Dec. 16, 2015 – GOLLUI CHONDAN LEH DANTHU HO GELDOH UTE ...

Dec. 16, 2015 – GOLLUI CHONDAN LEH DANTHU HO GELDOH UTE -Paotinchon Singson, Kaimai, President TKSU Churachandpur.

216
0
SHARE

Tulai ja khangthah Lekha them tahtah jong Ama Custom He lou tampi aum tan hiche ho chu ipi jeh ham kitile vannoi leiset khantou dung jui ahi kiti nopsel jeng di ahin Vannnoi leiset khantou manna eima Chondan khandan haimil nale suhmang nadi kin aum pon ahi hijehchun kenjong Pi le pu te Chon le khan chule nit dile nit lou di tia ana kipe ho kahin khol lele in kahin khol doh a kahin mu doh dan neokhat ana veu hite. NIKHO KIMANG MASAPEN: -Kumsung’a nikho kimang masa pen chu Semang Juneh ni ahi.Hiche ni hile khosunga Nupi jousen jubel adop khom’a Haosa semang pachong ho achep tholoi,adon tholoi uma ahi.Semang pan jukhon nom tah’a akidop ma koima don loijin tingam umlou,Hijeh’a chu paocham tuh’a kiseiji “Naki semang judop’e”kiti ji ahi. KHOJEH: -Khojeh hi khovel la dammo veiset alen teng khopumpi ding’a natset dalna ding’a Haosan khosam pa khojeh kinit ahi ti’a kholhang asap sahji’a JE kichang ji ahi,Lentah’a akibol le nisagi,Aneojep ahile nithum kinit ji ahi,Hiche khojeh kibol ni’a kon na koima kholche umtalouding,chule pam mijong khosung’a lut talouding ahi,Khojeh hi akibol teng le khosung’a meijouse kithat ding,mihem tilouva gancha ho jengjong jong uhpoh louding,chule ajing teng le meithah chu Haosapu in na thempu pa khut na kon’a kilah cheh ding bou ahi.Aki boldan,THIING,SAPHULIP,AITWI chule THINGTHU kisu hal’a hichu Thempun phui asapkhum’a kholai sung,Insung chule khomoul jinlampi jouse’a kithe thang’a ahi.chule amijat ding’a KANPOH chun an-chun dang chule SEL”LE Khi kimeh ho jouse chutoh khomoulla aga koidoh jiu ahi,Kan poh chun,An-chun hochu thilha ho neh ding,SELLE khi hochu alongman diuva kipedoh ji’a ahi,chule anamse hohi anam angai da nadiuva kibol ji. SAKHONIT:-Humpi Sapol aki kap bai le. Sakho nit akhitin umnit aki bole. Sakhonit nile koima agampot ngai poi, humpi, sahang to akiki toh jeng jenge atiuve INSUNGJEH:-Khojeh khosung dinga kibol bangin Insung khat jong dammo jalla kithoi akibolteng hiche insung chu thempun atep jat nikho chu insungjeh kimang ji ahi.Kot beng jet le veija theo hing, nahing hi kikhaija maljin lut ngai lou ahi. Theo aki khai sunga hi inneite vang itilou, Maljiin ahungle jesung kahiuve tia aseipeh diu,chutilouva jong theo kikhai amutengu le maljin dal la ahi. Chuti louvin maljin lut le akithoina chu moh hija ahitan, panna bei hiding ahi. Thempupan athenhonmasangin maljin alut ngai poi. Jesung ahi, aki ti. Khosung mi ima tilou ahi VAM NIT:-Khopi louhal jing nikho le khothingin Vamnit akinit nin ahi. Ajeh chu lou hal ni le Thilhaho akalih le athil ka se ho inkote ikitopi khah le aphapoi, ana tiu ahi. DAINIT: -Lou haljou ni 2 ni thum jou Daiphu jingle Dainit ahin, hichehi louma muchi phat na dinga khothing in Daiphu kimang ahi.Thempu ho alhang kihom’uva Loujatna Dai aphu diu ahi. Hiche ni hile Muchi jat jouse atu pat’u ahi. Nilhah teng Nupi ho alou va dai aphu peh houvin Thempu pa in na Bel Bing abuh uva Daiphu ju atiuva achep jiu ahi. Ajing nikho le koiman Loulai kichon ngai lou, mipin Dainit akitin inna aki um ji in ahi. SAAHNIT:-Thise aum le hoi koma gam thu hijong le akijah phat phat Umnit aki bol lin hi chu Saah nit aki tin, Satha,Galtha,Twi ja-thi,Thalla thi, Hemma thi, hitiho bang hi kinit na ahi. THISE:Tolthi gamthi jouse thise akitin, thise jouse lei tolla kivui ngailou, tollhanga kivuija ahin hiche ho chu Saah akinit nin Saah nitnile koima lou che, gamche, kholche aum ngaipoi. Anitlou le alouma abit theipoi, ama avangsei akiti. Saah kiti hi thise kisei na ahin Langgol la kipu ho tollhanga kivui thitwi kibuh lou ho ahiuvin,Tehse hon Vanchung langa Van gin thiplou hella Kongleng gin banga maojen juna ging khu amin Van cheng mao akitin Saah twi kichu jong akiti.Hiche khu athini a thitwi buhlou, Thitwi kipe lou ho twi kichu a ahi akiti. Nupiho hanse hon chapang a-el ella aum teng a Saah veil nahi, atiu khu Thipha a nathi lou ding ahi atinau kitamna a aman’u. THANGNANG PON JEM:-Thangnang pon jem hi nidang gollui lai ja chu midang’in ana khong ngai poi,Lenthang te chanu ho le Haosa chan bou akhon ngai ahi.Ajeh chu Gulpi jem ahin Lenthang pa chanun Gulpi kom’a nahoije,nangjong Haosa nahin keijong Haosa chanu kahin na jem kivet doh-inge nei vetsah in tia ana kithum doh ahin,Tuipi galla jong ana kipo ngai poi,ipoh dingle Thing (ginger)lhaibong a phikhum ma poh ding bou ahi,Achuti lou le Gulpin ala jeng jeng’e,Adeh in Twiso laile Twisoh akipal pi ngai poi ti hohi gollui jin phatah a ana jui ahi. GOLCHA KIVOP TOHSOI THU: -Golcha ni kivopna a khat josang gulchuh,satha thingkhe,twia thi atokhah lhonle ahingjoh chun athipa chu vocha khat in kosa henlang pon khatin tomhen. Agolpa chu aman atohkhah ahile tohsoi thua tan ding ahi.Ama sakap in agolpa atohkhah athi ahile sel khatin kosa henlang pon khatin tom hen.Thilou ahile akijenna man alang apeh ding Agolpa chu aman atokhah ahileh tohsoi thua tanding ahi.Ama sakap in agolpa atohkhah a thi ahile sel khat a akosa ding chule pon khatna atom ding ahi. KHOLJIN MI INNA VEISET ATOLE: -Koi hijong le akholjina a aveisit le alhunna ten adamna dia ajendu,adam phat le ain koten ten abeijat anungpeh dingu ahi.Thoi lou jenlouva akoiya athi le Haosan Jubel khata agap ding ahi. MOU DON DAAN: – Koi hijongle nungah khat mou dinga adeija adon nom le jubel atun masangin dongma (kingaipi)anei aneilou dohtoh masa hen,Midang jong donghen,Gol kaneipoi atia akidoh jou akipehjouva midang khat in alhai mangpi le alhaimangpi ten adongte chu selpi khat apeh dingu ahi. athu ala dongtoh louva jubel amohpoha min alhaimangpi ahile ima anehthei lou ding,chule Koi tabang tucha nupaa umsa achapan pat’a anakikhaokhi sa anakilhen sa khat mi chom khat in anu apa helouva anajollhah-a akichenpi le aputen man le loubeh a selpi khat aneh ding,chule atute chu phatea alhalhoa alhep ding,.Atute toh akitepna akiholna jouse asuhset peh jeh-a chu man leloubeh-a maithiman (sakhao selkhao sattan man)na selpi aneh ahi. Hichan hin ana nga phot u hitiu vin hichan aki seina a Seikhel Seival aumle Iki hil to joh diuvin iki tiem uvin ahi. Asim jousen Pi le Pu Chondan ihet nao punbe na ahi theina dingin Pathen in hiche Article hi phatthei boh tahen.