Covid-19: India in China khelta, Leiset chung’a case tamna pen gam 11...

Covid-19: India in China khelta, Leiset chung’a case tamna pen gam 11 channa a pangta

294
0
SHARE

Covid-19: India in China khelta, Leiset chung’a case tamna pen gam 11 channa a pangta

New Delhi, May 15: Worldometers.info akon kimu dungjui achun Corona case nei India in China akhel dan akimu in India gamsung a aveikha mi 83,072 apha in chule China gamsung a aveikha mi 82,933 in aum in ahi. Hinlah Press Trust of India ho mudungjui in tuni jan nidan 9 chan chun India gamsung a aveikha mi 85,538 ahidan asei uvin ahi. Leiset chung ah hiche natna veitam napen gam chu US ahi in aban a Spain chule athumna ding in Russia gam ahi. China gamsung a natna jeh in mi 4,633 tobang in thina atoh uvin India gamsung a mi 2,657 hon thina atoh tauvin ahi.

India gamsung a ading in Maharashtra state sung ah avei atampen in tuni chun case thah 1,576 mudoh ahitoh lhon in agamsung uva natna veikha mi 29,100 aphatan ahi. Chule tuni ma chun mi 49 in thina atoh utoh lhon in mi 1,068 hon agamsung uva thina atoh tauvin ahi. Mi 505 ho tuni a discharge ahi utoh lhon in mi 6,564 hon inmun a kijen ding in akisoldoh tan ahi. Mumbai khopi sung ah tuhin natna veikha mi 17,671 aphatan chule mi 655 hon thina atoh tauvin ahi. Tuni chun mi 34 in thina atoh uvin Pune district akon mi 6 in jong thina atoh uvin ahi. India gamsung ah tuni chan in sample 20,39,952 test akibol tan tuni chun 92,911 test akibol in ahi.

Health Ministry in aseikit dan achun tuhin India gamsung ah covid-19 vei mi 81,970 aum in chule thina toh mi 2,649 aphatai ati. Swiss pharmaceutical company Novartis, a chief executive in aseina achun kum 2 jou chan a hiche natna jenna ding lou kisemdoh louding in asei in chule aching them hon jong 2021 masang a manthei ding a kisemdoh louding ahi in chule kisemdoh jongle tamtah huhdoh nading a aveikhat chung a test bol teitei ngaiding ahithu jong asei in ahi.

Chandel ADC chairman masa ‘Bail’ a kilhadoh ding ginmo jeh a mi tampin NDPS Court nokhum

Imphal, May 15(ET): Chandel Autonomous District Council (ADC) chairman anahi Lhukhosei Zou ‘drug trafficking case’ toh kisaiya Friday nikhon NDPS Court, Lamphel a adinsah uvin ahi.

CADA, Nupi Samaj, AMKIL le Tammi Chingmi volunteer tamtah in NDPS Court Complex, Lamphel tunin anokhum uvin, ADC Chandel anahi Lhukhosei Zou ‘bail’ a kilhadoh ding ahi tia thu kisei ajah u douna a kiphinna anei uvin ahi. Hetthei khat chu Lhukhosei Zou aumna ‘official quarter’ a kon dan in akha drug tamtah kiman doh ahi.

Police khut a umbe dinga asei uvin ahi. Hetthei khat chu Narcotic and Affairs of Border (NAB) police le Imphal West district police hon achesa 2018 kum a ADC Chandel chairman anahi Zou panna a mi 8 dangka crore 27 val man khamnathei thil toh amat u ahi. Akiman khamnathei holah a dangka crore 13 val man Heroine 4.595 kg, dangka crore 14 vel man World is Yours (WY Amphetamine tablet chule dangka 57,18,000 sum a amat u ahi.

Assam le Mizoram in  lockdown hapta 2 a suhsaobe ding a sei

Guwahati, May 15: Assam Chief Minister Sarbananda Sonowal in tuni Centre ahetsahna achun gamsung a lockdown hi May 18 apat hapta 2 a susaobe ding in ahetsah in ahi. Tua lockdown 3.0 chelha jinglai hi May 17 nikho leh kichai ding ahi in, Sonowal in aseina achun hiche lockdown chungthu a deidan peding a Centre in phalna apeh dungjui a ngaidan kipe ahi ati. Centre in hiche natna hit kithejal suhtang nading a pan alah chungthu a kipathu jong aphong in ahi.

CM pan aseibena achun masang ihin todiu hi hahcheh ding ahi in hijeh chun juiding a kipe dan ho mipi hon juicheh ding in asei in ahi. Lockdown umsung in Assam sorkar in NFSA noiya hamphatna mulou a mipi lakh 44 ho heng ah anchang apedoh e ati. Chule lockdown sung a genthei hahsatna toh ho panpi nading a govt. bou nganse louva NGO ho chule mikiphal phabep hon govt. nasatah in akithopi uvin achung uva kipathu aphong in ahi. Chule gamsung a covid-19 douna a panla Medical staff, police leh Media ho chung ajong kipathu aphong in ahi.

Mizoram govt in jong tunin lockdown chu ahunglhungding May nisim 31  chan ading in suh sao be na ana nei taovin ahi. Hiche kilolna chu govt in mipi kiloikhomna jat chom chom le houbung hot oh kihou na ana nei jou a phondoh na ananei u ahi. Hiche kilolna chung chang a kihou na chu Chief Secretary Lalnunmawi Chuango makai na noi a an akibol ahi. Hiche lockdown kisuh sao be toh lhon in daan le mol jui ding athah semding in jong hetsah na ana nei uvin ahi.

Social Worker Sanjoy kimat jeh a nupi hon Andro police station nokhum

Imphal, May 15: Andro Assembly Constituency sung a cheng numei pol hon tuni chun social worker Lourembam Sanjoy kimat jeh in Andro PS anokhum uvin ahi. Thulhut khat in aseina achun Sanjoy chu janhi chun Porompat PS in ahenden uvin ipi jeh a kihenden ham ti tuchan in aki hedoh naipon ahi.

Numei kiloikhom hon placard ho adom uvin ‘L. Sanjoy chu imachu thu umlou va kilhadoh ding’,  ‘Koimachan Ex MLA Th Shyamkumar chenna in asusie poi’ tin adom uvin ahi.

Nupi khat in thuso miho heng a asina achun Shyamkumar naupa Thounaojam Rabi in Sanju, M. Tomba leh L. Shyamkeshore chung ah FIR ajih khum in ajeh jong akihenai pon ahi. Hiche chungthu a CM pa hung kikum ding in jong asei in ahi.

Myanmar sorkar in Northeast thingnoimi 22 India sorkar khut a pehdohna nei

Imphal, May 15(ET): India sorkar douna a gal bol a Northeast India thingnoimi 22 Myanmar vaipo hon India sorkar khut a pehdohna anei tauvin ahi.

Thingnoimi hohi India gam chan special Indian Air Force lenna a ahin puiyu ahi, tin thulhut in aseiyin ahi. India sorkar in ngehna anei banga Myanmar sorkar in pan alah a, agam a pansa a India gam mi thingnoi ho apehdoh na amasapen ahi.

Northeast India thingnoimi akisei 22 holah a hi self styled Captain Sanatomba Ningthoujam, UNLF, Lieutenant Pashuram Laishram, PREPAK-PRO, Home Secretary Rajen Daimary, NDFV-S chule self styled Captain Sansuma Basumatary, NDFB-S jong pang ahi.

Thulhut dungjuiya thingnoimi 22 hi Imphal a ahin nung puiyu ahi’in, hiche a kon mi 10 Guwahati a apui uva chule adang 12 hi Imphal a kihen den ding ahi. Mi 22 hohi abon uva Regional Institute of Medical Sciences (RIMS), Imphal a kikoi ahitai, tin thulhut in aseiyin ahi.

Achesa 2019 kum a Myanmar Army hon February a kon March lha sung chan India sepai hon thuguh aseipeh utoh kilhon a operation abol jom u ahi. Thingnoimi 22 hohi Myanmar Army hon operation abol nauva Sagaing Region a kon amat u ahi. NDFB-S lamkai Sansuma Basumatary le Rajen Daimary hi Myanmar Army hon operation abol nauva amat u ahitoh kilhon a tuchan chu Myanmar vaipo ho khut a um ahi.

January lha kipat til, NDFB-S le Centre in SoO (suspension of operation) soi akai kal khat masanga lamkai B Saoraigwa, G Bidai le K Batha panna a thingnoimi 600 vel Centre toh chamna thu seina a pang ahi. Hiche jouva Bodoland Territorial Council (BTC) area kipunkhom ding kinepna a NDFB faction ali in amaho thusim a seithei dinga kipunkhomna aneiyu ahi. Tukum February lha a Bijni, Chirang district, Assam gam a ‘special session’ anei nauva kipunkhom dinga aseiyu ahi.

“Thingnoimi ho ahin pedoh uve ti thulhut hi thutah ahi. Hijong le koi thingnoimi hiuvem chule thuchen dang dang kapeh theilou ding ahi”, tin Assam Police official khat in aseiyin ahi. Sorkar thupeh dungjui chule tua Covid-19 pandemic aum toh kitoh a amaho hi quarantine khoutah a kibol ding ahi. Aumnau kasei doh theilou ding ahi, tin aseibe in ahi.