CM Biren Delhi akon hung kile ta; apanmun centre in anamdet toh...

CM Biren Delhi akon hung kile ta; apanmun centre in anamdet toh lhon a Z+ Security peh ding phatsah

46
0
SHARE

CM Biren Delhi akon hung kile ta; apanmun centre in anamdet toh lhon a Z+ Security peh ding phatsah

Imphal July 3(ET):  Chief Minister N Biren chu tunin Delhi akon Imphal ahung kile tan ahi.

Manipur government sung’a boina jat chom chom ana um toh lhon a Chief Minister khel ding thu ho ana um jing toh lhon in tunin avel in central govt in N. Biren apanmun tuhchah ding in namdet na anei tauvin ahi.

 Chief Minister pa chu BJP lamkai hon tu naicha a kibol Rajya Sabha MP election a lolhin na toh kisai a kipapina nei pi ding a kouna ana nei u ahi akiti. Centre lamkai hotoh kihou lhahna thu ho chu ahunglhung ding nikho a kihe ding ahi akiti.

Hetthei khat chu NPP in BJP toh kitho khom a panlah khom kit ding a kigel lhah na ana nei kit tah toh lhon a NPF in jong cabinet post ahin thumbe kit u ahi akiti.  Congress akon chomlut MLA hon jong cabinet mun athum jing u ahi.

Central govt in Manipur sung a Biren vaihop thep jeh le party suh hat na ding a pan nasatah a alah jeh in pachat na anei utoh lhon in ministry of Home Affairs  in jong all India Z+ Security peh ding in phatsah na anei tauvin ahi.  Hiche toh lhon a Chief Minister pa hi Manipur Rifle ho khel a CISF hon a guard diu ahitai.

Central government in June nisim 10 sung a Chief Minister pa guard ding a CISF ho ahin sol diu ahitai jong akiti. Govt semna a party chom chom akon ahilou le party sung a minister peh ding chung chang thu a jong Chief Minister pan centre a lamkai hotoh kihou na ana nei uvin ahi.

National People’s Party (NPP) MLA ho hi adei bang uva cabinet hung kipehding le kipehlouding thu hi tu chan in hetchen ahi hih lai in ahi akiti. Jani a kihou na achu  BJP Central Party  President JP Nadda Amadi le  General Secretary VM Shantosh jaona a vaipoh na chung a kihou na ana um ahi. Hiche thu ho hetchet na le phondoh na hi ahunglhung ding nikho ho a ahin neiding ahi akiti.

CM pa ahunglhung chun Imphal Airport ah COVID-19 test abol ngal uvin, a result -ve ahi jong akiti.

Manipur a Covid-19 positive mi 37 kihetdoh be; natna nei 1316 lhingta, active case 678 um

Imphal, July 3(ET): Friday jan nidan 6.30 chan, achesa nidan 24 sunga Manipur a coronavirus positive case 37 akihet be toh kilhon a gamsunga natna nei agom a mi 1316 alhing tan, hiche lah a active case 678 um ahi.

Alangkhat a, hiche phat sung ma ma a Covid 19 natna a kon damdoh mi 22 jong akijenna mun uva kon discharged abol tauvin, hiche toh kilhon a natna a kon damdoh gamsunga mi 638 lhing ahitai, tin COVID-19 Common Control Room in aseiyin ahi. Manipur a recovery rate hi tua 48.48 percent lhing ahitai.

Friday ni a test akibolna a positive ahi kihedoh mi 37 holah a, mi 28 hi Jiribam district mi, Ukhrul district a mi 6, chule Thoubal district mi 3 ahi. Abon uva Covid Crae facility a achond iu chule ‘containment’ le ‘contact tracing’ ho jong achelha e, tin thuso anei nauva aseibe uvin ahi.

Chule Covid Care Centre a kon discharged kibol mi 22 lah a mi 11 hi Meitram CCC a kijen ahi in, mi 5 hi Kasom Khullen CCC, mithum hi Covid Care Facility, RIMS, mi 2 hi Chandel CCC chule mikhat hi Ukhrul CCC a kijen ahi. RT PCR test abol kit nauva Covid 19 negative ahi phat uva akijen nau mun a kon asoldoh u ahi.

Covid 19 natna achal dan hi ‘no case’, ‘sporadic case’, ‘clustering of cases’ chule ‘community transmission’ tia kikhen ahi. Jiribam police station a ‘local clustering of cases’ aume ti photchenna um ahi in, ahivanga tuchan a community transmission umlou lai ahi.

Covid 19 in atohkhah ho lungthim adam thei nadinga pan akila jing in, tuchan geiya State Psychological Support Team in counseling session 9227 abol ahitan, hiche hi mi 7449 in aphatchompi ahi, tin aseibe uvin ahi. Psychological Helpline Number hohi – 8787457035, 9402751364 chule 7629943596 ahi.

Jiribam Police personnel 26 covid-19 Positive hi

Jiribam, July 3: Jiribam Police station sung a police personnel 26 lam covid-19 positive ahiuve akiti. Amaho lah a positive khat ana kimat doh toh lhon a adang ho jing test kibol na a mi hijat chu positive anahiu ahi. Thuso kimu dungui in station a um police dang ho jong abon uva test kibol ding u ahi akiti. Positive ho hetdoh ana hi toh lhon in containment zone in phondoh na ana nei taovin ahi.

Yairipok Heitropokpi a Activa 2 kitatto; mi 1 thi, 3 kisukha

Imphal, July 3(ET): Tuni chun Yairipok Heitroipokpi Chingya a active ni akitatto in hiche achun amun a mikhat athi den in mi thum hochu akinthei pen in hospital ajotpi uvin ahi.

Thina tohpa chu Ingourok Awang Leikai a cheng Khundrakpam Kesho(73) ahi in Honda active MN01 A 5508 atol ahi. Thina tohpa toh toukhom chu Shikhong market akon Huirongbam Ibomcha (70) ahi chule midang teni chu Mutum Naba (64) chule Abujam Ibopisak (65) ahi lhon in amateni hi Chandrakhong Mayai Leikai akon ahi lhon e.

Chem a kisun lih

Imphal, July 3(ET): Tuni jingkah nidan 10:00 vel in  Thokchom Umachandra  Singh (38) yrs S/o. (L). Th. Tombi Singh  chu Nongthongbam Haridas Sjngh @ Rambo Singh, Mayang Imphal A/p. Lairikyengbam Leikai, Salan Leirak in chem in ana sun in, Th. Umachandra chu JNIMS hospital a jan ding a ana kipoh na a Doctor ho in athisa a kilhut in phondoh na ana nei taovin ahi. Police in thilsoh toh kisai in kholchilna ana nei pan taovin ahi.

Social Welfare Director in nehguh bol a ki ngoh official 6 ‘show cause notice’ pe

Imphal, July 4(ET): Director, Social Welfare, Manipur, Ng. Uttam Singh in Friday nikhon CDPO 4 panna a Department a official 6 ‘Show Cause Notice’ ape in ahi.

CDPO phabep in Supervisor ho a kon Anganwadi Workers and Helpers a kon AWWs le AWHs ho arrear peh ding thu toh kisaiya phalna umlou sum aladoh uve, tia ngohna aum thu toh kisai ahi.

Thilsoh a pang official hon hiche chungchang thu a July nisim 10 kah a jihtho a hilchenna apeh diu ahi in, ‘written explanation’ apeh lou uva ahile dan dungjuiya achung uva action kila ding ahi, tin Director Uttam Singh in aseiyin ahi. Uttam in Administrative Department henga tuni a report jong apeh ahi.

Hiche dungjuiya, Secretariat, Social Welfare Department in Director (SW) Chairperson hina a nehguh kibolna thu khol dinga Inquiry Committee asemdoh ahi. Committee in thutah akhol doh nadinga mopohna nei jousen kithopina apeh diuvin Director, Social Welfare in temna aneiyin chule official koi hijong le nehguh bol a adih louva natong akihet doh a ahile khoutah a gotna kipe ding ahi, ati.

Koi tobang thil dihlou bol a kingoh ho thu/evidence he a aumle Inquiry Committee Chairperson jong hi a Director henga asei uva chule thungaina anei diuvin Uttam in kouna aneibe in ahi. Hetthei khat chu Director in tu masanga jong thil dihlou bol a panla a official ho themmona pe thei (evidence) auma ahile kilom tah a kipaman kipe ding ahi, tia jong thuphon ana nei ahi.

 

Mun chom chom a Khamnathei a kivei leh Khamnathei Crore val man kiman

Imphal, July 3(ET): Gamsung mun chom chom a Moreh CDO team, NAB chule Assam Rifles hon dan in akha thil chule khamnathei phabep aman uvin, dan in aphal lou thil po a mi som val jong aman uvin ahi.

Moreh CDO team hon Th Vikramjit, SP-Tengnoupal lamkaina a Kondong Lairenbi check post, Chikim veng a Moreh langa kong hung WagonR car khat a kon dan in akha thil po a mikhat aman uvin ahi. Akiman mipa hi Thangjalet Khongsai (49), s/o (L) Thonglhun Khongsai, Khengjang kho, Chakpikarong sub division a cheng ahi in, tu le tua Moreh Ward No. 9 a um ahi.

Kondong Lairembi Check Post, Chikim kho a Friday jingkah nidan 7.30 don a police hon routine check abol nauva WagonR (reg. No. MN05A-7824) khat alamtin uva, phatah a akhol ule WY tablet chang 5000 le gram 958 a gih, international market a dangka crore 2 vel man hiding brown sugar (No 4) amudoh u ahi. Thangjalet Khongsai police hon amat uva, ahivanga, atohkhompi mikhat jamdoh man ahi. Akiman mipa chule khamnathei ho Moreh police a apelut tauvin ahi.

Thilsoh chomkhat a NAB-Police station in tuni nilhah nidan 4.30 don a Tuibong Bazar, Churachandpur district a heroin powder gram 375 toh khamnathei po a sumkol vei mi 2 aman uvin ahi. Akiman teni hi Lhingkhonei Haokip (49), w/o (L) Thangjang Haokip, Songdo kho, Henglep, Churachandpur district a cheng le Lemthang Vaiphei @Thangboi (34), s/o (L) Paocha Vaiphei, Tuibong kho, Churachandpur district a cheng ahi in, hiche thu toh kisaiya case ajihlut tauvin ahi.

Alangkhat a, Assam Rifles hon HQ IGAR (South) lamkaina noiya TM Kasom, Ukhrul district a khamnathei a kivei mikhat kani kg khat toh amat tha uvin ahi. Assam Rifles hon tahsan umtah thulhut amu jou uva TM Kasom, Litan kom Yaolen kho a cheu ahi in, nidan 11 don a team hon motorbike (registration no. MN 01 Z 6893) khat Yaolen kho pam a akham uva akhol ule kani kg khat apoh amudoh u ahi. Akiman mipa hi Tonglhun Khongsai (45), Yaolen kho a cheng ahi in, akiman thil holeh ama Litan Police station a apedoh tauvin ahi.

Thilsoh chom khat a Assam Rifles ho ma ma in achesa July nisim 2 nikho a operation mun ni a abol nauva dan in akha thil tamtah aman uvin ahi. Operation abol nau masa a hi Gamphazol a dan in aphal lou thil akipo e, ti thuguh Assam Rifles ho amu jeh a Gamphazol kho a cheuva Maruti Gypsy registration no. umlou khat akham uva, akhol ule Win cigarette packet 5500, supari chang, chule adang phabep amudoh u ahi. Hiche toh kisaiya mithum – Old Samtal kho a cheng Thongmang, Hengshi a cheng Tongminthang chule S Bongjoi kho a cheng Henminlien amat u ahi.

Alangkhat a, Molcham police hotoh Assam Rifles hon joint operation abol nauva Win cigarette packet 6000 aman uvin ahi. Registration number umlou gari (bike) li akham uva akhol nauva dangka lakh a sim Win dum packet 6000 amudoh u ahi. Akiman hohi Jamkholen Baite, Michael Jamminthang, Dominie Lunsei Haokip chule Jacop Jamkhopao ahi in, Molcham kho a cheng ahi.

 

MENIREDA Chairman in Singngat AC sung’a natoh jat chom chom chelha ho vetlhahna nei

B.Lalboi Gangte

CCpur, July 3 (ET): Ginsuanhau@GS Haupu, Chairman, MENIREDA Govt. of Manipur & MLA 60-Singngat AC in tunin Singngat kho sung mipi hamphat pi thei ding’a natoh na chom chom kibol ho vetlhah na ananei in ahi. Hiche vetlhah na phatsung’a  Lawrene K. Munluo, Additional SP, Operation in jong kithopi na anape in ahi. Chuleh Singngat kho’a Residential School campus sung’a administrative building ding jaona’a hostel building leh classroom kisa jing lai vetlhah na anei phatsung uvin Bhogendra, Director, Ministry of Minority Affairs (MOMA), N. Robindro, Executive Engineer, Ministry of Minority Affairs (MOMA), L. Rameshwor, SO, H. Dijen Singh, SO, Jameson Hangshing, MCS, SDO Singngat leh M. Thoibi, Contractor hon jong ana jui uvin ahi.

Hiche vetlhah na phatsung’a MLA  GS Haupu in aseina’a tuni School building hi Ministry of Affairs akon official ho panna’a kivelha ahi in maban’a boina ima umlouva natoh phatah’a achelhah thei leh financial year masang’a natoh ho jotheng ding’a tohgon kinei ahi ati. Singngat Assembly Constituency sung adeh’a Singngat leh akimvel’a kho leh District mipi ho ding leh khangthah tamtah hung seilet na mun hi ding ahi ati. Hiche natoh hi koiman suboi louva kithopi na joh apeh cheh ding in ngeh na jong aneiyin ahi. Hetthei khat chu Residential School kisa hi Multi-Sectorial Development Program (MsDP) noi’a Ministry of Minority Affairs (MOMA), Government of India in Dk. Crore 25 val sanction akon kisa ahi. Manipur Infrastructure Development Agency (MIDA) in natoh alah’a Thoibi in avetkol ahi. Hiche building hi block 4 tichu Girls Hostel, Boys Hostel, Kitchen-cum-Dinning Hall, Principal leh Staff Quarter um ding ahi.

Resident School vetlhah na anei jouvin Sadhbhana  Mandap kiti Community hall kisa jing lai avelha pai uvin ahi. Hiche Community hall hi  Ministry of Minority Affairs, Government of India in MSDP chung chon’a Dk. Crore 2.1 a funding abol ahi. Chuleh hiche natoh hi Manipur Minorities and OBC Economic Development Society (MOBED) in avetkol ahi. Hetthei khat chu hiche Community Hall hi achesa September 26, 2018 kum’a natoh pat nading’a kihongdoh ahi. Hiche Community Hall sung’a hi guest house, toilet complex chuleh mipi 1,000 kikhop khom thei ding’a tohgon ahi. Community hall avetlhah jouvin Singngat leh akimvel’a kho’a Covid-19 jeh’a inn hung kile ho vetkol namun St. Joseph High School Quarantine Centre vetlhah na anei kit uvin ahi. Hiche achun GS Haupu in Quarantine Centre vekol hon apoimo na’a amanchah ding uvin sum apeh naban’a Centre aum ho neh ding atam tahlou jeh in Jameson Hangshing, MCS Singgnat SDO heng’a Centre a umho neh ding ann-chang leh havai alah ding in hetsahna anei in ahi.

Alangkhat’a Singgnat SDO office building semthah natoh ho jo theng ahitoh lhon in agamkai MLA GS Haupu in official in hondoh na aneitan ahi. Chule tuhin Singngat SDO Office ah staff 15 aum in chuleh office room um jouse alosoh naban’a natoh jong apan tauvin ahi. Hiche nachung chon’a Singngat Police Station campus sung’a building semphat ding ho vetlhah na anei in hiche achun Singngat Police Station main building aha set val jeh in repairing bol thei ding din mun’a aum talou jeh in Main building  hi suhset’a athah’a sah ding chuleh building chom chom umho jong semphat ding anaseiyin ahi.

 

India a nidan 24 sung’a covid-19 case thah 20,903 kimudoh, mi 379 in thina toh

New Delhi, July 3: Union Health Ministry thuso khat in aseina achun tuni chun India a Covid-19 natna vei mi 20,000 akimudoh thah toh lhon in tuni India a case neikha mi 6,25,544 aphatan chule tuni mama chun mi 379 hon thina ato utoh lhon in mi 18,213 hon hiche natna jeh in thina atoh tauvin tin aseiyin ahi. Tuni a case thah kimudoh lah achun Maharashtra, Tamil Nadu, Delhi,Telangana le Karnataka state ho a aha kimudoh in ahi. Hiche natna akon mi 3,79,891 ho adamdoh tauvin tuhin active case 2,27,439 aum e tin thulhut chun aseiyin ahi. ICMR ho thuso bang in tuni chan in sample 92,97,749 test akibol tan chule tuni chun sample India sung ah 2,41,576 test akibol in ahi. Tuni a thina toh mi 379 holah achun Maharashtra akon mi 125, Delhi akon mi 61, Tamil Nadu akon mi 57, Gujarat leh Karnataka akon mi 19 cheh, UP akon mi 17, WB akon mi 16, Haryana akon mi 11, J&K akon mi 10, Rajasthan akon mi 9, Telangana leh MP akon mi 8 cheh, Bihar akon mi 7, AP akon mi 5, Punjab akon mi 3, Puducheety akon mi 2, Kerala leh Uttarakhand akon mi 1 cheh ahiuve. Tuni chan a thina toh lah achun Maharashtra akon mi 8,178 hon thina atoh tauvin, Delhi akon mi 2864, Gujarat akon mi 1886, Tamil Nadu akon mi 1321, UP akon mi 735, WB akon mi 699, MP akon mi 589, Rajasthan akon mi 430, Telangana akon mi 275 ahi.

Karnataka akonmi 272 hon thina atoh tauvin, Haryana akon mi 251, AP akon mi 198, Punjab akon mi 152, J&K akon mi 115, Bihar akon mi 77, Uttarakhand akon mi 42, Odisha akon mi 27, Kerala akon mi 25, Jharkhand akon mi 15, Chhattisgarh akon mi 14, Assam leh Puducherry akon mi 12 cheh, HP akon mi 10, Chandigarh akon mi 6, Goa akon mi 4, Meghalaya, Tripura, ladakh leh AP akon mi 1 cheh ahiuve tin Health Ministry thulhut chun asei in ahi. Case 4,500 val umna state hochu Maharashtra a case 1,86,626, Tamil Nadu a case 98,392, Delhi a case 92,175, Gujarat a case 33,913, UP a case 24,825, WB a case 19,819, Rajasthan a case 18,662, Telangana a case 18,570, Karnataka a case 18,016, AP a case 16,097, Haryana a case 15,509, MP a case 14,106, Bihar a case 10,471, Assam a case 9,013, Jammu and Kashmir a case 7,849, Odisha a case 7,545, Punjab a case 5,784 chule Kerala a case 4,753 akimudoh tan ahi.

 

Ccpur. District a chapang puimang kigo ho nidan 24 sung’a District Police in amatdoh lou leh Joint Student Bodies in kiphinna nei ding’a gihna nei

B.Lalboi Gangte

CCpur, July 3 (ET): Rengkai, Bridge Street aum chapang khat  janni (July 2) nilhah lam nidan 4:30 vel’a melhetlou pasal 2 in Maruti Van mangcha’a pohmang ding anagot lhon chu chapang pa hansan jeh chun ana jamdoh man in ahi. Thulhut kimu dungjui’a hiche chapang pa hi Eric Zohmathuoi (13) S/o Stephen Vanlalrum ahi akitin amahi sun’a kichem ache inlam jon’a ahung lai’a CCpur gammi hilou pasal 2 in amat tan lhon’a Maruti Omni Van, vutrong sung’a akailut in ana jam pi lhon in ahi. Ahin achenao lampi ki khatan jeh chun aman teni gari akon akumlhah lhah lhon in chapang pa chu anajam doh ahi. Chuleh mi tomngai ho panpi na in anu le-pa kom analhut uvin ahi.

Hetthei khat chu mi puimang teni hin Eric hi akhut amakan peh lhon in chuleh amai anatom peh lhon in ahi. Chu in Khuga Dam lang’a alhaipi lhon in hiche akon chun Saipum lam alhaipi lai lhon in tho’a lampi ana kikha jeh chun tho ladoh ding’a akum lhah kah lah’a Eric chu hung jamdoh man ahi akiti. Chuleh Eric chu Nepali chapang khat ajam lai in akisuto lhon in hiche chapang pa chun Thingkangphai’U a um Laldawngliana heng’a anapui lut in ahi. Hiche kon Laldawngliana chun Eric pa Stephen thu apeh’a hiche akon kisuto’u ahi.

Hiche thilsoh nachung’a HYA Rengkai Branch lamkai nan Police Station ah FIR anabol  utoh lhon’a Police team khat in Eric leh apa chu thilso namun aga phahpi uvin ahi. Hiche Eric khut kihen na khao anamudoh uvin ahi. Hiche toh lhon’a hiche thilsoh nachung’a tunin District Police in ginmo mi 2 aman uvin ahi. Chuleh a gari manchah Maruti Omni Van jong amatdoh utoh lhon’a Police Station ah akoi tauvin ahi. Police in ginmo jeh’a amat mi 2 hi khopi sung’a von chom chom joh le ahi lhon in Police in amani akon statement ala uvin hiche natoh na’a pan la ahi ahilhon lou hetchen ahi naipon ahi.

Alangkhat’a Eric hunam’a kipuimang natoh kisai’a  Joint Student Bodies, Churachandpur in thuso aneina’a Administration/District Police kom’a nidan 24 sung tichu July 3 nilhah nidan 5:00 apat simpat’a hiche phat sung’a mipui mang kigo ho hetdoh/ matdoh ahi lou leh kiphinna kinei ding ahi tin K. Vanlallian, President, ZSF GHQ, NJ Haoneo Baite, President, KSO Churachandpur, Jeffrey Joute, President, HSA Joint Headquarter leh GF Lalniropuia, President, MZP Headquarter, Manipur hon atahlang uvin ahi.

Thilsoh toh kisaiya Police hon ginmo mi 2 aman utoh kilhon in tunilhah chun mipin Police station ana nokhum uvin police hon kiphinna nei mipi ho nocheh na ding in teas gas ho ana kap uvin ahi.

 

Education (S) in ‘order’ asodoh CDPSA in demna nei; HiDiPSAM leh UARSoM tosot dinga seiyu

Imphal, July 3(ET): Commissioner, Education (Schools), Manipur government in adeh a June 20 ni a order asodoh a, private school hon April a kon July lha chan nu le pa teho a kon tuition fee la louva staff ho lo abon a apohdoh diuva thupeh anei hi thudih a natohna ahipoi, tin Churachandpur District Private Schools’ Association (CDPSA) in demna anei uvin ahi.

Atohkhah thei alen pen private school ho dohna umlouva hitobang order kisodoh hi adihna umlou, langneina um ahi, tin CDPSA in aseiyin chule hiche hi private school ho autonomy kigimbolna ahi, tin asei uvin ahi. T Chinsuanthang, President leh T.S. Mangcha, Secretary in soi akaina thuso a chun, order adeilou na thu sangtah asei uvin ahi.

Hitobang dinmun hi private school management ho dinga lung lhahna ahi in, institution lolhin na dinga angaicha ho bol dinga lunglutna alhahsam sah ahi, ati. Gamsunga themjilna aphatna dinga pan sangtah la a private school ho state sorkar in hitia khohsahna neilouva abol hi ahetthem je aumpoi. Constitution a bou hilouva jurisprudentially a jong private unaided  education institution hon amaho management le administration a autonomy lhingset aneiding ahi, ati.

Private school phattou nadinga thil akibol louhi vangset umtah ahi, tin CDPSA in aseiyin chule sorkar in gelkhohna aneilou ahivanga mopohna lentah neiya teacher/school administrator hinom na dinga kitilkhouna umlou ahi. Angaicha louva private school ho scrutiny le adang dang akibol khum hi kisuhgimna ahi, tin jong asei uvin ahi.

Hill District Private Schools Association (HiDiPSAM) le United Association Recognised Schools of Manipur (UARSoM) in thuso anei tosotna dinga CDPSA in aseiyin ahi. School ho tilkhou ding hi tu dinmun a ngaichat ahi in, ‘divide and rule’ pohdoh a school suh minset nading circular sodoh ding ahipoi. Private school hon chihna lutlou hiche order ajui theilou ding ahi in, private school ho kikha na thei dinmun soh thei ahi. Hiche hi society le gamsunga dinga semphat theilou man na hiding ahi, ati.

State sorkar in aganna thei pen a order asodoh u alahdoh uva chule private school ho ‘financial grant’ apeh a boina dinmun suhlhap nadinga akithopi diuvin kiloikhomna in ngehna aneibe uvin ahi.

 

Mizoram sorkar in school kihon pat nading phat vochon

Aizawl, July 3: Mizoram sorkar in gamsunga Covid 19 case atam cheh cheh jeh a school kihon nading phat avochon tauvin ahi.

Tu masanga Mizoram sorkar in 2020-21 academic session a dinga school ho July nisim 15 nikho a kon kihong pan dinga thuphon ananei ahi. Mizoram Education Minister Lalchhandama Ralte in gamsunga Covid 19 natna achal jing vetkol nadinga state in school kihon ding thu velvetna aneiya thulhuhna um ahi, tin Friday nikhon aseiyin ahi.

Minister Ralte in asei dungjuiya, Ministry of Home Affairs in state jousen July lha chan a themjilna mun chule training institute jouse ahon lou dinga thuhilna anei jeh a school hon ding thu a velvetna um ahi, ati. State sorkar in dinmun dungjuiya ol teng le school kihon nading thu a thulhuhna anei kit ding ahi, tin jong aseiyin ahi.

State sorkar in academic session athah pat nadinga kigotna anei ahi, tin jong aseibe in ahi.