CM in Ambulance homdoh; Dammo akinthei lam a vetkol na ngaicha ho...

CM in Ambulance homdoh; Dammo akinthei lam a vetkol na ngaicha ho vetnom lou leh jending jahda hon hospital ahon u phatchomna bei ahi tia CM Biren in sei, Private hospital ho show cause notice kipe

87
0
SHARE

CM in Ambulance homdoh; Dammo akinthei lam a vetkol na ngaicha ho vetnom lou leh jending jahda hon hospital ahon u phatchomna bei ahi tia CM Biren in sei, Private hospital ho show cause notice kipe

Imphal, September 8(ET): Tulai natna COVID-19 douna dinga frontline warriors ho suhhatbe ahi cheh theina dingin Chief Minister Shri N. Biren Singh Ambulance khat cheh Noney, Imphal East, Tengoupal, Imphal West Chief Medical Officers ho leh Directorate of Health Services mopo ho heng’ah pehdohna kin chu Minister’s Secretariat ah ana neiyin ahi.

Hiche kingon kiman na a Chief Minister in ahoulimna ah COVID Care Centres sembe ding tohgon aumtoh kilhon’a State Government in hiche natna akon a kivendoh na dinga angaicha leh apoimo ho gelkhohna kinei jinga kiong jing ding ahi ati.

Hiche natna hi khat le khat kipeson thei jing ahi jeh in ichan geiya state hi ahin suhkhah be ding ham ti hi seithei ahipon, hiche jeh a hi kigingsa dem a umjinga thilsoh ho aphat leh a nidan dungjuiya kimaito pi thei jing nadinga kigosa dem a umjing ding ahidan jong aseiyin ahi. Aman aseibe na ah hetna kichehtah neilou ho akonna hiche natna toh kisai lunggel chom chom kisei hon mipi lungthim asuh linglao bep ding ahi, hijeh chun koimachan hetgilna neilou a ama lung suhto ho media mangcha a sei le sah amoh bol bol louding injong temna aneyin, koi tobang thulamleng leh mipi kichatsah thei thu sei leh phongdoh akihet doh leh Disaster Management Act, 2005 a Section 54 dungjuiya kumkhat songkul a hentang hiding ahi ati.

Chukit leh achesa nikho phabep a nupi naonei ding khat private hospital a vetkol ding kiphalou toh kilhon a social media ho a viral ana che chungthu toh kisaiya Chief Minister in asei na ah, dammo na jeh a kijen nom a akinthei lam a vetkol na ngaicha ho vetnom lou leh jending jahda hon hospital ahon uchu phatchomna beiya hospital kihong ahi. Lou le ai thepna nei khat chun mihem lungset dan leh ngailutna aneiding doltah ahi, hospital kiti chun sum le pai leh business a ding bouva avetchep lou diu dol tah ahi tinjong Chief Minster in ahoulim na ah aphongdoh in ahi.

  1. Biren in aseibe na ah Principal Secretary (Health) henga private hospital ho show cause notice pehsah ahitan ahi ati. Chuleh Covid-19 jong kithokhom a doudal khom ding injong temna anei dan thu aphongdoh in ahi.

Achesa lha thum sung chun Government of Manipur hi Ambulance 14 ana chodoh tan ahi. Amasa pen ding in June lha chun Pherzawl leh Thoubal district pehdoh ana hi in ahi. Aban in Bishnupur district leh Directorate of Health Services June lhasung mama in pehdoh in ana um in ahi.

Directorate kipe ambulance hi COVID Care Centre, Lamboi Khongnangkhong ah akimangcha in ahi. Athumna ding in Jiribam leh Imphal West district pehdoh in ana umkit in ahi. Nikho phabeo jou teng leh akipedoh nailou district jouse a jong hopdohna um kit ding ahi.

Tu le tu hi ambulance ho kithopi ding ALS Ambulance achesa 2018 kuma pat ana umjing chu Covid-19 duty in nidan 24 sunga manchah thei ding in tuhin agomin Ambulance 25 aphatan ahi.

Health Minister Shri L. Jayantakumar, Water Resources Minister Shri Letpao Haokip, Chief Secretary Dr. Rajesh Kumar, Principal Secretary (Health) Shri V. Vumlunmang, Directorate Health Services Director Dr. K. Rajo hojong hiche kigon in ana pang’un ahi.

XXXXXXXX

Manipur a COVID-19 a thi khat umbe, agoma 39 phata, positive 96 kimube, 126 damdohbe

Imphal,  Sept 8(ET):  Tuni chun Kum 48 vel mi khat RIMS mun’ah COVID-19 natna leh natna jatchom khat toh kitho jeh in thina atoh kit in, hitoh kilhon chun tuchan a thina toh agomin mihem 39, alhingtan ahi.

Thina toh nunungpen hi Md Rahimuddin, 48, ahung kondohna Lilong Turel Ahanbi Khongnang Mathak, Thoubal district akiti in ama hi RIMS mun a nidan 7.10 chun ana muollien in ahi. Amahi achesa September nisim 3 nikho a chu Type 2 Diabetes, Bronchopneumonia leh COVID-19 natna jeh a admit ana kibol ahi tin thulhut chun aseiyin ahi.

Hitoh kilhon chun state sunga nidan 24 sung in COVID-19 natna nei thahbeh mihem 96 (milham 94 leh CAPF mi 2) aki mube toh kilhonin natna nei mihem agomin 7202 alhing tan ahi.

Dr Shasheekumar Manganga, Additional Director Health Department leh Spokesperson Covid Common Control Room in thuphon abolna ah, milham 94 hetdohbe ho lah ah, pasal 42 leh numei 52 ahiuvin, amaho hin mun chom leh gampam a lhun leh kuon doh na anei pouvin ahi. Natna kimube ho hi Viral Research & Diagnostic Laboratory  JNIMS a (14), RIMS RAT a (2), Raj Medicity a (18), Jiribam a (5), Ukhrul a (2), Churachandpur a (3), Bishnupur a (13), Mother’s care a (10), Chandel a (1), Tamenglong a (1), Jivan Hospital a (4), Babina Diagnostic a (9), Imphal East a (4) leh Thoubal a (10) ahi.

Amaho hi West district a (21), Imphal east district a (27), Thoubal a (17),  Bishnupur a (14), Kakching a (2), Jiribam a (5), Noney a (1), Chandel a (1), Tamenglong a (1), Ukhrul a (2) chuleh Churachandpur a (3) ahiuve. Hiche natna neiya kimandoh jouse hi COVID care facilities a koilut ahiuvin, angaikhoh dungjuiya vetkol a um dingu ahi tin CCR thuso chun aphongdoh in ahi.

Alangkhat ah nidan 24 sung chun Covid-19 natna a kon a damdoh mihem 126 lhadoh ana hiuvin ahi. Adamdoh ho hi CAPF (24), CCC Lamboikhongnangkhong (62),  CCC UNACCO (16),  JNIMS (9), RIMS (2) and RD Wing (13) amaho cheng hi RT PCR test kibol jouva Covid-19 anei tapouve tia lhakang ahitauvin ahi.

State in damdoh na langa adamdoh akibe jing toh kilhon in 76.14 percent alhing tou tan ahi. Hito lhon chun agoma damdoh hi mihem 5484 aphatan ahi. State sunga Covid-19 natna nei tu chan in mihem 1679 aum in, milham 1175 leh security personnel 504 ahiuvin ahi.

Health department in temna aneina ah, mipi jousen ahithei chan a eSanjeevaniOPD download ding ahi lou leh www.esanjeevaniopd.in a lut a government doctor ho inmun a kon jinglam nidan 10AM apat a nilhah lam nidan 3PM geiya Sunday nikho tailou a dohnom ho kidoh jing thei ahi.

Xxxxxxx

Mayang Imphal Rape Case a thina tohnu thilong nidan 72 sung’a lahdoh ahi louleh kigoulha ding ahi tai: Police

Imphal, Sept 8(et): Women Police Station, Imphal West a officer in-charge in Tuesday nichun gangrape kibol a ana kithat nu insung mite henga thiluong nidan 72 sunga ahung kilahdoh diuvin temna ana neiyin, ijemtia phattep sunga ahung kilahdoh lou leh district magistrate thupeh dungjuiya kisumang/kigoulha ding ahi ati.

Chapangnu thiluong hi RIMS hospital morgue a kikoi ahi in, tuni chan a koiman lahdoh ding agong pon, aki koisot chan in a muon cheh cheh e ahi tin officer-in-charge min a kisodoh chun aseiyin ahi.

Thupeh chom chom local newspaper, cable TV leh radio mangcha in a insungmi leh akinaipi hon ahung kipohdoh diuvin temna leh hetsahna ana kinei jing in hinla tuni chan in koiman lahdohna anei naipon ahi. Hijeh chun a kinaipi a insung miten thiluong hi ahung kilahdoh loi diuvin temna ahung kineiye tinjong thuso chun aseiyin ahi.

Thusodoh in aseibe na ah, thiluong amuon in, anamse cheh cheh in akimvel leh adeh a RIMS morgue a duty hodin tulai natna hoa boijing laitah ahitoh kilhon in tijat umtah leh hahsat na tampi jong alhunsah tan ahi ati.

Post mortem hi achesa September nisim 6 nikho a RIMS morgue mun a video coverage toh kitho a akisaipi doctor hon executive magistrate jaona in ana bol un ahi.

Kum 14 numei chapang gangrape kibol nu hi achesa September nisim 2 nikho a Mayang Imphal mun a lampam a suhset ahi jouva achangseh a kidalha ahi hetdoh leh mudoh ahi toh kilhon a RIMS hospital ana kipolut ahi in, hinla anatna athojou lou jeh in hospital mun ah ana muollien tan ahi. Hiche jou chun tuni geiyin RIMS morgue a koi ahijing nalaiyin ahi.

Hiche thilsoh toh kilhon in agomin ginmo a um mi 6 matdoh in aum in ahi. Hiche thilsoh toh kisaiya alubuh jep hidinga ngohna kinei Arish alias Naja leh matdoh a um adang ho – Md Salim Khan, 21, s/o Md Majahar Chesam of Heibong Makhong Mathak Leikai; Md Moor Mohhamad, 20, s/ Md Kalam of Heibong Makhong Mathak Leikai leh Md Feij alias Mohamad, 22, s/o Md Sanayai of Mayang Imphal Bangoon Mamang Loukok, amaho se hi tuchan a akimandoh ho ahiuvin, September 9 chan police custody hentang hidingu ahi.

Xxxxxx

CM in MOVCDNER noiya loubol mi 7500 kithopina sum homdoh

Imphal, September 8(ET): Mission Organic Value Chain Development for North East Region (MOVCDNER) noi a loubol mi 7500 hon amuding Dk. 7500 cheh le Manipur Old Age Pension Scheme (MOAP) noi a Go to Village mission sung a pension boldoh a um mi 20833 ho sum muding ho Direct Benefit Transfer (DBT) a Chief Minister Shri N. Biren Singh in tunichun ahenglut tan ahi.

Horticulture and Soil Conservation Department le Social Welfare Department gonna noi a chelha kingon a chun CAF and PD Minister Shri Karam Shyam, Water Resources Minister Shri Letpao Haokip, TA and Hills Minister Shri N. Kayisii, Education Minister Shri Th. Radheshyam, Forest and Environment Minister Shri Awangbow Newmai, MLA ban in high ranking official ho apang cheh un ahi.

Jin-Gun a pang CM Biren in asei na ah tamtah in Go to Village dem jong le hiche jal a chanvou chang dia lo mho hetdoh hi a aban le gamsung mipi thil ngaichat jong hetdoh a umthei ahi in, khantou machal lam jong apoimo nai hinla mitin in hinkho kilom aman thei nading lampi gondoh hi akhohjo ahi ajehchu lampi le in le lou ahoi apha umhen nat le sat le anngol in mipi um le ipi phachom ding ham, hijeh a mihem hinkho kikhel nading lampi gondoh ding hi tu government in khohsah pen a kinei ahi e, ati.

Mipi in government atosot jing le government in jong mipi a dia in le lou neidoh nading, sum le pai akilo nathei ding tohmun chujongle manbei dom a neh amuthei nading lampi gondoh thei nading a gancha vah le anche ninglhing tu nading lampi jong tohgon khat a kikoi ahitai tin CM chun asei e.

Hitolhon a Mission Organic Value Chain Development for North East Region (MOVCDNER) noi a registered farmer insung khat in kumkhat sung a Rs 7500 amuding chu mi 7500 ho a ding agom a crore 5.625 tunia DBT a hetlutpeh ahitai.

Chule achesa May 1, 2018 nia Go to Village chelhah sung a old age a dia min pelut mi 25,312 lah a chanvou muthei dia lhendoh mi 20,833 hon lhakhat a Rs 200 amuding chu March 2019 a pat February 2020 lha 12 sung a dia khatvei a amacheh account a thunpeh ahi.

XXXXXXXX

Class 9 apat 12 hon Sept 21 a pat jilkung ho kimupi thei ding;  Centre in ajui diu SOP sodoh

New Delhi, Sept 8: Union Health and Family Welfare Ministry in Tuesday nikho chun  September 21 apat a koi tobang class 9 apat 12 chan in school ho a voluntary basis a school mun a jilkung hotoh kimunom a doh leh sah neinom ho dinga phalpehna aneitoh kilhon in, simlai ho leh jilkung ho ding in jui ding standard operating procedures (SOPs) ana sodoh un ahi

Health Minister Harsh Vardhan thuphon in aseina ah, Government of India in phase-wise a kimanchah na chom chom ho ahin hondoh jing toh kilhon in, kimanchah na chom chom lhakang in ahung um in, hitoh kilhon chun atumbeh a simlai class 9 apat 12 koi tobang anom chan ading in school mun a jilkung hotoh kimuto theina leh jilkung ho akon a hetnom aneiho doh theina ahung lhung ding September 21 apat a phalpeh hiding ahi.

Hitoh kilhon a jilkung ho, mopohna neiho leh simlai hon ajuicheh dinga pha tahsa leh tahsa kinai lou ding, anaipen a feet gup a kigamlhat ding, mai kitom ding, khut silngim jing ding, eima mimal damtheina khohsah ding, chil set thang bollou ding chuleh School hojong online leh gal apat kihilna chejomg jing thei ding chuleh simlai class 9 apat class 12 chan anom chan in a jilkung ho toh akimuto thei uva dohnom anei jouseu adohthei nadiu phalpeh na school in apeh ding ahi.

Hiche hi nu le paten jihtho a phalna athum diu, hiche visit kineituo na sunga simlai leh jilkung ho kimanchah dan jong vetjui thei tah ahi ding ahi tinjong ministry thusodoh chun aseiyin ahi.

Hiche phalna hi containment zone pamlanga um school hobou hithei ding ahi. Chuleh jilkung, mopohna nei holeh simlai koi tobang containment zone huop sunga umho vang jaothei loudiu ahi. Kimanchah naho leh kihilna ho kipat masang ngeiya laboratories ho jaona a, kimanchah nading mun ho leh thamkhah jing theina mun ho sodium hypochlorite solution percent khat jaona a sanitize bol tei ding ahi.

Quarantine centres a ana kimangsa school ahileh hoitah a sanitized bol masat ding ahi. Teaching leh non-teaching staff hojong 50 percent beh a thahatna neijou leh damthei jep ho bou online leh tele-councelling ahilou leh kimanchah na dang dang ho a kou a pansah ding ahi.

Biometric attendance khel a kisuhkhah lou natei dinga attendance lamchom a bol nathei ding school langa mophna neihin agonpeh diu ahi. Phatseh a simlai leh jilkung hon tahsa kitongkha louva umjing diu anaipen a feet gup a kikah diu ahi.

Chuleh queue a kiguolna toh kisaiya dinna mun ho marking hoitah a feet 6 kikah a jihpeh ding ahi. Staff room holeh office area ho a physical distancing hoitah a chepi hi ding ahi

Kho aphat nah a guo le dai akailou nah leh pamlanga jilkung leh simlai ho kihoulim khomna phalpeh hiding ahi. Hiche hin damtheina leh physical distancing protocol phatah a asuh bulhit sahthei ding ahi.

Kititkhomna, kicheo golseh kitiho hatah a khamgah hijing nalai ding ahi. School in state helpline number ho leh local health authority ho number hoitah a jilkung, simlai leh employees ho muthei dinga atahdoh diu, kinkhoh leh boina aum leh contact abol jeng thei nadiuva kichehtah a atahdoh diu ahi.

Air-conditioning ahilou leh ventilation hoa dinga CPWD guidelines hoitah a ajui cheh diu, air temperature setting range jong 24-30 degree Celsius, hi ding chuleh relative humidity range jong 40-70 per cent hiding ahi. Huitheng lahlut na leh cross-ventilation kitohchet a koi tei ding ahi.

Student lockers hojong manchah jingthei hiding ahi. Hinla physical distancing leh  regular disinfection hoitah a manchah jing ding ahi. Gymnasiums mun a jong ministry guidelines ho phatah a ajui ding, hinla swimming pool hovang phal hinai louding ahi.

Chule juicheh ding SOPs hi skill or entrepreneurship training institutions, higher educational institutions a doctoral courses leh post graduate studies na a technical leh professional programmes adia laboratory leh experimental work kibolna mun ho a ding jong ana sodoh un ahi.

Xxxxxxxx

Hmar Students’ Association GHQ in ATSUM, ANSAM leh KSO-GHQ ho thilngeh tosotna nei

Ccpur, Sept 8(ET): Hmar Students Association (HAS-GHQ) in ATSUM, ANSAM leh KSO GHQ hon All Manipur Hill Districts Contract Teacher Association 2006 a ho regularization bolding,  Government college chom chom a ST ho dinga tohmun ong ho atumbeh’a lah na anei ding leh hill district hospital ho a specialist doctor koi ding thu a ngehna anei ho HAS GHQ injong kitosot jing ding ahi ati.

Government in phat sottah thinglhang mite thuneina nahsah louvin akoi jing in, minister leh officer hotoh seikhomna ana kinei jing in chuleh suhbulhit dinga kinopto na tampi vei ana um nung injong tuni chan in atah a muthei leh hetthei a tohdoh aum naipon ahi.

Hitoh kilhon chun government in akitepna ho mutheiya boldoh imacha aneilou jeh in kitahsan lelna apung cheh cheh in, kitepna sa hojong notthap in aum jingin ahi. ST ho dinga Assistant Professor tohmun ong kilo dim lou phabep kilah nading hihen, hill districts sunga specialist doctor koi lut nading hihen, MIL jilkung kilah na ding hihen chuleh high school leh higher secondary ho suh pilhing nading tiho hi akingeh thupi pen khat chu ahi. Government in tuni chan a kihetmosah tah a lungthim thim a ahin bolna hi kumtam tah ache tan ahi, hche jeh a hi kimoh umthim lou ding ahi tin jong aseiyun ahi.

Hiche chungchang thu hi akin thei lam pen a ahin khohsah ding, akingeh ho tah ahinso loi ding, lunggel bang lout ah a government in donse na ahin neilou leh HAS injong dan toh kitoh a kiphinna kiloikhom na chom chom hotoh kinei ding ahi tinjong thusodoh chun atahlang in ahi.

Xxxxxxxx

SMO, NVBDCP in phatah a natong lou ASHA ho holdoh ding’a hetsah nanei

B.Lalboi Gangte

CCpur. September 8(ET):  Dr. Thangpa Serto, State Malaria Officer, NVBDCP Manipur in tuni ( Sept 8) memorandum asodoh na’a District chom chom’a ASHA active tah’a natong louho holdoh cheh ding in hetsahna aneiyin ahi. Hetthei khat chu hiche thusoh hi Principal Secretary, Health & Family Welfare Govt. of Manipur deina leh achesa Jan. nisim 30 nikho’a thuso umsa dungjui’a kichelhah pi ahi ati.

Hiche toh lhon’a thusoh in atahlang na’a District chom chom’a  District Malaria Officer jouse in amaho thunei na hopsung’a um ASHA active lou ho ahung lhung ding Sept. nisim 15 sung kah’a aholdoh ding uva hetsah ahi. Chule hetsah na kinei hi SMD, DC, CMO, SNO (ASHA) & SNO NVBDCP ah jong pelut ding in aseiyin ahi. Kisem thah na ding’a lha 1 sung phat kipe sung’a um kha ASHA jousen hiche phat kipeh phat sung’a jong amopoh nao angaisah lou uleh ahi naova akon terminate bol ding jong thuso chun atahlang in ahi.

Xxxxxxxxxxxxxxx

Health Minister in Rural Collection Centre le AYUSH Store hongdoh

Imphal, September 8(ET): Health and Family Welfare minister Shri L. Jayantakumar Singh in Rural Collection Centre le Imphal East hopsung Kairao a AYUSH Store le Godown chule Lamphelpat a Directorate Office AYUSH tunichun anigel in hondohna aneitan ahi.

Minister Jayantakumar in mihem in tahsa damthei le hinsot ding adeicheh tolhon a government in health sector hi gelkhohna anei ahi, ati. Alhangpi a allopathic kijenna bou hi mipi in kingapna anei hijongle tahsa natna jatchom chom jen nadia AYUSH kijenna jong hi phatah ahi e tin Minister chun aseiye.

Adeh a tulai a dia AYUSH Department in aboldoh AYUSH IMMUNE PLUS hi mihem tahsa hatsah nadia phatah ahi in hitobang Rural Collection Center hondoh a aum hi state a dia amasapen adeh a loubol le kiveimi ho dia phachom tah hiding ahi e tin Minister chun aseibei.

Law & Legislative Affairs jong mopohtha Health Minister chun Imphal East a District Court semdoh nadia angaicha gam leiset jong Law Department in gontoh sa akoi ahitan aban a Imphal East a ding district hospital sahding jong tohgon a kinei ahi, ati.

Keirao Assembly Constituency MLA L. Rameshwor in Rural Collection Center hondoh a aum hi Imphal East loubol ho dia phachom dehset ding ahi e tia asei ban in hitobang tohgon hin gongdoh health minister chung a jong akipana aphongdoh in, government tohgon ho tosot cheh ding in mipi temna jong anei in ahi.

Kingon a chun Member Secretary, National Ayush Mission, Manipur, Dr. A. Guneshwor Sharma, Director, Department of AYUSH, Manipur, Dr. Y. Lukhoi Singh le AYUSH department official ho jong apang un ahi.

Xxxxxxxxxx

Tengnoupal District a kho 2 kikah’a boina anasoh

Tengnoupal, Sept. 8 (ET) : Tengnoupal District hopsung Sora kho sung akon miphabep in Minou kho sung miten thinglhang lam’a go (bamboo) akikoi’u anaguhdoh peh jeh uvin kho sung ni kikah in boina anasohdoh in ahi tin thulhut chun seiyin ahi. Hiche thilsoh chung thu’a Sora leh Minou akon village authorities leh SDPO Kakching chuleh OC Kakching makai na in kihoukhomna ananei utoh lhon’a thil gudoh hon Dk. 2000 peh ding’a kihouna anei lhah thei jeh uvin boina ima umbe talouvin kihouchamna ananei tauvin ahi akiti.

xxxxxxxx

CM in e-Office file management system hondohna nei

Imphal, September 8 (ET): Chief Minister Shri N. Biren Singh in State Government a dinga kisem e-Office File Management System amin https://eofficemanipur.nic.in kiti chu Chief Minister’s Secretariat a Cabinet Hall munah kikhop khomna kingon ah hondohna ana neitan ahi. CAF leh PD Minister Shri Karam Shyam, Forest and Environment Minister Shri Awangbow Newmai, Chief Secretary Dr. Rajesh Kumar leh state sunga mopohna nei milen milal phabep jong hiche kingon ah ana pang un ahi.

Kingon kineina a Chief Minister a houlimna ah state sunga mopohna nei officer hon phat hahsa le boi tahtah in toh ding thamding ho ana kimaituopi jing un ahi. Achesa kum ni kum thum masang injong boina leh phat hahsa tah tah in ana lhunkhu ji jong leh state government sunga officer hon bailamtah a boina ho ana kimaito pi jidan ho’u chungah pachatna jong ape’n chuleh atoh diu dol tohjou theina  aneijing thei nau chungah alunglhai dan jong ana phongdoh in, chuleh hiche kivaipohna sunga kitahsan tuona ahung umcheh thei nadinga e-Office hung kisemdoh jong amaho tohga khat ahi ati.

Hiche e-Office akonna official file ho bailam tah a lhadoh jing ahung hi a nehguh chahguh umlouva kivaipohna ahung machal jing ding akinepna jong aphongdoh in ahi. Chuleh mopohna nei officer hojong khat le khat akijahmat tuo jing uva kithokhom jing ding injong temna aneiyin ahi.

  1. Biren Singh in aseibe na ah, state government injong Good Governance toh kisaiya CM’s Award semdoh nading tohgon akineiyin, hiche hin adeh a amun mun a DC ho, Secretariat a officer ho, HoD’s leh Chief Engineer ho atohphat nau melchihna leh kipapina a kipe ding ahi. Tumasang jep chun Prime Minister Shri Narendra Modi in jong ‘Mission Karmayogi’ ana phongdoh in hitoh kisamkai a award hi hung chekhom ding ahi ati.

Hiche e-Office hin Government office ho a hatah a office natoh paper kimanchana ahin suhlhom ding, thengthou tah a state government sung hihen state pamlang hijong leh kivaipoh na hatah a ahin navahsah ding ahi.

State a dinga e-file masapen chun achesa nisim 11th June 2020 nidan 10:43 PM chun ana kimang pan in ahi. Hiche e-Office hi State Government sunga Department jouse a phase-wise a manchah hung hiding chuleh district 16 hoa jong hung kimang cheh ding ahi. Department 48 gah hetthei dinga Finance, Home, Health, Forest and Environment, GAD, DP, PWD, Water Resources, etc. ho a gontupsa ahitan ahi tan ahi. Tu le tu hin user 509 enrolled akibol tan e-dak 590 leh e-files 385 chu e-Office a dinga semtup leh chesah ahitan ahi. Chief Minister’s office leh Cabinet Minister’s offices ho manchah thei dingin jong gontup na achelhah jing lai ahi.

Tahsa tah a file le dak kisem leh kichoile ho ahunglhung ding November, 2020 jou teng leh hung um behseh talou ding, e-Office a hoitah a December 2920 jou teng leh Manipur Government jong Digital platform khat hung hiding 100 per cent paperless a natohna hung um ding department jouse ahin huop ding ahi.

e-Office suhpilhing thei nading a IT toh kisai manchah ho department jouse toh seikhomna jong aum in ahi. Hitoh kilhon chun Digital Signature Certificates (DSC), Desktop, Scanner, Printers kiti ho Government natong ho henga hoppeh hidingu ahi. Additional funding jong Sum le pai lut avat dungjuiya guon hiding ahi.

Chule Laptop policy jong government officer ho a dinga gonpeh hiding ahi. Hiche hin government natong ho dinga a kholjin na mun ho a kon hihen inmun a aumna mun akon hijong leh bailam tah a atoh diu dol akitoh thei jing nadiu khat hung hiding ahi.

XXXXXXXXXX

GoM in mining company toh kinoptona 7 hi mipi donglou a abollhon ahi: CPNRM

IMPHAL,  Sept. 08(UNA): Manipur government in state sung a chromites le limestone lah dia minig company toh kinoptona 7 aboldoh hi agam mipi donglou a abol lhon ahi e tin Committee on the Protection of Natural Resources in Manipur (CPNRM), Keisampat Imphal in tunichun aseiye.

State government in kinoptona hi M/s Sarvesh Refractories Pvt. Ltd, M/s Rourkela Minerals Pvt. Ltd, M/s Kotak Resources, M/s Gulf Natural Resources, M/s Visa Steel Ltd, M/s Manipur Mines and Minerals Pvt. Ltd., M/s Balassore Alloys Ltd chule limestone lahna dia M/s Super Ores, M/s Gulf Natural Resources, le M/s Ramung Enterprises toh mipi donglou hel a abollhon hi gam leiset thu a mipi khonung hi seitheilou dinmun alhut tei ding in CPNRM chun aseiye.

Singcha Gamnon a Chromite lahding tohgon hi Environment le Forest hetpehna umlou hel a 2017 le 2018 a chu phatsah a ana um ahi. Chromite lahding tohgon mihem a dia aphatmo thei ho vang tahlah ahikit pon ahi. Hinla phat masalai a chemical jatchom chom in atomden Manipur gam leiset a Chromite lahding hi mipi a dia setna tamjo din akilang e ajehchu mining a dia gam lah be jing chun mipi chen le ge asuhboi ban a khonung bin na sothei ahitolhon a hiche tohgon hi ngahding in CPNRM convenor Pamei Tingenlung chun government temna anei in ahi.

================

Arunachal a mi 5 kiholmo ho umna akihe tai: Kiren Rijiju

New Delhi: Arunachal Pradesh mi 5 holmo a um ho China People’s Liberation Army (PLA) in akom uva pat amudoh dan in ahin sei uve tin Union Minister Kiren Rijiju chun asei e.

Rijiju in asei be na ah mi 5 ho pehdoh ding chung chang a kihouna chelhah lai tah ahi e, ati. Mat a um mi 5 ho damsel a lhadoh ahi nadiu ngaito dia Congress MLA Ninong Ering in Defence Minister Rajnath Singh kom a ngehna ana nei ahi.

Ering in asei na ah India gam hoilai tah Arunachal Pradesh a hitobang thilsoh Russia gam umlai le China gam akibahpi kimutopi ding Defence Minister Rajnath Singh dia thilnom hilou hel ding ahi e, ati.

============

AMUCO in dihna dinpi dia phongdoh

Imphal,  Sept 8(UNA): Melsetah a suhgenthei jou a Bishnupur district hopsung Ningthoukhong achenna mun a August 15, 2020 nia akikhailih dan a kibol Laishram Angamba chungchang dihtah a tanlhah ding deisah nale atosotna All Manipur United Clubs’ Organisation (AMUCO) in tunichun aphongdoh in ahi.

AMUCO publicity secretary Brojen Irom in asodoh lekha chun asei na ah Laishram Angamba chungchang adih a boipi dia kisemdoh Joint Action Committee (JAC) atosot na le themmo chang taphot thichan gotna pehdia jong ngehna aneiban a themmo chang matdoh hinai hih jong le athinu chungthu hi dihtah a tan angai e, ati.

Chule hiche thil so jou September 2, 2020 nia jong Imphal West district sung a numei chapang khat ahon in asuhset jou a khohelou a dalhah a ana um kit ahin hitobang deiumlou thil aso jing hi government in atuhtang a themmo chang ho thichan gotna agan nathei pen a pehding hi mipi’n angalal boldoh thei chu mipi ding gel government hibep ding ahi, ati.

AMUCO in September 4, 2020 nia State Bank of India CCpur main branch ATM a sum koi dia che Arambam Ranjan kaplih thu a miphalou ho matdoh ahilou le September 9 a pat ATM jouse khadia government gahna kibol hitobang hesohna thu a kiphin ding tohgon hi kitosot ding ahi e, ati.

AMUCO in aseikit na ah thilphalou kipatna khamnathei tuhtang ahiteng gamsung a thilphalou beibep ding ahi, hiche hi government anop le abol lel ding ahipon chule chamdel a chenkhom thei nadia government in tohgon achesot ding asemdoh angai e, ati.

Xxxxxxxxxx

Tata Dimper khat in mi khat anatangkha

Imphal, Sept. 8 (ET): Lamding Cherapur akon (L) S. Gokul Singh chapa Sanasam Samer Singh (70) chu tunin cycle toh pum’a ahung lhai in Tata Dimper khat in Wangjing mun’a anatah khat in apet pet in JNIMS Hospital a anapolut uvin ahin Tata Dimper chu ajamdoh man in ahi tin thulhut chun aseiyin ahi.

Hiche toh hon’a Tata Dimper tol Wangjing Awang Leikai akon S. Kiran Singh chapa Soibam Anand Singh (28) chu Addl SP (L&O) Lakshay Sharma leh Addl SP (Ops) Sachidanada Soibam makai na’a team in pan nasatah’a analah nachung’a anamatdoh’u ahi.

Xxxxxxxx

Nagaland a Covid +ve case thah 42 kimudoh; adamdoh 173 discharge kibol

Kohima, Sept. 8: Nagaland a Covid +ve case thah janni (Sept. 7) nikho’a 42 akimudoh lah’a 37 hi armed force personnel ho, 3 hi trace contact akon chuleh frontline worker leh returnee ho khat cheh ahitoh lhon’a agom’a case 4,220 alhing tan ahi. Chule thah kimudoh 37 armed force personnel lah’a 35 hi Dimapur akon chuleh 2 hi Kohima akon ahi. Hiche naban’a trace contact akon 3 lah’a 2 hi Kohima akon chuleh khat hi Dimapur akon chuleh frontline worker khat leh returnee khat hi ani lhon’a Kohima akon ahi.

Hiche toh lhon’a Nagaland gamsung’a Covid +ve case agoma’a 4,220 lah’a 1,823 hi armed force personnel ho, 1,297 hi returnee ho, 7941 hi traced contact akon chuleh 309 hi frontline worker ho ahi. Covid-19 akon damdoh nanei thah 173 lah’a 91 hi Kohima akon, 78 hi Dimapur akon chuleh Peren leh Wokha akon 2 cheh ahi. Hetthei khat chu Peren leh Longleng akon Covid natna nei jouse adamdoh tah jeh in Nagaland sung’a District jouse lah’a amani District sung hi Covid-19 active cases um napen ahitai.

Xxxxxxxxxx

India a nidan 24 sung’a Covid +ve case 75,809 kimudoh; agoma’a case Lakh 42.8 val ta

New Delhi, Sept. 8: India a nidan 24 sung’a Covid case thah 75,809 akimudoh toh lhon’a tuni chan’a agom’a case 42,80,422 alhing tan chuleh thina toh 72,775 alhing tan ahi tin Union Health Ministry data akon akimudoh in ahi. Chule hiche phatsung ma ma’a Covid akon damdoh 33,23,950 discharge akiboldoh toh lhon’a recovery rate 77.65 per cent alhing tan ahi. Hetthei khat chu India ah Sunday leh Monday nikho seh seh in case 90,000 val aum in ahi.

Hiche toh lhon’a data dungjui’a India a active case 8,83,697 aum tan chuleh India a August nisim 7 chan chun case Lakh 20 aum in ahin August nisim 23 nichung Lakh 30 aval in chu jou in Sept. nisim 5 chan in Lakh 40 akhel tan ahi. Chuleh Indian Council of Medical Research dungjui’a Monday nikho’a sample 10,98,621 test kibol nalah’a covid +ve 5,06,128 akimudoh in ahi akiti.

Xxxxxx

Mizoram a Covid +ve case thah 9 kimudoh; agom’a case 1,123 lhingta

Aizawl, Sept. 8 : Mizoram a Covid +ve case thah tuni 9 akimudohbe toh lhon’a agom’a case 1,123 alhing tan ahi tin State Health Depatment akon thulhut kimu chun aseiyin ahi. Ahin Covid natna jeh’a gamsung’a thina toh koima vang aum naipon ahi ati. Chule tu le tun active case 391 aum in hiche naban’a Covid akon damdoh 732 jong discharged akibol tan ahi.

Hiche toh lhon’a Ministry of Health akon thulhut kimu dungjui’a India a Covid-19 case 42,80,422 alhing tan hiche lah’a active case 8,83,697; discharged 33,23,951 chuleh thina toh 72,775 alhing tan ahi.

xxxxxxxx

NIPCO in numei chapang nu suse ho gotna peh ding’a ngehna nei

IMPHAL,  Sept. 8: The Regional Identity Protection Council (NIPCO) in achesa Sept. nisim 1 nikho’a Mayang Imphla Assembly Assembly hopsung Loukok mun’a numei chanpang khat kisuhset nachung’a mona neiho ahinkho’a songkul tansah ding in Govt. heng’a ngehna anei in ahi.

Hiche chungthu’a NIPCO Secretary Pebam Bishambor in mopoh nanei hon hitobang thilsoh ho’a court khat hoitah akoi ding’u hitobang thilsoh dei umlou tah hohi maban’a ahung soh kit nalou ding’a phatah’a agelkhoh ding ngai ahi. Chuleh hiche numei chapang insung miten achanu’u damdoh ding deina’a RIMS a ajen jing lai uva damdoh joulouva athina chung’a alunghempi nao leh akipalou nao jong aphongdoh in ahi.

Xxxxxxxxxx

MP Maharaja Sanajaoba in RIMS a Dilyasis Treatment Center thah hondoh nanei

IMPHAL, Sept 8(UNA): Rajya Sabha MP Maharaja Sanajaoba Leishemba in tuni chun Regional Institue of Medical Science, RIMS ah Dialysis Treatment Center thah hondoh na ananei in ahi. Kingon achun Medical Superintendent of RIMS Prof Ch Arunkumar Singh, Head of Nephrology Department K. Doungel, Deputy Director (Admin) Dr. T Broken Singh,  Heads of Departments, Medial akon faculty, dental and college of Nursing, Nursing Superintendent leh official chom chom in pan anala uvin ahi.
Hiche toh lhon’a Maharaja Sanajaoba Leishemba in aseina’a bed 10 um na Dialysis Treatment Center kisa thah hin mipi ho ding’a phatchom na tamtah ahin poh lut ding ahi ati. Chuleh RIMS Director Prof. A Santa Singh in Manipur leh Northeaster State sung’a cheng mipi jouse health care facilities hoitah peh ding hi lungtup anakinei jing ahi. Chuleh hiche tohgon kibol doh hi RIMS a ding’a kikhel nakhat ahi naban’a hiche akon machine thah 10 leh Nephrology Department ading 3 RO jong kikoi thei ding ahitai. Hiche akon Nephrology Department in medical field akon DM Doctor 2 jong asoldoh thei ding ahi. Hiche nachung chon’a institution in jong kidney transplantation hi maban’a AIIMS, Delhi/ Gujarat Govt. toh kitohkhom nanoi’a bol pan ding in lunggel jong akinei jing lai ahi ati.