CM in COVID-19 thu’a thinglhang mi lamkai hotoh kihouna nei; Gamsung’a um...

CM in COVID-19 thu’a thinglhang mi lamkai hotoh kihouna nei; Gamsung’a um tribe jouse akondoh nau kho a Dk. lakh 10 cheh lut a Museum sah dinga thuphon nei

58
0
SHARE

CM in COVID-19 thu’a thinglhang mi lamkai hotoh kihouna nei; Gamsung’a um tribe jouse akondoh nau kho a Dk. lakh 10 cheh lut a Museum sah dinga thuphon nei

Imphal, May 27(ET): Chief Minister N Biren Singh in Chief Minister’s Secretariat mun a Wednesday nikhon tribal chom chom a lamkai hotoh kihouna agong in, hitobang abolna hi amasapen ahi.

Covid 19 pandemic dou ding dan chule lockdown jeh a thinglhang mihon hahsatna ato ho thu chom chom seikhom nadinga kihouna aneiyu ahi. Tribal kiloikhomna chom chom thalhenga mi 60 vel kihouna a apang uvin, social distancing chule dan chom chom umho phatah a ajui uvin ahi.

Chief Minister in ahoulimna a, dangka lakh 10 cheh lut a Manipur gam  aum tribal ho jouse dinga akon doh nau kho a museum sah dinga thuphon aneiyin ahi. Hiche museum ho a hi pu pa khanga ana kimang manchah, von chule adang dang ho kikoi ding ahi, ati. Community lamkai ho umna a WhatsApp group hon ding, hiche a hi member a Chief minister le official luboh adang dang jong pansah a, sorkar le nam lamkai ho kah a kijahto na hisah dinga CM in aseibe in ahi.

Covid 19 pandemic hi ‘awareness’ phatah a peh a kivenna neithei ahi, tin CM in aseiyin chule anempen a kipat a campaign bol ding ahi, ati. State dang dang toh tekah dinga gamsunga mihem jat lhom ahi in, ichih thei lou uva chule aphatcha pan ilah louvu le pandemic jeh a hahsatna chom chom ito theiyu ahi, ati. Thulamleng ho tahsan louva, WHO, ICMR, Health Ministry, Home Ministry le tahsan um agency dang dang ho thuhilna le guideline hobou tahsan dinga temna jong aneiyin ahi.

Thuhilna dungjuiya ni 14 ‘quarantine’ a um ho test result negative ahi teng in kile theidiu ahi. Hiche jeh a amaho hi khosung vengsung lungboina neilouva lutsah ding ahi, ati. Gamsunga um doctor, burse le paramedical ho son umtah ahi’in, natna nei jouse damdoh diu ahi, tin atahsanna thu aseiyin, mipi tosotna jal a hiche boina hi kijou ding ahi, ati.

Gamsung kipunkhom ding thu jong CM in aseiyin, tua sorkar in achengkhom nam chom chom ho kah a kiloikhomna suhdet ding agelkhoh ahi. Keibul Lamjao a Heritage park kisem ding chule kum seh a kibol Manipur Sangai Festival kiman na (main venue) hi ol a kichon ding ahi, ati. Park a nam jouse ‘traditional hut’ model kisa a kikoi ding ahi, tin CM in aseiyin chule thinglhang a lamkai hon Tribal Affairs and Hills Department henga ama ama ‘traditional house sketch’ apehlut diuvin temna jong aneiyin ahi.

Lamkai hon kihouna gong a CM chunga kipathu asei uvin, Covid 19 pandemic lockdown jeh a hahsatna thu asei hou angai lhah peh jeh uvin kipathu asei uvin ahi. National Health Mission, Manipur in pao chom chom a kijih Covid 19 awareness lekha peh (leaflet) asodoh u kihouna a pang lamkai ho ahom uvin ahi.

Lekha hi Meitei Mayek, English, Aimol, Anal, Chothe, Lamkang, Monsang, Moyon, Tarao, Chiru, Kabui, Inpui, Rongmei, Zemei, Liangmei, Gangte, Hmar, Kom, Mate, Paite, Simte, Vaiphei, Zou, Thadou, Kharam, Koireng, Mao, Maram, Poumai, Thangal, Maring, Tangkhul le pao dang dang a kisun ahi. CM in thilpeh jong ape in chule CM Secretariat a neh khom jong agong in ahi. Kihouna a Manipur Legislative Assembly Deputy Speaker K Robindro, Yaiskul MLA Th Satyabrata chule state government a official luboh hojong pang ahi.

Imphal-Jiribam lamlen a boina thilsoh aumkit louna dinga Naga lamkai hon lamlen juiya cheng lamkai hotoh kihouna nei

Imphal May 27(UNA): United Naga Council (UNC) president anahi Gaidon Kamei lamkaina a Naga lamkai hon Imphal-Jiribam lamlen juiya cheng hotoh meeting chom chom anei uvin ahi.

Gamdang a tangden gamsung miho po a driver hon gamkai mihon eitosot pouve, tia hehna asem hou thu toh kisaiya Naga lamkai hon hitobang program agon u ahi. “Driver chule ahung kile ho lungmon nadinga Imphal-Jiribam juiya cheng hon tosotna apeh nading uva pan kila ahi. Highway a kihetkhel na jeh a thilsoh deilou um alhung e, ti thu kaja uvin, hiche hi vangset umtah ahi. Hitobang thil avel a aso kit louna dinga Imphal-Jiribam lamlen juiya campaign kabol u ahi”, tin Gaidon Kamei in aseiyin ahi.

Phat boi pet a motor workshop, pharmacy ahiloule angaicha thil ho muthei ahina dinga Imphal-Jiribam lamlen jui mun chom chom a meeting kigong ahi, tin aseibe in ahi. Hetthei khat chu  India gam chom chom a kon atangden gamsung miho Jiribam Railway station chan train a ahin poh uva, hiche mun a kon state sorkar in agon bus a gamsung district chom chom a atangden ho athah kit u ahi.

Wednesday jingkah a Naga lamkai hole Rongmei Naga Youth Organisation (RNYO), Noney Range chule Longmai public leader hon Noney mun a kihouna masapen aneiyu ahi, tin Naga lamkai hon asei uvin ahi. “RNYO le Noney lamkai hon Naga lamkai ho henga atangden ho chule amaho hin po ho tosotna lhingset peh dinga kitepna aneiyu ahi”, tin meeting a pang lamkai khat in aseiyin ahi.

Sun langa Naga lamkai ho Nungba a cheuva Rongmei Naga Youth Organisation (RNYO), Nungba Range chule Nungba Headquarter Authority hotoh kihouna aneikit u ahi. “Hiche mun a umhon jong driver chule ahung kile ho tosotna peh dinga kitepna aneiyu ahi”, tin lamkai dang khat in aseiyin ahi.

Nilhah langa team ho Kambiron, Jiribam kom a lhang lamkai ho kimupi dinga che kit u ahi. Mijousen politics, jat le nam kikhenna achom koiya, phat hahsat pet tah a hi mihem ngailutna achungnung pen a akoi diuvin Naga lamkai hon temna anei uvin chule Covid-19 pandemic hi mihem douna gal ahi, tin asei uvin ahi. “Tua kon atangden ho chule driver hon lamlen a boina ato loudiu kinep ahi”, tin aseibe uvin ahi.

Manipur a Covid-19 case 5 kimudoh be lah a AirAsia vanleng a hung khat jao; Natna nei JNIMS a mi 26, RIMS a mi 18 kijen

Imphal, May 27(ET): Dr K Sasheekumar Mangang in aseina achun Manipur gamsung ading a Covid-19 vei case thah Tuesday nilhah chun mi 2 akimudoh be in chule tunin mi 3 akimudoh be e ati. Tuni a kimudoh be lah a khat chu Air Asia vangleng a hung kinungle lah a jao ahi in ama hi Bishnupur ho ahi in chule midang 2 chu Imphal East ho ahi ati. Tuesday jan a kimudoh thah teni chu Thoubal district ho ahi in Gujarat akon hung kinungle lhon ahi.

Tuni chun sample 603 test RIMS hospital a Virus Research and Diagnostic Laboratories (VRDL) a test akibol in ahi. Case thah 5 kimudoh be toh lhon in Manipur gamsung a ding in Covid-19 natna veikha mi 44 aphatan, active case 40 chule adamdoh mi 4 ahitai. Tuni chun Bir Tikendrajit Airport Imphal a vanleng thum in passenger mi 500 tobang ahung lhung tauvin abon uvin Community Quarantine center a aki koisoh kei in ahi.

Manipur gamsung a Covid-19 veikha mi 44 alhingtan tuhin active case 40 umna lah a Churachadpur district sung a avei atampen in mi 18 aum uve tin district surveillance officer Dr. Ngahneikim Haokip chun asei in ahi. Ccpur district sung a avei mi 18 lah a 17 hi Chennai akon hung kinungle ho ahiuvin chule khat hi Guwahati akon hung kinungle ahi ati. Adammo mi 26 ho chu Jawaharlal Nehru Institute of Medical Sciences (JNIMS) Hospital a aum uvin chule mi 18 hochu Regional Institute of Medical Sciences (RIMS) Hospital a aum uvin ahi.

Integrated Disease Surveillance Project (IDSP) a surveillance officer Dr L Tomcha Khuman in aseina achun tunichan in JNIMS le RIMS hospital a VRDL a test 6,834 akibol tan chule mi 2,21,585 ho screening akibol tan ahi. Gamdang a lockdown jeh a tangden Manipur gammi ho a state govt. in apuidoh jing in mi 13,000 hochu Special Shramik train leh bus in ahung lhung tauvin ahi. Tuni chan a institutional quarantine centres a mi 3,053 tobang aum uvin chule districts’ community quarantine centres a mi 9927 aum uvin ahi.

PMGKP noiya Covid-19 natna dou a pangho Life Insurance Scheme khat kigonpeh

Imphal, May 27(ET): Tuni chun Union Government of India in Health Worker ho a ding in dk. 50 lakh Life Insurance Scheme chu Prime Minister Garib Kalyan Package (PMGKP) noi a ding in agonpeh in ahi. Deputy Secretary (Health & Family Welfare) Government of Manipur in office memorandum khat asodoh na achun Covid-19 douna a panlah health worker ho vangset thu a thina toh aumle Life Insurance aumthu aphong in ahi. Hiche Insurance hi Public Helathcare a natong, Community health worker ho jong ahoptha in chule private hospital staff le Retired ho, Volunteer ho, contracted a tongho, Central Ministries noiya a hospital ho, Central hospital ho, Autonomous hospital ho jong ahoptha in ahi.

2011 Census dungjuiya ‘Delimitation’ bol louding chule insung genthei ho Dk.10,000 peh dinga Congress lamkai Ibobi in thumna nei

Imphal, May 27(ET): Chief minister anahi le Congress Legislature Party lamkai Okram Ibobi in vaicha genthei insung ho sorkar in dangka 10,000 apet pet a apeh dinga thumna aneiyin ahi.

Sorkar in sum le pai a kithopina apeh ding hi amopohna ahi’in, middle class insung hon akhut uva sum achoi nading sumkol veina neo bol ho (small business) ho loan apeh ding hi ahipoi. Chule Census data dihlouva parliamentary ahiloule assembly constituency ‘delimitation’ bol ding hi Congress in nasatah a adoudal ding ahi, ati.

Congress Bhavan a thuso miho akihoupi na a Ibobi in 2001 census a gamsung mun phabep a population akal dan hi kitoh lou ahi. Assembly constituency kikal sah be louva 2001 census dungjuiya ‘delimitation’ akibol a ahile Congress in sangtah a adoudal ding ahi. “2001 census dungjuiya lah ding hi kana doudal jing uva, 2015 kum a jong 2001 census a delimitation lah ding douna a court chan kana cheu ahi”, tin term thum chief minister  panmun tuh a Ibobi in aseiyin ahi.

Constituency hi 60 a kon akikal sah levang tin CLP lamkai pa in aseibe in ahi. Lok Sabha seat hi 7 a kalsah thei ahi, ajeh chu Outer Parliamentary constituency noiya um assembly constituency 7 a voter hon election atet theilou ahi, ati. “Voter akal tah jeh a assembly constituency 40 a Parliamentary constituency 2 hi ‘delimitated’ bol thei hiding ahi”, tin alunggel aseiyin ahi.

Alangkhat a, MPCC President M Okendro in, Lockdown jeh a toh ding neilou ‘migrant worker’ ho bank account a dangka 10,000 cheh sorkar in athot nadinga social networking site a India pumpi a Congress party hon campaign abol ding ahi, tin aseiyin ahi. Congress in May nisim 28 nikho a kon social media pat dinga tohgon anei ahi.

“Mi gam a natong a che jouse a in a sum lut lou chule damsel a akile thei nading uva ache nadiu gonpeh ding ahi. Chule MNREGA noiya natong ho le natoh nikho hi kum khat a nikho 200 a kalsah ding, tohmun peh ding ahi”, tin Ibobi in aseibe in ahi.

 

Transfer & Posting

Imphal, May 27(ET): D.K. Thangboi, MCS, Joint Secretary (CADA)&Joint Secretary, Manipur Information Commission apat Joint Secretary (CADA/TA&Hills) & Joint Secretary, Manipur Information Commission; Dr. Rajesh Akhtar, IAS Addl. Chief Secretary (Forest & Environment/Textile, Commerce & Industries) and DG/SAT apat Addl. Chief Secretary (Forest & Environment) and DG/SAT; Dr. Rajesh Kumar, IAS, Addl. Chief Secretary (Finance/IT/YAS/Tourism) and OSD to Chief Minister apat Addl. Chief Secretary (Finance/Planning/IT) and OSD to Chief Minister; Nidhi Kesarwani, IAS, Commissioner cum Secretary (PHED) apat Commissioner cum Secretary (PHED/Agriculture/MAHUD); Devesh Deval, IAS, apat On return from central Deputation apat Commissioner cum Secretary (Tourism/Textile, Commerce & Industries); Kh. Raghumani Singh, IAS Commissioner cum Secretary (Power/Agriculture) apat Commissioner cum Secretary (Power); M. Joy Singh, IAS Commissioner cum Secretary (Arts&Culture/IPR) & Secretary, Manipur Human Rights Commissioner in addition apat Commissioner cum Secretary (Arts & Culture/IPR/Science&Tech.) & Secretary, Manipur Human Rights Commissioner in addition; Bobby Waikhom, IAS Commissioner cum Secretary (CAF&PD/Science&Tech) and Secretary to Governor in addition apat Commissioner cum Secretary (CAF&PD/YAS) and Secretary to Governor in addition; Jacintha Lazarus, IAS Secretary (Water Resources/Minor Irrigation/MOBC) and Member Secretary, State Commissioner for OBC & SC and Member Secretary/MANIREDA apat Secretary (Water Resources/Minor Irrigation/MOBC) and Member Secretary, State Commission for OBC&SC and Special Secretary (Health & FW) ahi.

 

Vungzagin Valte in Covid-19 sunga sihnei langneina abol e, tia HPC (D) in ngohna nei

Ccpur, May, 27(UNA): Tripartite Talk a pang chule SoO signatory hi a HPC(D) hon Covid 19 pandemic sunga Thanlon MLA Vungjagin Valte in deilhen chom aneiye, tin ngohna anei uvin ahi.

HPC(D) Secretary, Information and Publicity, John L Hmar in thuso aneina a, Covid 19 nat douna a kivetda na ngah dinga United Nations (UN) in kouna anei vanga angaicha lou Churachandpur police team hole Vungzagin Valte mi melhet lou thal choi hon Thanglon MLA lungtup bulhit nadinga HPC(D) douna a na atong uve, tin ngohna anei uvin ahi.

Hiche hi SoO Ground rule kipalkeh na ahi’in, tu naicha nehguh abol kihedoh a Vungzagin in langneina aneiyin, tu dinmun a hi SoO a kinoptona soi kaina um jana pe louva SoO signatory member hi a chule HPC(D) Chairman inmun le member ho in kholna aneiyu ahi, ati. Vannoi pumpi boina sangtah a aum laiya Vungzagin constituency a um Hmar hon kithopina thil lhomcha bou amu uhi Hmar nam mihon asan theilou ahi, ati.

HPC(D) in amite phatchomna dinga bol thei chan abol ding chule achonchan deilou umtah Vungzagin Valte tobang MLA kiloset jeh a mipin kel le genthei athoh kimoh vetlou ding ahi, tin asei uvin chule chan ding dol thaneina thum ding hi Hmar miho dinga jachatna hilou ahi, ati.

Covid 19 pandemic hi Hmar ho bungkhenna ding chule HPC(D) douna a chonna dinga phat gomkom a aman ahi, tin John L Hmar in ngohna aneibe in ahi. Hmar mite hon lampi dang neilou jeh a akihonso natei diuva gal asat nau dinmun alhun louna dinga state sorkar chule India sorkar in pan alah a, Vungzagin Valte chule anatohna ho avetjui dinga HPC(D) in temna anei ahi, ati. Manipur a cheng Hmar ho Pandemic a dinga akigot diuvin jong temna aneibe uvin ahi.

 

MMWO in Delimitation Act, 2002 Commission kisemna a Meitei-Pangal thalheng apan lou demna nei

Imphal, May, 27(UNA): Manipur Muslim Welfare Organisation (MMWO) in Delimitation Act, 2002 commission kisemna a Manipur Legislative Assembly Secretariat in Meitei-Pangal ho thalheng khatcha apansah lou demna anei uvin ahi.

Wednesday nikho a office mun a thuso miho akimupi nauva MMWO Vice President Korimayum Boboy in, Delimitation Act, 2002 Commission kisemna a Manipur Legislative Assembly secretariat in nominate abol member 5 holah a Meitei-Pangal politician ahiloule MLA khat jong apan lou hi dih asah lounau thu asei uvin chule hitobang a kibungkhenna hi kisang louding ahi, ati.

Meitei-Pangal hohin gamsung security thu, khantouna toh kisai mopohna le natoh na hohi masanga kon aphat tin a pan alah jing ahi. Ahin, vangset umtah a Meitei-Pangal ho panlahna hi authority hon asumil uve, ati. Nam in society dinga thilpha abol jing ahi’in, gamsunga hitobang Commission kisemna a hitobang thulhuhna aumhin pan akilahna ho asuhmil u avetsah ahi

Hiche jeh a nomination abol nauva Meitei-Pangal MLA ahiloule politician khatcha kipan sah lou ahi’in, hiche hin Manipur Legislative Assembly House a kileptona aumsah louding ahi, tin MMWO Vice President in aseibe in ahi.

Manipur Legislative Assembly le state sorkar in hiche thu agel phat uva chule Meitei-Pangal MLA ahiloule politician khat apansah diuvin MMWO in temna aneiyin, achuti loule Meitei-Pangal ho lungthim a kibungkhenna ahiloule hunam thahat kivetsahna um ahi tihi kondoh ding ahi, tin aseibe uvin ahi.

Mipa khat in ajinu that

Imphal, May 27(ET): Moirang police station hopsung a um Saiton Leitanpokpi ward No. 4 a cheng mipa khat in ajinu atha thu thulhut chun asei in ahi. Thina toh nupi nu chu Soibam (ongbi) Pishakmacha Devi (65) ahi in ajipa chu Soibam Mani Singh (70) ahi. Thulhut in aseina achun Mani hin ajinu chu chemcha mangcha a alol a atpeh ahi in Moirang police hon Soibam Mani chu achungthu kholchilna neiding in ana podoh tauvin ahi.