CM Biren le Tiken Delhi gaki khojel (Thingnoi hohi govt sepai hitam?)

CM Biren le Tiken Delhi gaki khojel (Thingnoi hohi govt sepai hitam?)

59
0
SHARE

CM Biren le Tiken Delhi gaki khojel
(Thingnoi hohi govt sepai hitam?)

Leiset chunga gal boina lentah tah le mihem tamtah tah kithatona umjing hi mi khat le ni lungthim phatlou jehleh let le lal di deijeh ahibanga tutua Manipur govt sunga kiboina umjing jeh a mipi tamtah gentheina leh khantou machalna natoh ho kisuh theilouva um jong BJP le NPP sunga MLA themkhat let le lal di kichu jeh ahibouve. NPP le BJP hi govt pokhom’a apan lhon vanga itileh kisuh lhahto diham ti bou ahaboipi lhon jeh a adang dang jong boilo ahi. Kihoutohna um hitam akiti vanga naisailou hidan ahi het theina chu ahung lhung ding By-election a NPP hon jong candidate atum’a neidi atiu hi ahi. Govt pokhom party 2 election a akitet lhon di kiti hi datmo umthou ahi. By-election hung umdoh lona jong NPP hon BJP govt sotlhuh di tia ana kipeiji jeh uva BJP honjong govt lhouna di lampi phapen hi Congress a kon BJP a chomlut ho Resign kibolsah a by-election a BJP a kaisah di, chuteng NPP ho pehdoh di ti hi ahi. Hiche hi koiman akam’a aseidohlou vanga angolpen ninjong ahet jeng thei khat ahi. NPP ho pehdohna dia by-election hung naita’a Congress a kon BJP chomlutna Resign kibol ho BJP ticket kipe teidi ahi tina aumpoi kiti thu ahung gindoh hi moh thulamleng jong himaithei jongleh hiche jeh a Chief Minister (CM) N Biren leh State BJP party President Prof. Tiken Delhi langa aga kikhotho kit jeng chu State BJP hojong kihollelna khat ahinnei u mutheina ahi. Party dang’a kon MLA Resign kibola BJP a chomlut jouse akit election teng BJP ticket kipe jeng di ahi ti hi State party lamkai hon anasei u hijongleh Centre langa BJP lamkai hon ichan’a hetpehna ananei uham kihelou ahi. Ahin congress a kon BJP a lutna MLA kisan hailo ho kinepdan hi hitobang ex-MLA khat nin govt toh thingnoi ho kithoa by-election a “eisot diu” ahijeh in eiki tetpi ngapcha jong umpontin ‘un-contest’ in kikai jeng inte tia gel loi umleu ahi.

Govt poa pang ‘Ruling govt’ chun Ruling party candidate chu asotdi hisa ahi. Ahin govt to thingnoi kithoa Ruling party candidate khat asotdi kiti hi ponnoi thuguh hijongleh lhangphong tah a akiseikal chu thingnoi hohi Ruling party sepai khat bep hidoh tina ahi. Hiche hi govt leh thingnoi ho dia jachat umtah ahi. Ceasefire/SoO a um thingnoi hon election a Ruling party candidate asot teitei diu tina umlouhel, Political Talk tojong election hi athua akimatna umlouhel khat hididol ahi. Ruling BJP candidate khetlhahna dia achesa MP election a Ceasefire a um Naga thingnoi hon Manipur le Nagaland a lhangphong tah a NPF candidate asot ujong chu Ceasefire/SoO a um thingnoi hon Ruling party candidate asot teitei diu tina aumpoi ti mutheina khat ahi. Political Talk hi koi party hileh power a um umtoh kihouna neidi tina ahin tua hi Ruling party ho candidate sonlou lou chu political talk kibolpi talou di tina um hile kilom jeng hi datmo umtah leh kinoisena chungnung ahibouve. Chule hiche hi thingnoi ho election a lhangphong tah in kikum uhen ti phatsahna leh hetpehna (recognise) jong ahi. Election hi party khat lunggel le chepi (ideology) dung juija candidate ho kitet diudol ahin tua hi ipi ideology umlou, Candidate hole atoson thingnoi thingchung hon power a um um party beldi kichutho jeng ahi.