Dec. 13, 2015 – LUNGGEL KAICHAVAI THEIHO By: Hegin Misao, Asst. Pastor...

Dec. 13, 2015 – LUNGGEL KAICHAVAI THEIHO By: Hegin Misao, Asst. Pastor Thangkanphai Baptist Church, Saikul, Sadar Hills, Manipur

121
0
SHARE

Malam nojing a idoi le itup khat jangpet a chejing ding itiji nauvin, ahinla lungthim lamang thei le eisuboi thei tampi aume. Abanin imachal jingna suhboijin ahung umjin eigeisang sah jiuve. Abang komleh ichena lampi dalha in lamchom le munchom ijon jiuve. Demas kitipa chu Pathenna kipetah leh natohna a Paul toh lolhing tah a malam nojing khat anahi e. Ahinla, nikhat chu Thessalonica anajon tan, Paul nung anajui tapon, ananung suntai. Ajeh chu leiset lung ngaichat naho in alungthim ana lamang tan ahi. “Ajeh chu Demas chun tulai vannoi hi angailutjeh-in eida-lhan, Thessalonica a achetai; Cres-cens chu Galatia lama achen, Titus ma Dalmatia lama achei.” (2 Tim. 4:10). Lot chu Abraham toh achekhom lhonin, Pathenin Abraham chu hetlouna gam jon dingin anaseipeh in ahi. Mun loupitah galdot in Lot chun Abraham chu anajui in ahi. Vadung pama leiphalai mun hochu Lot in avelel tan ahi. Hijeh hin adoi le atupna mun Pathen lunglam jotna chu amansah tan, ama lung ngai lam le chonsetna thangkol achun a-oh tan ahi. Ipi dinga ilunggel u kai chavai a umthei ham? Ajeh chu imalam a umchu eima lungdei leh thanopna tah ahiji loujeh ahi. Lhagao lam hinkho a doi le tup inei uleh, Pathen toh ikijop matna suhhat ding, amin mai mai hilouva, dongcha hilouva thuhtah joh hisah angaiye. Chutileh Pathen toh kiloikhomna inei’u nop isah theidiu ahi. Pathen toh ikiguijop matna suhhat jinga atah hisah a, Pathen toh kiloikhomna suh bulhit ding ahi. Pathen toh kiloikhomna akhantou teng Pathen’a kona chamna chu kinei ding ahi. Hiche hohi lhagao lam’a kivaihomna jui mai mai le toh mai mai’in kimolso jou ponte. Pathen toh ikiloikhomna a kona aga hochu eiho hinkho a kona miten amudoh thei’u ngai ahi. Pathen lam ivet jing nau leh Pathen toh ikiloikhomna ihatsah uva, dettah a ikoi uva ahileh satan injong ilunggel’u kai chavai thei pontin, sum le pai, thaneina, imi hina leh lei lung ngaina, mit deichat leh kiletsahna hinkho in ilunggel kai chavai thei ponte. Jesu Christa lam jeng veleu hen ilunggel’u kai chavai theiho a kona ihoidoh dingu ahi.