Cyclone Amphan jeh a West Bengal a mi 72 thi; CM Banerjee...

Cyclone Amphan jeh a West Bengal a mi 72 thi; CM Banerjee in dk. lakh 2.5 compensation peh dinga phong, PM in kithopina thei chan a pan lah dinga sei

54
0
SHARE

Cyclone Amphan jeh a West Bengal a mi 72 thi; CM Banerjee in dk. lakh 2.5 compensation peh dinga phong, PM in kithopina thei chan a pan lah dinga sei

Kolkata, May 21: West Bengal Chief Minister Mamata Banerjee in Thursday nikhon cyclone Amphan jeh a mi 72 athi e, tin thuphon aneiyin ahi.

Wednesday nilhah a hui le go kithona Kolkata khopi a cheng mi 15 athi e, tin Chief Minister in aseiyin ahi. Cyclone Amphan hi Sunderban region, West Bengal a Wednesday sun a lhung a, hiche jouva Bangladesh lang (northeastward) a kitol ahi. Chief Minister Mamata Banerjee in ahoulimna a, hitobanga thil akisuhsetna asan dan hi ka hinkho a kamu khah lou ahi, ati.

“Tuchan geiya gamsung (West Bengal) a mi 72 athi in, hiche lah a mi 17 hi Kolkata a thi ahi. Athi hohi abon uva thingphung lhu ahiloule in chimlha in achimkhum ahiloule meiyin amat jeh (electrocution) ahi”, tin CM in aseiyin ahi. Vangsetna thilsoh a thi ho insung mite compensation peh dinga jong thuphon aneiyin ahi.

“Thilsoh a thi ho insung mite dangka lakh 2.5 compensation a kapeh diu ahi”, ati. Achesa 1999 kum a kon Bay of Bengal a kisem ‘super cyclone’ masapen ahi. West Bengal gam alhun a huinun ahat dan hi a ol lhah tah vanga ‘severe cyclone’ a kisei nalai ahi. “Prime Minister in Sunderban avil dinga temna kanei ahi. Tu boi pet a hin pan lakhom uhite. Amit Shah injong tuni sun a phone eihin bol a, Centre a kon kithopina peh dinga kitepna anei ahi”, tin Banerjee in aseibe in ahi.

East Midnapore, Howrah, North le South 24 Parganas district chule Kolkata hi thilso akhohset namun ahi. Inchung huiyin alhoh manga, thingphung chule electric (meivah) khom ho asuh lhuh a, mun nem ho twiyin achup ahi. Kolkata khopi a thingphung 500 val, electric post 100 val, traffic signal le police kiosk hui le go kitho in asuhset a chule lamlen le in anem laiya umho a twi kivei den ahi. Khopi le gam sunga um mobile tower 1000 val jong asuhset ahi. Mihem lakh 5 val aboina thei mun a kon damsel a apuidoh u ahi.

Cyclone Amphan hi Wednesday nilhah nidan 2.30 don a Digha coast, West Bengal lhung a huinun ahat dan hi 190 kmph a hat a, nidan phabep jouva Kolkata aphah ahi. Kolkata, North 24 Parganas le South Parganas a meivah amit soh in, mobile tower tamtah jong asuhset jeh a mobile le internet service jong mun phabep a umlou ahi. UNESCO site hi a Sundarban delta a gam leiset kilometer phabep hui le go kitho in asuhset ahi.

Prime Minister Narendra Modi in Thursday nikhon Odisha le West Bengal gam hi India pumpi in adinpi e, tin aseiyin ahi. “Odisha mihon Cyclone Amphan adou nauva ka umpi jing ahi. Amun a natong hon jo chan a vangsetna toh ho kithopina apeh ahi. West Bengal gam Cyclone Amphan in asuhset dan kamu in, phat hahsat pet a West Bengal India pumpi in adinpi ahi. Vangsetna toh state jouse kataopeh uve”, ati.

“NDRF team hon hui le go kithopi na mun a pan alahu ahi’in, official luboh hon dinmun avetlhah jing uva chule West Bengal sorkar toh kihoumat na anei jingu ahi”, tin aseibe in ahi. Nikho kipat til a Cabinet Secretary Rajiv Gauba in Odisha le West Bengal gam a cyclone Amphan lhunna mun ho dinmun velvetna State chule Central Ministry/Agency hotoh anei ahi.

XXXXXXXXX

Coronavirus positive jouse hi Covid-19 ahipoi: Dr. Palin

Imphal, May 21(ET): Managing Director, Shija Hospital and Research Institute, Dr. Kh. Palin in Thursday nikhon Coronavirus ahi kihedoh jouse hi COVID-19 case ahipoi, tin aseiyin chule Coronavirus toh kisai symptoms ho aum kah a mikhat hi COVID-19 natna nei banga kijen theilou ahi, ati.

Thursday ni a Facebook a ‘live chat’ a Dr Palin in thudoh adonbutna a asei ahi. Coronavirus ahi kihedoh hohi midang in natna (virus) akilah louna dinga achom a umsah ding ahi, tin aseiyin chule gampam a kon gamsung mi hung kile atam cheh cheh toh kilhon a gamsunga coronavirus natna neiya atam cheh cheh ding hi ginchat ahijeh a mipi ho moh tijat lungdon louding ahi, tin temna jong aneiyin ahi.

“Gamdang a kon hung ho lah a virus kimudoh ahijeh a community transmission umlou lai ahi’in, hiche jeh a moh tijat louva pandemic douna a chihthei joh ding ahi”, ati. Dr Palin hi State level COVID-19 Committee a consultative committee member jong hi ahi’in, Covid-19 natna neiho adamlou adang hotoh akihal/aumkhom louna dinga hospital achombeh semdoh dinga jong alunggel asei ahi.

Chule gamdang a kon hung ho Home Quarantine bol ding pha asah john a aseiyin, insung miten phatah a avetkol joh diu ahi, ati. Tu le tua Manipur gam a coronavirus positive hi 25 lhing ahitan, hiche lah a mi 2 kijen dam ahitai.

xxxxxxxxxx

2001 le 2011 census dungjuiya ‘Delimitation’ bol ding KSA in doudalna neiyu

Imphal, May 21(ET): Kangleipak Students’ Association (KSA) in 2001 leh 2011 census dungjuiya parliamentary le state assembly constituency ‘delimitation process’ doudalna thu sangtah aseiyin ahi.

Thursday sun a office mun a thuso miho akimupi na’a, President KSA N Chetan in, “Delimitation’ hi 2021 a census kila thah dungjuiya bol ding ahi, tin aseiyin ahi. Hiche toh kisaiya India President, Prime Minister le Home Minister henga memorandum kipe lut ding ahi, ati.

Delimitation Commission of India in Nagaland, Assam, Arunachal Pradesh, Jammu and Kashmir chule Manipur Legislative Assembly Speaker ho henga state parliamentary le assembly constituency ‘delimitation’ a dinga associate member nominate abol diuva thuhilna apeh ahi. Delimitation Act 2002 noiya Delimitation hi 2001 census dungjuiya Jammu and Kashmir chule North East a state 5 tilouva India pumpi a 2008 kum a kibol ahi.

Mihem apun be jat vetna umlouva constituency a Delimitation process’ depi ding hi kisang theilou ding ahi, tin Chetan in aseiyin ahi. Gam 5- Manipur, Nagaland, Assam, Arunachal Pradesh le Jammu and Kashmir hi 2001 census a population growth ahithei loujeh a 2008 Delimitation a apan sah louvu ahi. Manipur gam a 2001 census dungjuiya sub division 4- Mao- Maram, Paomata, Purul le Chakpikarong a mihem jat nasatah a kal ahi. Hiche phat laiya ‘law and order’ aboi jeh a President in phatsahna apeh jouva Delimitation kibol lou ahi, ati.

March 6, 2020 ni a sorkar in state nga ho a hi 2001 le 2011 census dungjuiya Delimitation Commission asemdoh ahi.  2001 le 2011 census dungjuiya delimitation bol ding KSA in sangtah a adoudal ding ahi, hijong le 2021 census thah akilah jouteng ‘delimitation’ alamto ding ahi, tin Chetan in aseibe in ahi.

Xxxxxxxxx

Churachandpur COVID-19 Control Room in social media a thu kithang suhthengna nei

Imphal, May 21(ET): Circuit House Quarantine Centre in gam dang a kon hung kile ho ala pouvin, chule lamlen pam a donlouva akoi uve, tia ngohna thu kisei Covid-19 Control Room Churachandpur in social media a suhthengna anei uvin ahi.

“CMO staff hon PCR test a negative hohi ‘Home Quarantine’ bol dinga asol ahi. Natna chungchang hilna um a, chule anu apa tehon Circuit House a kon akipui diuva kouna kineiya gari anga u ahi’in, amaho hin lamlen pam a anga u ahi”, ati. “Ahung kile ho ahiloule Institutional Quarantine administration hotoh kihet khelna ahiloule lunglhai louna aum thu ima aumpoi”, tin suhthengna anei uvin ahi.

Hetthei khat chu achesa May nisim 21 nilhah a lamlen pam a mithum adin na lim social media a kithang ahi’in, district administration in Yaralpat, Imphal a kon alah mithum le QC staff ho kah a kinelna ahiloule kihetkhelna aumjeh a Circuit House Quarantine Centre staff hon don louva akoi ahi, tia kisei ahi.

Xxxxxx

Thursday ni a Covid 19 test kibol mi 213 abon uva ‘negative’ hi

Imphal, May 21(ET): Wednesday nikho a Manipur gam a Covid-19 positive case 16 a akal jou Thursday nikho a gamsunga case thah aumpoi, tin thulhut in aseiyin ahi.

Thursday jan nidan 6.30 chan a VRDL, RIMS a sample 103 chule JNIMS a sample 110 test kibol a, agom a mi 213 test kibol ahi’in, abon uva Covid 19 negative ahiuve, tin Additional Director, Health Department Dr Sasheekumar in soi akaina COVID-19 Common Control Room thuson aseiyin ahi.

Gamsunga test kibol atam thei nadinga RIMS a tu naicha kikoi Trunaat machine jong kimang pan ahitai, ati. State sorkar in stakeholder hotoh kihoutohna aneiya ‘negative’ hi hohi apet pet a ‘Home Quarantine’ bol dinga policy asem ahi. Home Quarantine a dinga phatsahna kinei guideline hi natna achal louna dinga kipodoh ahi’in, vannoi muntin a achepi u ahi.

Guidelines hi www.mohfw.gov.in a muthei ahi, tin thuso chun aseibe in ahi.

Xxxxxxxxx

Sorkar in ‘Transgender’ ho dinga Quarantine Centre achom beh gon peh

Imphal, May 21(ET): State sorkar in Maria Montessori Higher Secondary School, Koirengei, Imphal East le Government Ideal Blind School, Takyelpat, Imphal West hi institutional ‘transgender’ ho dinga Quarantine Centre dinga asem tauvin ahi.

Director, Social Welfare Department, Manipur government in thuso anei dungjuiya, tu naicha gam dang a kon hung kile holah a ‘transgender’ phabep apan hetdohna um’a, numei ahiloule pasal toh akikoi khom nau institutional/community quarantine centre ho a hahsatna ato u hetdoh ahi, ati. Hiche jeh a amaho dinga akilemchang ding Quarantine Centre achombeh a hon peh dinga kigel ahi.

Hiche toh kilhon a department in Health and Family Welfare department henga Institutional Quarantine Centre, Maria Montesorri Higher Secondary School, Koirengei, Imphal East a hi Red Zone a kon hung ‘Transgender’ ho dinga Wing achombeh hondoh dinga ngehna anei ahi. Government Ideal Blind School, Takyelpat, Imphal West a Green Zone a kon hung ‘transgender’ ho quarantine bol dinga department in temna aneibe ahi.

Hiche thu a angaicha ho Social Welfare Department in agon ding ahi. May 20 ni a Health & Family Welfare Director in Maria Montessori Higher Secondary School, Koirengei le Government Ideal Blind School, Takyelpat hi Institutional Quarantine Centre le transgender ho dinga Quarantine Centre dinga aseilhah ahi. Takyelpat a man dinga mask, sanitizer, glove, PPE, Goggle, sodium hypochlorite solution le adang dang Health Department in apeh ahi, ati.

Transgender agom a 40 in ‘quarantine facility’ achom a angaichat dinga ginchat hi ahi. Government Ideal Blind School a mi 24 umthei ahi’in, adang se hi Maria Montessori Higher Secondary School, Koirengei a umsah thei ahi. Centre a capacity hi ngaichat dungjuiya akalsah diu ahi. Chule transgender hohi vengsung in avetkol Community Quarantine Centre a jong ‘quarantined’ kibol thei ahi’in, achom a amaho privacy vang peh ngaiding ahi.

Saroja Devi, Deputy Director, Children Programme (Mobile no 7005018575) in Govt Ideal Blind School, Takyelpat, Imphat West a Transgender Quarantine Centre avetkol ding ahi. ‘Second 20’ khut sop jing ding, mask kibol a mitoh kinai loudinga dan umho mipin ajuiya achihthei diuvin temna aneibe uvin ahi.

……………………..

Minister Nemcha in Kangpokpi vil kit, Frontline worker ho PPE pe jom jing

 Kangpokpi, May 21(ET): Social Welfare and Cooperation Minister le Kangpokpi MLA Nemcha Kipgen in Thursday nikhon Brig. M Thomas Ground, Kangpokpi DHQ a District Screening Centre mun avil in, frontline worker ho PPE ape in ahi.

Doctor le nurse hon aman ding mask, glove, hand sanitizer, face shield le adang dang ho Minister nu in Dr Paotinlal Haokip, Medical Superintendent in-charge, District Hospital Kangpokpi khut a pehdohna aneiyin ahi. Screening Centre in-charge le ADM/ADC Kangpokpi jong hi a Lalramsang Infimate, MCS jong Magistrate official hon Screening Centre a aman diu glove le sanitizer ape in ahi.

Addl. SP (Ops), Lalminlen Misao, MPS khut a Kangpokpi district police ho man ding face mask le sanitizer ape in chule Screening centre a pan la jing a fire personnel hojong ahop peh in ahi. Ahung kile ho man beiya neh le chah pehna a kisa lel a, frontline worker ho kithopi a Kangpokpi Women Welfare Organisation le Kangpokpi Youth Union hojong glove, mask le adang dang ape in ahi.

District Screening Centre/Centralized Arrival Point, Brig. M Thomas Ground a kivenna ding thil ho hopdohna anei ahi’in, Minister nu in suhkhel aumlou nadinga amun hi avil jing ahi. Ngaichat pet a boina thei dinmun a pang ho manchah peh dinga avel a aseikit in ahi. Covid-19 in-charge Minister jong hi a Nemcha Kipgen in, frontline worker ho dinga kivenna manchah ka lhahsam sah louding ahi, tin aseiyin chule mopohna nei hon avat aumle asei diuvin, temna aneiyin, apet pet a peh dinga aseiyin ahi.

Minister nu in Deputy Commissioner Kangpokpi office jong avil in, DC thah akimupi in chule district sunga Covid 19 douna a pan kilah na chule kivenna le natoh umho thu aseikhom lhonin ahi.

………..

IAS Somorjit in Kangpokpi DC panmun tuh pan ta; Kangpokpi CSO hon kipah tah a lamto

Kangpokpi, May 21(UNA): Senapati DC a kum ni apan jouva IAS Somorjit in Thursday nikhon Kangpokpi Deputy Commissioner panmun atuh pan tan ahi.

Conference Hall, DC Kangpokpi a achedoh ding DC Lalithambigai Kalidas, IAS le Somorjit Salam IAS in Addl. District Magistrate/ADC Kangpokpi umna a District Level Officer ho panna a mopohna ho kikhut lhehna anei lhonin ahi. Kangpokpi Town Committee, Kangpokpi Women Welfare Organization le Kangpokpi Youth Union panna a Kangpokpi DHQ a um kiloikhomna hon Somorjit Salam District Headquarter mun alhun a phatah in alamto uvin ahi.

“Pu Somorjit Salam, IAS, Deputy Commissioner, Kangpokpi, ka liem uve”, ti kijihna banner lentah jong lhang a um kiloikhomna hon akhaidoh uvin ahi. Vice Chairman, A Leivon lamkaina a Kangpokpi Town Committee, President Hekim Hangshing lamkaina a Kangpokpi Women Welfare organization member ho chule president Haolet Khongsai lamkaina a Kangpokpi Youth Union member hon IAS pa office alhun masang highway a chibai abol uvin, KTC member Rev. Thangboi David in CSO jouse thalhenga nam pon, Saipikhup asil peh in ahi.

Somorjit Salam in Kangpokpi DC panmun atuh ding akipana thu aseiyin chule tuni a kon Senapati DC panmun tuh dinga Lalithambigai Kalidas in vangphatna anei dinga aseiyin ahi. Kum ni masang May 21 ni a DC Senapati katuh ahi’in, kum 2 kitohchet jou, tuni a DC Kangpokpi panmun katuh ahi, ati. District khantou machalna dinga kitah tah a pan lah dinga jong kitepna aneiyin ahi.

Kikhut lhehna kin anei jou uva Kuki Inpi Kangpokpi District in Secretary Lamminlun Singsit lamkaina a IAS officer pa alamto uvin, Saipikhup asil peh uvin ahi. DC thah in ni phabep sunga hi ama cham a kigel lhahna aneiya mipi akimupi louding chule office jong ngaichat ahi dungjuiya che ding, ni phabep hi atamjo quarter a kon avetkol ding ahi.

Tu masanga Covid 19 positive ahi kihedoh a mi 2 hotoh hung kilhon gamsung a hung kile hotoh Senapati a IAS officer pa alha khom uve, tia kingoh ahi’in, amajong test kibol a, tuni result kipehna a negative hi ahi. Hijong le dan dungjuiya public meeting le office a hi ni phabep panglou dinga akigel lhah hi Kangpokpi mihon jong apachat ahi.

DC thah pa tilouva Green zone a kon hung kile a Chairman, Kangpokpi Town Committee, Lunseh Kipgen jong acham a Community Quarantine Centre, Kangpokpi a um ahi. Dan hi mijousen ajui ding ahi’in, ken jong kajui ding ahi, tia asei ahi.

Hiche masanga DC panmun dalha ding Lalithambigai Kalidas lhahna ding ADC Sadar Hills Chairman, Haokholal Hangshing le Kangpokpi Town Committee member hon agon peh uva chule alhahna a nam pon jong ape uvin ahi.

Kangpokpi district hi Manipur a Deputy Commissioner panmun katuhna masapen ahi’in, hiche jeh a kasuhmil theilou ding ahi, tin Lalithambigai in aseiyin chule ama phat sunga mipin atosot nau chunga kipathu aseiyin ahi. Chule itih phat hijong le Kangpokpi mihon ngaichat anei le eihin jot theiyu ahi, tin aseibe in ahi.

xxxxxxxxxxxx

Chandel Ex ADC Chairman bail a kilha

Imphal, May 21(ET): Tunin (May 21) Chandel Ex ADC Chairman Lhukhosei @Sesei Zou Court nin Bail ah alhatan ahi.

Hetthei khat chu ADC Chandel Chairman anahi Sesei Zou panna a mi 8 Narcotic and Affairs of Border (NAB) police le Imphal West district police hon achesa 2018 kum a dangka crore 27 val man khamnathei thil toh amat u ahin akiman khamnathei holah a dangka crore 13 val man Heroine 4.595 kg, dangka crore 14 vel man World is Yours (WY Amphetamine tablet chule sum a dangka 57,18,000 pang ahi.

Xxxxxxxxx

Cyclist leh Social Activist jong hi Philem Rohan in kithopina pe

Bishnupur, May 21(UNA): Phat sottah dammo a um Tronglaobi Maning leikai a cheng Kiyam Open chule mi banglou asopipa Kiyam Nabachandra heng ah Cyclist jong hi chule Social Activist Philem Rohan Singh in kithopina in sum ape in ahi. Rohan in aseina achun amauho insung hii lungset umtah ahi in a insung uva jong sum holthei a gense theijong aum pouvin chule tuchung lockdown ahikit toh agenthei nau akibe cheh in amauho insung thu kajah in kalaina behset in ka sumle pai nei kham kham a kithopina ngailut najal a kapeh ahi ati. Rohan in aseibena achun a insung uva nehding alhasam jeh in abon uvin thisan natna chikhat aneisoh kei uve ati. A insung uva koiman CMHT card anei pouvin hiche hi akisaipi authority hon angaito peh ding uvin Rohan in ngehna anei in ahi.

Rohan hin ama min a kibl T-Shirt ho ajoh in asum mu akon chun aveng sung Moirang Philem Leikai a cheng genthei hahsa insung 62 ho heng a lockdown sung a kithopina in nitin ngaichat ho ahom in chule local MLA covid-19 fund ajong kithopina ape in ahi. Philem Rohan Singh hi tibu kimlou ho rights neina ding a Delhi akon Tokya chan kim 10,000 a sao cycle atol ahi in hinlah covid-19 jeh in March 19 nichun aban jomtheilou ding ahi thu ana phongdoh in ahi. Nambol a meithai in 2 jong vilna nei in kithopina ape in ahi. Moirang Khunou a inkhat mi lunggel bang nei joulou vilna anei in kithopi jong ape in ahi.

Xxxxxxxxxxxxxxxxxxx

Manipur Pradesh Congress Committee in Rajiv Gandhi thi nikho nit

Imphal, May 21(ET): Manipur Pradesh Congress Committee (MPCC) hon tuni chun Rajiv Gandhi thi nikho anit uvin ahi. Hiche kin ahin CM masa O. Ibobi Singh leh Depurty CM masa Gaikhangam teni in jong pan ala uvin ahi.

Rajiv Ratna Gandhi chu August 20,1944 nikho’n Bombay ah apeng in India gamsung a ding in Prime Minister a gup channa ahi in 1984 apat 1989 chan PM hina atujing in chule PM panmun tulah akhangdong pen jong ahi. Tuni a athi nikho kinit hi kum 29 lhinna ahitai.

Xxxxxxxxxxxxxxxxxxx

Assembly Constituency chom chom a hopding PDS anchang kipodoh jing

Imphal, May 21(ET): May lhasung a PDS lahdong ding ho tuni chan in akiladoh jing in NFSA, PMGKAY leh OMSS scheme noiya FCI godown chom chom akon aki podoh jing in ahi. Tuni chun Andro AC ading in OMSS noiya quintal 645.30 chule PMGKAY noiya quintal 1828.05 aki podoh toh lhon in Imphal East district sung a ding a May lhasung a PDS anchang kipodoh ding jat alhing tan ahi. Imphat East district sung a um Kshetrigao AC ading in April lhasung a pohdoh ding jat chu NFSA noiya quintal 28.67 chule PMGKAY noiya quintal 82.84 jong aki podoh in ahi.

Tamenglong district sung a um Tamei AC ading in April lha a lahding anchang OMSS noiya quintal 845.50 chule PMGKAY noiya Dal quintal 113.77 chu FCI leh FCS godown Sangaiprou akon aki podoh in ahi. Imphal West district sung a Lamshang AC ading in NFSA noiya quintal 1935.7 chule Dal 90.58 aki podoh in chule Patsoi AC ading in PMGKAY noiya anchang quintal 2012.85 jong aki podoh in ahi. Lilong AC ading in PMGKAY noiya quintal 753.55 chule OMSS noiya quintal 151.90 aki podoh in ahi. Dal jong Thoubal AC ading in quintal 104.20, Wangkhem AC ading in quintal 99.30, Heirok AC ading in quintal 97.87, Wangjing Tentha AC ading in quintal 108.59, Khangabok AC ading in 114.80 jong aki podoh in ahi.

Tuni chun Thoubal District Administration in Govt. Children Home, Charangpat, Observation Home, Samaram, Open Shelter Home, Wangbal & Phouden, Children Home, Wangmataba, Children Home for Mentally ill, Sabaltongba & Langathel chule Specialised Adoption Agency, Langathel ho heng ah OMSS noiya anchang quintal 53 chu ahom chai uvin ahi. Covid-19 jeh a gamsung a lockdown aum toh lhon in state government in mipi hon nehding aki lhasam loutei nading angaito uvin scheme chom chom noiya kon in nehding anchang apodoh jing uvin ahi.

Xxxxxxxxxxxxxxxxxxx

Manipur gamsung hin jonding ho ahung kipat masang un test kibol theileh phalheh ding ahi: RK Imo

Imphal, May 21(ET): State dang tangden ho Manipur gamsung ahung lut utoh lhon in masang a Covid-19 case 2 ana um chu tuhin case 25 aphatan government in hiche natna hi mipi lah a aki thejal masang a pan alah uva chule Manipur gamsung hin jon ding ho ahung kipat masang uvin test kibol theileh phaleh ding in Sagolband MLA RK Imo chun asei in ahi. MLA pa in aseibena achun Johnstone School a quarantine a umho result aso toh lhon in abon uvin Negative ahisoh kei uvin chule aki test nailou ho jong ki test paiding ahi thu asei in ahi. State government thupeh dungji in a result negative ho chu inmun ajot thei uh ahidan jong asei in ahi.

Johnstone School community quarantine centre dalha ho chu thingnou khat, face mask, hand gloves ho ape uvin ahi. RK in aseibena achun quarantine a um ho kithopi ding a panla Volunteer ho jouse jong test ngai ahi in chule state government in health workers, volunteers, members of Red Cross, police personnel chule thuso lakhomho jong kithopina apeh ding in jong asei in ahi. Covid-19 douna ding a manchah poimo ho administration akon akimutam pon hinlah Sagolband sung a quarantine centre umho a manchah ding in T. Phulen Meitei MCS in PPE kit 65 ahin tohdoh in, AS Rajkumar in Hand Sanitiser ahin tohdoh kit in chule Glove leh Breakfast chu Kangabam Leikai Committee hon ahin tohdohkit uvin ahi.

PMGKAY noiya anchang ho jong Sagolband AC a FPS agent ho akon aki homdoh in hiche anchang hi Sagolband sung a cheng jouse heng a pehding a aki lhatsap jeh in MLA local Area development fund akon dk. lakh 12 tobang amang uvin anchang quintal 500 acho uvin ahi. FPS agent ho Sagolband sung a chengden ho kum 5 apat achung lam sese mikhat a kg 5 hisap in ahom uvin ahi.