COCOMI in ‘Public Convention’ bol; Sorkar in jihtho a kitepna anei dinga...

COCOMI in ‘Public Convention’ bol; Sorkar in jihtho a kitepna anei dinga COCOMI in thumna anei Home Minister in asan pehlou jeh’a kiphinna bol jom dinga kilolna neiyu

377
0
SHARE

COCOMI in ‘Public Convention’ bol; Sorkar in jihtho a kitepna anei dinga COCOMI in thumna anei Home Minister in asan pehlou jeh’a kiphinna bol jom dinga kilolna neiyu

IMPHAL, Nov 29(ET): Coordination Committee on Manipur Integrity (COCOMI) in Imphal khopi a Friday nikhon gamsung kipunkhomna huhna dinga pan alahjing toh kilhon uva ‘public convention’ abol uvin ahi.

COCOMI hi phaicham a um civil society organization kiloikhomna chom chom kipunkhomna ahi’in, Union Home Minister Amit Shah toh kihouna aneijou uva maban panlah ding dan thu seikhom dinga ‘public convention’ abol u ahi. Achesa November nisim 25 nikho a COCOMI delegate member 18 in Union Home Minister Amit Shah toh Indo-Naga thu in gamsung asuhkhah louna dinga kihouna aneiyu ahi.

Union Home Minister toh kihouna aneijou uva COCOMI lamkai hon Amit Shah in gamsung ‘territorial integrity’ leh kivaipohna kisukha louding ahi tin athu a kitepna aneiye, tia aseiyu ahi. Sorkar in jihtho a kitepna anei dinga COCOMI in thumna anei Home Minister in asan pehlou ahi.

Friday nikho a ‘public convention’ abol nauva Home Minister in kitepna anei thu aseikhom uvin chule kihouna a anapang COCOMI lamkai hon akikhom ho henga akihounau thu kichen tah a asei uvin chule Amit Shah kitepna jong asei uvin ahi. Gamsung atohkhah loudinga kisei ahi’in, kikhelna aum dinga ahileh Centre in gamsunga um civil society organization ho kouna apehding ahi, tia aseiyu jong COCOMI in aseiyin ahi.

Hetthei khat chu COCOMI in gamsunga Naga Peace Talk tu a ‘Alert campaign’ alamkai jing ahi’in, gamsung territorial integrity tohkhah loudinga thumna anei uva chule nam thu a territorial council pehding hi gamsung kibungkhenna ding muchi kitu ahi, tia aseiyu ahi. ‘Public Convention’ abol nauva kilolna nga anei uvin, hiche a hi mipin gamsung huhna dinga abol kiphinna bol jom ding jong apang in ahi.

India sorkar in NSCN-IM toh kihouna asemna a Manipur gamsunga nam thu a autonomous territorial council peh ding thu akiseiya ahileh doudal dinga kilolna masapen a aseiyu ahi. Union Home Minister in COCOMI toh New Delhi a akihouna a hiche thu agotna kilang ahi”, tin kilolna a chun asei uvin ahi. Home Minister in NSCN-IM toh kihouna chaina akisemna a gamsung atohkhahna thei thu auma ahileh gamsung miho dohna kinei ding ahi, tia athu a kitepna anei ahi, tia COCOMI in asei ahi’in, kitepna hi gamsung miho thumna kisanpeh na ahilou jeh a kisang louding ahi, tin asei uvin chule state sorkar leh CSO ho phatsahna sorkar in alah dinga ngehna neidinga kilolna jong anei uvin ahi.

State sorkar in December 10 nikho kah a Manipur Legislative Assembly special session akou dinga thumna nei dinga Convention in kilolna aneibe uvin chule Union Home Minister toh kihouna asem nauva kinoptona um hetpehna anei thu jong asei uvin ahi.

Kilolna achaina leh anga channa a hi nam chom chom lungmonga achenkhom ding thu asei uvin, gamsung pumpi phatchomna ding thu hi India sorkar ahilouleh Manipuri society section phabep bou hilouva gamsung a cheng nam chom chom in aseikhom a akinoptona dungjui hisah ding ahi, ati. Prof W Nabakumar in Convention alamkaiyin chule COCOMI lamkai ho tilouva academician leh social activist, CSO thalheng chom chom hojong apang uvin ahi.

CAB thu Lok Sabha ‘Zero Hour’ a kipodoh hi aphatchomna umlou ding ahi, tia expert hon seiyu

Imphal, Nov 29(ET): CPI(M) Manipur  State Committee Secrtary Kshetrimayum Santa in kinel baotamna Citizenship Amendment Bill thu a Inner Manipur Parliamentary Constituency MP Dr RK Ranjan in kitahna aneilou thu a thudoh aneiyin, hiche Bill hi Parliament ‘Zero Hour’ sunga pohdoh dinga kisei ahi.

“Hiche thu ‘zero hour’ a akipohdoh a ahileh aphatchomna umlou ding ahi”, tin Kshetrimayum Santa in aseiyin ahi. Thulhut chom chom a kon Nagaland, Mizoram, Meghalaya leh Arunachal Pradesh gam a kon political party hon CAB thu toh kisaiya Union Home Ministry in agon ‘Consultative Meeting’ a kouna ape uve, ti thu kaja in, ahivanga vangset umtah a gamsunga CAB douna a kiphinna bol MANPAC hon kouna amulou ahi, ati.

Hiche hi Central Ministry in MANPAC kiloikhomna hi state sorkar in avettup thei kiloikhomna ahi tia agel jeh himaithei ahi, tin Kshetrimayum Santa in aseibe in ahi. Dr.Noni Arambam, assistant professor, DM College of Arts in ahoulimna a ‘Zero Hour’ sunga kipodoh thu hi ipi hijongleh political decision kilahna a aphatchomna umlou ahi, ajeh chu hiche hi ‘listed business’ a kisei lou ahi, tin aseiyin ahi.

“Zero Hour’ hi thukhoh phabep a MP ho lunggel jana vetsahna chule mipi athu hilna dinga kibol ahi”, tin Dr Noni Arambam in aseiyin chule Zero hour a kipodoh thil hi sangtah hilou ding chule hiche thu a kinelkalna (official tah a debate) umlou ding, kihouna hohi ‘Informal discussion’ a kila ding ahi”, tin jong aseiyin ahi. MP pa in athu agelkhoh mong mong a ahileh business list a aumna dinga ‘Question hour’ ahilouleh ‘Short discussion hour’ sunga apohdoh ding ahi, tin Dr Noni in aseiyin, ahivanga Dr Ranjan panlahna hi abul a dinga kipatna pha ahi, tin aseibei.

NE MLA hon CAB thu’a Parliament pam’a kiphinna bol

New Delhi, Nov 29: Tuni chun Parliament lentoh ah Northeast akon MLA hon NE gamsung a CAB kichesah ding doudal na in kiphinna anei uvin ahi. Hiche kiphinna achun, Assam Congress MPs, Northeast Congress chule Opposition MPs hon jong pan ala uvin ahi.

MPs lah achun, Assam Congress lamkai Ripun Bora, Abdul Khaleque, Pradyut Bordoloi, Shillong MP Vincent H Pala ho apang uvin ahi. Hetthei khat chu hiche CAB douna jeh in simlai giet kigopkhomna North East Students’ Organisation (NESO) hon jong NE state sung a kiphinna ana bolsau ahitai.

HM in CAB thu a kihouna akou Assam Cong lamkai hon boycott bol

New Delhi, Nov 29 (IANS): Union Home Minister in Citizenship (Amendment) Bill (CAB) thu a New Delhi a jing a dia kihouna akou a hi lunglhai lou vetsahna Assam congress hon panlah lou ding in aphongdoh uvin ahi.

Shah in akou kihoukhomna a hi political party, simlai kiloikhom le civil society lamkai ho jong pang ding ahiuve.

Home Minister in citizenship amendment bill chung chang seikhompi ding a hiche kihouna hi akou ahi.

Hetding chu Northeast Congress MP le Naga People’s Front (NPF) hon Parliament a CAB thu hi nasatah a adoudal ahi.

CAB in Muslim hilou Pakistan, Bangladesh le Afghanistan mi Citizenship Act 1955 dannoi a India a kum 6 chan cheng Hindu, Sikh, Buddhist, Jain, Parsis le Christian ho  India mi a lahlut ding angaito ahi.

Geldoh ding chu CAB hi opposition ho bouseh hilou in Northeast state jousen jong Bangladesh gam mi hon alonkhum ding kichatna jeh a adoudal ahi.

Hiti jeh a 2019 General Election a jong BJP vaihomna pum a Northeast state jousen jong CAB thu hi adoudal u ahi. Hiti jeh a Modi government in Northeast state a gam nei ho bit na ding danthah haplut be ding agonkit ahi. Ahin Manipur Chief Minister N. Biren Singh in October lha a thuso miho toh akimuto pet chun Northeast state a gam nei ho venbit dia centre lamkai hon asei hi lung thengsel a kitahsan ahi e tin ana seiye.

CM Biren in Handloom and Handicrafts Mall masapen hondohna nei

Imphal, Nov 29 (ET): Chief Minister N. Biren Singh in Wangkhei Keithel Ashangbi, Imphal East district a Friday nikhon Handloom and Handicrafts Mall masapen leh Crafts Pillar hondohna aneiyin ahi.

Mall hi Manipur Handloom and Handicrafts Development Corporation (MHHDC) Ltd in abol ahi. Chief Guest a pang N Biren Singh in ahoulimna a handloom and handicraft sector hin gamsung Micro, Small and Medium Enterprise (MSME) toh kisai khantouna dinga pan lentah alah ahi, tin aseiyin chule gamsunga MSME business hop 50 hi numei in abol ahi’in, Micro, Small and Medium Enterprise, India government report dungjuiya India gam a MSME business hop 30 hi numei in abol ahi, ati.

Handloom and handicrafts thil joh nadinga mall kihong hi sector machal sah a pang ding ahi’in, gamdang a kon hung hon adeilhen u thil ho mun khat a akihol thei nau jong hiding ahi, tin aseiyin ahi. Mall hi Handloom market center a semdoh thei hiding ham tia official hon aumna mun avettoh diuvin jong thuhilna aneiyin ahi. Dukan bol hon athil joh uhi gamsung mun chom chom a kisem ‘handloom’ thil ho joh dinga akhel nom uva ahileh state sorkar in loan (soft loan) apeh ding ahi, tin jong aseiyin ahi.

Handloom sector akhantou be cheh nadinga state sorkar in school uniform kikhuina a kimang thil (fabric) hohi gamsung thil a khel nadinga tohgon anei ahi, tin aseiyin, hiche hi gamsunga ponkhui ho sum tong mu cheh nading ahi, ati. Pat lahna a ponkhui hon akilemchang lou tamtah anato jing u ahi’in, tua sorkar in pat ahop bou hilouva amaho a kon a jong achoh ahi, tin aseiyin chule state sorkar in ponkhong tamtah pat ahop pan ahitai, ati.

Manipur Legislative Assembly Speaker Y Khemchand injong ahoulimna a, handloom thil hohi atamjo gamsunga numei hon aman ahi’in, hiche jeh a pasal honjong ahaman thei nading uva MHHDC Ltd in tohgon anei ngai ahi, ati. MHHDC Ltd. Chairman S Rajen guest of honour a apang in, tua sorkar in Handloom and Handicraft sector machal nadinga pan sangtah alahjing ahi, ati.

State Annual budget a dangka crore 5 hi MHHDC Ltd. a dinga kigong ahi’in, kum seh’a kipe dangka crore 1 chunga ahi, tin aseiyin chule athah a hondohna kinei Mall hi ponkhui, khupthem, ponkhong leh acho hon aphatchompi diu akinepna thu aseiyin ahi. Kin gon a Principal Secretary (Textiles, Commerce and Industries) P Vaiphei jong guest of honour a apang in ahi. Imphal East DC Dr Rangitabali Waikhom, Imphal East SP Haobijam Jogeshchandra leh MHHDC Ltd. Managing Director Lamlee Kamei jong apang uvin ahi.

CAB thu a Union Home Minister in kihouna agon na a MPCC hon kouna mulou

Imphal, Nov 29(ET): Manipur State Assembly a Congress legislature hon Citizenship Amendment Bill, 2019 douna a campaign abol jing lai uva CAB thu a Home Minister in kihouna (consultative meet) akou na a Manipur Pradesh Congress Committee ho kouna ape pouvin ahi.

Gamsunga um CSO MANPAC in janni nikho a kihouna dinga North East gam chom chom a um civil society organization ho kouna akipeh vanga keihon kouna kamu pouve, tia aseiyu ahi’in chule meeting hi tuni a umdinga agon u ahi. MPCC president in thuso miho henga Home Minister in CAB thu seikhomna dinga kouna apeh lou thu photchenna aneiyin ahi.

Alangkhat a Assam Congress lamkai ho Home Minister in Friday nikho a meeting a kouna apeh nauva pan loudinga kilolna anei uvin ahi. Citizenship Amendment Bill thu kisei nading ahi’in, CAB douna a Northeast a kon Congress MP holeh Naga People’s Front (NPF) hon Parliament a tu masanga jong kiphinna aneiyu ahi. Home Minister Office in amaho tilouva North East gam a um political party ho, nam chom chom chule civil society organization ho jouse kouna apeh ahi.

Muslim tamna gam Pakistan, Bangladesh leh Afghanistan gam a kon India gam a hung chenglut Muslim hilou hou lhom ho citizenship peh nading thu ahi’in, The Citizenship Act, 1955 semphat dinga kisei ahi’in, bill masa dungjuiya applicant hohi India gam a kum 14 lah a kum 11 achen ngai ahi. Amendment a hi kum 11 a ana kipe hi kum 6 a kisulhom ahi’in, Hindu, Sikh, Buddhist, Jain, Parsi leh Christian hou ho citizenship peh nading ahi.

CAB doudal a hi opposition party ho bou ahipon, Bangladesh gam a kon dan dihlouva hung chenglut atam val in gamsung mi dihtah ho asuhboi ding ahi tia kichatna neiya Northeast gam honjong adoudal ahi, ati. 2019 General Election a Northeast gam atamjo hi BJP ahilouleh NDA in asem ahi’in, amahon jong adei lounau thu aseiyu ahi. Chief Minister N Biren Singh injong October lha a thuso miho akimupi na’a, Centre a lamkai hon Northeast gamkai mi dihtah ho aventup ding ahi tihi tahsanna kaneiye, tia anasei ahi.