CM in school 5 a ‘School Fagathansi’ mission hondohna nei, Mission a...

CM in school 5 a ‘School Fagathansi’ mission hondohna nei, Mission a dinga fund alhinga Budget a kisem ahi, tia sei

248
0
SHARE

CM in school 5 a ‘School Fagathansi’ mission hondohna nei, Mission a dinga fund alhinga Budget a kisem ahi, tia sei

Imphal, Feb 12 (ET): Chief Minister N. Biren Singh in government school chom chom mun 5 a tunin state sorkar in abol ‘School Fagathansi Mission’ official tah a hondohna anei tan ahi.

Mission hi kum masa January 18 ni a launch kibol ahi’in, tukhang toh kitoh manchah ho government school a koiya semhoi nading bidoi ahi. Mission first phase a Assembly constituency 60 a kon government school khat cheh hi ‘model school’ a upgrade bol dinga alhendoh u ahi.

Tuni a Mission hondohna aneiyu school ho hi- Moirangpurel High School leh Heingang High School, Imphal East district, Singjamei Chingamakha High School, Praja High School, Lamshang leh S.K. Ideal High School, Ngairangbam, Imphal West District ahi. Chief Minister in vengsung miho umna a mission hondohna anei jouva school ho khat khat a vilna aneiyin ahi.

Ahivanga kingon pipen hi SK Ideal High School, Ngairangbam mun a CM Biren chief guest hina a aman u ahi. MLA Y Khemchand, Forest and Environment Minister Th Shyamkumar, Education Minister Th Radheshyam, Deputy Speaker K Robindro, State Planning Board Deputy Chairman S Rajen, Tourism Corporation of Manipur Ltd. Chairman Dr S Ranjan leh MLA Md Abdul Nasir, L Rameshwor chule Th Satyabrata jong apang uvin ahi.

Mission noiya kum masa August 17 ni a Chief Minister in Chief Minister’s Secretariat mun a ‘foundation stone’ tundohna anei ahi. CM Biren in ahoulimna School Fagathansi Mission a dinga fund alhing a state budget a kipansah ahitai, tin aseiyin ahi. Revised Estimate (RE) a dangka crore 43 chule Budget Estimate a dangka crore 25 kisem ahi, ati. Mission akipat toh kilhon a government school a simlai enroll kibol hatah a kal ahi, tin CM in aseiyin chule mission noiya Kasom leh Chandel a um school ni hondohna umvah ding ahitai, ati.

Mission noiya um school ho a machalna hetna dinga lhaseh a review meeting umding ahi, ati. Phase masa a constituency 60 a school khat cheh inaugurate akibol jouteng aban phase a dinga school 60 kilheng kit ding ahi. CM in ahoulimna a chapang ho mopohna nei gamsung mi khat a semdoh nading chule tohmun  hol bou hilouva tohmun sem ahithei nading uva education pattern khel angaian thu jong aseiyin ahi.

Manipur StartUp scheme noiya lekhathem khangthah tamtah entrepreneur lolhingtah a kisemdoh ahi. Tua sorkar in gamsung miho ding agelkhoh ahi’in, CMHT noiya sorkar in mi lakh 6.70 vel CMHT card ahop peh’a chule ‘Lairik Tamhanlasi’ scheme noiya lekha sim lhunglou simlai 14,000 athah a school chom chom a amin kikhum kit ahi, ati. Chule gamsung mihon sorkar atosot jeh uvin kipathu jong aseiyin ahi.

Education Minister Th Radheshyam in ahoulimna a mission lolhingtah ahitei ding thu aseiyin chule sorkar in gelkhohna neitah, lungtup kicheh chule government school ho a kikhelna pohlut ding deisah tah a agondoh ahi, ati. Jilkung hon simlai ho marks muding bou hilouva mopohna nei gamsung mi ahinom nadiu agelkhoh diu adeisah na thu aseiyin ahi.

Moirangpurel High School a School Fagathansi Mission hondoh ahitoh kilhon a vengsung miho lunggel bulhit ahitai, tin Th Shyamkumar in aseiyin chule Chief Minister lungtup jeh a government school ho semphat nading lampi kisem ahi, ati. Gamsunga ‘law and order’ aphat tou jeh a jong school jilkung leh staff ho dinga lamlhahna nom ahi, tin aseiyin chule CM lamkaina sorkar in sector jouse a machalna aumding hi akhohsah ahi, ati. Chief Minister leh Education Department in Moirangpurel High School a kon School Fagathansi Mission hondohna aneijeh a akipana thu jong aseibe in ahi.

Kin gon a Commissioner (Education) T Ranjit leh Director (Education) Th Kirankumar jong apang in ahi.

 

Lha ni sunga vangsetna toh chapang compensation pehdoh ding hi kum ni aval nunga jong kipe loulai ahi: MACR

Imphal, Feb 12(ET): Manipur Alliance for Child Righst (MACR) in hunam a kisuse vangsetna toh ho, adeh a chapang vangsetna toh ho compensation kipe louhi gamsung dan government authority hon apalkeh na thu sangtah ahi, tin asei uvin ahi.

Manipur Press Club mun a MACR Core Member Keisham Pradipkumar leh State Convenor Montu Ahanthem in thuso miho akihoupi na’a, achesa December 2015 kum a hunam a kisuse a kithat kum 4 bou hinalai numei chapang nu a insung miten August 1, 2018 ni a court in compensation peh dinga recommendation aphondoh nung tuchan a compensation amu loulai ahi, tin aseiyin ahi.

The Manipur Victim Compensation Scheme, 2018 section 9(a) a hi ‘claim’ kibol verify akibol jouteng District Legal Services authority in court in recommendation apeh ahilouleh vangsetna toh ho a kon application amu ni a kon lha ni sunga thukholna aneiya compensation apeh dinga kisei ahi. Section 9(a) hi hiche case a bou hilouva case adang dang a jong kijui lou ahi, tin State coordinator Montu Ahanthem in aseibe in ahi.

Vangsetna toh ho compensation aphatcha akipeh lou hi alunggel kisuhgimpeh na ahi, ati. ‘Beti Bachao Beti Padhao’ hi national flagship programme lentah a akimu vanga gamsunga numei chapang ho dinga lungmonna aumpoi, ajeh chu school, boarding, community sunga numei chapang chunga Child Sexual Assault (CSA) case umjing ahi, tin MACR Core member Keisham Pradip in aseiyin ahi.

Achesa 2013 leh 2019 kum sunga kum khat a alhangpi a Manipur gam a Child Sexual Assault (CSA) case 78 vel report kibol a chule India gom a January 1, 2019 a kon June 30, 2019 kikah lha gup sunga National Crime Records Bureau dungjuiya rape case agom a 24,212 register kibol ahi.

Numei leh chapang chunga thilse kibolna case 1.66 lakh hi pending a um ahi’in, case ho gangtah a seilhah ahina dinga Supreme Court in Novemebr 13, 2019 kum a agom a Fast Track Special Courts (FTSCs) 1,023 semdoh dinga thuhilna anei ahi’in, hiche lah a court 389 hi Protection of Children from Sexual Offences (POCSO) Act noiya case kijihlut ho seina ding ahi.

Chule Criminal Amendment (Law) Act, 2018 in rape case a kihehna hi charge sheet akisem a kon lha ni sunga jo tei dinga asei ahi’in, police hon lha ni sunga thukholna ajo tei diuva jong kisei ahi. Ahivanga Manipur a alhangpi a CSA case hohi kum thum val court a ‘pending’ a um tei ahi. Phat sottah athu akisei jeh a thilse a kon sohcha ho leh a insung mite hon lungthim leh tahsa a cholna sangtah ato ahi, tin Montu Ahanthem in aseiyin ahi.

District jouse a POCSO Case ho thu seina ding Fast Track Special Courts semdoh ding, CSA case ho dan dungjuiya akipe phat sunga seilhah ding, chapang lungmonna thei mun sem ding, court in peh dinga asei compensation ho vaigei louva Manipur Victim Compensation Scheme, 2018 toh kitoh a pehdoh ding, police ho special training peh ding, Sexual Assault case ho gangtah a seilhah dinga MACR in thumna anei uvin ahi.

Hiche tilouva POCSO Court a chapang lungmonna thei court room sem ding, CSA case a vangsetna toh ho compensation peh nading fund lhing peh ding, gamsunga um khosung jouse a Village Level Child Protection Committees (VLCPCs) semdoh ding, Child Sexual Assault Case ho venna ding leh phatah a donbutna neiding, Child sum a kijoh, chapang khamnathei bol, school kai lhung lou case chule chapang huhna ding ho thu gelkhoh dinga jong thumna aneibe uvin ahi.

 

Washima thina toh kisaiya themmo kichan khat Sajiwa Jail a athisa kimu; JAC in bandh kou

Imphal, Feb 12(ET): Yairipok Tulihal Mayai Leikai akon Janamuddin chanu Khullakpam Washima (18) that a kingoh chuleh tulai tah a trial aum khat tujingkah chun Sajiwa Jail athisan akimun ahi. Songkul sung’a athisa kimu pa chu Lilong akon Md Sheikh Waris (24) ahin amapa hi tujingkah khovah masang’a Sajiwa Jail sector number 7 toilet sung’a amachang’a ana kikhailih ahi tin thulhut in aseiyin ahi. Thina toh insung miten ginmona lentah aneiyuvin ahi.

Khullakpam Washima chu achesa January 28 jingkah a Kakching district, Mayang Imphal police noi Irong Salam, fish farm a athisa kimudoh ahi.

Sheik chu window bar a towel a ana kikhailih dan’in aum’in ahinlah akeng in tol achonpha in ahi. Akhot amalang’a kikanpeh ahin, ginmo umtah in amit ah towel hal (piece) amuvin, min atha hitei ding’in ginmona sangtah aneiyuvin ahi. Sheik upa Habibulla in aseina ah Sheik chu achesa January nisim 31 nikho’a numei chapang nu kithana toh kisaiya tahsan tah’a SP Imphal West Police khut a anakipelut ahin chule February nisim 10 a Court a anakidin sah ahin chujouva Sajiwa Jail lang’a nikho 15 Judicial custody a umdia ana kipophei ahi ati. Mikhat chu akhut leh akam kikan pum’a achangseh’a iti kikhailih thei mong mong dingham tin Habibulla in thudoh abol’in chuleh Government in hiche chungchang’a thudih ahin kholdoh ding’in ngehna jong aneiyin ahi.

Hiche thina thutoh kisaiyin JAC in Asian Highway 1 (NH-102) Imphal-Moreh lampi a nidan 24 bandh bol ding in phondohna anei tan ahi.

JAC hi Wednesday jiingkah a Md Sheikh Waris Sajiwa Jail a athisa akimudohna thu’a Public meeting kibolna a kisemdoh ahin ijemtia government in thumna ho asuhbulhit louleh February 14 nilhah nidan 6 akon February 15 nilhah nidan 6 chan National Highway 102 a band bol ding’a thuphon jong abol pai ahi.

Geldoh theikhat chu achesa January nisim 28 nikho Mayang Imphal Police Station hopsung Irong Chesaba Kangjeibung Lampak kom a athisa a anakimu numei chapangnu kithana toh kisaiya Yairipok police hon Changamdabi Makha Leikha a aum talou Ayub Khan chapa Md Sahid (31) jong amat uva athu kholchilna jong anei laitah u ahi.

KCP-MC/Progressive in Lamjingba Group ‘ban’ bol; ngohna ho bu le bal neilou ahi tia Lamjingba Cab in sei

Imphal, Feb 12 (ET): Kangleipak Communist Party, Military Council. Progressive (KCP-MC/Progressive) in thuso abolna achun Lamjingba Group in anatoh jouse ah KCP in ban abolthu aphongdoh uvin ngohna abolkhum nauva chun Lamjingba cab service in mipi ho heng ah sum alah ding val uh alauvin chule TOM Cable Network jong akisuhlou thu asei in chule Lamjingba Group a Chairman Sansam Jaky in KCP ni 7 sung a akijahmat pi ding in jong thuphon aneikhum uvin ahi.

Alangkhat ah Lamjingba Cab service in KCP-MC (Progressive) hon a ngohnau donbutna abol nauva chun cab service in passenger ho akon aval in sum akila pon chule hiche chungthu a ngohna kibol hi bule bal neilou ahi ati. Cab service in Lamjingba group bahkai khat ahi. Manipur Press club a Lamjingba Cab Service a Head of Department, Pebam Sana Singh in thuso miho heng a aseina achun hiche gari touman aval a kila chung a ngohna eiki semkhum hi adihlou hel ahi ati.

Aseibena achun  tuni chan in Lamjingba cab service in aval in sum akilakha pon, aphatcha in update akibol jing in hiche tobang a ngohna dihlou hi cab service natong ho chung a bolkhum ding ahipoi ati.

TOM Cable service provider jong Lamjingba Group company in mopohna alah ding in asei in hinlah anatoh ding uh panlou hel a delaying tactics abol jeh un company in akintheipen a sum deposit kibol ho nungledoh kitding in jong thulhut chun asei in ahi.

 

April ahilouleh May lha a ADC election bol dinga ATRPFM in ngehna nei kit

Imphal, Feb 12(ET): Ahung lhung ding April ahilouleh May lha sunga ADC election bol ding thumna a ATRPFM in Manipur Governor, Chief Minister, Chairman, Hill Areas Committee (HAC), Manipur, TA& Hills Minister chule Principal Secretary, Chief Election Officer, Manipur henga lekhathot ape uvin ahi.

Hill Areas Committee (HAC) Manipur Legislative Assembly, Secretariat in achesa January nisim 16 ni a meeting anei nauva akisei ADC election hi November lha a bol dinga kilolna anei uva chule state sorkar leh Chief Election Officer henga recommendation apeh ahi. November lha hi chang lhun phat chule thinglhang miho dinga changvoh leh golnop phat ahijeh a election bol nadinga aphat akilempon, chule Christmas toh kinai ahi. Hiche jeh a voter hon phat onlou pet tah a election a pan ding hahsa asah diu ahi, tin Joseph Rongmei, President, ATRPFM in thuso aneina a aseiyin ahi.

Sorkar masa noiya election hi chuh lai hihen lang itih phat hijong leh ‘term’ kichai teng hilou ahi, ati. November lha hi ADC election bol nadinga adeh a thinglhang miho dinga aphat akilemchang poi, ajeh chu loubol miho boi laitah ahi. Hiche jeh a vote pe ding lhomding ahi’in hiche hi thinglhang miho vote peh nading tha kilahpeh na tobang ahi, ati.

Panchayati election a Party less Election kichepi ahi’in ahivanga Municipal Council Election leh ADC Election a hilou ahi. Party less system hi ADC Election masa a Political party jouse sei jeh a ana umlou ahi. ADC leh Pradhan hi local self government ahi’in chule grassroot politics bol hiu ahi.

Hiche jeh a Principle Secretary, Chief Election Officer, Manipur in hiche thu a pan alah a, April ahilouleh May lha a election bol nadinga pan alah dinga ngehna kinei ahi’in, ahiti theiding leh kipana sangtah hiding ahi, tin ATRPFM in aseibe in ahi.

 

Kum lhung a school chelou jilkung khat chunga action lah dinga DESAM in thumna nei

Imphal, Feb 12(UNA): Ching-Tam High School, Yaingangpokpi, Imphal East a Nongthombam Rockykanta kiti Luwangsangbam Matai a cheng jilkung khat school a kum kum a chelou ahitai, tin Democratic Students’ Alliance of Manipur (DESAM) in ngohna aneiyin, themmona nei jilkung pa chunga mopohna nei authority hon ‘disciplinary action’ alah diuvin thumna anei uvin ahi.

DESAM secretary General Leishangthem Lamyanba Meetei in thuso miho akihoupi na’a, Education and Academic Affairs Secretary Longjam Robin lamkaina a DESAM team hon February 11 ni a ‘Mass Reformation campaign phase-II’ noiya school inspection abol nauva jilkung khat phat sottah school achelou ahetdoh ahi, ati.

Class VI a kon class X chan umna Ching-Tam High School avil nauva DESAM team hon school hi jilkung 6 inbou avetsui amu ahi. Nongthombam Rockykanta, Luwangshangbam Matai hin school attendance register a akum a sim a soi akai tahlou ahi. School a hi Mathematic jilkung umlou ahi’in chule science graduate teacher sanction post 4 lah a jilkung khat inbou simlai ho lekha ahil ahi.

Social Science a post sanction kibol thum lah a jilkung khat bou um a chule non-teaching staff khatcha umlou ahi. Jilkung hon lhaseh a dangka 100 adonkhom uva Chowkidar akithalah u ahi. School quarter a meivah leh twi umlou, pamche nading toilet umlou, mihem chenna thei hilou ahi.

Kum phabep masanga jilkung 18 vetsuina noiya school hi phatah a ana kivaipo ahi’in, ahivanga sorkar in ‘superannuation’, transfer leh promotion’ ho jeh a post ong asuhdim theilou jeh a school lhasam cheh cheh ahi. Tu-leh-tua school a simlai 99 um ahi.

Ching-Tam High School, Yaingangpokpi, Imphal East hi Manipur Board in abol HSLC exam 2020 a dinga centre kipe holah a khat ahi. HSLC exam hi February nisim 17 teng kipan ding ahitai. Hiche centre a simlai 271 in exam abol ding ahi’in, ahivanga school a hi desk leh bench 30 bou um ahi, tin DESAM lamkai pa in aseiyin, hitobang dinmun a Manipur Board in iti Matric exam agon got ham, ati.

Matric exam peding simlai hohi school a jilkung hon private coaching centre a asol ahi. School headmaster in charge in avel vel a jilkung asolpeh diuva sorkar henga ngehna anei vanga authority hon agel khoh lou ahi. Hetthei khat chu tu masanga Joint Demand Committee, Yaingangpokpi in school a sorkar in jilkung angaicha asolpeh louleh February nisim 14 a kon school kha dinga gihna ananeiyu ahi.

DESAM team hon Yaingangpokpi Primary School jong avil uvin, jilkung thum inbou school avetkol hetdohna anei uvin ahi. Headmaster pa census duty a asoljeh uva school chelou chule school a toilet leh twi umlou ahi.

Education system hi gamsung khantou machal chule alhahsuh ding kingapna ahi, tin DESAM lamkai in aseiyin chule education sector hi politics bolna a manlou dinga aseibe uvin ahi.

 

Zo chate ho jouse kipunkhom phat ahitai ti’a Mizoram CM Zoramthanga in Zo Kutpui 2020 kingon a sei

B.Lalboi Gangte

CCpur. Feb 12 (ET): Tourism Department, Government of Mizoram leh Organizing Committee, Zo Kutpui, Manipur tohgon nanoi in tunin Kawnpui Playground mun’a “We Are One” thupi pansa in Zo Kutpui 2020 anamang uvin ahi. Kiman chahna phatsung in Jin-gun in Chief Minister, Mizoram Zoramthanga, In-neipa in V. Hangkhanlian, Minister, Agriculture, Veterinary & Animal Husbandry, Manipur, Kin-neipa in Robert Romawia Royte, Minister, Mizoram chuleh Kin-dei chom in T. Thangzalam Haokip, MLA, Chairman, Hill Areas Committee, Manipur, Vungzagin Valte, MLA, Chairman, MTDC Manipur; Ginsuanhau Zou, MLA, Chairman, MANIREDA Manipur, Dr. Chaltonlien Amo, MLA Manipur, TN Haokip, MLA Manipur leh JC. Ramthanga, IAS, Additional Chief Secretary, Mizoram ho Jinja-um in apang vin,  ADC Chairman leh Member, Churachandpur ho ana pang uvin ahi.

Kimanchah na phatsung in Cultural Troupe chom chom akon in Pu-pa lam vetsah na ananei uvin chuleh Costume Parade jong vetsahna ananei uvin ahi. Robert Romawia Royte, Minister, Mizoram in houlimna aneina’a Mizo Movement a Arakan apat galvon lah lutna’a Manipur apat jong mi 8 tobang in pan ala in chleh Manipur a Zo Kutpui kiman na ding’a Mizoram Government in sponsor abol hi Mizoram khangthu a ding’a State polam’a kingon kineina akhat vei naleh kiman chah na ding’a Budget kiman patna jong hi ding ahi ati. Hiche kingon hin kipumkhat na ding deina’a State budget apat Dk. Lakh 10 kikaidoh ahi. Chuleh March 17 leh 18 nikho jong leh Bangladesh gam’a  Zo Kutpui kimang ding chuleh April lha bul leh Tahan ah kinei kit ding ahi. Chu naban’a India gamsung State chom chom’a kinei nading ho ajong Mizoram State in sponsor abol ding ahi dan atahlang in chuleh Zo Kutpui kiman hi Political Party politics thu aum pon ahi tinjong aseibei.

Hiche toh lhon’a Zoramthanga Chief Minister of Mizoram in houlimna aneina’a Manipur gamsung’a lekha kana sem in chuleh graduate apat (1966) MNF ding’a pan kanala pan tan ahi. Hiche lai chun Manipur gamsung ahung kiphah teng Police hotoh kiki del to ji ahi in ahin 2020 ah vang Police in venbit na joh hoitah in eipi tan ahi. Sopi khat ihi nao kigeldoh phat ahi naban’a iti malam’a kalson ding ham ti jong gelkhom phat ahitai ati. Sopi kikhen nahi ham leh pao ahi in hijong leh hiche hi boipi lou ding ahi. Chuleh India Prime Minister, Manmohan Singh, Narendra Modi leh Home Minister Amit Shah hon North East gamkai sung’a chamna sem na ding’a mopohna eikipe hi koima dang hitobang mopoh na akipe naipon ahi. Naga ho IM leh K kikah thu sei ding in jong vel ijat ham akikal songdoh tan ahin Manipur, Nagaland leh Meghalaya Govt. deilou na’a chamna bol hilouva Govt. leh mipi deina bang’a chamna bolthei ding dan lampi jong um ahi dan atahlang in ahi. Hiche panlah nahi achelha jing in Zo chate sung’a Underground leh Over ground chom chom toh Aizawl ah kikimuto’a koima Nam min mangcha louva UPF kiphutdoh ahi in ahin kiloikhom na min ding hi lolhin phat leh minsah ding joh ahi ati.

Alangkhat’a Aizawl hi Zo Chate ding’a Jerusalem ahi dungjui in panlah na Aizawl ah akipan in lung kitoh tah in vaihom na aum in ahi. Mopoh napeh kahi dungjui in Churachandpur acheng Nam chom chom hon jong apom thei cheh ding in ngehna aneiyin ahi. Hiche’a lunglut lou jouse misol’a thamsah ding ngapchat lel na khat cha jong kinei lou ahi. Govt. akipat kouna hi Pathen kouna bang’a ngai’a kicham na bol ding’a kigong cheh ding in underground leh over-ground jouse kisutup ding in temna jong anei in ahi. Chuleh panlah naho Bangladesh leh mun dang dang’a jong sutjom hi ding chu jou teng leh Aizawl ah khompi lentah nei’a mitakip jaokim cheh thei nading’a pan la ding in mipi ho temna jong aneiyin ahi.

 

Mizoram CM in Gangte Pasal-pha (L) Demkhosiak Gangte Lumsong chung’a jana pe

B.Lalboi Gangte

CCpur. Feb 12 (ET) : Mizoram Chief Minister Zoramthanga, Minister Robert Romawia Royte leh JC Ramthanga, IAS additional Chief Secretary, Govt. of Mizoram hon tunin Mizoram National Front (MNF) lamkai (L) Demkhosiak Gangte (Gangte Pasalpha) jana pehna leh ama hetjing nading’a lhansong kitun na mun Cheingkonpang community hall ah jana pehna ananei uvin ahi. Kingon achun Mizoram Chief Minister Zoramthanga, Minister Robert Romawia Royte leh JC Ramthanga, IAS Additional Chief secretary, Govt.  of Mizoram hon (L) Demkhosiak Gangte lhan chung’a jana peh nan pahcha anakoi uvin chuleh Mizoram Chief Minister Zoramthanga in houlimna aneina’a Mizoram National Front (MNF) in Zalenna akidel lai in MNF sung’a Rank chom chom Self-Style SS kiti ho in ana ki-kiminsah in ahin India government noiya aum jou nung in Colnel, Major kiti in akikhel tan ahi. Zalen na kidel lai in (L) Demkhosiak Gangte toh Tipaimukh gamkai’a phatsot tah kana umkhom lhon in India sepai douna thei ding galvon neina ding in lampi chi chom chom anakikhol in East Pakistan, Arakan, China kiti gam ho’a (L) Demkhosiek Gangte ana vaikon doh in ahi.  Galvon ding akingai to-lai in China apat thal long 30 vel muthei ding in aum toh lhon’a twipi chung’a pah pohlut ding jong Security hat chuleh kenglam’a pot kit ding jong ham leh pao het kit ngai  ahi jeh chun (L) Demkhosiak Gangte hi ham leh pao chi chom chom anathep jeh chun ama lamkai nanoi in kenglam’a ana kipohlut thei jeh in MNF ahung kikal song thei in ahi. Zalenna galsah na’a (L) Demkhosiak Gangte kipeh lut naho  athupi nachung chon’a MNF ding’a suhmilthei hilou lamkai thupi leh tahsan um tah khat ahi.

Hetthei khat chu (L) Demkhosiek Gangte hi achesa June 1, 1927 in Teikhang, Tamenglong District, Manipur a peng ahi in chuleh India army ading in Sept. 1, 1943 in min ana kikhum lut in Dec. 12, 1944 in anapan in ahi. Feb. 2, 1955 in amipi ho khonung khankho ding gelkhol na jeh in Indian Army akipat resigned ana kibol in December 12, 1965 ah Mizo National Movement anajop ahi. Mizo National Movement apan sung in rank chom chom tichu SS. Major, SS. Military Governor, SS. General intelligence officer, political advisor MNF in anapang in chuleh Mizo National movement kalson na’a July 8, 1971 in Dhaka Jail ah ana tang kha in ami leh saho ding in phat atamjo amanchah jou nung in April 11, 1990 in ana mollem tan ahi.

Senapati a “Hit & Run case” a nupi khat in thina toh

Senapati, Feb 12(ET): Monday nilhah chun Senapati a oil tanker khat in nupi khat anatangkha in phat chomkhat jouvin thina ana toh in ahi.

Thilsoh chu nilhah nida 9:25 vel ahin thina toh nuchu V Thone w/o SI Kh. Shelly Senapati police station a posting family quarter a um ahi akiti. Amahi ajipa toh evening walk ache ahungkile lang hon a Waiting shed kom Police entry gate kom a oil tanker keuva hunlhai chun anatakhah ahi. Akisuhkhah jouchun Senapati Hospital lhut anahin doctor hon Imphal a dia reffered  abol u ahin Imphal alhun masang uva thina anato ahi.

Thilsoh toh kisaiyin Police hon case khat ajihlut taovin ahi. Chule mitatkha truck NL 07A-4048 chu Lairouching kom Khongnem anamandoh uvin hinlah driverpa ana jamdoh tai akiti.

Delhi a insung khat akon mi 5 athisa kimu

New Delhi, Feb 12: Police thuso khat in aseina achun tuni chun northeast Delhi’s Bhajanpura ah chapang 3 jaona in insungmi 5 in a inlo nauva athina jeh kihelou hel in mudoh ahiuve. Achenna in uchu kop apamlam akon in akikam in a inveng hon hiche insung akon thil namse gim ajeh phat uvin police ho ahetsah uvin tichun police hon kot chu ajep hong uvin ahile insung achun a inkouvin athisa in amudoh uvin chule atahsa ujong ana montan ahi.

Joint Commissioner of Police Alok Kumar in thuso miho heng a seina achun hiche inmun ahi lha 6-7 tobang cheng ahi tauvin athi na jeh jong akihedoh pon, Forensic team hon kholna anei ding uh ahi in chule athina jeh uh kiseina notes khatcha jong akimupoi ati.