COVID-19 positive athah 3 hetdoh be ahi toh kilhon a Manipur a...

COVID-19 positive athah 3 hetdoh be ahi toh kilhon a Manipur a active case 5 um ta

56
0
SHARE

COVID-19 positive athah 3 hetdoh be ahi toh kilhon a Manipur a active case 5 um ta

Imphal, May 16(ET): Green Zone tia phondohna um Manipur gamsunga Covid-19 case achesa ni phabep sunga atam cheh cheh in, Saturday nikho a Covid-19 positive case athah 3 (thum) akihetdoh be toh kilhon a gamsunga hiche natna neiya agom a mi 7 alhingtan, hiche lah a hi active case 5 ahi, tin thulhut in aseiyin ahi.

Athah a positive ahi kihedoh mithum lah a mi 2 hi kum 48 a upa pasal khat le kum 75 a upa numei ahi’in, RD Wing Lamphel a ‘quarantine’ a akoiyu ahi. Amani sample hi RIMS a test abol u ahi’in, Saturday jingkah a ani lhon a coronavirus positive ahilhon photchen hi ahitai.

Ani lhon a Moreh a kon ahi lhonin, Mumbai khopi a kon Imphal chan private gari a hung lhon ahi, tin thulhut in aseiyin ahi.

Tuni a natna anei athah a kihedoh athum channa hi kum 22 a upa numei khat ahi’in, VRDL, JNIMS a test kibol ahi. State sorkar in gamdang ho nungpui nadinga agon train a Chennai a kon hung ahi. Community Quarantine Centre, St. Stephen School, Saikot a quarantine abol u ahi’in, May 14 nikho a tisat anei jouva apet pet a District Hospital Churachandpur a apui uva, Isolation ward a admit abol u ahi. May 14 ni a VRDL, JNIMS a sample athot u ahi’in, tuni a bou result amu u ahi.

Achesa May 14 ni a Mumbai a kon hung kile a Kairang Khomidok, Imphal East a cheng mikhat jong positive ahi kihedoh ahi. Ama jouva Kamjong district a kon kum 21 a upa numei khat May 15 nikho a positive ahi kihedoh kit ahi. Numeinu hi Kolkata a kon hung kile a, NIT Takyel a um ahi’in, JNIMS a test kibol ahi.

Saturday nikho a RIMS State Level Viral Research & Diagnostic Laboratory a test kibol mi 8 lah a Moreh lhang mi hiya, Mumbai a kon hung kile mi 2 positive hi ahi. Amani hi nu cha hilhon ahi’in, Tata Memorial Hospital, Mumbai a kon hung kile lhon ahi. Tua hi Covid Care Centre, RIMS a akoi tauvin ahi. Achesa May nisim 8 nikho a Mumbai khopi a tangden mi 36 akisei holah a pang lhon ahi’in, May 13 nikho a hunglhung lhon ahi. Ahin kilhon pi adang hohi abon uva ‘negative’ hiu ahi.

Imphal West DC in Quarantine centre hi gamkaiya natna achal louna dinga ‘Containment zone’ a phondohna anei tan ahi. Hostel umna complex abon a akhah uvin, quarantine centre a mi lut le pot ding akhah uvin chule Containment zone a aphondoh na lhang (area) uva um school, office le adang dang jong akhah tauvin ahi. Authority hon Covid-19 case Surveillance jong apang uvin ahi. Alangkhat a, gampam a umho ahunglut be jing toh kilhon a achesa ni phabep sunga kon nikhat a hi test kibol 200 vel a akalsah pan u ahitai.

Manipur gam a Covid-19 positive case masapen hi March 24 ni a kihedoh ahi’in, ni phabep jouva mikhat kihetdoh be kit ahi. Case masa teni negative ahi jouva Manipur gamsung hi Covid-19 Free State tia phondohna um ahi. Tu le tua gamsunga Covid 19 active case 5 ahi’in, natna nei agom a 7 lhing ahitai. Case masa teni hi akijendam jouva hospital a kon asoldoh uva, hiche toh kilhon a gamsung hi Green Zone tia Centre sorkar in phondohna anei ahi.

Hijong le, Manipur gam pam a tangden mi asang a sim ho gamsung in apuidoh be jing toh kilhon a gamsunga natna athah a kisei kit ahi’in, hiche jeh a gamsunga lungjinna um ahi. Thulhut dungjuiya, gamsunga sample 1900 test kibol ahitai. Dan kisem dungjuiya ‘quarantine centre’ ho a ‘contact tracing’ le bol ding adang dang ho chelha jing ahi. Red Zone a kon hung kile ding atam nahlai toh kilhon a gamsunga Covid-19 case jong akalbe jing ding ginmo ahi.

Manipur a hunglut private le hired gari jouse Pass phat chomkhat a dinga kisumang ta

Imphal, May 16(ET): Home Department, Manipur government in phat chomkhat a dinga Manipur gam private gari ahiloule ‘hire’ kibol gari a hung lut ho ‘inter-state pass’ kipe avohai tauvin ahi.

Gam chom chom a tangden ho a kon thil lhung ho dungjuiya sorkar in hitobang thulhuhna anei ahi. Special Secretary (Home), H Gyan Prakash in soi akaina office memorandum a, achesa April nisim 16 nikho a ‘office memorandum’ a kipe dungjuiya adamlou ho (patient) ho pass hi kipe jom ding ahi.

Category phabep tilouva Curfew Pass adang jouse suhmang dinga Chief Secretary in thuso nei

Imphal, May 16(ET): Government authority hon mi phabep (individual) le gari phabep ‘curfew pass’ asodoh ho abon a vohhai (cancel) dinga state sorkar in thulhuhna anei ahitai, tin Chief Secretary Dr J Suresh Babu in soi akaina office memorandum a aseiyin ahi.

Curfew pass hi pass neihon alam louva aman na aume ti thu sorkar in ahet a chule district level a officer chom chom in ‘pass’ chom chom asodoh jong hetpehna anei uvin ahi. Hiche jeh a tua kon Imphal West le Imphal East district a dinga Old Secretariat Complex gate a curfew pass ngehna a application ho lah nading counter kihong doh ding ahi.

Curfew pass ngehna application jouse hi Deputy Secretary (Home) henga addressed bol ding chule applicant hon mobile number apeh diu, pass thot thei nading (electronically) jong apeh diu ahi. Applicant hon curfew pass adeiyu nikhat masanga application apehlut u ngai ahi’in, ahon hon a kipe louding ahi.

Imphal West le Imphal East tilou Deputy Commissioner jousen ama ama jurisdiction a ‘curfew pass’ apehdiu chule district sunga gari lhai le asuhlhom diu ahi. Changval hihen lang organization hijong le neh le chah chule thil dang dang kithopina pe nom hon ama ama Deputy Commissioner in ahondoh ‘Food Bank’ a apeh diuvin jong aseibe in ahi. Curfew Pass akisodoh sa ho suhmang soh dinga thuso aum vanga Chief Secretary in Pass kichoi thei category ho athah a thuso anei na’a ape in ahi.  Curfew Pass kikahna a kon exempt (akipansah lou) holah a hi Health Care Professional le support staff ho hiding, identity card avetsah diu ahi.

Print le electronic media jouse (identity card avetsah diu) kiphal ahi. Jiribam a kon train a hung ho po le dinga driver le handymen chule association member jouse jong apang in, amaho hin Director, Transport in Pass apeh avetsah diu ahi.

Government officer le official, Covid-19/Lockdown toh kisaiya natoh kipe ho ahi’in, amaho hin duty order le identity card avetsah diu ahi. Municipality in thil sutheng dinga athalah ho jong kilha ong ahi’in, amaho hin MAHUD Director in asodoh pass avetsah diu ahi.

Government officer le official angaicha khoh vetup dinga nganseina kinei hon identity card le duty order avetsah uva ache le diu kiphal ding ahi. Sorkar natong application pe nom hon application hi curfewpass@qmail.com email a apehlut theiyu ahi’in chule applicant adang hon curfewpassmnOl@qmail.com a apehlut theidiu ahi, tin Chief Secretary Dr. J Suresh Babu thuso chun aseibe in ahi.

 

‘Curfew Pass’ suhmang dinga Order kisodoh lahdoh dinga Manipur Congress in thumna nei

Imphal, May 16(ET): Manipur Congress hon Saturday nikho a Curfew Pass suhmang dinga state sorkar in notification asodoh alahdoh diuvin thumna anei uvin ahi.

Congress spokesperson O Nabakishore in party office, BT Road, Imphal a thuso miho akimupi na’a, Chief Secretary J Suresh Babu in office memorandum asodoh na a state government authority jousen district level a changval (individual) chule gari ho Curfew Pass apeh ho apet pet a suhmang/vohhai dinga thuso anei ahi’in, sorkar in Curfew Pass alam louva akimang e, ti ahet jeh ahi, tia kisei ahi, ati.

Curfew pass adih louva akimang e, tia kisei hi ipi asei na uham ti sorkar in asuhtheng ding ahi, tin Nabakishore in thumna aneiyin ahi. “Order hin Imphal West le Imphal East tilouva DC adang jousen ama ama jurisdiction a Curfew Pass issue abol thei diuva phalna kipe ahi’in chule district sunga che le va le suhlhom dinga kisei ahi”, tin Nabakishore in aseiyin chule District teni a DC in Curfew Pass asodoh ding akikha na ajeh hi thudohna neithei dol tah ahi, tin aseibe in ahi.

“Ipijeh a Imphal West le Imphal East DC in ‘curfew pass’ asodoh thei nading thaneina kilahpeh ham? Sorkar in notification hi gangtah a alahdoh ding ahi”, tin Nabakishore in thumna aneiyin ahi. Office Memorandum a kisei ‘Food Bank’ chungchang thu jong Nabakishore in aseiyin, sorkar in Lockdown sunga angaicha ho kithopina apeh hibou ning lhing joulou ahi, ati.

“Angaicha bulhit nadinga social worker chom chom in angaicha ho neh le chah, hon min sa an panna a kithopina a thil apeh u ahi. Kithopina a kipe thil hohi ‘Food Bank’ a akikoiya ahile mopohna nei DC in ahon ding ahi’in, akikoi neh leh chah chule thil le lo hohi angaicha ho heng lhung mong ding ahinai tihi sorkar in asei ngam ding ham, tin aseiyin chule koiyin Curfew Pass hi adih louva aman ham”, tin jong aseiyin ahi.

Sorkar in order asodoh na a Old Secretariat Complex a curfew pass thumna application ho lahlut nading counter kihong ding ahi, tia asei ahi. “Application hon Curfew pass jouse hi Deputy Secretary (Home) min a apeh lut diu chule Curfew Pass athot thei nadiu mobile number jong apeh diuva kisei ahi. Chule physical pass khatcha kipe louding ahi”, kiti ahi.

Chule application pelut hon ni khat masanga apehlut diuva jong order kisodoh na a kisei ahi. “Curfew pass hi mikhat kipe ding, tamtah (bulk pass) kipe louding ahi”, tia jong order a kisei ahi.

Covid-19 Consultative Committee in Lockdown May 31 chan susao

Imphal, May 16(ET): Tunin Chief Minister chairman hina noi in Covid-19 consultative committee in meeting ana bol uvin ahi. Hiche meeting chu gampam akon hung lut ho jeh a natna gamsung a hung kibe jing toh lhon a ana kibol ahi. Mi hunglut jing toh lhon a gamsung a quarantine um jat hole test bolna kining lhing le lhinlou thu jong seihom na ana nei uvin ahi.

State sung’a lockdown ahung lhungding May nisim 31 chan a suhsao be ding in jong phondoh na ana nei uvin ahi. Mipi heng a curfew pass kipe ho jong kah lhah soh kei ding pass system thah semdoh ding tiho jong ana sei uvin ahi.

Meeting achun train a hung lut ding hohi book kibolsa hobou hung lut thei ding in seilhah na ana nei uvin ahi. Hiche train ho chu Bangalore akon nisim 14  a hungkipat doh, Baroda akon nisim 15 leh hung kipat doh, Vijayawada akon nisim 17 le kipat doh ding, Hyderabad akon nisim 16 a kipatdoh, Haryana akon nisim 18 a hung ki pat doh ding,  Dehradun akon nisim 19 a hung kipat doh ding, Chennai akon nisim 19 a hug kipat doh ding le Kerala akon nisim 21 a hung kipat doh ding ho ahiuvina hi. Hiche ho tilou a koima dang train a lutsah phal ahi tah lou ding dan jong tahlang na ana kinei in ahi. Tu le tua hung lut ho tetst kibol chai tokah a lampi a hung ho jong phal nap eh tah louding in hetsahna ana kinei in ahi. Quarantine centre ho vetsui na chung chang a nodal officer ho in MLA hotoh kikhut jopna anei jing an ding uvin jong hetsah na ana kinei in ahi. Gampam a kon hung lut ho tetst bol tei ding chuleh quarantine centre a phate a umsah ding, negative hi ho inn a umsah ding,  quarantine centre a natong ho PPE peh soh kei ding tiho ana sei uvin ahi. Gov tin Deputy commissioner ho ang a hiche ho a jah dig fund lhadoh na anei diu dan jong seilhah na ana nei uvin ahi.

Gamsa kitha thu’a hehna kisem

Imphal, May 16(ET): Joint Co-Ordination Committee on Wildlife and Biodiversity (JCCWB) Manipur a Co-convenor Irengbam Sanaton in aseina achun tuni jing pung 5:00 don chun Kakching district sung a Sekmaijin Maning Leikai a Khoidum pat a vacha thang tamtah akimudoh in chule JCCWB hotoh Kakching Range Forest Division ho kitho in thang a ohden gam vacha ni jong aki huhdoh e ati. Irengbam in aseibena achun thuguh kijah dungjui in hiche mun chu kholchilna akinei na a vacha thang ho chu kumudoh ahi ati.

Alangkhat ah Kangpokpi Forest Division Officer, Chinpilhing Kipgen in kpi gamsung a sakhi ni toh gamvoh khat sakap hon atha jeh uvin complaint khat abol in ahi. Sa kithat le akap ho chu janhi chun social media ah Mangcha Khongsai kiti pahin ahin tahdoh ahi. Hiche gamsa ho kithat chung a hi Animal Protection Act 1979, schedule III noiya kikhap ahi.

Manipur mi nurse 185 in Kolkata private hospital a anatoh haisan’a innlam hinjon

Kolkata, May 16: Manipur akon nurse 185 lam Kolkata a private hospital a na tong ho chu ana toh nao hin dalha in inlam ahin jon taovin ahi akiti.

Kolkata a covid-19 natna nei hung khan jing toh lhon a mitin in a inn lam cheh akijot jing ahi.

Natna kibe jing toh lhon a khopi sung a umding tijat na anei utoh lhon a nurse ho chun innlam ahin jot u ahi akiti. Nurse ho akon thuso kimu dungjui in ka inkote ho u alunggim uvin, inn lam a natna nei aum beh lou lai toh lhon a kile ding tohgon kahin nei u ahi ati. Innlam jot na chung a ka um na u state govt in kithopina eipeh ding u ahin tin jong nurse ho chun ana sei uvin ahi.

Hetthei khat chu West Bengal a covid-19 natna nei hi jani chan a 1,407 lhing a,  mi 153 lam in thina ana to u ahitan ahi. Kadam nalai ule natoh na dang kaki mu ding u ahin, hijeh achu dalhah ding chu kahin gel lhah u ahi tin nurse ho chun asei uvin ahi. Thuso kimu dungjui in muntin a nurse le mi phabep in innlm jot nading in gari ahin kihol uvi ahung uvin ahi akiti.

Hiche nurse 185 ho jou hin, nurse dang 132 lam in Imphal lam ahin jon kit uvin ahi akiti. West Bengal a nursing college umlou jeh ahi nurse hi vaat ji ahiuvin, hiche ho hung kitol doh hin hospital ho nasatah ahin toh khah ding ahi tin, chairman, Healthcare Sub-committee, CII Eastern Region in hetsah na ahin nei in ahi. Kolkata a hospital ho hi Manipur, Tripura le Kerala akon nurse ho a kingam jing u ahidan tahlang na jong ana kinei in ahi.

Kuki Inpi Manipur in Ukhrul district Lihtan area a Kuki kho ho vilna le kithopina pe

Mangneo Touthang

Imphal:16th May(ET): Kuki Inpi Manipur makainan AMMOCOC leh Social Worker & Ex UCM President Elangbam Johnshon in Ukhrul District Lihtan  area a um Kuki kho Chehpu Jaolen, Litan Sareikhong, Mongkot Chehpu, Sangkai, Lamlai Chingphei, Jalenbung, Molnom, Songphel, Mullam,  Pashong, Molsohoi, Shongmun, Thawsi Kuki, K. Mollen leh Khomunnom ho vilna ana nei uvin kithopina Anchang bag 30, Dal, Chi (Salt)  Thao (M-Oil), Muhtom (Mask) ho jong ana peuvin ahi.

Hiche Relief Material ho pehdohna kin chu  Lamlai Chingphei Community Hall a Lhang Haosa holeh Gamkai MDC Zamkholet Khongsai jaonan ana kibol in Kuki Inpi Manipur President Khaimang Chongloi, Md Jalal, Presdident All Manipur Muslim Co-ordinating Committee leh UCM Ex President Johnson Elangbam hon houlimna anei uvn ahi.

Khaimang Chongloi, President Kuki Inpi Manipur ahoulimna ah, Kuki Inpi Manipur in Sum jong akinei pon, gamsung mipi hahsatna ho kithopina ding source ima jong akineipoi, hijongle gamsung huinun dan in aphaltah lou jeh a jochan na panlah ding hung kigel a namsung leh loile gol ho a kon kithopina tam hih jongle hung um theija, hiche hohi Namdang toh i-um khomnau Constituency Karong, Ukhrul, Tadubi leh adang dang ho a cheng Kuki chate genthei hahsa dehset set ho beh kipe hen tia hung kikal song ahi ati.

Tulai huinun dan leh gamsung dinmun hohi ivetna hileh nang ho kei ho tia  kikhentel naphat chu ahitapoi, Pule pa khanga kipat Chingmi-Tammi amatane kitibang a tunia hi gamsunga chengkhom hon iti lamdol a hiche Covid-19 natna hi idoudal uva pha ham ti mangcha Phaicham a cheng CSOs hotoh kilungkhat tah a pan kilakhom ahi.

Tunia hung kipo Anchang hohi atamjong ahipon, oi-va nakham jong ahipoi Hijongle Khosung Inpi ho/Haosa hon khosung pumpi kihom jou hih jongleh khosung a genthei hahsa dehset ho tanggol-kibang’a na nahoppeh diuvin tepna jong kahin neije ati.

MD Jalal President, AMMOCOC in aseina ah tuni hung kipolut anchang leh me hohi imacha ahipon, kikum phahna kham jong ahipoi, hijongle Manipur gamsung’a cheng jat le nam hohi khat ihiuvin, maban ajong kilungkhat tah a koima khentum neilouva ichenkhom diu vetsahna jal’a Kuki Inpi Manipur toh kithokhom’a tam hih jongle hung kithah lut ahi ati.

Johnson Elangbam, Ex President UCM in aseina ah tulai gamsung boina jeh hin Nehle chah nitin kimanchah na ahahsa lheh tan, hiche natna hise hi itihchan aum ding akiseithei pon ahi. Tuhin Imphal a kon nehle chah thinglhang ah akipolut jin, hibang chun Thinglhang a cheng sopi hon jong gam ga ho nahin holkhom ji-un, Imphal a um nasopi hou nehdin nahung thahji uvin hitobang’a iki lungkhat nau leh iki ngailut nau hohi ivetleh Manipur acheng eihohi kinathei ihi pouve ti avetsah ahi ati.

Tunia CSOs hoa kon Imphal lam a kipat nehle pohlut ana hi kipapinan gamsung Ga thinglhang me phabep jong gamsung mipi ho ana loukhom uvin, hichu Kuki Inpi leh ahung kalsong CSOs ho khut ah pehdoh na kin jong ana neikit uvin ahi.

Relief Material Hopdohna kin chaijin, Kuki Inpi Manipur leh AMMOCOC chuleh Johnson Elangbam leh a team hon Mongkot Chepu Quarantine Centre vilna ana neijun ahi.

Janglenlal Haokip General Secretary KSO Ukhrul District in aseina ah Quarantin Centre kisem hi Govt. in hetpehna jong einei peh pouvin, local MDC Zamkholet Khongsai leh Kuki Inpi Ukhrul ho kithokhom’a Dangka 50,000/- ahin todoh uva kon ana kipan ahin, tuhin Tezpur (Assam) a kon hung mi 2 aum pantai ati.

Tunia gamsung mipin kadei uchu ahileh Govt. a kon Officer khat beh hung henlang kabol uhi dih hinam tijong eihung vetlhah peh uleh kadeiyu ahin, hinlah tuchan in Govt. lang a kon in Dr hihen Test kibolna ding hihen angaicha ipi hileh aum thei hih laijin, hijeh chun ahithei leh hilai Quarantine Centre mun jong hi Govt. in eihung vilpeh uhenlang angaicha ijakai peh dia lom aum jongle eihung kithopi uleh tihi gamkai mipi ho ngaichat chu ahi ati.

 

‘Samagra Shiksha Manipur’ scheme noiya ‘online class’ English a bol dinga TSA-GHQ in temna nei

Imphal, May 16(ET): Thadou Students’ Association, General Headquarters (TSA-GHQ) in ‘Samagra Shiksha, Manipur’ scheme noiya department in e-Videos Learning Classes abol apachatna thuso anei uvin ahi.

Faculty team, technical team chule department team hon adeh a simlai ho mitmu a lekha het be nadinga hitobang package ahin patdoh theiyu hi pachatna kaneiyun, hiche hi Covid-19 jeh a Lockdown sunga simlai ho puihoui na a akithopi hiding ahi, tin Thangminlun Haokip, Secretary, Ministry of Education & Statistics (MES), Thadou Students’ Association (TSA) in soi akaina thuso a aseiyin ahi.

Video hi kavet ule lekha kihilna hi 95% Manipuri a ahi. Hiche hi thinglhang a um simlai ho dinga ahet ahahsa lheh in, state sorkar in gamsung mi ngaichat chom chom vetna dinga pan alah dan akilom lou jong ahi. Pao hetna alhahsam jeh a thinglhang district a simlai hon tutorial video hi ading banga aphatchompi theilou diu ahi, ati.

State pumpi a dinga kisem ahijeh a online video hi English a sem ding TSA in adei ahi, hiche hi gamsunga um school jouse a ‘medium of instruction’ jong hi ahi. Hiche jeh a aumsa tutorial hohi mipi ding, adeh a simlai ho ding gelna a aganna thei pen a English version a sem dinga ngehna kinei ahi, tin thuso chun aseibe in ahi.

Saikot Quarantine khatup hita

Ccpur, May 16(ET): Churachandpur sunga  covid-19 positive khat matdoh ana hi toh lhon in DC Pawan Yadav in hetding a dol phabep phondoh na ana nei in ahi.

Hetthei khat chu Saikot Stephen High School quarantine centre  a um khat tuni a positive anahi ahi. District DC akon thuso kimu dungjui in  Saikot lhangsung aki khah tan ding, asung a um ho kipot sah lou ding chuleh apolam  akon koima kilut sah louding ahi akiti. Hiche thupeh nitlou aum le daan dungjui a gotna kipe ding ahi dan jong hetsah na ahung kinei in ahi.

Assam a Covid-19 case 91 phata

Guwahati, May 16: ‘Aloo Godam’ case toh kisai in Guwahati akon mi 2 COVID-19 psitive ahikit tan ahi. Hiche toh lhon in  Assam sung a Covid-19 natna nei agom in mi 91 ana lhingtan ahi. Assam health minister Himanta Biswa Sarma in natna nei mi 2 anakibe chu tuni a phondoh na ana nei ahi.

Minister pa akon thuso kimu dungjui in natna nei thah hetdoh ana hiteni chu Mahendra Shah (57) le Suman Thakur (20) ahi akiti. Khat pa hi Thela tol ahin chuleh khat hi sam hou ahi akiti.  Hetthei khat chu Aloo Godam a natong Mungru Sahani kiti khat in covid-19 natna ana nei toh lhon a atoh khom pi jouse le akiloi pi ho khop khomna ana kinei a hiche toh lhon a test ana kibol ahin, akiloipi mi 17 lam in tu chan in hiche natna hi anei uvin ahi akiti. Tu chan ahi Assam akon hiche natna nei hi mi 91 lhing ahitan, hiche ho lah ahi tu le tua positive hi mi 46 ahi akiti.