Dec. 20, 2015 – MIDDLE EAST GAM’A CHRISTIAN HO GAAL-MI LENPEN (ISIS)...

Dec. 20, 2015 – MIDDLE EAST GAM’A CHRISTIAN HO GAAL-MI LENPEN (ISIS) By: Thanglam Manlun NGV.

150
0
SHARE

Christmas niloupi ahung naitoh kilhon’in leiset chung’a cheng Christa nungjui Christian jousen Christmas a ding’a kigot’na ineicheh diu katahsan’in ahi. Hitia nang leh ken kinem tah le kipah tah’a Christmas ingaying laiyin Christa jalla isopiu Middle East gam’a cheng Christian hon lungmong thei louva ISIS Terrorist ho kichatna jeh’a gaal-jam leh kisel pum’a hinkho aman’u igelleh lainat aum’in ahi. ISIS KOI PHUDOH HAM : ISIS full form chu ISLAMIC STATE OF IRAG AND SYRIA tina ahi. Hiche Terrorist group hin phutdohpa min chu Abu Musab Al-zarqawi akitin, amahi  30th Oct, 1966 kum’a Jordan gam’a anapeng ahi. Hiche mipa hi aneova pat mikikhel seingailou chapang ahin, kum 17 alhin kum’in apan athisan tan ahi. Hiche’a pat chun High School asimlai angan louchang leh kham’na thei chi chom chom ne’a kingolsah pum’in lamsom dung’a mi-chang/michom’in ahung pang tan ahi. Hiti chun 1980 kum’in khamna theiya kingolsahna leh numei suse’a bolgim’na case jeh’in  Jail analut’in, Jail’a kon koima alhatdoh ding aumlou jeh’in kum 8 jou 1988 kum-min ahinlhadoh taovin ahi. Jail’a kon ahung potdoh jou 1989 kum’in Afghanistan gam’a Mujahideen lamkaiho kimupi din anachen ahin, phat chom khat jouvin Jordan lam jon’in akinung lekittan ahi.  Abu Musab Al-Zarqawi in “JIHAD” tichu houthu toh kimat’a Gaal-theng bolding lung-gel ahin neitan ahi. Hiti chun 1999 kum’in Afghanistan gam’a Terrorist training camp semdoh ding’in achen Osama Bin Ladin jong anakimu pin ahi. Ahin, Al-Qaeda jopding vang ana nompon ama changtum lung-gel’a gaal bolding anagel toh kilhon’in 1999 kum’in ISI tichu “ISLAMIC STATE OF IRAG” anaphut doh tan ahi. Ahin, athahat’na tah tah chu ana kilangdoh joupon ahi. Hiti chun phat ahung che chen Irag gam’a Taliban ho 2001 kum’a ahung lhuh phat’uvin Irag gam’ah analut tan, Irag gamsung’ah ISI (Islamic state of Irag) min’in naa ahintong tan ahileh athahat’na ahungsoh dohtan ahi. Hiti chun Irag gamsung’a allied force ho ahin kisatpin hitoh kilhon chun Muslim hon America te leh allied force ho akithopi lou diuvin  kholhang anasam’in ahi. Abu Musab Al-Zarqawi 2006 kum’in America te Air strike’in ana thitan, ama athijou vin Abu Bakar Al- Baghdadi in ama panmun chu ahin kheltan ahi. Baghdadi’in ahinkhel toh kilhon’in gam ahinkeh len’in Syria gamsung jong ahinlo tan ahileh ISI chu ISIS tichu (Islamic state of Irag and Syria) tin ahin khel tan ahi. Abu Bakar Al- Baghdadi in tuni chan’in ISIS alamkaijing tan ahi. ISIS DOI LE TUP : Muslim ho tahsan dungjuiyin leiset chung’a kivaihom’na dihpen chu “Caliphate” ahi. Hiche “Caliphate” hin government vaihopna hihen Sepai (Military) thanei’na hijong leh atuhding ahi. Hiche kivaipoh’na ding hi ahouvu Pathen Muhammad in gao-thu’a anaphon ahi tia tahsan’na aneiyu ahi. Hiche gao-thusei suhbulhit’na chu ISIS ahitai van-noi gamtin’a Muslim ho chung’a vaihom ding chuleh Muslim ho chungseh hilouva van-noi pumpi gaal’a bol ding ISIS vaihop’na noiya van-noi mite umsah ding tichu ISIS doile tup lenpen ahi. Hiti chun ISIS in van-noiya namjouse chung’a vaihom ding chu Muslim ho ihiuve, hijeh chun ihouvu Pathen Muhhamud gao-thusei suhbulhit’na ding’in ISIS hinjop’un tin van-noi gamtin’ah thu athethang jing’un ahileh Muslim aja asang’a sim’in niseh’in ISIS ajop jing’uve akitin ahi. Abu Bakar Al-Baghdadi in keihi “Caliph Ibrahim” tichu Muslim te leh leiset chung pumpi’a leng-vaihom ding chu kahitai tin akiphong tan ahi. ISIS HON CHRISTIAN HO ABOLGENTHEI NAU : Abu Bakar Al-Baghdadi in “Caliphate” kahitai ti’a akiphon toh kilhon’in hitihin thuphon aboltan ahi. Irag leh Syria gamsung’a cheng Christian hon akilhen diuvin thil nibou kakoiyin ahi. Hiteni chu ahileh 1. Islam hou ajopdiu 2. Islam hou jopnom louhon Kai apehdiu tichu Christian tahsan chu Sana, dangka, neile gouva akichohdiu ahi. Hiche thupeh juilou hochu achandiu thildang aumpon angong’u chemjam’a tanding tilou thildang aumpoi ti thupeh hi Feb. lha thurday ni’a munjou se’a anathe thang’u ahi. Hiche thupeh’a chun nikho nibou phat akipen hiteni chu ahileh Friday leh Saturday bou ahi. Saturday-ni kah’a Islam hou kajoptai tinom louhon Caliphate vaihopna gamsung adalhah ding adalhalou ho alol’u kitan ding ahi tin thuphon aboltan ahi. Hiche thuphon kibolna munpi chu northern Irag’a um Nineveh leh Syria gam’a khopi Raqqa’a anaki phong doh ahi. Irag leh Syria gamma um Christian ho ding’in hahsa lheh inte. Hiti chun phat kiteppeh phat aval phat’in ISIS Terrorist hon Christian ho ahon hon’in ahoikhom’un lungset’na beihel’in naosenho anu apa masang’ah alehsang’un Chemjam’in asattan’un, Nungah hoihoi alheng’un kichepna’n aneijun alungnau achimjou teng Chemjam’in asatlih jiuvin ahi. Chemjam’a asat’uva alel teng’u leh meipum mang chan ahon hon’in akaplih jiuvin ahi. Leiset thusim bu’a Hitler hatlaitah’a Jews ho asang sang anatha jou kum 70 jouvin ISIS hon tun leiset thusim’a mangtalou ding’in Christian ho niseh’in athat jing’un aja asang’a sim gaal-jam (refugee) asosah gamtau vin ahi. CHRISTIAN POPULATION NISEH’A KEMSUHJING: Irag gam leh Syria gamsung’a ISIS ho khan-gitlou’na hin niseh’in Christian population akemsuh sah jing’in ahi. 2011 kum’a Syria gam’a civil war kipat masang’a Syria gam’a Christian population chu 1.1 million tichu Lakh 10 val ahin, tun lakh 2 leh sang 50 tobang bou aumtan ahi. Syria gam’a Christian tam’na penchu Aleppo khopi ahi. Hiche mun’a hi kum 3/4 masang’a chu Christian Lakh 4 vel ana’um ahi. Ahin, tun sang 45 apat 65 kikah bou umtadin akiseiyin ahi. Irag gamsung’a Chritian population ahileh 1.2 million ahin Syria gam’a bang’in Irag gamsung’a jong  niseh’in Christian population akemsuh jing’in ahi. IRAG LEH SYRIA GAM’A CHRITIAN HO KANA AW : Aw…. Pakai hitobang hahsatna leh genthei’na dinmun’a kaumlaiyun eikitopi diu kangaichauvin ahi. Nathil bolthei na’n leiset mite chung’ah thu seiyin lang leiset hinkho’a eihuhdoh diu neihin solpeh’un. Aw… Pakai nachate kagenthei nau neihet peh’un, neikithopiuvin ti’a kahung taovu ahi. Kagam’uvah cham’na hinlen sah’in lang Namaicham (Hou-inn) sung’ah nangma vahchoina leh thangvah’na ding phat neipe kit tei teiyun. Vo…. Van-noiya Christian ho keihon jong nangho bang’in Christmas Kaman nom’uve, Kagam’uva kilena ding lampi neigot peh’un, Ka-inn uvah neipui kit’un lang hou-inn’ah Pakai Ann-theng neijonsah kit’un. IRAG LEH SYRIA GAM CHRISTIAN HO KITHOPI DING DAN: Sopi teho Van-noi miten Irag leh Syria gam’a Christian ho sum le pai nei le gouva akithopi jing lai’uva eiho imoh touthim ding’u ham? Chutiponte Christa’n nangho khat le khat kihu touvin ati hilouham! Nam vaicha genthei hijong leuhen Christian ichankhom piu Irag leh Syria gam’a um Christian ho kithopi na’n Christmas niloupi niteng houbung-mi kilungtoh tah’in taona beh’in kithopiu hite. Ajeh chu amahon Christmas aman theilou ding’u ahitan ahi. Hichu Christa nungjui Kuki nam-miten kithopina ipeh thei sun’u chu ahi. Achaina’n mi-dang kithopina ngah jing Christian hilouva mi-dang kithopi Christian ihicheh theina diuvin kihambol’u hite. Wish you Happy Christmas.