Dec. 12, 2015 – MIHEM NATOH ACHUOM CHEH AHI. By: Dr. Sir...

Dec. 12, 2015 – MIHEM NATOH ACHUOM CHEH AHI. By: Dr. Sir H. H. Mate.

275
0
SHARE

Natoh (work) kiti hi leiset chung’a mi jouse a kibang sohkei ahipoi. Mi konkhat chu lou natoh lammah athem’in ahi. Konkhat chu insah, leido kiti ho-a athem in ahi. Abangchu mihil lammah athem in, abangchu vaihon lam le thutan na lamma them a-umme. Mi konkhat chu music lam, lasah lam mahathem kitne. Abang khatchu lekha sutlamma athem me, khuolgilna (research) lampang’a athem me. Mi konkhat chu khuttumma kisuhna (boxing) lammah athem in, abang chu kibotna (wrestling) lammah athem me. Abangchu kinahna lam le kivenna lam (martial arts) pang’a athemme. Mihem hi Pathen in akivahna theiding’a thibol theina khat or ni apehcheh ahi. Amangcha them teding’a gasona ahin, amangcha thei loute ding’a mangthahna le thina ahi. Mihem khatchun Pathen in apeh thil boltheina anei hi akihet masat pen ding, amanchahna ding dolla amanchah ngai ahi. Ahilou lamma ithepna le ithil boltheina ho imanchah khah le thina ahiloule manthahna sohthei ahi. Tulaija mipa le gollhang alam vai ho hihen, minu le nungah alam vaiho hin athepnao le athil bolthei nao aman chahkhel jeh uva lamvai uva, chavai den ahiuve. Midang’in iti agel ding vang kathei pon, keivang chun pasal hihen numei hijongleh lunggim jeh a ju le sa-a kibol hohi alhoh vat thim ahiuve kati ahi. Ajehchu ilung agimma ahileh lungmuon na eipethei Pathen hingjing bel ding, aheng’a tao ding ahi. Judon na lunggim, lung khamna ho beithei lou ahi ti akihet diu ahi. Pathen houjing ding joh ahi. Eima tahsa le lhagao hinkho suh boilou ding, Pathen joh ha kouva kouding ahi. Itahsao jongei ho kisem ahipoi. Aboncha Pathen na ahi het ding, eima lunggella chon louhel ding ahi.
Veuvin sopite, vannoija miching, mithem, mipontho hon ju akisuh boisah pon ahi. Ju a lop hole numeija kitahlou ho hi mithase ho, lhoh vat thim ho hinte tin kagel lin ahi. Aching hon ase-apha ahekhen in, aphalou ho-a akisuh boh nompoi. Tulaija vannoija pasal hihen, numei hi jongleh jon thanhoina lamma hinkho mang’a sumkol vei hohi mithase, akhonung ding kimu theilou, hinkho manlut dan hetheilou ho ahiuve. Eimite hi 99% Christian ihi taovin hinlah hitobang’a hinkho mang mi umda ahipoi. Tuhinkho ding bou gella, khonung ding hinkho gel phalou ho hi michavai, avatthim ahiti akalah ahi. Nikho khatleh Pathen in Christian hihen non-Christian hi jongleh achungthu atan nikho hung lhung teitei ding ahi. Koi man seihih jong le mihem amacheh in achonna jouse aki phuondoh nikho hung lhung ding ahi. Hiti ahijeh a chingthei tah a hinkho man ding ahije, sopi teho. Pathen ’in hetna le chihna chule thil boltheina nape h chu ama lou pina ding’in mang le chun leisetna jong mivangpha chule vanna jong mivang pha nahi ding ahi. Mihem in itohtheina, ithepna hi ihetdoh louva ahileh ipi kibol jongleh kilolh ing joulou ahi. Amavang ithepna le ithil bol theina hi adoltah a thoh hat pumma iman khahle kilolhing teitei ahi. Boltheina kiti hi aphalam boltheina a-um’in, aselam boltheina jong a-umme. Apha bolten agapha amudiu, ase bolten ase akimu tei tei diu ahi. Mihem ten inatoh u achuom cheh ahi dung juija itohnaova hi potthona le gunchuna neiding, midang natoh theina ho chu seiset louding, eima natohna bou kiboipi ding ahi.