CHRISTMAS KIPANA LAMPI – Thanglam Manlun NGV. (29th Nov. 2015)

CHRISTMAS KIPANA LAMPI – Thanglam Manlun NGV. (29th Nov. 2015)

310
0
SHARE

Phat leh nikho achejing toh kilhon’in Chavang golnop leh ahoina voujol sil sella hinkho iman-nau phat akichaiyin, phalbidap’in vouso hoilou nea-khit’na, kengkhit’na toh kilhon’a tahsa vou gepna leh pong thit thet’a eikoidiu igelleh lainat aum’in ahi, ahideh’in nungah gollhangho laina dehset inte. Hijeng jongleh “ Phalbidap jan khosot phoinel chung’a, kelngoi chinghon akelngoi ngapet’un, Jankhang laiyin Gabriel’in ahung vil’un tia vahchoina laa isah’uva eihojong Christmas’a Pathen lhagaovin ihung vildiu igelleh kipahlou thei ihipouvin ahi. 2015 Christmas mangthei ding’a damna leh hinkhopha eipe’uvah chungnung pen Pathen chu thangvah’in umtahen. CHRISTMAS KIPANA NEINA DIN KIKHEL’NA ANGAIYIN AHI : Jerimiah themgao kam’ah Pakaiyin “ Lamsom dung’a dingu vin veovin. Lamluiho hol’un lang lampi phapen umna dong’un, hiche lampi chu juiyun, lungmong’in hingun nate” ati. Tukum 2015 kumsung’a inn-chen khosah khantouna ding, nihchen ponsil holna chuleh nehle chah holna’a lampi nahinjot’na ho nungvet’in lang dong’in, najotna lampi dih’ah hinam? Khangdong nangjong kumsung’a hinkho namandan, naneh nadon chuleh nachena lampiho nungvet’in! Lamsom’a chun ding’in lang ven nachena lampi dih’a hinam? Lampi dihlouva cheho hinkho’ah kipana aumtheipon ahi. Nikhat Sagolban’a Sarat kiti khat kimupi din kachetan ahi. Kache cheleh munkhat’a hin lam-kasom thum anaumtan ahileh hoiche pen’a chedingham kalung adongtan ahi. Kalungdon phat’in keijong lamka som’a chun chomkhat kading’in achele avahle ho kangah’in mikhat hitin kadongtan ahi. Oja…. Sarat khoigi jumdu kadomdano? Tin kadongtan ahileh amanjong eihil’in lampidih kahet’a kajot phat’in kalung among’in kakipah tan ahi. Sopiteho lampi dih’a icheu hinam? Ichenau lampi adihlou leh ikiheiyuva lampi dih lungmon’na leh kipana lampi iholdiu angaiyin ahi. Ajeh chu kipana hinkho neithei’na din lampi dih jotding angaiyin ahi. Pakai Jesun keima lampi dihtah kahi ati. CHRISTMAS KIPANA NEINA DIN KIPEHNA ANGAIYIN AHI : “Pen chutileh nang jong nakipe ding ahi”. Mihem pehdohna neitheilouho hinkho’ah kipana alhom’in ahi. Vannoiya khantouna gamho’ah Christmas kipana din lam chom chom’in khatle khat thilpeh(Christmas-gift) akipeto jiuvin ahi. Van-noi mitin’in ahet Christmas father Santa Claus amintah St. Nicolus hi Asia minor tua Turkey kiti muna Myra mun’a hou-lamkaiya pang ahi. St.Nicolus Christian mihaotah inn-sung’a hung peng ahi. Aneolaiyin anuleh apan athisan’in neile gou tampi adalhah peh lhon’in ahi. St. Nicolus in chaga gentheiho leh chapangho angailun chaga kithopina leh chapangho kipana din guhthim’in akithopiyin ahi. Aumnau khosung’a hin migenthei tahkhat aum’in amahin chanu thum aneiyin ahi. Achanute lah’a alenpen’nu jineina ding man (dowry) aneijou loujeh’in achanu jinei louvin aumtan ahi. Hiche thu chu Nicolus’in ajatan chagat genthei jeh’a jineilouva aumding chu apona’n jankhat hi guhthim’in achen migenthei te inn-sung’a chun Sana chun neokhat pon’in ajel’in aselut pehtan ahileh numeinu keng-moja kiphou sung’a chun aseplut khatan ahi. Hiche sana chu amudoh phat’un hoiya kon ahitadem tin migentheite inn-sung chu lungdon na’n adim tauvin ahi. Achai na’n Pathen phatthei boh’na hinte atiuvin ajoh’un achanu lenpen jineina’in amang tauvin ahi. Saint Nicolus in chaga hoseh hilouvin chapang ho jong angailun ahi. Hijeh chun Christmas niloupini jingkah khovah masang ngei’in inn-son tin’ah chapangho kipana din Mithai (Sweets) aselut pehyin ahi. Ahileh Tuni’a nang leh ken ipi ipeh ding ham? Kigel’u hite ajeh chu pehdoh kitihi kipana ahi. Hijeh chun 2015 Christmas’a din ilungthim’u leh itahsau pedoh tau hite. Anina’in Christmas’a din iphat’uleh pehding’a kigong tolom ho pedohtau hite ! hichu Christmas kipana lampi ahi. CHRISTMAS KIPANA NEINA DIN KITHOPI DING ANGAIYIN AHI : Phat khat laiyin Canada gam’a St.Jorse Ontario khopi miten Christmas October lha’in anamang’un ahi. Aman-nau ajeh chu ahileh hiche khopi’a chun meithai amin Nicole wellwood kiti khat acheng’in ahi. Amanu hin chapa thum aneiyin, achapate lah’a aneopen Jene Evan kumni lhin’na birthday amanpi jou ajing’in achapa chu adamotan ahileh anun damdoi inn’ah apuitan ahi. Doctor pan avet chaiyin anu Nicole kom’ah hitin aseitan ahi. Mrs. Nicole nachapa hi Brain cancer’a dammo ahin lou Kapding angaiyin ahi, atitan ahileh Nicole alung dong behseh’in seiding helouvin akaden tan ahi. Chomkhat jouvin….ahileh Doctorpu lou chu kapkhat’a aman ijat ham tin adong tan ahileh doctor pan aman akibang poi, nang chapa hi kapkhat’a sangsom leh sangni man kapding ngaiyinte najenjou ding hinam tin adongtan ahi. Nicole’in adonbut’in Doctorpu ipi hileh phat chomkhat neipen hung kigel’inge atitan ahileh Doctor panjong hungkigel’in lang jending natileh hungkit tan tin asoldoh tan ahi. Nicole meithai nun hasatah leh genthei tah’in achapa ngailutna jallin ajo chan’in sum ahol’in achapa chu a course lhing’in akaptan ahileh achapa adamtan ahi. Ahin, kum 7 alhin kum’in anatna ahung pong kittan akengtha abeiyin achat thei tapon ahileh anun Doctorpa kom’ah apuikit tan ahi. Doctor pan anatna chu aven avetjouvin anu Nicole akouvin seidoh ngam lou sasan Mrs. Nicole nachapan tukum Christmas amanlou ding ahitai atipeh tan ahi. Nicole’in jong lung thideh’in inn-lam ahinjon tan ahi. Nicole alungthim’in ama leh ama akihouvin kachapa toh tukum Christmas kamankhom louding ahitai aw…tin ama leh ama akihouvin ahileh ahetman loukah’in amit’a kon alhi along chut chut jengtan ahi. Meithai’nu Nicole in kachapa Christmas Kamanpi tei teiding ahi tin kigel lhahna aneitan akigellhah’na chu aloi agolho kom’ah aseitan ahileh amahon jong aphatsah peh tauvin ahi. Nicole meithai nu’n angailut achapa toh achaina Christmas mankhom ding’a agot nichu Oct. 7. 7pm ahi. Hitia tohgon aneichu asopipa jinu Shelly wellwood in ahet phat’in “GOFUNDME” tin face book account khat ahong’in Evan thusim anun genthei tah’a ajen’na ho abon’in ajih’in achai na’n hitin ajih’in ahi. Hiche chapang Evan hi angailut anu meithai Nicole in Oct.7.7pm teng achapa Evan ding’a achaina Christmas aman khompi ding ahin angailu jousen panhue hite tin ajih’in ahileh asimdoh jouse lung atong khan hiche “fb” group chu mi sang somthum (30000) in ajoptan ahi. Hiti chun phat achejing toh kilhon’in Oct.7.7pm ahung lhungtan Nicole’in a window ahong’in khopisung chu agahven ahile aginchat banglouvin khopi sung chu meivah jatchom chom’a vah-emsella mijousen achapa Evan aleiset hinkho’a ding’a achaina Christmas aman khompiu chu amun ahileh akipah lheh jeng’in ahi. Khopi sung’a mi 30000 ho chun ajokham cheh’in sum adong khom’un Meithai’nu Nicole kithopi na’n anapeuvin ahi. Meithainu leh akithopi’a pang Ontario khomite jouse Christmas kipana achang khom tauvin ahi. Doctor lah’a achung nungpen Doctor Jesu tahsan’in chuti leh aman damna napeh ding ahi. Achaina’n eiho nam sung’a jong Christmas hi golnop (celebration) a kichaisah jeng louva Christmas Ministry ipat tahdiu dei aum’in ahi. Chaga gentheiho kithopina, meithaiho kithopina ahilou leh damlouho kithopina tiho bolpan ding’in kigotau hite, chutileh kingailutna pung’in tin Christmas kipana dihtah chu ineithei ding’u ahi.