Constable Candidate ho kiphinna’a politics lut (Aug 26, 2016)

Constable Candidate ho kiphinna’a politics lut (Aug 26, 2016)

196
0
SHARE

Thil geltuoh louva kimoh bolbol chu lhoh satna ahidi hetsa ahi 2013 police constable Recruitment a muthei ahi. Test boldi jouse tobang kichai nung’a akikahlhatan, abul’a pat Test jouse velbolkit dia kisei chu Candidate holeh ainsungmite dia anopje umloudi mong ahi. Ahin hiche thua Candidate hon Singjamei (Imphal) a Meeting abol uva govt nin Test jouse velbol kitdi ti order anunglahdoh kah-a phat teplou bandh boldi atiu chu ni khat khucheng’a Manipur muntin bandh aboljou uvin ‘phaat teplou bandh’ chu aladohpaiyun Economic Blockade vang boljom din ahinsei kit uve. Mipi di gelna jong hinantin hinlah phaigam’a Constable recruitment thua kiphinna akhohsetleh phaigam miho dia akhohjo ILP thu ima hilouva aumdoh lodi jeh jong hidi ahi. Economic Blockade leh 26 August a apat govt office ho buludi (kha di) ti jong kiphinna chejomna din asei uve. Court Case boldi atiu jong hi aboltah tahbah uleh lha ijat, kum ijat hung lut diham, hiche kah-a govt jong hung kikhel khaleh ipi atidem ti jong um ahi. Senapati district a kon Candidate hon 26 August apat ni 2 bandh boldi atiu jong hi mun dang’a hoto kihoutohna umlou, amaho chamtah-a abolgot u ahikitne. Candidate ho kiloikhomna hi phatah-a lamkai kilhenna leh kivaihomna kisuhsel ahilou jeh in alamkai jangpu dom ho chu guhthim’in amuh kisip pieh jongleu Candidate tamjo hon ahetphahlou diu ahi. Candidate sangsom lang’in 2013 DPC Final Result bou anga vang uva mi sang ni bou kiladi ahijeh a jong Viva Test gei kachaitai tia kimoh neplou jong tamdi ahijeh-a Candidate holah a kithutona lhasam jong himaithei ahi. Test jouse avel’a bolkit di ahileh akipatna – Physical Test a kitanglha di jong hiche Viva gei chaisa holah-a tamdi ahi. Hiche Test jouse abul’a patkitdi kitina’a Viva gei anachai ho koima ajao umthei loudi ti jong kilolna ahi hi velbol kit di mong mong ahileh ajaolou-lou chu avangse’a hung pang thei ahi. Manipur’a dia Recruitment Exam kivelbolkit kiti hi Manipur Public Service Commission (MPSC) nuoiya bon aumjileh Constable Recruitment a hi datmo theijong ahibehpoi. MPSC nuoiya MCS Exam jeng jong Prelim kivelbol, Viva gei kichai nung’a ana kikahlha’a ana kivelbolna um khasa ahi.

Tua hiche 2013 Constable Recruitment thua hi politics hunglut ahitan political party jatjat hon Ruling party suhminsetna dia van’a kon ‘maana’ ahinbahsah u ahitai. MPP, BJP leh NPF in nasatah in govt (Congress) bolchahna’n ahinmango taove. MPP in hiche thua PIL Case bolding ati keu hilouvin hiche recruitment hi dangka Crore tamtah kinehna (scandal) ahijeh in CBI in khuolna aneiya mona nei ho gotna apiehdin jong aseiye. BJP MLA Th. Joy Kishan in hiche police candidate ho kiphinna’a hi “keima tah ka lamkaidi ahi” ati-e. Tua kiphinna khutcheng jeh in govt injong ‘order’ abolsa khat hin lekah kit taleh govt dia kijumsona hikitdi ahi. Ipi hileh Recruitment kiti phot thiengsel’a akibolto kah a kiboina kiti umjingdi ahi.