CM Biren in COVID-19 Care Centre athah hondohna nei; gamsunga Community Transmission...

CM Biren in COVID-19 Care Centre athah hondohna nei; gamsunga Community Transmission aumpoi, tia sei

77
0
SHARE

CM Biren in COVID-19 Care Centre athah hondohna nei; gamsunga Community Transmission aumpoi, tia sei

Imphal, Aug 3(ET): Manipur Chief Minister N Biren Singh in Monday nikhon gamsunga ‘local transmission’ aum akimu vanga Covid 19 natna a ‘community transmission’ aum poi, tin aseiyin ahi.

Manipur Trade and Expo Centre, Lamboi Khongnangkhong, Imphal West mun a lupna 300 umna COVID Care Center ahondoh na kin gon a Chief Minister in thusoh miho akihoupi na a asei ahi. Speaker Y Khemchand in gamsung a Community tramission kipan ahitai, tia asei nikhat jouva Chief Minister in suhthengna anei ahi.

CM Biren in Manipur Trade and Expo Centre, Lamboikhongnang, Imphal East district a Monday nikhon athah a kisa lupna 300 umna COVID 19 Care Centre hondohna aneiyin, hiche pum a Manipur a COVID 19 natna neiho kijen nading hitobang centre agom a 14 um ahitai. Centre thah a hi block 4 um ahi in, lupna 300 umna thei ahi in, chule ngaichat ahi a ahileh lupna 1,000 chan umna COVID 19 Care Centre a upgrade kibol ding ahi, ati.

Manipur gam a coronavirus case tam cheh cheh a, gamdang a kholjin lou gamsung miho lah a natna kisei pung cheh cheh a athi jong um ahi. COVID 19 Care Centre athah akisemdoh a, manchah upgrade akibol toh kilhon a, natna nei ho tua hi aphatcha kijen theidiu ahi. Covid 19 local transmission aumin, ahivanga gamsunga Community transmission aume tia seithei hilou lai ahi, tin CM in aseiyin ahi.

Natna nei hon anatna selguh louva lhangphong a kijen dinga ahung doh joh diuvin jong temna aneibe in ahi. Tu masang jep a Manipur Legislative Assembly Speaker Yumnam Khemchand Singh in sorkar chule mopohna nei department hon aphon doh loulai vanga gamsunga virus hi ‘community transmission’ kipan ahitai, tia anasei ahi.

State dang a kon hung kile hilou gamsung mi natna anei aum jouva CM Biren in natna neiho lhangphong a joh ahungdoh uva, positive ahiuleh amat na thei pen a kijen ding a kouna anei ahi. COVID 19 natna hi local transmission um ahitah jeh a lungkham umthim ahi in, tu dinmun a pandemic douna dinga COVID 19 holah a awareness bol a chule tosot ding hi thupi ahi, ati.

August nisim 6 chan Lockdown aum ding thu a CM in, gamsung dinmun akhohset cheh cheh a ahileh state cabinet in lockdown hi ni 7 aphat asuhsao be maithei ahi, tin aseiyin, hijong leh hiche hi case ho phatah a vettohna kineiya thulhuhna umding ahi, ati.

Kin goun a Deputy Chief Minister Y Joykumar leh Health Minister L Jayantakumar, Chief secretary Dr Rajesh Kumar, Principal Secretary (Health) V Vumlunmang, Director (Health) Dr. K Rajo chule official dang dang jong apang uvin ahi.

Alangkhat a, Manipur gam a tu dinmun a Covid 19 positive case 2,920 lhing ahitan, hiche lah a active case 1,147 leh recovered case 1,766 um ahi.

Manipur a travel history neilou mi 80 panna a Covid-19 positive 89 kimudoh be; Natna nei 2920 lhingta

Imphal, Aug 3(ET): Manipur a achesa nidan 24 sunga Travel history neilou mi 80 panna in Covid-19 positive case 89 akimudoh ben, hiche ho chu pasal 51 leh numei 33 panna a milham (general population) 84  chule Central Armed Police Force (CAPF) personnel mi 5 ahi.

Positive kihetdoh beh athah holah a VRDL, RIMS a mi 67, DH Thoubal a 16 chule Babina Diagnostic Centre a mi 6 test kibol ahi. Natna nei hohi Imphal West district mi 51, Thoubal 30, Bishnupur 1 chule Ukhrul district mi 1 ahi. Ukhrul a kon mi 2 leh Thoubal a kon mi 2, agom a mi 4 hi state dang a kon hung kile ahiuvin, adang se hi gamsung mi, gamdang a akholjin na umlou ahi.

Abon uva Covid Care facility a achon tauvin, ‘containment leh contact tracing’ kiti angaicha ho kipan ahitai. Chule Monday nikho a Covid 19 toh kisai natna jeh a athi akisei be pon ahi.

Alangkhat a, District Administration Chandel in gamkaiya numei 5 Covid 19 positive ahi hetdoh ahi jouva Tampi Lamkhai a kon Chakpikarong Khupi, Beula, Rungchang leh Ravalan chan Chakpikarong area ‘containment zone’ a phondohna anei tan ahi. Containment zone phondoh ahi toh kilhon a, gamkai kikhah a, lut leh pot tuni a kon kiphal talou ahi.

Achesa nidan 24 sung ma ma a CCC Meitram a kon 21, Senapati a kon 2, Churachandpur a 5 chule NIELIT Churachandpur a kijen mi 1 RT PCR test abol uva COVID 19 negative ahi jou uva discharged abol tauvin ahi. Gamsunga tuchan geiya natna nei agom a 2920 lhing ahitan hiche lah a active case leh adamdoh hi 1147 leh 1766 cheh ahi. Natna jeh a agom a mi 7 thi a chule recovery rate 60.47 a um ahi.

 

Kpi a ASHA worker khat Covid 19 positive ahi akihetdoh jouva ‘containment zone’ phondoh hita

KANGPOKPI, Aug 3(UNA): State dang a kon hung kile Kangpokpi district a ‘quarantine centre’ a kikoi mi asang a sim lah a 300 nailam Covid 19 positive ahi a chule district sunga mi 2 athi jouva, virus in Kangpokpi district a um quarantine centre ahin khel in, defence line masapen atongkha in, gamdang a kon hung kile hilou gamsung mikhat positive ahi akimudoh in ahi.

Hiche toh kilhon a, adeh a Kangpokpi town miho lah a community transmission umthei ding dinmun a ahi. Kangpokpi District Headquarters Ward No 5 a cheng ASHA worker kum 60 a upa numei khat achesa July 31 nikho a ASHA worker adang dang hotoh sample alah nauva ama result Sunday nilhah a akimu in, positive ahi  hetdoh ahi. Ahivanga, symptoms aneilou chule damthei tah a um ahi.

Institutional Quarantine Centre chom chom a umho temperature la dinga ASHA worker adang hotoh natoh kipe a amanu hin Kangpokpi DHQ a Nute Kailhang a me jong ajoh ji ahi. Medical Department injong apet pet a pan alah a Kangpokpi Town Committee, Kangpokpi Women Welfare Organization, Kangpokpi Youth Union chule district police ho toh kitho a ‘containment zone’ aphondoh uva, gamkaiya natna achal be louna dinga pan alah u ahitai.

Monday jingkah a kon Dr Henkhoneng Mate, DSO Kangpokpi District leh Dr. Paotinlal Haokip, MS i/c District Hospital Kangpokpi lamkaina a Chunglenmang Kipgen, MCS toh town sunga um kiloikhomna ho leh police hon positive ahi kihedoh nu toh kimuto ho akhol (contact tracing) pan tauvin, chule ama jong a inmun a kon phat chomkhat a man ding ‘isolation centre’ a achon tauvin ahi.

Numeinu in akimupi khah hohi medical department leh district administration official hon nikho 14 self quarantine akibol diu chule achedoh louding uva thuhilna anei uvin ahi. Alangkhat a, ama ama ward Chairman henga ‘home surveillance’ aum sung uva angaichat ho ahetsah diuvin jong asei uvin ahi.

District Magistrate jong hi a District Deputy Commissioner, Somorjit Salam, IAS in public notification asodoh na a, achesa kal khat sung (July 25) nikho a kon positive ahi kihedoh nu toh kimuto hon Dr. Henkhoneng Mate, DSO Kangpokpi (8131087633) leh Dr. Paotinlal Haokip, MS i/c District Hospital Kangpokpi (96512324045)  henga ahetsah uva chule hospital hour sunga sample collection leh testing abol dinga asei uvin ahi.

‘The Manipur Epidemic Disease COVID 19 Regulation, 2020’ Para 13 noiya athaneina kipe jong amangcha in, Kangpokpi Ward No. 5 ‘containment’ dinga phondohna aneiyin chule containment area sunga alut leh apot doh ding kiphal talou, school kihon, mipi kikhopna, gari lhaiho jong kikhah soh ahitai.

Quarantine center pam a Covid 19 positive case akimudoh jouva Kangpokpi town mihon lockdown guideline leh protocol ho jana ahin neipan uvin, town sunga tuni a koima avah le umlou tobang ahi. Kangpokpi pam a dealer ho leh me joh gamdang hon Kangpokpi avil loudiu hi thilpha hiding ahi, ajeh chu community transmission umthei ahi.

August nisim 3 nikho chan a Kangpokpi District a Covid 19 positive case 280 lhing ahitan, hiche lah a mi 141 damdoh a chule active case 139 um ahi. District sunga natna jeh a thi mi 2 lhing ahitai.

 

‘Drug case’ CBI khut a pehdoh dinga KIMACS in sorkar henga ngehna nei

IMPHAL, Aug 3(UNA): Kanglei Indigenous Martials Arts and Cultural Society in khamnathei toh kiman Lhukhosei Zou case a politician, mi bolthei, thunei tah tah leh state police ho apanna thu alungkhampi nau asei uvin chule hitobang case hi apet pet a CBI in akhol dinga pehdoh dinga temna anei uvin ahi.

KIMACS publicity and information secretary L Saityamjit Meitei in thuso anei na a, tu dinmun a gamsung mi jouse hi society suboi a chule khangthah ho khonung suse a khamnathei douna a pan alahkhom phat ahi, ati.

Alangkhat a, state sorkar in ‘war on drugs’ campaign abol hi mipin aginchat lel ahi, ajeh chu kani, kanja, number 4 leh khamnathei adang dang a sumkol vei hohi mi bolthei chule tua haosa tah leh nomtah a cheng ho bola hi, tin aseiyin ahi. Thinglhang gam atamjo a kani lei kibol a chule kho phabep a factory jong um ahi in, hitobang alei akibolna mun ho a police security force ho lut joulou ahi, ati.

Khamnathei hohi state police hon lakh a sim man kal seh tobanga amat vang uva, akiman themmona neiho hi amimo chule thanei lou alhasam ho tilouva achung uva gotna kilom khatcha kipe lou ahi, tin aseibe in ahi. Khangthah tamtah in khamnathei abol a, society a boina chom chom aso hi khonung khang dinga kinepna umlou ahi, tin KIMACS in aseiyin ahi.

Manipur a heroin dinmun hi Columbia leh Mexico kiti khamnathei a kivei gangster ho sepai ho sanga athanei john au mun toh kilou ahitai, tin asei uvin ahi. 1980 kum a AFSPA akichepi a hi sorkar leh thingnoimi ho kah a kidouna sangtah um a, hiche a hi khangthah tamtah in meithal khel a khamnathei leh syringe joh achoi uva gamsung hi HIV state a ana umlo ahi. Society in heroin tilou boina tamtah ato ahi in, tuchan a khamnathei addict hon phatah a hinkho aman kit nadinga policy programme hi mopohna nei sorkar thalhenga kon ima kisem lou, khamnathei bol ho hi society in athet joh ahi, tin aseibe uvin ahi.

 

PG leh UG semester exam bol dinga thulhuhna velvet dinga AMSU in ngehna nei

Imphal, Aug 3(ET): All Manipur Students’ Union (AMSU) in achesa July nisim 6 nikho a September lha kah a terminal semester examination jo dinga UGC in thuphon anei alungkhampi nau thuso anei uvin ahi.

Simlai kiloikhom hon thuso anei nauva, UGC guidelines deilouva a Supreme Court a case kisem ‘pending’ a um ahi, tin aseiyun chule Home Ministry in UGC guidelines toh kisaiya adin na apehlut dinga Court in thuhilna apeh ahi, ati.

Bruce Pebam, Human Resource Development Secretary, AMSU Headquarters in thuso anei na a, COVID 19 pandemic jeh a India chule Manipur gam a mihem lakh 18 val atohkhah a chule natna jeh a thi jong um ahi. Tua hi WHO in apeh guidelines ho juiya natna douna a mipin kigotna phatah anei phat ahi, ati.  UGC guidelines dungjuiya, Manipur University injong Under Graduate leh Postgraduate terminal semester exam hi September kal kipat a kon bol pan dinga notification asodoh a, time table toh asodoh ahi. Lockdown lahdoh a exam bol ding hi simlai ho dinga ahinkho tongkha thei ahi. Alangkhat a lha thum bol ding class hi lha ni jeng jong class umlouva exam bol ding hi adih ahipoi, tin AMSU thuson aseiyin ahi.

UGC guidelines dungjuiya exam hi online, offline ahilouleh blended mode a bol thei ahi in, ahivanga Manipur in guidelines kichah asem loulai ahi. Exam bol na dinga exam bol ding dan guidelines hi SOP juiya Expert Committee hon asem diu ahi, tin aseibe uvin ahi.

Manipur University authority hon Undergraduate leh postgraduate semester exam bol nadinga thulhuhna anei avel gel phat diuvin AMSU in thuso anei nauva temna aneibe uvin ahi.

 

State drug policy a juu ana kijaosah lou hi vangset umtah ahi: CADA

Imphal, Aug 3(ET): Tu chung Manipur a Social Welfare Department in ahin pohdoh State Policy on Drugs ki sem na a juu chug cchang thu ana jao lou hi vangset umtah ahi tin Coalition for anti drug Association (CADA) in hetsah na ahin nei uvin ahi.

Manipur a achesa 1970 kum lam akon a pasla ho in ju don akon a numei le chapang chung a khanset na ana nei dan ho ule hitobang natoh ani ni a khan jing a angah na aum loudan chung chang a jong kiloikhomna in tahlang na ahin nei uvin ahi. Gamsung a juu le khamnathei jat chom chom akon a khangthah ho in kingolsah na le chatei na a ahin nei utoh lhon a Nisha Bandh jong ana kisem doh ahidan jong tahlang na anakinei in ahi.

Achesa 1991 kum a “Manipur Liquor Prohibition Act 1991”  hung kisem doh toh lhon a gamsung dry state a phondoh na ana kinei ahin, aphat dungjui a Amendment hung kibol in gamsung a juu akikham lou bang a john a hung kinei kit na chung a mipi ding a avngset na hai dan kiloikhomna in hetsah na ahin nei uvin ahi. Gamsung a khangthah ho in picnic min a juud on na gamsung muntin a anei jing nah o u chung a jong demna sangtah ahin nei utoh lhon in hou toh kisai thil tohgon kingon ho ajong juu kidon jing dan thu tahlang na ahin nei uvin ahi.

Gamsung a juu kha dinga tohgon jat chom chom kinei jing vang a juu don ho atam cheh cheh daan le akhoh cheh cheh dan u jong kiloikhomna in hetsah na ahin nei uvin ahi. Ju jeh a khangthah ho tahsa hung kitoh khah dan le dammo na jat chom chom anei dan u chuleh lampi toset ho chung chang ahung tam jing toh lhon a vangset na jat chom chom jong ahung um jing dan tahlang na ahin nei utoh lhon a juu kha nading tohgon nasatah a chelhah ahi na ding in hetsah na ahin nei uvin ahi. Governemtn in gamsung a juu jeh a boina soh ho geldoh pum a khan a ding tohgon ahin nei uva, daan gahtah a ahin sem ding uvin jong kiloikhomna in tahlang na ahin nei uvin ahi. Kum ijat hamkhat mii kiloikhomna jat chom chom ho in juu khan a ding a natoh jat chom chom ahin nei jing vang uva gov tin daan gahtah a asem loujeh a kikhah jou lou ahidan thu jong kiloikhomna in hetsahna ahin nei uvin ahi.

Singngat kho a CBI bank kibulu

B.Lalboi Gangte

CCpur. August 3 (ET):  Singngat kho sung’a achesa  July nisim 31 nilhah a gucha hon khat in Centre Bank of India (CBI) aluh chu tunin office staff hon anahedoh utoh lhon’a Singngat Police ho toh vetlhah na ananei uvin ahi. Hetthei khat chu achesa  August nisim 1 leh 2 sung bank holiday anahi jeh ahi. Hiche natoh hi koi khut nung ahi khosung leh Police hon ahedoh nai pouvin ahi. Ahin gucha ho bank sung nalut u vang uvin thil keu mang vang ima anaum pon ahi. Alangkhat’a  Centre Bank of India (CBI) hi Singngat khosung’a Bank aum sun khat jong ahi.

 

Konyak makai na NSCN-K in Yung Aung demna nei

Kohima, Aug 3: NSCN (K) Lt General (Retd) Nyemlang Konyak lamkai na kiloikhomna in Yung Aung chung a demna ahin nei utoh lhon in daan toh kitoh lou a acaloh naho seilhah na ahin nei uvin ahi. Yung AUng hi NSCN(K) chom khat a lamkai hi ahi. Lt General (Retd) Nyemlang makai na NSCN akon a thuso kimu chun asei na a Yung Aung  in tohgon hoilou anei na akon a NSCN (K) lamkai lui  SS Khaplang in thina ato ahi tin ngohna ahin nei uvin ahi. Khaplang toh kinai cha aum jeh a ana toh nah o chu ana chelha ahin, lamkai pa thina chung a apanlah na hi akimat pi ho in hetsah na ahin nei u ahidan jong tahlang na ahin nei uvin ahi. Achesa 2010 kum a Yung AUng in kahmnathei toh kisai a kivein anei ding le lampi ahin gon dan jong tahlang na ahin nei uvin ahi. Yung AUng in atohgon chung chang a Kahplang lheplhah na ana nei dan jong hetsah na ahin nei uvin ahi. Khaplang in ana toh na phatlou naho hetdoh na ahin nei toh lhon a Yung AUng in ngaidam ana kithum dan jng hetsah na ahin nei uvin ahi. Khaplang hti jou a Yung AUng in abol le atoh ho ahin jom kit dan le galguh bol lamkai a apan hi khamnathei a kivei na ding lampi semna bou a ajah da thu jong hetsah na ahin nei uvin ahi. Naga mite in Yung AUng akon a kikhin doh na anei uva koim ain abel lou ding uvin jong hetsah na ahin nei uvin ahi.

 

JNIMS a jilkung ho dinga ‘Time Scale Promotion Scheme’ phatsah hita

Imphal, Aug 3(ET): State Cabinet in JNIMS a teacher (Assistant Professor leh Associate Professor) ho a dinga ‘Time Scale Promotion scheme’ phatsahna anei tauvin, additional post akisem louna dinga proposal abol uvin ahi.

Director JNIMS henga Deputy Secretary (Health and Family Welfare), Manipur government in lekhathot apeh dungjuiya, apang sa/aum sa natong hohi ‘critical assessment’ dungjuiya higher level a promote kibol ahilouleh post jat khelna umlouva scale upgrade kibol ahi, ati.

Proposed kibol scheme a hi- Associate Professor a kon professor a promotion peh nadinga appointment authority hon Associate Professor regular post 22% hi Professor a grade upgrade abol ding, MCI guidelines aphat phat a kisodoh dungjuiya Assistant/Associate Professor leh adang dang hon service kum ijat abol a chule research publication abol ho ngai ding ahi.

Officer promotion kipe hohi en-block junior a umdiu ahi. Hitobang officer ‘personal promotion’ nei hohi ama ama thepna noiya vacancy um dungjuiya post kigon peh ding ahi. Chule Associate Professor jat (agom a) hin Assistant Professor aum jat akhel theilou ding ahi. Aphat dungjuiya JNIMS service rules dungjuiya Chief Secretary lamkaina Selection Board in time scale promotion a dinga screening abol ding ahi.

Time Scale Promotion, 2018 Rules 7 (C) semphatna (amendment) anei nauva, SRs/Tutor/Demonstration/Lady Medical Officer sanction strength 50% kal val hi kum khat a upgrade kibol louding chule Actual up-gradation hi MCI in aphat phat a asodoh dan dungjuiya Assistant Professor panmun tuh dinga kilom SRs/Demonstrators/Lady Medical Officers ho chunga kingam ding ahi.

Ningol Club in Lhukhosei Zou case CBI khut a peh doh dinga kiphinna bol

Imphal, Aug 3(ET): Lhukhosei Zou drug case CBI in alah dinga Ningol Club volunteer hon thumna anei uvin, Monday nikhon poster campaign apan uvin chule Heirok Part-II kailhang a kiphinna abol uvin ahi.

Ningol Club hi society suboi a lunggel kibahpi numei ho kiloikhomna ahi. Ningol Club Secretary general Yaiphabi Ningthoujam in thuso miho akihoupi na a, sorkar in mipi lungnatna ahetthem peh a, khamnathei a kivei Lhukhosei Zou case hi Central Bureau of Investigation khut a apeh ding ahi, ati.

Sorkar in society suhboi ding go a Zou venna apeh louding, gamsung dan dungjuiya gotna peh ding ahi, tin jong aseiyin ahi. Drug lord khat gotna akipeh louva ahileh War on Drug kibol lo na ajeh ipi um ham, tin Ningol Club Secretary in thudohna aneibe in ahi.