Congress in Drug case thu a BJP sorkar douna a ‘No Confidence...

Congress in Drug case thu a BJP sorkar douna a ‘No Confidence Motion’ notice pe

45
0
SHARE

Congress in Drug case thu a BJP sorkar douna a ‘No Confidence Motion’ notice pe

IMPHAL, Jul. 28(UNA): Chief Minister lamkaina state sorkar in Lhukhosei Zou case Central Bureau of Investigation khut a apeh doh lou thu a Congress party hon No Confidence Motion file abol uvin ahi.

Congress MLA Keisham Meghachandra leh Thokchom Lokeshwor in Tuesday nilhah nidan 3 don a Speaker, Manipur Legislative Assembly henga No Confidence Motion notice apelut lhonin ahi. Notice apehlut jouva Assembly a kon hungdoh a MLA Keisham Meghachandra in thuso miho akimupi na a, Lhukhosei Zou case thu CBI khut a akipeh doh loujeh a party in CM N Biren lamkaina Council of Ministers ho douna a No Confidence Motion apehlut ahi, tin aseiyin ahi.

Achesa kum 2 sung party in hiche case CBI hon akhol ding uva thumna anei ahi. BJP a milen milal chule Chief Minister in police officer phabep toh kithuto na anei uva court proceeding leh thukholna a kikumna aneiyu ahi. BJP sorkar a milen milal hohin drug case thu tahlang a thusoh miho chunga FIR sem dinga gihna anei ahi in, sorkar in case CBI khut a pelut louva case atosot jom jeh uva Congress in No Confidence Motion apehlut ahi, tin aseibe in ahi.

Milen milal lamkai ho police hotoh hitobang drug case a akikhut jop uva ahileh gamsung miho leh khangthah ho sohcha louding ahi. Sorkar in media chule kitah tah a natong officer ho agih ahi in, avel a hiche case hi CBI khut a kipedoh ding ahi tia kitepna aneikit vang uva abol doh louvu ahi. Hiche jeh a tua sorkar in thudih a na atoh ding ginchatna kanei louvu ahi, tin Meghachandra in aseibe in ahi.

MLA Th Lokeshwor in janni jan a MPS officer Thounaojam Brinda police hon nidan ni val ahen nau thilsoh demna sangtah anei uvin, thudih louva na kitong douna a kitahna neitah a natong officer khat kigihna ahi, tin aseiyin ahi. Sorkar in Th Brinda in ajih affidavit published bol a media ho chan a agih ahi. Gamsung mi, CSO, media in pan alahkhom a, sorkar gitlou na adou phat ahi in, hangsan tah a pan la a officer nu tilkhou phat ahi, tin Lokeshwor in aseibe in ahi.

Imp-Moreh bandh bolding kivohai

Chandel, July 28(ET): Ahunglhungding August nisim 1 akon a Imphal-Moreh lampi bandh bol ding a phondoh na ana kinei chu K. Prakash Maring, president Chandel district Animal Farmers wellfare Union in phat tep lou a voh hai ahi tah dan hetsah na ahin nei in ahi.

Hetthei khat chu kiloikhomna in Moreh lampi a phat teplou a bandh kou ding a phondoh na ana nei u ahi. Hiche bandh kivoh haina chu covid-19 toh kisai a gamsung boitoh kisai a kiladoh ahi tin lamkai pa chun hetsah na ana nei in ahi. Union in Manipur chief minister ang a memorandum pehlut na Deputy commissioner Tengnoupal District ang a ana nei u ahin lethu na ima an amu lou utoh lhon a hiche bandh chu an akou u ahi.  Ahunglhungding August nisim 10 akon a assembly kibol na ding a  Manipur sung a Mithun Conservation & Department Board  khat sem na ding a kilolna ahin nei ding u deisah na anei dan jong lamkai pa in tahlang na ana nei in ahi.

Imphal khopi a lupna 300 umna COVID-19 Care Center nithum sunga man thei hidinga sorkar in kigotna nei

Imphal, July 28(ET): Manipur gam a Covid 19 case akal cheh cheh toh kilhon a state sorkar in natna douna dinga bol thei chan abol in, coronavirus natna nei ho kijen nading lupna jong asem be uvin ahi.

Tuesday nikho a Health Minister L Jayantakumar Singh leh Health Director Dr K Rajo in Covid -19 Care Center, Manipur Trade and Expo Center Lamboi Khongnangkhong, Imphal East district a lupna 300 sem dinga tohgon aneiyu vetlhahna anei lhonin ahi. “Nithum sunga center kijou ding ahi tia kasei thei hi kakipana ahi”, tin Minister pa in aseiyin ahi.

Thulhut dungjuiya, hiche hi gamsunga Covid 19 Care Center athah kisem ding li ho lah a khat ahi in, tu leh tua hi center adang 13 um ahi. Center adang thum hohi State TB Hospital, Keirao Wangkhem, Imphal East, Model School, Harinaganar, Jiribam leh Kangpokpi district ahi.

Achesa May lha a kon, gamdang a um gamsung mi tamtah hung kile a chule natna nei kihedoh atamjo hi gamdang a kon hung kile ho hiu ahi. Achesa kal phabep sunga active case sanga natna a kon kijen dam atam vanga, metro city a kon inn hung kile ding tamtah um nalai ahi. Tu leh tua Covid 19 Care Center, UNACCO School, Meitram a lupna 350 um a, RD Wing Lamphelpat a lupna 100, JNIMS Training School, Thoubal a lupna 100, District Hospital Bishnupur a lupna 32, Padma Ratna English School, Kakching a lupna 50 chule sub district hospital, Moreh a lupna 20 um ahi.

Hill district a dinga Tamenglong Higher Secondary School, TK Woodland Resort, Ukhrul chule DEIC Senapati a lupna 100 cheh um a, JNV School, Chandel a lupna 55, NIELIT Churachandpur a lupna 50, Tribal Boys Hostel, Noney a lupna 20 chule Kamjong a lupna 15 um ahi. State official hon Thoubal district a athah a Covid 19 Care Center kisa vetlhahna jong anei uvin ahi.

COVID 19 Care Center athah ho akimanchah a ahileh Manipur gam a coronavirus natna nei ho kijen na ding lupna 1,400 vel umding ahitai. Monday ni a natna nei athah kihetbe mi 51 holah a Thoubal a kon mi 18 panna a agom a mi 24 hi gamdang a kholjin khalou hiu ahi in, natna nei agom a 2,286 lhing ahitai. Hiche lah a active case 727 um a chule akijen dam 1,559 lhing ahitai.

 

Adamlou jending leh admission bol loudinga sei doctor leh hospital authority ho thu sorkar in akhol dinga MMWO in ngehna nei

Imphal,  Jululy 28(UNA): Manipur Muslim Welfare Organization (MMWO) in vannoi gam chom chom chule Manipur gamsung mun chom chom, adeh a Thoubal district a hatah a chal jing a Covid 19 natna jeh a district mihon hahsatna sangtah ato uvin, gamsung miho gentheina ahi, tin asei uvin ahi.

General Secretary, MMWO, Thoubal Moijing Branch, Md. Ayub Khan in soi akaina thuso a chun, natna jeh a boina sangtah Thoubal district mihon ato laiya, Imphal khopi mun chom chom a um hospital a kijen nading jong district mi adam lou hon amu joulou ahi, tin aseiyin chule doctor hon ajen nomlou jeh a thina chan gei toh a adamlou jong aumhi vangset umtah ahi, ati.

Covid 19 local transmission aumjeh a gamsunga um hospital hon adamlou ajen da a chule hospital a admission apeh lou uva ahileh mipi vet a itobang hiding ham, tin jong thudoh aneiyin ahi. Thoubal district mi adamlou hon Imphal khopi a um hospital chom chom a kijen na ding ato mo a ahileh state sorkar chule mopohna nei authority adang dang hon adeh a Thoubal district miho kijen nading mun atumbeh a aganna thei pen a agon peh ding ahi, ati.

Covid 19 natna nei aumna veng mi/lhang mi ho hospital a admit kibol louding chule kijen theilou ding ahi tia thulhuhna um ham, aumleh mipi anga tahdoh uhen, tin Md Ayub Khan in aseiyin chule state sorkar in pan alah a, Thoubal district mi adamlou ni jen ding nom louva doctor ho leh hospital authority ho jouse chungchang thu kholna apat dinga temna jong aneiyin ahi.

Doctor hi mijousen jana apeh natoh khat ahi in, ahivanga sihnei langneina neiya doctor khat leh ni jeh a hiche profession mipi tahsan lel na achan hi vangset umtah ahi, ati. District mun phabep a niseh a Covid 19 positive atam cheh cheh jeh hi mipin sorkar in asemdoh SOP phatah a ajuilou jeh ahi, tia kisei ahi. Covid 19 positive hi ho insung mite jouse Covid 19 test akibol uva chule natna akisei na lhang ho aganna thei pen a sanitize abol diuvin jong temna aneiyin ahi.

SOP jui ding hi tu phat a athupi pen leh angaicha pen ahi in, police hon bou mipi avetkol jouding ahipoi, tin aseiyin chule Thoubal district miho akitim them diuvin Md. Ayub Khan in temna aneibe in ahi.

IRB hon escort abol dum thil tamtah kipohna truck vengsung mihon man, thil ho sumang tau

Imphal, July 28(ET): Indian Reserved Police (IRB) hon escort abol dum thil (tobacco product)  tamtah kipohna truck khat Tuesday jingkah a vengsung numei ho leh club member hon aman uvin, akipo thil ho asumang tauvin ahi.

CM Biren umna Heingang Assembly constituency mun a thilsoh ahi. Thulhut dungjuiya, jingkah a lhai (exercise bol) hon jingkah nidan 5.30 don a IRB hon escort abol truck ginmo umkhat amudoh uva, athu hi Luwangsangbam Apunba Meira Paibi Lup kiti numei kiloikhom ho ahetsah u ahi. Hiche jouva volunteer hon truck a thil kipo ho aso lhah nau anung ajuiyu ahi.

Laishram Ongbi Purnima Devi (62), w/o (L) Birchandra inmun a truck a kon dum thil tamtah asodoh u amudoh u ahi. CADA volunteer honjong amun adel lut uva, ginmo thil kipo ho kholna a numei volunteer ho akithopi u ahi. Inmun akhol nauva, numei ho leh CADA member chule Luwangsangbam area club member hon Talab, Zarda, Khaini leh adang dang kihetna box packing kibol 130 amudoh u ahi.

Akiman thil ho Luwangsangbam Maning Ching a apoh uva, meiya ahal uva asuhmang u ahitai. Lungdon umtah khat chu, dum thil neiya mikhat in drive bol a volunteer ho henga thil hohi MLA pa thil ahi, tia suh kichat ding anagot ahi. Athusei hi atah ahileh sorkar in ‘War on Drug’ achepi na asungthu hi kicheh cheh ahi, tin volunteer khat in aseiyin ahi.

Kuwa leh dum thil adang dang mipi lah a neh ding kiphal lou ahi in, public place a chil set akikha na lo umlou ding ahi, tin asei uvin chule dum thil nei pa in asei hi atahbeh ahileh COVID 19 natna chal be sah nadinga tohgon um ahidem, tin jong organization in thudoh aneibe uvin ahi.

 

Covid 19 nat kisei khoh laitah a ipijeh a ILP peh pan dinga kisei ham, tia CSO chom chom in thudoh nei

Imphal, July 28(ET): State sorkar in gamsung a hung lut nom a gamdang miho ILP peh pan dinga tut ah a thulhuhna anei chungchang civil society organization tamtah in thudoh anei uvin ahi.

Special Home Secretary Gyan Prakash in order asodoh na a, ILP permit hi July nisim 21 nikho a kon kipe pan ding ahitai, tia asei ahi. United Social Development and Educational Organisation leh All Khangabok Labour’s Welfare Union in novel coronavirus natna hi gamdang a kon hung kipolut ahi ti sorkar in ahet ahi in, ipijeh a kinotah a gamdang miho gamsunga alut ding kiphal ham, tin thudoh anei uvin ahi.

Covid 19 case atam cheh cheh laiya gamdang miho ILP kipeh jeh ipiham tin jong thudoh anei uvin ahi. Natna doudal nadinga state sorkar in achesa March nisim 18 nikho a ILP kipe phat chomkhat a dinga avohhai ahi. Virus hi gamsung mi gamdang a kon hung kile hon ahin pohlut u ahi in, state danga kon hung kile ho a kon tua hi natna hi kholjin khalou honjong akilah son ahitai. Covid 19 positive ho jen na a sun leh jan a kisalel health worker ho positive hiuva, atohkhompi chule aumkhompi hojong positive hiu ahitai, ati.

Tu dinmun aboi laitah a state sorkar in ipijeh a gamdang miho hunglut thei nading ILP asodoh got ham, tin kiloikhomna tenin thudoh aneibe in ahi.

Kangpokpi Dist VDF Welfare Association in Kpi a kiphinna nei

Kangpokpi, July 28(UNA): Manipur sung a VDF kiloikhomna in ‘Pen down Strike’ phondoh na a anei toh lhon a nitna kinei jing toh lhon in Kangpokpi District VDF Welfare Association in tuni in Kangpokpi DHQs ah lha lo kal na ding, lha 13 lhinna lo peh na ding le anatoh u regular kilhah sah na ding in kiphina ana nei uvin ahi. Hetthei khat chu All Manipur VDF Welfare Association in natoh louding a phondoh na ana nei u ahi. Hiche phondoh na ana kinei toh lhon a ahunglhungding July nisim 30 sung a a thumna u kisan peh na ding a phat peh na ana nei u ahi. Kangpokpi District VDF Welfare Association in tuni a toumun kiphin abol na uva chun placard jat chom chom jong ana dom uvin ahi. Kiphinna a chun Lamminlun Kipgen, President, KDVDFWA in thuso mihotoh akihou limna a achesa July nisim 16 akon kiphinna akinei vang in govt in tu chan in nahsah in akoi pon, hiche toh lhon a hitabang toumun kiphinna hi hung kinei ahi ati. Lamkai pa chun asei na a VDF ho in niseh a natoh na hatah a anei jing uva a duty u midang ho asang a atam joh vang a lha a dangka 7,500 bou kipe ahi dan tahlang a ana nei in ahi. Police ho toh kibang a natoh na anei jing utoh lhon a lha 13 lhinna lo jong pehding adei dan u phondoh na jong ahin nei uvin ahi. Covid-19 natna khoh jing toh lhon a gov tin VDF ho main covid cente ho akoi jing dan u jong tahlang na ana nei uvin chuleh hilai mun a kikoi ho ki venna ding thil phate a kipeh loudan chung a nopmo asah na jong tahlang na ahin nei uvin ahi. Muntin a gamvaipo ho ahilou le mun jouse a natoh na a kijang le kinganse VDF ho thumna ho nahsah lou a hitabang a kikoi hi pohnat na state sung a VDF jouse in ahin nei utoh lhon a hitabang kiphinna hi hung kinei ahi tin jong kiloikhomna in hetsah na ahin nei uvin ahi.

Manipur a covid-19 case thah kimube jing

Imphal, July 28(ET): Covid-19 Common Control Room  akon thulhut kimu dan achun tuni chun Manipur a covid case thah 31 kimube thu asei in hiche holah achun Thoubal akon mi 10, Ccpur leh Tamenglong akon mi 8 cheh, Imphal West akon mi 5 ahiuve. Akimudoh lah achun Imphal West akon mi 1 chule Tamenglong akon mi 8 tilou adang ho chu travel history neilou ahiuvin hinlah local risk history vang anei uvin ahi. Alangkhat ah tuni mama chun hiche natna akon mi 56 ho adamdoh tauvin ahi. Tuni chan in Manipur a active case 702 aum in chule recovery rate jong 69.70 aphatan ahi.

Churachandpur Covid control room akon thulhut khat kimu in aseina achun tuni chun Ccpur akon JNIMS a sample test bolding a kithot ho result aso toh lhon in mi 38 avei amudoh thah uvin ahi. ITI Saikot CQC akon mi 7, 113 Battalion BSF akon mi 31 ahiuve. Tuhin Ccpur sung a hiche natna veikha mi 228 ahi tauvin hiche lah achun active case 75 aum in midang 153 hochu adamdoh tauvin ahi. Alangkhat ah tuni nilhah lang chun 1st Bn. Maniopur Rifle, Imphal a cheng 8th Bn. Manipur Rifle a personnel khat leh a insungmi 2 chu positive ahidan akimudoh utoh lhon in Naorem Praveen Singh, Deputy Commissioner, Imphal West in 1st MR High School leh Imphal Central Jail Complex kikah, 1st MR Family line, 8th MR Rear HQ building leh DG Pool Oil Pump chule Nambul vadung lah kikhah ding in thuphon aboltan ahi.