Dec. 11, 2015 – THALCHOI DALHAH PHAT AHITAI By: Misao Hejang...

Dec. 11, 2015 – THALCHOI DALHAH PHAT AHITAI By: Misao Hejang Hangmi

187
0
SHARE

Kuki kahi tiphot mikhat ki thang’at napen le apaome pi jing khat chu kapu kapa gaal hang te, nangho noise thei kahi ham. Hiche kiletsahpi najallin pasal atamjon meithal dop dingbou thanopna le lungtupna ina neiyun, mitoh kinah ding jong bolthei natah in ina lauvin ahi. Ipu ipa teu pasal khat hina a ana kithang’at piu chu asa kapdoh jat, a thang (trap) kamdoh jat, alou vaat doh jat, chule gancha avahdoh jat ahi. Vangset umtah chu tua khangdong hon bolthei natah le letna tah a alah uchu……….. kadondoh hai(bottle) hijat, mi hijat toh kakidel, numei hijat kaheldoh, numei hijat toh ………. (he jengu’te). Jachat umtah chu iphatlou nau jouse kithang’at na a ineiyu hi ahi. Hitobang bollou pasal khat chu apasal loudanna kigel. Kidah umtah chu numei honjong hitobang bollou ho chu pasal lou danna gelkit. Khang khat chun thagum in mi ana kibollin hijeh chun thahat te gaalkap themte, gaal haang te chu mi gin le ja ana changun ahi. Khang chedung juiyin leiset ahung kikhel toupeh in ahi. Phat khat chun hiem le thal ana thahat penin, ahin tukhang hin lungthim chihna a kivaihop khang ahung hiphat in pen thahat na khang chu ahitan ahi. Khang kikhel dungjuiya eiho jong kikhel phat chu ahitan ahi. Dihtah a ipu ipa teu hatna le haan na ikithang’at piu va ahile eiho jong akhangtoh kitoh a ihat’a chule ihaan’u angaiyin ahi. Achuti louva ahile tua sanga ahung lhung ding khang’a mi chutpha le notthap ihitei tei diu ahi. Tahchapa, tahchanu kahi nati le anoiya chenghi nanu se angaiyin ahi: 1. Moh kichang vahchoi……. ..ajeh chu ipu ipateu ana kimoh chang vahchoiji pouve. Tohdoh boldoh na chunga ana kivahchoiji bouvin ahi) 2. Thaset ……………ipu ipa teuvin mithase kiti phot ana munom pouve. (Thaset hi chonset bulpi ahi. Tukhang khangdong ho thasetna pen hi lekha sim ahi. Hijeh hin nampi khonung ding athim in ahi) 3. Kitah louna…….. ipu ipa teuvin akamcheng ana chepiu vin, bollou ding thuchang kamcheng ana potsahji pouve. Numei pasal kingaina chung changa jong ana kitah uvin ahi. 4. Thalchoi ……… ipu ipa teuvin hiem le thal in michung’a vai ana hom un, eihon hem le thal dalhah a pen a vaihop nading lungput ineiyu ngai ahitai. 5. Pathen ngaisah lou……….. Christian ana hilouvangun ipu ipa teuvin chunngmang Pathen ana ngaisah un, ahouvu pathen ana gingun ahi. Tukhang eiho ivang phauvin Christian ihitauvin ahin Pathen ngaisah le ginna lam’a ipu ipateu ipha pouve. Pathen panlouna a ima apha, ahoi, alhing aumpoi. Ipu ipa teuvin eiho kithang’at nading anaboldoh tauvin. Tukhang eihon khangkit a ho kithang’at nading ipi iboldoh uva pha ham. Themkhat ana veu hite: 1. Lekha thepna lam’: Leiset kivaihomna hi policies semhoa pat ahi. Policy semho chu hiem le thal choiho ahipon ahin pen choiho joh ahi. Kuki nam thal choi itam chan’uva minoiya umding tina ahi. Tun jong eihon thalchoi kiletsah natah a inei laiyun ichenkhompi hon pen in igam’u akaimang gamtauvin ahi. 2. Sumkol vei lam’: Economy hoi gam/nam chu thunei le vaihom in apang in ahi. USA in vannoi apohtheina jong ecnonomy lam’a midang jouse sanga ahoijeh ahi. Economy ahoiteng thildang jouse ahoisa tobang ahi. Thing leiya kumlhunga ikithai uva kumlhunga nehding jong kimu lou chule gam jong kisuse. Hiche sanga chu sumkol veina (business) lam joh a inchen semding ngaito phat ahitai. Eiho thinglei bolsangin kol khat in lampi panga kuwa ajoh ainchenpi jon ahi. Sum muna dia natoh kijapi lou ding ahi. 3. Pathen ngaisah nam: Leiset hi Pathen in asem’a chu phatthei anaboh a Gou kiselguh tamtah akoi ahi. Hiche gou kiselguh holdoh theina le mudoh theina hi Ama gingte le ngaisah te apeh ahi. Hijeh a chu Kuki nam kiledoh nading adanga aumpoi Pathen tilou. Pathen in Bible a namasanga thina le hinna kakoipeh e hoiche pen nakilhen ding ham ati bangin. Tun jong eiho masanga thina le hinna aumme. Hoiche pen ikilhen diu ham? Phatlouna, gitlouna ikilhen diu ham ahilou le lekhathep, sumkolvei themna chule Pathen ngaisah ikilhen diu ham? “The CHOICE is ours’. Our today’s CHOICE will decide our tomorrow”.