Damlou hospital akipohlut masanga hospital ahilouleh COVID 19 Control Room phone bol...

Damlou hospital akipohlut masanga hospital ahilouleh COVID 19 Control Room phone bol masat dinga Dr Sasheekumar in sei; Sodium hypochloride kikap hin coronavirus athat pon, mihem tahsa joh atohkhah thei ahi, tia sei

140
0
SHARE

Damlou hospital akipohlut masanga hospital ahilouleh COVID 19 Control Room phone bol masat dinga Dr Sasheekumar in sei; Sodium hypochloride kikap hin coronavirus athat pon, mihem tahsa joh atohkhah thei ahi, tia sei

Imphal, Aug 4(ET): Health Department additional director leh spokesperson, Dr Khoirom Sasheekumar Mangang in gamsung mihon hospital emergency ward a itobang natna hijong leh adamlou apui masang uva hospital ahilouleh COVID 19 Control Room number a phone abol diuvin temna anei uvin ahi.

Monday nikho a Health Directorate mun a press conference abol nauva Dr. Sasheekumar in thuso anei ahi in, Mayang Imphal leh Thoubal a tu naicha thilsoh suhthengna anei ahi. District teni a um Health department hi mipin Coronavirus hidinga ginmo adamlou ho khohsahna anei pouve tia anokhum u ahi.

Dr Sasheekumar in aseina a, Mayang Imphal a kon adamlou mikhat government hospital emergency ward a ahin puiyu ahi in, COVID 19 natna achal lou nadinga adamlou mikhat hi hospital dang a refer abol u ahi, ati.

Thoubal a kon numei khat nao neina a athi thu agel khohna thu jong aseiyin, vangsetna toh nu insung mite hohin hospital a akipui a ahileh COVID 19 natna kilah khah inte tia kichat jeh a amahon inmun a nao adop got u himaithei ahi, ati. Hiche thu hi ahileh health professional ho themmo chan nading thu umlou ahi, ati.

Health department in hitobang thilsoh aumlou nadinga hospital ahilouleh COVID 19 Control Number kijahpi masat a, hiche jouteng adamlou koi hijong leh hospital a poh ding hi adei ahi. Kihoutoh na a kon adamlou pen pen hi itobang dinmun a um a, iti nat ham tihi hospital alhun masanga hetdoh theina a kithopina lentah hiding ahi, tin aseibe in ahi.

Covid 19 natna a kon kivenna dinga vengsung jouse a sodium hypochloride lou akikap thu a Dr Sasheekumar in alungkhampi na thu aseiyin, sodium hypochloride hi dan phatah a jui louva akikap a ahileh hiche hin mihem tahsa chule environment atohkhah thei ahi, ati. Coronavirus hi hui a sottah umthei lou chule gamlha tah che theilou ahijeh a, virus hi muntin a um inte ti ginmo jeh a sodium hypochloride kap ngailou ahi, ati.

Hypochlorite twi (solution) kikap hin novel coronavirus atha louding, mihem tahsa joh atohkhah ding ahi, tin Dr Sasheekumar Mangang in aseiyin ahi. COVID 19 natna sodoh sa a SAR-CoV 2 hi mihem tahsa, adeh a alol leh anahkui a kimu ahi in, virus hi mitoh kihouna ahilouleh achit na hungdoh ahi. Hui a sottah umthei lou ahi. Expert phabep in virus hi room sunga 25 feet chan che thei dinga asei ahi in, ahivanga atahbeh a hi sottah hing joulou, mihem tahsa a kon virus ahungdoh teng lhasam cheh cheh a chule midang infect abol joulou ahi, ati.

Hypochlorite kikap doh tamtah a kinah lut hin mihem tahsa chunga cancer jong asodoh maithei ahi. Akikap teng environment a sottah um ahi in, bong chule hamba ne a gancha ho atohkhah a, chule akimvel a kichem chapang hojong atohkhah thei ahi. Medical expert ho vetkolna noiya bou kap dinga aseiyin, mipin lamlen, phailei leh lentol ho a Hypochlorite tamtah akap lou dinga temna aneibe in ahi.

Hiche hin Covid 19 natna a kon kivenna sanga aphat louna atam sodoh joh ding ahi in, chemical kikap ding dan phabep um ahi, ati. Gamsung mihon thulamleng aseithang louding a jong temna aneibe in ahi.

Health Department Director Dr. K Rajo in, achesa lha nga-gup sunga Health Department in coronavirus nat douna dinga pan sangtah alah ahi in, hijong leh society tosotna leh thungai na hi natna vetkol nadinga angaicha sangpen ahi, ati. Dan kisem ho gamsung mihon phatah a ajui ding uva temna aneiyin, chule COVID 19 natna hi ikhohsah jep a ahileh bailam tah a damdoh thei ahi, ati.

COVID 19 toh kisai natna a thi na aum thu a moh kichat ding ahipon, COVID 19 neiya athi hohin abon uva tahsa dammo na chom chom jong aneiyu ahi, tin aseibe in ahi.

UPSC Civil Service result 2019 kiphong; Manipur mi 2 panna a Northeast akon mi 10 lolhing

Imphal, Aug 4: Union Public Service Commission (UPSC) in Civil Service exam 2019 result tuni phondohna aneitoh lhon in candidate mi 829 lolhing lah in Manipur akon mi 2 apang in ahi.

Manipur akon lolhing teni chu Nongjai Mohd Ali Akram Shah (188 rank), Khergao Nongjai Leikai Kshetrigao, Imphal East district akon leh Parikshit Thoudam (373 rank), Uripok Cheirap Maning, Imphal West district akon ahi. Ali Akram Shah hi National Institute Techonology (NIT), Imphal, Manipur a B. Tech in Computer Science ahin Thoudam hi Sainik School, Imphal a ana kai ahi akiti.

Northeast akon lolhinna nei mi 10 ahin, Assam Director General of Police lui Kuladhar Saikia chapa kum 25 a upa tu le tua Karnataka cadre IPS officer Aranyak Saikia chu rank 59 in alolhing in tuchung hi ama ding’a UPSC exam thumvei channa alolhinna jong ahi.

Northeast mi 10 ho chu Assam state akon mi 4, Manipur leh Sikkim akon mi 2 cheh ahin chule Nagaland le Tripura akon mi khat cheh ahi.

Assam akon mi 4 lolhing ho chu Aranyak Saikia, 59th rank, Nivedita Dutta 697th rank, Tapan Deka 766th rank, Kishore Sutradhar, 784th rank ahi. Manipur akon mi 2 lolhin teni chu Nongjai Mohd Ali Akram Shah 188 rank, Parikshit Thoudam 373 rank ahilhon in  Sikkim akon teni chu Yangchen Doma Bhutia 677 rank, Zenden Lingzerpa 794 rank, Nagaland akon lolhin mikhat ahin ama chu Richard Yanthan, rank 133, Lakhuti kho Wokha district akon ahin kum 13 jouva Nagaland state a ding’a candidate lolhing masapen ahi.  Tripura akon Dhiman Chakma 722 rank ahi.

UPSC in final list aphondoh chu achesa September 2019 a written test ana kibol a February-August, 2020 sung’a personality test/interview ana bol ahi. Pachanna nei 829 ho lah a 304 chu General category, 78 EWS, 251 OBC, 129 SC chule 67 ST category ahi. Hiche a lolhinna neiho hin Indian Administrative Service, Indian Police Service, Indian Foreign Service, Central Services, Group ‘A’ leh Group ‘B’ a appointment amu diu ahi.

India a ding’a kitetna sangpen UPSC result tuni kiphonna a chun Haryana state a loubol mi chapa Pradeep Singh chu first rank in alolhin in, ama hi tu le tua Indian Revenue Service Officer, Faridabad a training bol lai jong ahi. Delhi akon Jatin Kishore chu second rank chule Uttar Pradesh akon Pratibha Verma chu third rank ahi.

CSE 2020 exam May 31 a ding’a ana kisei chu COvid-19 kiseikhoh jeh in October 4 a ding in phat ana kikhel tan ahi.

 

Sorkar in tuchan a TA&Hills noiya um Family Oriented Scheme a beneficiary ho fund apehdoh loulai jeh a ATRPFM in demna nei

Imphal, Aug 4(ET): All Tribal Rights’ Protection Forum Manipur (ATRPFM) in Tribal Affairs and Hills, Manipur government noiya 2018-19 chule 2019-20 a kon tuni chan Family Oriented Scheme noiya beneficiary ho achan dinga lom fund state sorkar in pehdoh nadinga pan alah loujeh a alunglhai lou nau thu sangtah asei uvin ahi.

Union government in state sorkar henga sanctioned jat sum apehdoh ahitan, ahivanga, state sorkar in kho hephalou scheme beneficiary ho a dinga kipe fund hi ahen den u ahi. Sttae sorkar in TA & Hills noiya Scheduled tribe ho dinga kigong fund hohi simlai ho scholarship panna a achom a aman jing hi angaina tobang a achepi u ahitan, hiche hi dem dinga lomtah ahi, ati.

Tua sorkar hin ST community ho dinga kigong fund khatcha aphatcha ahopna umlou ahi, tin jong asei uvin ahi. Scholarship a dinga fund achom a aman uva, Family Oriented scheme ahi in chule gamsunga TA & Hills noiya ST ho dinga fund kigong adang jouse jong achom a akheldoh jing uhin tribal miho kichepna aneiyu chule athaneinau asuhnem peh nau phatah a avetsah ahi, ati.

Agriculture,   Horticulture, Animal Husbandry, Flower Fisheries, Piggeries, Industries, Women’s & Children Programme, Medical and Health, Education leh adang dang program akichepi na a TA&Hills Department hi bou economic relief (kithopina) akimuna ahi in, ahivanga state sorkar in financial year kichai kum khat leh lha nga ache nunga jong tuni chan geiya beneficiary ho fund apehdoh loulai ahi, tin thuso chun aseiyin ahi.

Hiche jeh a state sorkar chule mopohna nei authority/department in akipe sum hi beneficiary ho bank account a ahetpeh dinga ATRPFM in thumna anei ahi in, achuti louva ahileh Union Ministry of Tribal Affairs henga athu kipodoh ding chule Manipur High Court a jong PIL kipelut ding ahi, tin aseibe uvin ahi.

 

Covid-19 pandemic sunga naovop numei hon thi na chan ato jeh a WAD in alunglhai louna thu sei

Imphal, August 4(ET): Women Action for Development in Manipur gam a COVID 19 pandemic sunga aphat louva naovop numei khat athi thu ajah na chunga alunglhai louna thuso anei uvin ahi.

Gamsunga um hospital ho COVID natna neiho jenna a akiman jeh a COVID natna neilou chule adeh a naovop numei hon, adeh a containment zone a um hon tu phat a hi hahsatna sangtah ato u ahi. State Health Department in pandemic sunga hitobang thu vetlhahna dinga angaicha kigotna anei ding ahi, tin WAD in thuso anei nauva asei uvin ahi.

COVID natna neiho jenna dinga pan la a front liner ho chunga kakipah uvin, ahivanga, Covid natna neilou adamlou ho jen ding doctor achom a gon ngai ahi. Achuti louva ahileh COVID natna neilou hon medical facility amulou jeh a athi hi COVID natna nei ho sanga tamjo ding ahi in, naovop numei nao so ding jong hi khongai thei hilou apet pet a kithopina (medical) angaichat ahi, tin jong asei uvin ahi.

Pandemic sunga Thoubal district mi Longjam Basanti (34) leh Thoudam (O) Malemnganbi in nao nei na a thina ato thu WAD in ajah a apohnat na thu sangtah aseiyin ahi. Indian Governmental scheme of Women’s Health kiti radio a aphat tin a kiphong- naosen melmu nadinga hospital apha pen ahi, tia kisei hi pandemic sunga jong chepi ding ahi, achuti louleh ahung lhung ding nikho sunga naovop numei thina toh jat hi tam cheh cheh ding ahi, ati.

Imphal East a naovop numei kal phabep leh lha sunga naosoh ding naovop numei 8 thu jong WAD in anei ahi. “District chom chom a um ASHA hon naovop atamjo hi insung hahsa a kon ahiuvin, nikho tha lo atamjo ahiuvin, lockdown jeh a na atoh theilou jeh uva neh leh chah chule kivenna a lhahsamna sangtah ato u ahi, tin eiseipeh uvin ahi. COVID natna neilou chule naovop ho hi state in akhohsah ding ahi”, ati.

District jouse a state sorkar in phat chomkhat manding maternity hospital leh special gynae ward akoiya, hiche mun a kithopina ngaicha numei hon panpina amu uva, naovop chule nao vah lai jouse district jouse a hetdoh ahitheiya, angaicha nutrition chule health care akipeh theina dinga sorkar in pan alah dinga WAD in temna aneiyin ahi. State sorkar in tu pandemic sunga Covid natna neilou adamlou ho kijenna ding agon a, hitobang emergency ho, adeh a nao so nading ho a helpline number agon a, ambulance akoiya, angaicha natna khoh leh naoso na ho vekol thei ding team asem a chule COVID natna neilou adamlou chule naonei ho dinga doctor achom a agon peh dinga temna aneibe uvin ahi.

 

Kpi district a ‘community transmission’ umlou nadinga meeting chelha; mipi pan lahna a bou natna kiveng jouding ahi, tia Minister Nemcha in sei

KANGPOKPI, Aug 4(UNA): Kangpokpi district a ‘community transmission’ umthei ding dinmun a aum jouva Social Welfare and Cooperation Minister Nemcha Kipgen in Conference Hall, DC office, Kangpokpi mun a Tuesday nikhon ’emergency review meeting’ alamkaiyin ahi.

Minister nu lamkaina a chelha meeting a DM/DC Kangpokpi, Somorjit Salam, IAS, SP Kangpokpi, Hemant Pandey, IPS, Chief Medical Officer Kangpokpi, Dr. Nilakanta Singh, Addl.SP Kangpokpi, Lalminlen Misao, MPS, SDO leh SDC jouse, AC to DC, chule PHED, MSPDCL, CAF& PD chule department adang dang a kon official hojong apang uvin ahi.

Community transmission umthei ding dinmun a kon kivenna dinga pan khoutah a lah angai dan Social Welfare Minister in aseiyin chule District Magistrate/DC Kangpokpi in nam lamkai ho hilna snagtah (awareness) apeh a, district sunga natna achal be louna dinga pan alah diuvin thuhilna aneiyin ahi.

“Sorkar in bou virus venna dinga pan alah nathei dinmun hi talou ahi, ajeh chu local transmission aumthei na dinmun um ahitan, nam pumpi in pan alah ding hibou virus achal be louna dinga kivenna ahi”, tin Minister nu in aseiyin ahi. Nam lamkai ho dinmun aboi dan chule natna a kon mipi panlahna a kivenna nei ding dan phatah a hetsahna leh hil na nei phat ahi, achuti louva ahileh local transmission umthei ding dinmun kivengdoh joulou ding ahi, ati.

Pao chom chom a awareness video leh audio ho aganna thei pen a sem a, nam lamkai hon ama ama umna mun a mipi ho ahil son nading uva sem dinga phat sottah kihouna anei jou uva asei uvin ahi. Sorkar in natna a kon kivenna dinga asodoh guidelines ho juiya eima chule I insung mi venna nei dinga Minister nu in tilkhouna thu jong aseiyin ahi.

“Virus the jal a pang hilouva akilahson to louna dinga mopohna nei gamsung mi hi joh ding ahi”, ati. Nam lamkai hon District Administration, Medical Department, District Police chule frontline worker jouse natna jo nadinga atosot uva chule thu ngaina anei diuvin temna aneibe in ahi.

PHE Department in athah a hondohna aneiyu COVID Care Centre a twi phatah a supply abol dinga Minister nu in thuhilna aneiyin chule MSPDCL injong meivah phatah a apeh dinga aseiyin, kihouna a thu khoh adang dang jong asei khom uvin ahi.

Kihouna kichaiya Minister Nemcha in vengsung numei kiloikhom chule khangthah lamkai ho ‘Emergency Food Kiosk’ mun a akimupi in, mihem ngailutna a pan alah u atoh jom diuvin tilkhouna thu aseiyin ahi.

 

YPA GHQ in Chassad Relief ding adondoh thilkeu ho KKL GHQ khut’a anapelut

B.Lalboi Gangte

CCpur. August 4 (ET): Young Paite Association (YPA) General Headquarter in tunin (Aug 4) KKL Complex, IB Road mun’a Chassad Relief ding pehdoh na ananei uvin ahi. Chassad Relief ding hi Kuki Khanglai Lawmpi (KKL) General Headquarter  chungchon’a mi tomngai kiloikhom na chom chom hon anapehkhom ho Chassad kho ding’a KKL GHQ in anapohlut jing ahi. YPA GHQ in Relief ding apeh phatsung in Lianmuanthang Valte, General Secretary, YPA GHQ in alamkai in chuleh T. Khailianthang, President, YPA GHQ in Chassad kho’a Relief ding ho Kamthang Haokip, President, KKL GHQ khut’a anapedoh in ahi.

Hetthei khat chu Kamjong District hopsung’a um Chassad kho hi achesa March nisim 16 nikho’a gamgi thu’a boina jeh’a Tangkhul hon Chassad Haosa pa inn jaona’a khosung’a inn, gari leh thilkeu tamtah anahal lhah’u ahi. YPA GHQ in Block leh Unit hon Chassad kho panpina ding’a pan alah vang uvin Covid-19 jeh’a Lockdown anakiphon khah tah jeh’a natoh bangkhai ho sujom theilouva aum nung uva panpi na ding’a ann-chang (Kg 25) bag 100 anapeh’u ahi.  Hiche kingon phatsung’a President Khailianthang YPA GHQ in houlimna aneina’a panpi na ngai ho panpi jing YPA leh KKL ahi naban’a YPA panlah na umsa ho jong KKL akon kithopina hoitah amunao chung’a kipathu aphongdoh in ahi. Chule  koima kichom bol thei akium pon, achengkhom ngen akihi jeh’a Chassad kho ding panpina KKL toh kitho’a Chassad kho mama’a peh ding’a YPA in lungtup anakinei vang in Covid-19 jeh’a KKL khut joh’a anakipedoh ahi ati.

KKL President Kamthang Haokip in houlimna aneina’a Chassad ah relief thilkeu ho KKL in 5-vei tobang agakithah tan ahi. Ajeh chu Chassad kho sung’a cheng hon apoimo ho jouse akichoh nading uva akinai pi kho kimkhat jotpa angei jeh in hahsat na lentah atodan ho aphongdoh in ahi.

 

AMUCO in 23rd Manipur Integrity Day nit; Gamsung huhna dinga pan lahkhom dinga avel a sei kit

Imphal, Aug 4(ET): Achesa August 4, 1997 kum a mihem lakh 5 val in Manipur gamgi huhna dinga lamlen a kijotna anei nikho geldohna a All Manipur United Club Organization (AMUCO) in club chule organization chom chom toh Tuesday nikhon 23rd Manipur Integrity Day amang uvin ahi.

Unity Pillar, Pologround lhumlam a AMUCO member chule gam ngailu hon jana pehna anei uvin, hiche jouva AMUCO office complex, Kwakeithel Akham Leikai mun a kin anei uvin, Meira Paibi lamkai leh advisor chule AMUCO khohsah a lamkai tamtah kin goun a apang uvin ahi. AMUCO President, Nando Luwang in ahoulimna a, gamsung huhna dinga kijotna akipat dan thu aseiyin ahi.

“Gamsung chule gamsung mi suhkhen nadinga tohgon aume tihi July 25, 1997 nikho a NSCN-IM leh India sorkar in “Ceasefire Agreement’ soi akaina gamsung mihon amu a khonung ding chan amu jeh uva mihem lakh 5 val in lamlen a kijotna anei ahi”, ati. Gamsung miho kikhenna ding tohgon ahi hi mipin ahet a, chomkhat jouva June 14, 2001 ni a hemkham kinoptona soi akaiyu hi extension abol u ahi. Mipin sangtah a adoudal a, thilsoh a mi 18 thi ahi, tin aseiyin ahi.

1997 kum tuni nikho a mipin kijotna anei na a, rally a pang kum 17 a upa pasal khat akhosung Moirang Thana Leikai a akile na a thi ahi. Nawaz Khan kiti mikhat jong rally kichai ni 18 jouva Yairipok a toumun kiphinna abol nauva gari in atounau mun ata a thi ahi.

“Manipur Integrity huhna dinga mipin ahinkho aphal a, aphal jom ding ahi”, tin Nando in aseiyin chule tohgon chom chom noiya achesa kum 23 sunga gamsunga chengkhom nam chom chom khenna ding natoh chelha jing ahi, ati. Tuni a jong NSCN-IM hon India sorkar tohgon dihtah ahetdoh pan pan u ahitai, tin aseibe in ahi.

Alangkhat a, COVID 19 pandemic khoh laitah a hi gamsung mihon virus douna dinga kipumkhat angaina ahetdoh thei ahi in, hiche hin kipunkhomna chule nam jouse dinkhom ding eihil u ahi, ati. Natna hin nam khenna umlouva mijouse atohkhah ahi in, khat leh khat kithopina ki kipe to a ahi. Tua hi sorkar chule medical profession a natong hon gamsung miho huhna dinga kitahna neitah a na atoh phat u ahitai, ati.

Covid natna nei hihen lang natna neilou hijong leh Health care service a natong hon jen ding ngaicha jouse ajen diuvin temna aneiyin, chule health care sector machal nadinga sorkar in policy det agon dinga jong temna aneiyin ahi. “Pandemic kipat a doctor lhasam ahi in, tua hi pandemic kichai teng doctor ingaichat be diu ahi. Doctor chule health worker angaicha lahna dinga sorkar in ipijeh a phat sottah asuhlut ham” tin jong thudoh aneiyin ahi.

Adamlou ho kijenna a doctor hon gelkhohna anei pouve, tia thu kisei ho thu jong Nando in aseiyin, health service provider hon adamlou ho ajen dan khol nadinga ICU chan a CCTV camera koi dinga lunggel aseiyin ahi.

Manipur a Covid 19 case thah 98 kimube; CAPF 34 panna a travel history neilou mi 97 hi

Imphal, Aug 4(ET): Achesa nidan 24 sung in Manipur a Covid-19 positive case thah 98 mudoh be ahin, hiche lah a chun travel history neilou mi 63 leh Central Armed Police Force (CAPF) akon mi 34 apang in ahi.

Tuni case kimuthah ho chu pasal 39 le numei 25 ahin amaho lah’a Tamenglong district akon mi khat tilou adangse hi travel history neilou ahiuve tin Additional health director Dr. K Sasheekumar Mangang in aseiyin ahi.

Tuni channa gamsung’a covid-19 positive case 3018 alhing tan, hiche lah a 1814 hi active case ahin, 1197 hi kijendam ahi tan tuhin gamsung’a recovery rate 60.10% aphatan ahi.

Health department akon thuso kimun aseina ah case thah kimube 98 ho hi VRDL RIMS, JNIMS, SDH Jiribam leh Imphal West RAT akon ahin, amaho chu Imphal West a 25, Thoubal district 23, Kakching district a 2, Chandel district 5, Tamenglong  1 leh Imphal East a 8 ahi.

Tuni in mi 48 jong discharged akibol in ama ho chu  COVID-19 care center, Meitram (8), Senapati (4), Tamenglong (3), RD Wing (12), Assam Rifles in Jiribam (17) leh JNIMS (4) ahi.

Tuni chan in gamsung’a thina toh mi 7 aum tan ahi.