Chief Minister N Biren in sericulture lampang machalna dia machine leh thil...

Chief Minister N Biren in sericulture lampang machalna dia machine leh thil homdoh; Chanvou nei mi 1300 ho personal account a Dk. crore 11 hetlut peh; CM in ILPS ‘online portal’ hondohna nei; Revenue a dangka crore 1 vel akimu e tia jong sei; Tamenglong-Noney school jilkung hon board exam ‘boycott’ bol dinga gihna nei; Chandel a jong jilkung hon kiphinna nei; BOSEM in class X exam akigong banga chelhah pi dinga sei; LPG man kal jeh’a MPMC in toumun kiphinna bol; Thil man kal hi government thepmo ahi tia MPCC spokesperson in sei; All Manipur Kuki Chiefs General Assembly chelha; Kiloikhomna min KCA chu KCC a suhdet hita; Sajiwa Jail a Sheikh Warish thi thu a kisemdoh JAC hon Judicial inquiry bol dia thumna nei; MHRC in DGP heng a Sahid thi thu report apeh dinga sei; Post chom chom 209 kilahna a dan kipalkeh na thu a MU Registrar in action alah dinga UGC in thuhilna nei; PM-Kisan Scheme thu’a DC/CCpur in thuso miho kimupi; Kerala Hospital akon Corona natvei khat kijendam ta

408
0
SHARE

Chief Minister N Biren in sericulture lampang machalna dia machine leh thil homdoh; Chanvou nei mi 1300 ho personal account a Dk. crore 11 hetlut peh

Imphal, Feb 13(ET): Chief Minister N. Biren in tunin scheme chom chom’a chanvou nei mi 1300 personal account cheh ah dangka crore 11 ahetlut peh’in ahi. Sericulture lampang machal ding bidoi neipum’in machine leh thil le lo dang dang jong ahomdoh e ati.

Sangaipat a um Sericulture Office Conference Hall a kikhopkhomna ah Chief Minister N. Biren in Sericulture hi Manipur gam’a dia angaicha khohpen khat ahi tin aseiyin ahi.

Kingon a chun Yaiskul Assembly Constituency MLA Th Satyabrata, Tamei Assembly Constituency MLA Awangbou Newmai leh milen milal dang dang hon jong pan alauvin ahi.

Chanvou nei mi 1300 lah’a mi 1000 chu phaicham mi ahiuvin, adang 300 hochu thinglhang mi ahi. Phaicham a um chanvou nei mi 1000 hochu grant dan in dangka crore 7 lakh 41 leh sang 12 apeuvin, thinglhang mi chanvou nei mi 300 hochu dangka crore 3 lakh 44 leh sang 42 apeuvin ahi.

Tuchung hi Manipur gamsung’a Sericulture lampang hatah a kiboipi ding ahi tin MLA Th Satyabrata in ahoulimna ah aseiyin hiche hin gamsung economy hatah a ahin khantou sahding ahi ati.

Chief Minister N. Biren in ahoulimna ah gamsung mipite hin thepna leh boltheina jatchom chom inei uvin, gamsung law and order ahung kitup toh kilhon a khantouna lam hatah a mano thei ahitai atiban ah moh um louva thil phachom khatbeh boldia lunggel nei mi jong akibe jing’e ati. Tua kon’a midang gamdang ho kimanchah dan leh inchen louchen dan thothei ahitai tin jong aseiyin chule Kaani lei kibolna gamho Sericulture farm a hung kikhel ding ahitan, akisaipi Department holeh thinglhang gamkai lamkai ho kihoutoh uva Committee khat asemdiu chuleh thilpha lam’a bolthei thei, tu thei thei hojong atudiu ahi  atin chule tunia kipodoh direct benefit system hin gamsung’a nehguh chahguh kibolna ho ahin kemsah ding ahi tin Chief Minister pan aseiben ahi.

CM in ILPS ‘online portal’ hondohna nei; Revenue a dangka crore 1 akimu e tia jong sei

Imphal, Feb 13(ET): Gamdang mi gamsunga hunglut ho database phatah a koitup nading a Chief Minister N Biren Singh in Chief Minister’s Secretariat mun a tuni a kin abol nauva Inner Line Permit (ILP) portal www.manipurilponline.com hondohna aneiyin ahi.

Gamsunga ILP akichepi a kon sorkar in ILP kipe ho record koina dinga web portal hondoh dinga kigel lhahna anei ahi’in, permit kipe ho thuchen jong kipe ding ahi. Mopohna nei authority chule official hon gate chom chom a permit apeh nauva hahsatna leh boina ato hou suhlhap nading ahi, ati.

Atil a online portal hi Bir Tikendrajit International Airport mun a system 6 a kikoi ding, March 1, 2020 kah a hiche hi gamsung adang dang a kikehlen ding ahi. Applicant hon online a payment abol uva ILP apply abol theiyu ahi’in, chule gamsung ahung lhun masang uva permit print akibol theiyu ahi. January nisim 31 chan a category chom chom noiya agom a permit 33,995 kipedoh ahitan, chule revenue a dangka crore 1 vel kimu ahi, tin CM in aseiyin ahi.

India gam dang dang a um Manipur Bhawan ho a facilitation centre hondoh dinga Chief Minister in aseiyin ahi. Hetthei khat chu ILP system hi gamsunga tukum January nisim 1 nikho a kon kichepi pan ahi’in, Airport, Mao, Jiribam, Jessami, Moreh, Behiang leh Sinjowl a ILP permit pehna aneiyu ahi. Mobile phone a kon application akipeh theina ding mobile application jong kikoi vahding ahitai. Web portal hi IT Department, Manipur government in asem ahi.

Chief Minister in kin gon a Department of Taxes noiya www.manipurtaxes.gov.in jong hondohna aneiyin ahi. GST, VAT (petroleum product leh alcohol) chule Professional Tax chungchang a thu ho hetna thei ahi. Kai pe hon email ahilouleh toll-free number a ngaidan apeh theiyu ahi’in, hitobang tohgon hi sorkar natoh a oljep nading ahi.

Tamenglong-Noney school jilkung hon board exam ‘boycott’ bol dinga gihna nei; Chandel a jong jilkung hon kiphinna nei

Tamenglong, Feb 13(ET): Sorkar in ROP 2019 a adihlou ho suhdihna apet pet a anei louva ahileh board exam boycott bol dinga Tamenglong leh Noney district a government school teacher hon gihna anei uvin ahi.

Zonal Office Tamenglong a 2019 revised pay douna a Thursday nikhon Tamenglong leh Noney district a kon jilkung hon toumun kiphinna abol uvin ahi. Kiphinna bol hon, ‘Jilkung ho lo suhnem hilouva kalsah uvin, suhdihna aum louleh natoh umlou ding ahi, 7th ROP adih nadinga 6th ROP suhdihna nei uvin’ tia kisun lekha akidop uvin ahi.

Tamenglong District Teachers’ Association member Remgong Riamei in thuso miho akimupi na’a, sorkar in thumna akhohsah louva ahileh Tamenglong leh Noney district a jilkung hon kiphinna sangtah abol ding chule class X leh XII board exam a pan alah loudiu ahi, ati.

Alangkhat a Tamenglong District Teachers’ Association president Tigaimei Gangmei in, Tamenglong Zonal Education office mun a nilhum a toumun kiphinna akibol jouva Chief Minister a dinga Tamenglong DC henga memorandum akipe lut in, pay suhdihna apet pet a anei dinga ngehna akineiye, ati. Memorandum copy thuso miho jong ape uvin ahi.

Finance Department in achesa July 17, 2019 kum a asodoh ROP 2019 a hi jilkung grade chom chom ho lo kisem adihpon, hiche hi jilkung ho kibungkhenna chule kijumso na ahi, tin memorandum a asei uvina hi. ROP 2019 a ‘pay fixation’ akisuhnem hi kisang louding, jilkung ho kisuhminsetna ahi, tin Tamenglong District Teachers’ Association president Tigaimei Gangmei leh Secretary Sebastian Gailinlung in soi akaina memorandum a asei uvin ahi.

Alangkhat a Chandel District Teachers Association injong Maha Union Govt Higher Secondary School mun a toumun kiphinna abol uvin Manipur Services Revised Pay Rules- 2019 (7th Pay) asuhdih diuvin thumna anei uvin ahi.

Chandel leh Tengnoupal district a um Higher Secondary lecturer ho, Graduate teacher, primary teacher, RMSA chule SSA jilkung hon kiphinna agon u ahi. “ROP 2019 suhdihna nei uvin’, ‘AGP suhmang a GP system chepi ding ahi’, ‘Jilkung ho ROP 2019 a bungkhen hih uvin’ tia kisun lekha chom chom akidop uvin ahi.

 

BOSEM in class X exam akigong banga chelhah pi dinga sei

Imphal, Feb 13(ET): Board of Secondary Manipur (BOSEM) in agon High School Leaving Certificate Examination (HSLC) exam hi bandh, boycott leh kiphinna chom chom jeh a aphat kikhel louding ahi, tin Education (S) Director Kirankumar in tunin thuso miho henga aseiyin chule top 10 a pang position chang holeh subject topper ho answer sheet hi website a kitahdoh ding ahi, tin aseibe in ahi.

“February 17 ni a kipan ding exam a top 10 sunga pang holeh subject jouse a mark mu sangpen ho scanned kibol answer script hi mipi lungthen nadinga BOSEM web portal a kitahdoh ding ahi”, tin Kirankumar in aseiyin chule exam kichai teng answer key ho BOSEM website a tahdoh dinga jong aseiyin ahi.

“Akigong exam hi aphat a thon louva kibol ding ahi”, ati. HSLC exam hi center 140 a simlai 38664 in apeh ding ahi’in, simlai 19040 hi pasal hi a chule 19624 hi numei hi ahi. Tuchung exam a ‘disable candidate’ khat bou aum’e, tin Kirankumar in thuso miho henga aseiyin ahi.

Evaluation chule script format akikhelna phabep umding ahi, tin aseiyin chule tuchung a answer script hi landscape a kon portrait format a kikhel ding, margin kijih ding ahi, ati. Chule science leh social science answer script a ‘watermark’ kipe ding ahi, ati. Exam thengtah a akibol theina dinga Supervising Officer (SOs), Officer-in-charge of exam centre (OCs), Assistant Officers-in charge (AOCs), Supervising-Invigilators (SI) leh Flying Squad kiti official ho lhendohna aneiyu ahi.

Centre phabep tilouva answer script hi exam centre atamjo a lhung ahitan, adang ho a jong jing nikho teng lhung ding ahitai, tin aseiyin chule exam phatah a chelha ding ahi, tin nu-le-pa teho alungkham lou diuvin temna aneibe in ahi. Jilkung, nu-le-pa chule adang dang hon boina umlouva centre jouse a exam achelhah theina dinga atosot diuvin temna jong aneiyin ahi.

Koitobang exam a agu ahilouleh akhel a mi tousah auma akihetdoh a ahileh centre kisumang theiding chule centre chunga board in action chom chom alah ding ahi, ati. BOSEM Controller of Examination cum Secretary Dr Chithung Mary Thomas in form fill up hi manual a kon online a format kikhel ahi, tin aseiyin chule simlai koitobang in Physics watermark kipehna a history ajih a ahileh answer kive louding ahi, ati.

Tu masanga banga centre jouse a CCTV camera kikoi ding nikhat a 100 marks po a answer script 50, 28, 27 leh 26 marks po a script 100 chule 50 marks po a script 80 kal vet lou dinga jong aseibe in ahi. Kum dang a banga science leh social science paper achom a kive ding ahi, tin jong aseiyin ahi.

 

LPG man kal jeh’a MPMC in toumun kiphinna bol; Thil man kal hi government thepmo ahi tia MPCC spokesperson in sei

Imphal, Feb 13(ET): Tulai thil le lo mankal hi tule tua thunei vaihom ho thepmo ahin, hiche hi akinthei lam’in hin sufel’u hen tin MPCC Spokesperson O Nabakishore in tuni Congress Bhawan a thuso mihotoh kihoukhomna khat ah aseiyin ahi. Jani a kon’a thao joh company IOC, BPCL, HPC leh adang dang hon thaoman ahinkal sah’u, chuleh phutlou chang’a LPG gas man ahung kikalsah hi achesa kum 6 sung’a dia anasapen loikhat ahi ati.

Government chaloh dan hi gamsung mipite ding gelkhoh louna khat ahin, adeh’a neilou vaicha hodia hahsat kibena ahi tin Nabakishore chun aseiben chule thilman hohi kintah in akal loichel jin ahinlah ahung khehnem nading’in phat sottah alutji’e ati. Hiche hohi supply kivat jeh ham, black marketing kihabol jeh ham ahilouleh thilkeu ho kikholtup chahkheh jeh ham tin thudoh jong aneiyin ahi.

Alangkhat ah India pumpia LPG gas man kikalsah deilou vetsahnan tunin All India Mahila Congress Committee kithopina noiyin  Manipur Pradesh Mahila Congress hon Congress Bhawan Gate mai ah toumun kiphin abol uvin ahi. Thuso mihotoh akihoulimna ah Manipur Pradesh Mahila Congress Committee a President Mutum Sharma in phutlou chang’a thilman hung kikalsah hin neilou vaicha ho ding’in hahsatna sangtah ahin polut’in, Ujawalla Scheme jong panna bei tobang’in aumdoh tai tin aseiyin ahi.

Hetthei khat chu LPG man 14.2 kg cylinder khat a dk. 714 an chu dk. 858.50 a kikalsah ahi.

All Manipur Kuki Chiefs General Assembly chelha; Kiloikhomna min KCA chu KCC a suhdet hita

Imphal, Feb 13(ET): Tuni chun Kuki Inn, Imphal ah All Manipur Kuki Chiefs General Assembly 2020 achelhah toh kilhon in kilolna phabep jong aneiuvin ahi.

Kingon a KCA-KCC thu seikhomna jong aneiuvin achesa November 29, 2019 nikho a General Assembly a kiseilha KCA a konna KCC a ana kikhel chu suhdetna (re-affirm) anei uvin chule District a Haosa kiloikhomna jousen jong KCC minna natoh/thilbol anei diuvin kilolna anei uvin ahi. KCC in PM heng’a memorandum anakipe, response ahungjeh in Delhi a kalson ding in jong phatsahna anei uvin acheding dan leh aphat ho KCC Cabinet hon ahin suhtoh diuvin kilolna aneiuvin ahi.

Sajiwa Jail a Sheikh Warish thi thu a kisemdoh JAC hon Judicial inquiry bol dia thumna nei

Imphal, Feb 13(ET): Achesa February nisim 12 nilhah nidan 4 don a Sajiwa Jail Sector No 7, Room no 3 a toilet sunga akikhailih sa kimudoh Sheikh Warish Khan thi thu toh kisaiya Lilong Turel Ahanbi Dam lentol a public meeting abol uvin ahi.

Sajiwa Jail a Sheikh Warish kitha douna a JAC asemdoh uvin ahi. Mopohna nei authority hon jail vaipoho chunga action alah diuvin JAC in temna aneiyin ahi. Sheikh Warish (24) kitha a pang jail authority ho nidan 24 sunga terminate bol ding, judicial inquiry bol ding, Sheikh Warish case CBI khut a pehdoh dinga thumna anei uvin,sorkar in action apet pet a alah louleh Sheikh Warish thilong lah lou dinga asei uvin ahi.

February nisim 14 jan nidan 6 a kon nisim 15 jan nidan 6 chan nidan 24 JAC in National Highway 102 a strike bol dinga gihna anei uvin ahi. Sorkar in donbutna anei louva ahileh gamsung CSO hotoh kiphinna bol be dinga jong aseibe uvin ahi.

MHRC in DGP heng a Sahid thi thu report apeh dinga sei

Imphal, Feb. 13(ET): Manipur Human Rights Commission (MHRC) in thuso abolna achun Washima thatpa Md. Sahid (25) Sajiwa jail a kikhailih sa mudoh ahi chungthu a report kicheh tah a Feb 24, 2020 kah a apehlut ding in ahetsah in ahi. Chule Feb 14 nikho a MHRC a Acting Chairman in Central jail Sajiwa a hiche chungthu a kholna anina ding a IGP (Prison) jong thonlouva ajao teiding in jong ahetsah in ahi.

Post chom chom 209 kilahna a dan kipalkeh na thu a MU Registrar in action alah dinga UGC in thuhilna nei

Imphal, Feb 13(ET): Manipur University authority hon group chom chom a post 209 kilahna a adihlou abol’e tia UGC in hehna amu ho chungchang a Registrar, Manipur University in dan dungjuiya action alah dinga University Grants Commission (UGC) in thuhilna aneiyin ahi.

May 27, 2019 ni a Deputy Registrar, Manipur University in Group-A post 20 leh Group B leh C post 74 lah nadinga advertisement mangcha a application achom chom a kouna anei ahi. Professor 25, Associate Professor 51 chule Assistant professor 39 lahna ding advertisement jong hiche nikho ma ma a Registrar-in-charge anahi David K Zote in asodoh ahi.

Secretary leh CVO, UGC henga hehna lekha a Kunal Shandhilya in Central University hi a Manipur University in post chom chom lahna dinga advertisement thum aso hi Central University/UGC dan chule Recruitment Rules apalkehna ahi, tia asei ahi. Medical Officer, Curator, Public Relations Officer leh Hindi Officer tilouva adang se a hi teaching post panna a ‘upper age limit’ kipelou ahi.

Group A post 4 lahna a University in ama jurisdiction kalval a thil abol jong UGC secretary henga lekhathot kipehna a kisei ahi. Information Scientist a dinga written test hi January 25, 2020 ni a um a, Assistant Registrar written test January 27 ni a, Programmer post a January 29 chule Public Relation Officer post a Screening Test January nisim 28 nikho a abol u ahi.

Thulhut dungjuiya hehna sempa in test kisei hohi MU toh kinai Catholic School Canchipur a abol ahi. Chule Group A post lahna dinga question paper hi Manipur University in asem ahi, tin jong lekhathot a aseibe uvin ahi. “Angaina a Central University a hi written test, question paper hohi question sem jing a third party organization in asemding chule exam/test hojong min neiya ahilouleh hetna neiya third-party organization in abol ding ahi”, ati.

Recruitment kibol dan hi Central University dan palkehna ahi, tin aseibe in ahi.

 

PM-Kisan Scheme thu’a DC/CCpur in thuso miho kimupi

B.Lalboi Gangte

CCpur. Feb 13 (ET): Centre Govt. in India gamsung pumpi’a loubol miho panpi na ding’a Pradhan Mantri Kisan Samman Nidhi (PM-KISAN) Schems toh kisai in PM-Kishan hamphat pina lha seh’a Kishan credit Card (KCC) anei ding’u ahi ti ahi jeh in Pawan Yadav IAS DC/Ccpur lamkai nan Thangchinkhup Guite, AGM NABARD, Sothang Haokip Chief Manager SBI hon  DC Conference Hall, DC Office mun’a tunin CCpur District sung’a thuso miho anakimupi uvin ahi. Hiche Press meet achun lounei miho ading’a loan lah theina Kishan credit Card toh kisai mipi hetthei ding in tahlang na anei uvin ahi. Kisan Cradit Card (KCC) hi loubol miho panpi na ding’a Centre Govt. in August 1998 kum a ana patdoh ahi in loubol mihon phat chomcha sung’a amanchah thei ding sum leh pai hahsatna  aneikhah hou panpi na ding’a schemes kipan doh ahi tin DC/Ccpur chun aseiyin ahi. Tuchung’a vaihop natuh PM Modi in PM-Kishan apatdoh nung in PM Kishan hamphat pi loubol jouse in KCC aneileu ahamphat pisoh kei ding’u ahi ti ahi dungjui’a hitobang Special drive kinei ahi. Hiche nading’a PM Kishan hamphat pi jouse heng’a KCC peh hi ding ahi tinjong aseibei.

Hiche toh lhon’a Sothang Haokip in houlimna aneina’a KCC hi interest rate lhomcha bouva loubol miho ding’a loan lah thei na ding ahi. KCC apply thei na ding’a Bank jouse in Special camp anei ding nikho 14 alhin masang’a KCC apehdoh ding’u ahi. KCC hi loubol miho bou hilouva Animal Husbandry leh Fisheries farmer ho jong jaotha ahi. Gancha vah mi leh nga vah jouse in jong KCC ahamphat na um ho ahamphat pi thei ding chuleh KCC nei jou nung’a processing man, documentation, inspection leh charge chom chom peh ding um ho jao louva loan Dk. Lakh 3 chan amu thei ding ahi. Chuleh Bank chom chom in jong ama ama bank toh kijom kha PM Kishan neiho list aholdoh uva akisaipi department heng’a KCC anei theina ding uva akimupi ding ahi. KCC nei theina ding’a gam lekha leh loubol na mun’a muchi kitu ho lim lah ngai ding chuleh PM Kishan toh kijopna Bank Branch a hiche KCC ngaito thei ding ahi tinjong aseibei.

Hiche nachung chon’a India gamsung pumpi’a Dk. Crore 7 val loubol mihon PM-Kishan ahamphat po taovin ahi. Hiche bang chun CCpur District ajong loubol mi 37,399 in hiche scheme ahamphat pi taovin ahi. Kishan Credit Card (KCC) hi mi 4654 in ahamphat pi taovin chuleh Uttar Pradesh ah loubol mi Crore 1 val umna lah’a Lakh 67 val in Scheme ahamphat pi tauvin ahi. PM-Kishan hi PM Modi in India gamsung ah loubol miho gelkhoh na’a Feb. 24, 2019 ah hondoh na ananei ahi. Hiche hin atup hi loubol miho gimna akon hamphat pi thei nading tupna kibol ahi. Hiche schmes hi kum khat sung’a thum vei peh di Dk. 6000 hi ding  first installment ah Dk. 2000 hiding ahi.

Kerala Hospital akon Corona natvei khat kijendam ta

Thiru, Feb 13: Kerala gamsung a Corona natvei nei mithum ho chu kitupsel a vetkol ahi utoh lhon in janhi  chun mithum lah a khat chu hiche natna avei tahlou jeh in Alappuzha a um Medical College Hospital akon alhadoh tauvin ahi. Authority ho seidan in hapta khat tobang test kibolna resutl ho negative ahisoh kei in chule adam thengsel a het ahi jeh a kipot sah ahi in chule ani channa jong nikho sotlou a potdoh pai ding ahitai ati.

State Health Minister K K Shailaja in aseina chun apatdoh pa toh phone ah kaki hou uvin inmun a kijenna ho achai phatleh akimuto pi ding asei in chule hiche natna vei jen a pang doctor, para-medical staff chule adang dang ho chung a kipathu asei in ahi.

Feb 5 nikho chun Kerala gamsung a hiche natna vei mithum hetdoh ahi a kon chun gamsung mipiho kichihthei ding in state govt. in thuphon anei in chule pan nasatah in ala uvin natna vei ho hi China akon hung kinungle ahiuvin chule athum uva Medical simlai ngen ahiuvin tuni chan in jong govt. in hiche natna douna ding in pan ala jing in ahi.

Tule leh tu dinmun hin Kerala gamsung ah mi 2,500 tobang chu a inmun uva khumtup ahiu vin amau chu hiche natna vei leh veilo hetdoh nading a kholchilna kibol ahi in chule mi 30 ho chu hospital ah kholchil ding in aum uvin ahi. Hiche natna chung a state in nasatah leh gangtah a pan alah jeh uvin aching athem hon kipathu aphong uvin ahi.