‘Containment Zone’ ho a June 30 chan Lockdown umjom ding ...

‘Containment Zone’ ho a June 30 chan Lockdown umjom ding MHA in ‘Unlock 1’ guidelines sodoh; Containment zone pam a um Mall, Restaurant, Houin ho June 8 a kon kihong pan ding

67
0
SHARE

‘Containment Zone’ ho a June 30 chan Lockdown umjom ding

 MHA in ‘Unlock 1’ guidelines sodoh; Containment zone pam a um Mall, Restaurant, Houin ho June 8 a kon kihong pan ding

New Delhi, May 30: Ministry of Home Affairs (MHA) in Saturday nikhon ‘containment zone’ ho a lockdown June nisim 30 chan a dinga asuhsao be na thuso anei tauvin, chule hiche zone pam a umhon ajui diu ‘guidelines’ athah asodoh uvin ahi.

Containment zone pam ho kihon pat nading ‘Unlock 1’  a hi economy khohsahna kipe ding, June nisim 1 a kon kichepi pan a June 30 chan kichepi ding ahi. MHA in achesa March nisim 24 nikho a India pumpi a lockdown khoutah aphondoh ahi’in, angaichah khoh mong mong ho tilou adang se kikhah ahi.

Ministry in athah a guidelines asodoh hi State le UT hotoh kihouna anei jouva asodoh ahi. Containment Zone pam a um jouse a phase manner a ana kikhah ho kihong ding ahitan, Health Ministry in Standard Operating Procedures (SOPs) apeh kijui ding ahi.

Phase 1 a hi June nisim 8 a kon Pathen hou khom na mun ho, hotel, restaurant le hospitality service chule shopping mall ho akihon ding kiphal ding ahi. Health Ministry in akisei ho a SOP asodoh ding ahi’in, Central Ministry/department chule stakeholder hotoh COVID 19 venna dinga ‘social distancing’ jui pum a akibol thei nadinga akihoupi a SOP asodoh ding ahi.

Phase II a hi school, college, educational/training/coaching institution le adang dang ho state chule UT toh kihouna aum jouteng kihong ding ahi. State government/UT administration hon institutional level a nu le pa chule stakeholder hotoh kihouna anei diuvin jong thuhilna anei uvin, hiche dungjuiya July lha teng institution ho kihon kit ding thu a thulhuhna umding chule MoHFW in institution hon ajui diu SOP asem ding ahi.

India pumpi a akikhah hi lhomcha bou hiding ahitai. International air travel, metro rail, cinema hall, gymnasium, swimming pool, park, theatre, bar le auditorium, assembly hall le hitobang thil ho chule hou/sports/politics/social/entertainment/academic/cultural le adang dang thu a mipi tamtah kikhopna ho kikhah ding ahi. Phase III a hi dinmun dungjuiya akihon thei ding thu a thulhuhna umding ahi.

Lockdown hi ‘containment zone’ ho a khoutah a kichepi nalai ding ahi. Hiche mun hohi Health Ministry in guidelines asodoh ho State/UT sorkar in avet a akhen ding ahi. Containment zone sunga angaicha khoh tah bou kilha ding ahi. Chule kholjinna le thil kipohna ho adang a kilha ong ding ahi.

Inter-state le intra-state a mi chule thil kipoh kikhah louding, hiche a dinga achombeh a phalna lah ngailou ding ahi. Hijong le, state/UT in public health avet a dinmun velvetna aneiya, mi che le na thu a dan asem thei ahi.

Jan teng le curfew umjom ding, koima kin khoh louva ache le ding kiphal louding ahi. Hijong le curfew phat hi jan nidan 9 a kon jingkah nidan 5 sung hidinga aphat kikhel ahitai. India pumpi a ‘social distancing’ akijui tei nadinga COVID-19 management a dinga National Directive umjom ding ahi.

Containment Zone pam a akiphal ding hohi state le UT hon amaho gam dinmun dungjuiya akisem diu ahi’in, ngaicha asah nauva containment zone pam a jong thil phabep akha theiyu ahi. Kum 65 chunglang ho, natna chom chom nei ho, naovop numei chule chapang kum 10 noilang ho dammo thu ahiloule angaicha khoh tilouva in a aum tup diuvin thuhilna anei jom uvin ahi.

Chule India sorkar in Covid 19 natna nei ho kikholdoh theina dinga asem Aarogya Setu mobile application hi kivenna dinga mipin aman cheh dinga thuhilna aneibe uvin ahi.

Manipur a Covid-19 Active case 55 phata

Imphal, May 30(ET): Gujarat, Mumbai le Chennai a kon gamsung hung kile a mithum Saturday nikhon COVID 19 positive ahi hetdoh be ahikit in, amaho hi Imphal West, Churachandpur le Chandel district mi hiu ahi.

Hiche toh kilhon a gamsunga COVID 19 case agom a 62 lhing ahitai. Chule Churachandpur district a Covid 19 case agom a 21 lhing ahitan, Manipur gam a dinga natna atamna pen district ahitan, aban a Imphal West le Thoubal district um a, case 11 cheh um ahi. Gamsunga Covid 19 active case 55 a kal ahitai. Tu masanga natna nei mi 7 kijen dam a, hospital a kon kiledoh u ahitai.

Official hon asei dungjuiya, Mumbai le Chennai a kon train a hung kile kum 34 a upa pasal khat le kum 44 a upa numei khat case kihedoh hi athah pen ahi. Amani sample hi VRDL, JNIMS Hospital a test abol uva, positive ahi akihetdoh jouva COVID 19 Care facility, JNIMS a admit abol u ahitai.

Hiche masanga Imphal West district noiya um Kanglatongbi a kon kum 19 a upa numei khat positive ahi kihedoh ahi. Numeinu hi Gujarat a kon hung kile ahi’in, tua hi RIMS Hospital a admit abol u ahitai. Ama sample hi VRDL, RIMS a test kibol ahi, tin Additional Director Dr K Sasheekumar Mangang in aseiyin chule adinmun alel poi, tin aseibe in ahi.

Kivenna dinga ‘contact tracing’ le ‘containment’ process ho apat soh u ahitai. Saturday nikho nilhah nidan 6:00 channa sample test kiboldoh agom a 580 lah a RIMS a 400 negative ahi. Chule JNIMS a 180 a test akibol na a case 2 kihedoh ahi. Tuchan geiya gamsunga sample 8,791 test kibol ahitan chule tule tua mi 11,442 Community Quarantine centre a um a chule 4,769 hi Government Quarantine centre a um ahi. Saturday nikho a mi 438 Government Quarantine centre a akoibe uva chule mi 1,333 hi Community Quarantine centre a akoibe u ahi.

District dungjuiya sei dinga COVID 19 positive case hi Churachandpur district a 21, Thoubal a 11, Imphal West a 11, Imphal East a 4, Kamjong 3, Tengnoupal 4, Kakching 1, Bishnupur 2, Kangpokpi 1, Senapati 1, Jiribam 1, Noney 1 chule Chandel a 1 um ahi. Hiche lah a Imphal West, Thoubal le Imphal East mi khat cheh damdoh a chule Tengnoupal district mi 2 damdoh ahitai. Chule Pherzawl, Ukhrul le Tamenglong district a COVID 19 positive umlou lai ahi.

State in UNACCO School a lupna 100 umna COVID-19 Care center semdoh ding

Imphal, May 30(ET): Manipur Governor Najma Heptulla in Saturday nikhon UNACCO School, Meitram, Imphal West a coronavirus natna neiya ahivanga anatna khohse lou ho kijen nading lupna 100 koi dinga phatsahna anei tauvin ahi.

State health official ho, health mission chule UNACCO School authority hon Chief Minister N Biren Singh lamkaina a Thursday nikho a gamsunga case atam cheh cheh jeh a centre hondoh dinga kilolna anei utoh kilhon a thulhuhna aneiyu ahi.

Manipur a tua hi coronavirus positive case agom a 60 um ahi’in, hiche lah a active case 53 um a chule mi 7 hospital a kon dam a kile ahitai. Gamsunga Covid 19 case akal cheh cheh jeh a hitobang center semdoh ngai ahi, tin Governor Heptulla in thuso aneina a aseiyin ahi. Hiche hi Covid 19 pandemic akiseiya kon gamsunga private property a center akisemdoh na amasapen ahi.

Thuso dungjuiya, state health department in centre a alut ding angaicha ho apohdoh ding ahi. Covid 19 Care centre a building akiman nadinga angaicha thil chule personnel hohi mopohna nei department hon agon diu ahi.

May 29 chan a Imphal Airport panna a gamsunga hunglut mi 2,24,073 screened kibol ahitan, chule sample 8,249 test kibol la, hiche lah a 62 hi positive hi ahi. May lha kipat a state sorkar in gamdang a tangden gamsung miho puidoh dinga natoh apat a kon gamsung a mi 14,000 val hung lhung ahi. Thulhut dungjuiya mi 4,483 hi institutional quarantine centre a um a chule ahung kile mi 10,370 vel hi ama ama district a Community quarantine centre a um ahi.

India a Covid-19 natna nei damdoh atamna pen hi; Recovery rate 47.40% a kal

New Delhi, May 30: Union Health Ministry thuso in aseina achun tuni pungkah 24 sung in Covid-19 natna akon mi 11,264 adamdoh uvin hiche hi nikhat sung a damdoh tampen a melchih thei ahi tin asei in a percent a vet in tuni a damdoh chu 4.51% alhing in tuhin adamdoh percent chu 47.40% aphatan ahi.

India a ding in hiche natna veikha mi 1,74,355 aphatan, adamdoh mi 82,804 apha in chule active case 86,558 aphatan ahi.

Tu dinmun in India gamsung a covid-19 natna akon damdoh mi 82,369 aphatan ahi. Ministry thuso in aseibena achun tuni a phabep pi in damna akimu utoh lhon in active case jong 89,987 akon 86,422 in aniemsuh in ahi. Thina toh ho jong a percent a vet in 2.86% bou ahi gamdang ho sang in India gamsung a veijat toh vetkah in athijat hi alhompen ahinalai in ahi. Gamsung a test bolna Government laboratory 462 aum in chule private a 200 tobang aum in ahi. India gamsung ading in mi 36,12,242 tobang test akibol tan chule janhi chun mi 1,26,842 hon test akibol in ahi.

Tuni chun central govt. in containment zone a lockdown June 30 chan ading in asusao be kit in chule hiche zone in ahoplou se se in angai bang a natoh chu aphatnei (phase manner) a atohthei ding in asei in ahi. Ministry of home affairs in guideline thah asodoh jong June 1 nikho apat manpat hiding ahi. Nagaland state sung ajong Covid-19 natvei mi 36 alhingtan, Mizoram gamsung ajong tuhin active case 1 aum in, Arunachal Pradesh gamsung ajong tuhin active case mi 2 aum in ahi.

 

Treasury office thilsoh thu’a kholchil na nei ding Committee khat Ccpur DC in semdoh

B.Lalboi Gangte

CCpur. May 30 (ET): Churachandpur  District sung’a Govt. daan toh kitoh louva nehguh bol janni (May 29) nikho’a SP Office Campus, Tuibong a um Treasury office ah sum peh ding thu’a kinah na Video khat Social Media dung’a nasatah ana kithethang nachung’a CCpur. DC in hiche chung thu kholchilna nei ding in Committee khat anasemdoh tan ahi. Hetthei khat chu hiche video ahin numei khat in Treasury office staff khat Dk. 2000 anapeh nomlou jeh’a anakinil sang nao akimudoh in chuleh hiche Video achun thu kisei ho kichen tah in akilang naban’a English pao in subtitle jong ana kikoi in ahi.

Hiche thilsoh chung thu’a Deputy Commissioner Churachandpur Pawan Yadav IAS in nehguh thu agelkhoh toh lhon in  May nisim 29 nilhah in hiche boina thu kholchil ding in Three-member committee anasemdoh tan ahi. Hiche Committee in Treasury Office Churachandpur a staff  hon family pension pehdoh na ding’a sum athum’u chung chang thu akholchil ding chuleh athil mudoh ho ahung lhung ding June nisim 6 kah’a ama khut’a ahin pelut ding uvin thupeh jong anei in ahi. Hiche Committee hi Khaikhopau Ngaihte, Assistant Commissioner Churachandpur lamkai nanoi’a Hasby Haokip, Additional SP leh Prince Konsham, Treasury Officer Churachandpur hi ding ahi.