CM Biren in gamsung miho amoh lungjin loudinga temna nei; sorkar in...

CM Biren in gamsung miho amoh lungjin loudinga temna nei; sorkar in kigotna lhingset aneiye, tia sei

59
0
SHARE

CM Biren in gamsung miho amoh lungjin loudinga temna nei; sorkar in kigotna lhingset aneiye, tia sei

Imphal, May 22(ET): Chief Minister N. Biren Singh in pandemic douna dinga gamsung in kigotna lhingset anei ahijeh a mipi amoh lunggim lou dinga temna aneiyin ahi.

Chief Minister’s Secretariat mun a thuso miho akimupi na’a, CM Biren in, state sorkar in natna douna dinga kivenna chule kiginna dinga angaicha jouse abol ahi, ati. Akiboipi pen hi ‘community transmission’ aumlou nading ahi, tin aseiyin chule natna a kon kivenna dinga aphachom dinga kidemna chule tohgon sem nadinga ngaidan ho akilamto jing e, ati.

Union Health Ministry, Indian Council of Medical Research (ICMR) chule state sorkar in ‘guidelines’ chule thuhilna asodoh ho gamsung mihon phatah a ajui jeh a akipana thu CM in aseiyin, inmun a umtup ding, mask kibol ding, hand sanitizer man ding, mipi kikhopna a panlou ding, mi toh kigamlhat ding le adang dang hohi nat douna dinga athupi pen ahi, ati. WHO, Health Ministry, medical expert leh adang dang ho thuhilna hi eima kivenna dinga jui cheh dinga aseiyin chule India gam a natna jeh a thi hi 3% ahi’in, adamdoh hi 40% ahi, tin aseiyin ahi.

Gamsunga testing facility ho thu CM in aseina a, RIMS le JNIMS a test kibol hi nikhat a 200-300 chunglang a kikalsah ahi, ati. Niseh a sample 700 le 800 kikah ho kila ahi. Chule ‘throat swab’ koina ding freezer jong kikal sah ahi. Sorkar in ICMR le Health Ministry protocol juilouva Mao ahilouleh Jiribam a COVID 19 testing centre akoi theilou ahi, ati.

India mun chom chom a kon gamsung mi ahung kile ho thu a CM in, ahung jouse hi abon uva medical examination a dinga ‘quarantine centre’ a koi dinga aseiyin ahi. Covid 19 test akibol jouteng ama ama chenna constituency quarantine centre a sol ding kiphal ding, test negative ahile Home Quarantine a umdiu ahi. Inmun a quarantine bol nadinga dinmun hahsa hohi Community Quarantine centre a umdiu ahi, tin aseiyin ahi.

Frontline worker, volunteer, CSO ho panlah ahetpeh na thu aseiyin, local volunteer, truck driver, handymen le adang dang ho vangsetna toh aumle India sorkar dan sem dungjuiya compensation kipe ding ahi, ati. Tohkhompi Cabinet, MLA, DC le CSO hon kivenna ding dan thu ahil lhang diuvin temna aneibe in ahi.

Korean Manipuri Association in dangka lakh 40 vel man Seegene’s AllplexTM 2019-nCoV Assay kit 1000 kithopina a ape uvin ahi. Hiche testing kit hi ICMR, NIV Pune, FDA le CE-IVD in phatsahna apeh ahi. Tata Trust injong Chief Minister khut a PPE 3000 le surgical mask 18,000 kithopina a ape in, testing kit, PPE le mask ho CM Biren in JNIMS le RIMS official ho khut a pehdohna aneiyin ahi.

Press conference a Health, Family Welfare Minister L Jayantakumar Singh, CAF & PD Minister Karam Shyam, Education Minister Th Radheshyam jong apang uvin ahi.

 

RIMS Director in Covid-19 achal louna dinga ‘guidelines’ khoutah a jui dinga thuhilna nei

Imphal, May 22(ET): Achesa ni phabep sunga Manipur gam a covid 19 positive ana umlou ahi’in, hiche a kon gangtah a 23 aphah jeh a sorkar, adeh a health practitioner le support staff hon kigot dan velvetna anei uvin ahi.

Case athah jouse hi gamdang a kon hung kile ho a kihedoh ahi’in, ni phabep sunga asanga sim train le bus a hung lhung kit ding ahi. Dr. Ahanthem Santa, Director, Regional Institute of Medical Sciences (RIMS) in, tua douna kinei virus hi boitah ahi’in, hiche hin mihem tahsa akhohlai jouse abulu ahi. Ahung kile ding atam jeh a health practitioner ho lungkhamna hatah a kal ahi’in, tua hi kivenna inei louvu le ‘community transmission’ umthei ahi, tin Dr Santa in aseiyin ahi.

Test tamsah dinga thumna um ahi, ‘pooling test’ kiti agangjep lampi hi hahsa ding ahi. Positive result auma ahile sample 25 abon a test achom beh a thah bol ngai ahi’in, phat lut jo ahi, ati. ICMR, Virus Research and Diagnostic Laboratory (VRDL) le state dang dang a natong microbiologist hon positive case hetdoh nadinga sample hi mangthei ahi, tia agel u ahi’in, hiche jeh a hi May 18 ni a ICMR in guideline athah aso na a apansah lou himaithei ahi, ati.

Result negative ahile ‘home quarantine’ dinga kisol ahi. Hiche phase hi thupi ahi, ajeh chu insung mi, vengsung mihon home quarantine sunga jui ding dan ho khoutah a ajui ding thupi ahi. Test result a negative adih louva jong sohthei ahi, ati. ‘Incubation period’ (natna akimat doh theilouna phat) um ahi, tihi mihon ahet angaiyin, hiche sunga test akibol a ahile positive hiding tina umlou ahi. Hiche jeh a ‘community transmission’ aumna thei dinmun neocha um ahi, ati.

Vangsetna toh hi tehse ho, asthma natna nei, mithao val, heart natna nei, diabetic, CKD (kidney/kal natna nei) ho hidiu ahi. Covid natna nei atam teng le heart attack, stroke, dialysis kibol, cancer natna nei, gu le chang kisuhboh, elective surgery chule CS chan gei hohi khohsahna kipe theilou ding ahi, tin aseibe in ahi. Room khat a kikoi manchah ho a test/scan kibol ding mi alung opkai ding ahi’in, diagnostic radiology, C ray, CT scan, USG ho jouse atohkhah ding ahi, ati.

JNIMS a case athah 11 akimu jouva JNIMS emergency ward a koima umlou tobang ahitan, atohkhah hi len ding ahi. Hospital che ding chan geiya mipi kicha ahi, tin aseiyin ahi. Ahung lhung ding ni 14 sunga kigotna hi thupi ahi. Manipur tobang gam neocha a hi Covid natna nei tamtah kive joulou ding ahi. Gamdang a umho puidohna hi vetkol jou hile doctor, nurse, paramedical staff le official hon natoh tam jong le ajo diu ahi. Process hi natna jen dam na akimu a ahile lha gup ahiloule aval jep lut ding ahi, tin aseibe in ahi.

State sorkar in gamdang a kon hung kile ho lamtona ding, apoh nading, quarantine bol nading natoh lentah apat a, transgender ho dinga jong achom agon ahi. CM Biren lamkaina State Consultation Committee in dinmun avetkol ahi. Minister, MLA, RIMS le JNIMS Director, Chief Secretary le government official dang dang ho Committee member a pang ahi.

Committee in expert ho ngaidan alah a na atoh ahi. Thukhoh atamjo Committee henga kisei ahi, tin Dr Santa in aseiyin ahi. RIMS a hi natna khoh neiya adamlou ho kijen ahi’in, tua hi centre a Covid-19 patient hojong avet kit ahi. OPD a jong adamlou kivetsah ding a che hi ‘limit’ asem uva avet u ahitai.

‘Domestic flight’ a tou ho ni 14 ‘quarantine’ bol ngailou ding ahi, tia Aviation Minister in sei

New Delhi, May 22: Monday (May 25) nikho teng ‘domestic flight operation’ akipat ding toh kilhon a, Union Civil Aviation Minister Hardeep Singh Puri in, passenger hohi nikho 14 ‘quarantine’ bol ngailou ding ahi, tin aseiyin ahi. ‘Quarantine thu hi dinmun toh kitoh a kibol ding ahi. Ni 14 quarantine angaipoi”, ati.

“Positive nahi a ahile airport nalut ding ahiloule lenna a natou doh ding jong kiphal louding ahi”, tin Puri in May 25 nikho a lenna alen pat nadinga SOP velvetna umho thu aseina a aseiyin ahi. Centre in lha ni jou, kal kit a kon India gamsunga lenna lensah pan kit dinga thulhuhna anei ahi. Achesa March lha kichaiya Lockdown masapen phondoh ahi a hi India in lenna jouse avohhai ahi.

Lenna a tou ding ho lenna alen doh nidan 2 masanga airport alhung ngai ahi. State sorkar chule administration in passenger le airline crew ho a dinga public transport le private taxi agon peh ding ahi. Departure phat ‘minute 60’ masanga lenna a toudoh pan diu, chule lenna alendoh ‘minute 20’ masanga boarding gate kikhah ding ahi.

Web check-in (confirmed) hobou airport terminal sunga alut ding kiphal ding ahi. Counter a physical check umlou ding ahi, tin Civil Aviation Ministry in aseiyin, passenger hohi airport terminal building alut masang uva ‘thermal screening zone’ a ache pa teiyu ngai ahi. Chule mask le glove jong bol tei ngai ahi, ati.

Symptom neilou hobou alen ding kiphal ding chule lenna a tou ding jousen Aarogya Setu app ama ama phone a install abol diu (chapang kum 14 noilang tilou) ahi. App a ‘green’ aumlouva ahiloule government contact tracing app anei lou uva ahile asunga alut diu kiphal louding ahi. Chule airlines in lenna sunga ‘meal service’ akoi louding ahi.

Lenna alendoh nading nidan 4 sunga aleng ding ho alut diu kiphal ding, terminal/lounge a newspaper le magazine ho kikhah ding chule lhunna le chedoh namun a ‘special case’ tilouva trolley ho kiphal louding ahi.

 

Manipur a Covid 19 positive khat kihetdoh be

Imphal, May 22(ET): Manipur a mikhat COVID-19 positive ahi akihetdoh be in, hiche toh kilhon a gamsunga photchenna kinei case agom a 26 alhingtan ahi.

Covid 19 positive ni hi damdoh ahitan, tu le tu a gamsunga Active case 24 um ahi. State Health Department in thuso aneina a, kum 22 a upa, buhse a symptoms soh pasal khat Thursday nilhah a VRDL, RIMS, Imphal a test kibol ahi’in, positive ahi hetdoh ahitai, ati. Mipa hi Delhi a kon tu naicha gari a hung kile group holah a pang ahi. Tua hi COVID Care facility, RIMS hospital a jen dinga admit kibol ahitai, tin aseiyin ahi.

A tahsa dinmun alel pon, ahivanga kivenna dinga ‘contact tracing’ jouse kibol ahi, ati. Athah a khat akihetdoh be toh kilhon a gamsunga positive case 26 lhing a, hiche lah a active case 24 um ahi. Achesa ni phabep sunga positive case hi kal cheh cheh ahi’in, tuchan geiya natna neiya kihedoh hi gamdang a kon hung kile ho a bou kihe ahi. Mipin social distancing ajuiya, hand sanitizer aman a, mask akibol uva, amoh tijat lou diuvin Health department official hon temna anei uvin ahi.

Achesa Wednesday nikho a, ni 23 bou hinalai naosen pasal khat midang 15 toh Covid 19 positive ahi kihedoh ahi’in, Churachandpur mi hiche naosen hi Manipur gam a natna nei akhangdong pen hi ahitai. Hiche masanga Kamjong district a kon nu-cha ni positive ahi kihedoh ahi’in, nu cha teni hi Covid 19 positive hi a Delhi a kon bus a hung kile holah a pang ahi.

Ahivanga thulhut kimu chan a, athah pen a natna nei ahi kihedoh pa hi amaho toh bus a hung toukhom uham ti kihechen loulai ahi. Natna hatah a ahung kal jeh a state sorkar in ‘test’ kibol hi nikhat a 1,500 a kalsah ding chule sample collection centre 16 lhen be dinga thulhuhna anei ahi. Tuchan geiya train ahiloule gari a gamdang a kon hung kile gamsung mi 10,000 val ahitai.

Friday jan nidan 6 chan a CRDL, RIMS a sample 144 chule JNIMS a sample 220 test akibol in, hiche ho chu abon a negative ahi, tin COVID-19 Common Control Room in thuso aneiyin ahi. Addl Director, Health Department, Dr Sasheekumar in soi akaina thuso a chun test kibol hi 3726 a kal ahitai, tin aseiyin chule testing rate jong 131 per lakh a kal ahi, ati. Active case 24 ho abon uva Covid Care facility a kijen ahi. Mi 5 hi RIMS a kijen a chule mi 19 hi JNIMS a kijen ahi’in, natna neiho tahsa dinmun alel poi, tin thuso chun aseibe in ahi.

Phase masa a hi state sorkar in alhompen a train 15 ho vel a mi apoh ding ginchat ahi’in, tuchan geiya Jiribam a train hunglhung hi 8 lhing ahitai. Thulhut dungjuiya metro city chom chom a gamsung mi 47,000 val um ahi.

 

Central Trade Union in ‘Labour Law’ deilou jeh a kiphina bol

Imphal, May 22(UNA): Central Trade Union kiloikhomna hon tuni chun Labour Law kisem jeh in Rajghat ah kiphinna anei uvin ahi. Covid-19 jeh a gamdang akon natongho (migrant worker) holeh niseh nehkom holho genthei deh ahina chung uva hiche Dan kisem kit nachung ah deilou thu aphong uvin ahi.

All India Trade Union Council (AITUC) a Trade Union Co-ordinating body a Convenor Ksh Shanta in aseina achun Manipur gamsung a um Union hon jong Kongba Nongthombam Leikai a social distancing jui toh kop a deilou vetsahna abol u ahidan asei in ahi. General Secretary AITUC, Manipur L. Sotinkumar in aseina achun natoh phatsung pungkah 8 apat 12 chan a kisusang be hi gamsunga natong mi ho (Working class people) ho chung a lungsetna aumlou thu aphongdoh in ahi.

AITUC hon gonna noiyin Nambol, Thanga Moirang Khunou, Uripok Achom Leikai, Lamshang Bazar ho a lunglhailou vetsahna kingon achelha in ahi.

 

ADC ex-Chairman chungthu kiseina court mipin anokhum UZO in alunglhai louna thuso nei

Imphal, May 22(ET): Manipur gam a Zou tribe ho kiloikhomna United Zou Organisation (UZO) le constituency body- Zou Youth Organization GHQ, Zou Sangnaupang Pawipi GHQ in Imphal khopi a um NGO chule khamna thei doudal a kisei campaign bol hon amachang phatchomna ding gel ho tilkhouna a angaicha louva boina asem u adei lounau thu asei uvin ahi.

ADC chairman anahi khamnathei po a kingoh court in alhadoh ding ginmo jeh a NDPS court   akinokhum e, tia thuso a kipe chungchang thu aseiyu ahi. Thukholna anei nauva report hole charge sheet ho akipehlut nunga jong court a athu akiseina avel vel a sorkar official hole akithokhompi adih louva kihil NGO hon asuhboi jing adeilou nau thu sangtah asei uvin ahi.

Hetthei khat chu Lhukhosei Zou hi thinglhang miho dinga ja umtah lamkai ahi’in, Sajiwa Central Jail, Imphal a aumna a atahsa dammona chom chom adou jing ahi. Jouthu a akingoh chan geiya society a dinga pan alah jing ahi’in, khamnathei po chule jo a ngohna aumhi United Zou Organisation in atosot pon, Judiciary system in thutah achoiding tahsanna anei ahi, tin UZO in thuso anei nauva asei uvin ahi.

“Law in atoh ding tong intin, themmona neiho gamsung dan dungjuiya gotna pe henlang chule society dang dang kikum da hen. Hitobang thilsoh hi avel a aumkit a ahile Zou Civil Organization in kibungkhenna chule kinoise thilsoh ho thipbeh a avet louding ahi. Mijousen ama ama rights anei ahi’in, hiche hi Court sunga jana pehding ahi, ati.

Themmona neiya kingoh khat chu themmo akichan kah a themmona nei hilou ahi, tin UZO in aseiyin, chule Court in mikhat themmo achan masanga koiman mikhat hina hi asuhminset theilou ding ahi, tin gihna aneibe uvin ahi.

Ccpur District Magistrate in Police Reserve Land, Kipgen Veng Approach Road, Mary Kom Ring Road Containment Zone ding’a phongdoh

B. Lalboi Gangte

Ccpur, May 22 (ET): Pawan Yadav, IAS, District Magistrate, CCPur in Order aso dugjui in Coronavirus jeh’a Tuibong (Tuibong sub-division) hopsung Containment Zone ding’a phondoh ahina atahlang in ahi. Chuleh Containment Zone in ahopkhah ding gamkai hochu   Solam Police Reserve Land, lhumlam Kipgen Veng Approach Road, Solam ah Mary Kom Ring Road leh lhumlam ah Kipgen Veng Village hi ding ahi. Containment Zone hopsung’a mimal koima poh leh valut phal hilou ding ahi ati. Chuleh hiche hopsung’a mipi kikhop na umthei lou ding, akim vel lah’a gari lut lou ding ahi. Hiche thuphon juilou aum leh gotna peh hiding chuleh hiche Area sung’a mipi umhon Mobile phone ah Aarogya Setu App kiti download ah aman cheh ding uvin jong hetsah na aneiyin ahi.

Uttarakhand akon Manipur mi phabep Jiribam Train station hung lhung tau

Imphal, May 22(ET): Lockdown jeh a Uttarakhand gamsung a tangden Manipur gammi 1,145 hochu janhi jan 6:12 don chun Jiribam train station chu ahung lhung tauvin ahi. Ahung ho lah achun Ukhrul district akon mi 26, Ccpur leh Pherzawl district akon mi 49, Tengnoupal leh Chandel district akon mi 34, Thoubal district akon mi 312, Kangpokpi district akon mi 35, Senapati district akon mi 25, Tamenglong district akon mi 7, Kakching district akon mi 69, Bishnupur district akon mi 73, Noney leh Kamjong district akon mi 28, Imphal West district akon mi 222, Imphal East akon mi 255, Jiribam district akon mi 10 ahiuvin, State transport bus ho mangcha in amauoh district muncheh jonding in Jiribam railway station ana dalha tauvin ahi. Jiribam station ahung lhun uvin authority hon screening abolsoh kei uvin ahi. Ama ama district alhung phat ule ni 14 sung quarantine centre a umkit ding u ahi.

Gampam akon hunglut ho pole Bus driver ho ding quarantine centre sempeh ding a ngehna um

Imphal, May 22(ET): State dang akon Manipur mi inn hung kile ho pole a pang bus driver ho ading a quarantine centre khat sem ahi na ding in hetsah na ahung kinei in ahi.

Driver ho ading a quarantine centre nidan 48 sung a akisem lou le driver ho in kiki sem ding ahitai tin hetsah na ahin nei uvin ahi. Hiche thu chu tuni a Khundrakpam Kendra sung a um quarantine centre Rk. Sanatombi Vidyalaya a doctor le medical staff dang ho ading maitom, sanitizer le jah ding thil chom chom ho pehdoh na kinei na  a phondoh na ana kinei in ahi.

Govt akon thupeh kinei jing ho suh khel tou khel kitho na chung a driver ho in nopmo asah na u phondoh na ahin nei utoh lhon in DC thupeh home dept in akah lhah jing u jong hi ahoi  na avaat in ahi tin hetsah na ahin nei uvin ahi. Tuni kingon achun Kendra sung a Pradhan le ward member ho in anchang, nga, chi, le thao ho hopdoh na jong an anei uvin ahi. Kingon toh kisai in Khudnrakpam Kendra sung a Print le Electronic media a natong ho ang a maitom le sanitizer hopdoh na ana kinei in ahi.

MFICL meeting Minister Biswajit in Makai, Hand sanitizer sem ding’a tulhuhna neiyu

Imphal, May 22(ET): Trade, Commerce and Industries Minister Thongam Biswajit Singh in tuni chun New Secretariat conference hall a Manipur Food Industries Corporation Ltd. Board of Director ho meeting a 64 vei channa chu amakai in ahi. Meeting sung achun tuchung natna douna ding a manchah khat Hand sanitizer chu MSME-TC hotoh kithokhom a semding dan jong aseikhom uvin ahi.

MFICL a chairman Biswajit in aseina achun state sung a pharmaceutical company ho vel vettha kit ding thu asei in chule Manipur State Power Company Ltd. hotoh kitho a Mega Food Park sahdohna ding mun a power sub-station jong sahdoh ding thu asei in ahi. Thu chom chom jong aseikhom uvin National Honey Mission chungthu jong asei uvin ahi. Food Park, Nilukuthi a nehthei ho koivotna ding (cold storage) semphat ding thu jong asei uvin tuhin cold storage (normal) nga aum in chule deep freezer 60 MT khat jong aum thu asei un, cold storage chamber ni kisempha ta ahithu jong report abol un chule hiche cold storage hi mipi ho manthei ding a amanjat jong kitupsel a gon ding in jong asei un ahi. Tuni a meeting achun Addl. Chief Secretary (Textiles, Commerce & Industries) Suhel Akhtar leh MFICL a board member hon jong pan ala uvin ahi.

Pakistan a vanleng toset jeh a mi 99 in thina toh

Islamabad, May 22: Tuni chun Pakistan International Airlines (PIA) vanleng mi 99 leh asung a natong ho jaona in Karachi kom ah toset atoh thu Pakistan Aviation official thuso chun asei in ahi. Official thuso in aseina achun hiche toset achun mi 2 tobang hingdoh ahidan aginchat thu asei in chule Karachi Mayor in ana seina achun hiche toset achun asung a tou jouse athi e ati. Hiche vanleng chu International airport toh kinaicha khat mi chenna lah a khelha ahi.

Toset toh lah achun 24 News Naqvi a Director Programming panmun tu chule Bank of Punjab President Zafar Masood teni jong ajao uvin ahi. Hinlah Masood insungmi hon ama asochat thu asei uvin ahi. Mittah a muho seidan in Airbus A320 chu nivei thumvei jen tol chuding (landing) ding in akisa e tin asei un ahi. Jinnah hospital apat thuso khat chun amauho hospital sung ah mi 7 kipohlut thu asei un ahi. Vanleng chu Lahore akon hung kipandoh ahi in Karachi airport a kinga ding ahi in hinlah Model Colony, Malir a toset atoh in ahi.