Coronavirus natna akisei thang jing toh kilhon a Myanmar, China leh South...

Coronavirus natna akisei thang jing toh kilhon a Myanmar, China leh South East Asia gam a kon kipolut nehthei ho state sorkar in ‘Ban’ bol ta; Myanmar leh Bangladesh gamgi juiya ‘coronavirus screening center’ kikoi ta; Sorkar in ‘charter of demands’ ana kipe ho aganna thei pen a abulhit louleh kiphinna sangtah bol dinga ATSUM in gihna nei; Gamsung in ‘food safety standard’ palkeh ho gotna apehna a leuman Dk. lakh 7 nailam mu; RK Jaichandra Singh Manipur Youth League 2020 hondohna kin a CM in Khumanlampak Stadium a Flood light kito hondohna nei; Khwairamband bazar a kinotona a police 4 leh lamlen pam a thil joh numei 3 kisukha; UPSC, RRB leh SSC in tukum post ong 1.34 lakh la ding; Class XII exam umna ding centre ho a Section 144 kikoi; ZoRO GHQ in Zo Kupui kiman ding kipapi; NE state sung a project 667 kichai ta; Imphal khopi a kiphinna bol jilkung hon kijotna anei got police hon suh molphou peh

697
0
SHARE

Coronavirus natna akisei thang jing toh kilhon a Myanmar, China leh South East Asia gam a kon kipolut nehthei ho state sorkar in ‘Ban’ bol ta

Imphal, Feb 6(ET): Coronavirus natna akisei thang jing toh kilhon a state sorkar in China, Myanmar chule South East Asia gam dang dang a kon kipolut a, Food Safety and Standards (Import) Regulation, 2017 juilouva nehthei packet a kichun ho ‘ban’ abol tan ahi.

Addl Food Safety Commissioner, Directorate of Health Service office in notification asodoh nauva, “Food Safety and Standards (Licensing and Registration of Food Business) Regulations a kipe dan ho toh kitoh a Central Licensing Authority a kon ‘import license’ beiya neh leh chah ho koiman apohlut theilou ding ahi”, ati.

Notification a chun dan a kipe dungjuiya ‘marked’ leh ‘labeled’ kibol lou nehthei thil (packed) ho joh nadinga koiman asem theilou, ahop theilou, ajoh theilou ding ahilouleh agent ho apeh theilou ding ahi, tin aseibe in ahi. Chule gamsung mihon Food Safety and Standards (Import) Regulations, 2017 jui louva China, Myanmar leh South East Asian Country ho a kisem nehthei ho aneh lou diuvin jong thuhilna aneibe uvin ahi.

Chukit leg State Health Department in department noi a natong ho heng a jong phate a mipi avetlhah jing ding uvin hetsah na anei uvin ahi. Department in mipi ho heng a China, Myanmar le South east gamho akon nehthei ho aneh lou ding uvin jong temna ahin nei uvin ahi.

Alangkhat a additional director health services  Dr. L Arke in thuso miho toh akihoulimna a department in hiche thu toh kisai a ministry of health and family welfare toh kijaah mat tona anei jing dan u hetsah na ahin nei uvin ahi. Gampam akon hunglut miho jong phate cha a akivet lhih jing dan jong Arke in phondoh na ana nei in ahi. Hetthei khat chu corona virus toh kisai a Principal health secretary, health department,  RIMS natong ho,  JNIMS le Manipur health services jat chom chom ho in kihoukhomna jong ana  nei uvin ahi.  Additional director pa in asei be na a China, Thailand le Singapore akon mi 172 lam jong vetchil jing a aki koi dan jong hetsah na ana nei uvin ahi. Coronavirus toh kisai in sample 7 lam jonh  Pune a test bol ding in akithot tan ahi akiti. Centre in hiche natna nei jat phate cha a hetsah na ahin nei lou jeh uvin mi ijat in hiche dammo na anei ham ti akihe chen pon ahi tin jong Arke in ana sei in ahi.

Khwairamband bazar a kinotona a police 4 leh lamlen pam a thil joh numei 3 kisukha

Imphal, Feb 6(ET): Imphal khopi a Thursday nikho a kailhang a kinahna asoh in, thilsoh a lamlen a thil joh mithum leh police 4 akisukha uvin ahi.

Thil joh hon GM Hall, Imphal a meeting bol dinga agot u police hon asuh molphou peh jou uva thiljoh holeh police ho kah a kinahna um ahi. Lamlen pam a thiljoh hon thil ajoh theilou diuva akikha jouva kon achesa kal ni sung kiphinna aneiyu ahitan, Imphal Municipal Corporation (IMC) in thupeh anei jouva police hon lamlen pam a thil ajoh diu akha ahi.

IMC in achesa January nisim 16 nikho a order asodohna a lamlen pam a thiljoh hon jingkah nidan 5 leh nidan 9 kikah a athil u atoupi diuva thupeh anei ahi’in, hiche hi thil joh hon sangtah a adoudal ahi. Order akichepi pan a kon niseh tobang a police holeh lamlen pam a thiljoh ho kah a kinahna umjing ahi.

IMC thupeh douna neiya thil joh ho Thursday nikho a GM Hall a kikhop a, ahahsatnau seikhom ding agot u ahi’in, ahivanga police tamtah in amun alut diu aphalpeh lou jou uva thiljoh ho lunghanna sang cheh cheh a kinotona um ahi. Meeting bol nading mun kalut diu eiphalpeh pouvin, meeting bol nadinga administration in phalna eipeh u akivohai tai, tia eiphalpeh louvu ahi, tin thiljoh mikhat in thuso miho henga aseiyin ahi.

Police ho umchan chunga lunghang a thiljoh ho Khwairamband Keithel langa kijot uva, kiphinna abol u ahi. Lamlen pam a thiljoh ho umchan jeh a kailhang a niseh kimanchahna aboi phat a police phabep in anokhum uva, kinotona sangtah um ahi. Thil joh hojong nungchon louva police ho akimaitopi ule police hon mock bomb leh tear gas chan akap u ahi. Thilsoh a police 4 leh lamlen pam a thil joh numei 3 akisukha in, akisukha ho RIMS hospital a apolut tauvin ahi.

Imphal khopi a kiphinna bol jilkung hon kijotna anei got police hon suh molphou peh

Imphal, Feb 6(ET): Police hon Thursday nikhon kiphinna bol college jilkung hon rally bol ding agot asuh molphou peh uvin, college campus sunga ahenden uvin ahi.

All Manipur College Teacher’s Association (AMCTA) in Federation of Government College Teacher’s Association (FEGOCTA) Manipur tosotna a Imphal khopi lamlen a kijotna neidinga tohgon aneiyu ahi. FEGOCTA noiya government teacher hon January nisim 28 a kon 7th UGC Pay and Regulations 2018 chepi nadinga strike apat u ahitai.

Thumna anei hou sorkar in asanpeh loujeh a FEGOCTA in February nisim 3 nikho a kon phat teplou cease work strike apat u ahi. FEGOCTA in thumna anei tosotna a jilkung hon Imphal khopi a AMCTA banner a kijotna bol dinga tohgon aneiyu ahi’in, Manipur College campus, Imphal a meeting anei jou teng ule kijotna pat ding agot u ahi.

Ahivanga, state sorkar in ngansena anei police phabep in jilkung hon rally abol diu aphalpeh louvu ahi. AMCTA spokesperson Dr Ibotombi Singh in thuso miho akimupi na a state sorkar in phat sottah a kon kisei 7th UGC Pay and Regulations 2018 agelkhoh lou ahi, ati. BJP lamkaina sorkar in akitepna abulhit poi tin demna sangtah aneiyin ahi. BJP in election manifesto a state sorkar natong ho 7th Pay Commission chepi dinga kitepna anei thu asei ahi.

BJP sorkar vaipoh sung kum ni-le-keh lhing ahitan ahivanga kitepna aneiyu anatoh a avetsah loulaiyu ahi, ati. 7th UGC Pay and Regulations 2018 chepi ding tilouva state sorkar in thumna anei point 10 ho avetpeh diuva jong college jilkung hon thumna aneijing ahi. February nisim 3 a kon FEGOCTA in cease work strike apat ahitan, ama ama college a class alah louvu ahi.

Phat teplouva cease work strike bol dinga aphondoh vang uva exam toh kisaiya natoh ho bol dinga kiphinna bol jilkung hon thuphon aneiyu ahi. February nisim 5 chan FEGOCTA lamkai hon kiphinna sangtah anei jing nahlaiyu ahi.

 

UPSC, RRB leh SSC in tukum post ong 1.34 lakh la ding

New Delhi, Feb 6: Central government department chom chom a tohmun ong lakh 6.83 aumin, government agency hon tukum teng agom a post 1.34 lakh lah ding agot diu ahi, tin personnel ministry in Lok Sabha a aseiyin ahi.

Union minister of state (independent charge) Dr Jitendra Singh in thudoh jihtho a adonbut na’a, Union Public Service Commission (UPSC) in post 4,399 alah ding, Staff Selection Commission (SSC) in post 13,995 alah ding chule Railway Recruitment Board (RRB) in post tampen- 1,16,391 alah ding ahi, ati.

Central government a tohmun ong hohi retirement, natohna a kon haina neiya, thina, promotion leh adang dang jeh a ong ahi’in, recruitment rule dungjuiya mopohna nei ministry/department/organization in tohmun ong ho alah ding ahi, tin Minister pa in aseiyin ahi. “SSC, Railway Recruitment Board, Postal Service Board leh Ministry of Defence kiti recruiting agency hon defence civilian post a tohmun ong 27,652 panna a agom a post ong 3,10,832 lah nadinga natoh apat ahitai”, ati.

Department in aong a aum’e tia asei post ho akilah kah a vacancy athah thah umkit ahi, tin jong aseiyin ahi. Post khat chu kum ni kum thum val a ong a auma ahileh (newly created post) hiche hi akisumang a kikoi ahi, tin hetsahna aneiyin, hijong leh Railways a post kisuhmang na system aumpoi, ati.

DOPT in tohmun ong ho lah nadinga aphat dungjuiya thuhilna anei jing ahi. “Recruitment cycle suhnem nadinga recruiting agency hon computer based online test a akhel u ahitan, non-gazetted post a interview kibol kinga ahitai, tin Union Minister in jihtho a donbutna apehna a aseibe in ahi.

 

Gamsung in ‘food safety standard’ palkeh ho gotna apehna a leuman Dk. lakh 7 nailam mu

Imphal, Feb 5(ET): 2018-19 kum sunga gamsung in ‘food safety standard’ ki palkehna case 12 vel a penalty a revenue dangka 6,8,000 amu in ahi.

Manipur gamsung hi Northeast a dinga ‘food safety standard’ palkeh jeh a leuman la tampen ahi. Hiche thu hi Food Safety and Standards Authority of India (FSSAI) in 2018-19 annual public laboratory testing report apehna a asei ahi.

Ahivanga, Press Information Bureau (PIB) a report asodoh nauva penal kipehna case 12 a koima themmo kichan lou ahi, ati. Case 18 hi state sorkar in alah ahi’in, atamjo hi civil case hi ahi. FSSAI in agom a Manipur a kon sample 388 amu a, hiche lah a 56 hi ‘non-conforming’ hi’a, 28 hi ‘defects’ kiti a chule 28 hi ‘substandard’ kiti ahi.

Northeast state holah a Mizoram, Sikkim leh Tripura gam in case aneilou jeh a revenue akalsah theilou ahi. Leuman sum tam lahpen anichanna a Meghalaya gam pang a, case thum a dangka 1,93,700 alah a, hiche a hi criminal case khat pang ahi.

Assam gam a criminal case 7 um’a, case nga a penalty akoi uva, dangka 77,000 amu ahi. Arunachal Pradesh in criminal case khat le civil case sagi aneiya, 2,100 hi ahi. Non-conforming sample holah a Manipur gam sangpen a, aban a Nagaland gam (202) hi ahi.

Food Safety and Standards Act, 2006 kichepi hi state/UT government chunga kingam ahi, tin PIB report chun aseiyin ahi. State/UT level a dan suhgah dinga FSSAI in state/UT ho henga hatah a asei ahi. Regulatory staff lhahsamna leh full time officer lah ding, sampling leh testing facility ho semhoi ding, central advisory committee meeting lhathum seh a bol ding, food safety department official hotoh video conference ho bol jing dinga aseiyu ahi.

State/UT 29 a um state food testing lab 38 upgrade bol nadinga FSSAI in dangka crore 269.69 asodoh ahitai.  Hiche chunga Food Safety on Wheel kiti mobile food testing laboratories 54 jong state/UT 32 a kipe ahitai, tin report chun aseibe in ahi.

RK Jaichandra Singh Manipur Youth League 2020 hondohna kin a CM in Khumanlampak Stadium a Flood light kito hondohna nei

Imphal, Feb 6(ET): Tunin RK Jaichandra Singh Manipur Youth League 2020 a masapen chu Khuman Lampak Main Stadium ah akipan tan ahi.

Hiche match kipat masang ahin CM N. Biren in floodligh kitothah ho chule stadium kisemthah honna anei in ama ahoulimna a seina achun kichep golseh hi khangthah ho khamnathei akon vendohna phatah ahin tuhin main stadium jan a jong manthei ding in semdoh ahi tan, Langjing Achouba a astro-turf kisem jong kichai vah ding ahi tan chule mun thum a jong kisembe nalai ding ahi ati. Main stadium aphatcha a manthei ding a nganse a um Sports Minister Letpao Haokip chung a CM in kipathu asei in YAS official holeh Philips company chung ajong kipathu asei in ahi.

Hiche league sung a hin floodlight noiya kichem diu ahi in hondohna kin achun Chief Minister team leh Chief Secretary team hon kitetna anei uvin Chief Minister pan goal masapen chu ana khum in chule L. Nandakumar IAS in Chief Secretary team ho ding in khat akhum kit in 1-1 in aki chai uvin ahi. Hiche Youth league 2020 a opening match chu Classic football academy leh HIYAI football academy ho akichem uvin ahi.

A umtalou RK Jaichandra Singh hi MLA RK Imo Singh pa ahi in ama hetjing nading a khangthah ho football lampang a kalbi khat semsah ding tupna jeh a kibol ahidan jong thulhut chun asei in ahi.

Sorkar in ‘charter of demands’ ana kipe ho aganna thei pen a abulhit louleh kiphinna sangtah bol dinga ATSUM in gihna nei

Imphal, Feb 6(ET): All Tribal Students’ Union Manipur (ATSUM) in Thursday nikhon sorkar in thumna ho aganna thei pen a abulhit louleh kiphinna sangtah bol dinga gihna anei uvin ahi.

ATSUM General Secretary in head office, Adimjati mun a press meet abolna a thuso anei ahi. ATSUM, ANSAM, KSO-GHQ in Charter of Demands apehlut hohi sorkar in aganna thei pen a abulhit louleh kiphinna sangtah bol dinga ATSUM General Secretary Seiboi Haokip in gihna aneiyin ahi.

Hetthei khat chu achesa August 13 nikho a CM Conference a Chief Minister lamkaina a ATSUM, ANSAM, KSO-GHQ chule state government officer hon kihouna aneiyu ahi. Kihouna anei nauva simlai kiloikhomna thum in Education (S) noiya hill district a teaching leh non-teaching staff alhing a peh diu, higher secondary school a lecturer alhing a apeh diu, 2006 batch contract teacher (Education-S in alah ho) regularize hisah ding, Adhoc teacher ho regularization, MIL teacher lecturer lah ding, hill district a high school ho higher secondary a upgrade bol ding, Tamenglong leh Tadubi a science stream hondoh ding, Churachandpur leh Ukhrul a B.Ed center sem dinga jong thumna aneiyu ahi.

IGNTU-RCM hi full-fledged autonomous university a upgrade bol ding, Tribal Affairs and Hills a vacancy umho lah ding, Autonomous District Council 6 noiya teaching leh non-teaching staff alhing a lah ding, Tribal Research Institute hi directorate ahilouleh department chom a sem ding, JNIMS a category chom chom a ST post ho lah ding, hill district a um hospital a specialist doctor koi ding, central institution ho a group C leh group D post direct recruitment a reservation koi ding chule post jouse a recruitment a reservation policy hi 200 point Roster dungjuiya khoutah a chepi dinga ATSUM in thumna anei ahi.

Meeting a thumna anei hou Chief Minister chule mopohna nei department ho henga apohdoh uva, Chief Ministr injong lha phabep sunga tahso dinga simlai kiloikhom ho henga kitepna anei ahi. Ahivanga state sorkar in tuchan a donlouva akoiya, action alah loulai ahi. Adang dang a tribal ho dinga sanction kibol fund ho state sorkar in achom a amang’e, tia kisei ahi’in chule simlai kiloikhom hon thil umchan amoh vetthei lou ahitai.

State sorkar in bulhit dinga kitepna asem ho aganna thei pen a abulhit dinga temna aneiyin chule state sorkar in thumna ho asan peh louva ahileh union in kiphinna sangtah apat ding ahi, tin aseibe in ahi.

Class XII exam umna ding centre ho a Section 144 kikoi

Imphal, Feb 6(ET): COHSEM noiya umding Higher Secondary Examination, 2020 dihtah leh thengtah a akibol theina dinga District Magistrate, Kakching district in district sunga um Examination centre ho a kon metre 100 hopsung a section 144 CrPC akoi tan ahi.

Exam hi February nisim 14 a kon March nisim 23 chan umding ahi. Thupeh hi exam kichai kah jingkah nidan 9 a kon nilhah nidan 4 sunga kichepi ding ahi. Exam gong a pang Government official/machinery ho chule changval hon District Magistrate, Kakching district a kon ‘special permit’ akilah diu ahi’in chule Superintend of Police, Kakching district hiche dan in akan louding ahi, ati.

Section 144 kikoina Kakching district a examination centre hohi- Kakching Higher Secondary School, Kakching; Kakching Khunou College, Umathel; Langmeidong Higher Secondary School, Langmeidong; Padma Ratna Higher Secondary School, Kakching; Pole Star College, Wabagai chule Sugnu Higher Secondary School, Sugnu ahi.

 

Myanmar leh Bangladesh gamgi juiya ‘coronavirus screening center’ kikoi ta

Guwahati, Feb 6(IANS): China gam a kipan coronavirus natna a kon kivenna ding a India vaipo hon Myanmar leh Bangladesh gamgi a screening and testing centre ahongdoh tauve, tin official hon Wednesday nikhon asei uvin ahi.

Airport Authority of India (AAI) in state sorkar toh hitobang screening and testing counter hi Northeast India a airport atamjo a ahon ahi. Mizoram Health and Family Welfare Department official khat in, Aizawl khopi a doctor leh health staff ho panna medical team hon achesa Tuesday a kon Zokhawthar (Indo-Myanmar gamgi, Champhai district checkpost) a medical check-up abol uve, tia asei ahi.

District administration official hojong gamgi a kikoi ‘screening and testing centre’ a aumsah u ahi. Gamgi galkaiya Myanmar sorkar injong achesa January nisim 27 nikho a kon gamgi galkai ho medical screening apat ahitai, ati. Manipur Health and Family Welfare Department official hon Indo-Myanmar gamgi Moreh leh Behiang a jong che le vah le ho abon a screen abol u ahi.

“Myanmar sorkar in tourist ho chule gamgi mun jouse a kholjin ho screening abol ahi”, tin official khat in aseiyin ahi. India-Bangladesh gamgi jui Tripura, Meghalaya leh Mizoram gam a jong checkpost ho a screening and testing centre ho kimangcha pan ahitai. Northeast India gam li- Tripura, Meghalaya, Mizoram leh Assam gam toh Bangladesh gam hi km 1,880 lhing gamgi kikop ahi’in chule Manipur, Mizoram, Nagaland leh Arunachal Pradesh gam hi Myanmar toh km 1,640 lhing tho kigen lou gamgi kikop ahi.

Aizawl khopi a um official hon January lha kipat til a China gam a kon hung kile a mi 2 ‘inmun a kon vahdoh louva (house quarantine) kikoi ahi’in, gam kinaipi a thina thei coronavirus natna douna ding ahi, ati. Mizoram Health Department official khat in mi 2 teni hin natna anei hetdoh theina natna ima aneilou chule test kibolna a negative ahivanga kivenna dinga achom a kikoi ahi, ati.

AAI Regional Executive Director (NER) Sanjeev Jindal in Lokopriya Gopinath Bordoloi International Airport, Guwahati hibou Northeast a international flight operation aumna ahi’in, Singapore leh Bhutan lenna leng ahi, ati. Centre sorkar a kon standard operating procedure (SOP) akimu jouva ‘special screening, testing and checking counter’ hi Assam sorkar kithopina a kihongdoh a, kal masa a kon Guwahati airport a hiche hi kimangcha pan ahi, tin thuso miho henga aseiyin ahi.

ZoRO GHQ in Zo Kupui kiman ding kipapi

B.Lalboi Gangte

CCpur. Feb 6 (ET): Zo-Reunification Organisation (ZORO) Ghq, Aizawl Mizoram akon President R. Sangkawia in tuni hilchetna thuso anei na ah, Manipur state sung’a newspaper phabep ho a Zo Kutpui kiman ding ZoRO in adal dan kiso ho jouthu ahin ZoRO Ghq in hitobang ngaidan akineipoi ati.

ZoRO in Zo Kutpui kiman na ding doudal tahsang in Committee in seikhom na anei dungjui va Zo Kutpui a pan lah ding in thulhuh na joh akineiye ati.

Mizoram Govt. in Zo chate sopi khat hi nading’a panlah na aneihi ZoRO in akipapi toh kilhon’a  ZoRO policy a ZO chate kisepkhen ho sopi ihinao geldohna athah beh  ahina ding joh a nakitong ho ZoRO in kitosot soh kei ahi ati.

NE state sung a project 667 kichai ta

Imphal Feb 6(ET):   DoNER Minister Jitendra Singh in tuni a Rajya Sabha ahetsah na achun 2014-15 sung a Northeast gamsung in project 667 akichai e ati. Aseibena achun 2014-15 kum sung a ding in Union Ministry of Development of North Eastern Region (DoNER) chule North-Eastern Council (NEC) heng ah NE gamsung semphatna ding in project 549 dangka crore 8640.08 sanction akibol e ati.

Union minister of state (Independent Charge) Development of North-Eastern Region (DoNER), MoS PMO, Personnel, Public Grievances & Pensions, Atomic Energy and Space in Rajya Sabha a hetsah na achun project 667 akichatan chule hiche akibol jing lai hin project 32 ahung kikoibe in tua kichailou ho jong hi patding a kigongtoh sa ngen ahitai ati.