CM in Covid Care Center kihon nading UNACCO School le Haraothel a...

CM in Covid Care Center kihon nading UNACCO School le Haraothel a NSU complex vetlhahna nei; QC a um dan juilou ho ding’a Sajiwa Central Jail a ‘block’ achombeh kigon peh ahi, tia sei

77
0
SHARE

CM in Covid Care Center kihon nading UNACCO School le Haraothel a NSU complex vetlhahna nei; QC a um dan juilou ho ding’a Sajiwa Central Jail a ‘block’ achombeh kigon peh ahi, tia sei

Imphal, June 9(ET): Chief Minister N. Biren Singh le Health and Family Welfare Minister L. Jayantakumar, Youth Affairs and Sports Minister Letpao Haokip in UNACCO School, Meitram, Imphal West district a COVID Care Center hondoh nadinga natoh chelha ho vetlhahna anei uvin ahi.

Chief Minister le Minister ho henga Chairman, School Governing Body, N Irabanta in school a block le campus chom chom aumho thu aseiyin ahi. N Biren Singh in ahoulimna a ‘quarantine center’ a umchan dihlou bol chule ase bol hohi tua kon jail a kikoi ding ahitai, tin aseiyin ahi. Center a um mi phabep in sorkar in asem ‘guidelines’ ho khohsahna anei lou thu aseiyin, koima aphat tin a mi achin theilou ahi, ati. Hiche jeh a state sorkar in tua hi Sajiwa Central Jail a block achombeh khat akoi ahitan, hiche hi center a um dan juilou mi 90 umna thei ahi, ati.

Chief Minister in aseina a, gamsung a um Quarantine Center chom chom a um hohin sorkar in asem kivenna ding guidelines ho ajui pouvin, hiche hi sorkar in sangtah a alah ahi, ati. Mijouse aphat tin a kivesui theilou ahi, tin aseiyin chule center a umchan hoilou soh ho adeilou na thu sangtah aseiyin ahi.

Waikhom Mani Girls College Community Quarantine center a tu naicha asunga um hon college gate le thil dang dang asuhset u chule Vimala Raina High School Quarantine center, Churachandpur a um hon ‘social distancing’ le quarantine protocol jui louva alam khom nau ho sangtah a agel na thu CM in aseiyin ahi.

Center a um hon ‘social distancing’ le protocol ho ajui loujeh a gamsunga Covid 19 positive case hatah a kal ahi, tin CM in aseiyin chule Central Jail, Sajiwa a umchan hoilou tho a centre a um mi 90 kikoi na thei block achom beh a kikoi ahi, tin aseibe in ahi.

UNACCO School a COVID Care Center hi Wednesday nikho a kon kihong/kimang pan ding ahitai, tin CM in aseiyin, atil a chu lupna 100 koi dinga tohgon ana kisem ahi’in, tua hi 300 a kalsah ding kiti ahi, ati. Tu dinmun a Churachandpur district a COVID 19 case le containment zone tampen ahi, tin CM in aseiyin chule RIMS le JNIMS tilouva Bishnupur District Hospital a jong COVID 19 natna neiho admit kibol pan ahitai, ati.

Chief Minister in Haraothel/Koutruk a National Sports University kisahna natoh jong vetlhahna aneiyin, NBCC (India) Ltd. official hon project dinmun chule natoh chelha ho thu hetsahna aneiyin ahi. Achesa Monday nikho a Union Youth Affairs and Sports Minister Kiren Rijiju toh video conferencing anei jouva CM in inspection abol ahi in, hiche hi Prime Minister Narendra Modi in adei sah project chule Northeast, adeh a Manipur gam mi hon atup jing university ahi, tin aseiyin ahi.

Centre le state kah a kihouna alhahsam jeh a project ana khongai ahi’in, athu seilhah ahi toh kilhon a project hi machal ding ahi, tin Biren in aseiyin ahi. Tua hi work agency kikhel a chule project hi NBCC (India) Ltd. khut a pehdohna um ahitan, agency thah in asah ding dan (construction) plan, drawing, blueprint le adang dang athah apohdoh ahi, ati.

Manipur Chief Secretary lamkaina a Committee in natoh machal dan vetlhahna aneiding, committee a hi Union Youth Affairs and Sports Secretary le Joint Secretary, Commissioner (YAS), Manipur government member a pang diu, amaho hin Chief Minister le Union Minister Kiren Rijiju henga kal kichai chan a report apehlut diu ahi. Achuti teng le mutheiya machalna umding ahi, tin CM in aseiyin ahi.

National Sports University hi 2014 kum a sah dinga proposal aumna thuphon anaum ahitan, Prime Minister Narendra Modi in March 16, 2018 kum a University Foundation stone tundohna anei ahi. Kiren Rijiju injong kum masa September lha a campus mun ana vil ahi.

Kuki Inpi Kangpokpi District in June 12 jankim a kon NH-2 a economic blockade bol ding’a gihna nei

Kangpokpi, Jun 9(UNA): Kuki Inpi Kangpokpi District in District sunga um CSO chom chom toh kihouna anei jouva Haraothel a National Sports University kisah ding thunoh baotamna toh kisaiya June 12 jan kim a kon National Highway 2 a economic blockade bol dinga kilol lhahna anei tauvin ahi.

Lamminlun Singsit, General Secretary, Kuki Inpi Kangpokpi District in thuso aneina a, Kuki Inpi Kangpokpi District, Vaiphei People’s Council chule Kuki Women Union Sadar Hills member hohi Chief Minister in tuni a Haraothel a National Sports University mun avil a, amun a kakimupi diu phal peh loudinga security ho thuhilna apeh hi eijumso nau ahi in, he na sa sa a abol ahi, tin aseiyin ahi.

Chief Minister in eijumso uva khohsahna neilou tah a eibol vang uva, boina suhlhap nadinga kihouna neiding hi alampi ahi tia kagel uva kimupi ding kagot jing ule achaina a Kangpokpi DC a kon ama Bungalow a kimupi dinga eihil u ahi, ati. Hahsa lheh jong le kakitim uva, National Sports University adalhah jouva ama Bungalow a ama kimupi dinga kacheu ahi, tin aseiyin ahi.

Ahin, gel tobang louva Chief Minister in eibolna bang bang uva eibol kit uva, gate pam a min chule thuchen ho kapehlut jou uva jong nidan khat le ni val einga sah uva, kimupi louva kahung kile u ahitai, tin aseiyin ahi. YAS Minister Letpao Haokip umna a National Sports University chungchang a kinoptona um dungjuiya National Sports University Haraothel tia kou dinga kisei ahi’in, ahivanga N Biren Singh sorkar in he na sa sa a NSU Koutruk tia akou jing ahi.

Hiche thu hi National Commission for Scheduled Tribe a seilhah louva um nalai ahi, tin Lamminlun Singsit in aseiyin ahi. CM Biren in National Sports University chungchang a boina hi phatah a ahet ahi’in, stakeholder ho dohna umlouva athu hi seilhah ding agot jing ahi, tin district CSO ho kibolna demna thu aseiyin, tua hi hitobang kibolna ho moh thoh tahlou dinga kigel lhahna um ahitai, ati.

State sorkar nithum phat peh dinga kilolna um ahi’in, hiche jouteng CM in donbutna anei louva ahile National Highway 2 a economic blockade khoutah kibol ding ahi, ati. Sadar Hills districthood thumna anaum 2011 kum a nikho 123 lhing kiphinna akibol jouva kon thinglhang district holah a Kangpokpi district hibou kiphinna sangtah bol lou nadinga kitim na nei ahi’in, lunghanna lampi a che kit nading dinmun aumle vangset umtah hiding ahi, tin aseibe in ahi.

Manipur a Malaria natna jeh’a naovop numei khat panna a mi 4 in thina toh ta

Imphal, June 9(ET): COVID 19 pandemic kisei khoh latah a Manipur gam a ‘cerebral malaria’ kiti ‘vector-borne disease’ jeh a naovop numei khat panna a mi 4 athi in chule midang 12 injong hiche natna aneiyin ahi.

Thulhut dungjuiya, Churachandpur district noiya um Tuikot kho kiti thinglhang gamlha tah a cheng kum 47 a upa pasal khat tu naicha ‘cerebral Malaria’ jeh a thi ahi. Chule Noney noiya um Okoklong kho a cheng kum 21 a upa lha ni naovop numei khat, kum 39 a upa numei khat le kum 19 numei khat jong hiche natna jeh a achesa June 4,8 le 9 ni a thi ahi.

Manipur thinglhang gamlha tah tah ho a hiche natna achal jing jeh a doctor le nurse ho panna medical team hon khosung adel lut uvin, test abol uvin chule natna chungchang/aumdan thu ho mipi ahil uvin ahi. Thulhut dungjuiya, apet pet a kivenna aum louva ahile Nungba sub-division a ‘malarial infection’ (natna leng) dinga ginmona um ahi.

Tuesday ni a Rongmei Naga Students’ Organisation Manipur (RNSOM) in Chief Medical officer (CMO), Noney District henga thoukang lou kap ding, malaria testing kit le lou le ai ho supply abol nauva natna achal be louna dinga pan alah diuva ngehna aneiyu ahi.

Lhang a natna achal louna dinga kigotna um ahi, tin thulhut in aseiyin ahi. Ahivanga, tuchan a hi gamsung mun dang dag a ‘vector-borne disease’ aum thu kisei loulai ahi.

 

Ccpur Dist. a Malaria Case 1 kimube; Case 8 lhingta

B.Lalboi Gangte

CCpur, June 9 (ET): Churachandpur District sung’a Malaria case apunjing toh lhon in tunin Lungthul (L) kho mi kum 24 khat Malaria PV ahidan photchet ahitoh lhon in Dr. T. Nengkhanmang, DMO/Ccpur in jing jingkah nidan 6:00 leh Malaria Department akon team khat District Malaria Officer lamkaina noiya James Pumthianlam MTS, S. Lianbiakthang DEO, Seitinpao Grade IV leh Lalramhlun Driver ho cheng in Lungthul (L) kho ajot diu Mass Rapid Diagnostic Test, Blood Slides Collection, Public awareness leh kangkal ho damdoi twi adediu (Bednet Impregnation) ahi ati. Malaria case hi achesa May 27 chun Tuikot kho’a  kum 47 pasal khat leh kum 13 chapang pasal khat kihedoh masapen ahin hiche jou May 28 a Penjang kho’a pasal kum 23 khat, Singngat Sub Division Bualkot kho’a chapang pasal kum 10 khat kimudoh kit’a June 1 a Bualkot kho mama a nupi kum 28  leh pasal kum 28  khat, June 5 in Gangpimual khomi Mata khokom’a  Ngakul ngah a um pasal kum 40 khat mudoh ahiuve.

Malaria PV veiho Tuhin Malaria Deprtment panlah na in treatment pat ahi tan adamtheng jong aum tao uvin, tuni chan’a Ccpur District sung’a Malaria case 8 kimudoh holah’a Thangneilian (47) B/o Thangthianvel of Tuikot, Henglep sub Division in thina atoh in ahi.

Malaria PV natna thu’a Officer Dr. T. Nengkhanmang akipat thuhut kimun atahlang na, Covid-19 dou dalna a Govt. leh Civil Society Organisation ho aha boi lai uvin, CCpur leh Noney District a Malaria PV leh PF mudoh in aum in, Noney a Malaria nat najeh in June 2, 3 leh 7 nikhon mi 3 athi uvin, CCpur ajong mi khat in thina ato ahijeh in mipi ho kiveng them ding in ngeh na aneiyin, khosih nei jousen lou moh nehlouva Malaria test bol  tei teiding in Malaria Department, Ccpur in mipi ho hetsah na aneiyin ahi.

Engedi Quarantine Centre a pasal 4 chaval jeh’a achung uva FIR kijih khum

B.Lalboi Gangte

CCpur. June 9 (ET): Pherzawl District ding’a CCpur District sung’a Institutional Quarantine Centre a kimang Geljang kho’a Engedi Quarantine Centre mun’a umhon amaho vekol In-charge leh Police ho kamcheng ngailou tah tah’a ahou nao chung’a Centre aum mi 4 chung’a FIR jihlut in ana um in ahi. Hetthei khat chu hiche Centre aum ho hin June nisim 7 nikho nilhah lam nidan1:30 vel dung in mi 4 hin momthei leh tobacco product toh kisai In-charge ho kom’a apeh ding uvin athum in ahin athil thum ho hi thil hi theilou ahidan mopoh nanei ho aseipeh nao’a kampao hoilou tah tah’a ana houkhum’u ahi. Chuleh hiche mun’a duty aum Police ho changei akigol nung uvin jong Police ho kisan jana pelouvin gih toh tho in kampao ngailou tah in anahou uvin ahi.

Hiche nachung chon’a Police ho lim jouse jong kimel chih ahi in Quarantine Centre akipot nung leh ti’a gihna anei nao chung’a daan kal’a um mi 4 pannan mi phabep jong athil ngeh uleh akamcheng ngailou chuleh Standard Operating Procedure jui louva aum jeh uvin amaho chengse chu Disaster Management Act, 188/269/34 IPC pansa in FIR No. 43(06) 2020 CCP- PS U/S 51 Disaster  Management Act, 188/269/34 IPC noi’a case ana bolkhum uvin ahi. Chuleh FIR jih khum’a um ho chu Isaac Lalrawngbawl (33), S/o Parsang of Lungthulien village; John David (27), S/o Darhalien of Pherzawl; Jehovah Lalmalsawm (26), S/o Ramneilien of Lungthulien leh Lalditsuok s/o Lalzawnglien of Damdiei Village ahin chuleh adang hetchet lou mi phabep jong anajao in ahi.

Alangkhat’a hiche mi 4 hohi Delhi akon hung kipan ahi uvin Pherzawl District mi inn lam hung ho vetkol namun Institutional Quarantine mun khat ahi. Tuhin hiche mun’a mi 147 aum in amaho hi  Mumbai, Delhi, Shillong, Andhra Pradesh, Gurgaon leh Kerala akon hung kipan ahi. Chuleh Muolvaiphei aum Bethesda School of Nursing mun’a ahin Mumbai akon hung kipan mi 51 aum uvin ahi.

Covid-19 positive 34 kimu na Moirang IQC a um ho lamlen a hungdoh uva kiphinna neiyu

Imphal, June 9(UNA): Moirang assembly constituency noiya um Diligent High School Quarantine Center a um hon Tuesday nikhon neh le chah chule ngaichat khoh adang dang kipehna a sorkar alhasam e, tin lamlen a ahungdoh uvin kiphinna anei uvin ahi.

Hiche hi mi 34 COVID 19 positive ahi akihetdoh a, Bishnupur District Headquarter Isolation ward a akoi jouvu ahi. Center a umho lamlen a achedoh uva, sorkar vaipo hon khohsahna anei pouve, tia akiphin nau video Facebook a kitahdoh a, social media a viral che ahi.

“Jingkah a kon district administration authority ho chule lamkai koima neh le chah eidong ding uva ahung pouvin, tahsa dammona nei hojong ahung ve pouve”, tin center a um numei khat in aseiyin ahi. Hiche masanga amaho umna center a um mikhat coronavirus positive ahi kihedoh ahi’in, center sunga aumna a akilah himaithei ahi, tia kisei ahi.

Thuso mihon natna neipa akihoupi nauva Bishnupur district hospital isolation ward a ama chule positive hi a adang ho phatah a eijen pouve, tin aseiyin ahi. Natna neipa hi Khangembam Arbinda (27), s/o Kh. Amu Singh, Kumbi Leirak Achouba, Bishnupur district a um ahi’in, Chennai a kon hung kile ahi’in, May 23 ni a Jiribam hunglhung ahi. Amahin Anna University Chennai a research abol ahi’in, lungchang natna aneijeh a Imphal hospital a kijen ding adeiya hung kile ahi.

“Jiribam kalhun uva, gam chom chom a kon hunglhung mi 104 hi Imphal chan bus 3 a katou diuva eiseiyu ahi”, tin Arbinda in thuso miho akihoupi na a aseiyin ahi. Amasa a Utlou Public School a eikoi uvin, hiche jouva Diligent School, Moirang a eisol u ahi. Center a um phabep in khosih le tisat anei aseiya hi paracetamol apeh mai mai uva, test abol louvu ahi”, ati.

Aumna quarantine center a kon natna akilah ahiding aginmo na thu aseiyin ahi. Monday jan agei nung a positive ahi kihedoh mi 104 lah a mi 34 hi hiche quarantine center mun a um hiu ahi.

Natoh na kilah na ding chung a ATSUM in govt hetsah na nei

Imphal, June 9(ET): All Tribal Students’ Union Manipur (ATSUM) in N Biren Singh, Chief Minister makai na noi a covid-19 doudal na le vetsui na natoh an chung a govt lam a natong ho le Doctors, Nurses, Health Workers, Security officers, personals, CSOs le Volunteer ho chung’a kipa thusei na ahin nei uvin ahi. Kiloikhomna in achesa June nisim 5 nikho a Cabinet toukhomna a natoh lahding thu ana sei na uva MPSC noi a assistant professor 190 lahding ati nau chung a  Chief Minister pa in ATSUM toh achesa August nisim 13 nikho a kihou na ST assistant professor ho dipna ding chung chang thu hilchetna le natoh a pohdoh na ding ahin gon masat ding uvin hetsah na ahin nei uvin ahi. Education department akon thuso kimu dungjui in ST assistant professor 166 lam akingai cha in ahi akiti in hinlah tu chan in akila pon ahi akiti.  Hetthei khat chu ATSUM in ST assistant professor vat kilah na hcung ahi Manipur state government ang a hetsah na anei jing u ahitan ahi.  Hetthei khat chu ST assistant professor ho hi achesa 2013 kum a vat ana kisei akon ana kila lou lai ahi. Tribal mi hiche panmun lodim ahung tam toh lhon a kiloikhomna in kibang chat a tohmun kihop dong adei dan u Indian  Constitution Article 16 noi a thumna ahin nei u ahi.

 

Nikhat a Covid-19 case athah 9987 mudoh be ahitoh kilhon a, natna kiseikhoh na gam holah a India 5 channa a pang ta

New Delhi, June 9: India gam a Tuesday nikho a Covid 19 case thah 9,987 akisei hi nikhat a dinga case kimu be atamna pen ahitan, natna jeh a achesa nidan 24 sunga mi 266 thi ahi.

Health Ministry data dungjuiya, gamsunga covid 19 case hi agom a 266598 lhing ahitan, hiche lah a hi mi 12915 damdoh a, active case 129917 um a chule natna jeh a mi 7466 thi ahitai. Maharashtra hi natna akisei khoh na pen gam India a dinga hijing nalai ahi’in, case 88,528 um ahi. Aban a Tamil Nadu gam (33,229) hi a chule Delhi (29,943) athum channa a pang ahi.

Andaman and Nicobar Island a Covid positive hi agom a 33, Andhra Pradesh a 4851, Arunachal Pradesh a 51, Assam a 2776, Bihar a 5202, Chandigarh a 317, Dadar Nagar Haveli a 22, Goa a 330, Gujarat a 20545, Haryana a 4854, Himachal Pradesh a 421, Jammu and Kashmir a 4285, Jharkhand a 1256, Karnataka a 5760, Kerala a 2005, Ladakh a 103, Madhya Pradesh a 9638, Manipur a 272, Meghalaya a 36, Mizoram a 42, Nagaland a 123, Odisha a 2994, Puducherry a 127, Punjab a 2663, Rajasthan a 10763, Sikkim a 7, Telangana a 3650, Tripura a 838, Uttarakhand a 1411, Uttar Pradesh a 10947, West Bengal a 8613 ahi.

India a natna a kon kijen dam hi 48.46 per cent ahi’in, Maharashtra gam a bou adamlou mi 40,975 dam doh ahitai. Johns Hopkins University data in asei dungjuiya India gam hi Covid 19 pandemic kisei khohna pen US, Brazil, Russia le UK ban a gam anga channa a pang ahitai.

 

QC a um khat nikho 7 jou’a Covid-19 Negative ahi leh HQC a soldoh thei ahitai ti’a Ccpur Dist. Hospital CMO in phongdoh

B.Lalboi Gangte

CCpur. June 9 (ET): Churachandpur District sung’a Chief Medical Officer, CCpur leh IDSP team in tunin CMO office chamber mun’a thuso miho anakimupi uvin hiche phatsung’a achun Quarantine Period chung chang thu’a protocol kikhen ho hilchet na ananei in ahi. Kingon phatsung’a Dr. Vumchinpau Tonsing, CMO/CCpur in aseina’a Manipur ah Covid-19 toh kisai Centre chom chom’a Quarantine period hi phat masalam chun nikho 14 Centre mun’a um ding chu jouleh nikho 14 ma Home quarantine ding’a Directorate of Health Services, Manipur in achesa May nisim 24 nikho’a Discharge Policy Guideline asodoh na’a Quarantine Centre aum koi hi jong leh Covid-19 test ahi nung’a result negative ahi leh inn lang solthei hi ding in anasei in ahi. Ahin tun vang Quarantine period hi nikho 14 sung ding hi jong leh Centre aum mi khat in nikho 7 sung’a test result negative ahileh pot sah hi ding ahivang’a nikho 14 chan vang Home quarantine ah asuhlhing ding’u ahi ati.

Alangkhat’a Quarantine Centre aum Covid-19 toh kisai’a symptom nei lou ahileh Centre a nikho 8 chan hi jong leh inn lam pot thei ding’u ahin nikho 8 ban’a adang nikho 7 vang Home Quarantine abol ding’u ahi. Chuleh phat masa lam’a nikho 14 sung Home quarantine a um tei tei ding kiti chu poimo talou ding ahi ati. Ahin Quarantine Centre khat tapou Positive Case kimudoh namun chu Containment zone ahileh hiche mun’a um adang Negative result ngah ho jouse jong kipotsah theilou ding ahi. Chuleh hiche Containment zone aum kha ho Low, Moderate leh High Risk a kikhen ding amaho hi nikho 14 sung Centre aum jou nung ujong leh nikho 14 ma ma Home Quarantine ding hi Govt. in hetpeh ta hih jong leh veng chom chom’a Home Quarantine ho avetkol ding’u ahi. Quarantine Centre ah nikho 14 lhing lou ho Home Quarantine ding’a pot sah’a um ho Consent form hoi tah’a signed kibolsah’a kisoldoh ding ahi tinjong aseibei.

Dr. Vumchinpau Tonsing, CMO/CCpur in aseibe na’a Quarantine Centre kimkhat’a Protocol jui lou um ahidan akihetdoh toh lhon’a gangtah in District Administration leh Medical Department in amun anakipha in thil umdan ho kholchil na anakinei in ahi. Chuleh Hou lamkai hon Centre mun’a um ho jouse thuhil na anei uvin chuleh maban’a guideline apalkeh tah lou ding uvin jong thuhil na ananei uvin ahi. CCPur District sung’a janni (June 8) chun Case thah numei 4 leh pasal 8 ana kimudohbe in ahi. Tuchan in JNV Bishnupur CQC apat mi 1 pannan CCpur District sung’a positive case 46 alhing tan ahi. Hiche lah’a numei 12 leh pasal 2 agom’a mi 20 adamtheng uvin chuleh Active case pasal 11 leh numei 15 agom’a 26 aum nalai in ahi ati.

Quarantine Centre a SOP palkeh hon CM, Dist. Adm. leh SP kom’a ngaidam thum u

B.Lalboi Gangte

CCpur. June 9 (ET): Vimala Raina Government High School Quarantine Centre mun’a um hon tunin (June 9) SOP daan apalkeh naochung’a ngaidam thumna ananei uvin ahi. Hiche Vimala Raina Government High School Quarantine Centre mun’a umho hi Delhi akipat hung kipandoh ho ahi. Chuleh amaho hi achesa May nisim 28 nikho’a mi 6 leh May nisim 29 nikho’a adang 17 hung lhungbe ho toh agom’a mi 23 hi ZEO noi’a Vimala Raina Government High School a staff ho vetkol nanoi’a um’u ahi.

Hetthei khat chu achesa June nisim 4 nikho’a Quarantine Centre mun’a nilhah lam’a laa alha uvin analam khom uvin ahi. Hiche alam nao video chu Social media bou hi talouvin National News chan’a phondoh anahi phat in District Administration leh Manipur Chief Minister het in ana umdoh tan ahi. Hiche video akon physical distance hoitah jui ding’a Standard Operating Procedure (SOP) kisodoh apalkeh’u dungjui in achesa June nisim 8 nikhon District Administration lam akon Pawan Yadav, IAS, DC Churachandpur, Amrita Sinha, IPS, SP Churachandpur leh Ginmuan Ngaihte, MCS, SDO Churachandpur hon Quarantine Centre mun vetlhah na ananei uvin ahi.

Hiche toh lhon’a Vimala Raina Government High School Quarantine Centre mun’a um numei 13 leh pasal 10 ho hin  ama holeh amaho kila uva amaho maman Social Media dung’a analhadoh’u ahi. Ngaidam ngehna anei naova SOP jui ding’a kisem apalkeh naochung’a phamo asah nao thu aphongdoh uvin chuleh Manipur Chief Minister, District Administration, SDO, CMO hon angaidam ding uvin jong ngeh na anei uvin ahi.