Dec. 14&15, 2015 – INDIA MITEN ITOBANG MIHO PACHATNA APEH UHAM? ...

Dec. 14&15, 2015 – INDIA MITEN ITOBANG MIHO PACHATNA APEH UHAM? By: Dr. Sir H. H Mate

165
0
SHARE

India hi Asia continent sung’a ding’a gam (country) lentah ahin, chule democracy a kivaipohna lah a jong gam lenpen khat ahi. Hiche India hin State jong 30 lang aneitan, asung’a cheng mihem jong hi vannoija mi tamna penna kisei China gam bantah a ahitai. India mite hi aching, athem atam lheh tan, gampam (foreign country) a natong le cheng jong tam tah ki um ahi. Chutkit leh, India gamsung’a cheng lekhathem mi (educationist) ho, chihgilna nei mi ho (scientists), khuolthem mi ho (engineers) chule adang lampang’a hetgilna neimiho hin ahetnao, achihnao, athepnao chule athil boltheinao va India gam le nampi a ding le vannoi huop ma mipi a ding’a na atoh uva, anatoh u hetdoh theija ahung um’a, atohdoh u mudoh-a ahung um’a chule, athilpeh doh u mipin aphat chuompi tengleh hitobang India mite hochu miching, mithem, gamvaipo, thilkhuol ho chule Society, Organization, Association, Industry, Institutechule adang dang hon pachatna peh ding’a lom ahitai atiteng’uleh atohna lampang’a chungnunna (excellence) aneina dungjuija, pachatna, hetpihna, tohphatman, kipaman apeh u ahibouvin ahi. India gamsung’a mi million hijat cheng lah a kipaman sangthei, pachatna muthei, tohphatman kisan thei mihi percentage in kiveleh 10% jong lhing lou hel ding ahi. Hiche lah a eimite ipan jing thei uhi ikipa diu ahin, aki pah thei lou, ahe thei lou mi jong i-um nalai uvin ahi. Pachat sang le til khou sang’a sot lhah ding le seiset ding guo mi kium nalai ahi. India gamma kolte (Hindu) hin nasatah a janna eipeh u chule mi nasah tah le kidang tah a eikoi ju ahin, eimite ding’a vang hi mingol, mi vaicha, kihoupi thei loupa soh doh kahi tai. Hiche hi ivet na ahileh midang te toh teding’a imalam jouse ah ilhasam nalai uve ti akimun ahi. Kithep sah hiu tin, kaching’e, kabol thei je, lekha themmmi kahi tijong leo hen achingloute, abol theiloute, athemloute ihinalai uve ti aphot chen soh kei ahi. Mihem khat na ipenna ahileh midang’in thil kidang atoh doh a, a mu-a, ahet doh thei leh iti atoh doh, amudoh, ahet doh thei ham tia kigella, kikhuolla, eiman jong mi dang in atoh doh, amudoh chule ahet doh tobang nga kipat doh a na toh ding, mudohna ding’a hol ding, het doh tei guot ding ahi. Hitobang bolthei michu minasa, tah chapa, tah chanu ahije. I kam’uva thu isei sei uva ipi kitong doh a, ipi kimu a, ipi kihe doh ding ham sopite. Kam kanei nai tia thu jeng bou manna thu sei hi thina, manna ahi. Thale jung, khut le keng, mit le lhoh sen ding, manding ahi bou vin ahi. Iman nom lou jeh uleh iman lou jeh uva mithase te ihiu ve. Themjilna (education) lampang’a lung lut mi nahi a, natong nahileh na profession na hi outstanding service, outstanding achievement & outstanding contribution for the progress and development of the society, nation, country and worldwide a ding’a tohdoh na nei tei na ding’a hi nadam sung’a sunle janna na natoh ngai ahi. Chutobang ma-a chu science& technology lampang hihenlang, literature lampang hihen, social work lam hihen, spiritual lam hihen, journalism lam hihen, field dang dang hijong leh na profession na chu gasotei na ding’a na natoh ngai ahi. Toh mai mai hilou ding, toh tah tah a toh ding ahije. Natoh ga ho chu nang male na nampia ding, nagamma ding ahibou vin ahi. Scope lientah nei puma na natoh louleh imacha hipon nate. Scope neocha natong miho chu koi ho ham itileh amading bou kigella, ama inchen sem doh na ding bou kigel ho khu ahiuve. Achenna gam India ding le vannoi/leiset (world/earth) khantou na ding’a thilpha tong doh ho avaicha pon ahi. Pathen in amaho ding jong aguong in ahi. Keivang chu cheh building’a jong ka cheng pon, sum jong kanei pon, hinlah Pathen in lung mong sella chenna ding inn eipeh a cheng kahin, kaki man chahna ding kham ma sum le pai eiguon pih ahin, avum-aval kadei poi. Kum 37 sung’a Literature & education lampang’a na kahin toh na-a hin kachim tai, aphatai kati ngai pon ahi. Kathi tokah a tong ding’a um kahi. Chule kum 37 sung’a Science& technology lampang’a na katoh na-a hin jong ahah e, ngatang’e kati naisaipon ahi. Kathi ni channa katoh ding ahi. Social work/service lampang’a na kahin toh kalse kum 30 ahitan, midang in tong tahen, kichol tang’e kati hih beh e. Mipi a ding’in thilpha toh ding le bol ding atam in, thi channa toh ding kati ahi. Jounalism lampang’a jong na kahin toh kalse kum 30 val ahitan, phatante kati pon ahi. Kathini channa lekha kasut ding newspapers, magazine ho-a kisoding ahi. Ka profession jouse hi det tah a kache pia, tohga muna tei ding’a katoh jeh a 1997 apatna katoh phatmaneihung kipe panna, tuni channa eikipe ahi. Kathi tokah a award kasan ding ahi kakihettan ahi.  Ajeh chu 1979 apatna kathi changeija na katoh ding ahije. Award thupi natiu kamu/kasan loulai ho jong eihung kipe thou thou ding ahi. Padma Shri, Padma Bhushan, Padma Vibhushan, Bharat Ratna, Lal Bahadur Shatri Award for Excellence in Academics, Nobel Prize chule adang dang ho jong kadam sung ahilou leh kathi nung leh India leh world in kanatoh thuguh ho ahin khuoldoh diu, ahetdoh thou thou diu, anop adao umlouva nam neocha hijong leng eipeh tei tei diu ahi. Vannoi jah imacha akiselguh a-um thei tapon, kiphuong doh thou thou ding ahije.   Eimiten neiseiset, neidem, nei nuisat sang’uvin, nei kipapiuvin, nei tilkhou leo chun miching nahi diu ahi. Keihi koi seisetna thase ding mi kahi poi, koidemma lunglha ding mi kahi poi, koi nuisat imading tilou mihem kahi. Kachena hi jangkei ja che a, kamasang’a hi obstruction umjong leh tumkeh jeng mi kahi. Hitia na katoh jeh a kolte le sapkangte tamtah jong thepna lam hihen, natoh doh na lam hihen, thildang dang hi jong leh kanuoija ka umsah, kachung’a kalensahlou ahi. Pathen toh kikhenlou, Pathen ging mi chule Pathen toh natong khom kahi jeh a hi Pathen in eipanpia, eitun ahin, mihem tun kahipoi.