Chivu kho a Chandrakirti Memorial Park kisah ngah a Chibu Stone Inscription...

Chivu kho a Chandrakirti Memorial Park kisah ngah a Chibu Stone Inscription lahdoh dinga Tribal Intellectual Forum in CM henga lekhathot pe

263
0
SHARE

Chivu kho a Chandrakirti Memorial Park kisah ngah a Chibu Stone Inscription lahdoh dinga Tribal Intellectual Forum in CM henga lekhathot pe

Imphal, May 17(ET): Indo-Myanmar gamgi, Chivu a Chandrakirti Memorial Park kisahna chule Chibu Stone Inscription lahdoh ding a Tribal Intellectual Forum, Manipur in Chief Minister N Biren Singh henga ngehna lekhathot ape uvin ahi.

Covid 19 pandemic kisei khoh laitah a sorkar in Indo-Myanmar gamgi Behiang kom Chivu a Chibu Stone Inscription mun a kinel baotamna um leng Chandrakirti Singh min aMemorial Park kisa Tribal Intellectual Forum, Manipur in alunglhai lounau thu asei uvin ahi. India Act East Policy noiya Behiang khantou nading le tourism choisang nadinga CM in pan alah akipapi nau thu aseiyun, ahivanga Chandrakirti Memorial Park sah dinga tohgon hi CM in thinglhang le phaicham mi thakhat ahi, tia asei toh kitohlou ahi’in, hiche hi chamna le lungmonna suboithei ahi, ati.

Hiche mun hi Manipur Ancient and Historical Monuments and Archaeological Sites and Remains Act, 1976 noiya venna kinei ahi’in, tribal gam lahmang nadinga thusim khel ding nagot ahiloule project nangah a chule 1976 Act noiya Chibu Stone Inscription nalahdoh a ‘de-notify’ nabol dinga ngehna kaneiyu ahi, tin asei uvin ahi.

Lushai Expedition, 1971-72 a Lushai haosa ho chunga British military hon gal ajo nau ahi’in, Chandrakirti Singh galjona ahipoi. Chivu a official signboard a hi song kijih hi 1872 kum, Chandrakirti Singh vaipoh lai a Lushai haosa kiphinna bol 112 chunga Singh goljo hetjingna ding ahi tia adih louva kisei ahi. State sorkar in hiche hi Chandrakirti galjona ahi tia hetpeh ahina dinga Archaeological Survey of India (ASI) het dinga amanchah ahi.

Hiche jouthu hi Indian Archaeology 1987-89: A Review kiti MC Joshi in ajih lekhabu phengmai 120-121 a kipe ahi’in, ASI Director General ana hiya chule ASI in 1993 kum a published abol ahi. Lushai Expedition hi Alexander Mackenzie, The North East Frontier, RG Woodthorpe, The Lushai Expedition le Carey and Tuck, The Chin Hills, vol, 1 a phatah a kisei ahi. Major General WF Nuthall in Cachar column commanding officer anahi Brigadier General G Bourchier thuhilna noiya Lushai Expedition sunga Lushai Hills a lut khalou chule pan jong alah khahlou ahi. Bourchier in contingent ho Moirang a aum diuva thuhilna apeh a Tsek-la-pi kalval ache lou diuva thuhilna anei vanga thuhilna apalkeh uva tua Indo-Myanmar gamgi Chivu a camp abol u ahi.

British hon military expedition ajo jouva Mnaipur contingent ho Imphal base a akile sah u ahi’in, akile nauva tribal lah a haosa hetthei umtah Goukhothang le amite hin hiche camp ajot pa ahi. Goukhothang hi 1873 kum a jail a thi ahi. Chibu Stone Inscription mun a Chandrakirti Park kisah hi achesa thusim a pohnatna ho thosah kit ding ahi, ajeh chu Chandrakirti Singh min a thisan kiso a hi tribal mihon amu jing ahi, ati.

Achesa 1989 kum a state sorkar in Chivu a gam leiset 607.50 sq. metre hi ‘public interest’ a dinga alah ahi’in, adih lou chule jouva kilhepna a gam kila hi dihlou ahi’in apet pet a alahdoh diu ahi, tin aseiyun chule sorkar in Chibu Stone Inscription ‘denotification’ abol a, Chandrakirti Memorial Park sah ding agot angah dinga aseibe uvin ahi.

Hitobang thil akibol tei tei got le Indo-Myanmar gamgi a tribal ho kichouna a kila ding ahi, tin aseiyun chule hiche park sah ding CM le state sorkar in angah a thinglhang le phaicham mi kiloikhomna semhoi dinga kitepna anei atuh chah kit joh dinga kinepna aneiyu thu aseibe uvin ahi.

Xxxxxxxxx

India pumpi a Lockdown May 31 chan kisuhsao be; MHA in ‘guidelines’ athah sodoh ta

New Delhi, May 17: Centre in Sunday nikhon Covid-19 pandemic natna achal louna dinga Lockdown kal ni asuhsaobe uvin chule May nisim 18 a kon May nisim 31 sunga kichepi ding Lockdown 4.0 sunga jui ding guidelines athah beh a asodoh tauvin ahi.

Ministry of Home Affairs (MHA) in Lockdown sunga zone chom chom a akiphal ding le akikhah ding ho guidelines thah asodoh uvin, dan thah a hi ‘containment zone’ pam a lockdown alha ong be uvin ahi. Covid 19 jeh a thi India gam a 2,872 lhing a chule Sunday jingkah chan a positive case 90,927 alhin jouva Guidelines kisodoh ahi.

Tu masanga India a dinga Covid 19 case tamna pen Maharashtra le Tamil Nadu in Lockdown hi May nisim 31 chan chepi dinga Centre in guideline thah asodoh masanga aphondoh ahitai.

Lockdown 4.0 sunga India pumpi a akikhah ding hohi domestic le international flight service ahi’in, MHA in phalna apeh domestic medical service, domestic air ambulance le security toh kisai hotoh kiphal ding ahi. Metro rail service kikhah ding chule school, college, themjilna mun/training, coaching institution le adang dang ho kikhah ding, ahivanga online/distance learning kiphal jom ding ahi.

Health, police, government official, healthcare worker, mi gam a tangden ho le quarantine facility a kimang ho tilouva hotel, restaurant le hospitality service ho kikhah jom ding, bus, railway station le airport a canteen ho kikhah ding, home delivery (food item) a dinga bou restaurant akihon ding kiphal ding ahi. Cinema hall, shopping mall, gymnasium, swimming pool, park, theatre, bar, auditorium, assembly hall ho kikhah ding, stadium le sports complex akihon ding kiphal jong le ave ding mi kiphal louding ahi.

Houin mun ho, social, politica, sports, entertainment, academic, cultural, le kikhopna dang dang kiphal louding ahi.

Containment Zone ho tilou adang a akiphal phabep hohi, inter-state a bus le gari ho alhaiding ahi’in, ahivanga alhaina state, UT hon kinoptona anei diu ahi. State le UT in asei dungjuiya Intra-State a passenger gari le bus lhaiding jong kiphal ahi.

Red, Green le Orange Zone kikhenna hi ama ama state le UT sorkar in Ministry of Health & Family Welfare (MoHFW), India government in asei ho thu avet uva thulhuhna aneidiu ahi. Red Zone le Orange Zone sunga Containment Zone le Buffer Zone hi District authority hon MoHFW guideline avet a asem diu ahi.

Containment Zone a service khoh hobou kiphal ding ahi. Hiche zone a hi medical emergency le chule angaichah khoh ho tilouva midang alut le apot ding kiphal louding ahi. Containment Zone a ‘contact tracing’, inson a surveillance chule clinical intervention ho angaicha dungjuiya umjing ding ahi.

Angaicha khoh tilouva jan nidan 7 a kon jingkah nidan 7 sunga curfew umding, mi che le va le kiphal louding ahi. Section 144, CrPC noiya local authority hon Curfew order asodoh diu ahi. Natna jeh a boina khoh toh thei- kum 65 le achunglang ho, natna chom chom neiho, naovop numei chule chapang kum 10 noilang ho inmun a umtup diu, akhohtah chule dammona thu tilouva in a umdiu ahi.

Akikhah a kisei tiho tailou adang kiphal ding ahi’in, ahivanga Containment Zone ho a akhoh tah bou kiphal ding ahi, adang se kikhah ding ahi. Chule state/UT in dinmun akholtoh dungjuiya zone chom chom a activity ho akha thei ahiloule ngaicha asahna ho a ‘restriction’ akoi theiding ahi.

Xxxxxxxxxx

CM Biren in gamsung hung kile nom ho thaneina kilahpeh louding ahi, tia suhthengna nei; itobang dinmun hijongle kimaitopi dinga kigotna kinei ahi, tia sei

Imphal, May 17: Chief Minister N Biren Singh in Novel Corona Virus nat achal louna dinga sorkar in bol thei chan abol ding ahi, tin aseiyin chule pandemic douna dinga sorkar in pan lahthei chan a alah a, sorkar natong hojong kigotna akhousah ahi, ati.

Chule India gam chom chom a natong Manipuri health worker ho sorkar in akithang at pi e, tin Chief Minister in aseiyin, sorkar in natohna mun adalhah uva ahung kile nading uva koima temna aneilou ahi, ati. Hetthei khat chu Kolkata khopi a private hospital a natong Manipur gam mi nurse 185 in corona virus akal cheh cheh jouva agam hung kile nadinga anatoh nauva kon haina anei tauve, tia kisei ahi.

Koi hijong le agam a hung kile nom ho athanei nau (right) don louva kikoi louding chule thilsoh hunglhung ding ho sorkar in kimaitopi dinga kigotna anei ahi, ati. Home Department in West Bengal a nurse 185 in anatoh nau adalhah uva chule Manipur gam ahung kile nading uva transit approval asodoh tai tia thulhut aum nidan phabep jouva Chief Minister Biren in keima sorkar in nurse le doctor ho a dinga hitobang advisory asodoh poi, tia suhthengna anei ahi.

“State sorkar in hitobang advisory asodoh poi. Nurse hihen lang doctor hijong le koima ahung kile ding uva kisei lou ahi. Kolkata, Delhi, Chennai, Maharashtra a natong ho kakithang at pi u ahi’in, state sorkar in amaho compensate peh a kipaman peh dinga asei ahitai”, ati. Hijong le nurse/doctor koi tobang anatohna mun a nom salou ahiloule kithetna/kibungkhenna toh aumle amaho thu ahi. Anatoh nau mun a aumtei nading uva hunam a kasei louding ahi. Amaho thu ahi, tin jong aseibe in ahi.

Saturday nikho thulhut in West Bengal gam a kon hung nurse 185 hohi Apollo, Peerless, Ruby, AMRI, RN Tagore, Tata, Charnock Hospital, Medica, Fortis chule hospital dang dang a natong ahiuve, tia kisei ahi. Chule Manipur gam ban a state dang dang injong agam mi nurse ho West Bengal gam aboi jeh a nungkou ding angaito uve, tia jong thulhut in asei ahi.

ANI thulhut dungjuiya CEO, AMRI Hospital Rupak Barua in, North East a kon health care worker ho chunga kingapna sangtah um ahi’in, amaho akile uva ahile boina lentah umding ahi, tia asei ahi. “North East, adeh a Manipur le Tripura sorkar in state chom chom a natong agam mi ho covid 19 lockdown sunga ahung kile diuva aseiyu ahi. Amaho chunga kingapna kinei ahijeh a hiche hi boina lentah ahi”, tia Barua in asei ahi.

xxxxxxxxx

Senapati CSO chom chom in DC Somorjit ‘suspend’ bol dinga Chief Minister henga thumna nei; nidan 48 phat tep peh u

Imphal, May 17: District Frontal Organisation Senapati in NPO Conference hall, Senapati DHQ a Senapati District Civil Bodies emergency meeting abol nauva Deputy Commissioner Somorjit Salam ‘suspend’ bol dinga thumna nei dinga kilolna anei uvin, Chief Minister N Biren Singh in thumna abulhit nadinga Ultimatum apelut uvin ahi.

Covid 18 chule Quarantine protocol achesa May nisim 13 nikho a abon a akipalkeh na chunga Senapati District CSO hon alunglhai lounau thu aseiyun, Deputy Commissioner Somorjit Salam in khohsahna aneilou ahi, tin ngohna anei uvin ahi. Sorkar in gamdang a tangden gamsung mi ahung kile ho jouse dinga order le gamgi hunglut nadinga SOP chule Quarantine protocol asem hi DC in totna tobang a abol a, screening kibol na Mao Gate a passenger 36 hi alut phat hilouva alut sah ahi.

DC in anatohna agel khoh louhi mi tamtah hinkho suhkhah nathei ahi’in chule May 13 jan a Quarantine centre, Multi purpose hall hilouva nehkhomna asem a, passenger ho ATM, cha kijohna le dukan ho a ache uva, chamlhatna neitah a avale u alungkhampi nau asei uvin ahi. Passenger hohi May 14 jingkah a kile u ahi’in, May nisim 16 nikho a amaho lah a pang passenger 2 hi Covid-19 positive ahi hetdohna um ahijeh a, adalhah nau mun a natna aumding hi lungkhamna sangtah um ahi, tin asei uvin ahi.

Mipin athum chule boina sohthei ahijeh a CSO hon meeting abol nauva Somorjit Salam apet pet a ‘Suspend’ bol dinga thumna anei uvin chule National Disaster Management Act 2005 noiya thilsoh umchan phatah a akhol uva chule officer pa ‘book’ abol khum diuvin jong thumna anei uvin ahi.

CSO hon May nisim 17 jan nidan 6 a kon May 19 jan nidan 6 chan (nidan 48) sunga state sorkar in thumna abulhit dinga phat atep peh uvin, thumna nahsah louva aumla ahile akisei phat akichai teng le CSO hon kiphinna sangtah abol ding ahi, tin gihna anei uvin ahi. Covid 19 natna akisei khoh laitah a mopohna neilou tah a natong a District Administrator khat in pan kilah na jouse asuhboi thei ding ahi ti ahetthem uva sorkar in thumna asan peh diuvin CSO hon ngehna aneibe uvin ahi.

XXXXXX

Covid 19 case athah 5 het doh be ahi jouva Imphal khopi a Lockdown khoutah a kichepi

Imphal, May 17: Manipur gam a Covid-19 positive case athah 5 photchenna aum jouva Imphal khopi a lockdown bulhing set a achelha in, lamlen a gari khat le ni tilou alhai akimu pon ahi.

Lockdown hi tu masanga kon kichepi ahitan, ahivanga Saturday nikho chan a security pass neiho ahiloule ajeh dang dang a miho lamlen a hungdoh jing nalai ahi. March nisim 24 nikho chule April nisim 1 nikho a JNIMS le RIMS a kon kijen dam a mi 2 in natna anei thu hi gamsung mihon alah sanglou tobang a aumin ahi.

Lockdown hin niseh kimanchah sangtah a atohkhah jeh a demna neiya jong phabep um ahi. Sorkar injong Covid 19 positive case aum tahlou jeh a lockdown a kon sector phabep alha ong pan ahitan, ahivanga gamdang dang a tangden gamsung miho ahung kile uva, Red Zone a kon atamjo ahung kile uva kon gamsung mihon natna hung chal dinga ginmona aneiyu ahi.

Ahung kile ho puihoui dinga sorkar natong hon kitup tah a pan alahlou jeh a tamtah in demna anei ahi. Covid 19 positive case 5 photchen ahi jouva state sorkar chule gamsung mihon jong gelkhohna sangtah ahin nei pan ahi. Sorkar in Saturday nikho a curfew pass jouse avoh haiya chule ‘pass’ athah kisodoh ding ahi, tia asei ahi. Curfew pass ho kisuhmang jeh ahiloule mipin natna agin jeh himai thei ahivanga Sunday nikho a Imphal khopi mun atamjo a mi thip ahi.

xxxxxx

India a Covid case hatah a kal; natna jeh a thi 2,872 lhingta

New Delhi, May 17: India gam a Sunday nikhon Covid-19 natna jeh a thi mi 2,872 alhingtan chule natna neiya 90,927 a akal in ahi. Natna jeh a thi hi Saturday jingkah nidan 8 a kon nidan 24 sunga mi 120 a kal a chule case kisei thah hi 4,987 a kal ahi’in, Union Health Ministry thulhut dungjuiya akalna asana pen ahitai.

India gam a Covid 19 active case 53,946 lhing a chule natna a kon mi 34,108 kijen dam a, mikhat hi agam a kile ahitai, tin Ministry in aseiyin ahi. “Tuchan geiya natna a kon damdoh hi 37.51 per cent ahi”, tin senior health ministry official khat in aseiyin ahi. Case photchenna umho lah a hi gamdang mi jong pang ahi.

Achesa Saturday jingkah nidan 8 a kon athi kisei mi 120 lah a mi 67 hi Maharashtra gam a thi a, Gujarat a 19, Uttar Pradesh a 9, West Bengal a 7, Delhi a 6, Madhya Pradesh a 4, Tamil Nadu a 3, Haryana a 2 chule Andhra Pradesh, Jammu and Kashmir le Rajasthan gam a kon khat cheh ahi.

Natna jeh a athi kisei 2,872 lah a Maharashtra gam a athi tampen ahi’in, mi 1,135 thi a, anichanna a Gujarat gam ahi in (625), aban a Madhya Pradesh (243), West Bengal (232), Delhi (129), Rajasthan (126), Uttar Pradesh (104), Tamil Nadu (74) chule Andhra Pradesh (49) ahi. Karnataka gam a natna jeh a mi 36 thi a, Telangana gam a 34 chule Punjab gam a mi 32 thi ahitai.

Haryana gam a mi 13, Jammu and Kashmir a 12, Bihar a 7 chule Kerala a 4 thi ahi. Jharkhand, Chandigarh, Himachal Pradesh le Odisha a mi 3 cheh thi a chule Assam gam a mi 2 thi ahi. Meghalaya, Uttarakhand le Puducherry a mikhat cheh thi ahi, tia Ministry data a kisei ahi’in chule ministry website dungjuiya, athi hop 70 hi natna chom chom nei ahi.

Xxxxxxxxx

Longding a thingnoi holeh Security force ho kikapto jeh a milham khat in thina toh

Itanagar, May 16: Tuni chun Arunachal Pradesh gamsung ah Security force holeh thingnoi ho akikapto nauva milham khat in thina atoh i chule phabep akitongkha uvin ahi. Thulhut in aseina achun hiche thilsoh chu Longding district sung a Pumao khosung a soh ahi in Security force holeh thingnoi ho kikaptona kikah a chu milham ho um ahiuvin ajam nauva thina atokhah uh chule phabep kitongkha ahi.

Defence official thulhut in aseina achun NSCN(IM) ho chaloh dan aki sui jing toh lhon in Longding khosung a aum u akihet phat in Indian Army hon operation abol uvin ahi. Operation kibol jeh chun khosung miho alunglhai pouvin aki koukhom uvin security force ho chu song in asep uvin ahi. Sepai khat in chenna inkhat a muonmo jeh in aga naiphei phat in hiche in akon chun thal ahung kikap in security force hon jong alethuh pai uvin ahi. Mipi ho bitthei nading a security force hon aboipi kah uvin thingnoi ho aki jamdoh uvin chule khosung mi hon song ase nauva chun sepai phabep jong akitongkha kit uvin ahi.

Xxxxxxxxxxxxxxxxxxx

Gampam akong hunglhung mi 218 ho result Negative hita

Imphal, May 16: Covid Control room thuso khat in aseina achun state dang akon Manipur gamsung hunglut mi 218 ho sample test akibol in a result u asotoh lhon in abon in negative ahisoh kei uve ati. RIMS ah VRDL a 154 test akibol in chule JNIMS a 64 test akibol in ahi. Mi 218 holah achun mi 12 chu Myanmar gamsung a songkul tang hunglut ho ahiuvin ahi.

Xxxxxxxxxxxxxxxxxxx

Manipur gamsung hung kinungle ding in koima akijol khapoi; Chief Secretary

Imphal, May 16 : Manipur Chief Secretary J Suresh Babu in aseina achun Manipur government in gampam a um hong hung kinungle ding in koima akijol khapon ahung nom jeh uva ahin hathum jeh un pass leh permit kigonpeh ahibouve tin asei in ahi. Hiche aseina jeh pen hi Kolkata AMRI hospital a thunei hon covid-19 natgol jeh in Northeast gamsung  adeh a Manipur leh Tripura state govt. in gampam a um agammi hou health department a tongho kinungle ding in asei uve ti agindoh jeh a Chief Secretary in hiche tobang chu ahilou dan hilchetna apeh ahi.

Rupak Barua, CEO, AMRI hospital in twitter a atahdoh na achun Northeast akon hung doctor leh Nurse ho jeh a AMRI hospital in kituptah a na atohthei uh ahidan atah lang in hinlah tuhin hiche hospital akon NE mi phabep in agamsung alejot kigot jeh uva CEO Rupak in Manipur leh Tripura state govt. in akoudoh dan in asei in ahi.

 Alangkhat ah Dr. Th. Bhimo Singh, Director JNIMS in aseina achun tuni a covid-19 vei case ni akimudoh be toh lhon in Manipur gamsung ah tuhin active case 5 aumthu asei in ahi. Hiche a dammo teni lah a khat chu Mumbai akon hung kinungle ahi in chule khat chu Kolkata akon hung kinungle ahi. Minu mipa holeh gampam a umho hasei man in Manipur government in gampam a um hon apodoh jing utoh lhon in Manipur state sung a jong natna vei akibe ding in ginchat um ahi. Health Minister L Jayenta Kumar Singh in aseina achun Manipur govt. in aseichu ahileh Manipur gammi gampam a umhon aum nau akitup louva inlam ahung kinungle nom ule kida louhel ding ahi tia asei ahi in gampam a umho hungpot doh uvin tin akisei khapon chule kou jong akikoukha poi tin asei in ahi.

Xxxxxxxxxxxxxxxxxxx

Ccpur OPD phat chomkhat a ding a kikhah

Ccpur, May 16: Churachandpur District hospital a Medical Superintendent in thuso abolna achun Covid-19 natjeh in phat chomkhat a ding in OPD akikha thu asei in ahi. Hinlah Flu clinic ho kihong ding ahi in. Gamdang akon hung kinungle ho natna vei hiding a ginmo aum jeh uve OPD phat chomkhat kikhah ahidan asei in ahi.

Natnavei hiding a ginmo umho koina ding in District hospital phatsah ahitoh lhon in Isolation ward jong gontup ahitai. OPD akikha vang in Emergency leh Flu-clinic ho kihong ahithu thulhut in asei in ahi.

Xxxxxx

Ccpur a toset jeh a mikhat thi

Ccpur, May 16: Thulhut khat in aseina achun tuni chun Churachandpur district sung a gari toset jeh in mikhat in thina atoh in adang khat akitohkhah thu asei in ahi. Thilsoh chu Thingkangphai leh Lanva kikah a soh ahi in Thina toh chu Lhangnem kho a cheng Lanmang S/o (L) Khanthang ahi in chule akitongkha chu ajinu ahi in. Ama teni hi Ccpur district HQ jon a hung lhai ahiuvin Mata lang akon hung lhai gari neu khat toh akiphutkhah jeh uva thina ato ahi.

Xxxxxxxxxxxxxxxxxxx

Bengaluru akon Special train khat Jiribam hunglhung ta

Imphal, May 17(ET): Lockdown jeh a Bengaluru a tangden Manipur gammi 1384 ho hinpo special train chu tuni chun Jiribam 3:52 pm chun ahung lhung tan ahi. Amauho Jiribam akon poding in Ukhrul akon bus 6 ache in mi 105 ho ahinpoh ding ahi in, Ccpur leh Pherzawl ho ading in bus 6 ma ache in mi 123 ahinpoh in tuni nilhah nidan 5:25 chun ahung kipandoh tauvin ahi.Tamenglong ho a ding in bus 1 ache in mi 26 ahinpo in nilhah nidan 5:25 chun ahung kipandoh kit tuvin ahi. Senapati district sung ho ding in bus 6 ma ache in mi 123 ahinpoh ahi. Chandel district ho a ding in bus 2 ache in mi 49 ahinpo uvin ahi. Kakching district ho a ding in bus 4 ache in mi 104 ho ahin po in tuni jan nidan 6:20 chun ahung kipandoh tauvin ahi.

Bishnupur district sung aho ding in bus 4 ache in mi 93 ahinpo in nilhah ni 7:13 chun ahung kipandoh tauvin ahi. Kangpokpi district ho a ding in bus 5 ache in mi 107 ahinpo in nilhah nidan 6:50 chun Jiribam akon ahung kipandoh tauvin ahi. Thoubal district ho a ding in bus 7 ache in mi 147 ahinpo in jiribam akon 7:40 in ahung kipandoh tauvin ahi. Kamjong district ading in bus khat alut in mi 19 ahinpo in Jiribam jan pung 8 in ahin dalha tauvin ahi. Bengaluru akon hunglhung ho chu Jiribam Railway station ah screening ho abol uvin chule a district hou alhung phat ule ni 14 sung community quarantine centre a umding ahiuve.

Senapati district sung a pungkah 48 sung total lockdown kiphong

Imphal, May. 17: Covid-19 natna akon kihuidoh nading in Senapati gamsung a CSO hon pungkah 48 sung total lockdown aphong uvin ahi. Hiche lockdown chu 18 May 2020 jingkah nidan 6 apat 20 May 2020 jingkah nidan 6:00 chan hiding ahi. Hiche thulhutna chu Senapati district sung a CSO (NPO, SDSA leh SDWA) hon NPO conference hall a meeting anei nauva ahin phatsah u ahi.

Lockdown sung ahi Medical, Fire Brigade, Media leh Permit neiho bou kilha ong ding ahi CSO hon mipi ho heng a insung a kikhum tup a kitupsel a lockdown dan juiding in asei uvin chule Senapati DC Somorjit in Covid-19 Protocol apalkeh jeh a Suspend ding in ngehna anei uvin ahi.

Covid-19 natna dou a panla ho heng a sun-an kihoppeh

Thoubal, May 17(ET): Tuni chun Wangjing Tentha Farmers Development Association (WATEFADEAS) hon ‘Work and Fight Covid-19’ kiti thupi a mangcha in hiche natna dou a panla security force Kakching leh Thoubal district sung a duty po ho heng a sun-an hopna anei uvin ahi. Thoubal Thong, Melaground, Ushoipokpi, Tangje, Wangjing, Khongjom, Sora, Kakching Lamkhai leh kakching Bazar a duty poho heng ah ahom uvin ahi.

Chief Functionary Moirangthem Hemanta in aseina achun hiche sun-an hi janhi apat kipan ahidan asei in security force ho heng a bou kihom ahipon loubol miho chule quarantine centre a umho heng a jong association in kithopi apeh uh ahidan jong asei in ahi.

Truck in Nungka kho a mikhat tanglih

Imphal, May 17(ET): Janilhah chun NH 37  Tamenlong district sunga Nungkao kho a Truck khat nin Motorcycle a tou khangthah pasal khat anatanglih in ahi. Athipa hi Nungkao khomi ahin Truck chu Imphal langa kon akeuva Jiribam a thilpo dia che ahi. Nungkao khomi hon longman Dk. lakh 15 demand abol uve akitin hinlah Truck neipa, police  leh Bushenpur MLA Govindas panlah jallin tunin kihoulhahna aumin sum ijat chetna kinop tona aum kiseilou vangin demand kiboljat sanga lhomjo hidin vang akiseije.