CHAVANG-KUT MANDAN VELVET’A SEMPHAT ANGAITAN AHI

CHAVANG-KUT MANDAN VELVET’A SEMPHAT ANGAITAN AHI

327
0
SHARE

CHAVANG-KUT MANDAN VELVET’A SEMPHAT ANGAITAN AHI

Thanglam Manlun NGV.

Chavang kut, Kuki nam-mite ding’a golnop lenpen’a ineiyu hi aphatcha semphat’na ineilouvu leh khonung teng kisihna hunglhung ding’in akilang’in ahi.
CHAVANG KUT MANNA DING’A KIGOTNA :- Tukum chavang kut manna ding’a mun chom chom tichu District ineihou jouse’a kigotna ineicheh’u hi aphatna khat ahi. Ajeh chu state level seh seh inganse jing’uva kumseh’a 1st MR ground a iman jing’u hin lung-gel chom chom akondohsah keu hilouvin chavang kut hi anei kihelou festival khat asosah gotan ahi. Chavang kut kiman dan leh akiboldan adih adihlou thu kaseinom ahipon chavang kut anei umlou dan’a aumdoh’a khonung teng boina theiding dinmun’a aumpahi aphat cha isuhtoh diu deina thu kaseinom joh ahi.
GOLNOP (FESTIVAL):- Leiset chung’a cheng nam jousen ama ama nam chonna a golnop aneisoh kei ahi. Hiche golnop ho chu agam vaihom (govt) in hetpehna anei leh aneilou jong aumin ahi. Eiho manipur contacts a seidin Naga te’a din Luingai-ni ahin, Kuki te’a din Chavang kut ahi, chuleh Meitei te’a din Ningol chakkouba le sangai festival ahi. Hiche golnop hohi ama ama nam-in anam chonna akichintup nading’a govt. in eihetpeh’uva General holiday list’a jong eikoipeh’u ahi. Hiche toh kilhon chun nam-dang tenvang agolnop’u akichintup jouvun Kuki nam miten vang ikichintup joupouvin jalhang golnop dan’in aumdohtan ahi.
STATE LEVEL KUT COMMITTEE :- State level Kut committee ahung kisemdoh dan hetthuhna kaneipon hijong leh ahung kiphudan ahidingdol khat gahseileng Chavang kut Manipur govt. hetpehna ding’a pan anala aumtalou Pu Major Pagin, Pu Holkhomang Haokip leh adang dang ho chung’a ikipa soh keidiu katahsan’in ahi. Hiche phat laiya chu kivaihopna kitup ineilou jeh’uva lamkai masahon Manipur Govt. a kon sanction analah’uva Chavang kut golnop imanji’u ahi. Ahin, tulanghin ivetleh govt. kithopina ilah’u hi aphatmona umjo dan’in akilangtan ahi. Ajeh chu Manipur Govt.in fund sanction abol ahijeh’in ichenkhompi’u Meilhei hon thaneina ichanham ahin neidoh nau dan’in aumdoh tan ahi. Hijeh’a chu Chavang Kut mandan athah’a gelphat phat hitading ham ti’a kasei ahi. Lamkai masahon aphading tia eina bolpeh’u ahin ikipapi’uvin ahi. Ahin, ichenkhompi’u Meilhei te lung-gel ahoitah loujeh’in chihthei ding angaiyin hitoh kilhon’a chu aphatcha semtoh’a khonung’a itu ichateu vin eihin oimo louna diuva isemphat diu angaiyin ahi.
KUT HAIBASE MIJAMGI KUMMEINI:- Chavang kut hi eiho’a ahi tia ikineisah kei vang’uvin ichenkhompi’u meilhei ho lung-gella hin Kut haibase mijamgi kummeini ti lung-gel aneitauvin golnop (festival) neite eiho sang’in meilheite athaneijo kigotauvin aphomo lheh jeng’in ahi. Hiche athanei nau photchetna chu State level Kut kimanna ding’a eiho chenna thinglhang gam akigot teng MLA/ Minister ho anopji louvu hi athanei nau photchetna khat ahi. Security reason a lame excuse ibol’uva kumseh’a Imphal khopi’a iman jingu le Golnop ineisun’u Chang Kut hi jalhang golnop khat dan’a ahung umdohna ding nailam chan aumtan ahi.
AMIN KIKHEL:- Hiche golnop kimantil laichun Chavang Kut anakitin ahi. ahin, phat chomkhat jouvin Chavang ahung kiladoh tan ajeh ipiham? tivang kahepon hijong leh kei lung-gellin hiche amin chung chang’a jong hi Meilhei te lungthim kigollut hiding ham? ti ginmona kaneiyin ahi. Ajeh ho1. Chavang kitihi meilheiten aseitheilou jeh’u ahi. 2. Chavang akitile perticular tribe khat’a dan’in aumin ahop lenpoi tijeh hiding ahi. Ahileh ahop lentah’a isemmu hi phachom mong mong ding hinam?
KUKI,CHIN,MIZO:- Lamkai masahon lungthim thuh tah tichu political vision neipum’a anasah’u hidin katahsan’in ahi. Hitoh kilhon chun Pu PS Haokip in akiminsah’na bang ngeiyin Kuki, Chin, Mizo kipumkhat’na semdohna din ahin chepin ahileh adem ding ikichutho kit’un ahi. Ahileh Chavang Kut neite chu Kuki,Chin,Mizo te ahi kitihi phachom mongding hinam? Eihon iminsahna’u bang’in tun Meitei majek
Class iii subject’ah Kut haibase Kuki,Chin,Mizo ichin inao singgi kummeini tin akijih tan ahi. Hiche thu kahetdoh nichun kagellin ahileh khonung’a itu ichate’uvin eihin oimo teidiuvin kamun ahi. Ajeh chu Chavang jong pangtalou aneijong kichehlou golnop khat dan’in aumdoh tan asim’ah chapang hojong aboitan ahi. Class iii a kai chapang chinboineng Haokip’in alekha’a Kut thu asimdoh chun anu kom’ah achen heno Kut hi eiho’a hilouham? tin adong’in ahileh anu’n adonbut’in ahe ahe boi Chavang kut chu eiho’a ahi’e atileh Chinboineng’in ahileh maa ipi ding’a Kuki,Chin,Mizo gini tia kijihham? ati leh anun aponabeh seh’in adonbutye jong ahetapon ahi. Heng’e golnop’a kipumkhatna semdoh ding chu thilphatah ahi. Ahin, kei mudan’in vang hiche Chavang Kut’a Nam min tampi kigollhah jeh’a kipumkhat’na leh kihotna umchom loudin kamun ahi. Hijeh chun Lui-ngaini haibase Naga ichin inao singgi kummeini ati bang’in Chavang Kut haibase Kuki ichin inaosinggi kummeini tin anei kicheh sah joleuhen hichun kingailut naleh kipumkhat’na ahinso joh ding’in kamun ahi. Ajeh chu Chin ten hitobang golnop chu neinama jong leu chavang kut atilou ding’u ahi. Ikinaipi pen’u Mizo ten jong Chavang kut atilouvu ahijeh’in Manipur, Nagaland leh Assam’a chenghon iman’u Chavang Kut hi Kuki nam mite golnop (festival) ahi tijoleu hen akichehna khat umding koimanjong eihot’a eithet chom loudiu ahi.
BOLDING’A KADEIHO :- 1. Chavang-kut thu’a Kuki Inpi mophna noiya intellectual circle a seikhom’na neiya anei (owner) kichehsah ding. 2. School syllabus a jong next edition teng Suhdihna neiding 3. State levella kut kimang hi eihon ineiyu District li lah’a Pherjol tilou adangse hi communication hoicheh ahijeh’in hiche District thum tichu Kanggui, Lamka leh Tengnoupal ho akitol jouteng phaiya khatvei bolding tichu kum thum jouleh khatvei bou umsahyi ding. 4. State level Kut committee jong Kuki Inpi noiya umding.
Achaina in thil kigong leh thil kibol ho jouse aphachamkim aumpon, aphat leh anikho dungjuiya semhoiya semtoh ding angaiye ti hepum’a Chavang Kut mandan jong aphat cha semphat’na neiding ikhohsah cheh diu angaitan ahi.