Coronavirus case thah 24,201 akimube toh lhon a India in Russia khel...

Coronavirus case thah 24,201 akimube toh lhon a India in Russia khel ta; Leiset chung’a case tamna pen gamho lah a athum channa a pang

66
0
SHARE

Coronavirus case thah 24,201 akimube toh lhon a India in Russia khel ta; Leiset chung’a case tamna pen gamho lah a athum channa a pang

New Delhi, July 5: Coronavirus natna akisei khoh na pen gam ho lah a India in Russia gam akhel in, athum channa a apang tan ahi.

Sunday nilhah chan a India a natna nei case 6.9 lakh val lhing ahitai, tin state government data hon aseiyin, America gam a um Johns Hopkins University (JHU) in asei dungjuiya natna nei lakh 6.8 umna Russia gam India in akhel ahitai. Tua hi India chunga Brazil le US gam bou um ahitai. Natna akisei khoh na pen US gam a natna nei lakh 28 val um a chule Brazil a lakh 15 val um ahi.

India a Sunday nikho chan a coronavirus case kihetdoh be hi ‘record’ hi ahi. Sunday jingkah a Health ministry in update abolna a, achesa nidan 24 sunga case 25,000 nailam aumin, chule mi 613 athi e, tia asei ahi in, hiche hi India gam a achesa January lha kichaiya natna case masapen akihetdoh a kon case kimudoh asan na pen hi ahitai.

Achesa Saturday nikho a India gam a Covid 19 case athah chule natna jeh a thi hatah a kal ahi in, case athah 24,201 alhing in, tuchan geiya dinga nikhat a case kihet be asan na pen ahitai. Chule natna jeh a achesa nidan 24 sunga mi 608 athi in ahi.

Nithum kijom a natna nei kihetdoh be 23,500 case aval na ahitai. State government in data alahkhom dungjuiya India gam a Covid 19 case hi 6.9 lakh val lhing ahitan Sunday nikho a Russia gam akhel ahi tai. Russia akhel toh kilhon a India hi coronavirus case tam na pen gam holah a athum channa a pang ahitan, US (lakh 29.1 val) chule Brazil (lakh 15.5 val) noiya um ahi tai.

Saturday ni a natna hatah a akalbe akiseina a hi Maharashtra gam a natna kihet be sang pen kit a, agom a 7,074 case kihetdoh be ahi. Maharashtra a nikhat a case thah 7000 avalna amasat na pen jong ahi. State adang 6 a jong natna hatah a kal ahi. Karnataka a case 1,839, Bengal a 743, Gujarat a 712, Rajasthan a 480 chule Kerala a 240 kiseibe ahi in, chule Goa a natna nei 100 aval na jong amasapen ahi.

Natna jeh a thi mi 600 aval na amasat na pen jong ahi. Saturday ni a natna jeh a athi atamna pen ahina gam ni -Maharashtra (295) le Delhi (81) ahi. Tamil Nadu a 65, Karnataka a 42, Uttar Pradesh a 24, Gujarat a 21 chule Bengal a 19 athi in ahi. South India a coronavirus case kal cheh cheh ahi in, Telangana le Karnataka gam India a natna akisei khohna gam No 6 le 7 a pang a chule Bengal 8 channa a pang ahi.

Karnataka a case athah 1,839 kihetdoh be a, Saturday nikho chan a agamsunga um case 21,000 val a, tua hi state tally hi 21,549 lhing ahi. Bengaluru a jong nikhat a case 1,000 val akimudoh na amasapen ahi in, nidan 24 sunga 1,172 kimudoh ahi. Gamsunga natna jeh a mi 42 thi ahi. Gamsung mun chom chom a um ICU a adamlou mi 226 um ahi in, Bengaluru a bou mi 124 um ahi.

Tamil Nadu a jong Covid 19 case athah 4,280 akihetdoh be in, natna nei agom a 44,956 lhing ahitai. Natna jeh a mi 65 thi be kit a, natna a thi agom a 1,450 lhing ahitai.  Ahin, Chennai a case 2,000 noilang a akhe in, case 1,842 ahi in, case alhahsuh na amasapen ahi. Hijongleh epidemiologist hon district dang dang a akal e, tia aseiyu ahi.

Gujarat gam a Saturday nilhah nidan 5 chan, achesa nidan 24 sunga case 712 akihetdoh be in, nikhat a dinga asan na pen ahitai. Agamsunga covid 19 positive case 35,398 lhing ahitai. Gujarat gam a natna a thi 21 aumbe in, natna jeh a thi agam a mi 1,927 um ahitai.

Rajasthan gam a natna nei kihet be nikhat a 480 alhing in, nikhat a natna kimu be atamna pen ahi. Hiche masanga case asang pen a kisei hi 395 ahi in, June 23 ni a ahi. Agamsung district 11 a case thah akihetdoh be jou ahi. Case asan na pen hi Alwar district ahi.

School kihon kitding thu aki seithei naipoi, Themjilna sang’a hinkho manlujo ahi: Th. Radheshyam

Imphal, July 5(ET): Education Minister Thokchom Radheshyam in aseina achun Manipur a school leh themjilna mun chom chom ho kihon kitding thu hi aki seithei naipon, hiche hi Centre akon guideline jong kila ding ahi in chule public akon ngaidan jong kila ding chule Manipur a hiche natna hi akiemsuh lang ahi loule themjilna mun ho kimoh honlou ding ahi in hinkho hi manlul jo ahi ati. Labour and employment minister jong hi Radheshyam in skill mapping website khat www.mssd.in ahondohna kin a asei ahi.

Aseibena achun simlai hon syllabus achai manlou khah ding u thu jong hi minu mipa, school authority holeh stakeholder chom chom hoto jong akiseikhom thou nan chule hiche lockdown hi ahung kichai a school ho ahung kihong theikit phatle simlai tamnei school hon ajui ding u dan jong kisodoh ding ahi in apoimo pen a social distancing bol hi kichepi jing ding ahi na ah simlai ho school kaiding dan jong kingaito a kisemdoh ding ahi ati. Private school ho a teaching leh non-teaching staff ho lhalo chungthu vang a school authority hon aki ngaito ding u ahi in hinlah amauho kikah a thulhuhna aumtheilou le state govt. jong kikum thei ahi ati. Chule Private school hon simlai ho chung leh minu mipa ho chung a pohgih aha bolpeh louding un asei in ahi. Radheshyam in aseibena achun Right to Education Act dan dungjui achun Class 8 chan hi promotion pehthei ahi in hiche chungthu ahin seiboina ding imacha aumpoi ati.

Delimitation thu a ‘all political party meeting’ bol dinga CPI in ngehna nei

Imphal, Jul 5(UNA): Manipur State Secretariat of the CPI(M) in Manipur a Delimitation Act 2002 noiya 2001 Census report dungjuiya delimitation chepi dinga India sorkar in kigotna anei thu aseikhom uvin ahi.

Manipur a Delimitation hi 2001 Census data dungjuiya bol louding ahi, ajeh chu data a hi Manipur a um sub division 9 a population growth in aval a kal ahi, tin party secretariat in thulhuhna anei uvin ahi. Sub division phabep a population growth hi 143% chan a sang/kal jong um ahi in, hiche hi ama chang phatchom ding gel a mi phabep natoh ahi.

India sorkar in Delimitation Act 2002 Section 10 A noiya athanei na amanchah a delimitation achepi jom a ahileh gamsunga ‘law and order’ khohse ding ahi, tihi Secretariat lunggel ahi, tin jong asei uvin ahi. Delimitation Act 2002 hi India gam a delimitation exercise bol nading ahi in, Manipur panna a 2001 census data dungjui ahi. CPI (M) Manipur State Secretariat in Delimitation Act 2002 hi semphatna neiya chule gamsung miho adeh a Manipur a political party ho ding gelna a 2001 Census dungjuiya bol lou dinga thumna anei ahi, tin CPI thuson aseiyin ahi.

Kum 12 val jouva India sorkar in achesa February nisim 28, 2020 ni a order kilahdoh na order asodoh a, Manipur gam a jong delimitation exercise bol pat dinga thuso anei ahi. Hiche thu hi thukhoh tah ahi, ajeh chu, Delimitation chungchang a Manipur a um political party jousen kipunkhomna aneiya chule Imphal khopi a All Parties Meeting nivei chelha ahitai, ati.

Chief Minister N Biren Singh in gamsung miho ding gel na a All Parties Meeting gangtah a akou dinga CPI(M) Manipur State Secretariat in temna anei ahi, tin aseibe uvin ahi.

IWDVDFWA in VDF personnel ho ‘Honorarium’ kalsah dinga thumna neiyu

Imphal July 5(ET): Imphal West District VDF Welfare Association (IWDVDFWA) in tukhang hin dan toh kitoh a honorarium kalsah dinga thumna anei state sorkar in abulhit peh dinga temna anei uvin, administration in thi nung a thumna eipeh got uham, tin thudoh jong anei uvin ahi.

VDF association in tu naicha Chief Minister henga memorandum apehlut nauva point thupi thum apansah u ahi, tin IWDVDFWA president Md. Riyaj Khan in soi akaina thuso a asei uvin ahi. Sorkar in aphat dungjuiya mopohna apeh jouse VDF personnel hon abol jing ahi in, ahivanga amaho thumna hi state sorkar in khohsahna apehlou ahi.

Boi pet dinmun a dangka 7500 a insung vet hahsa ahi, tin thuso chun aseiyin chule VDF personnel hon frontline worker, press le police personnel ho tobang kibanga duty abol ahi, ati. Ahivanga, facility kitup tah a kipelou, chule choltih neilouva asun ajan a pan alah u hetpehna kinei lou ahi. Hiche jeh a VDF personnel hohin duty abolna a covid 19 natna kilah khah uleh koiyin amopoh ding ham tih lungkham um ahi, ati.

Chief Minister in health worker le media mi Covid 19 natna jeh a vangsetna toh aumle ex-gratia peh dinga thuphon anei ahi in, hitobang hi amaho dinga jong agon diuvin aseibe uvin ahi. Community Quarantine centre a VDF personnel 70 per cent in duty abol a chule Jiribam a police personnel covid natna neiya 28 kisei holah a VDF personnel 8 pang ahi. Security ho lah a natna alhun hi lungkhamna um ahi, tin thuso a asei uvin, chule association in kivenna dinga angaicha hand glove, sanitizer le face mask ho Imphal West SP K Meghachandra Singh in ama sum a kon apohdoh a, munchom chom a um VDF Welfare association ho ahop peh jeh a achunga akipana thu aseibe uvin ahi.

Covid 19 jouteng NE Region hi India lamkaiya ‘economic power house’ hiding ahi: MoS Dr Jitendra Singh

Imphal, July 5: Union Minister of State (Independent Charge) Development of North Eastern Region (DoNER), MoS PMO, Personnel, Public Grievances, Pensions, Atomic Energy and Space, Dr Jitendra Singh in Covid khang akichai teng North-Eastern Region a hi natural le human skill resource lentah aumtoh kilhon a economic power a India amakai ding ahi, tin Sunday nikhon aseiyin ahi.

North Eastern Region a numei thahatna (Matrashakti) hin economic activity imalam jouse a alamkai ahi, tin aseiyin chule pandemic douna a numei hon lolhinna sangtah aneijeh a North Eastern Region hi Model of Corona Management a umdoh ahi, ati. Webinar a kon North Eastern Region Community Resource and Management Program (NERCORMP) toh kisai Self Help Groups chom chom hotoh akihouna a asei ahi.

Achesa kum 5 sunga PM Narendra Modi lamkaina sorkar noiya N-E Region hi Model of Development a um a, kum 6 channa a Model of Corona Management hi ahi, ajeh chu state 8 a hi tuchan geiya corona natna jeh a thi 17 bou um a chule case lhomcha bou um ahi, ati. PM Modi in Northeast hi khohsahna sangpen apeh jing ahi in, 2014 kum a Modi sorkar akisem a kon gamsunga gam khangtou hotoh akibah nadinga pan alah jing ahi, ati.

Achesa kum 6 sunga North Eastern Region a Psychological confidence jong kal ahi. Go (bamboo) hi Covid jouva economy hatdoh nadinga thupi ahi, tin aseiyin ahi. India a go phung 60% hi Northeast a um ahi in, PM Modi noiya hiche sector hin advantage lentah anei ahi. Self Help Groups (SHG) hon asem thil ho corona pandemic akichai teng New Delhi khopi a Exhibition bol peh dinga jong kitepna aneiyin ahi.

Road, Rail leh Air connectivity a machalna lentah um ahi, tin Dr Jitendra Singh in aseiyin ahi. Arunachal Pradesh le Meghalaya kiti gam hohin Railways amu lou ahi in, tua hi national capital toh kijot to na Railways um ahitai. Hitobang ma a Sikkim a jong Airport masapen kisem ahi. State dang dang injong aumsa thil ho nasatah a akhantou pi be ahi, tin Dr. Jitendra Singh in aseiyin ahi.

Arunachal Pardesh a Film and Television Institute athah pohdoh vah dinga aseiyin ahi. Northeast a Aspirational district 14 ho thu Dr Jitendra Singh in aseiyin, Aspirational District hi key indicator 49 a kisem ahi in, hiche lah a healthcare hi athupi pen a pang ahi. Aspirational District holah a ‘practice’ phapen/hoipen hi India gam dang dang a kivetsah (share) ding ahi, tin aseibe in ahi.

Nagaland Governor hi school chapang ahipoi, tia NPF in NDPP lamkaina Nagaland sorkar demna nei

Kohima, July 4: Nagaland Governor RN Ravi in gamsunga ‘law and order’ thu toh kisaiya thuso anei state sorkar in adonbut na chungchang a Naga People’s Front (NPF) in Nationalist Democratic Progressive Party (NDPP) lamkaina Nagaland sorkar demna anei uvin ahi.

“Nagaland Governor RN Ravi in achesa June nisim 16 nikho a Chief Minister Neiphiu Rio lekhathot apeh state sorkar in adonbut hi imadang ahipon, Governor chule alhangpi a Naga miho joulhep nadinga thutah chule figure adih louva achomkhom na ahi”, tin NPF Legislature Party in Saturday nikhon thuso anei uvin ahi.

Governor in amu dan ajihtho na a hi gamsunga achesa kum khat sunga ‘law and order’ dinmun aseidoh ahi in, hiche hi thutah hilouva seithei jeng ahipoi, ati. “RN Ravi hi gamsunga ‘law and order’ umdan hethem lou chule muthei louva school chapang ahipoi”, tin NPF thuso chun aseiyin ahi.

RN Ravi hi 1976 batch Indian Police Service (IPS) officer ahi in, chule Deputy National Security Advisor jong anahi ahi, tin opposition party hon asei uvin ahi. “Hitobang hetna sangtah neiya mikhat in mudoh anei ho state sorkar in thutah ahipoi, tia aseiya chule mipi lah a ajumso hi lunglhai umlou tah ahi. Hiche hi politics kichepna nemcha chule duha kibolna ahi”, tin aseibe uvin ahi.

Governor in aseidoh ho NPF in anop na thu asei uvin, “Nagaland gamsunga tua sorkar noiya imalam jouse a khantou machalna natoh hohi khesuh ahi in, hiche hi lamlen semna ding, healthcare, themjilna chule infrastructure building le adang dang a dinga government fund tamtah alam louva akiman jeh chule non-functional project ho joh a akichesah jeh ahi”, tin asei uvin ahi.

Gamsung economy dinmun ahoilou dan asei uvin chule state sorkar themmo achan nau thu jong asei uvin ahi. “Governor in tua pan alahna tobanga pan sangtah akilah louva ahile gamsung economy dinmun ahoilou dan hi kidoh vah theilou ding ahi. State economu hi boina dinmun a umjing ahi vanga, state financial position hi thunei vaihom hon bou ahet ajeh ipi kihe louva kisuthip a aguh a kikoi ahi”, tin NPF in aseiyin ahi.

Tua sorkar hin economy chule politics a molphouna anei ahi, tin jong asei uvin ahi. “Gamsunga boina tamtah umho hi Governor amatah in Chief Minister henga lekhathot apehna a aseidoh thu- ‘law and order’ ho khohsahna akipeh loujeh a soh jeng ahi. Healthcare le education jong anem na pen a um ahitan alangkhat a Covid 19 pandemic jeh a dinmun khohse cheh ahi”, tin NPF thuso chun aseibe in ahi.

SOP semdoh a School thah honkit ding a Simlai kiloikhom hon ngehna bol

Imphal, July 5(ET): Covid-19 natguol jeh a gamsung a lockdown akikoi toh lhon in school chule themjilna chom chomp hat sottah akikhah tan tuni chan in school thah honkit nading tohgon govt. akon imacha aumthei hihlai in ahi. Tuni a MIMS Manipur University a Disturbance Free Educational Zone Demand Day 2020 kingon a 13 vei channa chu “Covid-19 and Education: Diagnosis and Prognosis” thupi mangcha in amang kingon chu Retired IAS RK Nimai Moderator hina noiya MGHSLWA, CASA, AMSGO, AMCTA, AMESTA, AMSSTA, AMRPSW, ATSUM, AIMS le DESAM ho kithokhom a Co-ordinating committee kisemdoh hon abol u ahi. Hiche phatsung a Public discussion abol nauva chun lthulhuhna li anala uvin ahi. Standard Operating Procedures ho gondoh a chule stakeholder hotoh govt. aki hou uva akinthei pen a school hondoh kit ding in asei uvin ahi. Government in simlai hon Entrepreneurship and Skill development Courses ajil theina ding ujong gondoh pehding in aseikit uvin, Gamdang akon hung kinungle simlai hon asim ban u ajomtheina ding uva govt. in alampi a ngaito peh ding chule gampam akon hung kinungle hon state sung a na atohtheina ding lampi jong govt. in gonpeh ding in asei uvin ahi.

RK Nimai in aseina achun lockdown jeh a hitia school ho aki chute kha leh simlai ho jong lhasam thei ahi in Govt. in lung hoitah a ahin gel uva akintheipen a honkit ding ahin ngaito ding un asei in chule online class kibol jongle internet hoilou na a cheng simlai ho ding a phachomlou ahi in chule neijoulou genthei chaga ho ding a jong boina khat sohdoh ahi ati. Longjam Robin, Secretary Education and Academic Affairs, DESAM in aseina achun state government in pan ahinlah uva hiche natna doujing pum a school ho honkit ding ahin ngaito ding un asei in ahi.

Go hajuh jeh a Ukhrul district sunga phailei twi in chup

Imphal, July 5(ET): Thulhut khat in aseina achun go hajuh jeh in Vatthei vadung twi alen in Ukhrul district sung a um Hoomi khosung miho phailei bol twi in achup thu asei in ahi.

Insung 33 tobang in abol uh 21,500 square feet tobang a phailei kibol chu manthei asoh tapon twi in asuhset sung ahi bu tin 3000 tobang kimuthei ahi tin Hoomi village secretary Vangam Zingkhai chun asei in ahi. Aseibena achun bu kiphut chai ahitan tua hi hampa botdoh ding a kigot laitah ahi in hinlah twi in asusie joutan kithah patkit ding a jong gei ahitai ati.

Zingkhai in state government in khosung miho kihinso theina ding ngaito peh ding in asei in ahi. Hoomi kho hi Ukhrul HQ akon km 42 gamlha a cheng ahiuvin inn 200 tobang acheng uvin ahi.

MLA lui Subhachandra in BJP akon resign akibol thu’a Congress aminphah chu bul le bal neilou thuso ahi tia Ratankumar in sei

Imphal, July 5: State Congress vice-president Kh Ratankumar in Janni a Congress office a thuso miho heng a aseina achun Naoriya Pakhanglakpa assembly constituency akon BJP ticket a kaidoh MLA S Subhachandra in BJP akon primary membership ahina akon chule MLA ahina akon jong ahai thu a Congress hon eihatil jeh uva kahai ahi tia anasei khah jeh a newspaper ho leh social media a hung kithang ho chu bul le bal neilou ahi in Congress hon akitil khapoi tin asei in ahi.

Ratankumar in aseibena achun June 17 nichun Subhachandra haiding thu ana seikhah thu asei in chule Subhachandra High court heng a Manipur Legislative Assembly a secretary in June 18 nikho a resignation order ana sodoh jong chu nunglahdoh ding a asei ahi ati. Ipi hileh athu in High court lhung ahitan court in ahin ngaito ding ahi in hinlah Subhachandra in thuso miho heng ah amatah in BJP akon leh MLA ahina akon ahaithu ana phongdoh e ati. Sunday nikho a press conference kibol chu state Congress committee president M Okendro thupeh noiya Ratankumar in abol ahi in hiche chu Subhachandra in Congress ho ahin minphah najeh a suhchetna khat kibol ahi ati.

Manipur a Covid-19 case thah 41 kimudoh be; mi 22 kijendam be

Imphal, July 5(ET): Manipur a nidan 24 sung in covid-19 case thah 41 mudoh be ahi tin COVID-19 Common Control Room apat Health Department a Spokesperson Dr. Sasheekumar chun asei in ahi. Case thah kimube toh lhin in tuni chan a Manipur a Covid-19 case kimudoh jat 1366 aphatan hiche lah a active case 677 aum in ahi. Case thah kimudoh mi 41 ho chu pasal 32 chule numei 9 ahi in, Kangpokpi akon mi 18, Imphal West leh kamjong akon mi 6 cheh, Kakching akon mi 4, Tamenglong leh Ukhrul akon mi 2 cheh, Ccpur, Imphal East leh Noney akon mi 1 cheh ahiuve.

Alangkhat a tunin natna neiya kijen holah a mi 22 test negative ahitoh lhin in Covid care centre akon discharged ahi tauvin ahi. Ama ho chu Tamenglong Hr. Sc school akon mi 8, Covid Care Facility JNIMS akon mi 5, Ukhrul akon mi 2 ahiuve.

IPS Officers transfer and Posting

Imphal, July 5(ET): Arvind Kumar, IPS, ADGP (Armed Police) apat     ADGP )L & O); Lupheng Kailun, IPS, ADGP ( L & O) apat  ADGP (Armed Police); Clay Khongsai, IPS, IGP/Zone-I apat IGP/Zone-II; Lunsieh Kipgen, IPS, IGP/Zone-II apat IGP/Zone-IIl; K. Jayanta Singh, IPS, IGP/Zone-IIl apat IGP/Zone-I; K. Radhashyam Singh, IPS, IGP (Intelligence & Narcotics & Border Affairs) & Spccial Secretary (Home) apat IGP (Intelligence & Narcotics & Border Affairs); H. Thanghaulien Gangte, IPS, DGP (CID/Crime Branch) and Special Secretary to the Governor of Manipur in addition (On Promotion) apat IGP (Training) and Special Secretary to the Governor of Manipur in addition ahi.