CM Biren in gamsunga COVID-19 dinmun velvetna nei; COVID Care Centre hon...

CM Biren in gamsunga COVID-19 dinmun velvetna nei; COVID Care Centre hon doh be dinga sei

38
0
SHARE

CM Biren in gamsunga COVID-19 dinmun velvetna nei; COVID Care Centre hon doh be dinga sei

Imphal, June 26(ET): Chief Minister N. Biren Singh in Chief Minister’s Secretariat mun a Friday nikho a COVID-19 Task Force meeting alamkaiyin, chule mopohna nei official hon atha ajung u Covid 19 nat douna a apeh diuvin thuhilna jong aneiyin ahi.

Pandemic toh kisaiya boina ho thu a aphat tin a (24X7) ka um ding ahi, tin CM in aseiyin ahi. Manipur gam a achesa kal khat sunga hi niseh le Covid 19 test kibol jat (capacity) kal cheh cheh ahi in, tua hi gamsunga testing lab ho a nikhat a sample 2000-2500 chan test kibol thei ahitai. Hiche jeh a sample test bol louva um jat hi lhom cheh cheh ahi. Gamsung in tuchan geiya sample 45,000 val test abol ahitan chule positivity rate hi 2.33% a um ahi.

Natna neiho aganna thei pen a akijen a khohsahna akipeh theina dinga sorkar in aumsa RIMS, JNIMS, UNACCO School le Bishnupur District Hospital a COVID Care Centre akihong sa chunga hi Senapati, Kangpokpi, Churachandpur, Ukhrul, Tamenglong le Thoubal a COVID Care Centre hondoh ding tohgon aneiya chule Imphal West a jong center ni hon be dinga tohgon anei ahi.

June nisim 26 nikho chan a Manipur a natna a kon kijen dam mi 393 lhing ahitan chule recovery rate hi 36.55% a kal ahi. June nisim 25 nikho chan a positive case kihedoh agom a mi 1056 lah a mi 529 hi Delhi a kon hung kile ho hiu ahi. Natna nei atamjo (1056 lah a 921) hi kum 19 le 49 kikah hiu ahi. Chule June 25 chan a Tamenglong district a positive 137 um a, Manipur a dinga Covid 19 positive atamna pen district hi ahi.

Alangkhat a, Health Services Director Chairman hina a member li umna COVID Admission Committee asemdoh uvin, Covid 19 positive jouse phatah a akijen nadiu chule COVID Hospital ahiloule COVID Care Centre a adamlou ho kijenna dinga mopo dinga kisemdoh ahi. Principal Secretary (Health) in achesa June 24 ni a hiche thu a order asodoh ahitai.  RIMS ahiloule JNIMS a natna nei anatna soh (symptomatic) ho admit kibol ding ahi. Medical Superintendent, RIMS le JNIMS in amaho tobang natna nei ho akijen nading lupna aval/a ong aumtei nadinga avetsui ding chule CMO hon COVID Admission Committee toh ngaichat chan a kihoutoh na aneidiu ahi.

Committee hin COVID 19 Hospital le COVID Care Centre ho a lupna kimang chule a ong jat avettup diu chule Medical Superintendent ahiloule in-charge, hospital le COVID Care Centre hon Committee ho aphat tin a update abol jing ding ahi.

CMO jousen Covid 19 positive case ho centre a admit akibol tei nading a Committee henga che diu chule Committee Chairman in iti phat hijong le angaicha admission akibol tei nadinga pan alah ding ahi.

Manipur a Covid-19 case 1,075 lhingta, mi 39 damdoh be

Imphal, June 26(ET): Manipur gam a Covid 19 positive case Friday nikhon mi 19 akihetdoh be in, hiche toh kilhon a gamsunga natna nei agom a 1,075 lhing a chule active case 682 um ahi.

Athah a kihedoh case 19 holah a sample 15 hi Virus Research and Diagnostic Laboratory (VRDL), Regional Institute of Medical Sciences (RIMS) a test kibol a chule adang 4 hi Jawaharlal Nehru Institute of Medical Sciences (JNIMS) a test kibol ahi.

Alangkhat a, natna nei mi 39 RT PCR test abol nauva Covid 19 negative ahi jou uva hospital a kon discharged akibol tai, tin official thulhut in aseiyin ahi. Manipur a Covid 19 natna a kon damdoh hi 393 lhing ahitan, recovery rate gamsunga 36.55 per cent a um ahi, tin Additional Health Director Dr K Sasheekumar Mangang in aseiyin ahi.

Achesa nidan 24 sunga positive athah kimu be mi 19 holah a Thoubal mi 9, Ukhrul mi 5, Churachandpur mi 3 chule Senapati le Kamjong district mikhat cheh pang ahi. Amaho hi abon uva JNIMS, UNACCO School COVID-19 Care, Imphal a kijen dinga achon u ahitai. Chule natna vetkol nadinga ‘contact tracing’ le ‘containment process’ hojong apat u ahitai.

NPP MLA ho apanmun lui a akile kit MLA Joykishan in alunglhai louna thu sei

Imphal,  Jun 26(UNA): MLA Khumukcham Joykishan in NPP MLA 4 ho BJP lamkaina coalition government a akile kit kidang asahna thu aseiyin ahi. NPP MLA 4 hohin coalition government a kon haina anei jou uva Congress toh SPF kiti kiloikhomna asem u ahi in, tua apanmun lui uva kile kit nadinga thulhuhna aneiyu hi lungdon umtah ahi, ati.

BJP le NPP legislature ho kah a asungthu a boina aumjeh a Congress lamkaina SPF coalition kisem ahi in, NPP MLA hohin Congress party ho kot akiuva, tua Biren lamkaina sorkar suhlhuh nadinga kithopina athum u ahi. Congress injong opposition hina a amopohna abol a, constitution boina huhdoh nadinga party dang dang toh SPF asemdoh ahi, ati.

Tu masanga NPP MLA L Jayentakumar le  Y Joykumar toh Congress legislature party hon politics toh kisaina neiya kihouna chom chom ananei nauva BJP party tosotna a kon haina dinga thulhuhna aneiyu ahi in, L Jayanta amatah injong social media a , “NPP dinmun hi kicheh tah chule achaina ahi, kihouna ding, nungchon nading mun aumpoi”, tia anasei ahi, tin Kh Joykishan in aseiyin ahi.

NPP MLA ho BJP a akile kit uva, Chief Minister le akiloikhompi BJP legislature ho demna thu sangtah aseiyu kal khat jong lhing manlouva apanmun lui a akile kit uhin lunggel pilhing louva mipi natong dinga kilom/lhingjou ahi pouve, ti kicheh tah a avetsah ahi, ati.

Keima constituency miho chule Manipur gam mihon thutah ahet nom ahi, tin Joykishan ina seiyin, chule NPP le BJP kah a boina aum thu hi mipin ahet soh ahi, ati. NPP le BJP kah a boina aum hi Congress party in mopohna lentah anei akhan be cheh na ahi, tin aseiyin chule mipin tua hi Congress party ho gamsung a dinga itobang thu hijong leh ading jing e, ti ahet them diu ahi, tin aseibe in ahi.

Achesa nidan 24 sunga India a Covid 19 positive kihet doh be le natna a kon damdoh jat tamna pen record hi

New Delhi, June 26: India gam a coronavirus case ani seh a akal cheh cheh in, tua hi nikhat a 17,000 val case thah kihetdoh be ahi. Friday ni a India gam a coronavirus case athah 17,296 akimudoh be toh kilhon a, nikhat a natna akimube atamna pen ahitai.

Natna nei agom a 4,90,401 lhing a chule mi 407 athi be toh kilhon a natna jeh a thi jong 15,301 lhing ahitai, tin Union Health Ministry in Friday jingkah nidan 8 a thuso anei uvin ahi. Ni 7 kijom a India gam a case athah akihetdoh be 14,000 aval na ahitan, June 1 a kon June 26 sunga hi case 2,99,866 kibe ahi.

India gam a achesa kal khat sunga Covid 19 case 28.5 per cent a akal hi US, Brazil le Russia gam a sanga sangjo ahi, tin World in Data in aseiyin ahi. Friday jingkah chan a natna a thi mi 407 lah a Maharashtra a mi 192, Delhi a 64, Tamil Nadu a 45, Gujarat a 18, West Bengal le UP a 15 cheh, Andhra Pradesh a 12, Haryana a 10, Madhya Pradesh a 8, Punjab a 7, Karnataka a 6, Telangana a 5, Rajasthan a 4 chule J&K a 2 ahi.

Natna a thi hop 70 hi natna chom chom nei ahiuve, tin health ministry in aseiyin ahi. Case thah kisei rate hi lockdown akilha ong a kon kal ahi in, natna a kon kijen dam jong kal jing ahi. Nikhat sunga damlou mi 13,940 adam e, tia health ministry data in asei ahi. India a active case hi tua 1,89,463 ahi in, chule mi 2,85,636 kijen dam a, mikhat agam a kile ahitai.

Natna a kon kijen dam hi 58.24 percent ahi, tin health ministry official in aseiyin ahi. Thursday nikho chan a natna a kon damdoh hi agom a 2,71,696 lhing ahitai. Indian Council of Medical Research (ICMR) in asei dungjuiya, June 25 chan agom a sample 77,76,228 test kibol ahitan chule Thursday nikho a bou sample 2,15,446 test kibol ahi.

KIC in SDO/SDM Sharath chule Covid 19 pandemic sunga frontline worker jouse chunga kipathu sei

Ccpur, June 26(ET): Kuki Inpi Churachandpur in KIC Complex, Tuibong, Churachandpur a street solar lamp thum tungdoh a Sharath Arroyu, IAS, SDO/SDM, Tuibong TD Block chunga kipathu asei uvin, mipi phatchomna dinga anatoh hi pachat umtah ahi, tin asei uvin ahi.

Chule Pawan Yadav, Deputy Commissioner, Churachandpur, Amrita Sinha, IPS SP/Churachandpur, Dr. Vumchinpao, CMO, ADCC chule health care professional jouse le CSO hon Covid 10 pandemic sunga asun ajan a frontline a pan alah jeh uva Kuki Inpi Churachandpur in abon chau chunga kipathu asei uvin ahi.

Doctor, nurse, paramedical staff, police personnel, government teacher, NGO le volunteer, natna douna a pan la jouse chunga KIC in kipathu aseiyin, tu dinmun a hi ahinkho boina thei dinmun a koiya mipi natong a amaho pachatna thu avel a kaseiyu ahi, ati. Amaho hin society phatchomna ding hi achungnung pen a akoiyu ahi in, kamcheng a kipathu sei jou ahipoi, ati.

Eiho jouse dinga kinepna chule kitilkhouna ahiuve, tin KIC thuson aseibe in ahi. Gamsung mi hina a government/administration in asodoh SOP hohi khoutah a ijui diu hi imopoh nau ahi in, boina isem loudiu, boina hi ithet diu ahi, tin asei uvin, chule kipunkhom a pan lahkhom dinga kouna aneibe uvin ahi.

Manipur, Mizoram, Nagaland le Sikkim a Covid-19 akon thina toh umlou

New Delhi, June 26: Covid-19 akon thina tu chan in Manipur, Mizoram, Nagaland le Sikkim sung ah aum hihlai in ahi tin helath ministry akon thuso kimu chun asei in ahi.  Hiche state ho ahin test bolnaiding mun le covid-19 hosiptal ana um lou jeh in boina sangtah an atoh uvin hinlah tu in hatah in kikhel na anei taovin ahi akiti. Covid-19 doudal na dinga centre in northeast state ho a hospital ho tosot na anei jing ding dan jong phondoh na ana nei uvin ahi. Northeast gamsung a covid-19 kijanna a ana boi pen chu test bol na lhahsam chu ana hi in hinlah tu in hiche hatah in akikhel tan ahi tin ministry akon thuso kimu chun asei in ahi. Hiche kikhel na hi centre in phate a vetsui na anei jeh ahi akiti. Northeast gamkai sung a test kibol na lab 42 lam akisemdoh dan hetsahna jong ministry in ahin nei uvin ahi. Assam in lab public a 10, private a 2 anei in, Meghalaya in public a 6 le private a khat anei in, Nagaland in testing lab 13 anei in, Arunachal Pradesh in thum, Manipur, Mizoram le Sikkim in ni cheh chuleh Tripura in khat anei uvin ahi. Northeast gamsung a covid-19 natsang na nei ho kijanna ding hospital anei lou u ahi. Centre in gamkai sung a covid-19 jan na ding in hospital  ho a ICU lupna, isolation bed, oxygen support thei lupna, ventilator le adang dang ho pehdoh na ana neijing uvin ahi. Assam in isolation lupna 67,833 anei in, oxygen support 1,841 chuleh ICU lupna 598 anei uvin chuleh ventilator 350 anei uvin. Arunachal Pradesh in 1,998 isolation, 178 oxygen-supported, 60 ICU bed le 16 ventilator.

Meghalaya a 1,231 isolation, 345 oxygen-supported le 83 ICU bed chuleh 95 ventilator, Nagaland a 681 isolation, 142 oxygen-supported, 54 ICU bed le 28 ventilator, Sikkim a 251 isolation, 224 oxygen-supported, 20 ICU bed le 59 ventilator, Tripura a 1,277 isolation, 10 oxygen-supported, 13 ICU bed le ventilator 7, Manipur a 829 isolation, 317 oxygen supported le 48 ICU bed chuleh 45 ventilator chuleh Mizoram a 709 isolation, 213 oxygen-supported, 37 ICU bed le 27 ventilator ahi. Tu channa centre in northeast gamkai a covid-19 natna janna ding a thil hopdoh na anei hi Arunchal Pradesh a 1.21 lakh N95 maitom, 0.66 lakh PPE kits le 1.5 lakh hydroxychloroquine tablet, Assam a  3.37 lakh N95 maitom, 2.01 lakh kits le 6.7 lakh HCQ tablet, Manipur a 0.95 lakh N95 maitom, 0.79 lakh PPE kits le 2.7 lakh HCQ tablet, Meghalaya a 0.75 lakh N95 maitom, 0.52 lakh PPE kits le 1.75 lakh hydroxychloroquine tablets, Mizoram a  0.76 lakh N95 masks, 0.31 lakh PPE kits le 2.2 lakh HCQ tablets chuleh Nagland a 0.7 lakh N95 masks, 0.25 lakh PPE kits le 1.75 lakh hydroxychloroquine tablet ahi. Sikkim a tu channa kihom dohhi 0.80 lakh N95 masks, 0.52 lakh PPE kits le 0.25 lakh HCQ tablet ahin chuleh Tripura ahi 1.38 lakh N95 masks, 1.13 lakh PPE kits le 2.5 lakh hydroxychloroquine tablet ahi. Manipur ahi tu la tua active 702 ahin, adamdoh hi 354 ahi tan ahi akiti.

 

Politics boina suhlhap ahi jouva CM Biren in Naga Nullah a ‘public parking space’ hondohna nei

Imphal, June 26(ET): Politics a boina suhlhap ahi jouva Chief Minister N Biren Singh mipi lah a alha kit in, Thangal bazar a traffic anohphah olsah nadinga natoh apan in ahi. Chief Minister in Friday ni a Thangal bazar a cheng ho dinga Naga Nullah, Imphal mun a ‘public parking space’ hondohna aneiyin ahi.

Thuso miho akihoupi na a Chief Minister in parking mun a hi gari kang li (4 wheeler) 116 vel kikoi thei ding ahi, tin aseiyin chule Naga Nullah parking mun a gari nga thei ding gari nei agom a 106 kilheng ahitai, ati. Dukan bol anaivel a cheng hohi amaho driver ahiloule insung miten athah uva alah diu chule Thangal le Paona bazar a gari akingah den ding (permanent parking) kiphal louding ahi, ati.

Paona bazar a cheng ho dinga Johnstone school kom a phat chomkhat man ding parking space kipe a chule hondohna kinei vahding ahi, tin CM in aseiyin ahi. Smart City Plan noiya Imphal area a in dan phabep a sang parking space kisa ding ahi, tin hetsahna aneiyin chule Thangal bazar a gai nei hon MAHUD in apeh (allot) banga gari ho ‘parking area’ a angah diuvin temna aneibe in ahi.

Kin gon a Yaiskul MLA Th. Satyabrata, Commissioner (MAHUD) Nidhi Kesarwani, Director (MAHUD) Th. Harikumar Singh, Imphal Muncipal Corporation a Councilor ho chule adang dang jong apang uvin ahi.

 

Special Judge ND&PS Manipur in kani po mikhat themmo chan ta

Imphal,  June 26(UNA): A Noutuneshwari Devi Special Court ND&PS Manipur in Friday nikhon City Police leh Narcotic Cell hon Kasturi lei kom a achesa August 19, 2014 kum a kani kg 3 toh amat tha kum 48 a upa Lalthang Lhouvum themmo achan tan ahi.

Court in June 29 nikho teng gotna thutanna nei dinga jong aphat atep in ahi. Special court in thutanna anei jou jouva bail a kilhadoh Lalthang Lhouvum (48), s/o (L) Thangkholun Lhouvum, Motbung Bazar City police station team hon aman tauvin ahi.

Achesa March 16 nikho a trail case a hearing chaina pen anaum ahi in, Friday nikho a thutanna nei dinga aphat ana tep u ahi. Covid 19 pandemic jeh a court in thutanna anei vah theilou ahi. Themmona neipa hi August nisim 19, 2014 kum a Kasturi bridge, Nagamapal a kon plastic sakhao achoiya, public  toilet langa ache na a amat u ahi in, plastic sakhao thum a hi kani kg 1 cheh apoh ahi.

Thukholna akichaiya case IO anahi Sub-Inspector N Suresh in court henga Section 18, ND&PS Act noiya charge sheet apehlut a chule April 11, 2016 ni a charge asem khum u ahi. Prosecution in themmona neipa themmo chan nadinga witness 8 court a adinsah a chule themmona neipa injong defence witness 2 court a adin sah ahi.

Special court in special PP le defence counsel thusei ngailhahna anei jouva, evidence kipe jouse alahkhom a, Lalthang Lhouvum in kani kg 3 apo in, Section 18 r/w Section 8, ND&PS Act noiya gotna pehthei ahi tihi tahsan lelna aumpoi, tia themmo achan ahi. Ahung lhung ding June nisim 29 nikho teng gotna thuphonna aneidiu ahi.

 

Assam twilet jeh’a mi 16 in thina tohta

Guwahtai, June 26: Assam state sung muntina ga hatah a an juh toh lhon in state sung district 16 lam a twi an alen in ahi. Hiche twi let doh toh lhon in mi 2.5 lakh lam ana tong kha in ahi akiti.  Assam State Disaster Management Authority akon thuso kimu dungjui in kho  704 lam twi in achup in ahi akiti. Hiche kho ho chu Dhemaji, Lakhimpur, Biswanath, Udalguri, Darrang, Baksa, Nalbari, Kokrajhar, Barpeta, Nagaon, Golaghat, Jorhat, Majuli, Sibsagar, Dibrugarh le Tinsukia district ho ahiuvin ahi akiti. Tuni a Dibrugarh a twilet jeh a mikhat an athi be kit toh lhon in athi mi 16 alhing tan ahi akiti. State usng a mi twi let  in atoh khah chu Dhemaji (88,269) le Tinsukia (59,261) a atam pen in ahi akiti. Brahmaputra vadung chu danger level chung in along in ahi akiti. Vadung sunga longlut Burhidihing, Dhansiri, Jia Bharali, Puthimari, Pagladiya, Manas, Beki le Sankosh ho jong anal en uvin ahi akiti. India Meteorological Department (IMD) akon thuso kimu dungjui in ahunglhungding Monday nikho tokah a Northeast India a go hatah a ju nalai ding ahi akiti. Assam le Meghalya sung a gojuh hi ahunglhungding June nisim 27 chan a hatah a ju ding ahi akiti.

 

Ccpur Dist. Adm leh Dist. Police in Dist. Level “International day against drugs and illicit trafficking day” toh kisai’a  lampi juina nei

B.Lalboi gangte

CCpur. June 26 (ET): International day against drugs and illicit trafficking day hi tuni (June 26) ahitoh lhon’a khovel mun chom chom’a man anahi vang in Covid-19 jeh in mandan chom chom in anaman uvin ahi. Chuleh CCpur District ah District level in District Administration leh Police Department kitho in Pawan Yadav, IAS DC CCpur leh Amrita sinha, IPS SP CCpur lamkai nan keng in Lampi jui na anei uvin chu jouvin Awareness jong anabol uvin ahi. Hiche kingon sung’a Amrita Sinha, IPS SP CCpur leh Lawrence K Munluo, MPS, Additional SP tenin CCpur District sung’a khamnathei atam in, demand jong asang lheh in, khangthah tamtah khamnathei aki ngol sah jeh uvin District sung chan nasatah tah’a atong khah toh lhon’a Civil Society Organization, Houbung leh mipi jouse pankhom’a kalson khom ding in temna aneilhon in ahi.

Hiche toh lhon’a International day against drugs and illicit trafficking day hi kumseh leh “better knowledge for better care” kiti thupi mancha’a kimang jing ahi naban’a CCpur Police apat Data kimu dan in June 2019 apat June 2020 sung chan in khamnathei toh kisai’a ND & PS case registered 6 akibol in ahi. Hiche case 6 achun khamnathei joh mi 10 akiman in amaho akipat in Heroin powder Gram 594, Ganja Kg 72, Opium Kg 8 leh Kaani lei gam Acres 19 alen suhset anahi. Manipur leh CCpur a hunglut khamnathei holah’a atamjo hi Golden Triangle tia kiminsah Northern Thailand, Laos leh Myanmar apat bailam tah’a hung kipolut jing ahi. Chuleh hiche Golden Triangle apat khamnathei semdoh’a um ho Manipur ahunglut nung in Afghanistan leh gam chom chom’a johdoh in aum kit ahi.

Alangkhat’a Mualkoi a um STC/BSF in jong International Day against Drug Abuse and Illicit Trafficking chu Dorcas Veng, New Lamka aum Hope Children Home ah chapang ho toh amang khom uvin chuleh kipa thilpeh jong anei uvin ahi. Hiche kingon’a T. Douminlian, Assistant Commandant in khamnathei bole kiti hi mihem tahsa ding’a hoilou tah ahidan leh aphat lou dan chapang holah’a atahlang in ahi. Chuleh Career guidance toh kisai in chapang ho tilkhou na aneiyin hiche naban’a DK. Tripathi, Inspector General, STC/BSF in Home dinng’a aan-chang bag khat anape in ahi.

 

Minister Nemcha in mipi ho heng a khamnathei doukhom ding a kouna nei

Imphal, June 26(ET): Social Welfare Minister Nemcha Kipgen in tuni a ama office a  “International Day Against Drug Abuse and Illicit Trafficking” kingon aman nauva aseina achun lampi pam a khamnathei a kichemse ho hi mipi hon khat vei vei leh khamnathei aphatlou dan leh ichangei a tahsa asuhset ham ti hi seipeh a chule mipi ho kithokhom a khangthah ho chung a khamnathei in vai ahopding in doudal ding ahidan asei in ahi. Tuni a kingon kimang chu “Better Knowledge for Better Care” kiti thupi noiya a kingon aman u ahi. Minu mipa hon jong cha le naute heng a hi khamnathei aphatlou dan hi phattin a seipeh jing ding ahi in addict ahi nungkei uva aphatlou dan hasei sang a achepset masang uva hi awareness kituptah bolpeh jing ding ahi ati.

Lampi dung a khamnathei bol a vahle amukha ium ule akinthei pen a akinaipi pen police station a report bolding in asei in ahilou le Social Welfare department ho 7005018755 hetsah jeng ding in asei in ahi. Covid-19 nat hat laitah ahi toh lhon in lampi pang a khamnathei ho ventup na dingin Integrated Rehabilitation Centres for Addicts (IRCAs) kiti tohgon Social welfare hon abol uvin hiche noiya hin programme chom chom agong uvin ahi. Manipur government in agon State Drug Policy jong mipi ho muthei ding a hin kisodoh vah ding ahitai tin asei in ahi.