Congress in BJP lamkaina state sorkar douna a ‘no-confident motion’ podoh ding;...

Congress in BJP lamkaina state sorkar douna a ‘no-confident motion’ podoh ding; Governor henga ‘special session’ bol dinga ngehna neiyu

52
0
SHARE

Congress in BJP lamkaina state sorkar douna a ‘no-confident motion’ podoh ding; Governor henga ‘special session’ bol dinga ngehna neiyu

Imphal, June 18(ET): Congress in Thursday nikhon Biren Singh lamkaina state sorkar douna a ‘no-confidence motion’ pohdoh dinga kilolna anei uvin, hiche hi BJP MLA 3 panna a MLA 9 in BJP a kon haina anei jou ahi.

Party in Thursday sun a Governor Najma Heptullah akimupi uvin, hiche motion pohdoh nadinga ‘special session’ bol dinga ngehna aneiyu ahi. “Governor henga application pelut dinga kacheu ahi in, N Biren lamkaina sorkar douna a no-confidence motion kilolna sem nadinga special assembly session bol dinga ngehna kaneiyu ahi”, tin Congress lamkai Chaltonlien Amo in Raj Bhavan alut masanga thuso miho henga aseiyin ahi.

Congress in Okram Ibobi Singh lamkaina a sorkar sem nathei ding mi kaneiyu ahi, tia aseiyu ahi. “Okram Ibobi Singh lamkaina noiya athah a kisem Secular Progressive Front (SPF) thu a Governor kouna kaneiyu ahi. Congress in SPF toh sorkar asem ding ahi. Tua sorkar hi majority hita lou ahi”, tin aseibe in ahi.

Alangkhat a, NPP president le Meghalaya Chief minister Conrad Sangma in Manipur a thilsoh umchan hi N Biren Singh lamkaina a boina aumjeh ahi in, hiche hin BJP MLA 2 tosotna neiya Meghalaya sorkar atohkhah louding ahi, tin aseiyin ahi. “Manipur a BJP MLA thum in haina anei hi ‘trigger’ ahi. Gamsunga keiho party minister ho sungthu a jong akikum nau thilsoh um ahi. Manipur thusoh hin Meghalaya sorkar atohkhah louding ahi”, tin Sangma in Shillong khopi a thuso miho henga aseiyin ahi.

BJP MLA 3, NPP MLA 4, TMC MLA 1 chule Independent MLA khat in kum thum lhing Biren lamkaina sorkar tosot tahlou dinga Wednesday nikho a thulhuhna aneiyu ahi. Governor henga lekhathot apeh nauva Chief minister anahi Okram Ibobi Singh in BJP lamkaina coalition government chunga no-confidence motion’ hi Assembly Speaker Y Khemchand Singh henga kipodoh ahitan, hiche thu a aganna thei pen a kihouna aumna dinga special session bol dinga jong ngehna kaneiyu ahi”, ati.

“Ja umtah Governor in Article 174 noiya athaneina (power) amanchah a Manipur Legislative Assembly special session akou dinga ngehna kinei ahi”, ati. Tua ministry hi minority (alhomjo) ahijeh a ‘dismissed’ bol thei ahi in chule SPF lamkai hiya majority hi Okram Ibobi Singh hi sorkar sem dinga kouna peh thei ahi, ati. Governor henga lekhathot apeh nauva SPF member jouse, Congress MLA 20, NPP MLA 4, TMC MLA 1 le Independent MLA 1 in atosotnau lekhathot jong apan sah u ahi.

Meghalaya gam a NPP in BJP tosotna a sorkar asem ahi in, akit sorkar semna dinga Congress toh pan lahkhom dinga thulhuhna anei ahi. Wednesday ni a BJP MLA thum haina nei hohi Congress a lut ahitan, ahivanga amaho hi ‘anti-defection law’ noiya aumdiu jeh a amaho vote hi kisim louding ahi.

Congress lamkaina a aban sorkar kisemna a pan kalah diu ahi. Sorkar in Covid 19 thu a pan alah dan chule keiho party ministry a party minister ho akikum ho jeh a hi sorkar katosot tah louvu ahi, tin NPP lamkai le deputy chief minister anahi Y Joykumar Singh in aseiyin ahi.

Hetthei khat chu tukum April lha a Joykumar in Covid 19 chungchang a anchang kihop dan thu a CM in kitepna anei hi ngolhoi tah ahi tia anasei jouva ama portfolio jouse hi CM pa in alahpeh ahi. Manipur High Court injong achesa June nisim 9 nikho a BJP a lut Congress MLA 7 ho hi Speaker Yumnam Khemchand Singh in achungthu aseilhah kahse a assembly a lut theilou dinga dan asemkhum ahi.

Tukum March lha a Supreme Court in Th Shyamkumar jong Minister ahina alahpeh ahi. Shyamkumar hin Congress ticket a election ajo a, ahivanga result akiphon phon jouva BJP a lut a, BJP lamkaina sorkar a minister panmun atuh ahi. SC in thutanna anei jouva MLA ahina a kon a jong haina anei ahitai. Manipur gam a March 2017 kum a BJP sorkar masapen kisem doh ahi. Party hin seat 60 umna assembly a seat 21 amu a chule Congress in seat 28 amu ahi.

Ahivanga BJP in NPP le NPF MLA 4 cheh, TMC MLA 1, LJP MLA 1 chule Independent MLA 1 tosotna a sorkar asem ahi. Shyamkumar banga tua Congress MLA 7 hojong BJP a beh ahi. Tua hi BJP MLA 3 in haina anei le BJP MLA hi 18 a nemsuh ahitan, NPF MLA 4 le LJP MLA khat in atosot nahlai ahi in, tu masanga MLA 39 ananei u ahi in, tua agom a 23 aneiyu ahi.

Alangkhat a Congress in MLA 20 (8 hi BJP a alut jeh a disqualify hi ahi) aneiya, hiche chunga NPP MLA 4, TMC MLA 1 chule Independent MLA 1 in atosot a ahile agom a MLA 26 aneiyu ahi. Congress a kon BJP a lut jeh a assembly a alut ding kikhah Congress MLA 7 chule BJP a kon haina neiya BJP MLA 3 hohi anti-defection law noiya um ahijeh a tua hi assembly a member hi 49 a nemsuh ahi. Congress MLA 7 ho chungchang a Speaker in itobang thutanna aneiding ham tihi tamtah in avet ahi. Amaho hin case ajo ule (overruled) BJP hat ding, alel ule Congress hat ding ahi.

“Keiho MLA 3 in eidalha jong leu sorkar dinga aboina ding aumpoi. Tohgon kinei ahi”, tin BJP MLA le government spokesperson S Rajen in aseiyin ahi. MLA 7 ho House a alut uva chule vote apeh thei ding uva Speaker in phalna apeh ding hi kinepna kaneiyu ahi. Achuti a ahile Friday ni a umding Rajya Sabha election kajo diu chule ‘floor test’ aum jong le kajo diu ahi”, tin aseibe in ahi.

Alangkhat a NPF hon BJP a umjom ding chule Friday ni a umding Rajya Sabha election chule ‘floor test’ aumle BJP tosot dinga thulhuhna anei ahi. “NPF le BJP kiloikhomna hi sot ahitan, Manipur a sorkar kisemna dinga BJP in MLA anei lhinglou pet a kitosot a, kitosot jom ding ahi. BJP in achesa phat ho a kinoptona kisem jana pe hih jong le gol le pai keihon kadalhah louvu ahi”, tin K Leishiyo, NPF MLA in aseiyin ahi.

Congress a kon BJP a lut MLA 7 hon High Court a writ petition apeh aseina ding nikho kivochon; High Court le Speaker’s Tribunal in thulhuhna ima nei loulai

Imphal, June 18(ET): Manipur Legislative Assembly Speaker’s Tribunal in Congress MLA 7 party a kon haina neiho chunga ‘disqualification case’ kisem na a ‘hearing’ June 22 a dinga anatep nauva kon tuni (june 18) ni a achon nai jeh uva boina sangtah aumin ahi.

Congress MLA K Meghachandra le party in Manipur High Court a Justice K Nobin henga kino tah a thil kibol na thu a Manipur Speaker natoh hi adihlou/athenglou um hidinga aseiyu ahi. Hiche bench ma ma hin achesa June 6 ni a MLA 7 hohi state Assembly Complex a lut theilou diu chule Speakers Tribunal in hiche chungchang a case aseilhah dinga thupeh ananei ahi.

Ahivanga, Justice K Nobin lamkaina bench in thutanna hi jing nikho a dinga akhongaiya, hiche jouva Speaker’s Tribunal hearing jong khongai ahi. MLA K Meghachandra le party in ‘urgency’ thu a miscellaneous case asem jou ahi. Alangkhat a Congress MLA 7 le Manipur Legislative Assembly Speaker in Justice Ahanthem Bimol le Jamir henga writ petition apeh jong ‘technical’ a boina aumjeh a avohchon u ahi.

Court a thutanna aumlou jeh a Manipur High Court in Congress a kon jamdoh a MLA 7 ho Manipur Legislative Assembly a alut theilou dinga dan akoikhum hi kikhel lou ahi. Achuti a ahile MLA 7 hohin Friday nikho a umding Rajya Sabha election a vote apeh theilou diu tina ahitai.

N Biren Singh, aki kumlou na ding’a kihakum val ahi: Jayantakumar

Imphal,  June 18(ET): Keishamthong constituency MLA Langpoklakpam Jayantakumar Singh in tuni a thuso miho masang a aseina achun Chief Minister N Biren Singh in government apoh dan hi ama chang phatchomna ding bou a apoh ahin Minister dang ho mopohna a jong aha kikum val e ati.

National People’s Party lamkai khat a pang chule state Health Minister ahina akon hai a chule BJP toh kikhut jopna jong ana ladoh Jayantakumar in aseibena achun Dictator tobang in vai ahom in ama toh kinai mi kilhengdoh hotobou thulhutna asem ji uvin Minister dang ho ngaidan khatcha ala ji poi ati.

Aseibena ah Health Ministry hina katuh vang in tuchung corona thu a ngaidan seikhom ding in khatvei cha jong eiki koukha pon chule kamopoh nadol a dohna ding dol ajong ei kidongkha pon mutin ah akikum in tuchung natna jeh a kahet ding dol ahiloule kabol ding dol ipi ham jong kahe pon CM pan abon chan akikumsoh kei e ati.

Coalition government ahi henasa sa in Common Minimum Programme semdoh ding jong anompon MLA phabep in ama toh kijopna abotan jong hi avaihop themlou jeh ahi in chule Democracy ahitoh lhon a thanei na hi number game ahi akihet ding ahi tin asei in ahi.

Congress le athah a akiloikhompi MLA hon Speaker Y Khemchand apanmun a kon lahdoh dinga thumna nei

Imphal, June 18(ET): N Biren Singh lamkaina sorkar a kon MLA 9 in haina aneiya chule Manipur Pradesh Congress Committee Thursday nikho a atosot jou uva Congress MLA K Meghachandra in MLA 12 tosotna a Manipur Assembly Speaker Y Khemchand lahdoh dinga asei uvin ahi.

Manipur Legislative Assembly Secretary henga notice apeh nauva MLA K Meghachandra in MLA 12 tosotna a Manipur Legislative Assembly Speaker apanmun a kon lahdoh dinga akisei hi atuh panmun toh kilom louva na atoh jeh ahi in, chule anatoh hi constitution toh akitolou bou hilouva dan dihlou (illegal) ahi, tin aseiyin ahi.

Notice hi 307(1), Rules of Procedure and Conduct of Business in Manipur Legislative Assembly of a Resolution for the removal of the Speaker’ noiya apeh u ahi. Notice a hi MLA Y Joykumar panna a NPP MLA ho, Congress MLA O Ibobi, Gaikhangam, Independent MLA ho panna a agom a MLA 13 in ahung lhung ding June 22 ni a umdinga ana kisei Disqualification case thu hi ajeh kicheh pe louva athanei vetsah tah a tuni (June 18) ni a achon nai ahi, ati.

Speaker pa lahdoh angaiye, tin MLA hon aseibe uvin ahi. “Speaker pa amatah in Congress party hi a MLA 7 ho ‘disqualification case’ thu hi June 22 nikho a sei dinga aphat ana tep ahi. Ahivanga, amahin social media a June 17 jan nidan 11 a Manipur Legislative Assembly member ho henga social media a thuso aneiya, ajeh hilchenna nei louva hiche case hi June 18 a dinga avoh nai ahi. Athil bol hi athanei avetsahna ahi in, hiche hi doudalna kaneiyu ahi. Hiche jeh a Speaker pa lahdoh nadinga notice kapeh uhi neisan peh uvin lang chule ‘list of business’ a nei koipeh uvin tia ngehna kaneiyu ahi”, tin State Assembly Secretary henga notice apehna a Congress MLA K Meghachandra in aseiyin ahi.

Alangkhat a, thilsoh umchan chungchang a, Ningombam Bupendra Meitei, Congress spokesperson in Twitter a, “Hiche notice hin Congress lamkaina a Manipur a coalition government kisem athah athahat sah ding ahi”, ati. Legislative Assembly member 60 umna a legislator 36 in tosotna anei toh kilhon a Congress party lamkai hon sorkar sem nadinga state sorkar akimupi vahdiu hi ginchat ahi.

NPP MLA 4 le Independent MLA 2 injong tu masanga Congress party atosotna aphondoh ahitai. NPP, Independent MLA tosotna a tua hi Congress in House a MLA 36 anei ahi, tin thulhut in aseiyin ahi.

Manipur a covid-19 case 606 hita

Imphal, June 18(ET): Gampam akon hung kinungle mi 54 ho covid-19 vei ahidan mudohbe ahitoh lhon in tuhin Manipur gamsung a covid-19 natna veikha mi 606 aphatan ahi. Alangkhat ah tuni chun JNIMS akon natna akon damdoh mi 7 hon hospital ana dalha utoh lhon in hiche natna akon damdoh mi 199 aphatan chule tua active case mi 407 aum in ahi. Senior health official thulut in aseina achun a percent a vet in avei ho akon adamdoh jat hi 32.83 pc ahi ati. Avei akimudoh thah 54 ho hi numei 34 chule pasal 20 ahiuvin amau ho chu Pherzawl akon mi 26, Senapati akon mi 21 chule adang 7 hochu Ccpur district akon ahiuve tin Covid-19 Common Control Room thulhut chun asei in ahi. Abon uvin Covid-19 care Imphal a kijen ding in ahin podoh tauvin ahi.

Official thuso khat in aseina achun gampam akon gari lampi a hung ho Mao gate a nilhah pung 4 chan aki lutsah in chule Jiribam a 12 pm chan gate akihong in ahi. Iham tia ahung nau gari sung a chu district chom chom akon mi tou aum khah uva chule Imphal akon ama ama district chan chena ding gari aki gong aumlou le passenger ho chu Modern College, Porompat a report kibol ding in jong thulhut chun asei in chule Flight a hungho chu HRD Academy, Ghari a report akibolsoh kei diu in jong asei in ahi.

Congress party dalha MLA li kinungle kit

Imphal, June 18: Ibobi makai Congress party suhhat cheh nading in Congress MLA ana dalha MLA li hon ahin nungjop kit tauvin ahi. MLA Y Surchandra (Kakching AC), MLA P Brojen (Wangjing Tentha AC), MLA Ksh Biren (Lamlai AC) chule MLA S Bira (Kumbi AC) ho ahiuve.

MLA Ngamthang Haokip of Saitu assembly constituency; MLA Paonam Brojen of Wangjing Tentha assembly constituency; MLA Y Surchandra of Kakching assembly constituency; MLA Sanasam Bira of Kumbi assembly  constituency; MLA O Lukhoi of Wangoi assembly constituency chule MLA Ginsuanhau of Singhat assembly constituency hon Congress akon BJP ana jop jeh uvin Congress party hon achung uva action lading a petition anase bang un disqualification cases ana kimaitopi uvin ahi.

June 8 nichun Manipur High Court a single bench, Justice Kh Nobin in thuso abolna achun Congress MLA 7 hochu Manipur Legislative Assembly sung Speaker in aphatsah tokah luttheilou ding in thuso ana bolkhum ahitai.

 

India a Covid 19 natna a kon kijen dam 53% a kal

New Delhi, June 18: India gam a Covid 19 natna a kon akijendam (recovery rate) hi 52.96 per cent a akal tan, tuchan geiya natna a kon mi 1,94,324 kijen dam ahitai, tin Health Ministry in Thursday nikhon aseiyin, hiche hi Prime Minister Narendra Modi in Unlock 2 chepi dinga asei jou ahi.

Achesa nidan 24 sunga Covid 19 natna neiya agom a mi 7,390 kijen dam ahi. Tuchan geiya natna nei mi 1,94,324 kijen dam ahitan, recovery rate hi 52.86% lhing a kal jing ahi. Gamsunga Covid 19 active case hi 1,60,384 ahi in, amaho hi medical supervision noiya um ahi”, tin Health Ministry in thuso aneiyin ahi.

India sorkar in Covid case ho kijen na a chepi thum – Tracing, tracking le treating’ principle hi ajuiya akhohsah ahi in, chule aniseh a test kibol hi hiche jeh a kalsah be ding a natoh chelha jing ahi, ati. Health Ministry data dungjuiya, India pumpi a agom a sample 62,49,668 test kibol ahitai.

Chule gamsunga government lab jong 699 a kikal sah a, private lab testing Covid 19 sample jong 254 a kikal sah ahitan, agom a testing capacity hi 953 lab lhing a, hiche lah a lab 540 a hi real time RT PCR test kibol a chule lab 340 a hi TrueNat based testing kibol ahi. Chule adang lab 72 a hi CBNAAT based test kibol ahi, tin thuso chun aseibe in ahi.

Test kibol na akikal sah be toh kilhon a, achesa nidan 24 sunga hi India gam a agom a sample 1,65,412 test kibol ahi, tin thuso a asei uvin ahi. Thursday nikho a India gam a Covid 19 positive kihetdoh be hi tuchan geiya dinga nikhat a natna kihedoh be atamna pen ahitan, athah a natna 12,881 kihetdoh be ahi. Hiche toh kilhon a Covid 19 positive hi agom a 3,66,946 lhing ahitai.

Hiche lah a natna nei mi 12,237 thi ahitai. Chule achesa nidan 24 sunga natna jeh a athi akisei be hi 334 lhing ahi. India gam a Health infrastructure thahat sah be a, pandemic douna dinga Thursday nikho a Health Ministry in India a dinga mobile I-Lab masapen hondohna aneiyin ahi. Hiche hi infectious disease diagnostic lab ahi in, thinglhang gamlha tah tah a Covid 19 test bol nading ahi.

“Athah a hondohna umhi thinglhang gamlha tah tah, chule gamsunga gam hahsatna mun, alhun hahsatna mun ho a kikoi ding ahi in, hiche hi CGHS rate (akisem man) dungjuiya 25 COVID-19 RT-PCR tests/Day, 300 ELISA tests/day, TB, HIV leh adang dang ho test kibol na a kimang thei ding ahi.

I-LAB (Infectious Disease Diagnostic Lab) hi Department of Biotechnology, Ministry of Science & Technology in Covid Command Strategy noiya atosot ahi”, tin Ministry in thuso anei nauva aseibe uvin ahi.

Manipur leng phunggui Leisemba in BJP min a election tet dinga kigel lhahna anei MNPF in demna nei

Imphal, Jun 18(ET): Manipur Naga People front (MNPF) in Manipur leng phunggui Leisemba Sanajouba in BJP a election tet dinga thulhuhna anei demna sangtah anei uvin ahi.

MNPF in thuso anei nauva, achesa September 21, 1949 kum a Shillong a ‘merger agreement’ soi kaina aumhi Maharaja Budhachandra gihna anei uva abol u ahi, tin aseiyun chule Manipur gam in 1947 kum a ama Constitution anei ahitan, Indian Constitution hi 1950 a bou um ahi, ati. Manipur hi Indian Union a kilalut jong le chon le khan, chena lhongpi chule ima jouse hi leng mopohna a um ahi, ati.

O Ibobi le ama Cabinet in Leng ho chenna (Palace) hi achesa 2013 kum a museum a sem ding anagot ahi in, hiche hi lengpa amatah in adoudal a, an ngol kiphinna aneiya, kho 220 a kon kho haosa tamtah injong kiphinna a pan alah ahi. Madhya Pradesh a Scindia chilhah ho le Jammu and Kashmir a Maharaja Hari Singh chilhah ho Minister ahithei leh, tia hi Leisemba Sanajaoba in agel hiding ahi, tin aseibe uvin ahi.

Leisemba Sanajaoba MP ahiding hi leng ahina kisuhneo na ahi. Ahiti a ahile Manipur leng ahina a jana hohi ajoh mang soh ding ahi in, hiche jeh a leng panmun atuh adalhah masat a hiche jouteng BJP a active worker hi a, Indian Parliament natong hiding ahi. Ajeh chu Manipur leng khat chu Indian Parliament soh a pang a ‘Jai Mata ki’ le ‘Jai Shree Ram tia asap theilou ding ahi, tin MNPF thuso chun aseiyin ahi.

BJP in Leisemba Sanajaoba alhen hi achom a tohgon aneiyu avetsah ahi, tin jong aseibe uvin ahi. “Leisemba Sanajaoba in soh nomsa tah hiding ahiloule mi pupa genthei tah hiding khat joh joh hi chingthei tah a akilhen ding ahi in, ama khut a kingam ahi”, tin MNPF thuson aseibe in ahi.