Chuhgo lon masang’a ADC election bol dinga UTCOM in sorkar henga ngehna...

Chuhgo lon masang’a ADC election bol dinga UTCOM in sorkar henga ngehna nei

54
0
SHARE

Chuhgo lon masang’a ADC election bol dinga UTCOM in sorkar henga ngehna nei

Imphal, Feb 1(ET): United Tribal Civil Organisations Manipur (UTCOM) in Chief Minister, Tribal Affairs & Hills, Hill Areas Committee Chairman chule Chief Secretary henga go juh masang- June 2020 masanga ADC election bol ding thu a lekha apelut uvin ahi.

H Lunkhothang Mate, general secretary, UTCOM in thuso aneina a, ADC election nukhah 2015 kum a State Election Commission, Manipur in April 30, 2015 ni a Autonomous District Council (ADC) 6 a election dinga notification asodoh a, chule election hi June 1, 2015 jingkah nidan 7 a kon nilhah nidan 4.30 sung a ana kibol ahi, ati. Nomination pehlut nading nikho May 6, 2015 chan kihong a, May 7 ni a scrutiny um a, May 11 chan nomination kiladoh thei ahi’in, chule re-poll aumding le June 6 a bol ding, June 10 ni a vote kisimna um’a chule election process hi abon a June 17 kah a kichai ahi, ati.

June lha hi go juh lai ahi’in, munchim, thingphung lhuh, lamlen a bonnang leh adang dang umjing ahijeh a thinglhang gamlha tah ho a campaign leh vote pehna hahsa ahi. Thinglhang kho atamjo a lamlen pha umlou ahi’in, tehse chule tahsa bukimlou hon hahsatna sangpen ato ahi.

Hill Areas Committee (HAC) in January 16, 2020 ni a kilolna aneiya, ADC election November 2020 lha a bol dinga recommend abol hi akisangpon, hiche thulhuhna hi thinglhang miho deibang hilou ahi. November lha hi changvoh lai ahi’in, UTCOM in thinglhang miho lah a election bol nadinga April leh May lha hi kilemchang asah pen ahi, ati.

State sorkar in ADC election go juh kipat masang, June lha masang a abol dinga UTCOM in ngehna aneiyin, achuti louleh candidate jouse, election duty lha a government officer ho leh voter hon hahsatna lentah ato diu ahi, tin aseibe uvin ahi.

PDCC in nidan 24 bandh akou jeh a Imphal-Saikul lamlen kikhah; Contractor hotoh kihoutoh PWD engineer ho gotna peh dinga thumna neiyu

Imphal, Feb 1(ET): Peace and Development Coordinating Committee (PDCC) in nidan 24 bandh abol toh kilhon a Imphal-Saikul lamlen a gari lhai sangtah a asuboi in ahi. PDCC in Imphal East district hopsung Yumnam Patlou a lei thah sahna dinga contractor khat toh kithu to a PWD engineer ho chunga action lah dinga thumna aneiyu ahi.

“VDF ahilouleh constable ahilouleh grade IV natong khat in dangka 100 sumguh akilah jeh a suspend akibol a gotna akipeh leh ipijeh a N Biren Singh sorkar in dangka lakh a sim ne mang a contractor ho toh kithu to a PWD engineer ho chunga action alah louham”, tin Thoudam Hemjit, General Secretary, PDCC in thuso miho henga aseiyin ahi.

Jingkah a kon Pangei munvel a mipi tamtah akikhom uvin, gari khatcha alhai sah pouvin ahi. Dukan mun hojong akikhah in, nidan 24 bandh aumjeh a Saikul jotna lamlen akikhah in ahi. Kum 70 a lui culvert hi ‘outdate’ ahitan, hiche jeh a government official hon lei thah sem ngai angaisah a, lei thah sem nadinga work order asodoh ahi, tin Hemjit in aseiyin ahi.

Ahivanga 2017 chan a natoh hi ipijeh ham kihe louva kipan lou ahi. “December nisim 26, 2017 kum a lei akisah gang chel nadinga bandh kakou uvin, PWD Engineer hotoh kinoptona akisem jouva bandh kiladoh ahi, ajeh chu natoh pat dinga PWD engineer hon kitepna anei ahi”, ati.

“Natoh akipan in, ahivanga work schedule toh kitoh louva akibol jeh a PWD authority ho henga hehna kisem ahi”, ati. Work order toh kitoh a lei thah sem sang a contractor leh engineer ho kihetthem tona a lei hi alangni kikehlen a, athah a kisa tobang ahina dinga asemphat u ahi”, tin ngohna aneiyin ahi. Meeyamgi Numit ni a athu Chief Minister het dinga akipohdoh jouva CM in athu vetoh dinga PWD authority ho thuhilna apeh’a, chule akisei contractor chunga action lah dinga asei ahi’in, CM thuhilna hi kijui lou ahi, ati.

January 18, 2020 ni a PWD Executive Engineer in PDCCC member ho lei pillar kisem inspect bol dinga kouna apeh a, January nisim 20, 2020 ni a Engineer umna a contractor in lei cement abol ahi. EE leh Contractor in mipi sum achom ahi tihi mijousen ahet thuguh ahi’in, sorkar in action ima alah lou ahi. Nehguh kibol hi VDF, Constable leh grade four natong ho dinga bou kikhah tobang ahi, tin Hemjit in aseibe in ahi.

Manipur a Eco Park le garden dang dang ho khamnathei neh na le thil phalou bolna a mang gam ta

Imphal, Feb 1(ET): Manipur sung a eco park le garden dang dang ho khamnathei bol nop na le thil phalou dang dang bol na in akimang gamtai tin hiche mun velha a che ho akon thuso kimu chun asei e. Thuso miho in hiche mun ho vetlhah na aga neina uva jaan khang chan in mi phabep in ju adon jing dan ule thil phalou jat chom chom bolna a akimoh phal dan hetdoh na ana nei uvin ahi.

Hiche garden ho ahin mi phabep in license gun jang in mei thal kap kithem chuh na ho in jong ajang uvin ahi akiti. Hiche garden ho a hitabang na toh na kinei ho hi govt in vetsui na anei lou le mipi in  kichol du namun a anei ho u gam ong ho hi thil phalou bolna a kijang pei ding in aum tan ahi akiti. Nupi phabep garden ho ana vil ho in jong akinthei pen a govt in vetsui na anei ding uvin temna anei uvin ahi.

Union budget kipehna a Northeast a dinga ima aumpoi tia Congress in Centre demna nei

New Delhi, Feb 1: Union finance minister Nirmala Sitaraman in Saturday nikhon Lok Sabha a Narendra Modi 2.0 budget ape in ahi.

Sivsagar a archaeological site hi ‘iconic site’ a sem dinga phondohna aneiyin chule km 890 lhing Sadiya a kon Dhubri jotna inland waterway jong gamkai economic khantouna dinga sem dinga jong aseiyin ahi. Assam Pradesh Congress Committee (APCC) in Centre demna thu aseiyin, Northeast a dinga budget ima aumpoi, ati.

“Budget a northeast a dinga ima aumpoi”, tin APCC president leh Rajya Sabha MP Ripun Bora in thuso miho henga aseiyin ahi. “Sadiya Dhubri inland waterways semhoi nadinga kihouna aumna sot ahitan, budget hi aphalou lang jeng ahi”, ati. “All India basis a isei leh budget a ima aumpon, loubol mi hahsatna toh ho thu jong budget a kisei lou ahi”, tin aseibe in ahi.

Sitharaman in apeh Union Budget a National Gas Grid hi 16,200 km a kon 27,000km a kehlet dinga kiseiya chule gas market semphat ding thu jong kipodoh ahi. North East leh tribal district ho a dinga Krishi UDAN launch bol dinga jong budget a kisei ahi. “Hiche hi adeh a north east leh tribal ho district a lousoh ga amanlut nadinga akithopi lentah hiding ahi”, tin Sitharaman in aseibe in ahi.

 

Nagaland state hi Naga ho kibung khen na ding a ana kisemdoh ahi: NSCN-IM Chairman Tuccu

Kohima, Feb 1: Dimpur camp Hebron mun a NSCN-IM in a 41st vei channa  ‘Raising Day’ an aman na uva kiloikhomna chairman, Q Tuccu in Naga national movement chung a hou limna ana neina a ‘Nagalim for Christ’ kiti thupi chunga adin det nalai dan u phondoh na ana nei in ahi.

Tuccu in Raising day toh kisai a thuthot anei na a  Naga mite in kipumkhom ding adei lou le suhmang a um ding u ahi ati. Gamsung thusim chung chang a hou limna anei na a Indian assembly in achesa 1950 kum a Naga ho ang a India jop ding  a temna ana neina thu ana sei in ahi.

Indian Prime Minister masapen Jawaharlal Nehru in vaan ahung kheh a India sung ake jong le Naga mite chamlhat na kipe lou ding ahi tia ana sei thu avel in tahlang na Tuccu in ana nei in ahi. Hiche thusei na toh kisai a Indian government in Naga ho gam a sepai ana sol lut uva Naga mite ana suh genthei u ahin hinlah Naga mite hitabang na toh na akon ana so chat dan ule, achesa 1963 kum a hitabang boina suhmang na ding le Naga mite bung khen na ding a Nagaland state ana kipeh dan thu tahlang na jong chairman pa in ahin nei in ahi.

Naga thu hi Pathen pan pi najal a huh doh a ana um ahi dan le lamkai phabep in Indian government ang a kipehdoh na ana nei jeng vang uva tu le tu chuleh achesa phat ho a NSCN-IM lamkai ho in nam ngailut na jal a pandet na ana nei utoh lhon a Naga mite tu chan a huhdoh a um u ahidan jong hetsah na ana nei in ahi. Achesa 1975 kum a NNC lamkai phabep in Naga mite ana joh doh uva Shillong accord soi an akai uva, Isak Muivah faction suh mang ding a tohgon ana nei dan u jong Tuccu in tahlang na ana nei in ahi. Hitabang thilsoh jat chom chom akon a Naga te unique history ana ki huh doh jou nung a achesa 1988 kum a SS Khaplang makai na faction in Isak Muivak faction suhmang ding a tohgon ahin nei kit dan u jong hetsah na ana nei in ahi. Gal le tol a chamna hung lhun thei lout oh lhon a Indian government in NSCN kihou pi ding a temna ana nei toh lhon a achesa 2015 kum a Framework agreement ana kinei ahi dan jong Tuccu in phondoh na ahin nei in ahi. Naga nam mite suhmang ding le lhahsam sah ding a galmi aum jing toh lhon a mipi te in kiloikhomna le Pathen tuh jing a gal asat ding uvin jong hetsah na ahin nei in ahi.

Muolvaiphei kho a Ayush Hospital kisa tuni chan’a jotheng’a um loulai

B.Lalboi Gangte

CCpur. Feb 1 (ET): Churachandpur District sung’a amasapen’a ding’a Muolvaiphei kho mun’a achesa Nov. nisim 14, 2017 nikho’a Ayush Hospital mun ding’a songphu na ana kinei toh lhon’a tuhin Hospital sahna natoh atam jo chai in aum thei tan ahi. Ayush Hospital kisa ban ho vetlhah na ananei phatsung uvin natong ho koima ana um po chuleh natoh jong tong jom lou in bangkhai in anakoi uhi ipi jeh’a bangkhai’a kikoi’a itih leh jotheng hi ding ham tivang akisei thei pon ahi. Hetthei khat chu hiche Hospital mun’a hi lupna 50 um thei na ding Ayush Hospital Dk. Crore 6.5 project a kigong ahi in  jotheng ahi teng G+2 building, G+3 building, Barrack type quarter, gari buh (Garage) leh concrete fencing um ding ahi.

Hiche toh lhon’a tuhin Barrack Type Quarter hi rong jong akinu lai ahi in adang G+2 leh G+3 Building hi khat achung akikhu jou tan adang jo theng lou in aum nalai in ahi. Hiche building Songphu nahi Health minister L. Jayanta kumar in ananei ahi in chuleh hiche Hospital bol nahi lha 12 sung’a jotheng ding in Agriculture Minister V. Hangkhanlian; Shyamlal Poonia, IAS, DC Churachandpur. Dr. A. Guneshwor Sharma, Director AYUSH, Dr. Y. Lukhoi Singh, Additional Director AYUSH leh agam tohdoh Lalzarlien Darngawn chuleh mipi heng’a phondoh anahi vang in tuni chan in jotheng in aum naipon ahi.

Manipur a lhakhat sung’a Inner Line Permit mi 33,995 kihom doh

Imphal, Feb 1(ET): Achesa January lha sung a ILP counter ana kihondoh toh lhon in district chom chom a ILP phabep ana kipedoh in ahi.  Imphal East district a ILP 2,221 ana kipedoh in, Jiribam ah 7,451, Imphal West a 15,639, Thoubal a 405, Kakching a 328, Senapati a 5,808, Kangpokpi a 211, Chandel a 342, Tengnoupal a 128, Tamenglong a 121, Noney a 176, Churachandpur a 42, Pherzawl a 29, Ukhrul a 632, Kamjong a 27 chuleh Bishnupur a 389 ahi in agom a 33, 995 ahi akiti.