(Dec.1, 2015) HOU TOH POLITICS – By: H. Japan Eimi KMC Ward...

(Dec.1, 2015) HOU TOH POLITICS – By: H. Japan Eimi KMC Ward No. 6., (rolandhangs@gmail.com)

298
0
SHARE

HOU, (Sakho) Leiset chung mitamdan (POPULATION) hi 7 Billion (700 crore) lang epha taovin, ham le pao (Language) jong sang gup (6000) la aummin ahi. Chule hou (Sakho) jeng jong ajat sim sen lou a um kitnin, min ama ama tahsan le chepi khat chu gun chu tah leh kitah tah in ahou kit uvin athipi ngap chat kit uve. Leiset chunga hou lah’a alen cheh leh het thei pen thum(3) ho tahsan dan leh chepi chomcha2 gah sei uhite.

HINDU TE TAHSAN: thi jouva thah pen kit RE-INCARNATION: Michonpha, miki tah ngailutna nei, nu thu pa thu ngai mipha khat chu thi jongleh mi-thupi ahilouleh mi haosatah insung khat nin ahung peng kit in ahi. Amavang migi lou/miphalou ngailutna neilou a mihem chanpi khat jong mihem’a gellou, mi kilet sah, mi hoitho, hitobang mi chu thi jong leh Bong le loi ham, gancha dang ham khat nin ahung peng kit in ahi louleh mihem’a ahung pen kit jong leh mitcho elbai ham ahilou leh migenthei tah khat insung khat in ahung peng kit in ahi ti atahsan u ahi.

SAI BABA: god man, tia jong akou leu pao jong chu HINDU te pathen anathi khat hung thah pen kit ahi atiu ahi. SAI BABA chun 2030 teng le bou kathi ding ahi anatin ahinlah anung jui hon 2007 kum chun Hyderabad khopi ah ana vuidoh tauve. SAI BABA chu eiho Christa nung jui Christian hou tahsan leh jui mi ana hi kha leh vangam teng Lal lukhuh ejat ana san da tadem. SAI BABA chu gam (Country) somgup (60) ma konna anung jui 6 Million (60 Lakh) hon pathen khat ahi tia ahou u ahi.

MUSLIM HO TAHSAN: Abraham chapa Ismeal chi lhah ho tulaiya vannoi muntin suboi le hotling ho aphung gol jouseu toh kidou to’a hung khosa ho chu ahi tauve. (Genesis 16:11.12.) 15 century lai vel chun Prophet Mohammad chu Mecca khopi (Saudi Arabia) ah anagao chang in ahi. Hiche agao channa a mu anei na’a chun van le lei kikah ahin meikong lenpi tah khat ana um in ahi. Koitobang Muslim nungah gollhang numei pasal hijong leh leiset chunga Muslim ho thunei theina ding leh  vaipoh/vaihop thei na dinga gal theng (JIHAD) na thi jouse chu, hiche meikonga chun umpa talouvin vangam alhung pai jiu vin ahi. VANGAM alhun teng u le chun nungah ahi leh gollhang hon ana welcome jiuvin, gollhang ahiuleh nungah hon ana welcome jiu vin, vangam achun nomtah in hinkho amang khom ji taove. Ahin JIHAD na thi lou jouse chu vangam lhung talouvin hiche meikonga chun aum den ji tai atiuvin ahi. Ahin Muslim ho jong hin vannoi muntin alo uva leiset chunga gam(Country) haopen ahi vang uvin koi te ham khat kisei tobang nga aphung aphunga kikhen te ahi kit jeh uvin hiche jong hi Muslim jousen apom thei deh kit pouve.

CHRISTIAN HO TAHSAN: Christian eti teng koi jat koi nam umlou, Christa nungjui leh tahsan jouse chu Christian kiti jeng ahi. Mihem tamdan (POPULATION) jong leist chunga dinga ani channa Muslim ho bantah ehiuve. Ahin etahsan khat jong leh chena lhongpi kibang lou Denomination tamtah ium kit uvin ahi. Eiho Thadou-Kuki te jong hi Christa nung jui Christian hou tahsan leh jui te chu ehi tauve. Christian ho tahsan le chepi chu seitam di jong um behseh lou eihon eki het jeng diu tahsan aum in ahi. Mun dang gam dang jong ti da jeng utin, eiho Manipur context a sei dingin Christian hi Naga le Kuki ehi jeng uve. Ahileh e Pathen houdan uleh etahsan dan ujong hi kibang lou ngap hitam? Vetsan na in, Mi masa Adam chateni CAIN LEH ABEL chun, Pumgo thilto Maicham ahin sem cheh cheh lhon tan ahi. Ahin Pathen in CAIN maicham sanpeh talouvin ABEL maicham joh asan peh tan ahi. Genesis: 4:4.

NAGA TE DINMUN : Vangam lut le lutlou ding pa chu thu chom ahitan, koima akisei thei akium pon ahi. Ahin Naga te hi evet leh Leiset na dinga jong phatthei achanna khat uhi paole ham kibang jong hilou’u, kho khat le kho khat jong apao kibang lou, Labu le Bible jong Meilhei paova aman kit uahi nalai ye. Ahin Naga’a ahung kipum khat thei nao hi ahi. Alah uva kingailut naleh kitahna aum thei jeh’a hung kipum khat thei yu ahi. Hou lang jong evet leh eiho tobang bang in kiloikhomna (DENOMINATION) akhuti tam lom lom pon ahi. Tangkhul Baptist Church, Mao Baptist Church, adang dang ati tho jeng uvin ahi. Hou thu lang in jong ahung kipum khat thei jun ahileh Social, Politics langa jong hung kipumkhat thei ahiuve. Eiho M.P. Minister, MLA, MDC, thingnoi gam noi to jong amaho’a kibang lou, Government natong/Officer/Hounatong jong kibang lou chule Mipi jong kikibang lou ahi. Amahon ahina cheh uleh anatoh na cheh uva konna jong kipum khat tah’a anampiu na ahin toh sohkei thei jeh uva hat uva, machal uva, migin mija hung chang uva NAGALAND STATE titah louva jong Manipur’a Hill District li (4) atou pha kit u ahitai. Hiche jeh achu Pu. Rishang Keishing in Manipur CM anahi lai chun Naga te hi aneopen apatna alenpen gei’a NSCN kahi jeng u ahi tia hangsan tah’a ana sei jeng ahi. KUKI te jong anepen akipat alenpen gei’a EPIHAM khat ehi teng uleh GAMTUM kinei hih lai jong leh Koima noise vang kihi deh tapon te.

EIHO DINMUN: Kei mingol mitanang chihna hetna neilou pen hijong leng tulanga eimi te edin mun’u hi koima dem tum/ got tum na ahipon kamu dan chomcha leh kahet dan hin sei ing’e. I.Corinth. bung 13 sung chu evet leh kingailutna thu jeng aki sei jin ahi, Vantil paovin thu sei jong lechun ngailutna naneilou leh sum eng kivo ging bep ahi dan aki sei jin ahi. Ngailutna kiti thucheng hi Bible la jong agil pen tha thucheng ahi. Ahileh e Pathen hou nao hong sung jeng nga jong kingailut na’a kivaipoh.kivaihop aum ta pon ahi. TITLE le POSITION chule Hao le Vai jin eki ve gam taovin ahi. Government natoh Service neilou meithai chaga nulou palou ho jeng jong mihem danna kigel talou, Mivai cha, migenthei ho Hopsom, Maicham hinpeh jeng jong Hopsomma kigel peh talou ahi, ahao/Govt. Service neiho hopsom hinpeh ho bou, Pathen kom lhung didanna bou kigel ta, hiche hi hoilang vang le phattheina ba echan diu ham? Thingnoi, gamnoi, nuthu pathu ngailou ho kiloikhom na group somthum (30) lang epha tauve eti jing uchu alhom nalai ahi. Labu Bible eki choi uva Pathen hing Khat seh e hou khom naova bon kholen dom dom ho’a Houin nga le gup etc, aum thei leh, thal choi ho chu oimo thei beh seh ahipoi. Mathew :6:33 a kisei bang in amasa tah in e Pathen hou nao sung beh ahin kingailut na in kivai po/kivai hom masa tadi leu hen vang Social,Politics, lang jong kingailutna hung um jep intin ehung kilung khat dom diu ham kati. Masang laija Israel leng teho jong chu, a Pathen hou dan ujoh ahung kisuh dih teng uleh bou Pathen alung lhai jin, ajet avei uva amelma teu, milim houho khutna konnin ana huh doh jin ahi. Leiset chunga Rapture masapen chu SODOM LE GOMMORAH anahi. Pathen in Abraham jah achun, Keiman Sodom le Gommorah khopi sunga khu Pathen he mikitah, midih, ngailut na nei mi somnga kamu doh leh sumang ponge ana ti ahi. Mi somnga malah in misom jong akimu lou phat in ana sumang tan ahi. Tunin jong Pathein in nanam sung uva hi Midih, Pathen he, ngailutna nei mi somnga (50) na um pou pou uleh leiset thunei vaipo, Govt. milim hou ho khutna konna kahuh doh di nahiuve ehin ti taleu etobang din mun ehi tadiuvem? Tukhang phat che dan hi evet leh Noah in kong asui jou kon lang tobang phat chu ahitan ahi. Kitah tah leh thudih tah’a ulsa long’a tucha,belcha,chempong kichoi ya sum hol ho khu mingol dannin bou emu tauvin ahi. Ahin Jeep le Car a touva joule nalla sum hol, Development sum tam tah tah nemang ho khu mi ching, mibol thei dannin bou emu taovin ahi. Noah mingol pa chun nichaang sat laitah in kong ana ki sui jin, miching hon ana nui sat uvin ahi. Ahin twisang ahung let phat chun mingol pa asoh cha in miching, mithem, milen milal, mithupi ho aki chai gam taovin ahi. Thupi kitan nikho chuleh vannoi nopsah na’a hinkho mang ho Pathen hepha lou hel ho thu kitan talou ding ahi tai. Ama ho thu chu tansa hi tan tin, tan ding jong um talou ahi. Ache na diu chu gotsa hitan tin, ahin Houbung thu joh hung kitan ding ahi. KELNGOI LEH KELTAH. Matthew. 25:33-34.

POLITICS: Politics eti teng tahsa thu lang, leiset kivaipoh, kivaihop (administration) thu le la ti ding hitan tin, Hou eti teng Pathen thu / lhagao thu lang tina ahi kit jeng in ahi. Mi tam tah in hou toh Politics hi kikal ahi, ache khom thei poi. Hou natong Hou Lamkai khat chu gam sung thu/ Social Politics in kikum da jeng hen. Ahilouleh gamsung natong/nam natong khat chu Hou thu langin kikum da jeng hen ti ngaidan tampi sei loi jong aumin ahi. Hou toh Politics hi kikal ahileh Pathen deilou jouse/Bible thu toh kitoh lou jouse jong hi Hou toh kikal hijeng lou diham. Nitin hinkho’a eki man chah nau elung thim, elunggel jouse jong hi atamjo Pathen deilou, Bible thu toh kitoh lou jong atam ding tahsan aumme. Leiset kivaipoh/kivai hop (administration) jong hi Pathen hin phu doh ahi bouve. Mijouse hi hou khat cheh toh politics toh hung pen tha cheh ahi. Mikhat chun Politics kahepoi, kabol poi ti jong leh Hou toh Politics toh kipen tha soh kei ahi. Pathen in Mihem ahin sem achun leiset leinganna konnin ama lim le mel bangin ahin sem tai, ahin leiset chu tahsa phe mai mai bou ahi nalai jin, ahinna aum thei pon ahi. Chuin ahinna thei dingin “Hinna Hu” lhagao ahin khum peh tan ahileh, tahsa le lhagao ahung kijop mat phat chun mihing khat ahung hitai. Tahsa hin kisem masah’a abanna lhagao hin ki khum peh ahijeh chun mihem khat chun ahung penna kipat lhagao thu sangin tahsa thu ahin he masa jon ahi. Chule mihem khat chu ahung pen lhah’a thilse thil pha ahin het khenna deile deilou ahin nei thei ja kipat ama chu politics a lut pan ahitai. Ima jouse hi insung ngenna hung kipan ahi jeh in, insung politics jonghi asang loi ahi bouve. Tua tahsa’a inchen louchen ekisem thei uva Pathen jong phate cha eki hou thei uhi leiset thunei vaipo Govt. Politician ho khut noija eum uva Pathen jong eki hou thei uahi. Pakai Jesu jong leiset na analen lai chun leiset thunei vaipo ho khut noija um ding dan ana sei jin ahi. “CEASAR LA CHU CEASAR PEU VIN LANG PATHEN A CHU PATHEN PEU VIN ANATI”. Tahsa’a inchen lou chen ekisem nao, sum le pai eki hol nao, gamsung na, nam sung na etoh nao hijong leh kitah tah leh ngailutna neitah’a etoh uleh Pathen natong hi thou thou ahi. Hou natong/houlamkai kitahlou, ngailutna nei lou ho sanga gamsung natong nam natong kitahna nei le ngailutna nei chu Pathen natong jo ahi. Ahin hou toh politics kikah ahin akhoh tah khat aum in ahi. Hichu a balance peh toh/lep toh ahi. Hiche teni hi kitoh chetna che khom sah ngai ahi. Vetsahnan, Electric wire (Mei) sunga khun akhao jang ni ache khom in ahi, khat khu Minus (-) ahin khat khu (+) ahi, Minus pa khu politics, tahsa lang thu ti tao tin, Plus pa khu hou thu/lhagao lam thu ti kit tao hite, a Bulb pa khu mihem tikit tao te, hiche Electric wire chekhom teni khu khat joh sang khu kila doh taleh a bulb khu avah nadem? Tahsa hinkho enei sung uva hin hou/lhagao thu chule politics tahsa thu teni hi hi kikhen thei lou/alou thei lou chekhom pi jing ahi. Ethi teng ule vang hou toh politics jong kikhen tan tin chule tahsa lhagao jong kikhen bep di ahibouve.

PATHEN, GINGMI, POLITICIAN MINTHANG HO: leiset chung politics bol masapen chu Mose anahin Pathen in chihna thepna thil het khen theina apeh’a Egypt te thepna, hetna jouse ahin het soh kei phat na Movement ahin pat ahi.

2). Communist gam lentah, thunei tah USSR tel jeng junga hin lha jeng MIKHAEL GORBACHEV chu USSR President ahung kaidoh doh chun tunin, communist kajou tai anatin ahi. Pathen ging mitah, Pathen toh kinai cha hinkho mang jing mi ana hidan ahe. USSR political leader lentah Pa pi chu.

3). INDIA  sunga dinga jong top 10 politician holah’a asagi (7) chenna a ana jao pha Pi. INDIRA GANDHI jong Congress sunga dinga jong ana kison pi loi jong chule Manipur CM nivei anahi kha Pu. RISHANG KEISHING chu CM ana hi lai chun khat vei a Ministry ahung boi tan ahi. Meilhei Minister ho jah achun Nanghon e neilo diu ham kei Pathen hing hou kahi ana ti peh in ahi.

4). MIZO SUPER COP tia jong kisei IPS Officer T. Sangliana, chu anatoh namun KOLGAM jenga jong, kitah tha leh ngailutna neitah’a thudih tah’a na atoh jeh in Member of Parliament MP geijin ana kai doh in ahi. Kitah naleh ngailutna hin hoilai hijong leh mun anei je ti akilangin ahi. Insung kivaipoh/kivaihop kitoh lou teng Insung jong anom pon, Pathen jong lung lhai sellin aki hou thei pon ahi. Gam sung nam sung aboi eng jong leh, kipah tah in Pathen aki hou thei pon ahi. Tuchung CCPUR a esopiu mikoh (9) thina jeng jong hi politics sang pen nam sung gam sung thu ahi tan ahi. Keiho Christian te Pathen hing houte politics kabol pouve/kahepouve tiu tin donda taleo hen Pathen kipah tah in lung mong sellin ehou thei nadiu vem? Politics theng tah leh kitah tah’a bol chu hou toh aki kal na aum poi. Asopi ngailu lou, ajat anam ngailu lou chun Pathen kangailui ti jong leh jou ahi. 1 John. 4:20. Tuchung Ccpur thilsoh hi egel leh Pathen in tu ninunung ngailut na khang kilah doh kon beh ahin Kuki te hi ahung kipum khat dom thei khat uleh eihin tiu jong himai thei tan tin Pathen lungset na kipumkhat theina lampi ahung um doh thei khat leh eiho Thadou Speaking hohin lamkai chu tun tun bolda thei leo hen dei aum lheh’e. Centre a UPA in vai anapoh ali chun Pi. SONIA LEH achapa RAHUL chun PM chan gei hijong leh adei lhon leh anatuh thei lhon ahi, ahinlah amanin Lamkai achu tun tun lhon pon midang joh  anahoppeh lhon jon ahi. Ahinlah amani thusah louva nakitong thil kibol ema cha ana um deh pon ahi. Politics le hou hi kikal ahi a chekhom thei lou ahileh mihem khat chu eti aki hing thei tadem? Hiche teni kitoh chetna che khomsah thei, Balance kitoh chetna chekhom thei sah pa chu miching, chihna le thil het khen theina nei mi ahi.  Job.29:29 . hou toh politics hi kikal ahi etiu leh ISRAEL te dinmun khu eti ding tam? Society sunga kivaipoh/kivaihop (administration) kitup louna chu loi hon bong hon angat ngat na langa lhai ahi bouve. Tulai eimi society eha boinao pen tah chu “administration” kivaipoh/kivaihop dan ethep lou jeh’u  ahi penne. Nikhat Lamka langa konnin bus khat na hin eimi nupi khat toh kahung tou khom lhonnin ahileh, Boi koi kho nahim ahin tin, kasei tan ahi, naphung min epi ham ahin ti kit tan ahi, Heno, eini eimi cheh cheh ehi chu la em kati leh, hilou pi naphung min ahin tikit tan ahi, kei jong kalung thim atong kha tennin, Heno kei hi chilhah gui lhah jong neilou, phung le chang jong neilou “MELCHIZADEK” tobang kahi kati peh leh apao tapon ahi. Lamka a pat Imphal chan chu kihou louvin kahung tou khom peh lhonnin avel la kihou kit talouvin Imphal la kaki khen lhon tai. Eimi te vang hi evet leh nupi tehse ho gei jong politics langa ana kivai pei jeng thou dan ehiuve. Phung le chang ngailu ehiu leh eima phung sung seh seh ngailu louvin  phung dang chang dang jong ngailu thei soh kei leu hen vang phung ngailu dih tah ehi diu ahi. Tua eimi te eboi nao pipen tah chu “INSUNG POLITICS” hi ahi.

SHARE
Previous articleTribal damsel
Next articleDec. 1, 2015