Coronavirus natna nei hidinga ginmo mikhat RIMS ‘isolation ward’ a kikoi

Coronavirus natna nei hidinga ginmo mikhat RIMS ‘isolation ward’ a kikoi

213
0
SHARE

Coronavirus natna nei hidinga ginmo mikhat RIMS ‘isolation ward’ a kikoi

Imphal, Mar 6(ET): Imphal Airport a Friday nikhon COVID-19 (coronavirus) case hidinga ginmo khat hetdohna anei uvin, mipa hi Guwahati a kon lenna a hung a, Imphal Airport hi tuni jingkah nidan 10.30 don a hunglhung ahi.

Natna nei hidinga ginmo mipa RIMS isolation ward a ‘observation’ le kijen dinga akoi tauvin ahi. Tuchan geiya hiche case panna a gamsunga coronavirus case hidinga ginmo case 13 kisei ahitai. Test bol dinga mi 12 ho sample athot nauva mi 10 a test result soh a, natna nei ahilou photchen hi ahitan, mi 2 a hi result anga jing nahlaiyu ahi. Tuni a Imphal Airport hung lhung a natna nei hidinga ginmo mikhat sample jong test bol dinga Guwahati a athot diu ahi.

India gam a coronavirus natna neiya mi 30 alhin tah vanga tuchan a natna jeh a athi kisei loulai ahi. Chule Manipur gam a coronavirus case photchenna kinei aumlou vanga sorkar in kiginna sangtah anei ahi.

Alangkhat a RIMS isolation ward a kipolut khat video social media a ana viral toh lhon in RIMS vaipo hon Imphal West police ang a isolation video le  coronavirus natna nei ding a ginchat umpa lim chu social media ho akon lahdopeh ahina ding in hetsah na ana nei uvin ahi.  Dammo na nei pa chu ipi natna ahi hetcheh ahi lou lai toh lhon a sample trest bol ding a kithot ahin, koima in coronavirus natna nei a aginmo na lou ding uvin jong RIMS vaipo ho in hetsah na ahin nei uvin ahi.

Imphal Airport a coronavirus natna nei khat hungkipohlut tia kisei Mock Drill ahi dan hilchetna kinei

Imphal, Mar 6(ET): Imphal Bir Tikendrajit Airport a coronavirus natna nei khat ahung kipo lut e tia thu kithang ana um chu mock drill ahibouvin ahi tin Directorate of Health Services Manipur in suhchen na ahin nei uvin ahi.

Hetthei khat chu Bangladesh a kholjin khat in coronavirus natna anei akimatdoh toh lhon in airport akon hospital lam a akipo in ahi tia thulamleng ana kithang ahi. Directorate of Health Services in hiche thu chung chang a hilchet na ahin neina uva hiche thilsoh chu exercise kibol ahi dan le  gamsung a corona virus hung lut teng umchan ding dan kijil na ahi dan tahlang na ahin nei uvin ahi. Directorate in hetsah na ahin nei be na uva tu chan in Bangladesh ah coronavirus natna nei aum hih lai in ahi tin jong hilchetna ahin nei uvin ahi. Alangkhat a ginmo jeh a RIMS a isolation a kikoi ho chu  adinmun u akicheh loulai toh lhon a koima in kichat tijat na anei na louding uvin jong temna ahin nei uvin ahi.

Question paper ‘leak’ thu a themmona neiho chunga action khoutah lah dinga Education Minister in sei

Imphal, Mar 6(ET): Education Minister Dr. Thokchom Radheshyam in question paper ‘leak’ ahina a jilkung chule official themmona neiho chunga action khoutah kila ding ahi, tin aseiyin chule ‘criminal case’ jong kijihlut ahitai, ati.

SSA conference hall, Babupara mun a BOSEM leh COHSEM in abol exam thu a thuso miho akimupi na a asei ahi. Chule March nisim 5 nikho a exam centre kinokhum a thil kisuhset a jilkung ho kibuluna thilsoh jong aseiyin, exam centre a hitobang alhun hi vangset umtah ahi, ati. Tukum HSLC exam, 2020 tou a simlai 38664 lah a exam centre 140 a mi khel a tou jeh a simlai 77 kinodoh a chule copy bol jeh a simlai 23 kinodoh ahi, ati.

Education (S) Department in coronavirus douna dinga kigotna anei dan ho thu jong Minister pa in aseiyin, gamsunga um school jouse henga bol ding leh bol louding ho circular kithot ahi, ati. Education (S) Director Thokchom Kirankumar in thuso miho akihoupi a a HSLC examination, 2020 a answer key hi March 11 nikho a kon BSEM website www.bsem.in a upload kibol ding chule nithum sunga ‘claim leh objection’ bol nading phat kipe ding ahi. ‘Claim leh objection’ pehlut nadinga March 14 nilhah nidan 4 chan aphat kihong ding ahi, tin hetsahna aneiyin ahi.

Press meet a Commissioner, Education (S) T Ranjit Singh, Chairman, COHSEM, L Mahendra Singh, Secretary COHSEM chule BSEM leh COHSEM official le staff hojong apang uvin ahi.

Exam centre kibulu na thilsoh a kisuse thil holeh akisukha ho kijenna abon a Five Star English School in apohdoh dinga kinoptona neiyu

Imphal, Mar 6(UNA): Five Star English School authority holeh Guardian Committee, Five Star English School chule ZEO Thoubal in Friday nikhon kihouna anei uvinachesa Thursday nikho a Five Star English School a simlai phabep in school thil asuhset a chule Lilong Higher Secondary Madrassa song a ase uva, mi kisuhkhah na natoh abol thu uva kinoptona asem tauvin ahi.

Five Star English School hi Lilong Atukhong Mamang Leikai a um ahi. Dan phabep asem uva kinoptona aneiyu ahi, tin thulhut in aseiyin ahi. Thulhut dungjuiya Five Star English School a School Authority holeh Guardian Committee, Five Star English School hohi school thil kisuhset, gari kisuhsetna chule akisukha ho kijenna a mopohna alah diu ahi.

“Gari panna a ase thil ho semphat na chule akisukha ho kijenna a lut sum ho apohdoh diu ahi”, tia kinoptona aneiyu ahi’in, chule khonunga hitobang thilsoh aumkit a ahileh Five Star English School registration kikah ding, ahilouleh notice peh masatna umlouva kilahpeh ding ahi, tin thulhut chun aseibe in ahi.

Thilsoh umchan akikhol sunga themmona nei akihedoh ho school authority, Five Star English School leh Guardian Committee, Five Star English School in themmona nei ho police ho henga apehdoh diu chule thukholna atosot diuva jong ‘deed’ (kinoptona) asem nauva aseiyu ahi.

Vangset umtah thilsoh chungchang a Five star English School authority holeh Guardian Committee, Five Star English School in mipi anga ngaidam athum ding ahi, tin aseibe uvin ahi. Hetthei khat chu kinoptona (agreement deed) a hi Md. Habibullah in School Authority thalheng, Md. Helaluddin in Guardian Committee thalheng chule A Anilkumar, ZEO Thoubal in sorkar thalheng a soi akai ahi.

Alangkhat, School Authority leh Guardian Committee, Five Star English School, Lilong in Lilong Higher Secondary Madrassa a Thursday nikho a thilsoh demna sangtah anei nau thuso anei uvin ahi. Md. Helal-luddin in soi akaina thuso a chun school in hitobang thilsoh aumkit lou nadinga pan sangtah alah dinga aseiyin chule thilsoh chungchang a ngaidam jong athum in ahi.

CBCA Kum 100 lhinna centenary mang’a che khangdong khat in thina toh; Pastor khat in jong vangsetna toh

Mangneo Touthang

Imphal, Mar 6(ET): Chongthu Baptist Churches Association in jani (Mar 5) apat March 9 chan chelha ding CBCA Gambih No. 03 Circle sung’a um Bunglung Baptist Church in Host abol kum 100 lhinna Centenary mang a hung Lungoumang@James Touthang (12) S/o Seikhohao Touthang chu Ithoi/Jil vadung a aloi hotoh akisilna uvah twi ah anakhelut in, aleiset hinkho ana beitan ahi. Ama hi CBCA Gambih No. 2 Bijang Houbung a kon ahin chule Salt Brook School a Class IX simlai ahi.

Lungouthang Touthang in thina ato toh kilhon in, Bijang CBCA houbung miten jong thanomtah a ana galdot jing’u Centenary kingon chu anadalhauvin inn ana lejot tauvin ahi.

Lungouthang Touthang thina chunga KSO Saikul hon jong jochan in thilong holna ah pan anala uvin ahi.

Alangkhat ah Centenary mang ding’a jani Tuibong CBCA Pastor, Ginneo Doungel in Bunglung ahinjot na ah Airport kom a mikhat ana sukha in, apet pet in mipa chun thina anatoh in ahi. Hiche nachung ahin, KKL holeh sahle lhang a sopi ulenao ho panpi najal in athite toh Dangka lakh 5 in athu chai ana hitan ahi.

Vangsetna chung’a pan nasatah’a hinla Kamthang Haokip, President KKL leh aloiho chung ah Pastor Ginneo Doungel Pupa Thongkam @Kamboi Touthang in kipathu jong ana sejin ahi.

Lamphel Supermarket R.K Hotel mai a jukham khat in aloipa kaplih

Imphal, Mar 6(UNA/ET): Tuni chun Chief Judicial Magistrate, Imphal West in mithat a kingoh Heisnam Premjit chu ni 8 sung tichu March 13 chan police custody a umding in thu atankhum tan ahi. Thulhut in aseina achun Uripok Bachanspati Leikai a cheng Ibomcha chapa Heisnam Premkit (48) in tuni jingkah nidan 4 don chun Lamphel Super Market a um R.K Rice Hotel mai ah a license meithal chun Uripok Kabrabam Leikai a cheng (L) Kameshore chapa kabrabam Shyam alias Nanao (48) chu akaplih in akaplih chomkhat jouvin police hon ana mandoh pai uvin ahi. Tuni mama in CJM Imphal west masang a dinsah ahitoh lhon in ni 8 sung police custody a umding in thutan khumna anei in ahi. Hiche case a IO pa in aseina achun tuni jingkah pung 4 don chun super market a thal kikap thu akihe in amun akidellut pai e ati. Nanao chu RIMS hospital lhut ahi vang in doctor hon athisa a hinlhut uh ahidan ahetsah uvin ahi.

Hiche thilsoh chung chang kholchilna kibolna achun Heisnam Premjit in a license meithal mangcha a akaplih ahithu amatah in aphong in ahi. IO pa in court ang a thulhut apehlutna a aseina achun Premjit hi Keishampat akon jingkah 2:30 dong in Lamphel supermarket ajon in 2:40 don in alhung in R.K Rice hotel ah ju athum in hotel neite toh jingkah pung 4 chan hotel mai achun adon khom un ahi. Hiche phat chun Kabrabam Shyam leh RIMS gate kombirei keithel a cheng Yumnam Nilachandra chu R.K hotel jon chun ahung uvin Nilachandra chun Premjit heng ah keini sang in adonmasa hon e tin atot in chule ju chu a li uvin adon khom uvin chomkhat jou chun Premjit chun ameithal poh chu asatdoh in Nilachandra chu akap gon hiche phat chun Nilachandra chun akhut in adaldoh in Kabrabam Shyam joh chu akap kha in ahi. Shyam chu RIMS hospital lhut ahivang in ana damdoh jou tapon ahi.

Hiche thilsoh toh lhon in JAC semdoh in aum in hiche a lamkai Silhan Singh in aseina achun hiche tobang mi kikaplih thu akija jing in akisaipi authority hon meithal license pehdoh masang in aneiding ho kholchilna bol masat ding in asei in chule mithat pa chung a akitopoi gotna akithei pen a apeh ahina ding in jong asei in ahi. Thangmeiband United Club (TUC) hon jong thilsoh chungthu a deilou vetsahna in toumun kiphinna abol uvin mona nei pa chung a gotna peh ahitei ding in aphong uvin ahi.

 

ATRPFM in ADC ho term kum 5 kalval a suhsao be loudinga thumna nei; Election aphatcha bol dinga seiyu

Imphal, March 6(ET): All Tribal Rights’ Protection Forum Manipur (ATRPFM) in tua ADC ho term hi April, 2020 a kichai ding ahi, tin asei uvin chule Administrator in term hi kivaipohna a hahsatna dinmun sangtah aumding peldoh nading ahi ti lunglhaina anei teng lebou office term asuhsao be thei ahi, tin asei uvin ahi.

HAC leh Cabinet in ‘office term’ extend bol dinga thulhuhna anei hi office term suhsao be nading ajeh kicheh/kitup umlou, akibulphu na umlou ahi. Ajeh beiya Cabinet in ‘office term’ suhsaobe dinga HAC in ‘recommendation’ apeh phatsahna anei hi dan dihlou ahi. HAC in amaho deibang hilouva tribal mipi ho phatchomna dinga Act achepi ding ahi, ati.

ADC member ho term hi kum 5 ahi’in, chule election notification ahilouleh nomination ni a kon kisim pan ahi. Forum in nisim 12.02.2020 ni a Governor, Chief Minister, TA&Hills Minister, Chairman, HAC chule Chief Election Officer, Manipur henga ADC election 2020 hi go juh kipat masang, April ahilouleh May lha ho a abol diuva ngehna lekha apehlut u ahi.

“Election Officer (HQ), CEO, Manipur in Secretary, State Election Commission, Manipur henga lekhathot nisim 26.02.2020 ni a apeh copy kamu uvin ahi. Ahivanga mopohna nei authority hon action alah loulaiyu ahi’in, aphatna dinga natoh sanga Additional Chief Secretary (TA & Hills), State government in nisim 29.02.2020 ni a ADC CEO jouse henga state cabinet in nisim 26.09.2019 ni a meeting anei nauva ADC 6 (gup) a tohmun ong 750 (ADC khat a post 125 cheh) lah nadinga phatsahna anei thu joh jui dinga asei ahi.

Election kon tah a ipijeh a appointment kila ding ham ti sorkar in hilchenna apeh dinga temna kaneiyu ahi. Aumsa ADC in election kon chule election joutah a natoh alah got ahi, ADC thah hon avohhai theiyu ahi, ti ginmona um ahi. Natoh kilahna hi election expenditure a ding ham, ipijeh mong ham? tin Forum in thudoh aneiyin, ADC election hon kum 5 term sunga angaicha khantouna ding atoh louvu ahi’in, tua phat kipehbe hi ajeh umlou ahi. Hiche jeh a ADC election angaiya banga bol ding ahi, tin aseibe uvin ahi.

November lha a election bol dinga recommendation lahdoh dinga ATRPFM in temna aneiyin, chule April ahiloule May lha teng election bol dinga temna anei uvin ahi. Chule HAC in ‘partyless election’ bol dinga recommendation apeh jong ATRPFM in demna sangtah anei uvin ahi.

 

Manipur University a natoh 209 kila ho lahdoh ding thu a thudoh anakinei

Imphal, March 6(ET): University Grant Commission (UGC) akon lekha kimu dungui a Administrator Jarnail Singh  mopoh na sung a kila natoh na ho chu lahdoh ding hilou ham tin thudoh ahung kinei in ahi. Hiche thudoh chu Ministry of Human Resource Development, Department of Education in central university 39 ho a Vice Chancellor ho ang a thuthot ana nein a utoh kisai a hung kinei ahi. Hetthei khat chu central university ho ahi Acting Vice-Chancellor ho in appointment jong phat chom khat ading bou ho apeh thei ding u, Finance Committee, Executive Council le Academic Council meeting ho akou thei ding u bou ahi kiti ahi.  Achesa 2014 kum a Pramod Kumar Saha, Deputy Secretary,  Government of India in lekha thot ana neina anatoh  permanent a lah ahi lou le thil thah pohdoh kiti hohi acting VC in abol thei lou ding a hetsah na ananei ahi. Hetthei khat chu achesa 2018 kum a Manipur High Court in Manipur University boina toh kisai a Jarnail Singh chu phatchom khat administrator ding a nganse na ana nei u ahi. Achesa March nisim 4 nikho a chu Ministry of Human Resource Development, Government of India in Registrar, Manipur University  ang a Vice chancellor thah lhen na ding a natoh akipat ding hetsah na ana nei u ahi. University sung a natoh na lah na kinei na ho ahi Registrar in UGC ang a hetsah na anei ham anei lou ham ti photchen hilou lai ahi. MHRD  in central university ho ang a lekha thot ana nei kichepi jing ahi nalai toh lhon a acting VC noi a natoh mun kila ho lahdoh ding a um ahi.

 

Question paper leak thu a DESAM in govt. gihna bol

Imphal, Mar 6(ET): Tuchung class 10 leh 12 question paper leak toh kisai in Democratic Students’ Alliance of Manipur (DESAM) hon Manipur Cyber crime unit ang ah complai abol utho lhon in hiche a mona neiho akinthei pena a matdoh hiding in thuso abol uvin ahi.

Secretary Leishangthem Lamyanba in aseina achun Higher Secondary Education Manipur (COHSEM) le Board of Secondary Education Manipur (BOSEM) hon akitup theiding pen a exam hi agon uh ahi in hinlah jilkung phabep kitahlou jeh in question paper akihomdoh masakha in hiche chungthu a Manipur cabinet in nithum kah a atoukhom uva ni 15 sung a mona neiho kholdoh ahi a gotna peh ahitheina ding in asei in ahi. Phat kitep sung a govt. in aboldoh loule DESAM leh AIMS ho thipbe cha a kiumlou ding thudih kholdoh nadingleh thil bolkhel ho gotna akipeh theina ding a bol thei thei kibol pan ding ahi ati.

CBCA Kum 100 lhinna centenary Janglumsong kihondoh; Chongthu Holy Bible thenso na jong kinei

Mangneo Touthang

Imphal, Mar 6(ET): Chongthu Baptist Churches Association (CBCA) Kum 100 lhinna Centenary achelhah jing toh kilhon in, tunin Centenary Janglumsong Rev. Kamkhosat  Kilong, Executive Secretary CBCA in Pathen henga lhandoh naleh hondohna ana neitann ahi. Centenary Janglumsong feet 21 a sang hondoh ahitoh kilhon in Centenary Choir hon CBCA kum 100 lhinna Vahchoila ngeita ana sauvin, Dahpi 100 vei chupna jong ana um in ahi.

Kum tampi hung kiboipi Chongthu Holy Bible chu Dr. Ken Schmitt, Senior Advisor for Special Projects, Wycliffe Bible Translators, USA in Hondohna/Thensona jong ana neiyin ahi. Chule CBCA khang thusim adia suhmil thei lou houbung hung kiphudoh til a kipat tuni changeija CBCA thusim kisutna Souvenir jong Rev. Dr. Seikhokam Touthang in hondohna ana nei kit in ahi. Sun kaikhom chu Rev. Sehkam Dimngel, Education Secretary CBCA makainan ana um in, Rev. Dr. Ngul Khan Pau in Pathen thu ana seijin CBCA houbung 61 akon delegates 7000 val in tuni kikhopna a pan analan ahi.

Imphal-Moreh highway a bandh umlou

Tengnoupal, March 6(ET): Moreh le Tengnoupal a boina ima aumpon, nitin kimanchah bang in natoh achelha jing in bandh kikou na ima aumpon ahi akiti. Hetthei khat chu Manipur Tribal Indigenous Farmers Committee in bandh akou e tia ana kisei ahi.

Jingkah lam chun Lamkang Khunou a bandh tosot mi phabep ana um in police in ana no cheh uvin ahi akiti. Highway a gari angai bang in alhai in boina ima aumpoin ahi tin thuso kimu chun asei in ahi.

MTIFC hon National Highway a shutdown bolding

Imphal, Mar 6: Manipur tribal Indigenous Farmers Committee (MTIFC) hon Manipur gamsung lut National Highway ho ah tuni jingkah nidan 1 am apat pungkah 24 sung total shutdown apan tauvin ahi. MTIFC a President RA Fernandez in aseina achun hiche kiboljeh hi Manipur government in Chief Engineer retired L Brojendro Singh chu Department of Tribal Affairs and Hills a Chief Engineer cum Technical Consultant a apansah kit jeh ahi thu asei in ahi.