Dec. 20, 2015 – CHRISTMAS NANGAICHAT NA AJEH – By: Hegin Misao,...

Dec. 20, 2015 – CHRISTMAS NANGAICHAT NA AJEH – By: Hegin Misao, Asst. Pastor Thangkanphai Baptist Church, Saikul, Sadar Hills, Manipur

115
0
SHARE

Christmas ahung hiding toh kilhonin kipa golnop jatchom chom ho ibol pan tauvin, khat le khat ngailut thilpeh jong ikipeto uvin, hiche ho jouse hi aphamo poi. Ahinla, ipi jeh a Christmas hi iman uham ti ajeh hetchet angaiye. Ipidinga Christmas ingaichat uham? Christmas in eiho dinga ipi eibol peh uham? Christmas in eiho hinkho a ipi kikhelna aumsah em? Hiche ho donbutna hi nalungdong maithei ahi, ajeh chu Christmas ingaichat nau ajeh pen Genesis bung thum sunga anakisei masa chu ahi. Genesis bung 3 sunga hin mihem chonsetna a alhah lutna kipa umloutah thu akimun ahi. Adam le Eve chu Satan nin analhem lha hon tan, Pathen toh bahding lung ngaichat na ananei lhon tai. “Thingphung chu numei nu mitvet’in ahoi lheh jengin, akineh le mi achihsah ding jeh-in jong aducha cheh jenge. Hijeh chun numei nun theiga chu akilon anen, ajipa jong apen, aman jong anetai.”  (Genesis 3:6). Ahinla hiche theiga aneh jou hon chun amani kinepna bang asohdoh tapon, sagoh keova aum hon ahin kihetdoh hon tan, jum le ja ahin hetdoh hon seh hilouvin, Pathen toh kinaicha a umteni chun tunvang Pathen kichatna nasatah ahin nei hon tan, Pathen gaosap na achang hon tai. Leiset chunga thina ahung lut tan, chamkim na mun (Paradise) achun avela lut kit thei nading chu akiphal peh tapoi. Hitobanga malam a muthim le lunghem aum nungin, kinepna khat ahung umdoh e – hiche hi ahi Christmas thu ahung kiseipat na. Naosen khat hungpeng ding ama chun Satan chu ahin jo ding ahi tin Pathenin kitepna aneitai. Chule Gul (satan) koma hitin Pathenin aseitai, “Numei nu toh kakidousah a, ama chilhah le nang chilhah kigalto ding ahi. Ama chilhah pan nalu avoh chip’a, nangin akhotaljum nachuhpeh ding ahi,” (Gen. 3:15). Eve a kon achilhah in satan chunga galjona ahin neiding Pathenin kitepna ana neitan, hiche achilhah a akitepna hi Jesu chunga ahung guilhung tai. Nangma chonse nahim? Nahi a ahileh Christmas nangaicha e. Genesis bung 3 sunga kon hin Christmas ipi jeh a ingaichat uham ti aki muchen tai. Christmas hi suty muna ding, kipa golnop man nading le hou in kaikhom nading mai mai hilouvin, ichonset jeh uva Christmas hung um ahi. Genesis bung 3 sunga thilsoh khu ana umlou hile Christmas ingaichat loudiu ahi. Mihem in se le pha hetna dingin Pathen anatahsan le Christmas ingaichat loudiu ahi. Ilungsung uva Pathen douna inei ji jeh uva tunia jong Christmas ingaichat tah tah u ahi. Matthew in Christa pen thudol a hitin ana jih e, “Chapa khat ahinding, amin Jesu nasah ding ahi; ajeh chu amatah hin amite achonset’uva kona ahuhhing ding ahi,” (Mt. 1:21). Mihemten  ihinkho uva hin Pathen panpina ingaicha uvin, Pakai Pathenin hiche ingaichat uhi suhbulhit na dingin achapa ahinsol in, Lhagao Theng a konin nungah theng Mariam sunga patnin ahung pengtai. Hiche hi ahi Christmas! Chule, hiche jeh a hi Christmas iman dan u ikikhelsah u ngai ahi. Pakai Jesu leiset chunga nang le kei dinga ahung lona pen ihet utoh kilhonin tukum Christmas iman dan u jong kikhel sah tau hite. Tunin Christmas kipah le thanom tah a iman nadiu ajeh chu, chonsetna a thiding a ium laitah uva Jesu Christa jala kinepna le tonsot hinna inei jeh u ahi. Pathen douna a hinkho iman vanguva, ami lungset nale khotona ichan uva, ei umpi jingu (Immanuel) hi thil kidang tah le loupi tah ahi. Hijeh chun, tukum Christmas hi hoitho nale golnopna ho jouse sanga, Christa a kipana Christmas namanthei nadingin kigel lhahna neiyin.