COVID-19 laitah a by-election campaign hondoh a um, mihem 100 val in...

COVID-19 laitah a by-election campaign hondoh a um, mihem 100 val in Chief Minister N. Biren Singh lemna nei, SOP in mi 30 chunglam kikhopkhom phal lou

126
0
SHARE

COVID-19 laitah a by-election campaign hondoh a um, mihem 100 val in Chief Minister N. Biren Singh lemna nei, SOP in mi 30 chunglam kikhopkhom phal lou

Imphal, Sept 9(ET): Tulai COVID-19 natna jeh a juiding a kisem SOP dan leh mipi 30 chunglam kikhopkhom naleh SOP dan in aphallou hijeng jong leh, social distancing jui behseh louvin tuni chun Wangjing Tentha Assembly constituency a by-election dinga candidate a kigong ex-MLA Paonam Brojen a ding in Chief Minister N. Biren Singh in by-election campaign hondohna ana neitan ahi.

Manipur sunga assembly seat ong phabep lodim ahi nadinga by-election hi ahunglhung ding November lha leh India sung pumpi a assembly constituency a seat 64 ong umho toh thakhat a kibolkhom ding ahi. COVID-19 natna jeh in Unlock 4 hinung injong mipi kititkhom naleh gari tamtah manchah ding phal ahi naipon ahi. Election Commission of India in jong election campaign sunga juidinga kilom SOPs jong ana sodoh tan ahi.

Tuhin mi 50 chan kikhop khom theina phalna kipe hi kichenna kin holeh shradha kin ho a ding bou ahina ban’a SOP phatah a ajuidiu ahi.

Tuni nikho a Wangjing Tentha Assembly constituency sunga Sapam Community Hall mun’a kikhopkhom na achun thuso lakhom hon amittah a amu dungjuiyun ahung kikhom mipi hi 500 chunglam hidinga ginchat ahi in, community hall asung apo alodim hel jengin ahi. Wangjing Tentha Assembly Constituency a dinga Chief Minister ahung vailhun lhun chun BJP supporter ho lamlen pam’ah akigol uvin, Chief Minister pachatna in slogan sapna jong ana neiyun ahi.

COVID-19 natna toh akiboi laitah a by-election umding kiti hi kiloikhomna jat chom chom injong adeisah lou dan ana phongdoh uvin ahi.

Kikhopna kin a ahoulim na ah Chief Minister N Biren in Manipur Legislative Assembly member ahina akon a resigned kibol ex-Congress MLA pu apachatna thu aphongdoh in, tutua vaipohna nei BJP government suhdet na dinga a umna Congress hin dalha ngam a MLA ahina kisan chaan ngam leuva um ex-Congress MLA pu kipehdohna sanga lenjo aum pon Manipur thusim a jong kiseidoh kha behseh lou thusim khat ahitai atin ahi. Hitobang mi hohi mipi lamkai dihtah ahina ban’a MLA ahinau akon’a haina abol uhi mipi deidan ahitoh kilhonna abol jouseuva lolhinna amudiu ahi. Chief Minister in aseibe na ah mipi hon Congress a kon a haina nei ex-Congress MLA pu government dettah semkhom pithei ahung hina dinga tosot cheh ding leh lhendoh ahi tei nadin jong mipi ho temna aneiyin ahi.

Government dettah chun amipi te dei leh ngaichat hojong asuboi ding umlou keiya baitah a asuhbulhit pen jing thei ahi. Tutua government vaipohna hi party chom chom BJP, NPP, NPF, Trinamool Congress, LJP leh Independent ho kigomkhom a sorkar kitungdoh ahi jeh in phat khat khat leh lunggel kikal jeh in party chom chom akon in boina ahungsohdoh ji in, hitobang dinmun ahung um teng leh sorkar dingdet thei louvin lhuding sadem in aum ji tan ahi. Hiche ho jeh a apanmun dalha a haina hinbol MLA ho hi kipedohna lentah a sem ahiuve ati.

Chif Minister in aseibe na ah, mipi lung toh kitoh a natong MLA ho tosot cheh ding in temna jong aneiyin, khat leh khat kingohto leh kiseiset tuo naleh thu le la a kidouto naho atahsan lou dan leh tule tua sorkar vaipo ho in genthei vaicha ho mitlhi long ho kitheh hul ding peh ding, inn le lou neilou ho chenna inn kioe ding, insuon a sorkar natohna gonpeh hi ding ahi ati. Chuleh government in vaicha genthei ho dinga manbeiya kijenthei na gonpeh hiding, koimacha gilkel jeh a thina toh umlou ding ahi. Chief Minister gi Haksel gi Tengbang (CMHT) leh PM Ayushman Bharat jong aneilou te dinga kijenna a manchah thei a kibolpeh ahi ati.

ILP thua a houlim na ah, state sunga ILP manchah theiya ahung um ding tahsan na ana kibeipon, hinla centre lamkai ho phatah a jol lhahna akineitoh kilhon a state sunga manchah thei dinga hung umdoh thei ahi atin ahi. BJP in gamsung mipite akingailu jing in ahi. Tuhin gamdangmi ILP noiya phalna umlouva cheng theilou ahi tauve. Ihinau hoitah a ivenbit thei jingu ahi. BJP hung hatdoh a kipat thinglhang leh phaicham kikah a kikhutjop na leh kingailutna apunbe cheh in, bandh, blockade kitiho aum tapon, mijouse chamlhat tah in chele vale abolthei tan, mipi leh police ho kikah semhoi ahi jing in, politics kiti chu hiche ho hi ahi tinjong ahoulim na ah aseiyin ahi.

Chuleh tehse mi 20,800 tobang in tutua government akon in tehse sumsan akipe jing in, government lui ho noiya hiche chanvou chang dinga lom tamtah changlou tamtah hojong “Go to Village” mangcha in holdoh leh athahbeh a bolpeh in aum uve tinjong Chief Minister N. Biren Singh in ahoulimna ah aphongdoh in ahi.

XXXXX

Manipur a COVID-19 a thi 40 lhingta; Active case 1774 um

Imphal, Sept 9(ET): Manipur sunga Thoubal district akona kum 39 mi khat in JNIMS mun a thina atuo toh kilhon in Manipur sunga Covid-19 jeh a thina toh agomin mi 40 alhing tan ahi tin COVID-19 Common Control Room akon thuphon chun aseiyin ahi.

Chuleh nidan 24 sung mama in Covid-19 natna nei athahbeh in milham lah a kon in mihem 135 leh Central Armed Police Force (CAPF) a kon in mi 25 mudohbe ahi. Natna nei 135 kimudoh ho lah a 132 hi lhun leh potdoh na neilou ahiuve.

Milham natna neiya kihedoh hohi Imphal East akon a 53 ahiuvin, 52 hi  Imphal West, 12 hi Bishnupur, Kangpokpi leh Thoubal akon  5 cheh, 4 hi Kakching, 3 hi Senapati leh 1 hi Ukhrul akon ahiuve. Amaho se hi Covid Care facilities a koitup ahiutoh kilhon a vetkol ahi tauvin ahi.

Alangkhat ah, mi 64 discharged ahi tan ahi. Mi 37 hi JNIM akon ahiuvin, CAPF leh CCC Jiribam akon mi 6 cheh, 4 hi CCC JNV akon, RIMS, RD Wing, CCC Thoubal leh Tamenglong a kon mi 3 cheh RT PCR test kibol jouva COVID-19 free ahiutoh kilhon a lhadoh ahiuvin ahi.

Tuni chan a natna kimudoh agomin 7362 aphatan (Milham — 5624 leh Central Security Personnel -1738) ahi. Adamdoh jat agomin 5548 (Milham– 4335 leh Central Security Personnel -1213) aphatan ahi. Active cases agomin 1774 (Milham– 1251 leh Central Security Personnel – 523) apha tan ahi. Tule tua recovery rate hi 75.35 % ahitai.

Natna a kon hung damdoh ho adeh a  Imphal West and Imphal East, sunga Surveillance, testing leh Home Isolation ho vesui jing ding in Imphal West akon Doctor 7 Imphal East a kon Doctor 5 gon ahiuve tijong thusodoh chun atahlang in ahi.

XXXXXX

Thanglhangmi simlai kiloikhomna hon Sept 14 apat nidan 48 sung state pumpia bandh phongdoh

Imphal, Sept 9(ET): Achesa nisim 13 August, 2019 nikho a government of Manipur leh ATSUM, ANSAM leh KSO-GHQ in Chief Minister Conference hall a ana kinoptuo nau suhbulhit a aum lou jeh in ahung lhung ding nisim 14 September 2020 akipat nidan 48 sung inter-state bandh kibol ding ahi tin ATSUM information secretary Micah Kamei min a thusodoh chun aphongdoh in ahi. Hiche hi achesa 7 September 2020 nikho a Hmar Community Hall, Lamphel, Imphal mun a All Tribal Students’ Union Manipur (ATSUM)General Assembly kin a kithulhuhna ana umsa kichepi ahi tinjong atahlangin ahi.

Hiche kiphinna hi government in kinopto na ana umsa banga government college chom chom a ST ho dinga Assistant Professor tohmun ong ho suhdim ding, government hetpehna B. Ed simthei na thinglhang district ho a koi ding, Tamenglong leh Senapati government college ho a Science stream umsah ding, amun district cheh a kon a recruitment cadre semdoh a employees ho utilization kibol lele ho suh hai ding, Tribal Affairs and Hills noiya staff thalhing set a umsah a lahbe ding, Hill Contract Teachers 2006 batch ho regularise hisah ding, 6 Autonomous district ho a primary teacher lahna dinga mother tongue(child’s language) jilkung khat hi nadia alou theilou hisah ding, TRI jong Directorate gei a suhpilhing ding, ST ho dinga tohmun ong ho atumbeh a thinglhang mite chanvou kepbit ahina dia  Tribal Sub Scheme (TSS) manchah ding, department jouse a DoPT, government of India dan dungjui a ST ho adia tohmun ong jouse a reservation quantum manchah a central institution hoa group C leh D direct recruitment bol a manchah hiding, Hill district sunga Health Services ho a natong thalhingset a koi ding, thil le lo manchah kimsel a koi ding, specialist Doctor koicheh ding, IGNTU-RC full fledged university hisah ding tiho a kinopto na umho government in tuni chan a nahsah a akoilou dan leh suhbulhit ahi nailou dan thusodoh chun atahlangin ahi.

Thusodoh in aseibe na ah, state government koma ngehna ana kibolsa government in tunichan a suhbulhit a akoilou danjong aphong doh in, phabep hung kitahlang ho gah hetthei ding in, achesa nisim 9 June, 2018 nikho a State Government leh ATSUM, DESAM leh AIMS in MoU ana bolsa banga Chief Secretary dinga agam mi IAS officer ho gon hi dinga kinopto na suhbulhit ahi lou dan, chukit leh government of Manipur leh Hill District Private Schools Association Manipur (HIDIPSAM) kikah seitoh a kinopto na kilomtah umsah hiding,  MCSCCE 2016 main examinationthu a CBI enquiry suhhat jing ding, CBI thukholna achen achai aum a kigolna neiho gotna peh ahi masang se a Re-examination bol lou ding, MSPDCL promotion toh kisaiya reservation hoitah a umsah a manchah ding, thinglhang gam a mining kibol ho suhtang hiding, ministry of Tribal Affairs, Govt. of Manipur noiya Pre matric leh Post matric scholarship ho akinthei pen a hopdoh ding tia ngehna ana umsa donlouva umjing ahidan jong aphongdoh in ahi.

Hiche kiphinna sunga tulai natna Covid-19 toh kisai kimanchah naho, media leh medical service ho kilhakang ding ahi. Interstate a lhai le ho leh vonpo honjong hiche kiphinna hi jabol cheh a kithopi cheh ding injong Micah Kamei min a thusodoh chun atanglang in ahi.

XXXXXX

CCpur District sung’a CSOs leh JAC lamkai na’a tuni peace protest rally chelha ding

B.LALBOI GANGTE

CCPUR. SEPT. 9 (ET) : (L) Arambam Ranjan kithana chungthu’a tuni chan’a Govt. leh Police Department lam’a kon tohdoh ima aumlou jeh in tunin Khuga Tampak, Zoveng mun’a CCpur District sung’a Civil Society Organization leh Joint Action Committee (JAC) lamkai hon maban’a panlah ding dan seikhomna ananei uvin ahi. Hiche phatsung’a chun thilsoh chung kholchilna suhhatbe nading  leh agannathei pen’a tolthat ho matdoh ahi nading nona’a peace protest rally nei ding in kiphatsahna ananei uvin ahi.

Hiche toh lhon’a thilsoh chung thu’a Joint Action Committee (JAC) in Press/Media akimupi nao’a CSO hotoh kihoukhomna dungjui’a peace protest rally nei ding’a kithulhuh na anei dan’u tahlangna anei in ahi. Chuleh Sairam Ibungo, Convener JAC in jing ( Sept. 10) nikho jinglam nidan 10:00 akon CCpur District sung’a Civil Society Organization CSOs chom chom lamkai nanoi’a peace protest rally chelha ding ahidan aphongdoh in ahi. Hiche phatsung’a hi Government ading Memorandum pehlut hi ding chule maban’a lungdei bang’a natoh doh aum louleh aphat dungjui’a kiphinna chom chom kichelhah peding ahi tinjong seiyin ahi.

Xxxxxx

Kuki Inpi, Imphal in “SAHNIT NI” ding toh kisai’a thuphon nei

Imphal, Sept. 9 (ET) : Kum seh’a ana kinit jing “SAHNIT Nl – KUKI BLACK DAY” nikho tukum jong ahung Ihung ding 13th Sept. 2020 nikho leh Imphal khopi sung’a um Eimi veng jousen Kuki Inpi Manipur (KIM) thupeh banga nit cheh ding in Kuki Inpi, Imphal General Secy. T. Robert Baite in thuphonanei in ahi. Ahin gamsung COVID-19 pandemic jeh’a kum masa bang’a mipi kitit khom thei lou ding ahi tah jeh in COVID SOPs jui puma vengsung, Houbung in ama ama hina theicheh’a aman cheh ding uvin mipi hetsahna jong anei in ahi.

Xxxxxxx

KSO in AMHDMEA ngehna tosot

Kangpokpi, Sept 9(ET): Tunichun Kuki Students Organisation (KSO) Ukhrul district in Manipur government kom ah All Manipur Hill Districts MGNREGS employees Association (AMHDMEA)   ngehna govt in amolso peh din ngehna anei uve.

AMHDMEA in sot a pat hill district a MGNREGS natong ho service regular sah nadia ngehna ana neijing chu government in ngehna kibol ana limsah lou ahi e, ati.

Hitolhon a KSO in AMHDMEA ngehna tosot ding a aphondoh ahi.

KSO in aseibe na ah state government in phaicham sung a ho achesa  kum 5 sung in regularisation anabol in hinla thinglhang gam agelkhoh pon, hitobanga state government in sihnei langnei a na atoh jingleh thinglhang leh phaicham kikah a kihet khel na ahin lhut thei ahi, ati.

District MGNREGS natong hojong phat khat a chu ana boisa ahi in state government in “CHINGTAM AMATANI” tahso nadia avel a panla dia KSO in government ngehna anei ahi.

Xxxxxx

NEP 2020 chungchang National Webinar a Education Minister in panla

Imphal, Sept 9(ET): Education minister Dr Thokchom Radhesyam in athahbeh a kisemdoh national education policy 2020 in class 10+2 school curriculum semhoina din 5+3+3+4 kum 3-18 kikah a simlai ho hi kum 3 a pat a huopsah din asei e. Danthah noi a themjilna 5+3+3+4 hi childhood care and education (ECCE) ahi in ahithei chan a Chapang hi matah a themjil na hil ding tupna anei ahi.

RK sanatombi Devi college of education, Imphal le RK sanatombi Devi makaina noi a chelha NEP 2020 thu a national Webinar a Jin-Gun a pang Radhesyam in aseina ah home language / Eima pao hi class 5-8 kikah a manchah ahile chapang hon kihil na ahet themjoh diu ahi, ati.

2020 national education policy hi ahung che thei leh Prep apat a class 5-8 chan hi Eima pao a kihil nahi hung che ding simlai chapang hohi class 3 a kipat a hi pao 2 beh a jihtho hihen simtho hijongle anei thei u angai e tin Minister Radheshyam chun asei e. Simlai chapang hon English le local /Eima pao a lunggel ngaitona aseidoh theina diu a pan lah hiding ahi e, ati.

Hiche Webinar a mihil a pang chu national president, council for teacher education foundation Dr. K. M Bhandarkar le internal secretary general le chairman council teacher education foundation Assam ahi. Associate professor Kh. Ajit Singh chu moderator a pang ahi.

Kingon a chun Director, RK Sanatombi Devi College of Education, Smt. Jina Thongram, Asst. Prof. RK Sanatombi Devi College of Education, Smt. Thangjam Medha Devi, academician, jilkung le simlai ho apang un ahi.

Xxxxxxx

CM in Chandel district khantousah dia kitepna nei

Imphal, Sept 9 (ET): Chandel district kikhel le khantousah nading a pangkhom cheh ding in video conference a Pallel le Chandel lampi kehlet ding vangthum pehna kingon tunia kiman pet chun Chief Minister Shri N. Biren Singh in mipi temna anei e.

Chule hiche kingon hi government in mipi phatchom nading tohgon aneiho hetdohna khat ahitolhon a tohgon boilou hel a chelhah thei nadia panla cheh ding in district mipi CM chun temna anei e.

Chule CM in natong dia nganse chang hon khutnung hoitah le phat kitep kumkhat sung a atohchai tei dia temna aneiban in mipi ngalal ma ma Chandel District Sports Stadium/Complex jong hondoh hivah ding ahitai, ati.

CM in hill district a nute kailhang jong phat kitep sung a jo hicheh ahi e, ati.

Kingon a chun Chandel ADC Chairman Shri D. Ringo Lamkang, Chief Secretary Dr. Rajesh Kumar, Principal Secretary Shri P. Vaiphei, Deputy Commissioner (i/c) Chandel Shri Ksh. Sidhart ho jong apang un ahi.

Xxxxxxx

Tuithapi kho’a Temporary Police Outpost tundoh theina ding’a natoh kipanta

B.Lalboi Gangte

CCpur. Sept. 9 (ET) : Tuithapi kho’a Temporary Police Outpost um ding mun’a tunin khosung mipin social work ananei uvin ahi. Temporary Police Outpost bolna ding mun chu JCB khat mangchan in ground leveling ananei uvin chuleh Social work phatsung’a natong ding’a kon khosung mipin abol thei nalam cheh’a natohna ananei uvin ahi.

Hetthei khat chu Tuithapi kho hi kho chom chom kijot matto na ding’a mun poimo tah ahi toh lhon’a sim lampang’a Muolvaiphei toh ki gamgi ahi in aki gamgit na mun’u Tuithapi gam a B. Nanglunmang leh a inn kote cheng’u ahi. Achesa June 24 leh August 26 nilhah lam in Nanglunmang inn’a galvon choi kiloikhom na chom chom analut uvin inn mun’u gangtah’a adalhah ding uvin gihna leh thal chan analhakhum uvin ahi. Hiche kahlah’a thilsoh kholchil na ding’a Sept. nisim 1 nikhon Vungzagin Valte, Chairman, MTDC in Tuithapi kho anapha in hiche akon chun Pawan Yadav, IAS, Deputy Commissioner, Amrita Sinha, IPS, Superintendent of Police, David Piaklian, MPS, Superintendent of Police (in-charge) Pherzawl, Lunkhomang Khongsai, MPS, Commanding Officer, First IRB, Thangboi Gangte, Additional DC, Alfred Khaute, MCS, SDO Saikot leh Ginmuan Ngaihte, MCS, SDO Churachandpur leh Tuithapi haosa lang’a  Khanthang Tonsing jaonan kihouna ananei uvin ahi. Tuithapi haosa Khanthang Tonsing in SP leh CO First IRB kom’a khosung mipi thomhao tah’a umho kholna’a Police Outpost khat um sah ding’a ngehna anabol naban’a outpost kisem nading gam leiset jong atodoh ding in anaseiyin ahi. Hiche dungjui in Amrita Sinha, IPS, SP Churachandpur in jong temporary outpost um ding’a phatsah na ananei dungjui’a khosung mipin Police outpost semdoh nading natohna anapat’u ahi. Hiche Temporary Police outpost ahi Police personnel 10 leh 15 kikah um thei na ding’a asem’u ahi.

Xxxxxxxxxxxxxxx

India a Covid-19 case lakh 43 phata; Case 60% hi state 5 akon ahi tia centre in sei

New Delhi, Sept 9: India a coronavirus lakh 43 aphatan hiche lah a 60% hi state 5 akon ahi tin tunin Ministery of Health in thuphon aneina ah aseiyin chule tuni nidan 24 sung’a case thah 89,706 kimulah a 20,000 hi Maharashtra  state leh Andra Pradesh state akon 10,000 val ahi ati.

Hiche case tamnapen  state 5 ho chu Maharashtra, Andhra Pradesh, Tamil Nadu, Karnataka le Uttar Pradesh ahin, Maharashtra state hi India sung’a case kisei akon tuchan a atamna pen hijing nalai ahi.

Tuni chan in India a Covid-19 case 43,70,128 aphatan tan hichelah a akijendam 33,98,844 ahin, active case 8,97,394 chule thina toh 73,890 ahin, hiche hi achesa nidan 24 sung’a thi mi 1,115 pum’a ahi.

Xxxxxxxxx

India-China boijeh a Arunachal a McMohan line koma cheng khomiten akhomun’u dalha

Itanagar, Sept 9: Ladakh mun a um Indo-Sino border mun a boina aum jing toh kilhonin Arunachal Pradesh, Tawang a McMohan Line koma cheng khomiten akhomun’u ana dalha tauvin ahi tin ginchat umtah thulhut chun EastMojo te ana hetsah un ahi.

Taksang kho hi Tawang district, Arunachal Pradesh sunga Zemutang circle apat 30-km a gamlha a um ahi in boina umjing jeh in khomiten tu naicha chun ana dalhauvin ahi.

Kum 1986 kum chun India ten Tawang district a um Zemithang mun a Sumdorong Chu Valley chu Chinese te khut in ana huhdoh jou pouvin ahi. Hichelai phat a Chief of Indian Army chu Krishnaswamy Sundarji ana hilai ahi akiti.

June 26, 1986 kum chun Indian government in Beijing ah Chinese troop hon June 16 chun India gamsung nehlut ding aguong jing uve tin hehna ana bol un ahi. Hinla Beijing ana nompon, Chinese troop ho amaho gamsung leh McMohan Line sahlam bouva um jingu ahidan ana tahlang kit un ahi.

Sumdorong Chu Valley hi masanga Tawang, Arunachal Pradesh huop sunga um ana hi in, Bhutan toh lhumlam a ki gamgi a chuleh Thag Ka ridge toh sahlam a ki gamgi ahi.

xxxxxxx

China dihlou a chaloh thu a India, France le Australia hon kihouna nei

New Delhi, Sept 9: Indo-Pacific le China dihlou a chaloh chung chang seikhom ding in India, Australia le France in tunichun kihoukhomna masapen anei uvin ahi.

Kihoukhomna chu Foreign Secretary Harsh Vardhan Shringla, secretary-general, French ministry for Europe and foreign affairs Franois Delattre chule secretary Australian department of foreign affairs Frances Adamson ho makaina noi a chelha ahi e.

Indo-Pacific gamkai a kithokhom ding thu a gamthum hon kihoukhomna anei u ahi.

Kumseh a kihoukhomna nei jing dia gamthum ho phatsahna anei u ahi e tia MEA chun asei ahi.

Hetding chu ASEAN gamkai a gam 10 kiloikhom hohi athunei pen India, US, China, Japan le Australia hohi akihouthei pi pen jong ahi.

Imalam jouse a kithokhom nadia IORA tia kipunkhomna a hi India, Australia, Bangladesh, Iran, Kenya, Comoros, Madagascar, Malaysia, Mauritius, Mozambique, Oman, Seychelles, Singapore, Somalia le South Africa ho palai ahiuve.

xxxxxxxx

Numei chapang suhset jou a kithana chu tamtah in demna phong; mona nei ho matdoh dia ngehna nei

Imphal, Sept 9 (ET): Achesa Sept 2 nia numei chapang kisuh set na thu a All Tribal Women Organisation -Chandel, Chingtam Nupi Apunba Lup-Pallel leh All Tribal Women Organisation, Chandel hon sangtah in demna aneitauve. Hiche chapang nu hi September 3, 2020 nia chu natna a kon damdoh jou lou a mollem ahi.

Thusoh khat in aseina ah numei nu hi adongmapa Maza Khan@Arish s/o Sikander, Heibong Makhong Mathak leikai  a um toh kijam dia mi phabep in akou doh a, ajing September 3 nia numei nu hi kho helou a Yendao Pali kom Maibam Pali ngakul kom a kho mihon aga mudoh ahi. Mithat hohin athi tai tia adalhah u hidia ginmo ahi.

Hitobang a numei chunga sosetna thilsoh hi akhatveina ahipon, January 1 apat a September 3 kikah in jong hitobang thilsoh 30 val ana sohsa ahi. Hiche lah a 5 hi tol thana, 8 tobang hi rape case, 2 hi ahon in asuhset ahi e. Numei le chapang ho chunga khanset na hi apung lheh e. Ahin hitobanga chon hohi apanpi le ahuh aum jihi akhoh lheh e. Kiloi khomna 3 hohin hitobanga chatloh hohi agan nathei lam a matdoh dia ngehna anei u ahi. Hiche kiloi khomna thum hon state government in chapang holeh numei ho venbit nadia dan khou tah semdoh ding in ngehna anei un ahi.

Tunichun hiche thu a Kwakta mun a toumun kiphin achelha in themmona neiho jouse akin thei lam pen a matdoh a achan diuva lom gotna pehding ti ahitai.

Xxxxxxxxxxx

AFESAM in Manual Self Propelled Wheelchair hopdohna nei

Imphal, Sept 9(UNA): Armed Forces Ex-servicemen Association (AFESAM)  in a sepai chankhom piho mi 2 chung ah thilpha anabol uvin ahi.

Hiche sepai teni chu deibang a chatle thei talou ahi. Amani lah a Ibungo chu cerebrovascular accident  temporparietal decompression craniotomy le intracranial haemorrhage evacuation, craniotomy bone flap replacement nei ahi. Hiche jou a jong a inmun a kisat kit a lamjot jou talou ahi.

Anina havildar Md. Alamgir hi mun sangtah a pat a akheh jeh a post traumatic D5 Laminectomy +D3-7 pedicle fixation ana kibol a paraparesis tichu a konga pat noilang se paralysis a um den ahi.

AFESAM in asei ah niseh a wheelchair mang dia doctor  hon aseipeh utoh kilhon a hiche athil peh uhin angaijang lheh ding aki nepna thu jong ana phongdoh uve.

Athum channa jong thal a LOC a duty namun a kisukha, ating gu kikap kha ahi e. Hiche wheelchair kipe hin sum le pai a imacha phachom ponte hinla  ex-servicemen kiloi khomna in healthcare ECHS  noiya scheme jatchom chom a bolthei jouse kibol jing ding ahi, ati.

Hiche ECHS (ex-servicemen contributory health scheme) Koirengei mun a umhi hitobanga vangset na nei ex-servicemen ho chunga anabol king khat u ahi.  ECHS hin ex-servicemen 50,000 tobang district 16 lah a 13 ho a thilpha boln anei u ahitai. ECHS hin India pumpi a army, navy,  leh Air Force hospital jaona private hospital 1500 tobanga hi natohna anei u ahi. ECHS polyclinic Imphal hi MoD noiya station commander Leimakhong military station a um ahi.

Hiche a ECHS thilpha bolna chung a sepai teni leh a insung miten kipa thu ana phong uve.

Chuleh AFESAM in ex-servicemen ho khel in ECHS leh kilo one team polyclinic Imphal ho chungah akipa nao aphongdoh kit uve.

Xxxxxxxxxx

Malaria Dept. CCpur in DMO,CCpur makai na’a Anti Malaria Day leh Awareness program chelhah pi

B.LALBOI GANGTE

CCPUR. SEPT. 9 (ET) : Malaria Department, CCpur in Dr. T. Nengkhanmang  District Malaria Officer CCpur lamkai na nanoi in CCpur District sung’a Malaria jaona’a natna chom chom suhbei nading’a panlah na achelhah pe jing uvin ahi. Hiche toh lhon’a chun tunin (Sept 9) L. Phaimol Community Hall mun’a Anti Malaria Day leh Awareness program ananei uvin ahi. Kingon achun Dr. T. Nengkhanmang leh Lalzarlian MHS, Dr. Liangoumuan MO In-Charge Zezaw PHC chuleh Dr. T. Ginsiam MO Zezaw PHC ho cheng in jong houlimna ananei uvin ahi.

Dr. T. Nengkhanmang in aseina’a achesa July lha sung in L. Phaimol kho akon in Malaria PF Case khat anakimudoh jeh chun hiche natna akon khosung mi venbitna ding in khosung mi koi hi jong leh khosih aum khah leh gangtah’a test akibol ding uvin hetsahna ananei uvin ahi. Chuleh hiche nading’a akho akho’a ASHA ho mopohna peh ahitoh lhon’a amaho akon test bol thei jing ding’u ahi dan jong tahlang na anei in ahi. Lalazarlian MHS in ahoulimna’a mipi jouse ahi thei chan’a thoukang kipe sah lou ding, lup teng kangkal khai tei ding, khosung leh inn kimvel ho thengthou tah’a koi ding, twi kivei umsah lou ding in ngehna anei in ahi.

Alangkhat’a Malaria Department CCpur in Anti Malaria Day leh Awareness program anei phatsung uvin Malaria hihen natna chom chom akon kivendoh ding dan leh damthei na lam toh kisai’a in houlimna ana um in ahi. Malaria Department hon L. Phaimol kho’a kimanchah na achai uvin DMO CCpur leh a team hon Zezaw PHC, Sumchinvum PHSC leh Singngat CHC apha uvin hiche achun National Vector Borne Disease Control Program noiya  nakitong ho vetlhahna ananei uvin ahi.

xxxxxxxxxxxxxxx

CCpur District a Covid +ve case thah 15 kimudoh; agom’a case 728 lhingta

B.LALBOI GANGTE

CCPUR. SEPT. 9 (ET): Churachandpur District sung’a Covid-19 natna nei akimudohbe jing toh lhon’a tunin jong Khuga Dam aum 27 Sector Assam Rifles noi’a um Assam Rifles personnel 15 akon +ve case thah  ana kimudoh in ahi. Chuleh case thah 15 akimudohbe toh lhon’a CCpur District sung tun case 728 alhing tan ahi. Hetthei khat chu tuni chan’a Covid-19 +ve hetdoh thei nading’a kimangcha Rapid Antigen Testing Kits akon test 3343 kibol nalah’a 222 +ve ahi in ahin adang se vang RT-PCR akon +ve ahi.

Hiche toh lhon’a CCpur District sung’a Covid-19 Care Centre ding in mun 7 kimangcha ho’a lupna 398 um nalah’a tuhin lupna 134 akimang in ahi. Covid-19 Care Centre ho lah’a District Hospital Isolation Ward a 1, NIELIT a 22, Lanva TD Block a 28, STC BSF a 19,  27-Sector Assam Rifles a 19, 2nd  Assam Rifles Singngat a 13 leh 32nd CRPF Loktak a 6 ahi. Chuleh case 728 lah’a 600 adamdoh tan chuleh active case 128 aum nalai in ahi. Self Isolation ahilou leh  Home Quarantine toh kisai’a mi 6,276 in nikho 14 sung Home Quarantine ajou theng uvin tuhin mi 669 Home Quarantine in aum nalai in ahi.

xxxxxxxxxxx

Dena leh Vijaya Bank hi Bank of Baroda toh akigopkhom toh lhon’a BOB Manager in hilchetna nei

B.Lalboi Gangte

CCpur. Sept. 9 (ET) : Govt. of India thulhuh dungjui’a Bank of Baroda a Vijaya Bank leh Dena Bank akigopkhom toh lhon in CCpur District sung’a Vijaya Bank a customer ho account number kikhelsoh ding ahi jeh in hiche thu hethem lou Customer ho ding in Bank of Baroda Manager in hilchetna aneina’a achesa April 1, 2019 in India gamsung’a ding’a Bank lenloi Bank of Baroda, Vijaya Bank leh Dena Bank hi Bank of Baroda a ana kigomkhom’u ahi tah lhon’a Bank of Baroda System akiman ding jeh’a Vijaya Bank leh Dena Bank ah account number jouse athah’a abon’a khel ngai hung hi kha ahi ati. Hitobang’a account number khel ahung ngai tah jeh’a Vijaya Bank leh Dena Bank a Customer ho mobile number toh Bank Account ki-link kha ho jouse heng’a SMS akon hetsahna akithot in ahi.

Hiche toh lhon’a hiche’a customer ho heng’a ahung lhung ding Sept. nisim 12 akon Account number thah, IFSC leh MICR number thah amanchah joh tah ding uvin hetsahna jong akinei in ahi. Chuleh CCpur District sung’a Dena Bank Branch um hih jong leh Vijaya Bank um ahi jeh in hiche a customer jouse Bank Account kikhel jong leh alui patoh atahpa ki-link to ahi jeh in Customer ho lungboina ding imacha aum pon ahi ati. Alangkhat’a tu’a process hi System ah Migrate kibol nalai ahi jeh in Sept. 13 chan Vijaya Bank hi Customer ho ding’a kihong thei tah tah loulai ding ahi. Ahin Sept. 14 akon Account number thah mangcha’a natoh  kipan ding hiche akon Customer ho ding’a Bank akihong kit ding, Account number, IFSC leh MICR number jouse  athah’a khel ding hi jong leh PM-KISHAN, lhalo lahna, ATM card neisa, Cheque Book issue sa kiti ho imacha boi lou ding ahi. Chuleh  Scholarship toh kisai jong boi lou ding, ATM card jouse card ah Expiry date kijih chan imacha aboina umlou’a manchah thei ding leh Cheque book jong manchah thei ding ahi. Sept. 14 akon Bank of Baroda passbook thah dei leh akin dehset ho ding’a passbook thah jong issue kibol pan ding ahitai tinjong tahlangna anei in ahi.

xxxxxxxxxxxxxx

Vangsetna toh chapangnu hina phongdoh ho chunga gotna kipe ding

Imphal, Sept 9(ET): Manipur Human Rights Commission (MHRC) hon Wednesday nikho chun DGP Manipur heng’ah Mayang Imphal a suhset a ana um jouva thina anatoh chapang nu lim le mel tahdoh ho chunga gotna peh ahina ding in ngehna ana neiyun ahi.

MHRC in registered case No 123 of 2020 chu jihlutna ana neiyun ahi. Hiche hi Youth’s Forum for Protection of Human Rights (YFPHR) a president min a filed kibol hi suhset a aum jouva thina toh chapangnu hina lim le mel tahdoh a aum hi  Section 23 of POCSO Act, 2012 and 228 A of IPC dan palkeh ahi atiu toh kilhon a kiloikhomna president in case filed anabol ahi. Hitoh kilhon chun commission in bol dinga lom ho abol jouvin Director General of Police heng’ah vangsetna tohnu lim le mel tahdoh masapen chunga gotna peh dinga lom ahin peh dingin ngansena akipe ngal in ahi. Chule local club ho, meira paibi ho, simlai leh khangdong chuleh milham hon hitobang bol ding leh bollou dingho ahin hetkhen nadiuva awareness programme ho oeh ahidiu dan jong DGP ngansena lhingset ana peuvin ahi.

Hiche aheh a pang hon aseina a chun Mayang Imphal mun a achesa September 2 nikho a hiche chapang kum 14 hi mi phabep in asuhset jouva kho helouva adalhah u ahi in, anatna thohjou louva RIMS mun a ana muolliem ahi in, chapang nu hi gang raped hidinga ginmo ahi. Hehna bol hon aseibe na ah numei chaoang nu lim hintahdoh masa holeh a hina hin tahdoh ho chunga gotna peh dingin ngehna aneiyin ahi.

MHRC in aseina ah vangsetna toh chapangnu hina selpeh tah sangin, media leh government officials ho akon in jong selguh peh in aumpon, tunung tuban leh hitobang thilsoh umkit louva vangsetna toh ho hina hoitah a selguh peh jing ding injong DGP hengah ngehna aneiyun ahi.

XXXXXXXXX

Pravish Chanam thi kum 3 lhinna kimang

Imphal, Sept 9(ET): Tuni chun Pravish Chanam thikal kum 3 lhinna chu COVID-19 a SOP ho phatah a jui pum in Uripok Achom Leikai mun’ah ana kimang in ahi. Pravish Chanam Peoples Action Committee a member Laishram Gulsan min a thusohdoh khat in aseina ah Pravish Chanam hi achesa kum 3 masanga Greater Noida mun a ana kithat ahi in, tuni chan in thudih hetchet ahinaioon ahi atin ahi.

Thusodoh in aseibe na ah, hiche athikal kum 3 hetjingna kingon kiman na ah CSO chom chom gah hetthei dingin WASEDEV, KIL, AMUCO, YFPHR, YACPIP honjong kingon a pan alah naban uvah aum talou Pravish Chanam’s lim chu pahvui opeh najong anei uvin ahi ati.

Peoples Action Committee a Convenor Mr. Laimayum Bichu in aseina ah, Pravish thi hetjingna kin kiman na hi a kum 3 na ahitan, tuni chan a PAC, a insungmi te leh Manipur mipi ten thudihna kinga jing na ahi ati. COVID-19 natna jeh in CBI in ahiding bangtah in kholchilna achelhapi thei pon, hinla CBI akonin kholchilna hi ahiding leh acheding dol in achelha jinge tithu akija jing in, hitoh lhon chun kholdoh a um phabep mipi lah a moh phondoh theilou thil aum jeh in mipi hetthei ding tu tadi a moh phondoh thei ahi loudan jong aseiyin ahi. . Aman aseibe na ah, muntina club chom chom ho, meira paibi ho leh mimal a pan hinla ho jouse chungah akipana aphong doh in, chuleh kholchilna hi aphat dungjuiya mipiho hetthei ding ho hung kihetsah jing ding ahi tinjong aseibei.

Hiche kin kiman sunga Covid-19 natna um laitah hijong leh jui dinga lom SOP ho PAC in phatah in akijui jinge tinjong thusodoh chun atahlangin ahi.

Xxxxxxxx

Tengnoupal MLA makai na noi a gampam akon hunglhung hotoh kihoukhomna kinei

Tengnoupal, Sept 9: COvid toh kisai a gampam a kon inn hung kile hotoh kihoukhomna kingon tuni in Hill Tribal Council(HTC) office conference Hall a ana um in ahi. Hiche kingon a chun D. Korungthang, Tengnoupal MLA, Cecelia Haokip- Member, ADC Chandel, Joseph Ginkhosei- President HTC, Mangminlen Singson- Gen Secy HTC LE Victor Limthang, HTC ho chu deichom a kou ana hiuvin ahi.

Tuni kingon achun gampam akon inn hung kile quarantine a ana um chai ho in jong panlah na ana nei uvin ahi. Gampam akon hung kile ho chun ahung kile nah o thusim le quarantine aum sung uva hahsat na ato ho ule akijan dan chung uva adeilou dan ho ujong seilhah na ana nei uvin ahi. Gampam akon ahung kile na ding uva tohgon hin nei le ahin boipi u MLA pa le adang dang hoc hung a kipa thu seina jong ana nei uvin ahi. Inn hung kile ho chun kipa thu chu Cecilia Haokip- Member ADC Chandel chung a akipa dehset na u phondoh na ana nei uvin ahi.

Inn hung kile ho houlimna ana ngai chai in MLA pa in ditrict sunga  mi phabep positive ana um toh lhona govt toh kitho a pan lah thei chan akilah dan le mipi lah a hiche nat na athang na lou ding a bolthei channa natoh na kinei ahi toh lhon a hahsat na le genthei na kitoh hoc hung a het them na aum na idng in temna ana nei in ahi. Tua jong Manipur sung a mipi lah a hiche natna kilah son na aum tah toh lhon a mipi in ching thei tah a hinkho aman ding u adei dan jong MLA pa in hetsah na ana nei in ahi.

Cecilia Haokip- Member ADC Chandel in ahoulimna a district sunga vaipo khat ahi toh lhon a mip iding gelna a toh thei chan atoh dan le inn hung kile ho genthei ding ahet toh lhon a nasatah a panlah na ana nei dan le Maynamr akon India sung a lekha sim a hung ho injong boina ato utoh lhon a ama ahin contact jing dan u thu tahlang na ana nei in ahi.

Xxxxxxxxxxxxxxxxxxxxxxxxx

KVK Imphal East in Yumnam Khunou a Training  bol u

Imphal Sep 9- ‘Offseason production technology of vegetables’ kiti thupi noi in KVK Imphal East in tuni in nit hum chelha ding training chu Yumnam Khunou mun a apan taovin ahi.

Hiche training programme chu loubol ho ading a kibol ahi. Tuni a patni in  Salam Priyadarshini, SMS agronomy Hoticulcure le KVK Imphal East a Program Co Ordinator, S. Monibala teni chu resource person in ana pang lhon in ahi. Salam Priyadarshini in ahou limna a eima hon a capsicum, Tomato, Califlower hot u thei ahidan le gam ong jouse nehthei ding tu jing a gampam akon a me lah jing hi ahinathei channa suh lhom ding angaidan tahlang na ana neiin ahi.

Xxxxxxxxxxxxxxxxxxxxxxxxxx

Numei kipuimang khat kihuhdoh

Ccpur, Sept 9: Achesa nisim 1 nikho jingkah lam nidan 9 vel a nisim 31 sun nidan 11 a numei khat aman thu hetsah na ana kinei toh lhon in Police in kholchil na ana nei pan uvin ahi. Numei nu chu Compound Veng, D. Phailian, Churachandpur District akon ahi in amanu chu Sandeep Kumar (30yrs), Dungarpur, Rajasthan akon khat in apui mang ahidan hetdoh in ana um in ahi.

Hetdoh ahi toh lhon SP CCpur makai na noi in Rajasthan police toh kitho in kholchilna ana kinei in Rajasthan a mi puimangpa le numei nu um hetdoh ahi toh lhon in SI T. Seikhotinlal Haokip, W/ASI PT Dodoi le numei nu paneo in Rajasthan mu nana jon uvin ahi. Mi puimang pa chu achesa nisim 5 nikho in matdoh in ana um in numei nu chu inn ahung kilhut tan ahi.

xxxxxxxxxxxxxxxxxxxxxxxxxxxxxxxxxxxxxx

Manipur Film Journalists le Critics Association Award pehna  kumseh a state sung a feature film hoipen ang a kipe jingding

Imphal, Sept 9: Manipur Film Journalists and Critics Association in Manipur Film Journalists and Critics Association Award chu state sung a Best Manipuri Feature Film lehndoh na kinei kumseh a peh jing ahidan phondoh na ahin nei uvin ahi. Hiche phondoh na chu tuni a Manipur Film Journalists and Critics Association lamkai ho in kihou na ana nei utoh lhon a seilhah na ana nei u ahi.

Hiche kipaman hi sum le memento hiding ahi akiti. Hiche thulut neina kiohu na chu kiloikhomna in State Information Centre, Palace Gate Imphal a Manindra Konsam, kiloikhomna president makai na a kihou na ana nein a uva seilhah na ana nei u ahi. Kihou na a Manindra Konsam in ahou limna a Manipuri cinema khantou jing na chung thu a kipana anei dan phondoh na ana nei toh lhon in amachal jing an ding a panlah na nei ding adeisahdan jong phondoh na ana nei in ahi.

Hetthei khat chu Central Board of Film Certification akon thuso kimudungjui a Manipuri feature film  Ningthiba Nonglik, Gurumayum Krishnakumar in produce abol, Eikhoishibu Kanano, Yumnam Brojen Singh, Nongphadok Lalqa Atithi by DDK Guwahati, Pandam Amada by Konsam Saroja, Korounganba-3 by Chandam Yaima Devi , Mr. Mangal by Longjam Sanamacha Devi, Ei Actor Natte by Rodika Mutum, Eerei by Sorenshangbam Herojit Singh, Chaphu by Rk Bikramjit Singh, Chanu IPS-2 by Khuraijam Linthoingambi Chanu, Eigi Kona by Konjengbam Sushila Leima and Education Da Mai onsillase by Rojendrakar Nongthomba ho chu hetpeh na anakinei ahi.

Kihouna achun film sem thum Oinam Goutam, Ajit Yumnam le Maibam Amarjit ho a film sem u Pandam Amada, Eikhoysibu Kanao le  Highways of Life (Documentary) kiti ho international film festival chom chom a ana kilha jing toh lhon a ahcung uva kipa na kingon neipi ding adeisah dan u jong ana sei uvin ahi.

Xxxxxxxxxxx

Mizoram  a Covid case 69 kimudoh be

AIZAWL, SEP 9: Mizoram sung asangpen ding in achesa nidan 24 sung in covis case 69 mudoh ana hi in ahi. State Health department akon thuso kimu dungjui in tuni a kimudoh case ho lah a case 48 chu Border Security Force (BSF) ho camp akon ahi akiti. Tuni a pum in state sung a covid case umjat hi 1192 alhing tan ahi.Tuni a case thah ho lah achun numei 7 jong ajao in ahi akiti. Army 6 jaona case thah ho chu abon a Aizawl district sung akon ahi akiti.

Milham 15 hetdoh ana hiho lah achun 13 ho chu natna neiho akon kiladoh ahi akiti. State sung a tu le tua active case hi 442 um ahi.  Hetthei khatchu Mizoram sung ahi tu channa covid toh kisai a thina toh umlou lai ahi.  Health department akon thuso kimu dungjui in tu channa sample test kiboldoh jat hi 46,414 alhung tan ahi akiti.

Xxxxxxxx

Meghalaya a COVID-19 akon thina toh 19 lhingta

Shillong, Sept 9- Meghalaya sung a tuni in covid case 121 mudoh be ana hi in chuleh numei ni in thina anatoh lhon in ahi akiti. State sunga  covid jeh a thina toh hi tuni a pum a 19 lhing ahitan ahi.

Director of Health Services (MI), Dr. Aman Warr akon thuso kimu dungjui in athiteni chu Nazareth Hospital a kijan lhon ahi akiti. Dr. Warr in aseina a tuni athahbeh a positive ho lah a 59 ho chu East Jaintia Hills, East Khasi Hills, West Garo Hills, South Garo Hills, Ri Bhoi le West Khasi Hills a mipi test kibol le na a hetdoh a ana um ahi akiti.

Senior medical officer pa chun asei be na a Health Department in Lumshnong mun a cement factpry jong positive case natoh na mun akon ahung umjing toh lhon a kha ding a hetsah na anei ding dan u tahlang na ana nei in ahi.

Hetthei khatchu state sung a covid case hi agom a 3,197 lam lhing ahitan, tu le tua natna nei hi 1,355 lhing a chuleh damdoh nanei hi 1,823 lam lhing ahitan ahi. State sung a case tamna pen hi East KHASI Hills ahin  case 860 lam umdoh ahitan ahi akiti. District sung a natna nei ho chu milham 708 le Security force 152 lam ahi.