Covid test boldi kicha (Covid Vaccine kisemdoh hi ichan kineppi thei ahidem)

Covid test boldi kicha (Covid Vaccine kisemdoh hi ichan kineppi thei ahidem)

34
0
SHARE

Aug 14, 2020 Editorial

Covid test boldi kicha
(Covid Vaccine kisemdoh hi ichan kineppi thei ahidem)

Niseh a mi tamtah Covid-19 test kibol jingto lhon’a positive jong tamtah mudoh ahung umbebe jeh in mi tamtah in test kiboldi jong akichat tho tai ti mudoh thei jong ahikitne. Test kibolnomlou ho geldan hi buhse ham, khosih tisat (temperature) themkhat veiho test kibol phot phot jouse covid positive ahi tin result apot jeng’e ti ahi. Adamsel ho gei test kibol nomlou jong umnalai ahi. Health worker test bol’a pang khat le ni’n nikhatna mi hijaja test bolteidi, mi hijaja positive hisah teitei di ti kichepina khat jong aume tiloi umjong hi mi tamtah test kibol nomloulo ahi. Hiche hi adih adihlou thuchom hitantin ahithei chana test kibol divang ngai ahi. Adamsel chu positive result pot dehlou di ahi. Ahin Positive khat aum’e akitileh ama keu hitalouva ainsung akho aveng pumpi gei jatchom tah a vetna (stigma) khat umpai jong hi hetna lhahsam jeh bou tina ahin chutitah a kithet bolna umdi jong hilou ahi. Ajeh chu positive ahi tia Covid Care Centre (CCC) a kikoi hojong thupi tah a lou kipea kijen hisohkei dehlou, chomkah a damdohpai loi jong tam ahi. Akiseisa banga  tuchan’a Manipur dehdeh a covid positive a thi hohi natna dang neisa ho ngen hinalai ahi. Chapang leh kum tam tehse lang ho covid akilahbai uve kiti ahin anu apa positive hia acha naosen noi chepnalai anu toh kilhakang khaloulai positive hikitlou jong Manipur kisan’a ahi hi test bolna manchah dihlou jeh ham, mi hijaja positive hisah teidi ti target aum’e kiti jeh ham kihetalou ahi. Tehse lang ho positive ahileh adamdohna di ahahsai tia kisei vang’in Nagaland a kum 90 khat positive a kon damdoh kit ahi.

Leiset chunga gamtina Pharmaceutical Company jakhat lang’in covid vaccine (kivenna di lou) semdohna dia aki thitet thojing laijun Russia in kasemdoh taove ahintiu hi ichan kinep pi thei ham seithei hiloulai ahi. Russia te semdoh covid vaccine hi Sputnik-V asah un tahsan theitah ahi ti vetsahna din Russia President V. Putin chanu khat jong alou (vaccine) chu akikapme. India a Bharat Biotech company injong Covaxin kiti Covid Vaccine kasemdoh taove atisau ahin hinlah ‘Trial/test’ hi chelha loulai ahi. Gamdang dang honjong covid vaccine kasemdohtai ativang uva vannoi mipi’n hiche hiba ahi tia kikapdi (injection) hi gamla nalai ngen ahi. Ajeh chu ipi vaccine kisemdoh jongleh ‘clinical human trial’ kiti mihem chunga patepna hi adandan (phase) a bol ngai ahi. Mi tamtah in covid vaccine kisemdoh kal angalel vang uva America a mi tamtah in vaccine umjongleh kikap ponge tiloi umkit ahi. Alhangpi’a hiche ‘clinical human trial’ hi phase 3 lut ahi. Midam theitah ho chunga test bol ngai ahi. Phase 1 a hi kum 18 le kum 55 kikah mi 370 vel bol masat di, Phase 2 a kum 12 leh 65 kikah mi chunga mi 750 vel bol ngai, hiche jouleh Phase 3 a kum jat chomchom le mi tamjep chunga test boldi ahi. Agom’a kum khat lang beh lut di chu Russia hon lha 2 sunga hiche Trial hi ajo jeh uva atahsanlou loi um ahi. Ipi hileh khovei kumbul langa vang covid vaccine hi bazaar a hung kijohpan di ginchat ahi. Tua hi natna kithejal hi alhunna di (peak) aphahloulaija kisei ahi.