Chassad kho Inn 220 kihallha ho Kuki Inpi Manipur leh abahkai Kuki...

Chassad kho Inn 220 kihallha ho Kuki Inpi Manipur leh abahkai Kuki CSOs hon vilna neiyu

179
0
SHARE

Chassad kho Inn 220 kihallha ho Kuki Inpi Manipur leh abahkai Kuki CSOs hon vilna neiyu

Mangneo Touthang

Imphal, March 17(ET): Achesa 16th March 2020 nikhoa Kamjong leh Sampui a cheng Tangkhul holeh NSCN-IM ho kitho a ana hallhah nao Kukite khopi Chassad chu tunin 17th Kuki Inpi Manipur makainan, Kuki Inpi Imphal, Kuki Inpi Churachandpur, Kuki Inpi Ukhrul District, Kuki Khanglai Lompi, Kuki Student Organisation GHQ leh abahkai District KSO,, Haokip People’s Council leh Kuki Chief Association hon vilna ana nei uvin ahi.

Hiche vilna kin a chun TN Haokip Hon’ble MLA Saikot, Khaipao Haokip Hon’ble MDC Kholmun, Lunkhohen Haokip Hon’ble MDC, DP Haokip Retd. IRS leh National Media leh State Media hon jong pan analauvin ahi.

Imphal a kon Security jaona leh HPC ho mapuina jal in Gari 35 tobang a ana kalsong ahiuvin, Chassad a um sopi ulenao Inle lou kihallha holeh sil le chen nehding donding neilou ho khoto najal a Imphal khopi sung’a um Kuki ten ana dondoh u relief material ijakai hochu KKL holeh Kuki Inpi Imphal chule KSO ho panlahna jal in DI 4 leh Tata 507 khat ah ana pouvin  ahi.

Kuki Nampi lamkai ho khosung ana lhun phat un, Chassad khopia In le Lou kihallha a suhna ding touna ding helouva lunglengvai tah’a hinkho ana mang hochu anu apa mu abang un, mitlhi long in ana kap uvin ahi. Kuki Inpi Lamkai holeh mun chom chom a kon hung kalsong nam lamkai ho toh mipi Chassad Houin a ana kikikhom uvin ahi. Kim President, HPC President, KKL President, KSO President, TN Haokip Hon’ble MLA Saitu, Khaipao Haokip Hon’ble MDC Kholmun leh Lunkhohen Haokip Hon’ble MDC  ho akon houlimna ana um in ahi.

Paotin Lupheng, President KSO GHQ in ahoulimna ah Chassad khopi hi Kukite history a mangthei lou khopi ahin, hahsatna tampi um jongle Kuki Nampi ikithouva hiche khopi hi inung tundoh kit diu ahi. Hijeh chun sopite ho lungneo hih un, tuchung nathoh nau hi Chassad te hina nathoh u ahipoi, Kuki hina a nathoh u ahin, eipanpi diu Kukite aum tapoitin gel hih un, asang aja ki um ahi. Chule Tuchung Chassad thilsoh chung chang a hin, KSO GHQ in pan ahin kila jing in, maban ajong pan hin kila jing nalai ding ahi tin khosung mipi lhamonna ana jong aneiyin ahi.

Kamthang President KKL in aseina ah Khosung kahung lhun chun In le lou kihal ho kavet leh kati akithing in kathoh joupon janni thilsoh chu muntin a um nam miten kaumna cheh uvah kahin lainat peh uvin kana lhiso piuvin ahi ati. Tunia KKL ten jong hilai khomun kahung phah nau hi janni Kuki Inpi Emergency Meeting a ana kiseilha bang’a Relief & Rehabilitation lam mopohna eikipeh utoh kilhon a maban ajong Chassad khomite dia kabol thei chan u kahin bol diu ahitoh kilhon na tunia hi advance a hung kahi uve tin  KKL min a pehdia lom hojong ana pedoh in ahi.

Khaimang Chongloi, President Kuki Inpi in tuchung Chassad khopi kihal thu a Government toh akihou nao report mipi heng a phongdohna aneiyin chuleh Chassad khomite lhamonna jong ana neiyin ahi.

Chassad khopi kithahsem nading’a Kuki Inpi makaina Kuki nampin pan kila ding ahi tichu jani Kuki Inpi Emergency meeting chun ana kiseilhatan, hitoh kilhon chun Chassad khomite leh lhangsung gamsung a um haosa upa hodin kihollelna ding ima aumpoi ati. Tuchung Chassad thilsoh a kihallha Inle lou jouse nungsah dia Nampin tohgon akineitoh kilhon na koitobang Chassad dalha aum leh nampin achungthu kisei ding ahi tihi agam a cheng mipin ahetdia kahin tahlang kit ahi ati. Chule janni thilsoh ho Social media a akimu akon IGAR South aga kiki mupin, Chassad gamkai vekol dia um 42 AR Battalion  hochu Chassad khopi kihal vedia um u ham? Ibol achu kakho u Chassad a Sepai um ma Sepai ho mitmu chang a kakhou kihallha jeng ham tin ana kiki tom in ahi ati.

Aman aseibe na ah KIM in emergency meeting ana kineijin nilhah in CM pa jong akiki mupin thilsoh chung’a ilunglhai lounau ho agakisei jin achesa 27th January  nikho a NSCN-IM Wuong Region Commander pan Chassad te lou navat thei lou diu ahitin lekha ana pe uve. Hiche lekha chu kahin choijun, Kuki Inpi injong Memorandum khat jong kahin choitha kit un, hinlah Govt. Side a kon in ima action aumpon, tunin kakho u Chassad akihallhatai. Hiche Government in neikhohsah lou jeh’u ahi tin CM kom ah kana kiphin uvin ahi jong ati. Chule Chassad khopi chu kisumang a kihalvam ahitah leh Government in iti lamdol’a pan nalah diu ham tin KIM lamkai hon ngehna ana kineijin ahi.

Kho Hal lha/Mipha lou hochu koi hiuvem? Koilamkaina ham? Hiche ho chung ahi action khoutah chelha ding ahi tin demand akibol in Government in eina noppeh uvin Chassad hi Inn khat cha jong liem louva kisempha ding ahi tin ana kiseijin Govt. In eina noppeh kit tauvin ahi. Relief & Rehabilitation ahi Govt. In special packages eipeh diu ahin hitoh kilhon a chu Kukite ikhopiu Chassad vekol dia IRB Company Post  khat permanent a kihong ding ahitai tihi Govt. toh kana kinopto nau japi hetthei hochu ahi ati.

KIM President in aseibena ah tuchung thilsoh a kisuse In le Lou thil le Lo gari hihen lang ipi hitaleh Govt. In eihin lepeh diu chule eingahtup diu sepai jong eikoipeh diu ahitan, chukitleh tuchung thilsoh a gitlouna lungthim le natoh nei hohi eihon vang kiphulah pontin, Govt. In achandiuva lom penalty chu hinpe nau vinte, achainan Kukiten Phula ding  Van Pathen inei nauve ti sumil lou din iki itiem uve tin anaseiyin ahi.

Tuchung Chassad thilsoh hi 17th February nikho a Chassad te lou lho nagam kikhapeh thua Wuong Commander pan Lekha ana peh uva kon hung kipan ahi. Achesa 15th Sunday nikho chun louhal phat lhing loulaijin Sampui khomite leh Kamjong te kithon alouvat u ana hallhah peh tauvin ahi.

Hiche Lou kihal deilou vetsahna a Chassad khomiten Bandh ana bol uva kon a NSCN-IM hon aum nau Kamjong side a kon Lethot le meithal ahin kap uva civil mipi chu hung kitollut uva hiche Chassad khopi hi ana halvam u hai. Hinlah Chassad leh Kamjong kigamgitna vel’a cheng Kuki ho Inn phabep chu ahal uva ahileh ama ho chenna Inn geija ahin kahset ding ahi jeh chun Insung a um neile gou apha lai lai ana kilah doh un, chule document poimo tah tah hojong ana ladoh un, Innsung chu heicha chempong in ana uvin ahi.

Lhangsung adia Themjilna mun umsun Lunkhomang Touthang in abol Lhingkim Memorial School  jong abon in ana kihalvam hel in, simlai 320 hon suhna ding helouvin aum uvin ahi.

Tule tuhin Chassad khomite jouse abon un Houin kisahna mun Church Compound ah Camping ahi un, hiche mun ahi mi 800 val khosa ahin, sil le chen nehle chah thil le lo ngaicha tah a hinkho aman u ahi tai.

Chassad Inpipu leh Haokip Bulpipa Thangjahao in aseina ah Chassad kho hi apum’a kihal tobang ahitan, lampi toh kinai nalouva um Lamsah lamlhang a In themkhat tailou adangse hi kihalchai ahitan, akihallha mong mong hi Inn 220 ahi tin press ho kom ah ana seijin ahi.

Chassad boina thua KIM in mipi hetdia thuphon bol

Imphal, Mar 17(ET): Kukite khopi Chassad ahung kihal lhah hi muntin gamtin nam mite ajapha jousen iponasoh keiyun, ilunghempi soh kei uvin ahi.  Tuchung Chassad Khopi inn 220 val kihal lhahna thu hi State Media phabep in adihlou lam tah in Gam meikah jeh leh In khat akah akon aban ban na kason dan a news anapehnau thu hi KIM in phamo akisai tin thuphon abol in ahi.

Chule thuchung thilsoh a hi muntin a um Kukiten Chassad khomite genthei hahsatna chung chang ahi ijochan uva kithopina inanei cheh ding uvin KIM in ngehna ahung kineijin, Relief & Rehabilitation mopoding hi Achesa 16th March 2020 Chassad kihal thua Kim Emergency meeting nikho a kiselha bang in KKL GHQ mopohna noi hiding chule KSO GHQ hotoh jochanna hung kithokhom diuva namdet ana hin, hijeh chun kithopina penom jousen KKL GHQ ho leh KSO GHQ ho toh kihet tona neija kithopi cheh din jong mipi hetsahna akineiyin chule KSO leh KKL hetpehna louva koiman don le kai jong abol lou ding in hetsahna jong abol uvin ahi.

Imphal a kipat Chassad che ding hi tu din mun a Security beija kalson ding hahsatna tampi aumtah jeh in, koi hileh ama ama personal a kalsong umthei lou dingin jong hetsahna aneiyun chule poh dia lom leh peh dia lom sahle lhang a kon hung kithah hohi Tribal Market New Lambulane akipat Chassad mun alhun nathei dia angaicha ijakai Security hihen ipi hileh KIM in hin kingaito jing ding ahi ati.

Hitoh kilhon chun muntin aum nam mite sum le pai hinpe nom hon Kamthang Haokip, President KKL  leh Nehgin Vice President KKL  toh kijahmat a KKL Account a nakiphalna kham kham sum le pai nahin thot jeng theiyu ahitai.

A/c No. 35122102631, KUKI KHANGLAI LAWMPI GHQ, IFSC code-SBIN0015027

Kamthang Haokip, President KKL 8974151325, Nehgin Vice President KKL 8787412384

KIM in Chassad kho hal a pang themmona nei jouse gotna peh dinga thumna nei

Imphal, Mar 17(ET): NSCN-IM leh Tangkhul mi phalou phabep in March 16 nikho a Chassad kho meiya ahal lhah nau thilsoh Kuki Inpi Manipur in kidang asah na le apohnat na thuso anei uvin ahi.

Gouminlun Gangte, Secretary, Information and Publicity in soi akaina thuso a chun, NSCN-IM hidinga ginmo ho civil dress a Chassad Kuki kho a Tangkhul khosung mi phabep toh cheuva, inmun a thil le lo ho asuhset uva chule in meiya ahal u ahi, ati. Tangkhul lamkaina NSCN-IM ho Chassad Kuki kho chunga akhanset nau hi mijousen adem dinga kilomtah ahi’in chule mei kihalna a panla jouse ‘booked’ bol a, dan dungjuiya gotna pehding ahi, ati.

Chule khosung kom tah a um a Assam Rifles hon amit mu uva thilsoh ho vendoh nadinga pan alah loujeh uva amaho chunga jong action kilomtah lah dinga Kuki Inpi Manipur in thumna aneibe uvin ahi. State sorkar, civil society organization chule gamsunga chamna ngailu jousen pan alahkhom a Tangkhul ho chule gal deiya NSCN-IM ho a kon Chassad Kuki kho venbit a chule tundoh kit nadinga pan alahkhom diuvin KIM in temna aneibe in ahi.

NSCN-IM tosotna a Kamjong Tangkhul hon Chassad kho ahal KSO, Delhi & NCR, ZPM, ZORO GHQ, MNPF leh CKWS in demna nei; themmona nei ho gotna peh dinga thumna nei

Imphal, Mar 17(ET):  Kuki Inpi, Delhi & NCR chule Kuki Students’ Organisation, Delhi & NCR in Kamjong leh Sampui kho mi Tangkhul hon India sorkar toh kihouna sem a thal choi NSCN-IM thingnoi ho tosotna a March nisim 16 ni a Chassad Kuki kho a school panna a inmun jakhat val meiya ahal nau thilsoh demna sangtah anei uvin ahi.

Chonchan gilou tah abol jeh uva numei chapang chule tehse panna a aja a sim chenna ding neilouva um ahi. Robin Letminlen, General Secretary, Kuki Students Organisation, Delhi and NCR in thuso aneina a, thilsoh demna sangtah aneiyin chule thilso namun a kon naicha a um Chassad kho a tou 42nd Assam Rifles chule Kamjong a tou Manipur Police hon kibuluna thilsoh vendoh nadinga pan lalouva, inmun ho meiya akihal sah jeh uvin demna sangtah jong aneiyin ahi.

Tohgon phatah a kisem masa a kibol thilsoh hi Tangkhul lamkaina NSCN-IM hon agon ahi’in, sun noiya hitobang khansetna thilsoh sangtah hi India sunga aum kha behseh lou ahi, ati. Tangkhul lamkaina a NSCN-IM hon 1990 khang a themmona neilou Kuki tamtah thisan aso na thilsoh ho tua hi athah a hing kit ahi.

Centre leh state a BJP sorkar in themmona nei, thilse bol ho FIR ajihkhum a, gotna apeh uva chule Tangkhul lamkaina NSCN-IM holeh Kamjong le Sampui kho mi Chassad  kho meiya hall ha a pang ho jouse chunga action alah diuva chamna ngailu a Kuki ho jouse thalheng a Kuki Inpi Delhi & NCR chule KSO Delhi & NCR in temna anei ahi, ati.

Vangsetna toh a chenna ding mun neilou Chassad khosung miho lhunna ding chule kithopina ho apet pet a apeh ding uva thuso anei nauva thumna anei uvin ahi. 42nd Assam Rifles a Commanding Officer chule Superintendent of Police, Chassad Police Station leh Officer-in-Charge in amaho umna mun a Tangkhul ho inmun meiya ahal sah thei uva, chamna ventup nadinga atohdiu atoh lou jeh uva apet pet a amaho suspend bol dinga jong thumna anei uvin ahi.

Akisei thumna hohi BJP sorkar in khohsahna apeh a achule aphat kitem sunga khosung asemphat kit uva, khonunga themmona neilou Chassad khosung mihon hitobang ato lou nadinga security apeh diuvin thumna aneiyu sorkar in abulhit louva ahile sorkar le thilse bol ho kithuto ahi tia kila ding ahi, tin KSO, Delhi and NCR thuson aseiyin, chule sorkar in gamsunga nam kikah a kinahna asolou nadinga apet pet a pan alah dinga aseibe uvin ahi.

Zoram People’s Movement in March nisim 16 ni a Kamjong district, Chassad Kuki kho meiya akihal na thilsoh demna thuso anei uvin chule sorkar in themmona neiho amat a chule dan dungjuiya gotna kilomtah apeh dinga thumna anei uvin ahi.

 Laldinpuia, Joint Secretary, Publicity Department, ZPM General Headquarter, Aizawl, Mizoram in thuso aneina a hitobang thilsoh khonung a alhun kit ding ZPM in adei pon chule thilsoh hi nam chom chom kikah a boina aso ding akidei poi, tin aseiyin chule state sorkar in thilsoh a vangsetna toh ho compensation alhingset a apeh dinga thumna jong anei uvin ahi.

Kamjong district mihon boina lampi adalhah a chule tua vannoi muntin a um Covid-19 natna a kon kivenna anei uva, nat douna dinga akigin jing diuvin jong temna anei uvin ahi.

ZORO office, Treasury Squad, Aizawl khopi a March 17 nikhon President R Sangkawia lamkaina a Manipur gamsung Chahsat Kuki kho meiya akihal thu a Zo Re-unification Organisation (ZORO) General Headquarter in ’emergency meeting’ abol uvin chule thilsoh demna anei uvin ahi.

Moses Lalramchhana, General Secretary, ZORO General Headquarters Aizawl, Mizoram in thuso aneina a  NSCN-IM thingnoi holeh Tangkhul khosung mihon Chahsat kho a sopi Kuki ho inmun le thil le lo ho meiya ahal uhi vangset umtah ahi, tin asei uvin chule themmona neiho natoh hi jachat umtah ahi, tin demna anei uvin ahi.

Vangsetna toh ho alunghempi uvin chule Manipur sorkar in themmona neilou khosung miho chunga khanse a adihlou bol ho amat a chule aganna thei pen a gotna kilomtah a apeh dinga temna aneiyin chule vangsetna toh ho compensation apeh dinga jong thumna anei uvin ahi.

Boina thilsoh a vangsetna toh Kuki sopi numei le pasal ho ZORO in ageldoh jing in chule ngaichat ahile organization in pan alah ding ahi, ati. ZORO hi Zo tribe jouse kiloikhomna ahijeh a hoilai mun hijong le kithopina ngaicha a Zo nam miho huhna dinga pan alah ding ahi, tin thuso chun aseibe in ahi.

Thingnoi kiloikhom Manipur Naga People’s Front MNPF in March nisim 16 ni a Chassad kho meiya akihal na thilsoh demna sangtah anei uvin, thilsoh a vangsetna toh ho pohnatna ahethem e, tin thuso anei uvin ahi.

“MNPF in a in chule thil le lo meiya kihal a vangsetna toh ho apohnat hu e”, tin Thomas Numai, Secretary Publicity in soi akaina thuso a asei uvin ahi. Chule Kamjong gamkaiya chamna aumna dinga lhang miho temna anei uvin, khonunga hitobang thil abol kit lou diuvin MNPF in temna aneibe in ahi.

Khopi 24 a Kuki Worship Service ho kiloikhomna Council of Kuki Worship Services(CKWS) in  Chahsad khosung a inn 200 vaal kihal lhah na chung a nopmo asah na u phondoh na ahin nei uvin ahi. Kiloikhomna in Christian ho sopi khat hina dol a boina jat chom chom ho hi Jesu Christa nungjui hina geldoh jing a kihou cham ding joh angai dan tahlang na ahin nei uvin ahi. CKWS in Manipur sung a thutah chepi mipi ho in thilsoh demna anei cheh ding uvin jong temna ahin nei uvin ahi. Govt In agan na thei pen a daan dungjui a mona nei ho gotna apeh ding uvin jong kiloikhomna in hetsah na le temna ahin nei uvin ahi.

Coronavirus jeh a India a thina toh mi 3 hita, Natna nei mi 137 lhingta; Gamdang a um gamsung miho aumthim diuva MEA in thuhilna nei

New Delhi, Mar 17: Government official thuso khat in aseina achun India gamsung a corona natna jeh a thi athum channa ding in Maharashtra gamsung a kum 64 a upa khat in Kasturba Hospital ah janhi chun amuollem tan ahi. Hiche natna jeh in Delhi leh Karnataka akon mikhat gel in thina ana toh tauvin ahi.

Health and Family Welfare Ministry in Tuesday nikhon India gam a COVID-19 case agom a 137 alhingtai, tin aseiyin ahi.

Alangkhat a External Affairs Ministry in India gam mi gamdang a umho ahithei chan a kholjin louva aumthim diuvin thuhilna aneiyin ahi. Dr Balram Bhargava, Director-General, Indian Council of Medical Research (ICMR) in March 17 (Tuesday) ni a thuso miho akimupi na a COVID-19 secondary test a dinga India gam a akimangcha lab 72 um ahi’in, tukal kichai teng lab 50 vel a test kibol pan ding ahitai, tin aseiyin ahi.

Ahin, BMC Commissioner Praveen Pardeshi in athi hohi COVID-19 jeh a bout hi ahi kiti le dihlou ding ahi, tin aseiyin ahi. “Uttar Pradesh gamsung Noida a case athah 2 akiseiyin, ani lhon a France gam a tu naicha kholjin lhon ahi”, tin Gautam Budh Naga CMO Anurag Bhargav in aseiyin ahi. March 18 a kon EU, Turkey leh UK gam a kon India gam a koima kholjin thei talou dinga kikhah ahitai.

Maharashtra gam a case athah 9 akisei toh kilhon a agom a case 41 lhing ahitai. Italy gam a Monday nikho a mi 349 athi be kit toh kilhon a natna jeh a thi 2,000 val ahitan, Spain gam a jong natna neiya 8744 lhing ahitai. Mun chom chom a Covid-19 jeh a thi 7,000 val ahitai.

WHO in Tuesday nikho a COVID-19 tobang natna (symptoms) neihon ahithei chan a ibuprofen kiti lou amaho hetna a amoh neh lou diuvin thuhilna aneiyin, hiche hi French authority hon virus akhohset sah thei ahi, tia asei jouvu ahi. ITBP (Indo-Tibetan Border Police) camp, Chhawla, Delhi a quarantine kibol holah a mi 2 Tuesday nikhon natna anei ahi photchen ahitan, ani lhon a safdarjung hospital a achon tauvin ahi.

Sorkar in Tuesday nikhon Covid-19 helpline number 011 243 00 666 chule email id: support.covid19-boi@gov.in hondohna anei tauvin ahi.

Akhil Gogoi in ‘bail’ amu jouva akimat kit nading thu kisei

Guwahati, March 17: National Investigation Agency (NIA) special court, Guwahati in Akhil Gogoi ‘bail’ apeh jouva Assam Police hon Sivasagar Chief Judicial Magistrate (CJM) court a mat dinga ngehna anei uvin, state authority ho tohgon um himaithei dinga ginmona um ahi.

Akhil Gogoi hin Tuesday ni a bail amu ahi’in, nidan phabep jouva Sivasagar le Gourisagar police hon lamkai pa kimat nadinga ngehna aneiyu ahi. Akhil Gogoi hi achesa December lha a Citizenship Amendment Act (CAA) douna a kiphinna abol jeh a kiman ahi’in, NIA special court in dangka 30,000 ‘bail’ apeh a lhadoh dinga nopna anei ahi.

Chule NIA hon chargesheet asemna dinga ni 90 phat pehbe ding jong court in asan peh tapon, ahivanga Gogoi bail akipeh thu a NIA hon alunglhai louna thu asei uvin ahi. Gogoi thalhenga ding advocate Jiaul Kamar in, “NIA hon chargesheet asemna ding phat kipe ni 90 kichai ahitan, hiche jeh a Akhil Gogoi in bail amu ahi. Kilhadoh vahding ahitai”, tin aseiyin ahi.

Court thutan douna a ngehna neidinga NIA hon asei ahi. Gogoi hi December lha a CAA douna a kiphinna asan laitah a kiman ahi’in, NIA hon KMSS (Krishak Mukti Sangram Samiti) lamkai pa chunga Unlawful Activities (Prevention) Act (UAPA) noiya hehna asem uva chule Maoist thingnoi hotoh kisaina neiya jong angoh u ahi.

Decemebr lha a kon Gogoi hi Assam gam bou hilouva muntin a kiphinna bol ho dinga kitilkhouna a pang ahi’in, Gogoi kilhadoh nadinga simlai, mipi chule organization tamtah in kiphinna abol jing u ahi. Gogoi ‘shown arrest’ hi Sivasagar police station case no. 1344/2019 u/s 120(B)/143/150/153/153(A)/157/158/183/188/291/431, chule Chabua police station 0289/2019,  u/s 120B, 147, 148, 149, 336, 353, 326, 307 toh kisai ahi.

 

Arunachal leh Dimapur a coronavirus jeh a ILP issue kibol talou ding

Itanagar, Mar 17: Coronavirus (COVID-19) natna akisei jing toh kilhon a Arunachal Pradesh sorkar in kivenna dinga agamsunga temporary ahilouleh provisional Inner Line Permit (ILP) chule e-ILP ho peh tahlou dinga kilolna anei tauvin ahi.

Sorkar in Tuesday nikhon gamsunga ILP chule e-ILP ho sodoh tahlou dinga ‘suspension order’ asodoh tan ahi. Hiche toh kilhon a gamsung chule gam pam a ILP sodoh a authority jousen order aum kit kahse a dinga ILP leh e-ILP ho aso be tahlou ding ahi.

Assam gam Dhemaji gamgi a um East Siang leh Lower Siang district administrative office injong Tuesday nikho a kon ILP ape tapouvin, Arunachal gamdang miho district a alut ding kiphal talou ahi. Hijong le Authority hon regular ILP renewal vang abol jom diu ahi. Vaipo hon gamsunga mipi ahon hon a akikhop louna dinga bazar nikho hojong akha ahitai.

Health department in Ruksin gate a gamdang a kon hung kile gamsung mi hojong screen abol pan tauvin, health official hon screening a ‘non-contact infra-red thermometer’ aman u ahi. East Siang district administration in Assam gamgi a um Dhemaji administration henga natna venna dinga pan alah khom diuva asei ahi.

East Siang Kaling Dai District Medical officer in Coronavirus chungchang a doctor phabep in ‘state level training’ a pan alah ahi’in, kichuhna nei doctor hohin medical staff, village level health worker chule Anganwadi worker ho dinga March 18 a kon phase-wise training apat diu ahi. Natgol, buhse le hai khoplou toh kisai natna nei aumle mipin mopohna neiho ahetsah diuva jong doctor hon thuhilna anei ahi.

Ruksin police station a posting hi a police hon district sunga lut ho chungchang thu, ache na hou dohna anei uvin, kithopina anei uvin chule administration in Covid-19 toh kisai thudoh neiho dinga helpline number-9436055743 jong hondohna anei tauvin ahi.

 Nagaland sorkar in memorandum asodoh toh kilhon a Deputy Commissioner Dimapur, Anoop Kinchi, IAS in gamsunga coronavirus nat venna dinga Dimapur district a um ILP counter jouse thuso aumkit kahse a kikhah ding ahitai, tin hetsahna aneiyin chule tua kon gamdang miho Inner Line Permit athah a kipe talou ding, DC Office, Dimapur a ILP renewal bou kibol ding ahi, tin aseiyin ahi.

Home Department order dungjuiya March nisim 18 nikho a kon order asodoh kit kahse a Foreign ahilouleh Domestic tourist ho Nagaland gam a alut ding kiphal talou ding ahi, tin jong hetsahna aneibe in ahi.

KSO, Imphal Branch in Chassad kho sung mipi ding’a kithopina adondoh ho thahpeh ta

Imphal, March 17 (ET) : Kuki Students’ Organisation, Imphal Branch in janni (March 16) nikho’a Kamjong District hopsung Chassad kho’a chengkhompi Tangkhul leh NSCN-IM kithokhom nanoi’a ngailutna beihel’a inn le lou, nei le gou jouse anahallhah nao chung’a Chassad kho sung mipi te kithopi nading in Imphal khopi a Veng jouse Youth Club leh Veng Haosa ho heng’a panpina anakithum in ahi tin President Thenkhomang Kipgen chun atahlang in ahi. Chuleh veng jouse akon khosung mipi te kithopi nading’a lou le ai, nihchen ponsil, neh le chah leh nitin kimanchah na’a angaicha phabep hung kitohdoh ho jouse Tribal Market, New Lambulane mun’a ana kithah khom in ahi ati.

Hiche toh lhon’a relief ading’a kidongdoh thil le lo ho jouse DI tata 3 leh 407 tata 1 ah Kuki Inpi Manipur, Kuki Inpi Imphal, KSO General Headquarters leh KSO Imphal in tunin Chassad kho chan anathah lhung tauvin ahi. Hiche nachung chon’a mimal atohnom nalai lai hon jong ama ama Youth Club/KSO Block leh Unit ho akijah mat pi uva kithopi naho hi bol jom jing ding injong tahlang na anei in ahi.

Koirengei Airfield a kon Army camp chondoh dinga state sorkar in centre henga seiding

Imphal, Mar 17(ET): Koirengei Airfield a kon military camp ho chondoh dinga Centre henga seiding a tohgon neiya Chief Minister N Biren Singh in Imphal East district a dinmun vetlhahna aneiyin ahi.

Airfield a um military camp hi Luwangshangbam, Khabam, Koirengei, Achanbigei leh adang dang toh naicha a um ahijeh a mipin camp chondoh dinga thumna anei na hi sot ahitai, tin CM in thuso miho akimupi na a aseiyin ahi. State sorkar official hon athu hi authority len ho henga asei ahi’in, mipi thumna tahso nadinga asei ahi, tin Union Defence Minister henga athu ahetsah dan aseiyin ahi.

Kihouna achelha jing in, state sorkar in akichon camp ho a dinga mun alhinga peh dinga kigotna anei ahi, tin jong aseiyin ahi. N Biren in Airfield chule akimvel ho dinmun hetthem nadinga avil thu aseiyin, tua hi kamu ahitan, military camp chon nadinga Centre henga kasei kit ding ahi, tin aseibe in ahi.

COVID-19 kivenna a ILP  kipe kikhah

Imphal, Mar 17(ET): Covid-19 kithe thang ding douna jeh in Manipur gamsung a inner line permit kipe April 15 chan khah hiding in Special secretary (Home) Gyanprakash in thuso abol in ahi. Hinlah alou theilou ahile bou issue bolpeh hiding in jong aseikit in ahi.

Hiche phat sung’a New Delhi, Kolkata, Guwahati chuleh ILP online portal hojong kikhongai ding chuleh District Deputy Commissioner holeh Deputy Labour Commissioner hon March nisim 20 nikho’a kipat Airport Police station, Jiribam police station, Mao police station, Zesami police station, Moreh police station, Behiang police station, Sinzawl police station ho’a ILP toh kisai natoh ho kivohai ding ahitai.