Computer khang’a thuguh kithejalna (Exam masang’a Question kithejal!)

Computer khang’a thuguh kithejalna (Exam masang’a Question kithejal!)

54
0
SHARE

Computer khang’a thuguh kithejalna
(Exam masang’a Question kithejal!)
  Tuchung Class XI Board Exam Question paper exam kibol masang’a kithejal (question paper leak) kiti hi Manipur thusim’a amasapen ahilou jeh in chutitah a datmo thei ahipoi. “Exam question paper leak” kiti hi India pumpi a Central Board exam hoa jong ana umjapjap jing thou ahi. Ahin Manipur’a hi School Board exam keu hilouva Service a dia asangpen MPSC exam hoa jong Question paper aguh a “kichoh” masat thu gei umkha ahijeh in jachat le datmo umtah ahi. Kum phabep masang’a Central Board noija Class X exam question paper Leak ana umkha chu Physics subject a anahin, abon’a jong hilou hinalai ahivang’a avel’a ana kibolsah ahi. Ipi exam hileh question leak kiti hi question sem’a pang oja holeh lekha tatna pang Computer bol hoa kon tina hijengji ahin, Board ho kitahlou jeh ahipoi. Ahin Board ho suhkhelna chu ahileh question sem’a pang Oja holeh Computer bol, lekha tatna pang ho vetsuina le gihna phatah aneilou chu ahi. Sum themkhat muna diham jeh a hitobang question paper kithejal masatna ho umji hiteidi ahijeh in mi kitah tah hobou exam question sem’a lhenji hi thil khohtah ahi. Chuban’a lekha tatna pang Computer tham/bol holeh lekha tana Press a Machine tham/bol hojong phatah a vetsuina le hilchahna nei ngai ahi. Computer khang’a hi question tatna pang Computer bol hon ata chai chai uleh minit khat jong lutman louva bailam tah a Internet ham, Pendrive ham’a akihet/akiseldoh thei u ahi. Chuban’a Presss a Machine tham/bol hon jong atadohsa u bailam tah a copy khat asakhaova akihetdoh ujongleh bailam tah a kithejal jeng thei ahi.
Tulai Internet/Social Media khang’a thu khat chu second khat le ni kah a vannoi leiset chung’a kithejal thei ahitah jeh a imalam jousea thil kisuhmona/kipalna lentah jong umthei ahi. Exam question kithejal chu alam khatna exam voh haija exam velbol thei ahi. Ahin politics lang’a kihouna thuguh a koidi ho bang kithalop tah ham’a social media a kithejalpai jengji kiti hobang hi akibol mong jong himaithei nantin hinlah Computer tham/bol lekha tatna pang hon aloi agol atahsan tah khat agah thot khah jongleh bailam tah a kithejal pai thei ahi. Numei muhchuh ho kom’a thuguh khat koimacha kom’ah seidoh hih in kitia kiseipeh chu vannoijin ahetpai di ahi tia totna a kisei tobang chu tulai Social media khang’a jong umdoh ahitai. Loi le gol kikah a koima dang thotson hih in tia thu ham, Video/Audio clip athanghuoi kithotto khat vannoija kithejal jengji ahitai. Hitobang jeh a adon achang louva boina leh kisuhmona tuoh loi umji ahi. Exam question aphat masang’a thejalna a mona nei ho chu khuoldoh ahiteng achung uva gotna akipehtei bang’a Social media a thuguh, mi suhminsetna thu thejal hojong gotna pehteijia pha ahi.