CM Biren in Dk. Crore 647 lhing project chom chom a dinga...

CM Biren in Dk. Crore 647 lhing project chom chom a dinga Foundation Stone hondohna nei

95
0
SHARE

CM Biren in Dk. Crore 647 lhing project chom chom a dinga Foundation Stone hondohna nei

Imphal, August 28 (ET): Chief Minister N. Biren Singh in City Convention Centre, Imphal a Friday nikho a kin goun anei nauva video conference a konin district chom chom a dinga Surface Minor Irrigation Scheme 375, Ground Water Irrigation scheme 550 chule infrastructure project 151 foundation stone hondohna aneiyin ahi.

Project hohi Union Ministry of Jal Shakti leh Union Ministry of Minority Affairs in dangka crore 647 lut a atoh ding ahi. District chom chom a Deputy Commissioner hon ama ama umna mun a Chief minister thalheng a ‘foundation stone plaque’ hondohna anei uvin ahi.

Deputy Chief Minister Y. Joykumar, CAF & PD Minister Karam Shyam, Water Resources Minister Letpao Haokip, Forest and Environment Minister Awangbow Newmai, MP R.K. Ranjan leh Maharaja Sanajaoba Leishemba, MLA chule state government a official luboh ho kin goun a apang uvin ahi.

CM Biren in ahoulimna a, tua state sorkar in kum thum leh keh sung, phat chomcha sunga hi khantou machalna natoh lentah tah atohdoh ahi, tin aseiyin ahi. Go to Village, Go to Hills, Meeyamgi Numit leh Hill Leaders’ Day tohgon ho a kon sorkar in mipi ngaichat leh dei ahetdoh thei ahi, tin aseiyin chule mopohna nei official leh work agency hon tuni a hondohna um project jouse khovei August lha kah a ajo diuvin thuhilna aneiyin ahi.

Irrigation facility sem phat angai dan thu CM in aseiyin, state sorkar in ningkum twi ahah a chu akimang talou ‘lift irrigation scheme’ 250 acho hing kit ahi, ati. Minor Irrigation Department hi masanga akihe behseh lou department ahivanga, sorkar thah akisemdoh a kon irrigation facility semhoi nadinga pan lentah alah ahi, ati.

Friday nikho a hondohna um Infrastructure project 151 lah a hi residential school, working women’s hostel leh medical facility tamtah jong pang ahi. Chapang ho themjilna dinga mipin sum tamtah asuhmang ahi in, residential school ho akichepi pan teng Imphal ahilouleh state pam a themjil dinga mipin achate asol angai tahlou ding akinepna thu jong aseiyin ahi.

District chom chom a Village Chief ho dinga Royal Palace complex, Imphal sunga dangka crore 7 lut a Guest House kisa ding ahi, tin CM in aseiyin chule Imphal-Jiribam highway a um Barak leh Makru lei jong tukum December kah a jo dinga aseibe in ahi.

Minority Affairs Department, Manipur government in Pradhan Mantri Jan Vikas Karyakram noiya Union Ministry of Minorities sum pohdoh na a Chandel, Tengnoupal, Pherzawl, Jiribam, Kangpokpi leh Kamjong district a dangka 25.26 lakh cheh lut a model residential school 6 asah ding, Thoubal leh Senapati district a dangka 142.42 lakh cheh lut a PHC 2 asah ding, Chandel, Churachandpur, Senapati, Thoubal leh Tamenglong district a dangka lakh 66.53 cheh lut a PHSC 21 asah ding, Noney district a health professional staff quarter 9, patient waiting room, In-patient department, medical staff room, gallery khat leh sports complex khat dangka crore 2.79 lut a asah ding ahi.

Tamenglong district a dangka crore 3.29 lut a natural football ground khat, dangka crore 0.45 lut a public library and information centre khat asah ding ahi. Imphal East a toilet umna school building 74 leh working women’s hostel 2 (dangka crore 11.30 cheh) asah ding ahi. Chandel, Pherzawl, Jiribam, Senapati, Noney, Tamenglong, Kamjong leh Ukhrul district a working women’s hostel 8 dangka crore 11.30 cheh lut a asah ding chule Thoubal, Churachandpur leh Chandel district a dangka crore 1.03 lut a hostel 3 asah ding ahi. Chandel, Imphal East, Kangpokpi, Thoubal, Ukhrul, Jiribam leh Tengnoupal district a dangka crore 2.50 cheh lut a hostel jong asah ding ahi.

Chule Surface Minor Irrigation Scheme 375 leh Ground Water Irrigation scheme 550 hi Department of Minor Irrigation, Manipur government in Pradhan Mantri Krishi Sinchai Yojana- Har Khet Ko Pani (PMKSY-HKKP) noiya achepi ding ahi in, Union Ministry of Jal Shakti in sum apohdoh ding ahi.

Nikho kipat til a Chief Minister in Imphal East district noiya um Kyamgei Mamang Leikai a River Lift Irrigation Scheme with Lined Canal leh Working Women’s Hostel foundation stone hondohna jong anei ahi.

XXXXXXXXX

Assam Rifles 1 panna a Covid-19 positive 2 thi be, Manipur a natna a thi 27 lhingta; Chief Secretary order thah sodoh tuchan kichepi lou

Imphal, Aug 28(ET): JNIMS COVID Care Centre a kijen Covid-19 positive mi 2 Friday jingkah a natna a athi kit in, hiche toh kilhon a gamsunga Coronavirus natna jeh a thi mi 27 alhing tan ahi.

Alangkhat a Chief Secretary in August nisim 25 nikho a gamdang a kon hung kile hon ajui dinga Standard Operating Procedure (SOP) asem phat na order asodoh hi amun a natong hon ajui lou jeh uva thuhilna hi kichepna tobanga aumdoh in ahi.

Covid-19 natna a tuni a thi mi 2 lah a mikhat hi kum 55 a upa 16th Assam Rifles personnel ahi in, JNIMS thulhut dungjuiya, amahi achesa August 13 jan nidan 8 don a COVID Ward-1 a admit abol uva, tuni jingkah nidan 5.55 don a thi ahi.

Covid 19 positive hi a athi midang khat hi Imphal East district a cheng kum 40 a upa numei khat ahi in, post-renal transplant leh HCV infection toh Covid 19 positive hina akop a, August 21 nikho a COVID Ward 1 a admit abol u ahi. Tuni jingkah matah, jan-kim khel minute 30 tobang jouva thi ahi. Amani pum a gamsunga natna a thi mi 27 lhing ahitai.

Alangkhat a, Chief Secretary Dr. Rajesh Kumar in state danga kon hung kile hon ajui dinga SOP athah asodoh hi amun a natong government staff hon ajui lou jeh uva totna tobanga aum in ahi. “SOP thah dungjuiya, gamdang a kon hung kile Covid 19 positive hilou jouse hi quarantine centre a umsah lou dinga kiseiya chule ahung kile ho apet pet a Covid-19 test bol pai dinga kisei ahi. Covid-19 negative hi hohin mask abol diu, khut asop jing diu, social distancing chule kivenna ding dan dang dang ho ajui uva ama ama inn a akile diu kiphal peh dinga kisei ahi.

Ahivanga, achesa August 26 nikho a hung kile chule Manipur ahung lhun masanga RTPCR test akibol na a kon Covid-19 negative ahi na result hin kipoh a Merchant navy khat inn sol louva ‘quarantine centre’ a joh asol uvin ahi. Amahi Manipur ahung lhun nikhat masanga Chennai a test kibol ahi. Chief Secretary order sodoh toh kitoh louva amun a natong hon mipa hi ajing nikho chan a test sample alah loulaiyu ahi.

Ahung kile midang ho lah a aumna a kon virus akilah ding akichat jeh a kum 26 a upa pa hi Imphal Hotel a sum lut tah a um ahi in, inmun a quarantine kibol nading atumbeh a room anei vanga quarantine kibol ahi. “Chennai a kon kahin kipoh Covid-19 negative kahi na result kavetsah vanga aphachom pon, Chief Secretary in order asodoh authority hon ajuilou jeh a hotel a kaumna a sum tamtah kasuhmang ahi”, tin thuso miho henga aseiyin ahi.

Xxxxxxxxxxx

NEET-JEE exam vohchon nadinga NSUI leh MPYCC in toumun kiphinna bol

IMPHAL, Aug. 28(UNA): National Students’ Union of India, Manipur (NSUI) leh Manipur Pradesh Youth Congress Committee (MPYCC) in September lha kipat teng kipan dinga ginchat um NEET-JEE exam postpone bol ding thumna a BT Road, Imphal a Friday nikhon toumun kiphinna abol uvin ahi.

NSUI Manipur leh MPYCC in thuso anei na a, thumna kinei ho society phatchomna ding chule simlai ho damthei nading ahijeh a exam vohchon dinga thumna kinei ahi, tin asei uvin ahi. BJP sorkar in Covid-19 pandemic sunga mipin gentheina sangtah ato na chunga simlai ho lungthim pohgih apeh be kit ahi in, simlai ho hinkho aboi na thei dinmun a bou akoi hilouva khonung a dinga thil phalou aso doh nathei jong ahi, tin aseibe uvin ahi.

BJP sorkar in pandemic sunga hunam a exam bol tei tei ding agot a chule exam sunga simlai natna kilah auma ahileh sorkar themmo kichan ding ahi, tin Union in thuso anei nauva aseibe uvin ahi.

Xxxxxx

Manipur a Covid-19 positive athah 118 kimube; natna a kon dam doh 69.43% lhingta

Imphal, Aug 28(ET): Manipur a Covid-19 positive hi a mi 100 adam doh toh kilhon a discharged abol uvin, Friday nikho chan a gamsunga ‘recovery rate’ agom a 69.43% alhing tan ahi.

Natna a kon dam doh a agom a mi 4,057 alhing tan, hiche lah a milham 3,286 leh Central Armed Police Force (CAPF) 771 pang ahi.

Alangkhat a, state dang a kholjin hilou gamsung mi 79 panna a achesa nidan 24 sunga Covid-19 positive 118 akimu be in, athah a kihetdoh be ho pum a gamsunga Covid-19 case um hi 5,843 lhing ahitai. Athah a kisei case ho lah a sepai 37 leh state dang a kon hung kile (Kakching leh Churachandpur district mikhat cheh) 2 pang ahi, tin Additional Health Director Dr K Sasheekumar Mangang in aseiyin ahi.

Manipur gam a natna jeh a thi mi 27 lhing ahitai. Local transmission case kisei hohi Imphal West a 37, Imphal East a 24, Bishnupur- 1, Thoubal – 12, Senapati- 2, Churachandpur- 1 chule Tengnoupal district a 2 ahi. Abon uva Covid 19 Care centre a achon uvin chule ‘contact tracing’ leh ‘containment process’ ho apan tauvin ahi.

Friday jingkah a Covid 19 natna nei mi 2 jong thi ahi in, hiche toh kilhon a gamsunga natna a thi mi 27 lhing ahitai.

Xxxxxxxx

NH-37 lamlen Kotlen kho kom a munchim

Imphal, Aug 28(ET): National Highway-37, Senapati district a Kotlen kho kom Imphal-Jiribam lamlen a munchim na thilsoh aumin ahi.

Friday sun nidan 11 don a National Highway-37 jui 35 milestone mun a munchim ahi in, ahin, thilsoh a akisukha ahilouleh vangsetna toh aumpoi, tin police thulhut in aseiyin ahi.

National Highways & Infrastructure Development Corp Ltd (NHIDCL) chule New Keithelmanbi Police station team hon munchim na mun asuhthen uva chule nilhah nidan 4 don a kon hiche lamlen a gari lhai pan kit ahitai. Team hon traffic avetkol uva, chule highway asuhtheng jing nahlaiyu ahi.

Munchimna mun suhtheng nadinga machine 3 amangcha uvin, Saturday nikho kah a highway a munchim na mun phatah a asuhtheng diu tahsan ahi, tin thulhut in aseibe in ahi.

Xxxxxxx

Leiset chung’a covid-19 case atamna pen gam holah a India ani channa a pang ta

New Delhi, Aug 28: India gam a achesa nidan 24 sunga Covid-19 case athah 77,266 akimu be in, nikhat a dinga natna akal na pen record ahitan, hiche toh kilhon a Friday nikho chan a natna nei agom a 33,87,500 lhing a chule natna a kon dam doh mi 25,83,948 lhing ahitai, tin Union Health Ministry data in aseiyin ahi.

Natna sangtah a akal toh kilhon a vannoi pumpi a Covid-19 active case atamna pen gam ho lah a India in Brazil akhel a, ani channa a pang ahitai. Achesa nidan 24 sunga natna a mi 1,057 athi in, natna a thi agom a 61,529 alhing tai, tin Friday jingkah nidan 8 a update apeh nauva ministry in aseiyin ahi. Recovery rate hi 76.28 percent a um a chule Covid-19 jeh a thi jat jong 1.82 percent a nemsuh ahitai.

India gam a Covid 19 active case 7,42,023 um ahi in, data dungjuiya total caseload lah a 21.90 percent tina ahi. Achesa August nisim 7 nikho a India gam a Covid-19 positive hi lakh 20 anaval a, August nisim 23 nikho a lakh 30 akhel kit ahi. ICMR in asei dungjuiya, Thursday nikho a sample 9,01,338 test kibol a chule tuchan geiya agom a sample 3,94,77,848 test kibol ahitai.

Natna a thi athah a kisei case 1,057 lah a Maharashtra a 355, Karnataka 141, Tamil Nadu 109, Andhra Pradesh 92, Uttar Pradesh 68, West Bengal 53, Punjab 37, Madhya Pradesh 24, Delhi 22, Gujarat 17, J&K leh Chhattisgarh 14 cheh, Rajasthan 13, Haryana 12, Telangana leh Jharkhand 11 cheh, Kerala leh Puducherry a 10 cheh, Uttarakhand 9, Bihar 9, Odisha 7, Goa 6, Assam leh Tripura a 4 cheh, Chandigarg leh Ladakh a 2 cheh chule Andaman and Nicobar Island leh Himachal Pradesh a khat cheh pang ahi.

Tuchan geiya natna a thi case 61,529 lah a Maharashtra gam a mi 23,44 thi a atamna pen state hijing nalai ahi. Tamil nadu a 6,948, Karnataka 5,232, Delhi a 4,369, Andhra Pradesh a 3,633, UP a 3,217, West Bengal a 3,017, Gujarat a 2,962, Madhya Pradesh a 1,306, Punjab a 1,256, Rajasthan a 1,005, Telangana 799, J&K 671, Haryana 646, Bihar 538, Odisha 448, Jharkhand 373, Assam 278, Kerala 267, Chhattisgarh 245, Uttarakhand 228, Puducherry 190, Goa 171, Tripura 89, Chandigarh 43, Andaman and Nicobar Island 42, Himachal Pradesh 33, Ladakh 27, Manipur 25, Nagaland 9, Meghalaya 8, Arunachal Pradesh 5, Sikkim 3, Dadra and Nagar Haveli chule Daman and Diu a mi 2 cheh thi ahi.

Natna a thi hop 70 val hi natna chom chom nei ho ahi, tin Health Ministry thuso chun aseibe in ahi.

Xxxxxx

Assam a Covid-19 case lakh khat anai toh kilhon a Assam sorkar in ‘Lockdown’ chepi kit dinga lunggel nei

Guwahati, Aug 28: Assam gam a Covid-19 positive case 2,000 vel athah a akimudoh a, gamsunga natna nei lakh khat nailam alhin toh kilhon a Assam in tua hi natna vetkol nadinga ‘lockdown’ chepi kit ding lunggel anei uvin ahi.

State Chief Secretary Kumar Sanjay Krishna in Friday nikho a, natna nei kimudoh jat hi ahiti jom a, akhehsuh louva chule mipin social distancing leh kivenna dinga dan kisem ho apalkeh jom a ahileh gamsunga lockdown kikoi kit thei ahi, tin aseiyin ahi.

“Assam gam a tu leh tua hi Unlock phase kipan ahitan, August 31 chan kichepi ding ahi. Hiche jouteng itobang panlah ding ham kigel khom ahi. Mi atamjo in mipi lah a alhat teng uleh mask akibol louvu kimu ahi”, tin Guwahati a thuso miho henga aseiyin ahi.

“Ipijeh a hitia hi ima gelkhohna nei louva um uham kahethem poi. Kum khenna umlouva niseh a mi 7 leh 8 athi jing jong kimu ahi. Mask akibol louva ahileh Covid-19 case hi khang cheh cheh ding, Lockdown athah a kichepi lo ding ahi”, tin aseibe in ahi.

Assam gam a tuni chan geiya Covid-19 positive case 98,807 lhing ahitan, natna a kon dam doh 79,307 chule natna a thi 278 lhing ahitai. Case 25,000 val hi Kamrup Metropolitan district a kon kisei ahi. Case hatah a akal jeh a achesa June 28 a kon July 19 chan state sorkar in Kamrup Metropolitan district a lockdown phatah a akoi kit ahi in, ahivanga hettheiya Covid-19 case nemsuh deh lou ahi.

Tu leh tua Barak Valley a district thum- Cachar, Karimganj leh Hailakandi hi achesa August nisim 26 nikho a kon ni 10 a dinga lockdown phatah a akoi khum u ahi.

Xxxxxxx

Naga peace talk kichaina hin Nagaland bou ahop ngai ahi: UCM

Imphal, Aug 28: United Committee Manipur (UCM) in tu le tua chelha jing Indo-Naga peace talk hi Nagland sunga chai ding ahi tin hetsahna anei uvin ahi. Hiche kihouna hin state dang atohkhah nalouding in jong temna anei uvin ahi.  India govt in Nagaland galguh bol ho akihoupi ahitoh lhon a Nagaland sunga kihou lhahna jouse achai u ngai ahin, Manipur tongkha ding thil ahung kibol le mipi in kipom theilou ding ahi tin hetsah na jong anei uvin ahi.

Hetthei khat chu UCM in cenre ang a Naga thu kihou lhahna a hi Manipur mite ahiding dol hetsahna akinei lou le kipom thei louding chuleh Manipur mite nopna lou a Manipur gam tongkha ding thu kiseilha theilou ding ahi tia hetsah na ananei u ahitan ahi. Bangkok agreement jeh a Manipur mipi in kiphinna ana nei ho avel a ahung so kit ding dan chunga jong kiloikhomna in centre hetsahna ana nei uvin ahi. Manipur mite in gamsung huhna dinga bol thei chan abol ding dan jong hetsahna ana nei uvin ahi.  Achesa 2015 kum a framework agreement akon a mudoh thei jong kihou lhah na Nagaland gamsung ading bou ahidan jong tahlang na ahung kinei in ahi. Centre govt in Manipur sung a jat le nam chom chom ho chondan le hindan ho hetpehna anei uva, jana apeh ding uvin jong UCM in hetsah na anei uvin ahi.

XXXXXXXX

Arunachal Pradesh Assembly in 6th schedule noiya state pumpi umsah nading ‘resolution’ phatsah ta

Itanagar, Aug 28: Arunachal Pradesh Assembly in Thursday nikhon Constitution 6th Schedule noiya state umsah nading chule gamsunga um tribe ho huhna ding provision kikoi be na article 371(H) semphat dinga kilolna phatsahna anei tauvin ahi.

State Parliamentary Affairs Minister Bamang Felix in sorkar thalheng a apohdoh resolution hi sottah aseikhom jou uva voice vote a phatsahna aneiyu ahi. House in athu aseikhom nauva Chief Minister Pema Khandu in, “Arunachal Pradesh thusim a dinga tribe jouse huhna ding ‘pan-Arunachal’ masapen ahi in, sorkar in resolution apohdoh ahi”, tin aseiyin ahi.

“Alampi hi hahsatah ahiding jeh a tomngai tah a ipan diu, India sorkar masanga idinmun u phatah a ipeh diu ahi. Centre henga ithot diu kilolna hi gamsung miho dinga kitilkhouna ahi”, tin Khandu in aseibe in ahi. Mijousen ngaichat ahiteng atosot diuvin jong CM in temna aneibe in ahi.

“Pema Khandu sorkar in legislative member jouse panna a awgin khat a Arunachal Pradesh gam pumpi hi Sixth schedule a pansah ding ati jeh a gamsung mihon eigeldoh jing diu ahi”, tin Deputy Chief Minister Chowna Mein in aseiyin ahi. Gamsunga tribal ho huhna dinga ‘point 4’ koibe a Article 371 (H) semphat dinga avel a kasei kit ahi, ati.

Kihouna a pang ho lah a Ninong Ering, Lombo Tayeng, Techi Kaso, Tapuk Taku, Wangki Lowang, G D Wangsu, Nyato Dukam  leh Mutchu Mithi jong apang uvin, Jikke Tako in atosot na thu aseiyin ahi. Bamang Felix in House a resolution apohdoh na a igam sungu chule I mite ho huhna dinga pan ilahkhom phat u ahitai, tin aseiyin ahi.

“Article 371 (H) semphat a, Arunachal Pradesh gam a tribe hon hou chule chonna achepi hou customary law, gam leiset leh thil nei kipehson to na (ownership and transfer), pu pa chonna dungjuiya kivaipohna leh thutanna um ho huh/venbit nading point ho koibe dinga Legislative Assembly in kilolna anei ahi”, tin aseibe uvin ahi.

Xxxxxxxx

Minister Jayantakumar in online a PMJAY bol nading hongdoh

Imphal, August 28 (ET): Imphal old secretariat conference hall ah online a PMJAY bol thei ding Health and Family Welfare Minister Shri L. Jayantakumar Singh tunichun hondohna anei tan ahi.

Jin-Gun a pang minister Jayantakumar in houlim aman sung in koi hijongle kijen nadia PMJAY bolnom jouse’n Identity Card, Household card le passport 2 apeh a online a min akhumlut a amuthei ahilou jongle Facebook, WhatscApp, Instragram a pat a jong abolthei, central government in September 2018 a ana gondoh ahitai, ati. Chule hiche AB-PMJAY noi a insung hahsa hon kumkhat sung a insurance lakh 5  amuthei ding hiche tohgon hi phatchompi tei ding in Minister Jayantakumar chun mipi temna anei e.

Minister Jayantakumar in kijen nadia lhendoh hospital phabep AB-PMJAY scheme pomlou aumthu aphamo lheh in, hiche thilsoh hi health department in kholchilna ahin nei ding ahi e, ati. Chule scheme chungchang hi mipi het thei a phatah a tahdoh ding in media ho temna jong anei e.

Jin-Ja-Um a pang Principal Secretary, Health, V. Vumlunmang, IAS, in Covid-19 natna hise in hiche tohgon noi a minkhum na hatah in asunoh phah in, hijongle chanvou muding a lom hon online a min akhumlut thei ding le kikhumtup phat kichai nung jongle chejom ding hiche tohgon hi vangphat umtah ahi e, ati.

Chief Executive Officer, CEO, State Health Agency (SHA), Haulianlal Guite, IAS in central government tohgon Ayushman Bharat –PMJAY (Pradhan Mantra Jan Arogya Yojna) noi a insung hahsa hon kumkhat sung a kijen nadia lakh 5 chan amanthei ding state a pat chanvou muthei ding insung 243000 lah a tuchan a chanvou mu hi 83000 ahi in hiche lah a mi 20000 tobang chanvou phatchompi a hospital a kijen ahitai, ati.

Kingon a chun health department Additional director ho, Medical Superintendant, RIMS, District Hospitals CMO ho leh SHA thalheng ho apang un ahi.

xxxxxxxxxxx

NEP chungchang Webinar a hilkung kichuhna neiding le jana chansah ding akhohdan seikhomna chelha

Imphal, Aug 28(ET): Field Outreach Bureau, Senapati le Press Information Bureau le Regional Outreach Bureau, Imphal gonna noi a National Education Policy 2020 chungchang Webinar a chun gamsung pumpi a themjil na phatah a chesah nadia hilkung ho kichuhna poimo dan, hilkung lahdan, atohding dol ule hilkung jana achanding dol chansah ding thu tunichun seikhom ahi e.

SCERT Joint Director Shri Jim G. Thingujam in NEP 2020 tohgon lolhin nadia gamsung pumpi a B.Ed kum hin sim athempen ho scholarship hoitah pehding, hilkung tohna mun chon a um jing ngahding, hilkung a Teacher Eligibility Tests (TET) lolhing hobou lahding angai e, ati.

Chuleh D.M College of Arts Principal Dr. Ch. Sheelaramani in NEP 2020 tohgon lolhin nading a Manipur higher education ho a hilkung lhinglel le thil le lo avat ho government in asuh bulhing angai e, ati.

Tuni webinar kingon a pang het thei ho chu Shri S N Pradhan, Addl DG, NE Region, Ministry of Information and Broadcasting, Shri Abhishek Dayal, Director, Press Information Bureau, Imphal, PIB le ROB, Imphal official chuleh media ho ahi in, Shri Aribam Ibomcha Sharma, HoO, ROB Imphal in kingon a pan la jouse chung ah kipathu aphong e.

xxxxxxxxxx

NEP 2020 in hilkung ho kamkeh lou dia tohgon anei AIFRTE in phamo asahna phongdoh

Imphal, Aug 28: State le UT 22 a pat simlai, hilkung le Educational Rights organizations mi 80 ho kiloikhomna All India Forum for Right to Education (AIFRTE) chun adeh a North East gam government hon Central Civil Services (Conduct)  Rules mang a NEP 2020 a hilkung hon alunglhai lou nao thu a  kamkeh lou nading aje lut chungchang phamo asah nao tunichun aphongdoh un ahi.

Amahon tohgon thah noi a themjil mun ho centre in apum tuhchah got dan a um hi nam lhasam ho dia phalou tah hiding ahi e ajehchu thepna homdoh son hilkung ho hi civil service hobang a tuhchah ding hilou in, amopohna phatah a tongdoh thei ding a Article 19(1) jong apoimo dungjui a amanthei diuva gonpeh angai in, kikanchahna tohgon ho state government in agangthei pen in ladoh hen tin ngehna anei un ahi.

xxxxxxxxx

Covid-19 natna toh kimat a Bihar election khongaisah dia ngehna Supreme Court sanglou

Patna, Aug 28: Covid-19 natna umsung a election nei masapen ding le lha 2 masang a pat Election Commission (EC) in gontohsa a akoi Bihar election khongaisah dia ngehna chu Supreme Court in apomlou thu tunichun phondohna aneitan ahi.

Bihar assembly election khongaisah dia Muzaffarpur mi Avinash Thakur in PIL apehlut chu Justice Ashok Bhushan makaina mithum panna bench chu akahlhah ahi.

Covid-19 natna asan be jing le Bihar gamsung tuilet in district 14 atohkhah tolhon a mihem damthei na hi apoimo jo e tia PIL a kibolchu aboi ding aum le Election Commission in kivetkol nante tia bench chun adonbut ahi.

Langkhat a PIL pelut pan amanchah danthem  Neeraj Shekhar in Representation of People’s Act dan noi a EC in election phat achon thei ahitolhon a court in election chelhahsah lou dia EC athuhil angai e tia asei ahi.

Hiche thudol in state a political party dinmun jong achom cheh ahikit e. Rashtriya Janata Dal (RJD) le Lok Janshakti Party (LJP) in election phat chon dia asei Left party hon atosot kit in ahinla state vaipo  Janata Dal (United) le Bhartiya Janata Party (BJP) in akigong bang a election chelhah ding adeikit e.

Election nikho ding phondoh ahilou lai vang in election chelhah sah dia EC hi ijakai gontoh sa akoi tobang ahitai. EC in natna nei dia ginmo hon jong ama ama polling station a vote apehthei ding, polling station khat a mi 1000 bou in vote apehding, ache jouse’n muh akitom a temperature akivet diu, candidate ho gari 5 bou a lamlha ding le mi 3 bouseh in vote holna intin achot thei ding a EC in agon ahi.

xxxxxxxxx

Tahsa dinmun hoilou jeh a Japan PM Abe apanmun dalha dia um

Tokyo, Aug 28: Japan Prime Minister panmun tuh sotpen Shinzo Abe chun tahsa damlou na khohtah anei tolhon a apanmun adalhah ding ahidan tunia ama party a pat thuso chun asei e.

Abe hi achesa kum 2 masang a pat ulcerative colitis natna nei a kijen jing ahi in, news conference jong tunilhah nidan 5 a chu anei ahi.

Abe chung chang thu phondoh ahitolhon in ama panmun khel ding in LDP sung a seikhom lai jong ahikit e.

Abe in velni chan na a December 2012 a PM panmun atuh kit a gamsung sum le pai dinmun hatah a ana semphat ahi.

Ahin Covid-19 kimaitopi thu a Abe hi hatah a ana minse ahi. Ahin gallen nina jou a amasapen ding in sepai ho gampam cheding achesa 2014 chun ana boldoh kit e. Chule gal nei akiloipi gam ho thu a panlah lou nading dankhat jong ana semdoh ahi. Geldoh ding chu 2007 kum a jong tahsa dinmun hoilou jeh a PM panmun jong ana dalhah a ama party ana hatmo lo ahi. Chujou a pat lou le ait oh kikhen lou a hinkho hin mang jing ahitai.

Xxxxxxxx

UKLA in tup le doi phondohna nei

Imphal, Aug 28(ET): United Kuki Liberation Army (UKLA) Information and Publicity Secretary ST Kilong in tuni Kiloikhom na kiphudoh lona ajeh hilchetna aneina ah UKLA hi Kuki ten gamtum neidohna ding tup le doi neiya achesa kum 2018 September lha a hung kiphutdoh ahi. Chule India ten British te khutna chamlhat ana mu 1947 lai chun Northeast India hi ana jaopon chule Southwest Myanmar jong Myanmar gam anahi pon hiche pu le pa chenna gam India le Myanmar in abonna analahpeh nungchudoh na ding doile tup neiya kiphutdoh nam sepai akihi ati.

UKLA hi thudih le lamdih a natong ding’a kiphutdoh akihin nam miten neihetpeh diuvin temna akineiyin chule gam le nam ngailutna jalla kiloikhomna hinbelnom ho ding’a jong UKLA in kot lentah akihong e ati.

Xxxxxxxxx

Supreme Court in UGC dinmun tosot; ‘Final year exam’ bol louva simlai ho state in promotion apeh theilou dinga sei

New Delhi, Aug 28 (PTI): Supreme Court in Friday nikhon state government chule university hon Covid-19 pandemic sunga hi final year university examination bol louva final year simlai ho promote abol theilou ding ahi, tin asei uvin ahi.

Ahin, state hon final year exam akibol jou nadinga phat kitep peh hi akivoh chon thei nadinga University Grants Commission (UGC) henga asei thei ahi, tin Court in aseibe in ahi. Justice Ashok Bhushan lamkaina bench in, state koi tobang UGC in apeh phat sunga exam kabol doh theilou diu ahi, tia lunggel neiya aumleh exam bol nading nikho thah UGC in apeh ding uva akisei theiyu ahi, ati.

September lha kichai kah a university toh kisai jousen final term exam abol soh tei ding uva University Grants Commission (UGC) in circular asodoh douna a court a hehna leh ngehna chom chom kipe ahi in, Supreme Court in achesa August nisim 18 nikho a hiche chungchang a thutanna ol a nei dinga anasei ahi.

UGC in affidavit apeh nauva court henga Delhi leh Maharashtra sorkar in final term exam cancel bol dinga thulhuhna anei hin India gamsunga higher education standard atohkhah ding ahi, tia Supreme Court a asei ahi. Achesa July nisim 6 nikho a Covid 19 pandemic jeh a final term exam vohhai dinga circular kisodoh chouna a affidavit apeh kit u ahi.

Hiche masanga UGC in July nisim 6 nikho a kisodoh guidelines hi expert ho recommendation sungjui ahi, tia aseiya chule phatah a kholtoh na akinei jouva final exam kibol thei louding ahi tia kisei hi dih kisa lou ahi, tia ana seiyu ahi.

Xxxxxxxxx

ASI khat suspend kibol

Imphal, Aug 29: Manipur police department in ASI K Umarjit Singh chung chang a kholchil na ananei toh lhon in achung a mona le suh khel na ana kimudoh toh lhon in suspend ahidan phondoh na ahung kinei in ahi. Suspend sung ahi ASI pa hi reserve line a umding district SP pahlpeh na jaolou  a district sung adalhah thei louding ahi akiti.

Xxxxxxx

Kho 2 kikah a boina um

Tengnoupal, Aug 29: Tengnoupal district sung a um Rengpam  Tangkhul kho le Salungpham kho kikah a gamgi toh kisai a boina ana um toh lhon in kho teni akon mipi ho in kinotona ana nei uvin ahi. Bojna toh kisai in Thoubal police in kho teni lamkai ho Tengnoupal polcice jaona a jing nikho le kihou na anei pi ding u ahi akiti.

Xxxxxxxx

Khongsai Youth Union

Tamenglong, Aug 29: Khongsai Youth Union, Tamenglong & Jiribam in KNO toh akiboi na toh kisai a ni 5 sunga athu suhchetding a phat atep pehna ana nei uchu, state govt in thu tan lhah na ahin nei utoh lhon in Union in kipathu seina anei uvin ahi.  Kiloikhomna in maban a govt daan palkeh ho galguh bol hihen mip kiloikhoman lamkai hijong le achung a gotna sangtah apeh jing na ding in temna ahin nei uvin ahi. Govt in hetsah na ana nei toh lhon in bandh kou ding a Union in phondoh na ana nei jong chu akivohai tan ahi akiti.

Xxxxxx

Manipur a Kani lei kibol thu’a PM lekha kithot

Imphal, Aug 29(ET): Manipur sung a Kani lei hatah a kibol na chung chang a Ex-MP Candidate Ashand Kasar in Prime Minister Narendra Modi ang a lekha thot ananei in ahi.

Ashand lekha thotna achun Manipur gamsung’a Kani lei  atam behseh toh lhon a gamsung gam le go atoh khah daan le  mipi adeh a khangthah hon che khelna a anei dan ho ana sei in ahi. State sung  Golden Traingle lampi a aum toh lhon a gamsung hitobang natoh naho akikha gang lou le maban a khamjoulou ahung hiding dan jong ana seitha in ahi.  State sunga Khamnathei kibol na a govt in pan alah jou tah lou dan le daan ngah a pang ho aphatseh a Khamnathei a kivei a matdoh le hetdoh ahi dan ho jong ana sei in ahi. State dinmun Khamnathei toh kisai a vetsui jou lou ahi tah toh lhona  centre in nasatah a vetsui na ahin nei a pan ahinlah ding in jong Ashand Kasar in lekha thot na achun aseiyin ahi.

XXXXXXXXX

AMSU 55th  Foundation Day ana kimang

Imphal Aug 28:  All Manipur Student Union (AMSU) in tuni in akiphudoh kal kum 55 lhinna ana mang uvin ahi. Hiche kingon chu DM college a um kiloikhomna na office a ana kimang ahi. Kingon achun jin gun in H. Badankumar ana pang in, simlai ho le kiloikhomna lamkai ho tilkhou na ananei in ahi. Kingon achun AMSU lamkai Peter Laidhram in ahou limna a kiloikhomna kiphu kal tuni hi kum 55 lhinna ahin, gamsung a sakho dang kimeh beh lut gotna ahi lou le AFSPA ho doudal na a kiloikhomna in panlah na anei jing ding dan jong tahlang na ana nei in ahi. Kahmnatehi toh kisai a gamsung Golden Triangle toh akinei toh lhon a khamnatehi a kivei suh tang jou lou ahi toh lhon a pan nasatah a atah beh a akilah na ding jong hetsah na ana nei in ahi. Ahunglhungding September sung a Indo –Naga thu kisei chai ding thu chung a kiloikhomna in hiche kihou lhah na in Manipur ahin toh khah le kiloikhoman in mipi pan na a kiphinna nei ding a kigotna anei jing dan u jong hetsah na ahin nei uvin ahi. Tuni kingon achun 55th Hunger Matchers Day 2020 “SOUVENIR” le audio casstte khat hondoh na jong ana kinei in ahi.

Xxxxxxxxxxxxxxxxxxxxxxxxxxxxxx

PDS anchang hopdoh na kinei jing

Imphal, August 28(ET): State govt in lockdown toh kisai a mipi phate a neh kining lhing a pehding tohgon anei utoh lhon in tuni in jong gamsung muntin a pDS thil ho anchang jaona in hopdoh na ana kinei jing in ahi.Tuni in Jiribam district sung ading in anchang 371.64.420 quintal lam godown akon pohdoh na ana kinei in ahi. Churachandpur district sung ading in tuni in SAIKOT AC sung a hop dong in anchang 2625.40 quintal lam pehdoh na ana kinei in ahi. Tuni a anchang  pehdoh na kinei chu August lha ading ahi akiti. District sung a Thanlon le Henglep ading in jong anchang 1729.45 quintal le 375.75 quintal lam pehdoh na ana kinei in ahi. Singat in jong anchang 101.42 quintal lam pehdoh na ana kineiin ahi. Tipaimukh (Parbung) AC le Thanlon AC ading in jong anchang 561 quintal le 446.80 quintal lam September lha ading in pehdoh na ana kinei in ahi. Ukhrul AC ading in jong anchang 2987 quintal lam ana kila doh in, CHingai ading in jong anchangg 2172.40 quintal lam pehdoh na ana kinei in ahi. Senapati district sung ading in Karong AC sung a hopding in anchang 960.85 quintal lam pehdoh na ana kinei in ahi.

Xxxxxxxxxx

NEET le JEE exam chung chang a state 6 in SC a heng a thupeh velvet ding a hehna sem

New Delhi, Aug 29: Opposition makai na state 6 akon minister ho in Supreme court ang a NEET le JEE exam bolding tohgon thah vet ding in hetsah na ahin nei uvina hi. Hiche exam natna um lai taha bolding a hetsah na ana kinei toh lhon a mi tampi in natna akilah doh thei ahi toh lhona velvet dinga  ngehna ana kinei ahi. Hiche velvet na nei an ding a hetsah na hin nei ho chu  West Bengal (Moloy Ghatak), Jharkhand (Rameshwar Oraon), Rajasthan (Raghu Sharma), Chhattisgarh (Amarjeet Bhagat), Punjab (B S Sidhu) le Maharashtra (Uday Ravindra Sawant) ho ahiuvin ahi. Hetthei khatchu hiche exam bolding phalpeh na hi Supreme court in achesa August nisim 17 nikho a bol ding a phal na an apeh u ahitan ahi. Opposition party minister rho akon thuso kimu dungjui in, hiche ecam bol hi simlai atam ji toh lhon a thmevetna kinei na hai simlai ho hung kip el jing ding u ahin, hitabang umding hi tulai tah a tijat umtah ahitoh lhon a hitabang velvet na nei ding ahi hetsah na hung kinei ahi akiti.

Xxxxxxxxxxxxxxxxxxxxxxxxx

Lockdown daan palkeh ho kiman jing

Imphal, Aug 29: Manipur Police in lockdown le covid toh kisai a daan kisem juilou ho matna anei jing uvin ahi. Hetthei khat chu covid toh kisai che le vah le khan a kinei le maitom kitom lou ahi lou le social distancing daan jui lou ho mat ding le leusah ding a daan ana kisem ahi. Tuni in daan palkeh mi 335 lam ana kiman in, akiman hochu phate a aki hil jou uvin nilhah lam a ana kilhadoh tan ahi akiti. Tuni a daan palkeh ho akonna leusah na a sum an akimu chu dangka 66.500/- (sixty-six thousand and five hundred) lam ahi akiti. Maban a jong daan palkeh ho kileusah na le kimat na um jing ding dan jong hetsah na ahung kinei in ahi.

Xxxxxxx

Covid-19 lockdown sunga Karnataka a ‘Child marriage’ case

tam cheh cheh

Karnataka, Aug 28: COVID-19 pandemic akisei khoh laiya Karnataka gam a ‘Child marriage’ atam cheh cheh e, tin Karnataka State Commission for Protection of Child Rights (KSCPCR) in aseiyin chule achesa lha li sung (April-July) a gamsunga child marriage case 107 kisei ahitan, kum masa a agom a 156 case record kibol ahi, ati.

KSCPCR Chairman Dr Sebastian Anthony in thuso miho akihoulimpi na a, “Administration in gamsung pumpi a Covid-19 lockdown aboipi pet a hi nu leh pa tehon achate chapang ho jinei sah nadinga phat pha ahi tia alah u ahi. Administration in lockdown jeh a ahet doh lou chapang ki jinei sah na adang dang jong um maithei ahi”, tin aseiyin ahi.

“Gamsunga achesa March leh June lha kikah sunga Childline in chapang golvah kibol peh ho thu toh kisai case 550 a pan alah ahitai”, tin Dr Anthony in aseiyin ahi. School leh college ho kikhah ahitan, numei chapang ijat school che um em, ti akhol hahsa ahi. Hiche hi nu leh pa te hon chapang cha cha hinalai achanu teho lockdown sunga golvah bol peh nap hat a man nadinga kijen asah u ahi, tin hilchenna aneiyin ahi.

Child marriage atamjo hi Ballari, Mysuru, Bagalkot, Dharwad, Belagavi chule thinglhang langa case kisei atamjo hi ahi. “Ningkum tu phat toh tekah dinga tukum a child marriage hi ajat ni a kal ahi. government helpline number 181 kikoi ahi”, tin KA Dayanand, Director, Women and Child Development Department, Karnataka in aseiyin ahi. Helpline a kon athu aguh a akijah teng leh hitobang golvah atamjo hi kisuh hai peh jou ahi, ati.

Pandemic sunga sum hahsat jeh jong hi child marriage atam cheh na ajeh khat ahi. Angaiya golvah hi loupitah a abol uva, loan sangtah tah alah u ahi in, lockdown leh pandemic jeh a golvah lentah a bol ding akiphal lou hi nu leh pa te dinga sum tamtah lut louva golvah bol nathei hi ahi, tin Dr Anthony in aseibe in ahi.

Xxxxxxx

Covid-19 natna toh kimat a Bihar election khongaisah dia ngehna Supreme Court sanglou

Patna, Aug 28: Covid-19 natna umsung a election nei masapen ding le lha 2 masang a pat Election Commission (EC) in gontohsa a akoi Bihar election khongaisah dia ngehna chu Supreme Court in apomlou thu tunichun phondohna aneitan ahi.

Bihar assembly election khongaisah dia Muzaffarpur mi Avinash Thakur in PIL apehlut chu Justice Ashok Bhushan makaina mithum panna bench chu akahlhah ahi.

Covid-19 natna asan be jing le Bihar gamsung tuilet in district 14 atohkhah tolhon a mihem damthei na hi apoimo jo e tia PIL a kibolchu aboi ding aum le Election Commission in kivetkol nante tia bench chun adonbut ahi.

Langkhat a PIL pelut pan amanchah danthem  Neeraj Shekhar in Representation of People’s Act dan noi a EC in election phat achon thei ahitolhon a court in election chelhahsah lou dia EC athuhil angai e tia asei ahi.

Hiche thudol in state a political party dinmun jong achom cheh ahikit e. Rashtriya Janata Dal (RJD) le Lok Janshakti Party (LJP) in election phat chon dia asei Left party hon atosot kit in ahinla state vaipo  Janata Dal (United) le Bhartiya Janata Party (BJP) in akigong bang a election chelhah ding adeikit e.

Election nikho ding phondoh ahilou lai vang in election chelhah sah dia EC hi ijakai gontoh sa akoi tobang ahitai. EC in natna nei dia ginmo hon jong ama ama polling station a vote apehthei ding, polling station khat a mi 1000 bou in vote apehding, ache jouse’n muh akitom a temperature akivet diu, candidate ho gari 5 bou a lamlha ding le mi 3 bouseh in vote holna intin achot thei ding a EC in agon ahi.