Congress a kon haina neiya MLA 5 ho BJP in party a...

Congress a kon haina neiya MLA 5 ho BJP in party a lahlut na neita

123
0
SHARE

Congress a kon haina neiya MLA 5 ho BJP in party a lahlut na neita

Imphal, Aug 19(ET): State assembly chule Congress party a kon haina neiya Congress MLA anahi mi 5 ho Wednesday nikhon Bharatiya Janata Party (BJP) a alut tauvin ahi.

Lamkai nga holah a CM anahi leh Congress lamkai Okram Ibobi Singh sopi cha Henry Okram pang ahi in, adang mi 4 hohi Paonam Brojen, Oinam Lukhoi Singh, Ngamthang Haokip chule Ginzuanhau Zou ahi. Gamsunga ‘Operation Kamal’ alolhin jouva BJP general secretary leh party points-man (NE) Ram Madhav in CM Biren lamkaina state sorkar aboina ding aum tapoi, tin aseiyin ahi.

“Tua hi Manipur a political dinmun det ahitai”, tin kin gon a pang Madhav in aseiyin chule sorkar in kum 5 lhing term apoh lhung bou hilouva election a akai doh kit ding akinepna thu jong aseiyin ahi. Chief Minister N Biren Singh leh party national president JP Nadda jong New Delhi khopi a Congress MLA anahi lamkai ho BJP a alahlut nau kin a pang a, Nadda amatah in mi 5 ho party membership hina apehdoh ahi.

Madhav in asei dungjuiya, party hi tua atoson MLA 34 aum tan assembly seat 47 um a chule seat 13 hi a ong a um ahi, ati. Achesa August nisim 12 nikho a Manipur State Assembly a Congress MLA 6 in party a kon haina aneiyu ahi in, BJP sorkar in abol ‘trust vote’ a BJP douna a vote apehlou jeh uva party kouna amu u ahi. Mi 5 hon haina lekha apeh Speaker in asan peh a ahivanga MLA 6 channa Brojen chunga disqualification case aum jeh a ama thu hi akho ngaiyu ahi.

Biren lamkaina sorkar in Trust Vote hi voice vote 28-16 a ajo ahi. Tu naicha BJP MLA 3, NPP MLA 4 chule Trinamool Congress 1 panna a MLA 9 in June lha kim a BJP tosot tahlou dinga anasei uva hi Biren lamkaina sorkar in boina ato ahi. Ahivanga, NPP MLA 4 ho Delhi a apui uva, Union Home Minister Amit Shah leh party president JP Nadda akimupi jou uva boina asuhlhap kit u ahi.

Chief Minister in achesa Tuesday nikho a JP Nadda, BJP national president ana kimupi a, Manipur a politics dinmun ho hetsahna anei ahi.

Xxxxx

AMUCO in Covid-19 pandemic sung hi ‘Nisha ban’ bol na a man dinga mipi kouna nei

Imphal, Aug 19(ET): All Manipur United Club Organisation (AMUCO) in Covid 19 pandemic in mijouse kiman chah na atohkhah dan ho phatah a vettohna aneiyin, phat hahsat pet a hi mipin society phat nadinga pan alah angaiye, tin asei uvin ahi.

MM Thambou, Assistant Secretary, AMUCO in soi akaina a thuso a, Covid 19 pandemic hin mijouse sangtah a atohkhah ahi in, hiche phat hi thilpha bol na a man phat ahi, tin aseiyin ahi. AMUCO in pandemic in atohkhah khamnathei thil ho abon a ‘ban’ bol na a phat gomkom a nei ding asei na ahi.

“Covid-19 pandemic jeh a tu dinmun a hi miho inmun a aumtup ngai ahitan, mipi ama ama inn chule vengsung a aum tup pet uhi khamnathei jouse ‘ban’ bol nadinga eihon kitepna inei phat u ahi”, ati. Natna a kon kivenna dinga vengsung tamtah in ama ama veng jot na a tho aget a, lampi atin a chule veng dang mi lutsah louva akoi sang uva vengsung a khamnathei thil chule dum thil kimang ho kholtoh joh ding hi thilpha hiding ahi, ati.

“Covid hin sector jouse suboi ta jong leh eiho mipi hon khonung phat na ding chule gamsunga khamnathei suhmang nadinga na pha toh na a inei theiyu ahi”, tin jong aseiyin ahi. Kipunkhom a khamnathei khamnathei dou na dinga phat kijen pet ahi, tin asei uvin chule mipi ngaichat khoh pet a politician ho thunei vaihom ding akichu uhi vangset umtah ahi, ati.

Tu boi pet a politician ho chonchan hi Manipur thusim a dinga muthim nikho ahi in, mipin tua athil bol uhi alethuh diu ahi, tin aseiyun chule amaho chang ding gel a natong politician ho mipi chule pathen in asan louding ahi, ati. Khamnathei douna a phat iman uva ahileh Covid 19 pandemic sung hi gamsung mihon phatchompi na a jong inei theidiu ahi, tin aseiyun chule khamnathei douna a sorkar vaipo hon police ho khoutah a thuhilna anei dinga AMUCO in temna aneibe in ahi.

Xxxxxxx

Manipur a Covid-19 case 111 kimu be; MLA Fazur Rahim anatna a kon dam doh ta

Imphal, Aug 19(ET): Congress legislator Md Fazur Rahim avel a test akibol jouva negative ahi tan, Covid-19 natna a kon adam doh tan ahi. Kum 50 a upa Wabagai constituency MLA pa hi Delhi a kon ahung kile jou achesa August nisim 10 nikho a Covid-19 positive ahi kihedoh ahi.

State Health Additional Director Dr K Sasheekumar Mangang in asei dungjuiya, MLA pa hi aumna Babupara quarter, Imphal khopi a ‘home isolation’ a um ahi. Achesa nidan 24 sunga, Covid-19 natna neiya agom a mi 96 ‘discharged’ abol tauvin, hiche toh kilhon a natna a kon dam doh mi 2,885 alhing tan chule recovery rate 59.16% ahi.

Alangkhat a, security personnel 56 panna a agom a mi 111 Covid-19 positive ahi akihetdoh be in ahi. Gamsunga Covid-19 positive case agom a 4,876 lhing ahitan, hiche lah a active case 1,973 (general population 1,037 leh CAPF 936) um ahi.

Athah a Covid 19 positive kihe doh milham mi 55 ho lah a mi 7 hi bou gamdang a kon hung kile ho ahiuvin, Manipur gam a ‘local transmission’ hi tang louva kimu jom jing ahi. Imphal West leh Thoubal district hi Manipur a ‘local transmission’ akisei khoh na pen hijing nalai ahi.

Imphal West district mi 26, Imphal East a 18, Thoubal a 1 chule Kakching district mi khat hi local transmission case ahi in, chule state dang a kon hung kile ho lah a Churachandpur district mi 5, Pherzawl mi 1 chule Chandel mi 1 pang ahi.

State Health Department in thuso anei na a, Covid-19 positive hi a ahivanga natna (symptoms) khoh neilou chule asymptomatic ho anom uva ahileh ama ama district Chief Medical Officer (CMO) toh kihouna anei jouteng uleh Home Isolation’ a umthei dinga jong aseibe in ahi.

Xxxxxxxx

Covid-19 asymptomatic ho ‘home quarantine’ bol dinga SoP kisem thu a Congress VP Hemanta in sorkar demna nei

Imphal, Aug 19(ET): Manipur Pradesh Congress Committee (MPCC) vice president Moirangthem Hemanta in asymptomatic positive case ho ‘home quarantine’ bol dinga phalna akipeh na COVID-19 SoP thah kisem demna anei uvin, hiche hi athi dinga mi ki dalha toh akikhet na umlou ahi, tin aseiyin ahi.

Asymptomatic ho ‘home quarantine’ bol dinga SOP thah kisodoh hi mopohna neilou tah a kibol order ahi, tin Congress lamkai pa in ama inmun Tentha, Thoubal district a thuso miho akimupi na a aseiyin ahi. BJP lamkaina sorkar in Covid-19 pandemic vetkol na dinga pan alah hi mipi dinga lhahdah na ahi, tin Hemanta in aseiyin ahi.

Manipur a Covid-19 positive case kal cheh cheh a, adamlou ho jen ding health worker lhasam ahi. Ipijeh a sorkar in tua kon lha get masanga state cabinet in phatsahna anei doctor 300 leh nurse 106 lah nadinga phatsahna anei hi tu chan geiya alah loulai ham, tin demna jong aneiyin ahi.

“Covid-19 igam u ahung lhun masanga doctor leh nurse alhahsam hi ihet u ahi in, hijong leh, ipi jeh a state cabinet in lha 8 masanga phatsahna apeh doctor 300 leh nurse 106 lah ding hi tuchan a sorkar in alah louham”, tin Hemanta in thudoh aneiyin ahi.

Chief Minister leh Health Minister kah a lunggel kibah louna aumjeh a doctor leh nurse kilahna ding natoh akisuhthip hi adamlou khat athi nung a doctor in avet toh akikhet na umlou ahi, tin aseiyin chule avaigei masanga state cabinet in phatsahna anei dungjuiya sorkar in doctor leh health worker alah dinga temna aneibe in ahi.

Xxxxxxxxx

CMO in khamnathei po a kiman police personnel khat ‘recommendation’ kipeh thu lentah a la; CS leh DGP in ni 10 sunga report apehlut dinga thupeh nei

Imphal, Aug 19(ET): Achesa April 28, 2013 kum a khamnathei po a apan jeh a ana kiman police officer khat Chief Minister’s Police Medal for Gallantry award sang dinga recommendation akibol thu hi CM Biren Singh lamkaina sorkar in thukhoh tah a alah jeh a state police department official phabep in boina ato ding ginchat ahi.

CMO in CM’s Police Medal for Gallantry a dinga recommendation apeh nauva alhahsamna umho khol dinga thupeh anei ahitan chule ni 10 sunga report apehlut diuva asei ahi. Chief Secretary leh DGP, Manipur henga Secretary to Chief Minister, Ningthoujam Geoffrey in lekhathot apehna a, state level award sang dinga hitobang officer recommendation akipeh hin sorkar henga award mu ding ho list akipeh masanga nomination kipe ho kholtoh leh lhenlhah na neiya committee ho nasatah a asuhnem ahi, ati.

Chief Minister in sorkar minset louna dinga action lahding agot hiche lekhathot hin kicheh tah a avetsah ahi, ajeh chu sorkar tohgon ‘War Against Drug’ hin lamchom chom a kon demna atho ahi. Hiche jeh a state sorkar minsetna sangtah lhung thei ahijeh a character verification, vigilance clearance leh adang dang bol ngai ahi, tin Secretary to CM in aseibe in ahi.

Home Department in Chief Minister’s Police Medal for Gallantry award mu ding ho lah a SI B Debson Singh nominate akibol thu akhol a chule Committee in recommendation ho lhenlhah na anei na a dihtah a na atoh uham ti jong akhol dinga Chief Minister Office in thuhilna apeh ahi in, chule recommendation hi sorkar henga apehlut masang uva velvetna aneiyu hinam ti jong akhol diuva aseiyu ahi.

Sub Inspector B Debson Singh nomination toh kisaiya thukholna anei sung uva nomination adang jouse jong akhol diu, adihlou na um em, ti akhol diuva jong aseiyu ahi.

Xxxxxx

Indo-Myanmar a Border trade hi gamdang toh tekah dinga machalna umlou ahi: Dr. RK Ranjan

Imphal, Aug 19(ET): Act East Police akichepi jouva kon Indo-Myanmar Border trade a kikhelna aume, tia thu thang aumjin vanga Lok Sabha MP Dr. Ranjan in propaganda atahsan na thu aseiyin ahi.

Chandel District Autonomous District Council election a BJP candidate dinga Jamkholet Khongsai lhendoh na anei nau Election Committee Office kin goun a Dr RK Ranjan in, Moreh a sumkol vein a (border trade) hi gam dang dang a toh ivetkah a ahileh amachal poi, tin aseiyin ahi.

Athu hi Parliament monsoon session a pohdoh dinga Ranjan in kitepna aneiyin chule Indo-Myanmar gamgi a um town a sumkol veina machal (free trade) sah tei dinga jong kitepna aneiyin ahi. Moreh hi commercial centre pha cheh ahi na dinga authority chule planner dang dang toh kihouna kigong ding ahi, ati.

Ahin, Moreh a um Integrated Check Post hi nasatah a khangtou (full-fledged) ahi, tin Ranjan in aseibe in ahi. ICP Moreh hi gam dang dang a um ICP hotoh tekah dinga technology thah thah kiman na ahi, ati.

xxxxxxxx

Naga Peace Talk thu a Manipur sorkar in Centre toh kihouna anei poi: Home department

Imphal, Aug 19(ET): Manipur sorkar in Indo-Naga Peace Talk ‘final agreement’ akisem thei nadinga India sorkar toh kihouna akinei poi, tin suhthengna anei uvin ahi.

Joint Secretary (Home) Rehanuddin Choudhury in thuso anei na a, hiche chungchang thu a state sorkar in tuchan geiya Centre toh kihouna anei loulai ahi, ati. Thulhut dungjuiya, India sorkar leh NSCN-IM in Naga politics thu tukum September kah a aseilhah a, chule soi kaina anei thei nadinga Manipur chule Arunachal Pradesh sorkar toh Centre in kihouna apan tai, tia kisei ahi.

Thuso dungjuiya, India sorkar in kinoptona asem nauva Nagaland gam kinaipi ho gam hopsung lahlut dinga thumna aneiyu asan peh tahlou ahi, tia kiseiya, ahivanga Arunachal Pradesh leh Manipur gam a Indian Constitution Sixth Schedule noiya autonomous council ni kisem ding ahi, tia aseiyu ahi.

Choudhury in asei dungjuiya, state sorkar in tu masanga Ministry of Home Affairs (MHA) henga draft accord copy hi kihouna anei nadiu lhakhat akivat masanga state henga apeh ding uva temna aneiyu ahi in, ngaidan chule lunggel phatah a seiya, donbut thei nadinga ngehna aneiyu ahi.

Indo-Naga peace process New Delhi a akisei pat kit thu akiseiya kon United Committee of Manipur (UCM) in stakeholder jouse dohna masa aum louleh Naga Peace Process chungchang a thulhuhna um ho kidou dal ding ahi, tia aseiyu ahi. Chule Naga thu hi Manipur gam tongkha louva aseilhah ding uva jong UCM in asei ahi.

Nagaland gam tilouva Manipur, Arunachal Pradesh leh Assam chule Myanmar gam a Naga phabep cheng ahi.

Xxxxxxxxx

India sorkar in Ceasefire Agreement in ahop sung aseichet dinga Naga Hoho in thumna nei

Dimapur, Aug 19: Prime Minister’s Office (PMO) in achesa August 12 nikho a kouna apeh Naga Hoho in Wednesday nikhon donbutna akipe e, tin asei uvin ahi.

“Peace Talk process akhoh jeh a Naga Hohi in PMO a kon kouna kimu hi Minister of State (MoS), PMO Jitendra Singh mangcha a donbutna kipe ahi”, tin Naga Hoho thuso chun aseiyin ahi. Thuso dungjuiya, achesa August nisim 12 nikho a delegate hon Jitendra Singh akimupi uva chule Ceasefire hin hoilai ahop ham (area coverage) ti India sorkar in suhthengna anei dinga avel a thumna anei kit u ahi.

Indo-Naga political issue aganna thei pen a suhlhap dinga Union Minister henga jong temna aneiyu ahi. “Framework Agreement hi August 3, 2015 ni a soi akai uva chule Agreed Position hi November 17, 2017 ni a soi akai uva chule October 31, 2019 nikho a ‘formal talk’ khumkhana aneiyu ahi”. Final Agreement a soi kaina hi khongai nalai ahi in, Naga section chom chom kah a kikhenna um ahi, tin Naga Hoho in aseiyin ahi.

“Naga Hoho delegate hon RN Ravi in Interlocutor hina a pan alah na ho akipapi nau thu aseiyun chule PMO in Interlocutor panlahna sangtah a agel khoh dinga jong aseiyu ahi. Ajeh chu Interlocutor leh kihouna a pang ho chule Naga ho kah a kitahsan to na lhahsam na jong um ahi”, tin asei uvin ahi.

RN Ravi in Governor (Constitutional head) leh Interlocutor role alah kop theilou ding ahi, tin Naga Hoho in aseiyin ahi. “Peace Talk hi chejom pi ding chule alangni kihetthem to na leh kija to na a suhlhap ding ahi”, ati. Naga Hoho in Prime Minister Narendra Modi leh Dr. Jitendra Singh chunga jong kipa thu aseibe uvin ahi.

xxxxxxx

SBI Thoubal a Covid-19 positive khat akimudoh jouva office building abon a kikhah ta

Thoubal, Aug 19(UNA): SBI Thoubal Branch a natong khat Covid 19 positive ahi akihetdoh toh kilhon a Wednesday nikho a kon office building pumpi abon a nidan 48 sung kikhah ding ahitai.

Thoubal Deputy Commissioner Nongmaithem Bandana in hiche thu a Wednesday nikho a thuso anei ahi. Covid-19 Pandemic hi Thoubal district a akisei khoh toh kilhon a pan sangtah a alah jingu ahi. Covid-19 positive ahi kihedoh mikhat toh kimuto jousen District Surveillance Officer, Thoubal a report abol ding uva jong thupeh anei ahi.

Order dungjuiya, Bank Manager in office akihon kit masanga building pumpi hi protocol dungjuiya ‘disinfect’ abol ding uva jong thuhilna apeh ahi.

XXXXXXXXXX

Centre in Jammu-Kashmir a pat paramilitary company 100 toldoh tading

J&K, Aug 19: Union Territory Jammu and Kashmir a pat paramilitary company 100 toldoh ding in centre in tunichun thulhuh asem tan ahi. Hiche hi Ministry of home affairs (MHA) in dan le thupeh dinmun velvetna anei a pat gon a hung um ahi. Toldoh ding paramilitary ho chu CRPF company 40 ban a BSF, CISF le SSB a kon company 20 cheh ahi e.

Hiche hi MHA in union Territory sung a dan le thupeh dinmun velvetna anei jou a ama ama munpi cheh a pansa dia paramilitary company 100 ho chu gangtah a atoldoh ahi.

Toldoh a um paramilitary hohi ningkum August a Article 370 lahdoh ahi a tollut a um ho chu ahi. CAPF noi a sepai company khat noi a sepai 100 um ahi. MHA in May lha a jong Jammu-Kashmir a pat CAPF sepai company 10 ana toldoh sa ahi.

Tuchung a sepai company 100 hohi tu hapta sung a kitoldoh pan diu ahitai. Tu a sepai toldoh ahijou teng Kashmir phaicham a CRPF sepai battalion 60 umding ahitai. Battalion khat noi a sepai 1000 um ahi.

Xxxxxxxxxxx

Parliament monsoon session hi September 10 a kipan dia um

New Delhi, Aug 19: Ngalal um ma ma Parliament monsoon session chu achaina kei a September 10 a kipan thei din aumtan ahi.

Alhangpi a July lhakim a ana kipan ji monsoon session chu Covid-19 jeh a aphatcha kipan thei lou ahi.

Tuchung toukhom hi phatdang bang a nikho sot toulou ding ahinla jatchom diu a lim vet na thei screen 10 ban a inpi teni kihoumatna thei special communication cable le lamkai len ho touna ding achombeh a gon ding ahi e tin inpi mopo hon asei e.

Inpi toukhom phatsung nikho ijat ahiding gellhah ahilou lai vang a Lok Sabha leh Rajya Sabha toukhom ding phat government hin gon a kingam ding in aum e.

Delhi polam a pat MP ho achom thei pen Delhi nichon thei nading le phat sot lou toukhom nading a niseh a toukhom ding Rajya Sabha chairman Venkaiah Naidu le Lok Sabha Speaker Om Birla in adeilhon in ahivang in inpi teni a donbutna baidom a peh thei nading in ministry phabep in vang nikhat kah hal a toukhom ding adeikit e.

Tuchung toukhom in achesa lha 4 sung a phatsah a um dan ho seilhah ding akhohsah pen ding in aum e tin official hon aseibei.

Narendra Modi government in Covid-19 kimaitopi dia agriculture dan, Essential Comnodities Act chule loubol hon lou ga nohphahna umlou a ajoh thei nadiu Agricultural Produce Marketing Committees (APMCs) dan semphat be dia achesa lha 4 sung a ana gon ahi e.

Langkhat a gamsung economy, India-China gamgi kiboina le Covid-19 galsat chung chang a government nuhdia opposition ho  kigong tei dia ginchat ahikit e. Hiche thudol hi congress president Sonia Gandhi in tunaicha a ama Rajya Sabha MP ho tojong ana seikhomsa ahi.

Xxxxxx

Myanmar Government in India mi 128 ohden ho hin soldoh

Imphal, Aug 19(ET): India mi 128 Myanmar a ohden ho Indo-Myanmar border town Moreh ah Myanmar Government in ahin soldoh tai.

India mi Myanmar a ohden hohi Myanmar gamsung a lampi le lei 69 semdia Government of India in asol ho ahi e. Ahung kisoldoh India mi 128 lah a 66 chu Moreh  Community Quarantine centre a um diu, adang mi 62 chun ama state cheh ajot pai diu ahi. Myanmar a ohden India mi atamjo chu  Jharkhand, Bihar, Punjab le West Bengal mi ahiuve. Hiche hi Ministry of External Affairs GOI in  Myanmar Government akihoupi a pat hung umdoh ahi.

Ahung potdoh se chu  District Nodal Officer Dr. Cecil Ahongshangbam lamkaina a Moreh ICP mun a vetchil ahiuve.

India mi Myanmar a pat hung potdoh ho chu ICP Manager Robin Gangte, Addl. SP (LO), Sangboi Gangte, Immigration officer Krishna Anand hon ana lamto ahi.

Xxxxxxx

High level independent inquiry committee gon pai dia AMSU in ngehna nei

IMPHAL,  Aug. 19(UNA): W. Basu Singh, Superintendent of Police NAB, PRO, Police Department in tunia thuso abol a pat High Court retired Judge makaina High Level Inquiry Committee semdoh dia Governor of Manipur kom a ngehna anei avel a tahlahna aneiban in AMSU  publicity and information secretary Lhunpao Lupheng a kon kimu lekha chun asei na ah kipaman peh a um pa phatlouna kichehsel thulhut kinei chu mipi het a kiphongdoh lou ding amavang semdoh ahi hi le High Level Inquiry Committee (HLIC) kom a thulhut ho kipedoh ding ahi e, ati.

Police department PRO W Basu Singh in senior police officer pa thi le hin kah a Delhi mun a kijenlai a hitobang thu AMSU in ahin pohdoh hi chih kai lou le vangset umtah ahi e tia asei ahi. AMSU in senior officer pa chu hiti ho jeh a vangse kha ahile ahilou hetdoh ding bou chu atup ahi in, hiche thilsoh hi phatah a kholchil dia AMSU in ngehna aneilo ahi.

AMSU in hiche thilsoh chung chang High Court retired Judge makaina kholchil ding lom semdoh dia Governor ngehna lekha apeh jong phengkhat cheh press ho ban a Chief Minister, Manipur le Director General of Police jong AMSU chun apeh ahi.

Hiche thu toh kimatna  thusoh ahet ho dan dungjui a Governor apehding a AMSU chun police department ngehna jong anei ahi.

XXXXXXXXXXX

Khamnathei thu a PIL kibol court in sanglou

IMPHAL, Aug. 19(UNA): Users Society for Effective Response) (USER Manipur, Paojel Chaoba (journalist) le Human Rights Alert (HRA) hon Manipur a khamnathei thilsoh toh kimat a Public Interest Litigation (PIL) apehlut chu Manipur High Court in apom tapon ahi.

Lamchom chom a kum 20 sung a gamsung a khamnathei kiveiden ho ngah le suhbei ding tupna a executive director Human Rights alert Babloo Loitongbam, president USER Jogesh Maibam le journalist Aribam Dhanajoy hon PIL apehlut u ahi.

PIL bol hon state government le central government kom joh a thu alhut dia aseipih tolhon a PIL apehlut u chu court in asanpihlou ahi.

Hitolhon a gamsung a khamnathei thu le Lukhosei Zou thu hi CBI ahiloule NIA in akholding deisah le ngehna a union home ministry le state government kom a PIL bol hon tuni ma a lekha apehlut diu ahi.

Amavang government in aphatcha a bolding dol abol lou le PIL bol hon avel a court a thu anunglhut kit ding ahi.

XXXXXX

Sample test bolna a Nagaland govt in tuchan a crore 17.16 mangdoh

Kohima: Nagaland in tuchan in RT-PCR le TrueNat machine mang a Covid-19 sample test abolna a sum amandoh hi crore 17.16 vel ahi.

RT-PCR test bolna a crore 14 crore leh TrueNat noi  a test bolna a crore 3.15 vel Nagaland in amandoh ahi e tin Dr Kika Longkumer, deputy director, health and family welfare in Kohima a thuso miho tunia akimupi pet a chu asei ahi. ,

Dr Kika in RT-PCR noi a 31,124 le TrueNat noi a 21015 patepna boldoh ahi in, RT-PCR noi a patepna khat chung a ₹ 4500 leh TrueNat noi a patepna khat chung a ₹ 1500 vel alut in, agom a crore 17.16 vel manchai ahi e, ati.

HFW Principal director Dr Vizolie Z Suokhrie in BSL laboratory a scientist, laboratory technician hon 24×7 in COVID-19 patepna aboljing un chutobang ma chun state sung a patepna manchah lhahsam jeh in nikhat jong akhongai khapon ahi, ati.

XXXXXXX

Covid-19 natna toh kisai a gamsung boilai a govt sung a boina um hi angaina ahipoi: HERICOUN

Imphal, Aug 19(ET): Leiset chung a covid-19 natna len jing toh lhon a India jong hiche natna nei nalah a asang loi a ahung pan toh lhon a Manipur sung a jong hiche natna akon kivenna ding a daan kisem ho jui na govt in thupeh anei u phate a kivetsui lou jeh a state sung a natna hung pun be jing na chung a HERICOUN in demna sangtah ahin nei uvin ahi.

Hiche natna toh kisai a mipi lang phang na hi achesa Rajya Sabha election ahiloule gamsung a govt boina ho akon hung kipan ahi dan jong kiloikhomna in ngohna ahin nei uvin ahi. Hitabang natna akon a kivenna ding a tohgon hatah a kiche pi laitah a MLA ho hung ki resign na le ECI in by election bolding a ahin gon u jong hi vangset umtah ahi tin kiloikhomna chun tahlang na ahin nei uvin ahi. Mipi pam pot ho lockdown ahi tia ki leusah na um jing lai a election bolding kiti hi ipi toh kitoh ham tinjong kiloikhomna chun dohna ahin nei uvin ahi.

Hitobang natna punbe jing lai a muntin a golnop kiloikomna ahi lou le buneh khomna ho um akon a jong hung khohse ahi akiti. Tu dinmun a gamsung a election umding kiti hi ahi thei louding toh lhon a CEO Manipur in ECI ang a ahi thei louna ding dan thu hilchet na nei a lekha thot anei ngai ahidan jong HERICOUN in tahlang na ahin nei uvin ahi. Amading kigel a MLA hi kadeitapoi tia haina lekha se pho jeh a covid-19 natna punbe na ding tohgon bol louding ahi tin jong kiloikhomna Asst Secretary Genaral A. Anand in hetsah na ahin nei in ahi. Gamsung a natna lentoh lhon a niseh a neh kihol ho natoh di kikhah a hitabang a election umding a tohgon hung kinei hi angai na ahipoi tin jong kiloikhomna in hetsah na ahin nei uvin ahi.

Xxxxxxxxxxxxxxxxxxxxxxxxxxxx

Meghalaya a covid-19 positive case 78 a punbe

SHILLONG, Aug 19: Tuni in Meghalaya a covid-19 positive case 78 in ana punbe in ahi. Hiche toh lhon a state sung a active case hi 804 aphatan ahi. Tu chan a state sung a case kimudoh hi 1535 ahitan ahi akiti. Hiche thu chu tuni a Director of Health Services (MI), Dr. Aman War in phondoh na ana nei ahi.

Tunia case thah kimu ho lah a case 47 chu East Khasi Hills district akon ahin chuleh case thah 27 ho chu West Garo Hills akon chuleh North Garo Hills le East Jaintia Hills akon ahiuvin ahi akiti. Shillong khopi sung a athah beh a case 30 ana kimu doh lah a 18 ho chu mipi test kibol na a hetdoh a ana um u ahi akiti. Dr. War akon thuso kimu dungjui in tuni in sample 44,695 lam tetst bolding in pehdoh na ana kinei kit in ahi akiti.

Xxxxxxxxx

National Recruitment Agency in govt natoh na toh kisai a Online Test kum khat a nivei bolding

New Delhi, Aug 19: National Recruitment Agency kisemdoh hi gamsung khang thusim a  ding a seichah thei khat ahi tan hiche noi a central govt natoh na ding hotoh kisai a kum khat ni vei online tetst umjing ding ahi tin Union minister Jitendra Singh in phondoh na ana nei in ahi.

Exam avel vel a phatseh a um hi candidate ho ading a boihoi tah ahi toh lhon a hitabang natoh na hi hung kipodoh ahi tin minister pa chun asei in ahi. Minister pa in asei na a kum khat a candidate 2.53 crore lam in hiche exam ho ahin panlah na anei jing uvin, tohgon thah kinei hi candidate ho ading a navah natah hung hiding ahi tin jong phondoh na ana nei in ahi. NRA noi a test kum khat a nivei umding candidate ho mark hi kum thum chan a jah thei hiding ahi ati. Hiche exam hohi English le Hindi tilou a pao 12 lam a jong kibolthei ding ahi akiti.

Minister pa in asei be na a hiche tohgon hin natoh holna lung ol na ahin pohdoh ding chuleh gamsung a district jouse a exam centre khat cheh jong kikoi ding ahi ati. Hitabang tohgon hi mun gamlha tah a um ho ading a phatchom na lentah ahin pohlut ding dan jong tahlang na ananei in ahi.

NRA hi kumkit akon hung kiche sah pan ding, New Delhi mun aheadquater kisem ding ahi tin jong phondoh na ana nei in ahi. NRA ahi Ministry of Railways, Ministry of Finance/Department of Financial Services, Staff Selection Commission (SSC), Railway Recruitment Boards (RRBs) le Institute of Banking Personnel Selection (IBPS) akon lamkai khat cheh in panlah na anei ding u ahi akiti.

Xxxxxxxx

Swachh Survekshan 2020 toh kisai a PM in khopi thengpen phondoh na nei ding

New DELHI, Aug 19: Prime Minister Narendra Modi  in a 5 vei channa khopi ho then kitetna ‘Swachh Survekshan 2020’ result chu phondoh na anei ding ahitai akiti. ‘Swachh Survekshan’ programme hi mipi tamtah in Swachh Bharat Mission a panlah na ana nei utoh lhon a hung kibol pan ahi. Hiche natoh na hi Ministry of Housing and Urban Affairs makai na noi a kibol ahi.

Hethei khat chi Swachh Bharat Mission: Indore in ‘Swachh Survekshan’ hi achesa kum 3 kijom a an alah u ahitan ahi. Union Housing and Urban Affairs Ministry akon thuso kimu dungjui in Prime Minister Modi in Swachh Bharat Mission-Urban (SBM-U) chanvou chang a lhendoh na ana kinei hotoh kihou na anei masat ding ahi akiti. Hiche award kipeh na amasa pen chu Mysuru in ana mu ahi.