Containment zone ho a June 30 chan curfew gahtah a kichepi ding;...

Containment zone ho a June 30 chan curfew gahtah a kichepi ding; Houin, School leh Imphal khopi sung’a Kailhang thum ho jong kikhah nalai ding

58
0
SHARE

Containment zone ho a June 30 chan curfew gahtah a kichepi ding; Houin, School leh Imphal khopi sung’a Kailhang thum ho jong kikhah nalai ding

Imphal, June 1(ET): Union Home Secretary in Chairperson, National Executive Committee, National Disaster Management Authority in June nisim 30 nikho a Lockdown phat suhsaobe ding chule ‘containment area’ pam a phased manner a akikhah ho hon dinga asei ahi.

State sorkar in Phased Re-opening (Unlock-I) guidelines velvetna aneiya, pha asah dungjuiya containment zone pam a dan akoi dinga mopohna Centre in apeh toh kilhon a state sorkar injong gamdang a kon hung kile gamsung miho lah a natna akal cheh cheh dinmun avet a Annexure-I a kipe banga dan (restriction) koi jom ding ngai asah ahi, tin Dr. J. Suresh Babu, Chief Secretary in thuso aneiyin ahi.

June nisim 1 nikho a kon June nisim 30 chan Manipur gam a chepi ding sorkar in guidelines thah asodoh uvin ahi. Hiche dungjuiya, containment zone jouse a lockdown le curfew gahtah a June 30 chan umjom ding ahi. Imphal khopi le district headquarter dang dang ho a sun nidan 2 a kon jingkah nidan 5 chan June nisim 15 chan curfew umding, aphat dungjuiya velvetlna umding ahi. Mun dang jouse a hi June 30 chan nilhah nidan 5 a kon jingkah nidan 5 chan curfew umding ahi. Manipur High Court in judiciary toh kisai ho a lockdown order le guideline ve pum a natoh akigon diu ahi.

June nisim 1 a kon nisim 30 chan Manipur gam pumpi a akikhah ding hohi Home department in phalna apeh tilou interstate bus service le Inter district public transport jouse, auto rickshaw, winger le public transport dang dang ho, school, college, educational/training/coaching institution, hotel, restaurant le hospitality service ho ahi. Cinema hall, shopping mall, gym, pool, park, theatre, auditorium, assembly hall, chule social/sports/entertainment/academic/cultural/religious program le mipi tamtah kikhopna ding kin hojong kikhah jom ding ahi. Houin, saloon, spa hojong kikhah ding chule Ima Keithel thum hole Ngari Gali a Retail shop (dukan) hojong kikhah nalai ding ahi.

Chule June 1 a kon 30 sunga gamsunga akiphal ding hohi- dammo vetseitna chungchang, essential service toh kisai ho, hospital, nursing home, clinic le dispensary ho, pharmacy, chemist chule Jan Aushadhi Kendra le Medical equipment shop panna a lou kijohna dukan jouse, medical laboratory, collection centre, veterinary hospital, dispensary, vaccine sale le supply kibolna ho ahi.

Social sector a chaga in, chatmo bukimlou in, meithai, tehse le numei ho kivetkol na inmun ho, Observation home, Juvenile Home, Old Age pension/widow pension/freedom fighter pension kihopna ho chule Anganwadi centre jong kihong ding ahi. Centre in neh le chah hi ni 15 sunga khatvei beneficiary ho inmun chan athah diu ahi.

Thil kipohna gari hon Mao, Jiribam le Jessami agalkai diu kiphal diu, chule gamdang a kon hunglut driver le helper jousen Home Department in asodoh dan ajui teidiu ahi. Truck kisemna workshop le cha johna dukan highway a ho kihong ding hijong le social distancing ajui diu ahi. Chule railways operation a dinga natong le staff ho che le theiding ahi.

Online teaching kiphal ding, print le electronic media kikhah louding ahi. Courier service- private security service, food processing unit, MSME toh kisai ho, mineral water kisem le kihop, restaurant le outlet hon neh le chah hom delivery abolna service hojong kihong ding ahi. RBI le RBI toh kisai market (financial), bank branch le ATM chule Business Correspondent, LIC le branch ho, telecommunication le internet service, micro financing institution, fish feed plant, Home delivery a LPG gas hopding, postal service le petrol pump hojong kiphal ding ahi.

Imphal khopi le District Headquarter ho tilouva mun dang dang a June nisim 30 chan jingkah nidan 6 a kon nilhah nidan 4 chan gei ‘dukan, home delivery (angaicha khoh ho), loubol toh kisai natoh ho, phailei a natoh,  MNREGA, construction activity (lamlen, railway project, rural water supply scheme), brickfield ho kiphal ding ahi.

Animal husbandry a bong processed kibol le kijoh, gancha kivahna mun, gancha neh ding kisemna mun ho kihong ding ahi. State le Centre government office jouse kihong ding, ana kichepi ngai dan kijui jom ding, visitor kiphal louding ahi.

Imphal khopi le district headquarter dang dang ho a June nisim 15 chan jingkah nidan 6 a kon nilhah nidan 2 chan akiphal holah a hi- home delivery (angaicha khoh ho), Dharmasala, Thangal bazar le Paona Bazar tilouva vengsung a um dukan ho kihong ding, social distancing jui ding hi dukan bol ho mopohna hiding ahi.

Wholesale market, Imphal ahi’in, bongnoi thil ho, petrol pump, chule Centre le state government office jouse kihong ding ahi. Mipi lah a mask bol tei ding, chule social distancing jui dinga Ministry of Health and Family Welfare in thuso anei ahi. Mun khat a mi 5 le achunglang akikhop ding kiphal lou chule golvah na a mi 50 kalval kiphal louding, thi opna kin a mi 20 kalval kikhom louding ahi.

Public place a chilset ho State/UT sei banga gotna kipe ding, public place a ju, gutka, khaini ho neh ding kikhah ahi. Dukan bol hon feet 6 beh a mi toh akigam lhah nading uva pan alah diu chule dukan mun a phat khat a mi 5 val umthei louding ahi.

Natohna mun ho a mask bol tei ding, chule alut le apotna a hand wash le sanitizer chule thermal screening koi ding, natohna mun abon a sanitization bol jing dinga kisei ahi. Aarogya Setu app natong jousen (public le private) install akibol diuva da nana kisei masa hojong kichepi jom ding ahi.

 

Manipur a Covid-19 case 83 phata

Imphal, June 1(ET): Covid-19 case athah 12 akimu be toh lhon in Manipur a  natna veikha mi 83 alhing tan tuhin active case 72 aum in mi 11 adamdoh tan thina toh vang aum naipon ahi.

Case kimuthah ho chu gampam akon hunglut ho ahiuvin case 3 chu JNIMS hospital akon report dungjui a kihe ahi in amaho thum hi Delhi akon hung kinungle ahiuvin chule case 2 chu RIMS hospital akon report dungjui a kihe ahi in mikhat chu Delhi akon hung kinungle ahi in khat chu Chennai akon hung kinungle ahi.

Dr K Sasheekumar Mangang in aseina achun Sunday jan chun Jawaharlal Nehru Institute of Medical Sciences (JNIMS) a Virus Research and Diagnostic Laboratories (VRDL) a test akibol dungjui chun case 4 akimudoh in chule Regional Institute of Medical Sciences (RIMS) akon case 3 akimu e ati. Official thulhut dungjui chun case 7 veiho chu JNIMS le RIMS a Covid-19 care facility mun a observation ding a kikoi ding ahi ati. Senapati district sung a case 2 kimudoh be toh lhon in District Magistrate I Lalithambigai K in Don Bosco Hr. Sec. School, Maram chu sealed bolding in aphongdoh tan ahi. Containment zone kom a koima chele vahle kiphal lou, gari khatcha jong lhaisah louding chule duty khautah a kipo jing ding in thupeh abol tan ahi.

 

Covid-19 jeh’a thuso a natong ho thina toh aumle Dk. lakh 5-10 ex-gratia peh dinga Chief Minister in thuphon nei

Imphal, June 1(ET): Chief Minister N Biren Singh in Monday nikhon Covid 19 douna a duty abolna a hiche natna a thi media natong aumle dangka lakh 5-10 ex-gratia peh dinga thuphon aneiyin ahi.

Editors’ Guild Manipur (EGM) le All Manipur Working Journalist Union (AMWJU) in Covid 19 pandemi jeh a media hon boina ato thu seina dinga CM kihoupi dinga kouna anei jou uva CM Biren in thuphon anei ahi. Natna chungchang thu kholna a Covid 19 natna kilah son thei dinmun a um media a natong ho thu team hon asei uva chule media house chejom sah nading thu jong aseiyu ahi.

EGM le AMWJU in CM henga state dang dang a journalist ho dinga phatchomna (package) kiphong doh ho thu asei uva chule pandemic jeh a India gam a media house tamtah akikhah ahiloule anatong akisuhlhom thu jong asei uvin ahi. “Manipur a thuso hi phengmai akisuh lhom vanga kiche sah jom ahi’in, pandemic thu a media in pan sangtah alah angai akihetthem jeh ahi”, tin team hon Chief Minister henga asei uvin ahi.

Chief Minister Biren Singh in joint team ho thusei angai lhah jouva media person koi tobang Covid 19 natna jeh a thi aumle ex-gratia peh dinga kitepna aneiyin ahi. Chule police le frontline worker adang dang ho dinga hitobang scheme jong Cabinet meeting a athu akipohdoh jouteng kisem ding ahi, ati. Meeting a pang Chief Secretary Suresh Babu in media (thuso) ho sum dinmun a ahahsat na olsah nadinga government department chom chom in ‘advertisement bill’ apeh loulai ho asuhtheng dinga thuhilna aneibe in ahi.

Meeting a EGM le AMWJU member hon Covid 19 pandemic douna a media hon pan alah nau Chief Minister in hetpehna anei jeh a kipathu jong asei uvin ahi.

Haipi Quarantine Centre a naosen peng khat Medical officer hon ‘Emmanuel Quarantino’ tia minsah u

Kangpokpi, Jun 1(UNA): Institutional Quarantine Centre, Emmanuel School, Haipi a um gamdang a kon hung kile Kangpokpi mi hi a nu pa ni in centre a chapa melhoi tah khat anei lhonin ahi. Hiche masang jep a hi Anjali Hmangte in Kangpokpi DHQ a lunglen tah a apa thilong lhahna anei ahi.

Naosen pasal hi Dr. Thangboi le Dr. Pilhing in Dr. Nilakanta Singh, CMO Kangpokpi le Dr. Paotinlal Haokip, in-charge Medical Superintendent, District Hospital, Kangpokpi puihouina a asosah ahi. Medical Officer tenin Christian ho dinga Pentecost nikho a Emmanuel School a naosen asosah uva chule naosen hi ‘Emmanuel Quarantino’ tia aminsah u ahi.

Dr. Paotinlal Haokip, in-charge, Medical Superintendent, District Hospital, Kangpokpi in asei dungjuiya, naosen pasal apa hi achesa May 27 ni a Goa a kon Jiribam lampi langa train a Kangpokpi DHQ hung lhung a, chule Institutional Quarantine Centre, Emmanuel School, Haipi a room khat a vetkolna aneiyu ahi.

Kum 27 a upa naosen anu hi COVID 19 test bol dinga May 30 ni a sample kila a JNIMS, Imphal laboratory a kithot ahi’in, result kingah nalai ahi, ati. Jingkah nidan 7 don a, oi nat aseiya chule atwi hoh neo neo a long ahi. Hiche jouva Dr. Thangboi le Dr, Pilhing lamkaina medical team hon apet pet a pan alah uva, PPE lhingset akivon uva, avetkol u ahi.

Naosen hi agih dan 3.2kg ahi’in, jingkah nidan 9.45 don a boina ima umlouva lolhing sah a soh ahi, tin aseiyin chule naosen pasal hi adam in, anu injong tahsa boina ahiloule PPH ima aneipoi, tin aseibe in ahi. Dr Paotinlal Haokip in asei dungjuiya, district sunga um Damdei Christian College, BIET Centre le Institutional Quarantine Centre adang dang a jong surveillance noiya um naovop numei phabep aum e, tin aseiyin chule amaho hi aphat tin a vetlhahna um a, medical team hon khohsahna apeh jing ahi, tin aseibe in ahi.

 

High Court in June 10 teng court a ding dinga MPS officer Brinda kouna pe

Imphal, Jun 1(UNA): Manipur High Court in June 10 jingkah nidan 10.30 teng Additional SP NAB (Narcotics and Affairs of Border), Thounaojam Brinda, MPS, SP court anga adin dinga kouna ape uvin, achesa May 21 ni a Lhukhosei Zou chungchang a hearing a court thulhuh demna a ngohna thu asei jeh ahi.

Justice Lanusungkum Jamir le Justice Kh Nobin lamkaina division bench in Additional SP, NAB, Th Brinda douna a kisem ‘criminal contempt case’ thu angailhah a, June 10, jingkah nidan 10.30 teng officer nu court anga adin dinga kouna apeh ahi. Special Judge, ND & PS in May nisim 26 nikho a SP nu douna a ‘criminal contempt case’ asem ahi’in, Lhukhosei Zou chungchang thu a May 21 ni a hearing aumna a Court jana ape poi, tia ngohna anei ahi.

Hetthei khat chu Special Judge ND&PS, A Noutuneshwari Devi in PR bond dangka 20,00,000 le surety ni (ajat ma) a Lhukhosei Zou hi Cholecystectomy (gallbladder surgery) akibol nadinga kal thum (June 12 chan) bail apeh ahi’in chule Court henga phalna la masa louva gamsung adalhah thei lou dinga thupeh anei ahi.

Court room a witness thudoh (cross-examine) bol dinga Thounaojam Brinda in ngehna aneiya, asan peh lou phat uva witness khat agih a chule court in medical ground a bail peh dinga thutanna anei jouva Brinda in Judge Devi hi akhutlai atun khum a avetsah ahi. Hiche thu hi May 21 ni a Special Judge in thutanna aneina a ahi, tin ngohna asem nauva asei uvin ahi.

Hiche jouva officer nu in ama Facebook page a Court thutan ademna thu sangtah asei ahi. Division bench in Social media hi order (thutanna) adihna sei nading ahipoi, tin aseiyin chule koi tobang court thutanna chunga alunglhai lou aumle appellate forum a athu aseithei ahi. Subordinate Judge chunga lunglhai lou aum jongle High Court a hehna asem thei ahi, ati. Hiche ho jouse chunga Brinda hi state government a police officer khat hi ahi, ati.

Officer nu chonchan chule Court sunga akikumna le post chom chom a thil atahdoh hohi kija louna le dei umloutah ahijeh a Criminal Proceeding achunga kisem ahi, tin court in aseiyin ahi. Social media a Th Brinda tosotna thu tahdoh ho chungchang thu jong SP, Cyber Crime, Manipur in aholkhom a chule kal khat sunga Court a apehlut diuvin thuhilna aneibe uvin ahi.’Criminal Contempt’ a seithei thu koiman asodoh louding ahi, tia Section 2, Contempt of Courts Act, 1971 a kisei ahi’in, koi tobang abol aumle achunga Criminal proceeding chelha ding ahi. Court hin angaiya amasapen a hehna kisemkhum ho akou lou ahi’in, ahivanga athu asan jeh a kouna kipe ahi, tin aseibe uvin ahi.