Dec. 23, 2015 – Kumseh’a iman u Christmas hi adih lou hikha...

Dec. 23, 2015 – Kumseh’a iman u Christmas hi adih lou hikha hitam!!! By: Thangminlal Khongsai

171
0
SHARE

Kum ahung lhung kit tai. Tong le chol te dia kinepna lha “Ollha (Dec.)” ahung lhung’e. Chuto lhonin mitin kinepna “Chritmas” jong ahung nai tai. Ahin tulai khantou dungjui jin Christmas ngalal na ho, kinepna ho hi adai cheh cheh deu in aki lang e. Chugoh hilouvin eiho lah jenga jong Chritmas kiman hi bible toh kikal a sei jong aki umda tapoi. Vangset umtahin Pathen tahsan cheh hijong leuhen tahsan dan chom chom inei tauve. Pathen oi kihe cheh jong leh tahsan na’a chena lhongpi jong achom cheh ineiyui. Christmas chungchang jenga jong tahsan dan jat chom chom inei tauve. Bible a Chrsitmas man ding thu aki sei poi. Christmas hi pathen helou hoa kon (pagan origin) kila son ahibouve. Chritmas tree, santa clause abona pathen helou ho chon le khan (pagan practices) ahi. Among mongin Christmas hi Babylon te chondan akon kila son ahi bouve, tia sei jong aki um da tapoi. Bible injong Christmas kiman aphatsah lou kicheh tahin aseiye, vetsah nan, Jeremiah. 10:2-4, “Pakaiyin hitin aseiye, “Namtin vaipiho lamlhah chu kihil them dauvin lang… Gammang la a thing phung…” Isaiah 44:14-15, “Aman Cedar thing ho chu aphuh lhun, kheng thing ham ganpi thing ham alhengin hiche chu gamchang thing ho…”
Chule Jeremiah 3:13, Thingna eng noi tin a na deichat jouse Gamdang mite laha…” tin asei yui. Atah mongin Christmas iman dan uhi Pathen hou lou ho chondan, um chan tamtah toh ikop tauve. Masanga Rome te Saturnilia tia kihe golnop/kumhei chu ni sagi (7 days), 17th to 24th December chan “kipana pe lhagao” (spirit of merriment) tin, chapang ho thilpeh le thil dang dang ho’a nomsa tahin ana mang jiuve. Phat ahung chechen ol ol’in hichu Christian masa hon Christmas joha man dingin ana khel doh uve. Thilpeh kipeh dan ho hi Rome te chondan khat ana hi; “Yule” hi masang Teutonic te hou um jing khat chu ahi. Khonungin, hichu Christian te laha ahung lut e. Hiche chondan chu 1555 kum in council in ana jahda in; ahin Reformation lai chun hichu thah sem phat in Christmas kiman na’a Christian lam joha ahin hei doh uve. Pathen helou (pagan) hon amanu tichu “candle vah”, “thing eng decoration” chuleh “thilpeh (gifts)” ho vel khu Christian ten jong ila son uve. Europen Sahlam, Celtic, Teutonic le Slavic geiya Christian ahung chal toh lhon in winter festival (phalbi golnop) chu holly (thingdo eng), mistletoe, Xmas tree, bonfires, le adang dang hung kimang cha pan ahi. Hiti chun namdang te chondan ho hi Christian te laha ahung lut e, adeh in Christmas kiman na’ah aha kilang deh e. Ahin eihon Chritmas iman teng uleh hiche ho dinga chu kimang ahi poi, milim doi ho gel louvin Pathen lamjoha kimang ahi joi. Vetsah nan, eiho hapta sunga nikho min ho jong hi Pagan ho pathen min/tahsan a kona kila son ahi. Thursday hi German te “keh (thunder god) pathen” min. Tuesday hi “Tiw” kiti “gaal pathen” (god of war). Chuleh Wednesday hi “Woden” kiti pathen, German te tahsan lentah khat ahi. Sunday le Monday hi “Nisa le Lha” houna toh kisam kai. Saturday hi “Saturnus” or “Saturn” a kona kila son, chuleh Friday hi “Fri” kiti “goddess of love” akon kila son ahi. Ahinla hiche ho jouse tahsan nale ajeh hohi tun akimang cha pon chuleh geljong aki gel doh peh poi. Vetsah nan, Friday nikho teng “Fri” goddess of love aki gelpoi. Saturday nin jong Saturn’s nikho’n jong aki gelpoi. Hibang a chu Christmas tradition jong chuti ma ahi. Min haptasunga nikho min ho leh Christmas jong masanga atahsan nau le anit dan bangin nit ta le, henge hichu adih lou ahi. Ahin hiche ho jouse chu koiman akigel pon hiche jeha jong chu kinit jong ahi tapoi. Sunday nibang chu Pathen hou na, Houin kaikhom, Ama thu kihil na nikho joh in aki mang jo bouve. Hibang chun thing phung kimang chun Christa, Pathen chapa tonsot hinna mihem te dia apeh thing a kon, hichu cross vetsah na ahung hijo tai (Rev.2:7; 22:2; 14). X-mas tree noiya thilpeh lim ki koi hochun, Pathenin eingailud jeh uva achapa changkhat eipeh u geldoh na jong ahi kit e. Chunga kisei Jeremiah leh Isaiah jong khu Christmas thutoh ki sam kai lou ahi. Hiche thing ho a kona chu milim sem’a hou chu adem nale gihsal na joh ahi. Milim doi hou chungchang thua kisei ahi joi. Jeremiah in chunga nisa, ahsi, lha etc. houho akon’a gihsal le gahna apeh, chuleh gam laha che a thing phuha hiche a kona milim or salim or thil lim dang dang sem a, hiche lim anga bohkhup a hou, lamhil ding, huhhing ding, leh phatthei boh chan na dinga tao chu agihsal joh ahi (Isaiah.44:14-17). Alang khata Khang masa miten Pathen thu dih tah joh chu ana man khel joh u ahi. Christmas chondan atam jo hi gollui Khanga Babylon te joh in tampi hi ama ho pathen houna chondan’a ana lah son joh u ahi. Ahin adih tah leh atah pa chu ana mankhel u ahi. Chuleh Christian ten Babylon te pathen hou dan le chondan alah u ahi tia kisei chu adih tahin Babylon te joh in Christian te, Bible a thu ho joh akaleh or adih louva ana man joh u ahi. Ajeh chu achon dan u le apathen hou dan ukhu Bible OT’a kona che khel ahidan u aki lange. (Vetsah nan, Genesis 3:15, numei nu chillhah a kon’a huhhing pu hung pen ding. Isaiah 7:14 Huhhingpu nungah theng a kona apen ding kitep. Bible mun tampin Messiah’a hinna chu thing (tree) vetsah na (symbol) aman chah. Genesis 2:9; 3:17, 22; Rev. 2:7; 22:2,14 hinna thingphung thu aseiye. Isaiah 4:2; 11:1; 60;21 Jerememiah 23:5; 33:15 leh Zechariah 3:8; 6:12 Pakaiya kona abah jamdoh chu Pathen natoh ahi dan asei). Hiche bible chang hohin Pakaiya kona hung jamdoh, atoi hung dondoh thingphung, Israelte le nam jouse dinga hin thing ahung hi di dan aseiye. New Testament lang ivet leh hiche hinna thingphung/hinthing chu Christa Jesu ah aki mui. Atil abul a Pathen ngaisah lou miho chu Satan in aman chaha ahi lou lam tah le ase lamtaha ana man chah sah joh ahi. Vetsah nan, Babylon te chondan khat “the mother-child cult” tia kihe ahou pen uchu achapa hilouvin anu joh ahi. Hiche hi Genesis 3:15 a Pathen thutep asuh setnau (distort) khat ahi. Hiche chondan abol lo na jeh pen tah uchu mihem in angaichat pen thutah (truth) le huhhingna ngaichat jal ahi. Adih lou lam tahin ana mong jong leu hiche hochun avetsah chu huhhingpu, tonsot hinna, numei nu son a kon’a Pathen thilpeh, van’a kona abah hung kailha, hiche ho lungput chu ahi. Hiche ho chu tahsan um lou tahin Pathen thugil chu alampi aho thou uve. Ahin Noah khanga twisang leta leiset kisuh mang thusim leh mihem chonset a alhah, etc. tobang chun chonset nan alon khum un, Pathen douna joh in abol jo tauve. Ahin alangkhat a adih lou lamtah hita jong le adoi ukhun adihpa (original) Pathen in ana peh pa lamjong anga thouve. Atil abul chun adihpa Pathen thu pa hi ana manu ahijong bailam tah ahi. Tulai eiho Chritmas man dan hin hiche pagan, Pathen helou ho chondan hole ajeh ho chu kiman saha, kiche pi lou ahi. Alangkhat a amahon ana suhset pau chu Pathen thu’a kona mimasa hon ana semtoh uva ana bol phat joh u ahi tai. Bible in atah mongin Christmas man ding asei poi (Ahung peng monge tivang kicheh tahin aseiye (Gen.3:15; Is.9:1-7; Micah 5:2; Matt.1-2; Lk.2).). Hijongleh, Christa lungsed na noiya chamlen ihi jehun, Christmas man na ding jong chamlhat na inei yui. Chujongleh Christmas manding Bible in asei lou bang in akiman hi ajah da na jong asei deh poi. Milim hou na’a saa kine chu ima aset na aum lou bang chun Christmas kiman na’a Xmas tree, gifts/presents, carols le decorations kibol hojong asetna ima a umpoi (Rom.14:22-23; 1Cor.4:4-8; 10:19). Ahin tulai in company ho leh offices ho titah louvin khosung vengsung jenga jong mi tampin jule sa’a party bolin amang tauve. Aki man lo na jeh huhhingpu pen chu agel pha pouve. Chapang ho jeng jong vonthah thah le thil thah thah, deiyin Huhhingpu hung pen thu mong mong aja kha ta hih uve. Hitobang hojoh chu ahi Pathen thun adei lou ho chu. Conclusion: Christmas kimang hi adihpoi natileh manda jengin, ahin amang ho seiset le muset vang bol hih in. Christmas tree, Santa Clause, gifts, decoration, etc., adih poi na ti le boldan, ahin Huhhingpu ahung pen monge ti vang sumil louvin mang in. Xmas tree, presents leh decorations ho bola pha na sah le phatahin bolin ahin Pathen helou (pagan) ho bol bangin boldan. Adeh in Christa Jesu nangle kei lhat doh dinga lei mihem a hung peng ahi tichu hejingin. Chuteng chu ho chu ahilchet na’a man thei ahi; vetsah nan,1) thingphung (tree) chun Pakai Jesun tonsot hinna thingpela eipeh dan u; 2) thilpeh (gifts), Pathenin ei ngailut jeh uva achapa changkhat eipeh dan u…etc. Chuleh Old Testament khanga Kalchuh Kut teng Israel ten achateu Pathen in thahhat taha Egypt gama kon’a ahin puidoh dan u ahil banguva chu, eihon jong iji, icha, isopi, loi le gol koma Pathen in chonset a kon’a eihung lhat doh diuva lei mihem’a ahung pen dan kihil na’a jong man thei ahi. Eima innsung le midang dinga ngailut vetsah na phat ajong mang thei ahi. Tunvang Kumseh’a Iman’u Christmas hi adehlou hikha hitam tia lungbuina umta loudin tahsan ahi! Christmas Mang Jouse; Christmas Chibai!

SHARE
Previous articleDec. 23, 2015
Next articleDec. 24, 2015