COCOMI in kiphinna abolna a MLA AK Mirabai leh MLA...

COCOMI in kiphinna abolna a MLA AK Mirabai leh MLA Govindas in panla; Naga peace talk in Manipur Integrity atohkhah le katohmun akon haina kaneiding ahi tia MLA AK Mirabai in sei

334
0
SHARE

COCOMI in kiphinna abolna a MLA  AK Mirabai leh  MLA Govindas in panla; Naga peace talk in Manipur Integrity atohkhah le katohmun akon haina kaneiding ahi tia MLA  AK Mirabai in sei

Imphal, Nov 10(ET): NSCN-IM leh Centre kah a Final Peace Talk kithulhuhna in Manipur territorial integrity ahin tohkhah a ahileh katohmun kadalhah ding ahi tin Patsoi Assembly Constituency MLA AK Mirabai in phongdoh na aneiyin ahi.

Hetthei khat chu MLA AK Mirabai hi gamsung huhbitna ding a MLA 60 lah a atohmun dalha dia kisei masapen ahi nalaiye. Hiche thuphon in janhi Taobungkhok area a cheng mipiten Peace Talk kithulhuhna chungchang’a MLA nu panmun dohchetna aganei nauva ahin phondoh ahi. Manipur hi akhang akhang’a chi le nam jatchom chom kilungtoh tah’a achenkhom nau gam ahin, hiche hi ahung kisuhkeh a ahile mipite thakhel leh mipite lamkai kahilona jong aumpoi tin anaseiyin ahi. Chule COCOMI tosotna a mipin kijotna abolnaovin jong pan analan ahi.

Manipur territorial integrity huhbitna dia tupet pet’a Manipur Legislative Assembly Special Session toukhomna bol ngai ahi tin Patsoi Assembly Constituency MLA AK Mirabai in Yengkhom Leikai Community Hall a toumun kiphin kibolna ah aseiyin ahi. Toumun kiphinna chu Patsoi Block Congress Committee makaina noiya kibol ahin hiche a chun “Naga solution hin Manipur integrity ahin tohkhah theilou ding ahi”, “Mipi lunghanna dia solution semlou ding ahi”, “Manipur hingsot hen” kiti thucheng hojong atahlang uvin ahi.

MLA Mirabai in aseibena ah Naga Peace Talk hin Manipur gamsung’a akhang akhang’a kilungkhat tah’a hung chengkhom jat le nam hokah’a kinah kiboi ahin sodoh theilou ding ahi ati. Manipur territorial integrity huhbitna dia jochan a pan kalah ding ahi tin aseiyin ijem tia Manipur territorial integrity ahung kitohkhah ngeiya ahile achaina chan’a kadou ding ahi tin MLA Mirabai chun aseiben ahi. Mipite gelkhohna neipum’a State Government in apet pet’a Manipur Legislative Assembly Special Session toukhomna akouva kithulhuhna asem ho Centre athot ding ahi tin jong seiyin ahi. Phat chomkhat jouchun toumun kiphinna a panla hon Yengkhom Leirak Imphal-jiribam lamlen keh langkhat akhah uvin human chain asem uvin chule Teral kailhang chan kijotna jong aneiyuvin ahi.

COCOMI lamkaina noiyin Ningthoikhong Keithel Fambi Ima Lup, Apunba Nupi lup (Anul) Bishnupur, Bishnupur Block Congress Committee, Bishnupur Block Mahila Congress Bishnupur leh Bishnupur Assembly Youth Congress Committee honjong nitin natoh bol louvin Ningthoukhong kailhang ah toumun kiphin abol uvin hiche a chun Bishnupur Assembly Constituency MLA Govindas Konthoujam jong apang’in ahi. Toumun kiphin abol jou uvin Tiddim Road ah kijotna anei uvin Naga Peace Talk hin gamsung ahin tohkhah theilou ding ahi tin kholhang jong asam uvin ahi.  Chule hitobang phat boi laitah a MLA holeh Minister hon atoumun’u bou agelkhoh lou diuvin MLA Govindas Konthoujam in temna aneiyin, Centre gano dia MLA jouse Delhi a kitol ding angai dan jong aseiyin ahi.

Toumun kiphinna a chun COCOMI Co-ordinator Sunil Karam jong apang’in, tuhi mipite thakhat tah’a gamsung integrity huhbitna dia pan lahkhom phat ahitai tin aseiyin ahi. Mipiten jong gamsung kipumkhatna huhbitna dia jochan a pan alah diuvin Ningthoukhong Keithel Phambi Ema lup a President Nungsi temna aneiyin ahi.

Thoubal District, Private Schools Development Council Thoubal noiya um school 43 a kon simlai hon Naga Peace Talk in Manipur gamsung ahin tohkhah louding ngehnan toumun kiphin abol uvin, human chain jong asem uvin ahi. Simlai holeh staff hochu a-school gate mai chieh uva tou’u ahi. Private Schools Development Council a Central Committee in Ananda Purna School ah toukhomna khatjong agong’in hiche a chun gamsung’a um MLA 60 hon Assembly Special Session toukhomna aneiyuva, Naga Peace Talk in gamsung ahin tohkhah louna teidia kithulhuhna asem diuvin Committee member Jyotin Salam in temna aneiyin ijem tia gamsung integrity ahung kitohkhah a ahile Private School Development Council, Thoubal in kimoh vetthim louding chule CSO holeh mipiten kiphinna abol jouseu kitosot ding ahi tin aseiyin ahi.

Alangkhat ah Konthoujam Assembly Constituency hopsung’a cheng mipiten janlhah chun COCOMI kalson tosot vetsahnan Kangmong village area leh akimvel ho ah thaomei choiyin kigin tohgom in kijotna aneiyuvin ahi. Hiche a chun Kangmong a um Meira Paibi Nupi Lup leh veng 9 a kon club honjong pan alauvin ahi.

MLA hon Assembly Special Session toukhomna anei uva chule kithulhuhna dettah alahdiu deisah jal’in janhi chun Khoijuman Apunba Nupi Lup hon Oinam Assembly Constituency MLA chule Manipur Pollution Control Board a Chairman jong hi Laishram Radhakishore, Keinao a chenna inn ana nokhum uvin ahi. Mipite chu National Highway-150 Tiddim Road lang’a kipat MLA pa chenna inn jon’a Manipur integrity huhbitna thucheng sap pum’a ana kijotphei u ahi. MLA pa anaumlou jehchun MLA nominee pa heng’ah memorandum khatjong anapelut uvin chule Police hon phate’a aventup jal uvin deilou thilsoh imacha vang ana umpon ahi.

Chongabi Development & Relife Organisation, Chairel Apunba Meira Paibi Lup, Chairel Apunba Meira Paibi Lup honjong mun chom chom a human chain asem uvin kiphinna abol uvin chule Pangaltabi High school simlai honjong COCOMI kalson tosot vetsahnan Indo Burma Sugnu Road ah Human Chain asem uvin ahi.  Village Development Committee Kanto Sabal, Women Welfare organisation, Leimakhong Chingmang Meira Paibi Lup leh Leimakhong Area Joint Development Committee honjong janhi chun kigin tohgom in kijotna aneiyuvin ahi.

MLA Joykishan in Sangai Festival boycott bol

Imphal, Nov 10(ET): Thangmeiband MLA Khumukcham Joykishan in Manipur Tourism department in agon Manipur Sangai festival boycott bol dinga aseiyin, tu dinmun a golnopna kin kigong hohi chihna ahipoi, tin aseiyin ahi.

Khoyathong a ama inmun a MLA pa in thuso miho akimupi na’a tukum Sangai festival a pang dinga Tourism department in kouna apeh kasan peh tapoi, tin aseiyin ahi. Tu masang chun Tourism department in hitobang festival a dinga kouna eipeh khah lou ahi’in, tukum a kamu hi kidang kasah ahi, tin aseiyin chule gamsung dinmun akhoh laitah a hiche festival a pan ding hi kasan theilou ahi, ati.

Indo-Naga peace talk jeh a gamsung kipunkhomna ake thei nading dinmun aumjeh a COCOMI chule cso chom chom in gamsunga kiphinna agon jing ahi. COCOMI injong tu masanga koiman golnopna kin (entertainment program) ho agon lou diuva temna aneiyu ahi. Tu dimun hi ivet a ahileh Sangai festival a pan ding jong gamsung miho douna a um ahi, tin aseiyin chule festival a pan ding leh panlou ding thu a Assembly segment injong ase apha hetkhenna anei uva akigel lhah diuvin temna aneibe in ahi.

Tua sorkar in Indo-Naga Peace Talk thu a tuchan geiya assembly session kouding agot lou hi vangset umtah ahi, tin aseiyin, political party chom chom leh mipin ngehna anei vanga sorkar in toukhomna akou lou hi centre a lamkai ho akichat jeh u chule sorkar semna dinga kiloikhomna asem u ake ding agin jeh u ahi, ati.

“Tua sorkar in House session kou nathei dinmun anei louva ahileh Indo-Naga thu jeh a gamsung a vangsetna thilsoh alhun le amahon mopohna abon a akipoh diu, keihon ima kasei loudiu ahi. Gamsung huhna dinga party line (dan) kalval a pan lah a, natoh khom ngai ahi”, ati. BJP sorkar hi jousei ahi, tin aseiyin chule BJP hon kitepna lhem aneiho gamsung mihon ahet ahi, ati.

Election rally abol lai uva BJP lamkai Ram Madhav leh Chief Minister N Biren Singh in NPF toh kiloikhom louding ahi, tia asei ahi’in, ahivanga election jouva jong BJP in NPF toh kiloikhomna asem ahi. “BJP in thu dang dang a jouthu asei khoh kasapoi, ahivanga Integrity thu a party in jou seilouding ahi”, ati. BJP lamkai sunga gamsung a hetthei umtah khantou machalna umlou ahi, tin aseibe in ahi.

Centre in hunam a gamsung miho deilouva pan alah a ahileh boina tam cheh cheh ding ahi, tin aseiyin chule Biren lamkaina sorkar in gamsung dinga hangsan tah a pan alah dinga temna aneibe in ahi. Kinel baotamna CAB jong November 18 a kipan ding Parliament session a apohdoh diu tahsan ahi, tin aseiyin chule mipi ding a Parliamentarian li hon a dinmun u aphon diuvin temna aneiyin ahi. MP li hon hiche thu a pan lentah alah ngai ahi, tin aseibe in ahi.

 

UNLF Chairman RK Meghen songkul akon lhadoh ahivang a Manipur hung lou ding

Imphal, Nov 10(ET): Guwahati Central Jail, Kahilipara a janni nilhah lam nidan 5:30 a lhadoh a um United Nation Liberation Front (UNLF) chairman RK Meghen @ Sanayaima chu mipi kinepna bang a jing le Manipur hunglou ding ahitai.

Songkul a ahung potdoh jou a danthem amanchah le achapa le ama chu Guwahati Intelligence Bureau guest house a dia Ministry of Home Affairs palai hon apuidoh pai chu jing le thai le akiseidoh lou munchom khat a puidoh hikit ding ahi. Ajehchu Naga thu seilhap ding kon ahitolhon a Meghen Imphal alhun le a boina sousang thei dia um chu aven na a MHA in mun chombeh a henden agot ahi e tin thulhut kimuchun aseiye.

UNLF Chairman RK Meghen @ Sanayaima hi avel a kiman hilou in aphachom dia henden hijodan in MHA chun aseiye. Geldoh ding chu UNLF luboh Meghan hi Bangladesh Police hon Dhaka khopi a achesa September 27, 2010 nia ana matdoh vang a India thunei hon akimat thu chu lhangphong a November 30, 2010 nia chu ana phondoh bep ahi. India thunei vaihom hon Bangladesh a kon India lut ding agotlai a Bihar East Champaran District hopsung a Meghan chu matdoh a umdan a ana sei ahi.

Hinla BBC news correspondent ana hi Subir Bhaumik in October 13, 2010 nia Meghan kimat thu aphondoh mang cha a UNLF publicity secretary Ksh Yoiheiba in India lung hol na kisa a UNLF luboh asel dan a Sheikh Hasina government themmo channa thu gei ana sodoh ahi. Chomkhat jou a Bihar-Nepal gamgi a matdoh a aum chu NIA hon amudoh uva chu a kon a Assam Police hon ana mat ho toh themmo chang khom a, Home Ministry thupeh dungjui a September 9, 2010 nia pat ama ho chung thu chu NIA hon mo ahin poh pan ahi.

Hetding chu Meghan le atohkhompi mat a um mi 17 ho – T Herojit, S Rakesh, O Samarjit, W Noren, M Sarat, K Jeeten, S Gune, M Ibohal, Ch Bembem Chanu, Landhoni Devi, O Moniton, N Dilip, L Jatishor, M Joy, N Bomi, Y Brajabidhu le A Ibomcha ho se chung a India douna natong a themmo chan hipai ahiuve. Chubanle NIA in phengmai 4000 dimset a Meghan le atohkhompi ho themmo na sutdoh sa akoi chu apehlut kit ahi. Hinla court ngohna ki bolkhum ho photchenna kichehsel aumlou tolhon a UA(P) Act section 16 dannoi a themmo chan thei hilou ding a akhumkha kit ahi.

Songkul hentang themmo chang hon thilchom chom min pan a bail athum vang in bail khatvei jong thum lou in Meghen chu Guwahati Central Jail a um peh a chujongle Manipur a mipi dohna nei dia angeh masa jong akhel deh lou ahi e. Ahin ULFA lamkai Arabinda Rajkhowa vang adin na masa khel a centre toh kihouna nei dia kigong kit ahi.

Geldoh ding chu Guwahati Central Jail homsung a songkul tang ho manchah thei dia library, music school le pahcha lei semdoh nadia pan alah a thilpha ana bol melchihna kipapina aphat lhin lha phabep masang a songkul a kon soldoh a um ahi e. UNLF hi Manipur jalenna tungdoh kit ding a achesa 1964 kum a phudoh a ana umpan ahitai.

Cyclone ‘Bulbul’ jeh’a mi 18 in thina toh; Kimanchah nasatah a suboi

Kolkata, Nov 10: Cyclone ‘Bulbul’ chu Bangladesh lam ano masang tunichun West Bengal tuipang ahopa in mi 18 athilo tan ahi. Go hat tah le hui hat tah kitho chun North le South 24 Parganas le East Midnapore a thingphung le cable gui ja val abo doh a North Parganas bouseh a mi 5 jen in thina ato ahi.

North Parganas Basirhat hopsung Purba Makala kho a kum 70 val tehse Suchitra Mandal chu thingphung lhu in alhuhkhum in chule Gokhna kho a thingphung lhu in Reba Biswas kum 47 jong adel lih e tin senior police officer Suchitra Mandal in aseiye. Chuleh North 24 Parganas a Manirul Gazi kum 59 chu amollem athum channa, electric khom in alhuhkhum a thi ahi e, ati. Chule East Midnapore district a thingphung in mikhat jong alhuhkhum in athi in abanle Saturday nichun go ha juh a thingbah khat in akhehkhum government natong khat jong athi lo in ahi.

Hitia go ha juh jeh in Saturday nichun koima in a kon potdoh thei lou in aum in chule South 24 Parganas, East Midnapore le akinaipi North 24 Parganas a 135 kmph a hat in hui le go anung in, thingphung hui semlhuh ho chun lampi tamtah asuhbing lo tan ahi.  Kolkata Municipal Corporation (KMC), police, fire personnel le NDRF ho makainan lampi thing lhuh den ho chu ahe theng un ahi.

State disaster management minister Javed Khan in lampi thing lhuh den ho gangtah a sutheng ding in thupeh aneitan ahi. Met department in North le South 24 Parganas, East Midnapore le Nadia district a sun nidan 12:30 a pat nidan 6 sung go ju ding in aseikit in ahi.

Go ha juh namun ho adeh a South 24 Parganas hopsung Namkhana le Bakkhali mun ho Chief Minister Mamata Banerjee in huikong a avilding thu tweeter in atahdoh in ahi. State power minister Sovandeb Chattopadhyay in jong mei set na mun jouse gangtah a tundoh ding in thupeh aneitan ahi.

Prime Minister Narendra Modi in centre government in angaichat na jouse a panpina apehding in West Bengal Chief Minister Mamata Banerjee kom a aseipih in ahi.

Cyclone ‘Bulbul’ hunglhung toh lhon a Home Minister in Bengal mite kithopi ding a phondoh na nei

New Delhi , Nov 10: Union Home Minister Amit Shah in tuni in centre in Cylcone Bulbul vetlhah na anei jing toh lhon a West Bengal mite kithopina akipeh jing ding dan phondoh na ana nei in ahi. West Bengal mun a cyclone hung lhun toh lhon in NDRF team 10 lam ana kisol lut tan ahi. Maban a lut ding in NDRF team 18 lam kiging sa in aki koi e tin jong thusoh kimu chun asei in ahi.

Hetthei khat chu Cyclone Bulbul in West Bengal’s South 24 Parganas region a thil tamtah ana suhset ahi tan ahi akiti. Hui hat jeh in thil le lo tamtah ana se in thingphung ho jong ana ki semdoh in ahi akiti. Jingkah lam chun NDRF natong ho in thingphung alhu ho chu ana dop jou lou jeh uvin ana aat keh uvin ahi akiti. Hiche cyclone chun Sunderban beach Danchi forest  jani nilhah lam nidan 8 lam a ana phah ahi. Tu le tu hin hiche huipi chun Bangladesh  lhang ajot in ahi akiti. Hiche huipi chu ahunglhungding nidan 24 sung a um ding ahi nah lai toh lhon in nga man ho koima apot lou ding injong hetsah na ana kinei in ahi.

PREPAK in Nov.12 teng Martyrs’ Day mang ding; Kangleipak hi India noiya umlou ding ahi, tia seiyu

Imphal, Nov. 10(ET): Thingnoi kiloikhomna PREPAK in November nisim 12 nikho teng Martyrs’ Day (Athoubasinggi Ningsing Numit) man dinga kigotna anei tauvin ahi.

PREPAK Publicity and propaganda secretary in-charge Leibaak Ngaakpa Luwang in thuso aneina’a, hiche nikho teng gamsung mihon golnop kin agon loudiuvin temna aneiyin chule aumtalou martyr ho jana apeh diuvin temna anei uvin ahi. Kangleipak hi India political map noiya umlou ding ahi, tin thuso chun aseiyin ahi.

August 14, 1947 kum a British vaipohna a kon Kangleipak in chamlhatna amu jouva Kangleipak hi sovereign country anahi ahi’in, Manipur Constitution Act ana kichepi ahi. India in chamlhatna amu nikhat masanga Kangleipak in chamlhatna amu ahi’in, Kangleipak hi India political map noiya aumden nading ajeh umlou ahi, ati. Thusim thutah ho a kon kihe ahi’in, gam atamjo in hiche hi atosot ahi, ati.

Universal Adult franchise noiya June 11 a kon August 27, 1948 kum sunga Manipur Constitution Act 1947 noiya election hi phase 10 a chelha ahi’in, agom a representative 53 kilhengdoh a chule MK Priyobrata Chief minister hina a akilhengdoh sorkar ana kisemdoh ahi. Manipur Legislative Assembly masapen ‘third session’ a toukhomna alivei channa hi September 28, 1949 kum a Johnstone High School mun a um TC Tiangkham Speaker hina a chelha ahi. Hiche mun hi Manipur Legislative Assembly chamber a ana kimang ahi, ati.

Kihouna a Minister 6 leh member 43 pang ahi’in, hiche toukhomna a Maharaja Bodhachandra in Kangleipak thalheng a India Advisor, Ministry of State Vapal Panguni Menon chule Assam Governor Prakasha toh (India sorkar thalheng) Shillong khopi a September nisim 21, 1949 kum a Merger Agreement soi kaina aneihi akisang poi (invalid) tia phondohna aneiyu ahi. Kangleipak hi Government of India Act 1935, Chapter 1, Section 5(2)(b) toh kitoh louva Indian Union a kilalut ahi, tin thuso chun aseiyin ahi.

Kangleipak hi lamdih lou chule duha a Indian Union a hunam a kilalut ahijeh a vannoiyin Kangleipak atosot ahi, tin asei uvin, alangkhat a India political lamkai hon India gamsung hi hou khat (Hindu gam), dan khat chule pao khat a khel ding agot u ahi, ati. J&K miho phatsahna beiya tukum August nisim 5 nikho a Article 370 akisuhmang hi pan alah u hetthei umtah khat ahi’in, hiche chungchon a J&K gam hi Union Territory ni a akhen u ahi. Tua hi BJP sorkar in North East region atup ahi.

BJP sorkar in Northeast gamkai mi dihtah ho suhmang nadinga Constitution provision jouse chunga pan alah a chule gamkai hi Hindu ho gamkai a akhel tei got ding ahi, tin PREPAK thuso chun ngohna anei uvin ahi. Sorkar in CAB pohdoh tei ding agot ahi’in, Kangleipak dinmun hi sangtah a boi ding ahi, ati. Kipa golnop bol phat ahipon, khahdoh Kangleipak huhna dinga pan lahkhom phat ahi, ati.

PREPAK in November 12 nikho teng Martyrs Day aman ding ahi’in, gamsung mihon ‘revolutionary movement’ sunga ahinkho tohdoh a martyr chang ho jana a mei avah uva pahcha akoi diuvin temna aneibe uvin ahi. Kangleipak sorkar akisem doh kit nadinga kiphinna umho PREPAK leh Red Army in atosot ding ahi, tin thuso chun aseibe in ahi.