Covid-19 case kisei khohna gam holah a India ali channa a pang...

Covid-19 case kisei khohna gam holah a India ali channa a pang ta; recovery rate 49.47 lhingta

64
0
SHARE

Covid-19 case kisei khohna gam holah a India ali channa a pang ta; recovery rate 49.47 lhingta

New Delhi, June 12: India gam a coronavirus case akal cheh cheh toh kilhon a vannoiya dinga Covid case kisei khoh na gam ali channa a apang tan ahi.

Nikhat a covid 19 case athah 10,956 akimudoh be hi India a dinga nikhat a case kimu atamna pen jong hi ahitai. Lha ni lhing lockdown akichepi na India gam a natna kilahson to hi chal hih jong le mihem 1.3 billion chenna mi tamna gam a natna kilason to thei tam ahi in chule virus douna a campaign hi lha phabep chejom nalai dinga Balram Bhargava, director-general, Indian Council of Medical Research in aginchat na thu aseiyin ahi.

India gam pumpi a achesa March lha kichaiya lockdown kichepi pan ahi in, ahivanga tua hi dan khoutah ana kichepi a olsah pan uva, ahivanga aboina thei (high-risk area) ho a kichepi jing nalai ahi. India in dukan, shopping mall, factory le religious place ho hon dinga phalna apeh jouva case hi athah beh a tam kit ahi.

India gam a subway, school, college le cinema ho kikhah jing nalai ahi. Covid 19 case tamna pen gam holah a United States, Brazil le Russia gam ban a India gam pang ahitai. India a dinga Mumbai, New Delhi le Chennai hi natna akisei khohset na pen ahi in khopi a umhon natna akilah son to natheiyu dinmun len jo ahi, tin Bhargava in aseiyin ahi. Thinglhang gam a natna kilason anemsuh in, ahivanga, khopi le town dalha a in jon a kile ho jeh a kal kit ahi, ati.

Centre sorkar in Friday nikho a India gam a Covid 19 recovery rate hi 49.47 per cent a akal tai, tia aseiya chule natna nei doubling rate hi 17.4 days a um ahi. Covid 19 case athah 10,956 akimudoh be hi gamsunga dinga nikhat a case kihedoh atamna pen ahitai. Case athah kihetdoh be ho pum a natna nei agom a 2,97,535 lhing ahitan, hiche lah a active case 1,41,842 hi a, akijen dam 1,47,195 chule natna jeh a thi 8,498 lhing ahitai, Union Ministry of Health and Family Welfare in aseiyin ahi.

Vannoi pumpi a natna neiya agom a 7,514,475 lhing ahitan chule natna jeh a thi 421,458 lhing ahitai. Gam chom chom a natna a kon damdoh a 3,540,693 lhing ahitai. Natna akhohset na pen United States gam a mihem lakh 2 val in natna aneiya chule natna jeh a 113,820 thi ahi.

HSLC exam result June 15 teng kiphong di

Imphal, June 12(ET): Board of Secondary Education, Manipur in abol High School Leaving Certificate Examination, 2020 result Monday nikho (June 15) teng kiphong ding ahitai.

BSEM Notice Board a exam result sheet ho kitahdoh louding ahi, tin official hon Friday nikhon asei uvin, result thuchen hi Board official website- www.bosem.in le www.manresultls.nic.in a June nisim 15 nilhah nidan 2 kah a muthei hiding ahi, ati. Covid 19 pandemic jeh a gamsung aboi jeh a exam result kiphon nikho teng le ‘press conference’ umlou ding ahi, tin jong asei uvin ahi. Tukum Class X exam hi centre 140 a candidate 38,664 in apeh ahi in, hiche lah a candidate 19040 hi pasal hi a chule 19624 hi numei ahi.

Tukum exam a ‘disabled candidate’ khat bou um ahi. Exam hi achesa February nisim 17 a kon March nisim 5 sunga abol u ahitai. Kum masa- 2019 kum a BOSEM in abol HSLC exam a passed percentage hi 74.69 lhing ahitai.

Special ND&PS Court in Lhukhosei Zou jail a sol ta, bail ngehna anei kit court in san peh talou

Imphal, June 12(ET): Special Court (ND & PS) Manipur in Friday nikhon multi-crore drug smuggling case a themmona neiya kingoh Lhukhosei Zou jail a asol tauvin ahi.

Zou hi Justice A Noutuneshwari Devi in achesa May 21 ni a Cholecystectomy bol dinga ‘medical ground’ a bail anapeh ahi. Ama bail kipeh hi hiche thu khol a case IO Th Brinda (MPS) le Additional SP, NAB in demna sangtah anei jeh a Th Brinda chunga Manipur High Court a ‘criminal contempt case’ kisem ahi.

May 21 ni a Zou bail a alhadoh jou uva Christian Hospital, Imphal a outpatient a kijen a, doctor ho thuhilna dungjuiya June 2 ni a hospital a admit kibol a chule June 4 ni a Cholecystectomy kibol ahi. June 8 ni a hospital a kon hungdoh a, June 13 niteng check up che ding chule lhakhat lhingset kichol dinga doctor hon thuhilna anei ahi.

Friday nikho a Lhukhosei Zou in A Noutunehswari henga ‘interim bail’ ngehna aneikit in, ahivanga, Special Public Prosecutor thusei angailhah jouva Justice A Noutuneshwari in medical ground a ‘interim bail’ peh be ding phal talou jail (judicial custody) a umdinga thulhuhna anei ahi.

Adongmanu kimupi dinga QC a um khangthah pasal ni jamdoh; QC a Khamnathei pohlut ding golhon

Imphal, June 12(ET): Tamenglong a quarantine centre a um khangthah ni adongma kimupi dinga centre a kon a ajamdoh lhon in, ahung kile lhon lang a a in a kon bike ahin kilahpa lhon a chule gamsunga kisem/kihon Ju litre 8, Cigarette le Kanja ho achoh lhon a, quarantine centre a um adang ho henga joh ding agot lhon ahi.

Ahivanga, official hon centre a kon ajamdoh a ahung kile kit lhon thu ahetdoh u ahi. Tamenglong Deputy Commissioner in centre a um hiche teni chonchan thusim hi social media a atahdoh a, ahivanga thilso nikho chet asei lou ahi.

“Kei le district a um ka team hon gamdang a kon hung kile mise tah hiche teni le lhang mi, amani tosot hohi ilo ding ham ti kahet thei louvu ahi”, tin Tamenglong Deputy Commissioner Armstrong Pame in aseiyin ahi. “Gamdang a kon hung kile centre a um mi 2 adongma (nu) kimupi dinga chedoh lhon a, ahung kile lhon a in a kon bike ahin kitol lhon a, centre a um mi phabep in athum bang a ju litre 8, kanja packet 4 le cigarette ahin poh lhon ahi in, thil apeh na lhon a kiman ahi”, ati.  “Amaho hi itobang gotna peh ding ham. Jail akikhah in, human rights palkeh ding kichat jeh a koiman avoh nom pon, sum a kileusah jong le athil joh lhon aman tam a ajoh lhon a leuman asah doh pai lhon ding ahi. Mun ong kanei tapouvin, quarantine kabol theilou diu nahitai”, tin aseibe in ahi.

Khosung miho, houbung mi chule volunteer hon Covid 19 douna dinga quarantine centre a umho kithopina dinga pan sangtah alah laiya sei ngailou amaho tobang hin mijouse alunghan sah a chule quarantine centre a um jouse asuh minset ahi, tin jong aseiyin ahi.

SK Women’s College Nambol QC a jukham a mibulu chule thil suse ho jail a koi tau

Imphal, June 12(ET): Achesa Friday jan nidan 9.45 don a SK Women’s College, Nambol Quarantine Centre a um mi phabep in Philem Suranjoy (25), s/o Ph Inaocha, Moirang lamkaina a jukham pum a volunteer khat avo uvin, angong le a op asuhkhah peh uvin ahi.

Volunteer mikhat hin centre a umho neh le chah apeh pet a abulu u ahi. Volunteer khat abulu u tilouva centre a um mi phabep hin centre sunga kikoi thil phabep jong asuhset u ahi. Hiche thilsoh toh kisaiya Nambol SDO in case ajihlut a chule thukholna chelha ahi.

Thilse bol a pang ho jouse police hon aman tauvin ahi. Akiman hohi- Philem Suranjoy (25), s/o Ph Inaocha, Moirang Philem Leikai a cheng, Wahengbam Jamson (23), s/o (I) W Biramangol Singh, Kakyai Makhai leikai a cheng, Thiyam Indrajit Singh (30), s/o (I) Th Chaoba Singh, Bishnupur Ward no 9 a cheng, Kongjengbam Ngamba (25), s/o K Rajen Singh, Moirang Panshang Leikai a cheng, Sashi Khagembam (26), s/o Kh. Sudama, Kumbi a cheng chule Salam Johny Singh (28), s/o (I) S Raghu Singh, Moirang Khuman Leikai a cheng ahiuve. Akiman ho JMFC Bishnupur a apui uvin, jail a umdinga asol tauvin ahi.

Imphal-Moreh lamlen a police hon galmanchah phabep po mikhat man

Imphal, June 12(ET): Imphal-Moreh National Highway 102 a galmanchah a kivei hon thal apoh diu ahi ti thuguh amu utoh kilhon a M Amit Singh, MPS, Addl. SP (Ops/MRH) lamkaina a police hon Moreh police station a um SI Syed Ershad Ali lamkaina police ho chule Th Vikramjit Singh, MPS, SP/Tengnoupal district vetkolna noiya June nisim 11 nikhon Kondong Lairembi kom a dan in aphal lou thil kipo mat nadinga thukholna anei uvin ahi.

Nilhah nidan 2.15 don a police team hon Moreh langa kon Imphal jon a Maruti Swift Dzire (regd. No. WB02AF 3805) khat akham uva, phatah a kholna anei ule Glock 21 Gen4 USA .45 Auto (made in USA) Glock INC. SMYRNA. GA khat aman uvin, manchah hohi abon a ‘black tape’ a kichun ahi in, chule driver touna langa magazine 2 (AECM 506) toh asel u amudoh u ahi.

Driver pa hi Khaijamang Touthang (30), S/o Ngamjapao Touthang ahi. Team hon gari akholbe kit ule gear box le stereo panel a manchah phabep kisel amudoh be kit u ahi.

Amat u galmanchah ho lah a M&P Bodyguard 380 Smith & Wesson (Springfield MA USA) khat le magazine 2, Glock 21 Gen4 USA .45 Auto made in USA Glock INC. Smyrna GA 5 (nga), AECM 507, AECM 508, AECM 509, AECM 512 le AECM 513, Glock 21 Gen4 USA .45 Auto magazine 10, Glock 21 Gen4 USA .45 magazine case 6, cleaning rod 6, ‘H’ shaped plastic fibre accessories 6, 11″ cable lock set khat jong apang in ahi.

Hiche tilou akiman mipa a kon Oppo mobile handset khat, Aadhaar card khat, PAN card khat, driving license khat, UCO Bank ATM card khat, Elector photo Identity card khat, West Bengal government in issue abol Maruti Swift Dzire VXI registration certificate khat jong aman uvin ahi.

Akiman mipa chule thil ho maban khol be nadinga OC Moreh Police station a ape lut tauvin ahi.

India a ‘Top 40 Medical Institute’ kilhenna a RIMS pang

Imphal, June 12(ET): Manipur University (MU) hi India gam a top 200 Universities holah a pang jou hih jongle gamsung mihon gamsung minphatna ding sem a Regional Institute of Medical Science (RIMS) aneiyin, National Institutional Ranking Framework (NIRF), Ministry of Human Resource Development in report apeh dungjuiya RIMS hi India gam a 40 Best Medical Institution holah a pang ahi.

Report dungjuiya, RIMS hi hiche list a pang jou Northeast state ho (west Bengal panna a) a kon Medical Institute khat seh bou ahi. RIMS hi Best Medical Institute 40 lah a RIMS hi 38 channa a pang ahi. India gam a Medical College 542 val um ahi in, RIMS hi AIIMS New Delhi tailou All India Institute of Medical Sciences adang ho jouse sanga hoijo a kisei ahi.

India gam a University ho National Institutional Ranking Framework (NIRF) in rank apeh dungjuiya Manipur University hi 266 channa a pang ahi. Chule Manipur Technical University hi 739 a pang a, Manipur University of Culture hi rank 869 a pang ahi.

DFKP in kiloikhomna kisem thu’a kiphon na leh thuphon phabep nei

Imphal, June 12(ET): Democratic Front of Khul(Khur) People (D.F.K.P) Government Of Khulland (Khurland) Chief in Command Thangliansanga S min a kimu thuphon in sei na ah D.F.K.P hung kiphu napen chu ahile Khul/Khur chate khunung a Zalen ding gel nale mipi te thalheng MLA, CSO chule haosa ho thudih le thutah a puihoi na ding’a achesa 2019 kum’a kiphut ahitai ati.

 Thuphon in aseibe na ah Khul/Khur chate sung’a kito mona le khatle khat kivetda na ho aniseh a apun jing akigel leh pohnat aum tan jungkhat thakhat a Khul/Khur chate din khomlou apoimo tahjeh a kiloikhom na hi hung umkha ahi ati.

Mipi thalheng a Khul/Khur chaten asot ho koitobang joule nal a kichem leh mipi ding gellouva chang phatchom na ding bou gel’a mipi chan ding lamdih louva mang le ne aum le tunia thuphon kinei hi apatna le achaina hiding, aban koima ngaidam kichan louding thuphon kinei kalval a chon akihet doh le koichung hijongle gotna sangpen kipe ding ahi ti isuhmil lou diuvin kiloikhomna in hetsahna ahung kineiye jong ati. Kiloikhomna in Asian Highway le National Highway compensation chung changa kihetsah nomchu koi CSO hihen, Haosa chule government natong hijongle mipi chandinga lom ama sakhao le phatchomna a mang akihet dohle achan dinga lom gontupsa ahitan khonunga koima iki oimo loudiuvin tiemna ahung kineiyin chule Organisation in ipi lampang hijong le Khul/Khur chate deile lamlhah dungjui a organization in na kitong jing ding ahi tin thuphon chun aseiyin ahi.

 

PM Modi in Coronavirus boina thu’a June 16, 17 teng Chief Minister hotoh kihouna nei ding

New Delhi, June 12:  Prime Minister Narendra Modi in online a  chief minister rhotoh coronavirus toh kisai a boina chung chang a ahunglhungding June nisim 16 le 17 nikho le kihou na aneipi ding ahi akiti. Hetthei khatchu tu kal sung a chu India sung a covid-19 natna nei hi niseh a 10,000 lam a ana khang jing ahi. Indi hi tule tua covid-19 in atoh khah gamlah a a li channa a aum ahin, athi hi govt het a mi 8,500 lam ahi vang ahi hiche sang a haa sang a sang ding a ginchet hi ahi.

Ni 70 lam lockdown ana um tohlhon a sum le pai dinmun suhhoi na ding a gamsung hoding tohgon ahung kinei jing toh lhon a hitabang a case khan hin govt natoh na ahin suhboi ding a um ahitan ahi. India sung khopi len ho a hospital ho jong adinmun ahoi tah loudan le hiche sang a ahung khoh jo le ajan ding dan hung um talouding dan jong hetsah na ana kinei ahi. New Delhi a jong ahunglhungding July lha kichai lam le case lakh 5.5 lam um ding dan hetsah na ana kinei ahi. Delhi in jong hiche natna kimai to pi ding dan chung a kiginna ana nei lou u ahi akiti. Gamsung a case asan jing vang in govt in lockdown chu alolhing lheh in ahi tin muntin a ana phongjel le uvin ahi. Hetthei khat chu India sung ahi natna nei vetsui lou le hetphah lou dimset ding a kisei ahi.