Chassad kho kihalna a themmona neiho nidan 36 sung’a akimatdoh lou leh...

Chassad kho kihalna a themmona neiho nidan 36 sung’a akimatdoh lou leh statewide bandh bol ding’a KSO-GHQ in gihna nei; NSCN apangpoi tia TNL President thuso KIM in nelkalna nei

136
0
SHARE

Chassad kho kihalna a themmona neiho nidan 36 sung’a akimatdoh lou leh statewide bandh bol ding’a KSO-GHQ in gihna nei; NSCN apangpoi tia TNL President thuso KIM in nelkalna nei

Imphal, Mar 17(ET): Chassad khopi hallha a ana pang ho lim leh video ho social media  a viral achejou nung kisan a Govt. in atohdia lom atoh louna chung a Kuki Students Organisation General Headquarters (KSO-GHQ) in alungnoplou nau aphondoh utoh kilhon in, Government in nidan 36 sung’a meihalla pang themmo na neiho amatdoh louva ahile March 20, 2020 jan akon Statewide bandh bol ding in thuphon ana nei tauvin ahi.

Hiche thuhi tuni Kuki Inpi Manipur leh KSO GHQ  in Kuki Inn Imphal a thuso miho akimupi na a Paotin Lupheng President KSO-GHQ in phondohna anei ahi.

NSCN-IM lamkaina a Tangkhul hon Chassad khopi ahallhah thu media chom chom in jatchom chom a thuso anei nao chung’a Kuki Inpi Manipur in thuso aneiyin ahi.

KIM President Khaimang Chongloi in aseina ah jani Ukhrul a TNL President pan press conference abol na ah Chassad kihalna ah NSCN-IM khut ajao poi tia asei hi abul abal umlou chule jouthubu ahin NSCN-IM ho lekhuna dinga thil abol ahibouve ati.

Achesa January 24, 2020 nikho a NSC-IM Wun region commander pan Chassad haosapu kom’a nalou vat u nangah lou uva ahile nachung uva action khoutah kila ding ahi tia gihna ananeina lekha chu Kuki Inpi khut a analut in hiche thu’a KIM in February 13 nikhon Chief Mininster kom ana kilhut toh lhon in Memorandum jong ana kipelut in chule CM in jong Home Minister Amith Shah kom analhut paiyin ahi. Hinlah hiche kahlah a chu NSCN IM hon lou kivat aphatlouva anahal lhah peh uva hiche jeh a Chassad ten meihal ho matdohna ding’a lampi anatin u Tangkhul hon akhut uva law kichoiyin nabol theilou diu ahi tin attack anabol uvin hiche a konna chu mei ahal uva inn 200 tobang anahal lhah u ahin, akihal moh cheng jong insung’a thil le lo jouse ajepset joukeiyuva chule Houbung treasurer pa sum koi jong apohdoh uva insung’a thil le lo pha jouse jong apohdoh u ahi tin President pan chun aseiyin ahi. Chule hiche hi NSCN-IM ho thil gon le IM ho makaina a thil kibol ahibouvin TNL President thusei hi ahettoh lou asei ahin NSCN-IM ho lekhuna ding’a asei ahibouve tin suhthengna aneiyin ahi.

KIM President in aseibe na ah March 16 nikho Chassad thilsoh ISTV le Media phabep in gam meikah akon ahi tiloi chule inn 10 seh bou akihal e tia kiso hi jou thubuh ahin, Tangkhul ho kom a information kila a media hon naphon u hi vangset leh jachat umtah ahin tunung tuban leh Media a adihdom a thilbol chu apha ahi ati. KIM hi Non communal peaceful coexistence justice for all ahin, khat le khat kivetkhelna ding thu ima KIM in akigong pon hinlah NSCN-IM hon hichan lom a khansetna aneipao hi pha akisa poi jong ati.

Hiche chung thu’a CSO chom chom in thusei lasah anei hou kipapi aum in hinlah hiche thu’a communal line a khat le khat kigalto nading thu koiman aseilou dingin temna jong aneiyin ahi. Chuleh Chassad hi Manipur history a ding’a khului leh adeh’a Kukite history a ding’a Anlo-Kuki War tia Britist te toh anakisatna galmun khat jong anahin hijeh chun Chassad hi jani dung’a kisem leh agam neilouva thu amadon kisei ima adih aum pon Britist ten anapeh u gam right jong hoita keiya nei gamluitah ahi tin jong phondohna ananeiyin ahi.

Th Shyamkumar in atuh cabinet portfolio kilahpeh ta; Supreme Court in Manipur Legislative Assembly a lutsah lou dinga thutanna nei

Imphal, March 18(ET): Supreme Court in Wednesday nikhon order asodoh kit kahse a Forest and Environment Minister Thounaojam Shyamkumar Legislative Assembly a lut theilou ding chule Chief Minister N Biren lamkaina Council of Minister a Cabinet Minister panmun atuh tahlou ding ahi, tin thutanna anei tan ahi.

Justice Rohinton Fali Nariman leh Justice S Ravindra Bhat umna bench in thutanna anei ahi’in, Indian Constitution Article 142 a tha (power) kipe amanchah ahi. Congress MLA Keisham Meghachandra Singh leh MLA Md. Fajur Rahim in 10th Schedule, Indian Constitution noiya Minister Th Shyamkumar ‘disqualify’ bol dinga petition apeh ahi.

Court sangpen in achesa January nisim 21 nikho a Minister Thounaojam Shyamkumar chunga hehna akisem thu a hi Manipur Legislative Assembly Speaker in athu amu nikho a kon kal li sunga thulhuhna anei dinga thuhilna anei ahi. Lha khat aval jouva Speaker in Miscellaneous Application no 820 of 2020 file abol a, chule hiche thu seilhah nadinga kal 8 athum be kit ahi. Appellant injong Cross Miscellaneous Application apeh a, court in hiche case alah a ‘disqualification petition’ aseilhah dinga ngehna anei kit u ahi.

Miscellaneous Application hi March nisim 4 nikho a Supreme Court a hearing um ahi’in, Speaker thalheng a pang Solicitor General in ‘Miscellaneous application’ hatah a kisei ahipon, ahivanga ni 10 sunga thulhuhna nei dinga asei ahi. Athu apohdoh u tuni a Solicitor General in court henga March 28 chan a athu vohchon dinga temna aneiya hiche kah a Speaker in thutanna anei dinga asei ahi. Hiche chungchang a March 28 teng thutanna neidinga Speaker Tribunal in aphat jong atep ahi, tin aseiyin ahi.

Senior advocate Kapil Sibal in athu vohchon dinga ngehna adoudal a, court in tuni ma ma a thulhuhna anei dinga ngehna sangtah anei ahi. Solicitor General leh Senior Advocate Kapil Sibal kinelna court in angailhah jouva bench in thutanna anei ahi. “Alangni thusei akingai tan, Indian constitution Article 142 a tha eikipe kimang ahi. Respondent No. 3 hi Court in order asodoh kit kah a Legislative Assembly alut ding kiphal louding chule tua kon Cabinet Minister hita louding ahi”, tin bench in thutanna aneiyin ahi.

Hetthei khat chu achesa January 21 nikho a member thum umna Supreme Court bench in Manipur Legislative Assembly Speaker’s Tribunal henga Forest and Environment Minister Th Shyamkumar ‘disqualification petition’ hi kal 4 sunga aseilhah dinga thuhilna apeh ahi. January 25 ni a Senior Advocate SH Hasnain, MLA K Meghachandra in SC thuhilna copy hi Manipur Legislative Assembly Speaker henga apeh ahi.

Hiche jouva Speaker’s Tribunal in kal get athum be a Miscellaneous application apeh hi Supreme Court in asan peh tahlou ahi. Speakers Trinunal in February nisim 4 nikho a hearing chaina pen anei uva, thutanna anei loulaiyu ahi’in, March 28 sun nidan 11 teng thutanna umding ahi, tia achesa March 16 nikho a Secretary, Manipur Legislative Assembly in asei ahi.

Minister Th Shyamkumar hi achesa 2017 state assembly election a Andro Assembly constituency a Congress ticket a MLA kaidoh ahi’in, kihahselna alah masanga BJP a lut ahi. BJP lamkaina coalition government a cabinet minister panmun apeh paiyu ahi. Assembly election a hi Congress in seat 28 amu a, party hat pen hiu ahi’in, chule BJP in seat 21 amu ahi. Ahivanga BJP in NPF, NPP leh adang dang tosotna a sorkar asem ahi.

MLA Shyamkumar in party adalhah a BJP a alut paijeng jeh a Congress ho lunghanna lhung a, ama disqualify bol ding thumna a Speakers Tribunal a petition chom chom 15 apehlut u ahitai. MLA TN Haokip, MLA Fajur Rahim, MLA K Meghachandra, MLA RK Imo, MLA Chaltonlien Amo, Yamthong Haokip, MLA K Ranjit, MLA Abdul Nasir, Kh Joykishan, MLA DD Thaisi, MLA Okram Henry, MLA Surjakumar Okram, MLA AK Mirabai, MLA K Arthur chule MLA K Govindas in achom chom a ‘disqualification case’ asem u ahi.

Supreme Court in Speakers Tribunal hiche thu tan dinga mopohna apeh jeh a MLA pa disqualify abol lou ahi’in, ahivanga Speaker’s Tribunal in akipe phat sunga thulhuhna anei louva ahile court sangpen in minister pa disqualify abol ding ahi, tia hehna sem a Congress MLA K Meghachandra in tu masanga asei ahi.

KSO-I, KSO-TPL leh TKSU-GHQ in ISTV Disconnect bolding’a thuphon nei

Mangneo Touthang

Imphal, Mar 18(ET): Tunin Kuki Student Organisation Imphal, KSO Tengnoupal Block leh TKSU-GHQ in lamdih louva News so Moreh boina thu leh Chassad kihal thua sihnei langneina neiya thuso nei ISTV muntin a um Kukite jousen Disconnect abol cheh ding uvin thuso ana nei uve.

Ijem tia hiche thu kisei nahsah louva ISTV disconnect bol lou akihet doh leh nampi douva kila ding ahitin jong thuso chun ana seiben ahi.  Ajeh chu Tuchung Chassad khopi kihal thu hi ISTV ten Gam mei kah a kon hung kipan ahidan leh In 25 hamkhat meijin akah dan na anaseiju ahi. Hitobang a State Media poimo tah khat in joule nal mang cha fake news asojing uhi apatna ahi pon, sot a kipat ana umjing ana ahi.

Moreh thisoh jong hi ISTV ten ama ho deideija thudih thutah phongdoh louva News anaso jing u ahitin, Student body thum ho chun anasei un, hitoh kilhonna ISTV tetoh kihou tohna aum kahsea koiman Connect abol thei lou diuvin thulhuhna jong ana nei uvin ahi. Chule hiche thupeh hi Churachandpur, Imphal leh Tengnoupal District hopsung a ding bou hilouvin, muntin a um Kuki chate jousen ichepi soh kei uva nam kilungkhat nahi chenkhompi hon ahetdoh nathei diuva panla cheh din jong tepna ana nei uvin ahi.

Manipur Rajya Sabha seat candidate 2 kichu ding; NPF candidate in nomination ladoh ta

Imphal, March 18(ET): Rajya Sabha seat a dinga nomination pe a candidate thum holah a NPF candidate, Honreikhui Kashung in candidate ahina tuni a alahdoh toh kilhon a seat hi candidate ni bou kichu ding ahitai.

BJP in asot candidate Leishemba Sanajaoba chule Congress candidate T Mangi Babu kitetna hiding ahi. NPF in member 60 umna Manipur Legislative Assembly a seat 4 anei ahi’in, BJP lamkaina sorkar toh kitho a sorkar asem ahi.

Congress in assembly election jouva seat 28 anei vanga akilhengdoh MLA 8 in party adalhah a BJP a alut jeh a seat 20 bou aneiyu ahitai. Election jouva BJP MLA 21 bou hi ahi’in, party dang a kon kichon ho pum a tua hi seat 28 aneiyu ahitai. Independent candidate Ashab Ali leh NPP MLA 4 chule NPF 4 ho pum a BJP in atoson 36 anei ahi’in, BJP in Rajya Sabha seat hi ajo tei ding dinmun a um ahi.

 

Boina aumlou nadinga ngehna ana kinei masa sorkar in akhohsah loujeh a Chassad khosung meiya kihal ahi: KCC-M

Imphal, Mar 18(ET): Achesa February nisim 29 nikho a Kamjong district noiya um Kuki kho 15 security peh dinga KCC (M) in ngehna anei state sorkar in anahsah loujeh a achesa March nisim 16 nikho a Chassad kho a inmun 150 val meiya kihal lha ahi, tin KCC (M) in Governor Dr Najma Heptulla henga lekhathot ape uvin ahi.

Lunjapao Simte, General Secretary, KCC (M) leh Tongkhothang Kipgen, President, KCC (M) in soi akaina memorandum a chun achesa March 16 nikho a Assam Rifles le Manipur state police ho umna noiya NSCN-IM in atosot Tangkhul mipi hon Chassad Kuki kho a inmun 150 val meiya ahal uhi lunghanna dinga kichouna sangtah ahi, tin aseiyin ahi.

Kamjong district noiya um Kuki kho hohi NSCN-IM hon agih jing ahi’in, achesa February nisim 24 nikho a jong Phaimol kho a cheng Seikhohao Haokip, s/o Mangjathang Haokip hi NSCN-IM hon athemmona umlouva melsetah a anavoh u ahi, ati.

Hiche chungchang a achesa February nisim 29 nikho a Governor’s office a memorandum kipelut ahitan, March 16 nikho tobang thilsoh vendoh nadinga ngehna ana kinei ahi. Gamsunga ‘law and order’ hi koi mopohna ham? Chassad, Kamjong a posting hi a Manipur police leh Assam Rifles ho thilso pet a hoiya um uham? Ipijeh a lhakhat masanga kiginna dinga kouna kinei hi state sorkar in akhohsah louham, tin thudoh anei uvin ahi.

 District sunga boina akhohset louna ding, lungmonna aumkit nading chule Kuki kho ho huhna dinga centre leh state sepai ho kithopi dinga Maokot kho a security akikoi ding chule state government noiya Village Defence Force (VDF) semdoh ding hibou alampi ahi, ati. Chule Chief Minister in thilsoh umchan vetlhahna aneiya pan alah na ho Kuki Chiefs Council Manipur (KCC-M) in akipapina thu jong asei uvin ahi.

 

Chassad Kuki kho a Tangkhul ho khansetna ATSUM, KSO Pune, KSO-B leh GSO-GHQ demna nei

Imphal, Mar 18(ET): Kuki Students’ Organisation, Pune in achesa March nisim 16 nikho a Sampui le Kamjong kho miho Chassad kho chunga akhanset uva, khosung meiya ahal nau thilsoh demna sangtah anei uvin, vangsetna toh ho pohnat hu na jong anei uvin ahi.

Lamgougin Khongsai, General Secretary, Kuki Students’ Organisation, Pune in soi akaina thuso a chun, Chassad khosung meiya ahal u tilouva kamcheng le umchan a jong avel vel a gihna aneiyu ahi’in, NSCN-IM hon 1990 khang a themmona neilou Kuki tamtah thisan aso nau banjom ahi, ati.

Thilso nikho a state sorkar in boina aum ahet soh ahi’in, ipijeh a thilsoh vendoh nadinga pan alah louham? Local police hon khosung mipin meiya ahal a achomna hohi ibol a thipbeh a avet uham? Chassad khosung mihon ngehna anei nunga jong ibol a 42nd Assam Rifles Commanding Officer in pan alah nomlou ham, tin KSO-GHQ in thuso anei uvin ahi.

Mei kihalna le kibuluna video chule thilse bol ho lim kimuna video le photo tamtah kithe thang ahi’in, ipijeh a tuchan a police hon koima amat loulai ham, tin jong thudoh anei uvin ahi. Centre chule State a BJP sorkar in Chassad Police station a Superintendent of  Police chule Officer-in-Charge in Tangkhul mipi ho chonchan kimu mosah tah a akoiya, thipbeh a avet jeh a suspend bol dinga thumna anei uvin ahi.

42nd Assam Rifles CO in action alah loujeh khol ding, themmona nei ho chunga FIR jihlut a chule athilse bol utoh kitoh a dan dungjuiya gotna peh ding, Chassad khosung mi chenna ding mun neilou ho chenna ding mun, neh le chah agon peh diuvin jong KSO, Pune in thumna aneibe uvin ahi.

All Tribal Students’ Union, Manipur (ATSUM) in Chassad kho kihal nasatah a demna anei utoh lhon in hitabang a nam le nam kikah a kithet tona ho Manipur sung thinglhang miho kikah a aum nalouding in temna ahin nei uvin ahi. Manipur thinglhang mi hon kilungtoh del a hinkho aman khom ding uvin jong hetsah na kiloikhomna in ahin nei uvin ahi.

Kiloikhomna information secretary Micah Kamei akon thuso kimu dungjui in achesa 1990 kum lam a thilsoh ho ahung le soh kigot kit hi vangset umtah ahin, thilsoh ho anung umkit nalou ding a mip in nasatah a panlah na anei ding uvin jong temna ahin nei uvin ahi.

ATSUM akon thuso kimu chun asei na a thinglhang mi ho epu epa teuvin chamna ding gong lou le hephalou a natoh na ana nei jing jeh uva tua hitabang thilsoh ho umjing ahi dan jong tahlang na ahin nei uvin ahi. Achesa phatsung a lamkai ana tuh ho in nasatah a panlah na an anei utoh lhon  a chamna hung um ahin, hinlah hitabang chamna chu tu naicha a kihet to na ho akon ahung set ding kichat na mip in panlah khom ding angai dan jong hetsah na ahin nei uvin ahi. Chassad kho a thilsoh hi thinglhang mite ding a khah doh na ahi a, mijouse in hitabang thilsoh aso kit nalou ding a thinglhang mijouse ding gelna a natoh na anei ding uvin hetsah na ahin nei uvin ahi. ATSUM team in achesa March nisim 17 nikho a Chassad khomite kithopina a anchang, aalu, daal le thildang dang po a vilna ana nei dan u jong hetsah na ahin nei uvin ahi. Chassad le Kamjong khomite ho in jong Pakai Jesu ngailut na het them a ki chamdel a hinkho aman na ding uvin jong tahlangna ana nei uvin ahi.

Social media dung a jong koima in nam sung kikah boina thei dinga thu le laa amoh tah tah louding uvin kiloikhomna in temna ahin nei uvin ahi.

Gangte Students’ Organisation, General Headquarters (GSO-GHQ) in achesa March 16 nikho a Kamjong district a Chahsat khosung meiya akihal a in jakhat val akihal lhahna thilsoh demna sangtah anei uvin ahi.

Society a tukhang a jong hitobang a khangtou loutah a chonna aumhi vangset umtah ahi, tin Paulallien Gangte, President, GSO-GHQ in soi akaina thuso a chun aseiyin ahi. Chahsat khosung toh kinaicha a um 42nd AR hon thilsoh vendoh nadinga pan lalouva thipbeh a thilsoh umchan avet hi lunggel dihtah nei jousen adem dinga lomtah ahi, tin jong asei uvin ahi.

Akithopi ding umlou themmona neilou, lhangsunga minority ho chunga hitobang thil kibol hi gal kibolna toh akikhetna aumpoi, tin aseiyun, hiche hin lungmonga chenkhomna atohkhah ding, boina asemdoh ding ahi, ati. Mopohna nei authority hon phatah a athu avetlhah a chule themmona neiho chunga thudih a thutanna anei dinga GSO-GHQ in temna aneiyin chule vangsetna toh ho alunghempi nau thu jong asei uvin ahi.

Kuki Students’ Organisation, Bangalore (KSOB) in Kamjong khomi te le NSCN-IM nakai na noi a Chassad kho ana kihal nasatah in demna ahin nei uvin ahi.  Hitabang mihem toh ding a kilom lou thil hohi maban a aum kit nalou ding in jong kiloikhomna in hetsah na ahin nei uvin ahi. Hitabang thilsoh hi achesa 1990 kum lai a jong Tangkhul ho makai na noi a NSCN-IM in Kuki hoc hung a ana bol sa u ahi dan jong tahlang na ahin nei uvin ahi. Kamjong mun a um Assam Rifles le Manipur police in thilsoh ana moh vet na chung uva jong kiloikhomna na in demna ahin nei uvin ahi. State government in mona nei ho agan na thei penna amat a, daan dungjui a gotna apeh uva,  Chassad khomite ho kihtopina phate a apeh uva, Kamjong lhang sung a NSCN-IM ho nom tah a alhat u angah sah uva, police duty poho suspend kibol na ding in kiloikhomn ain govt hetsah na ahin nei uvin ahi.

YFPHR in Chassad  thilsoh Govt. leh MHRC heng a akinthei pen a thudih kholding a ngehna bol

Imphal, Mar 18: Kamjong district sung a thilsoh chungthu toh lhon in Youth’s Forum for Protection of Human Rights (YFPHR) hon Manipur Government leh Manipur Human Rights Commission (MHRC) heng ah akinthei pen a thudih kholdoh ding in ngehna abol uvin ahi. Thilsoh achun Chahsad Kuki kho ah in 150 val aki hallha in hichu chi le nam kikah a boina hi mai mai ahipon akhoh le kithatona jong umdoh thei ahi jeh in akinthei pen a thudih  kholdoh ding in asei in ahi.

Aseibena achun Manipur govt. in gentheina tohho neh leh chah ding chule apoimo dang dang kininglhing sel a apeh ding numei chapang ho adeh a agelkhoh uva kithopina apeh ding uh ahi ati. Hiche tobang a chenna in 150 val jen kihal lhah thei kiti hi masang apat tohgon umsa hiding ahi in chule kiloikhomna khat phatchom nading a kibol jong hithei ahithu thulhut chun asei in ahi.

 

Chassad kho mite kithopina tohgon chelha jing; UNC hon Chassad gavil ahin khosung lamkai hon lemna ananei lou

Mangneo Touthang

Imphal: 18th March(ET): Chassad khopi kihal pohnat naleh lunghempi nan Kuki namsung’a CSO ho thuphon leh kithopina achelhah jing toh lhon in janni (March 17) nikho chun KIM le abahkai CSOs leh HPC in Chassad khopi vilna ananei uvin relief materials gari 5 jong anathah lut peh uvin ahi.

Hiche naban’a tunin (March 18) jong Hmar Youth Association, GHQ lamkai hon jong Chassad vilna ananei uvin hiche achun HYA GHQ leh sopi Hmar insung miten sum le pai neh le chah sil le chen ijakai adondoh ho amun’a anathah lut uvin ahi. Churachandpur lam in jong sopi Zomi Youth Association, ZYA GHQ leh Zomi Mother Association, ZMA GHQ hon jong Chassad khopi kihalna chung’a kithopi na in anchang bag 30 leh Dal bag 3 Relief & Rehabilitation mopohna nei KKL GHQ ho khut’a pehdohna ananei uvin ahi.

Hiche toh lhon’a  Tuibong Sumkong Bazar mun ah Joint Kuki Artistes hon Chassad khomite kithopi na ding Charity Concert anabol uvin chuleh Singapore lam’a um Kuki chanute hon jong kithopina anape uvin ahi. Chuleh India khopi Hyderabad, Pune, Delhi leh mun chom chom’a KSO hon Chassad thilsoh chungchang’a lunghempi na thuthot leh Govt. Press release jong anabol cheh naban’a kithopina donation jong anabol cheh uvin ahi. Hiti chun tunin chan in muntin gamtin’a kiloikhomna jat chom chom hon KKL GHQ leh KSO GHQ toh kijaton panpina na anei jing uvin ahi.

Alangkhat’a Kuki CSO jat chom chom hon Chassad khomite panpina anei jing utoh lhon in tunin TYC, New Lambulane. Imphal in jong Imphal khopi sung’a lekhasim Chassad khomi ho aum nou muncheh vilna ana uvin chuleh neh le chah, sum le pai angaicha ho kithopina anape uvin ahi. Tuchung Chassad khopi kihal lhah nachung’a donation pehnom jouse ding in KKL GHQ le KSO, GHQ in Tribal Youth Club (TYC) hotoh kithon Tribal Market New Lambulane, Imphal mun’a Relief Centre jong ahongdoh uvin ahi. Chassad khopi kihalna chung’a thil kisuse holeh inn le lou kihallha ho hetdoh ahina ding in Kamjong Police Deputy SP leh Chassad Haosa ho lamkai nan kholchil na ana kipantan ahi. Chuleh thulhut kimu dungjui in United Naga Council (UNC) lamkai hon jong Chassad khopi vilna ananei uvin hinlah khosung lamkai hon anakhohsah pouvin ahi akiti.