CMHT card neikhat in JNIMS a nikhat a Dk.1500 val mangcha theilou;...

CMHT card neikhat in JNIMS a nikhat a Dk.1500 val mangcha theilou; KFT, LFT leh ECHO test bol dinga private clinic a kisol

85
0
SHARE

CMHT card neikhat in JNIMS a nikhat a Dk.1500 val mangcha theilou; KFT, LFT leh ECHO test bol dinga private clinic a kisol

Imphal, Jan 12(ET): Chief Minister N. Biren Singh in gamsung mi anei joulou hon dammona ato teng akijen thei nading uva hondohna anei CMHT (Chief Minister Gi Hakshelgi Tengbang) scheme hi lungchang (heart) natna nei JNIMS hospital a kipolut khat phatah a kijen thei louva hospital a kon discharge ahin bol utoh kilhon a kichepna tobang a kibol dan a aumin ahi.

CMHT card anei vanga nikhat a dangka 1500 bou kimang thei ahi, tia aseipeh uva chule adamlou nu hinkho huhdoh nathei lou hi CMHT noiya akipe theipon, dangka 5000 vel man ahi, atipeh u ahi. Hiche chungchon a akivetsah doctor in Kidney Function Test (KFT), Liver Function Test (LFT) leh ECHO test panna a test dang tamtah hi private clinic hi a Babina Diagnostic Centre a akilah dinga aseipeh ahi.

Chief Minister Biren leh Health Minister L Jayantakumar in JNIMS doctor hon apeh ho panna a test bol ding ho abon a hospital a aumin, manbeiya muthei ahi, tia avel vel a aseilhon ahi. L Ronibala kiti adamlou nu in tua hi akijen jou nadinga kinepna nei talouva um ahi.

JNIMS hospital a achesa December nisim 24 nikho a Dr Rajendro noiya kalut ahi’in, hiche a kon hospital a kaum’a, doctor pa in test chom chom Babina Diagnostic Centre a kabol dinga eihil ahi, tin Ronibala in thuso miho henga aseiyin ahi. Ronibala leh a insung mite hi niseh a nehding kihol hiu ahi’in, JNIMS a man beiya test kibolna thei facility ho hoiya um ham, tin ama leh a insung miten thudoh anei uvin ahi.

Test result dungjuiya Dr Rajendra in dangka 5000 vel man hi a Albumin lou akikap dinga asei ahi. Ronibala in CMHT card aneijeh, sorkar phatna vanga kijen jou dinga ana kigel ahi’in, ahivanga CMHT kichepina JNIMS official hon Albumin lou kapeh theilou diu nahi, ajeh chu CMHT card in ahop poi, atipeh uva chule nikhat a dangka 1500 chan bou manbei hiding, adang ho amahon akipohdoh diuva aseipeh u ahi.

Government thuso dungjuiya CMHT scheme a hi damlou khat kum khat a dangka lakh ni chan manbeiya kijen thei ahi. Akipe hospital ho a CMHT- Manipur Health card akivetsah a ahileh damlou ho sum pe louva dangka lakh ni chan (cashless treatment) kijen theidiu ahi, tia jong sorkar in asei ahi. JNIMS hi government hospital ahi’in, Ronibala hospital a akipohlut December nisim 24 nikho a kon CMHT scheme noiya dangka lakh khat jong asuhmang loulai ahi.

West Bengal panna a India pumpi a CAA kichepi ding koiman adou theilou ding ahi: Mukhtar Abbas Naqvi

New Delhi, Jan 12: Union Minister leh senior BJP lamkai Mukhtar Abbas Naqvi in Sunday nikhon Parliament in aphatsah Citizenship Amendment Law, 2019 hi West Bengal gam panna a India gam pumpi a kichepi ding ahi, tin avel in aseikit in ahi.

“CAA hi Parliament in aphatsah ahitan, hiche jeh a gamsung pumpi a kichepi ding ahi. West Bengal gam hi India gam hopsung ahijeh a agam a jong kichepi ding ahi”, tin Naqvi in thuso miho henga aseiyin ahi. West Bengal Chief Minister leh Trinamool Congress lamkai Mamata Banerjee demna thu aseiyin, “Mamata in thusim chule Constitution sim hen”, ati.

Mamata in West Bengal gam a CAA chule NRC kichepi louding ahi, tia Prime Minister Narendra Modi henga kicheh tah a aseiya chule kinel baotamna Law alahdoh dinga temna anei nikhat jouva Naqvi in hiche thu asei ahi. Kolkata khopi a Mamata in PM akimupi na’a, Citizenship Amendment Act avel gel phat a chule alahdoh dinga asei ahi.

“Hiche hi aseiphat hilou ding ahi, tia kasei ahi. Ahivanga CAA leh NPR douna a kiphinna kabol u ahi’in, gamsung mi bungkhen na kinei hi kadoudal uve, tia kasei ahi. CAA gelpha uvin lang, lungset tah in ladoh uvin. Amanjong program akigong sa a pang dinga kahung ahi’in, hiche thu hi ol a Delhi a seithei ahi, ati ahi”, tia Mamata in Raj Bhavan pam a thuso miho henga asei ahi.

PM Modi toh akimuto jouva TMC student wing hon Kolkata khopi a CAA douna a toumun kiphinna abol nauva Mamata in pan alah ahi. “CAA hi lekha a bou hiding, kichepi louhel ding ahi. Kaphal loudiu ahi”, ati. Centre a Modi lamkaina sorkar demna sangtah nei khat ahi’in, CAA nasatah a adoudal a chule Act hi West Bengal gam a kichepi louding ahi, ti changeiya phondohna anei ahi.

Gamsunga CAA douna a kiphinna tamtah um’a, amatah injong atosot ahi. PM Modi akimupi jouva Raj Bhawan a kon metre 200 tobanga gamlha mun a Trinamool Chhatra Parishad in CAA leh NRC douna a toumun kiphinna abol nauva Banerjee in pan alah pai ahi.

Alangkhat a Union Home Minister Amit Shah in, CAA thu a opposition hon jouthu aseithang u ahi, tin ngohna aneiyin chule hiche thu a Rahul Gandhi toh ‘open debate’ bol dinga chouna jong aneiyin ahi. CAA hi koima citizenship kilahpeh nading hilouva kipeh nading joh ahi, tin Shah in aseiyin chule BJP worker hon athu hilna dinga campaign abol jing laise a opposition ho jouthu sei hi che sot louding ahi, tin aseibe in ahi.

Prime Minister Narendra Modi vaipohna sorkar apachatna thu jong aseiyin, Modi lamkai sunga India gam a imalam jouse a khantouna um ahi, ati. Modi in gamsung miho akijahmatpi jing jeh a mipin atahsan ahi, tin aseibe in ahi.

CPI lamkai Sotinkumar kilhadoh nadinga Governor in pan alah dinga AIWWF in temna nei

Imphal, Jan 12(ET): All India Working Womam Forum Manipur in Laishram Sotinkumar kimat na leh alunggel kisuhgimna thu toh kisaiya Governor Dr Najma Heptulla in pan alah dinga kouna aneiyin ahi.

Laishram Sotinkumar hi Communist Party of India (CPI), Manipur State Council a secretary ahi’in, India gam a dinga political party luipen khat ahi’in, Parliament House ani a parliamentarian anei ahi. CPI panna a Left party hon Citizenship Amendment Act (CAA), 2019 nasatah a adoudal u ahi. Gamsunga dinga party secretary ahijeh a sorkar in atup jing ahi.

Achesa December nisim 15 ni a police ho a inmun a che uva, in a aumlou pet ahijeh a achapa henga Porompat police station a report abol dinga aseiyu ahi. December 16 nikho a police ho chekit uva, police station a report abol dinga aseikit u ahi. December 18 jankim a police team ho a inmun bang a kaldoh uva, ima sei louva insung mi pumpi lunghanna ding abol u ahi.

Achesa December nisim 19 nikho a CPI panna a Left party jousen CAA 2019 douna a India gam pumpi a ‘general strike’ akouvu ahi’in, hiche toh kisaiya CPI Manipur State Council leh Left party dang dang hon Irawat Bhavan a press conference akou uva, mipin atosot diuva kouna aneiyu ahi.

December nisim 20 ni a Sotinkumar party office a aumna’a, Irawat Bhavan a kon City police station a team hon ajeh umlouva apuidoh uva, ‘arrest warrant’ pe louva amat u ahi. Imphal police station a akoi uva, chomkhat jouva City Police station a FIR No 117(12)2019 toh kisaiya kiman ahi, tia police hon ahetsah u ahi.

December 21 ni a Chief Judicial Magistrate (CJM) Imphal West a apui uva, CJM Imphal West in bail apeh ahi. Ahivanga, court mun ma ma a police hon SP, Imphal West in nakihoupi nom’e, tia asei uva amat pai kit u ahi. SP, Imphal West Office a pui louva Nambol police station a joh apuiyu ahi. Ahivanga Nambol police station a hi ama douna a hehna kisem aumpoi, tia police ho thusei ajah ahi.

Nambol police station a akihen thei nadinga case jihlut dinga police hon tohgon anei uva akihounau ajah thu asei ahi. Hiche jouva FIR No. 87(12)2019 NBL-PS uls 143/124-A/186/506/426/34 1PC ahetsah uva, soi akaisah u ahi.

Sotinkumar in Court of Judicial Magistrate First Class, Bishnupur a bail a alha diu ngehna a Carlit Misc. Case No. 193 of 2019 Ref: 87(12)2019 NBL-PS u/s 143/124-A/186/506/426/34 IPC apehlut ahi. Police hon ngohna eisemkhum u thu kahe phapon, chule kal, thin natna, BP nei leh diabetes chule natna dang dang nei kahi’in, lou a kingam kahi, tia asei ahi. Ahivanga court in ni 14 jail a umdinga thulhuhna aneiya, chule thukholna aumsunga phatah a akijen ding jong phalna apeh u ahi.

Sotinkumar douna a FIR ni um nalai ahi. Porompat police injong FIR No. 375(12)2019 PRT-PS u/leO-B/188/426/506, 7(1)(a) Cril Law Amendment Act, 1932 leh 3 PDl’P Act ajihlut a ahi. Porompat police station leh Lilong police station a FIR ni jouthu a akijihkhum pe ding hi Sotinkumar in tahsanna anei ahi. Left party hon strike abol sunga thilse soh umlou chule boina umlouva CAA douna a kiphinna chelha ahi.

Hiche jeh a abol lou thil bol’a kingoh a kiman ahi’in, thusei nadinga tha anei kisuhthip pehna ahi, tin asei uvin chule aganna thei pen a akilhadoh nadinga Governor in pan alah dinga temna aneibe uvin ahi.

Thinglhang gam’a khantou machal natoh kibol lou jeh’a tuchan’a khangtou joulou ahi: MLA Leishiyo Keishing

Kamjong, Jan 12 (ET): Kamjong District hopsung Loushing kho mun’a janni (Jan. 11) Khukok Student Union 2nd General Conference cum Literary Cultural & Sport meet ahung lhung ding Jan. nisim 17 chan chelha ding kingon kiman naphatsung’a Phungyar Assembly Constituency MLA Leishiyo Keishing in aseina’a phai sang’a thinglhang gam alet joh vang in thinglhang gam ho’a khantou machal natoh ho ahi ding bang in achelha theipon ahi. Chuleh phaicham toh thakhat’a khantou khom theina ding’a thinglhan gam’a bolthei thei bol phat ahitai ati. Aman aseinbe na’a thinglhang gam’a cheng khangdong hohin kichep golseh lampang’a hatah’a akhohsah leu kikhangtou ding ahi tinjong aseibei.

Hetthei khat chu hiche General Conference hi kum 10 jouva hung kibol ahin chuleh hiche phatsung’a hi gamsung pumpi khantou machalna ding’a pan lah ding dan seikhom na ding’a kigong ahi tin Khukok Student Union a General Secretary  Amung Keishing chun aseiyin ahi. Kingon achun ADC member holeh kho haosa hon jong pan anala uvin ahi.

Police hon Khuga Dam kimvel a khamnathei kholchil nanei

CCpur, Jan 12 (ET): Khuga Dam a thina toh atam jing toh lhon in tunin Police hon Khuga Dam jui lamlen dung’a gari lhai le ho kholchil na anei uvin chuleh kholchil na kinei phatsung’a khamnathei kimudoh ho mipi ho masang’a anasuse uvin ahi.

Hetthei khat chu hiche kholchil na kinei na ajeh hi Khuga Dam mun’a kihuilha’a che khangthah atamjo in khamnathei bol pum’a gari tol ahilou leh kisel jeh’a thina chan toh khangthah atamtah jeh’a hiche akon kivendoh thei nading deisah najal’a hiche kholchil nahi abol’u ahi.

Indian Army hon NSCN-IM kisel na bulu; Manchah phabep jong mandoh

Imphal, Jan 12(ET): Indian Army in Tamenglong district sung a um Nungkhao kho a NSCN-IM kisel na mun khat ana bulu uvin ahi.

NSCN-IM ho in kisel na mun anei uve ti thuguh kiimu dungjui a Army in alhang sung a operation ana bol na uva akisel na mun u chu ana mudoh u ahi. Thuso kimu dungjui in army in IM ho kisel na mun chu aga mudoh utoh lhon in galguh bol ho chu ajaam mang uvin aman chah u phabep adalha uvin ahi akiti.

Akidalha gal manchah ho chu meichang phabep, G-3 rifle khat, US a kisem carbine khat, gamsung a kisem carbine khat, 9mm pistol khat le 22mm pistol khat ahi akiti. Akimandoh gal manchah ho chu police ang a pehlut na ana kinei tan ahi.

ABSU leh Assam Minister Pramila Rani in NDFB-S faction ho chamna thu seikhompi ding a lemna nei

Kokrajhar, Jan 12: National media thuso khat in NDFB-S faction a member 50 hon Myanmar gamsung hindalha a India gamsung ahung lut utoh lhon in All Bodo Students’ Union (ABSU) chule Assam social welfare minister Pramila Rani Brahman in NDFB (NDFB-S) faction ho toh akikah uva chamna aumthei nading a holimkhom ding in lemnathu aphong uvin ahi.

Intelligence thuso khat in aseina achun Myanmar akon akipuidoh natoh hi Union Home Ministry mopohna nanoiya kibol ahi in hiche faction a lamkai ho chu Delhi a chamna thu seikhompi ding a kipuipai ding ahi ati.

Kokrajhar a um Bodofo House Bagansali a ABSU general secretary Lawrence Islary in thuso miho heng a aseina achun India government in hiche tobang anatoh hi kipapi aum in NDFB-S ho agam sung uva ahin puilut kit uva kichamna thu aseikhompi kit diu hi thil phattah ahi in chule ABSU honjong hiche natoh hi akilem in chule Bodo ho boina jong hi suhlhap peh ding in jong asei in ahi.

Bodoland People’s Front a senior lamkai khat jong hi, Assam Minister Pramila Rani Brahma, aman aseina achun centre in NDFB-S ho ahin puilut kit uhi akilem in phat sottah galmanchah pansa a athiltup uh ana deljing uchu tua hi kihouchampi ding a akoulut kit uhim gamsung ahiloule society sung a jong khantou machalna umding ahitan chule Bodoland Territorial Council a lamkai ho panhat najal a ahung lutkit thei uh akipapi thu aphong in ahi. Chule tule tua Centre toh chamna thu a kihou theilou lai United Liberation Front of Asom Independent (ULFA-I) chule Kamatapur Liberation Organization (KLO) hon jong lung agel ding uvin adeisah thu aphong in ahi.

India sorkar in ‘Naga solution’ khat bou apehding ahi: Patton

Dimapur, January 11: Nagaland Deputy Chief Minister, Y Patton in Naga thu aganna thei pen a akiseilhah a, lampi khat akisemdoh theina dinga India sorkar toh kihouna akisem na’a NSCN-IM chule Naga National Political Groups (NNPGs) sagi in pan alahkhom nadinga civil society hon pan alah diuvin kouna aneiyin ahi.

India sorkar in athu suhlhapna khat (solution khat) bou apeh ding ahi, tin Lotha Hoho Dimapur a Sunday nikho a General Meeting cum-Induction of New Office Bearers (2020-2022) kin abol nauva aseiyin ahi. Government project atamjo hi gam leiset thu a khongai a atamjo ahi, tin vangset um asahna thu aseiyin, sorkar in fund abol project ho akimu theina dinga mipi chule lamkai hon sorkar atosot diuvin temna aneiyin ahi.

Dimapur khopi a khonung teng Lotha Tokhu Emong host bol ding anopna thu Patton in aseiyin chule LHD ho gari thah peh dinga kitepna aneiyin ahi. LHD worker hon kitah tah a society phatchomna dinga na atoh diuvin temna aneibe in ahi.

2020-2022 kum sunga LHD lamkai dinga YL Jami (retd) IAS leh office bearer team thah ho lahlutna anei uvin ahi.  LHD chairman panmun lha dinga Etsungmomo Kikon in liemna thu aseiya chule LHT team thah ho dinga LBCD Sr. Pastor Rev, Zanao Moshui in taopehna aneiyin ahi.

JNU kibuluna thilsoh hi VC pa lhoh akon nakitong ahi, tia Congress in ngohna nei

New Delhi, Jan 12: Congress sung a kholchil na nei phabep akon thuso kimu dungjui in JNU boina chu Vice Chancellor M Jagadesh Kumar makai na noi ahi akiti. Hiche toh kisai in party in VC pa chung a kholchilna kibol dingin jong hetsah na ahin nei uvin ahi.

Kholchilna nei lah a pang Sushmita Dev in thuphon anei na a JNU kibulu na chu state sponsored ahi toh lhon a phate cha a university a natong ho  chung a suhboi na bei hel a kholchil na akinei na ding in hetsah na ana nei in ahi. Hetthei khat chu Congress in mi 4 jaona committee JNU kibulu na kholchil na nei ding a ana semdoh u ahi. Mahila Congress chief in thuso miho toh akihou limna a JNU VC pa chung a kholchil na nei angaidan le university sung a security pe company contract lahdoh ding chuleh university a natong bulu na hung nei ho toh kihou toh ho kholdoh ding angai dan tahlang na ana nei in ahi.

Sushmita Dev in asei na a VC pa in achesa 2016 kum  a panmun ahin lo akon in university a natong ho ama lung lhai na ho bou promotion ape in chuleh right wing natong nalam a lung lut na nei ho boutoh natoh khomna anei in ahi ati. Campus sung a boina semna ding a atoh khom pi ama tosot hotoh natoh na anei dan jong Dev in tahlang na ana nei in ahi. JNU campus sung boina na chu govt tosot na ahi aki hechen in hinlah thudoh thupi pen chu kivai poh na le Delhi police in kibulu na suhtang na ding uva ipi abol uvem ti chu ahi ati. Dev in JNU hostel fee man kikal sah jong akin thei pen a aki thah suhnem ding in hetsah na ana nei in ahi.

Hiche kholchil na kinei na chung a hoilang lampang  akon vetlhah na akinei jong le right wing ho natoh ahi aki hetdoh dan tahlang na ananei toh lhon in bulu ding a hung kon ho in right wing simlai ho ima alo loudan u jong hetsah na ahin nei in ahi.   Police in hiche kibulu na chung a phate cha a vangset na toh ho akimu a athu hoitah ahet jeng vang uva ima abol lou na u thu asei toh lhon in kholchil na kinei jong adih lam amano lou ding hetsah ahi danjong Dev in ana sei in ahi.  Hiche kholchilna nei committee a pang adang ho chu Hibi Eden, MP le NSUI president lui; Syed Naseer Hussain, MP le JNU NSUI president lui chuleh Amrita Dhawan, NSUI president lui le DUSU president lui ahiuvin ahi.

Citizens thah kipe ho gamsung a kiumsah lou ding ahi tia Tripura a CAA doudal na a kiphinna nei hon phondoh na neiyu

Agartala, Jan 12: Tripura Pradesh Congress Committee president le leng te insung mi Pradyot Kishore Manikya Deb Burman in CAA noi a citizenship kipe ho gamsung a aki umsah lou ding dan phondon na ana nei in ahi.

Progressive Regional Alliance (TIPRA) phutdoh a pang Burman in Khumulwng mun a kiphinna nei mipi ho ang a hou limna anei na a gamsung a mi thah gampam akon hung ho um na ding a on tah loud an jong ana sei in ahi. CAA noi ahi gampam akon hung mi tamtah citizenship kipe ding ahin hinlah  Tripura gamsung a koima um thei lou ding ahi tin ana sei in ahi.

Burman in mipi ho ang a national political party ho koima in tosot na anei lou na ding in jong temna ananei in ahi. Political party phabep in gamsung mi ho le Bengali ho kikah a kinah bou tam um na ding a panlah na anei jing dan u jong tahlang na ana nei in ahi.

Eiho hi agammi dihtah ihiu vin eihon Bengali hotoh kiboi na esem lou diu hinlah political party ho chung a elung haan na u evetsah ding u ahi ati. Hetthei khat chu  Deb Barman a pu Bir Bikram Kishore Manikya Bahadur chu Tripura leng achaina pen anahi ahi.