Chief Minister N Biren in thingnoi ho chamna sempi dia kouna nei

Chief Minister N Biren in thingnoi ho chamna sempi dia kouna nei

174
0
SHARE

Chief Minister in civil service tup hotoh kihouna nei; toh hat man umtei ahi, tia sei

Imphal, Feb. 8(ET): Chief Minister N Biren Singh lungtup ikhohsah a ahileh tompan na aga umding ahi, tin GM Hall mun a Chief Minister’s Coaching Scheme for Civil Service Aspirants scholar holah Interaction session abol nauva aseiyin ahi.

Themjilna hi sorkar natoh muna ding ahipon, mopohna nei gamsung mi hina ding ahi, tin CM in aseiyin chule gamsung mihon talent lentah anei uvin, simlai leh khangthah hohi khonung phatna dinga puihoi a sem angaiye, ati.

Chief Minister’s Coaching Scheme (CHMT) hi gamsunga thepna neiya simlai hon angaichat kithopina peh nathei dinga kibol ahi, tin CM in aseiyin chule scheme phatchomna simlai tamtah in amu akipana thu aseiyin ahi. Tua sorkar hin gamsung miho lungtup bulhit ding hi akhohsah pen ahi’in, sorkar in CHMT kiti scheme chom chom gamsung miho phatchomna dinga achepi a, chule scheme hi insung 1.5 lakh vel in aphatchompi ahitai, ati.

Kin gon a akikhom simlai ho Chief Minister anga amin aumna ho akiphong uvin chule Chief Minister leh state sorkar in simlai ho dinga scheme hitobang achepi jeh a akipanau thu asei uvin chule ngaidan, lunggel leh ahahsatnau hojong asei uvin ahi.

Hetthei khat chu Chief Minister’s Scholarship Scheme for Civil Services Coaching hi kum masa March lha a hondohna um ahi’in, dangka crore 1 val scheme ahi. Scheme noiya state sorkar in Civil Service tupna neiya akilhengdoh simlai 150 hi 100% scholarship apeh ding ahi. Simlai khat a kum khat course fee a dinga 70,800 fee lut ding hi state sorkar in apohdoh ding ahi’in, state sorkar in dangka 1,06,20,000 chan apohdoh ding ahi. Scheme hi Delhi khopi a um ALS-IAS Coaching Institute toh Corporate Social Responsibility (CSR) programme noiya abol u ahi.

Chief Minister N Biren in thingnoi ho chamna sempi dia kouna nei

Boina jatchom chom holeh political lampang toh kisaiya gamsung’a um thingnoi group ho akon member 100-200 panna a kihoukhomna neiding’in tohgon akineiye tin Chief Minister N. Biren in tuni GM Hall a Chief Minister’s Coaching Scheme noiya scholarship mu Civil Service jihding candidate hotoh kihoukhomna kingon a thuso miho heng’in aseiyin ahi. Masang boina jouse jong political dialogue jal’a suhfel a umthei anahi ahin, Bodo ho boina jong suhlhap in aum’in, ULFA leh Centre kikah Peace talk jong umvah ding ahitai ati. Alang alang’a boina leh kihetkhelna ho suhbeina dingleh kichamdel’a lhatkhomna thei dia tuhi gamsung’a um thingnoi miho jong ahungdoh uva Government toh political dialogue aneiphat’u ahitai tin aseiben ahi. Hichena dia milham mipiten jong thingnoimi ho ajol diuvin temna aneiyin chule Manipur gamsung’a um thingnoi hotoh kihou ding’in State Government in Centre heng’ah thu jong alhut tai tin Chief Minister pan aseikit in ahi.

Coronavirus nat douna dia Education department akigin dinga ngehna um; gamsung a mi 182 ‘Home Surveillance’ a kikoi

Imphal, Feb 8(UNA): China gam a kon Manipur gam a Friday ni a hung kile a mi 10 State Health official hon coronavirus natna nei thei dinmun a um ahijeh a observation a akoi uvin ahi.

Hiche toh kilhon a gamsunga ‘surveillance’ noiya um hi agom a mi 179 lhing ahitai, tin Dr L Arke Singh, Additional director (Public Health)/SSO, IDSP in aseiyin ahi. Central Health Ministry in China, Thailand leh Singapore a kon hung kile jouse ‘screening’ bol tei dinga thuhilna aneitoh kilhon a ‘surveillance’ noiya ahung lhung ho akoiyu ahi. Hiche masang a State Health official in mi 172 hi ‘home surveillance’ a akoi ahi.

Health officer in asei dungjuiya thisan sample 7 lab test a kithot holah a sample 4 a result akimu in, coronavirus natna a negative ahi, ati. Tuchan geiya hospital a ginmo case umlou chule ‘positive case’ jong umlou ahi, ati.

Vannoiya coronavirus natna neiya atam cheh cheh toh kilhon a Education department in natna a kon kivenna ding a kigotna anei dinga State Health authority in ngehna aneiyin ahi.

State Health official in pan alahna ho aseiyin, Additional Director (Public Health) leh Army Personnel, Leimakhong in hiche chungchang a meeting aneiye, ati. Achesa Friday nikho a NC, New Secretariat, Imphal khopi a Health official hon state jouse a Health and Family Welfare Ministry official hotoh video conferencing a kihouna anei uva chule February nisim 5 ni a jong Central Health Ministry official holeh NCDC in video-conference a kon meeting anei ahi.  JNIMS, RIMS leh Health department a kon health official hon Principal Secretary (Health) chairman hina February 6 ni a meeting anei nauva gamsunga coronavirus nat douna ding leh kivenna dinga pan kilahdan ho thu phatah a seikhomna aneiyu ahi.

State Health official hon Ministry of Health hi aniseh a akijahmatpi ahi. Airport leh gamgi mun dang dang a health official hon kholjin ho screening abol jing’a chule aphat tin a Centre henga report athot u ahi. Chule district leh community level a mopohna nei district health authority hon athu ahil’a, control room jong nidan tin a kihong ahi, tin Additional Director in aseibe in ahi.

Assam Rifles hon Kpi district a khamnathei kisemna ‘manufacturing unit’ mandoh; Khamnathei Dk. Crore 120 man jong mandoh

Imphal, Feb 8(ET): Assam Rifles hon HQ IGAR (South) noiya Maphou Police Station thalheng hotoh Kamu Saichang area, Kangpokpi district a tunin khamnathei kisemna ‘manufacturing plant’ khat amandoh uvin, khamnathei tamtah toh amat tha uvin ahi.

Thuguh amu u dungjuiya Assam Rifles hon operation abol a, manufacturing plant umna akholdoh ahi. Plant hi Opium a kon Morphine lahdohna a kimang’a, hiche hohi Brown sugar leh Heroin semna a aman kit u ahi. Operation abol nauva team hon heroin brown sugar (atah) kg 29, Brown sugar (atui) litre 20, ganja (marijuana) kh 8 chule khamnathei semna a kimang manchah leh chemical ho aman uvin ahi.

Khamnathei hohi asem jouteng uleh Manipur leh Nagaland khangthah ho supply abol u ahi. Elizabeth Khongsai kiti numei khat police hon aman uvin chule khamnathei semna a kimang inmun neipa jong tua hi kisel ahi. Khamnathei kiman hohi international market a agom a dangka crore 120 vel hidinga ginchat ahi. Akiman numeinu leh akiman thil ho Maphou Dam police station a apedoh tauvin ahi.

Alangkhat a Lilong police hon Lilong Lou Tara a konin achesa February nisim 7 nikhon khamnathei po a mi ni aman uvin, dan in akha buhse lou tui (cough syrup) bottle 103 aman uvin ahi. Akiman teni hi Md. Minhajuddin (29), s/o (L) Md. Karimuddin, Lilong Lou Tara a cheng leh anaopa Md. Wahajuddin @ Md. Waha ahi.

Thulhut dungjuiya Inspector O Ajit Singh, OC Lilong police lamkaina a Lilong police toh thuguh amu uva, SI Md Wakibuddin kithopina a ANJUMAN member hotoh ucha teni hi a inmun uva kon amat u ahi. February nisim 7 jan nidan 11.30 don a team hon inmun a kon cough syrup 103 amudoh uva, ucha teni jong amat u ahi. Thilsoh toh kisiaya Lilong police station a case ajihlut u ahitai.

Simlai 59,481 hon Class XI leh XII exam centre 101 a bolding

Imphal, Feb 8(ET): Council of Higher Secondary Education Manipur (COHSEM) a Chairman Dr. L. Mahendra Singh in thuso miho heng a tuni a Babupara conference hall a aseina achun tukum sung a Class XI leh XII akigom a exam bolding simlai 59,481 aum uvin centre 101 a exam abol ding uh ahi ati.

Class XI exam hi February 17 apat March 26 chan hiding ahi in chule Class XII exam hi February 14 apat March 23 chan hiding ahi ati. Higher secondary exam nading ahin simlai 29, 144 hon stream thum Science, Arts leh Commerce a exam apeh diu ahi in science a exam peding simlai  20, 369 ahiuvin, Arts stream a exam bolding simlai 8, 065 ahiuvin chule Commerce stream a exam bolding simlai 710 ahiuve.

Aseibena achun Class XI a exam bolding simlai 30,0337 ahiuvin hiche lah ahin science stream a exam bolding simlai 20,785 aum uvin, Arts stream a exam bolding simlai 8,885 aum kit uvin chule Commerce stream a exam bolding simlai 701 aum uve ati. District 16 lah a 14 sung a exam conduct kibol ding ahi in centre 101 a hiche exam hi umding ahi in chule hiche a panla ding S.O, O.C, Invigilator leh simlai hon dan kipe ho phatah a jui cheh diuvin jong asei in ahi. Tuni kin achun Commissioner of education(s) T. Ranjit Singh, Director of Education(s) Th. Kirankumar Singh chule education department a official hon pan ala uvin thuseina jong anei uvin ahi.

Gamsung a ‘third gender’ voter tam cheh cheh

Imphal, Feb 8(ET): Gamsunga ‘third gender’ voter atam cheh cheh in, state electoral list a ‘integrated final photo’ kisodoh na a ‘third gender’ voter kal atamna pen ahi.

January 1, 2020 chan a third gender electorate 88 register kibol ahi’in, January 1, 2019 kum chan a register kibol hi mi 26 hi ahi. Third gender electorate register kibol atamna pen hi Imphal East district ahi’in, mi 34 ahi. Hiche ban a Thoubal leh Imphal West district a tam ahi.

Jiribam, Chandel leh Senapati district a ‘third gender electorate’ register kibol aumpon ahi. Friday nikho a Assembly constituency 60 a dinga state election authority hon ‘integrated final photo electoral roll’ asodoh nauva hiche thu hi kihe ahi.

Tukum agom a electorate 30,688 akalbe in chule service electorate jong tuchung hi 21,250 a kon 21,392 a kal ahi. Final electoral roll dungjuiya Manipur gam a tukum January nisim 1 chan a voter hi agom a 19,12,649 ahi’in, pasal 9,30,931 leh numei 9,81,630 pang ahi.

Joint Chief Electoral Officer (CEO) Ramananda Nongmeikapam in thuso miho akimupi na’a, voter hon Electoral Registration Officer, Assistant Electoral Registration Officer chule boothe level officer ho office mun a ‘integrated final electoral roll’ avet thei ahi, ati. CEO website www.ceomanipur.nic.in a jong vetthei ahi, tin aseibe in ahi.

Achesa December 16 a kon tukum January nisim 15 sunga ‘special summary revision’ um ahi’in, hiche sunga State election authority hon electoral list a kon electorate 7859 akah ahi. Population toh tekah dinga voter hi 53.06 a kon 53.93 percent a kal ahi.

Imphal West District a electorate 3,57,178 lhing a atamna pen hi ahi’in chule Jiribam district a voter 26,852 um’a alhom na pen hi ahi. Chule Imphal West, Imphal East, Bishnupur, Thoubal, Chandel, Ukhrul, Kangpokpi, Tamenglong leh Churachandpur district a voter numei ho pasal sanga tamjo a chule Jiribam leh Senapati district a voter pasal tamjo ahi.

State electorate 98 percent hi elector photo identity card a cover kibol ahi. Coverage atampen hi Ukhrul district (92.2 percent) ahi’in chule Churachandpur district hi coverage alhom napen (97 percent) ahi.

 

Delhi Election: Voter 57% in vote lhadoh

New Delhi, Feb 8: Election commission official thuso in aseina achun tuni Delhi Assembly ading a kitetna ah vote khe 57 pc aval bep in jan nidan pung 5 injong vote khe ding polling station phabep a tamtah akigol nalai uvin polling station jouse ah kitupsel in boina imacha umlou in achelha jing in chule hiche kitetna ding ahin official mi 98,000 val in pan ala uve tin Delhi Chief Election officer Ranbir singh chun thuso miho heng ah asei in ahi.

Tuni a vote lha holah ahin President Ram Nath Kovind, President masa Pranab Mukherjee, Vice President masa Hamid Ansari, Prime Minister masa Manmohan Singh, Delhi Lt Governor Anil Baijal, Chief Minister Arvind Kejriwal, Congress President Sonia Gandhi, BJP lamkai LK Advani, Union Minister Harsh Vardhan leh S Jaishankar, Congress lamkai,Priyanka leh Rahul in jong vote lhana nei uvin ahi.

Delhi khopi sung ahin vote lhathei mi crore 1.4 tobang aum uvin hiche lah ahin pasal 81,05,236 aum uvin chule numei 66,80,277 aum uvin ahi.

Constituency lah ahin Ballimaran hi aneupen ahi in 2.50 sqkm bou ahi in chule Narela constituency chu alenpen 143.42 sq km ahi. Vote lhahna chu polling station 13,571 a aum in ahi. Kitetna hi BJP, AAP leh Congress ho atam pen uvin tuni a vote result hi Feb 11 nikho leh kiphongdoh ding ahi.

 

Delhi election a AAP in goljona anei ding ginchat thu hatah a kisei

New Delhi, Feb 8: Tuni a Delhi Assembly a vaihom ding vote lhahna akichai toh lhon in koi party in government asiem ding ham ti hatah in akisei pan tan atamjo seidan in AAP hon ahinsem kit diuvin asei uvin ahi. India Today-Axis poll in aseina achun AAP hon seat 70 lah ahin seat 59-68 kikah muding in asei uvin BJP hon seat 2-11 kikah muding in aseikit uvin ahi.

Times Now-Axis poll in aseikitna achun Kejriwal lamkai AAP in seat 47 amu ding in asei in chule BJP hon seat 23 amu diuvin asei in ahi. Republican-Jan ki Baat survey in aseikitna achun AAP hon seat 48-61 kikah amutei diuvin asei uvin chule BJP hon seat 9-21 kikah amu ding uvin asei in ahi. TV9 Bharatvarsh-Cicero in aseikitna achun AAP hon seat 52-64 kikah muding in asei uvin, BJP hon seat 6-16 kikah muding in aseikit uvin ahi. ABP survey in aseikitna achun AAP hon 50.4% seat amuding uh ahi in chule BJP hon 36 percent amu diuvin asei in ahi.

Prediction bolhon asei nauva chun tuchung kitetna ahin BJP hon 50% val amuding uva kon 30% lah ahung hikhah leh Jharkhand, Maharashtra leh Haryana gamsung a kitetna  a jong chutobang chu hiding ahi atiu vin hiche state ho hin BJP hon gollelna nasatah ahinto ding ahiuvin ningkum Lok Sabha election banglou hel ding ahi tin asei uvin ahi. Congress hon 10% velbep amuding un asei uvin tuchung a 10% vel tobang amukit ule Delhi khopi sung a single digit amunau term ni kijom ding ahitai.

ZUF faction ho  kah’a kikapto na um

Noney, Feb 8 (ET): Noney District hopsung Khoupum gamkai sung’a janhi (Feb. 7) chun ZUF/ZTF leh Jianchui Kamei makaina ZUF faction ho ana kikapto uvin ahi. Hiche achun ZUF faction cadre khat nasatah in anakitong khat in chuleh ZUF/ZTF hon thal leh manchah phabep jong anachompeh naban’a cadre khat jong ahing in anaman uvin ahi tin thulhut chun aseiyin ahi.

Thulhut chun aseibe na’a ZUF/ZTF in Jianchui Kamei faction group manchah achompeh ho chu AK 56-1, command bag 4, Kenwood radio set 2, HK magazine 2 ho ahi akiti.

Sekmai MLA Dingo Singh in accident toh; ICU kilhut

Imphal, Feb 8 (ET): Sekmai MLA Heikham Dingo Singh in tunin toset anatoh in apet pet in Raj Medicity Hospital mun’a anapolut uvin hiche kisuh chan in ICU a aum in ahi. Thulhut kimu dungjui in ama ding mun hi seithei ahipon khohelouvin aum in ahi. Hiche thilsoh Chief Minister N Biren Singh in ajat jat in Hospital mun’a avelha ding in anache in ahi.

Hiche thilsoh hi Imphal West District hopsung Khonghampat mun’a MLA pa touna SUV chun nilhah lam nidan 1:40 vel’a lamlen pam’a kinga Tata khat anatakhah ahi. Thulhu kimu dungjui in MLA Singh PSO pa jong nasatah in akitong kha in chuleh driver pa jong akitongkha in abon uvin Raj Medicity Hospital mun’a jen in aum uvin ahi.

College jilkung hon ann ngol kiphinna pan tao

Imphal, Feb 8(ET): Government college jilkung ho in kiphinna ana nei jing su jom in ann ngol ana pan taovin ahi. Hetthei khat chu jilkung ho hi achesa Jnuary nisim 28 akon ana kiphin pan ahi taovin ahi.

Jilkung ho hin thil 10 som 7th UGC Pay and Regulations 2018 kichesah ding deisah toh lhon a ana thum u ahi. Jilkung ho kiphinna hi Federation of Government College Teachers’ Association (FEGOCTA), Manipur makai na noi a an akibol ahi.

Hetthei khat chu government in tu chan a kiphinna nei jilkung ho adon lou u ahi. Kiphinna le kijotna ana nei ho u police in ana suh boi le lei u toh lhon a ann ngol kiphinna chu NG College jilkung ho in tuni a ana pat u ahi.

Kiphinna mun a FEGOCTA vice president RK Indira in ahou limna a  post graduate themvetna ahunglhungding February nisim 14 akon akipat tah ding vang in govt in kiphinna nei jilkung ho adonse pon ahi ati. Hiche ann ngol kiphinna hi collge jouse a hung kitol ding ahi ati.

State govt in thumna kinei ho hi ana nop peh sah u ahin hinlah tu chan in akipo doh nai hih in ahi ati. Achesa September  2019 akon a temna anakinei jing vang a govt in ajou lhep jing uva natoh na ima cha anei loudan u phondoh na jong ananei in ahi.