Chief Minister leh State BJP president, National Vice President toh Imphal hung...

Chief Minister leh State BJP president, National Vice President toh Imphal hung kinungle, Ministry reshuffle umtei dinga ginchat um

88
0
SHARE

Chief Minister leh State BJP president, National Vice President toh Imphal hung kinungle, Ministry reshuffle umtei dinga ginchat um

Imphal, Sept 22(ET): Chief Minister N. Biren Singh leh BJP Manipur Pradesh President chu tuni chun National Vice President, BJP Baijayant ‘Jay’ Panda leh Rajat Sethi toh Imphal ahung lhung tauvin ahi. State lamkai teni hin PSO leh PRO jaona a janhi a chu Imphal dalha a special charter flight a New Delhi ana jot’u ahi.

Thulakhom ho a kon a kihe dan in Chief Minister leh State BJP President S Tikendra in centre lamkai ho aga kimupi najeh hi assembly seat phabep ong ho huhbit na dinga by-election ahungnai toh kilhon a Ministry sunga akinthei pen a kikhelna umsah ding hitei dinga ginchat ahi.

Thulhut kimu dungjui in Chief Minister leh BJP President in Central lamkai ho janhi nilhah lam chun aki mupi uvin, BJP suhhat ding toh kilhon in kihoulim na phatsot tah ana neiyun ahi.

Central lamkai langa kon in ministry sunga reshuffle umsah tei dinga kinepna aumtoh kilhon a kholjin a kondoh state mopo lamkai teni hi National Vice President Baijayant ‘Jay’ Panda toh hung kinungle khom’u ahidan thulhut chun aseiyin chuleh reshuffle hi nikhat nini jouleh hung um dinga jong ginmo ahi.

Thulhut dangkhat in aseina ah, government sunga minister thum tobang khel a BJP a kilalut thah ho minister panmun peh a hung um ding in jong ginmo ahi. Chuleh center in panmun thah mudinga adeisah ho sanpeh ahidan jong thulhut chun aseiyin ahi.

Xxxxxx

NSCN-IM hon 2016 kum a CM lui Ibobi anabulu nao thu NIA in kholchilna pankit ding

IMPHAL,  Sept. 22(ET): National Investigation Agency (NIA) hon achesa 2016 kuma Ukhrul District Hospital leh Power sub station hondohna kin agaman na a NSCN-IM hon Ex-CM O. Ibobi attack anabolnau leh Tengnoupal district hopsunga ambush leh attack kibolna a security personnel mi 3 in thina ato’u toh kisaiya case ana umsa chu avel in kholchilna chelha kit ding in case chu ahongdoh kit tauvin ahi.

Gah hetthei ding in achesa nisim 24th October, 2016 nikho chun Ex-Chief Minister Okram Ibobi Singh chu helicopter akon a akisajou thah District hospital leh Power Sub Station hongdoh dinga ahung kum lhah lhah chun NSCN-IM hidinga ginmo galguhbol phabep in thal in ana kap un hinla damsel in ana kihuhdoh in, apet pet in hichelai mun dalha in Imphal ana lejotpai tan ahi. Hiche thilsoh a hin escort personal khat ana macha in ahi.

Chuleh hiche kum mama December 15 nikho chun Ex-CM O. Ibobi in hondohna kingon khat aneiding toh kilhon a ROP a kikoi police personnel hochu Tengnoupal district hopsunga um Lokchao leh Bongyang kikah a NSCN-IM hon attacked ana bol uvin police 3 tah in thina anatoh un ahi. Thina ana toh hochu Yengkhom Jeevan of Thoubal Leishangthem Awang Leikai, Md Ayub Khan of Yairipok Ningthiunai leh LS Lenghir Charanga of Kharam Khunou ahiuvin ahi.

Ex-CM O. Ibobi attack kibolna toh kisai cases chu NIA Special court heng’a 13/7/2020 nikho a pehlut a ana umtoh kilhon a National Investigation Agency in kholchilna ahin nei ahi.

Xxxxxxxxxxx

Positive case thah 270 kimube toh lhon a Manipur a COVID-19 case 9,280 phata, thina toh 60 lhingta

Imphal,  Sept. 22(ET): Nidan 24 sunga Mikhat in thina atobe kit toh kilhon in Manipur a COVID-19 a thina toh agomin 60 aphatan chuleh positive cases thah 270 kimube toh kilhon in agomin 9,280 alhingtan ahi tin state health department thuphondoh chun atahlangin ahi.

Imphal West akon upa tehse kum 82 khat in Covid-19 leh natna chichom chom kitho in JNIMS a thina ana toh in ahi tin Common Control Room in aphongdoh in ahi. Chuleh natna nei kimube ho lah ah Central Armed Police Force 56 ajao in ahi. Milham 214 kimudoh lah ah mi 100 hi Imphal East akon kimudoh ahin, 54 hi Imphal West, 29 hi Thoubal, 7 hi Kakching, 6 hi Bishnupur, 5 hi Churachandpur, 4 hi tamenglong, Tengnoupal  Chandel akon mi 3 cheh, chuleh Kamjong leh Senapati akon mi khat cheh ahi tin thuphobdoh chun aseiyin ahi. Akimudoh ho lah a milham 205 hohi travel history neilou ngen ahiuvin ahi. Amaho cheng hi Covid Care   centres mun chom chom a koi ahi ngal un ahi.

Alangkhat ah, Covid care facilities chom chom a kon in mi 49 chu RT PCR test akibol jouva negative ahiutoh kilhon in discharged ana kibol in ahi. Tule tua adamdoh jat mong mong agoma 6521 alhin toh kilhon in recovery rate jong 74.21 ahitai.

Emergency case toh kisaiya mijousen anoiya phone number kipe hohi 24×7 a kihoumatpi jingthei ahi.

 Psychological Support Helpline Number 8787457035, 9402751364, 7629943596; Hospitalisation Helpline Toll-Free Number 18001032015 and Helpline Covid-19 Common Control Room Number – 18003453818  chuleh  mipi anom chan in umna mun a kon a doctors ho doh le sah neinom hon dohjing thei ding in niseh leh Sunday tailouva 10 am leh 3 pm kikah Google play a eSanjeevaniOPD app download ding ahilou leh website – www.esanjeevani.opd.in.release a lut a kidoh jingthei ahi.

Covid positive khat toh vangsetpi a kitoh khah na neikha hon akithei pen a chom umdoh ding chuleh Covid Control Room ahilou leh district CMO kijahmatpi a test kibolpai ding ahi tinjong state health department thuphondoh chun atahlang in ahi.

Xxxxxxxx

Amit Shah in akitepna ho atuhchah ding’a COCOMI in avel a phongdoh, Indo-Naga peace talk in Manipur gam asuhkhah ding leh agam mite dong masa hen tia jong sei

Imphal,  Sept. 22(ET): NSCN-IM leh Government of India kikah a kihouna amachal jing toh kilhon a achaina lam amano jing toh kilhon in NSCN-IM toh September sunga achaina sem hidinga thu kithang leh Naga group chom hotoh October sunga thuchaina sem hidinga ginmo ahitoh kilhon in Coordinating Committee on Manipur Integrity (COCOMI) in peace talk toh kisaiya Manipur territorial integrity suhkhah leh suhkeh hithei lou ding ahi tin avel in hetsahna lekha jihtho in Union Home Minister hengah pehlutna ana nei tauvin ahi.

Committee injong hiche avel a hetsahna copy chu Manipur Governor Dr. Najima Heptulla leh Chief Minister N. Biren Singh heng ah jong ana pelut un ahi. Hiche avel a COCOMI hetsahna lekha a chun aseina ah, Indo-Naga peace talk thua a achaina lam amano dan thu leh September sunga thuchaina sem himaithei dinga media report kimutoh kilhon in Manipur mite lungthim asukha lheh in ahi. Ajeh chu achesa 25 November 2019 Delhi mun a Union Home Minister leh COCOMI palai ho kihoukhomna a  Minister of State for Home Affairs, Central government noiya official phabep, Chief Minister N Biren Singh leh Education Minister Th Radheshyam pan na a kihoukhomna a chun kiloikhomna in Manipur gamsung neokhat cha jong Nagaland gamsunga umtheilou dinga doudalna kineiding, Pan Naga Cultural Body/Province/ territorial Council ahilou leh atum a kivaipohna Manipur gamsung a umtheilou dinga doudalna neiding thu ana kiphongdoh in ahi ati. Chuleh Committee in iti hamkhat a GoI in Naga flag neiding phatsah na ahin neikhah tahjong leh Nagaland sung bouva manchah hiding Manipur sunga kimangcha theilou ding, Manipur Legislative Assembly jong thuneina leh loupina sukeh thei ding dan leh thupeh thah ho leh kinoptona kisem ho kisang lou ding ahi ati.

Union Home Minister in ana phondoh ma banga Manipur state toh kisaiya seiding bolding aum a Manipur kiminphah na aum leh amasapen a Manipur sunga CSO ho doh jimasa ding ahi, GoI in agamsung mi dohchen na um masa louva thulhuh na imacha asemlou ding ahi, chuleh kihouna amachal jing dan holeh Manipurkiminphah naho a GoI in Manipur leh agamsung mite hetsahna abeijing diu ahi tinjong COCOMI in aphongdoh un ahi.

Commitee injong achesa 28th December, 2017 kuma Prime Minister of India henga Memorandum ana kipelut leh 25th November, 2019 a Union Home Minister henga Memorandum anakipe copy hojong enclosed anabol un ahi.

Lekha kipe in aseibe na ah, Manipur hi nam luitah leh thusim luitah leh kum 2000 val a hettheiya thusim jihtho a neite ahiuvin, chuleh 1834 apat a gamgi ana kisem ho koiman suhkhel toukhel abolthei louding ahi ati. Manipur state hi jat leh nam chom chom, chondan khandan chom chom, ham le pao chom chom leh hou leh bieh chom chom ho lungkhat leh thakhat a kicham tah a chenkhomna mun ahi in, jat le nam chom chom kilungtih tah leh kichamdel a chengkhom ho kikah susethei ding natoh leh thilgon ho kisangthei lou ding ahi.

Thinglhang leh phaicham kikah ah British ten divide and rule policy mangcha in khenna ana sem un Article 371C in doudalna in ana um in ahi. Kum sot tah kiguijopna chu jat le nam khentum NSCN-IM in ahinsem a kon in suhset in ahung umpan in ahi. Tule tua a chelha jing kihouna hi achesa nisim 27th July, 2001 kum a Prime Minister Atal Bihari Vajpayee in official tah a phonlhana ana nei bang in Nagaland state sung bou huom hen tinjong ngehna aneiyun ahi.

Tua chelha jing peace talk hi NSCN-IM toh neipan anahi in, tun NNPG jong huoptha in aum kit tan ahi. Chuleh state dang dang ahin suhkhah bebe toh kilhon a Manipur jong lhimlhah ahung hi a agamsung suhkhahna ahung um jat leh nam chom chom akon a galvon choiya kiphinna ahin lhut thei ahi. Nagaland sunga Naga jouse huop ding a kingeh Naga national flag leh Pan Naga Cultural Body chuleh Territorial Council  ho semdoh ding tihi adeh a akinaipi Arunachal Pradesh, Assam leh Manipur state ho in hatah a doudalna aneijing in, atumbeh a flag nei ding phalpeh ahiu jong leh Nagaland sung bouva kaipal hiding, state danga kaipal hithei lou ding ahi. Chuleh Constitution a First Schedule dungjuiya Manipur territorial boundary leh Constitution a amendment of Article 3&4 dungjuiya venbit hiding in jong ngehna aneiyin ahi. Pan Naga Cultural Body hin aloutheilou a politics a SGPC ana umsa banga hung kigo lut diu, gam leh nam a dei umlou thil ahin boldoh thei ahi. Centre in jat leh nam kikah a kiloikhomna leh dan atumbeh abol louding injong COCOMI in ngehna aneiyin ahi.

Modern political history of India in eihil bang uva Territorial Council ahung kisemdoh leh state thumna hung kipan kit ding ahi chuleh Kuki ten jong akibahpi Council ahin thum kit tei ding ahi. Atumbeh a  Jat le nam khat dinga Territorial Council kisem ding hin jat leh nam khen na ahin lhut ding ahi. Indian Constitution Sixth Schedule noiya kivaihomna ipi hijong leh kisangthei lou ding ahi. Final agreement hi Nagaland a um Naga te ading bouva dinga umsah hiding ahi ajeh chu Naga plebiscite of 1951, in Manipur ahuopkha pon ahi ati.

Xxxxxxxxx

World Rose day nikho kiman na a Minister Radheshyam in Cancer nat na a kijen ho kimu pi

Imphal, Sept 22(ET): Radiation Oncology Department leh RIMS tohgon na noi a Imphal a World Rose Day 2020 kingon tunichun man ahi.

Education, Labour and Employment Minister Shri Thokchom Radheshyam in Regional Cancer Institute leh Regional Institute of Medical Science (RIMS) a cancer patient ho vilna jong anei ahi.

Hiche World Rose Day hi Canada mi numei chapang kum 12 Melinda Rose hetjing nadinga September 22 hi ana kigong ahi. Melinda Rose hi Askin Tumour kiti blood cancer jat khat ahi in hitobang cancer hi alhom lheh in mudoh ana hi khapon ahi.

Hitobang natna anei jou a jong amahin lung lhalou hel a natna chom chom neiho jong akipa nadiu ngaito mi khat ahi.

Radheshyam in function ah chun doctor hohi patient hodinga a Pathen tobang ahi e, ati. Doctor hohi midang in amuthei lou, ajah theilou a patient ho chung a natoh pha tong jing ahiuve.

Aman aseibena ah mipi hon Doctor hohi ginchat lou a thilsoh aum phatleh oimo na mohpeh loudin temna jong anei in ahi.

Minister chun cancer patient ho kom ah Rose jong ana homdoh e. Aman Radiation Oncology Department a simlai Post Graduate hotoh jong ana kimutopi ahi.

Prof. A. Santa Singh, RIMS Director, Prof. Arun Kumar Singh chuleh Department sunga Professor ho leh Post Graduate simlai leh Department sung a staff hojong hiche function ah chun apang uvin ahi.

Xxxxxxxxx

Nute hi Society tingpi gu ahi: Health Minister

Imphal, Sept 22 (ET): Shri L. Jayanta Kumar Singh, Health and Family Welfare Minister in minu hohi society tingpi gu ahiuve tin asei e. Society kiti hi thil neocha cha ajop mat ahi tin Minister chun aseibe e.  Kwakkeithel Konjeng leikai, Imphal West in agondoh Poshan Maah kingon a Jin-Gun a pang ahi. Jayantakumar in aseina ah mi jouse hi nute a kon a hung kipan ihi sohkei uve, ati.

Minu ho adamthei uva ahileh chapang damthei kisep doh ding hiche chun society adamsah ding ahi, ati.

Social Welfare Department injong minu leh chapang ho damthei nadinga panmun lentah anei uve tinjong aseibe e. Minu ho damthei nading gelkhoh najeh a hiche Poshan Maah hi kigong ahi tinjong aseiyin chule hiche lolhin thei nading a khat leh khat kihet themto angai e, ati.

Government in Welfare scheme agon hojong phatah a chelha hinam vetsui ahi jinge, ati.

Minister chun AYUSH department ho natoh akipapina thu aseina ah, mipi hetding a  hitobang awareness ahinbol u hi pachat umtah ahi, ati.

Chuleh official hojong kitah tah a natong din tepna anei in ahi. Hiche function ah chun Chief Executive Officer, SMPB, Manipur, Dr. Guneshwor Sharma chu Guest of Honour a pang ahi. Hiche function ah chun AYUSH Department holeh MSPB department hojong apang un ahi.

Xxxxxxx

June chan a migrant worker in jon crore 1 aval e tia government in Parliament hetsah

New Delhi, Sept 22: COVID-19 toh kimat lockdown umsung  March-June kikah a migrant worker in jon crore 1 aval e tin government in tunichun Parliament ahetsah in ahi.

Hiche hi Minister for Road Transport and Highways, V. K Singh in jihtho a Lok Sabha ahetsah ahi.

Labour and Employment Minister data chun keng a lamjot a ana kile mi crore 1 aval e tia asei ahi. Chule March-June kikah a national highway a tosetna 81,385 umlah a thina toh mi 29,415 ahidan jong Parliament ahetsah ahi. Lampi tosetna a mollem jouse melchih ahi in lockdown sung a migrant worker lampi tosetna a thina toh ho atumbeh a melchih ahipoi, ati.

Migrant worker ho umna, gena, touna le neh le chah phatah a gonpeh dia MHA in state le union territory ho aphatseh a hilchahna apeh jing ahi.  Hitolhon a lou le ai,  neh leh chah, donding tui chuleh angaicha ho kengchot geiya gonpeh ahiuve tin asei e. MHA in April 29, 2020 leh May 1, 2020 a order aso dungjui a migrant worker ho inlam achena diuvin bus leh Shramik Special Train  gotpeh ahiuve tin Minister chun aseiyin ahi.

Xxxxxxxx

Moreh sung veng phabep a kithopina kipe

Tengnoupal, Sept 22(ET): Lamboi Gangte, member, Moreh (C) Autonomous district council, Chandel in tuni in Moreh ward no 5 Muslim basti le Moreh ward no 6 Nepali basti a um tahlal innsung phabep ang a kithopina anape in ahi. Hiche kithopi na chu polictics toh kisuh meh na ima aum pon, covid boina toh kisai a kithopina kipe ahi tin MDC pa chun asei in ahi. MDC pa chun tahlal insung phabep ang a anchang, dal, thao le adang dang manbei in ana hom in ahi. Hetthei khat chu Muslim Basti akon insung khat covid positive ana hi utoh lhon a alhangsung containment zone a phondoh na ana kinei ahi. Hitabang a containment zone phondoh na ana kinei khum jeh a mipi in genthei ato toh lhon a atah lal ho kihtopina kinei ahi tin MDC Lamboi Gangte chun asei in ahi.

Xxxxxxxxxxxxxx

Manipur a left party hon Farm Bill douna a kiphinna tosot ding

Imphal, Sept 22(ET): Manipur sung a left party CPI, CPI(M), AIFB le RSP ho in tuni a kihou na ana nei utoh lhon in BJP government in farm bill ana sem u demna ahin nei uvin chuleh ahunglhungding Sept nisim 25 nikho a bill chung chang a kiphinna kinei ding tosot na anei ding dan u phondoh na anei uvin ahi.

Parliament a bill kipass na chunga thilsoh ho demna anei utoh lhon in hitobang natoh hi democracy toh akito lou dan le Manipur a jong CM Biren Government chung chang a vote of confidence kibol na thilsoh toh kibang a natoh na anakinei dan ho tahlang na ahin nei uvin ahi. MP 8 lam suspend kibol na chung a jong demna ahin nei utoh lhon in hitabang natoh hin gamsung a kibung khen na ahin so sah ding ahi tin left party ho chun hetsah na anei uvin ahi.

NDA makai na right wing govt jong tu le tua akibung khen dan le Harsimrat Kaur Badal, Union Cabinet Minister, Food Processing in apanmun akon Modi makai na natoh deilou jeh a haina anei dan jong tahlang na ahin nei uvin ahi. Hitobanga gamsung kivaihop na daanpi sukeh a natoh na kinei hi mipi in demna anei u angaidan hetsah na ahin nei utoh lhon in  mipi in phate a govt douna anei na ding uvin jong hetsah na ahin nei uvin ahi. Kiloikhomna ho in bill chung a hetsah na ahin neina uva bill ki pass teni hin India sung a loubol ho asuh genthei ding, sumkol lentah a vei ho in lou ga ho kichep na anei ding u chuleh neh hah na le mipi boina hung soh ding ahi ati. Mipi ang a neh le chah hop chung chang a jong boina lentah hung so ding dan tahlang na jong kiloikhomna ho in ahin nei uvin ahi.

Manipur sung a party jouse in hitabang bill kisem na chung a kiphinna hin nei All India  Kisan Sangarsh Coordination Committee tosot na anei cheh uva, ahunglhungding Sept 25 nikho a kiphinna kinei ding hi atosot cheh ding uvin temna ahin nei uvin ahi. Left party ho in party dang dang le lou bol hotoh kitho a hitabang natoh na chung a kiphinna neina ding toh kisai a kihoukhomna anei ding dan u jong hetsah na ahin nei uvin ahi.

Xxxxxxxxxxxxxx

Opposition ho kiphin hin Covid daan apalkeh e: Kerala CM

Kochi, Sept 22: Kerala sung a opposition ho in kiphinna anei uhin Covid daan apal keh in hiche jeh in sepai 101 lam jong covid positive ahilo taovin ahi tin Kerala Chief Minister Pinarayi Vijayan chun tuni in ahin sei in ahi. Hetthei khat chu opposition ho in Kerala pumpi a kiphinna anei jing lai tah u ahi. Kerala CM pa in thuso miho toh akihoulimna a covid positive sepai chu deputy superintendent, inspector, sub-inspector, assistant sub-inspector, senior civil police officer le civil police officer ho ajao uvin ahi ati. Hiche police officer hotoh hung kitong kha ahi lou le umkhom sepai 171 lam jong quarantine a akikoi dan tahlang na ahung kinei in ahi. Chief Minister pa in ahoulimna a WHO in Covid-19 akon kivendoh na hi mipi kipumkhomna umsahlou aphapen ahidan tahlang na ana nei utoh lhon a hitabang tohgon hung kigong a sepai hijat positive hung ki hisah hi vangset umtah ahi tin ana sei in ahi. Congress le BJP makai na opposition party ho hin state sung a Higher education minister KT Jaleel in apanmun angahding deisah na a kiphinna ana nei jing u ahi. Minister pa chu FCRA toh kisai a NIA in achungthu akholjing ahi toh lhon a apanmun akon lahdoh ding a opposition ho in kiphinna ana nei u ahi. Minister pa chu sana a kivei a jong ngohna ana kinei ahi. Thuso kimu dungjui in hiche kiphinna nei ho hin covid SOP apalkeh jing uvin ahi akiti. Hetthei khat chu state capital Thiruvananthapuram akon a covid case hung punbe jing toh lhon a hitabang kiphinna akon a hung tam be cheh ding kichat na ana um jing ahitan ahi. Chief Minister pa in party lamkai ho ang a kiphinna nei ho injong daan palkeh lou a natna um ho akon kiven na ding dan toh kisai a kiphinna anei na ding uvin temna ahin nei in ahi.

Xxxxxxxxxxxxxxxx

Jiribam hospital a medical staff  kininglhinglou

Jiribam, Sept 22: All Jiribam United Clubs Association (AJUCA) in lupna 50 umna Jiribam hospital a medical staff kininglhin lou na chung a govt moso na ahin nei uvin ahi. AJUCA vice-president M Premchandra in thuso miho toh akihou limna a hiche thu chung chang ahi kiloikhomna in govt ang a hetsah na avel vel a anei ahitah vang a ima akibol loudan tahlang na ahin nei in ahi. Hospital sung a x-ray le ultrasound  la ding mi jong aumlou dan hetsah na ahin nei in ahi. Hiche technician ding ahung kisol dan hetsah na akinei vang in hospital a jopna ahung nei u akihet khah loudan jong tahlang na ahin nei  in ahi. Premchandra in asei na a gynaecologist khat hospital ahin ahung kisol in hinlah hetsah na le ajeh beihel in district chom a ana kisol kit tan ahi ati. Hitabang natoh govt in abol jing hi demna sangtah akinei in, tu nat hahsat kisei jinglai a district sung a mipi in hospital anei sun u kijan na thei lou ahi hi vangset umtah ahi tin jong tahlang na ahin nei in ahi. Covid jeh a state dang kisung lha theilou ahi toh lhon a district hospital tilou mundang umlou ahin, ultrasound scan na ding mei mei a Silchar jon uhen tiuham tin Premchandra chun govt dohna ahin nei in ahi. Premchandra in asei be na a district dang a doctor le staff dang ho vat thu akisei teng govt in agan na thei pen in solpeh na anei ji uvin hinlah Jiribam ahi achuti pon ahi ati. Akin thei pen a mipi ho boina ho hetpeh a vaipo ho in angaicha staff ho ahinsol ding uvin jong kiloikhomna in hetsah na ahin nei uvin ahi.

Xxxxxxxxxxxxxxxxxxx

Imphal a International day of peace ana kimang

Imphal, Sept. 22: International day of peace chu jani in Lions Club Imphal City United in western gate, Kangla fort a “Shaping Peace Together” kiti thupi noi in ana mang uvin ahi. Kingon toh kisai in vakhu ni ana kilha doh in chuleh che le vah le gari ho a sticker ana kibeh peh in ahi. Hiche kingon chu Club President Lion Naorem Daljit Singh makai na noi a ana kimang ahi.

Xxxxxxxxxxxxxxxxxxxxxxxxxx

Leimakhong area Airtel network hoilou jeh a mipi lungkimlou

Kangpokpi, Sept 22(ET): Kangpokpi district hopsunga um Leimakhong hill town leh akimvel a Airtel network akisuh lou jeh in agamsunga cheng hon gentheina tamtah athoh utoh kilhon in  Leimakhong Vangkho Group (Whatsapp group) LEVA-Group hon lungkimlou na thusodoh anabol un ahi.

Thusodoh kimu in aseina a chun network hoilou jeh a nitin kimanchah na asuhboi keu hilouvin adeh a tulai Covid-19 natna jeh a themjilna mun jouse ahung kikha toh kilhon a simlai ho kihilna dinga internet mangcha a website, apps leh social media mangcha a online class kibol ahitah jeh in simlai hon aha manchah pen airter network lunggel toh abangpon hiche jeh in agamsung mipi ten genthei hahsatna tamtah akitoh tai ati.

Thusodoh in aseibe na ah, network hoilou dan kholchilna akinei toh kilhon in Airtel tower um hin apohjou lou ahidan mudoh in aum in ahi. Customer tamval tah jeh in apojou tapon, hiche sanga lenjo leh suhpilhing angai in ahi. Hichetoh kilhon in Airtel Nodal Officer North East Region leh corporate officials ho heng’ah suhpilhing jep ahina ding in avel vel in ngehna ana kineijing in ahi. Hinla ngehna kinei ho ngaisah in anei pouvin, khat le khat akingohto jing un ahi. Internet connection speed jong kingainathei ahipon ahatpen in 1Mbps jong alhingjou jipon ahi. Phatseh in bill akipe jing in phatchomna beiyin mipi kivahnop na in anei jing un, hitobang hi sumkolveina theng leh kilom ahipoi tinjong LEVA-Group thuphondoh chun atahlangin ahi.

Tulai chihna asan chehcheh toh kilhon a 5G speed mangcha jong um ahitan hinla Leimakhong hill town leh akimvel a um hon 4G speed jong akisei bang in aki mangcha theipon ahi. Hijeh chun akisaipi amopo holeh state government in akinthei pen a ngehna kibol ho adonselou uva, suhbulhit ahi lou leh LEVA-Group in khongailou hel’a bolthei chan kibol ding ahi tinjong aphongdoh un ahi.

Xxxxxxxxx

Kum 2015 a pat PM Modi in gam 58 avilna a crore 517 mangdoh

New Delhi, Sept 22: Rajya Sabha in dohna anasem dungjui in government chun report apeh na ah  Prime Minister Narendra Modi in kum 2015 a pat gam 58 avilna ah crore 517 amangdoh e tin jihtho in government in tunichun Rajya Sabha ahetsah tan ahi. Modi hin United States leh Russia vel 5 cheh ana pha in, China jong border thu leh eastern Ladakh thu jeh in vel 5 anavil e tin External Affairs Minister V. Muraleedharan chun aseiye.

Mr Muraleedharan in aseibe na ah Modi in Singapore, France, United Arab Emirates chuleh Sri Lanka hojong ana pha e, ati.

PM in visit anabol naho hi multi-nation trips, chuleh bilateral visit ahi in asum a lutjat chu Rs. 517.82 crore alhinge tin report a chun aseiye.

Prime Minister in avil nukhah penchu 2019 kum a Brazil ahi e, ati. Hichu BRICS (Brazil, Russia, India,China, and South Africa) Summit ahi, ati. Modi chun Thailand jong anavil ahi.

Hinla coronavirus pandemic jeh a lockdown umsung 2020 kum sungin vang PM Modi hin gamdang vilna ana neithei tapon ahi.

Muraleedharan chun aseikit na ah hitia PM kholjin hin India bilateral, regional chuleh global issues ah gamdang hon hetthem na anei uve, ati.

Hiche vilna ana neiho hin economic relations, trade, investment chuleh technology lampang ahi in, expenditure chu Rs 9.11 crore analut jouve, ati.

FDI (foreign direct investment) lam jong Modi khojinna in asemhoi e ti ahivangin, opposition hochun expenditure lutdan ho ana deipouvin ahi. 2019  April leh May a national election um masanga ana kholjin a jong Rahul Gandhi in demna ana nei ahitai. Gandhi in Farm sector a boina ho vetup lou in akholjin e tia demna ana nei ahi. Hinla BJP in hiche election a chun goljona ana nei ahi.

Xxxxxxxxxxx

‘Village Authorities on Forest and Wildlife Conservation’ ti thupi mang a One Day Workshop ana um

Chandel, Sept 22(ET): Nature Learning Center, National Mission on Himalayan Studies (NMHS) leh Ministry of Environment and Climate Change, Government of India tohgon na noiya Divisional Forest Office Chandel chun Village Authorities on Forest and Wildlife Conservation ti thupi mang in one day workshop tunichun achelha in ahi.

Chandel Forest Division, DFO N. Ganesh, Mahendra Pratap, Retd. CCF chuleh St. Rithung Anal, Chandel SDO  hochu Presidium Member panmun alo un ahi.

Mihil a pang Mahendra Singh in “For Village Authorities on Forest and Wildlife Conservation” ti thupi mangcha in houlimna anei e. Forest and Activities of Department ti thupi ah DFO Chandel N. Ganesh in houlimna anei in,  Jhuming Cultivation  thupi ah ACF Chandel S. L. Niang Thianhoi MFS in houlimna aneiyin ahi.

Hiche workshop chu Chandel sunga housa holeh DLO Horticulture and Agriculture department Officer chuleh CSO ho jong apang un ahi.

Xxxxxxxxxxxxx

Ranjan kithana thu’a mona nei khat chenna inn mipin nokhum dia agot Police hon ana vengdoh; Khuga Tampak area 144 CrPC kikoi

B.Lalboi Gangte

CCpur. Sept. 22 (ET): Arambam Ranjan kithana chung’a lunglhai lou mipin tunin tolthat’a kigol kha CCpur Police in anamat K. Soman chenna inn ana bulu got jeh uvin Police in boina so sang sah louvin K. Soman insung mite anapuidoh uvin ahi tin thulhut chun aseiyin ahi. CCpur Police in (L) Arambam Ranjan Meetei kitha na’a kimang cha pistol leh meichang kikapdoh loulai anamudoh toh lhon’a Writers Safeguard Group atong mi 3 in anatha uva sum Dk. Crore 1.15 anapohmang’u ahidan ahedoh tauvin ahi. Hiche WSG a natong mi 3 hochu Khongkham Brojen Singh (40) S/o (L) K. Sahen Singh of Bamon Kampu, Imphal East, V. Thangkhanmuan (40) S/o (L) V. Tunkhokam of V. Munhoih, CCpur leh K. Somen Singh (36) S/o K. Achouba Singh of Khuga Tampak, Zoveng, CCpur ho ahi.

Alangkaht’a Police hon thudoh anei nao’a akon hiche a akimandoh ho lah’a Khongkham Brojen Singh in Ranjan tha na ding leh sum guhmang na ding lunggel nei’a tohgon anei dan leh thal (pistol) apohdoh ahi dan aphongdoh in ahi. Chuleh Brojen Singh in thal apohdoh chu K. Somen Singh leh V. Thangkhanmuan in achoi lhon’a anakap lhon ahi. Brojen Singh in a min a um 0.32 Caliber revolver (pistol) Ranjan thana ding’a chang 6 toh apeh tha ahidan jong atahlang in ahi. Hiche thal chu K. Somen Singh in amanchah jouva  ATM booth kimang talou sung’a anasel’a achesa Sept. nisim 4 nikho’a Brojen Singh in ATM booth sung’a kon analadoh’a Bamon Kampu, Imphal East achenna inn a anasel ahi. Chu jouvin Police in amahi achesa Sept. nisim 8 nikho’a anamat uva thudoh anei nao akon ima jouse ana phondoh toh lhon’a achenna inn a anasel thal leh achang kimang loulai ho CCpur Police in anamudoh ahi. Hiche naban’a amaho cheng hi achesa Kum 5 sung’a ATM a koi ding Dk. Crore 2 val kiguhmang nachung’a jong kigolkha anahidan’u CCpur Police in anahedoh in ahi.

Hetthei khat CCpur Police in hiche thu phondohna anei toh lhon’a  mipi lungsou hon tunin K. Somen Singh inn (Zenhang Lamka) anabulu go uvin Khuga Tampak Youth Club panlah nan mipi lungsou ho anakham uchu anakham joulou phat uvin CCpur Police in apet pet in thilsoh namun anadellut pai uvin boina imacha um man louvin mipi ho anocheh uvin ahi. CCpur Police in K .Somen insung miho mun chom’a apodoh uvin chuleh thilsoh phalou lhun ding venna in District Magistrate in Khuga Tampak sung 144 Cr.Pc aphongdoh tan ahi. Toltha na’a kigol Brojen chu tunin Police in Chief Judicial Magistrate (CJM) Court, Tuibong a adinsah uvin Court in nikho 15 sung (Oct. 6, 2020) chan Judicial Custody a um ding in thutanna ananei in ahi.

Achesa Sept. nisim 8 nikhon (L) Arambam Ranjan kitha nathu’a Police in ginmo jeh’a in Huidrom Sanjit Singh (38) S/o (L) Huidron Rajen of Laipham Khunou Mayai Leikai, Laipham Siphai, Imphal East thudohna anei uvin ahin ajing (Sept. 9) nikhon PR Bond in analhadoh pai uvin ahi. Ahin Sept. nisim 18 nikhon achenna inn bathroom sung’a athisa in mudoh in anaum in ahi. Chuleh Ranjan kitha natoh kisai’a sum kigumang Dk. Crore 1.15 chung thu Police in kholchilna anei nung uvin jong akigumang sum ipi dinmun’a um ham ti phondohna anei naipouvin ahi.

xxxxxxxxxx

ADC/CCpur in District sung’a saa man khan nachung’a kihoukhomna ananei

B.Lalboi Gangte

CCpur. Sept. 22 (ET) : Churachandpur District hopsung Tuibong a Chairman,ADC/CCpur office chamber mun’a tunin CCpur District sung’a saa (meat) man toh kisai’a kihoukhom na ananei uvin ahi. Kingon achun ADCC lam akon in T. Paukhanlian, Chairman, ADC/CCpur, P. Kamkholal EM/ADCC, Paolal Haokip, Vice Chairman ADCC, Lalthazam MCS CEO/ADCC, Mannuamching IAS DC/Pherzawl chuleh CCpur Cattle Rearing-cum-Meat Processing & Marketing C/S Ltd. lamkai ho jong pan anala uvin ahi.

Hiche toh lhon’a ADC/CCpur in Imphal, Moirang, Kwakta leh District chom chom akon’a saa, nga, ahsa, bongsa, vohsa leh adang dang kijohna jat akaikhom uvin chuleh saa joh naleh atena ding’a kimang ser kimkhat agih dan dihlou jong um ji ahidan ADCC in atahlang in ahi. Chuleh adeh’a bongsa cho nom jouse in aphe achoh nom phat uleh  agu toh alahkhom tei tei ding ti umsah tahlou ding ahi. CCpur District sung’a hi nopni hihen dani hi jong leh saa hi apoimo pen khat ahitoh lhon’a saa man tam asahjep dan’u aphongdoh in ahi. Alangkhat’a Covid jeh’a thil-man nasatah ahung khan naban’a saa joh na toh kisai’a ADCC noi’a license neilou jouse DC/CCpur toh kithokhom nanoi’a vetlhah na anei ding chuleh CCpur Cattle Rearing-cum-Meat Processing & Marketing C/S Ltd. lamkai ho toh Dist. dang ho’a rate toh CCpur Dist. sung’a rate ding aseikhom uvin ahin kithulhuh na kicheh tah ananei theipouvin ahi.

 Xxxxxxxxxxxx

Mizoram a Covid +ve case thah 107 kimudohbe; agom’a case 1,692 lhingta

Aizawl, Sept. 21 : Mizoram a nidan 24 sung in Covid +ve case thah naosen lha 2 panna in mi 107 anakimdoh toh lhon’a agom’a case 1,692 alhing tan ahi tin thulhut kimu chun aseiyin ahi. State Information and Public Relation Department akon thulhut kimu dungjui’a nidan 24 sung in Zoram Mdical College (ZMC) mun’a RT-PCR machine mangcha in sample 759 vel test akibol ding, District Hospital mun chom chom akon in TrueNat machine mangcha in sample 87 test akibol ding chuleh Rapid Antigen Test Kits (RAT) mangcha in sample 1.059 test anakiboldoh in ahi akiti.

Hiche toh lhon’a ZMC mun’a sampel 759 test kibol nalah’a 106 +ve ahin chuleh Rapid Antigen Test akon mi khat akimudoh in ahi. Chuleh Covid +ve kimudoh case 107 hi Aizawl akon ngen ahi. Health Department dungjui’a Mizoram a active case 680 aum nalai in chuleh Covid natna akon damdoh 1,012 alhing tan ahi.

xxxxxxxxx

District level a ding’a DFWO CCpur Dr. Paulunmang Vaiphei in NDD leh IDCF 2020 hondoh nanei

B.Lalboi Gangte

CCpur. Sept. 22 (ET) : District Health Society (DHS), Churachandpur leh Integrated Child Development Services (ICDS) Project, Churachandpur kithokhom nanoi in tunin Hill Town Community Hall, Thangjam Road mun’a Dr. Paulunmang Vaiphei, DFWO Churachandpur in National Deworming Day (NDD) leh Intensified Diarrhoea Control Fortnight (IDCF) 2020 District level a ding in hondohna ananei in ahi. Kingon na phatsung’a DFWO Dr. Vaiphei in chapang ho kum seh’a sungkho’a thina toh tamtah um jing toh lhon’a hiche ho suhbei na ding’a Centre Government in National Deworming Day leh Intensified Diarrhoea Control Fortnight hi ahin patdoh ahi.

Hiche hin naosen akipat chapang kum 14 chan hopkha hi jong leh kum 19 chan hutlou peh ding ti ahi. Kum dang dang chun School ho’a hutlou peh ana hi jong leh tulai Covid-19 jeh’a School jouse kha ahitoh lhon’a ASHA leh Anganwadi Worker ho mopohna peh in aum in ahi. Hiche na ding’a amaho inn cheh’a lut’a hutlou ahopdoh ding’a ngense na kinei ahi ati.

Hiche toh lhon’a kingon phatsung in Resource Person Dr. Jire Pudaite, District Nodal Officer (Child Health), Churachandpur in kichuhna anape in chuleh NDD leh IDCF 2020 hi ahung lhung ding Oct. nisim 5 chan chelha ding ahi. Hiche sung’a hi ASHA leh Anganwadi Worker hon house-to-house visit abol ding’u chapang hutlou nethei ding ho jouse kom’a Albendazole table leh ORS manbei’a apeh ding’u ahi. Albendazole tablet leh ORS hi CMO Store, Churachandpur mun’a jing ( Sept. 23) nikho akipat akilah pan thei ding’u ahitai tinjong hetsah na anei in ahi.

Xxxxxx

India a Covid +ve case Lakh 55 val ta; nikhat sung’a mi 1,01,468 damdoh, recovery rate 80.86% a kal

New Delhi, Sept. 22 : India a Covid-19 natna anitin’a apunbe jing toh lhon’a tuni (Sept. 22) chan’a Covid-19 +ve case Lakh 55 aval tan chuleh nikho khat sung’a ding’a record in Covid natna akon adamdoh 1,01,468 alhing in ahi. Hiche toh lhon’a Covid akon damdoh nanei agom’a 44,97,867 alhing tan ahi tin Union Health Ministry data akon akimudoh thei in ahi.

Alangkhat’a nidan 24 sung’a Covid +ve case thah 75,083 akimudoh toh lhon’a India a agom’a case 55,62,663 alhing tan ahi. Hiche natna akon thina toh tuni jingkah nidan 8:00 chan’a data dungjui in 88,935 alhing tan ahi. Chuleh active case 9,75,861 aum nalai in ahi.

Hetthei khat chu India a achesa Aug. nisim 7 chan’a Covid +ve case Lakh 20 aval in, Aug. nisim 23 chan’a Lakh 30, Sept. nisim 5 chan’a Lakh 40 chuleh Sept. nisim 16 nikhon Lakh 50 aval tan ahi. Indian Council of Medical Research dungjui’a  Sept. nisim 21 chan in sample 6,53,25,779 tested akiboldoh tan chuleh janni (Sept. 21) nikho seh seh chun sample 9,33,185 tested akiboldoh in ahi akiti.

Xxxxxxxxx

ICRS, I/W District tohgon nanoi’a blood donation camp anakibol; Feb. lhasung’a kon thisan Unit 207 donated boldoh

Imphal Sept. 22 :  Indian Red Cross Society (ICRS), Imphal West District branch in gamsung’a Covid-19 natna ahung um doh akon thisan ngaicha hon boina hahsatna ato nalou ding uvin achesa Feb. lhasung’a kon tuni chan’a blood donated abol jing uvin ahi. ICRS, Imphal West District branch Chairman Dr. Koijam Arunkanta in aseina’a society hin achesa Feb. lhasung’a kon tuni chan’a thisan ngaicha ho in boina ato nalou ding uvin thisan donated akibol jing in ahi ati.

Hiche toh lhon’a janni (Sept. 21) nikho chun society in Department of transfusion medicine, RIMS mun’a one-day voluntary blood donation camp ana kibol in ahi. Chule camp chu Chairman ICRS, Imphal West District vetsui nanoi’a Vice Chairman Manipur State branch leh Medical Superintendent, Regional Institute of Medical Science, Dr. Ch Arunkumar ho toh kithokhom nanoi’a ana chelha ahi. Hitobang genthei hahsa ho kithopi nading’a voluntary a kipedoh aum jing nading in temna jong anei in ahi. Janni (Sept. 21) camp kibol na’a chun thisan unit 13 donated anakiboldoh toh lhon’a agom’a Unit 207 donated akibol akiboldoh tan ahi tin ICRS Chairman chun atahlang in ahi.