Chassad haosapu henga Tangkhul hon ‘kai’ anapeh a, Kuki gam ahi ti...

Chassad haosapu henga Tangkhul hon ‘kai’ anapeh a, Kuki gam ahi ti photchenna um ahi, tia NSCN-IM in Kuki te refugee ahi tia asei KIM in donbutna nei

248
0
SHARE

Chassad haosapu henga Tangkhul hon ‘kai’ anapeh a, Kuki gam ahi ti photchenna um ahi, tia NSCN-IM in Kuki te refugee ahi tia asei KIM in donbutna nei

Imphal, Mar 19(ET): March nisim 16 ni a Chassad khosung akibulu jou March 18 nikho a NSCN-IM Ministry of Information and Publicity in thuso anei chule alungput le apaocheng man hi Kuki Inpi Manipur gel tobang ahi, tin KIM in thuso anei uvin chule NSCN-IM hon thuso anei nauva ‘thutah’ tia asei houhi thusim dihtah chule official record hotoh kitoh lou, adih louva thuso kinei ahi, tin asei uvin ahi.

NSCN-IM ho thusei hin tohgon phalou aneiyu chule duha thuhtah a thusim amaho deibanga khel ding agot u asosal ahi. NSCN-IM hon amaho deibanga thusim jih phat ding avel vel a agot u hi mijousen ahet ahi. Akisemdoh uva kon ‘unique history’ brand a hi kisalel uva, Chassad khosung ‘official state record le document’ a kimu thutah hohi ahet louvu ahi. Thutah khat chu itahsan louvanga jou hideh lou ahi’in, achaina chan a thutah chu thutah hijing ahi”, tin Sominthang Doungel, Vice President (Political Affairs), Kuki Inpi Manipur in thuso aneina a aseiyin ahi.

Ukhrul district tia ana kihe Kamjong district a Chassad, Camp Zone hi Pache tia kihe a haosapu Lhunkhomang Haokip khosung ahi’in, amahi Aisan a kon tua Phek district, Nagaland chule Somla (Somra, Burma) chan a achesa 1917-1919 kum a Anglo-Kuki War anasat a Kuki haosa hetthei umtah mi 23 holah a khat ahi.

Tangkhul hohi Kuki gam hopsunga achom a cheng uva chule Kuki haosa ho henga kai (tax) le jana apeh u ahi’in, hiche jeh a nasatah a gal abol louvu ahi. Kuki ho douna dinga amaho hin British vaipo ho anajui joh ahi. British hon India adalhah kon a ‘history/political justification aumlou vanga amaho dinga apan jeh uva Tangkhul ho kipaman apeh ahi. Chassad gamkaiya um Tangkhul kho hohin Chassad haosapu henga kai ana peh u ahi.

Bongpa Tangkhul kho miho hi Somra Tract, Burma gam a um Nathalit (Tizu) vadunga kon Kacha Naga hon asuhmang diu akichat jeh uva hungdoh u ahi’in, Chassad Kuki haosapu in Ukhrul a achensah ahi. Bongpa Tangkhul injong kipa vetsahna a haosapu kai apeh a, jana apeh ahi. Thilpha tamtah abol peh u Tangkhul hohin tuchan a Kuki ho agam a kon nomang ding agot jing nahlaiyu ahi.

Rishang Keishing MLA akaidoh na Phungyar constituency hi atil a Phaisat Kuki kho ana kiti ahi’in, Tangkhul hon Kuki ho a kon alahpeh a Phungyar tia aminsah u ahi. Chassad ake jouva Sambui kho hi tua aumna mun akisemdoh pan ahi. KPM khanga Tangkhul ahijeh u chule langneina anei loujeh uva Chassad masanga achendiu aphal u ahi’in, ahivanga gam leiset chunga tha akipehna umlou ahi.

“M Case No 1387 of 1919-1920 a Peter in Pache gam leiset hi ama a kon kilahpeh louding ahivanga ahung kile kah a suh ong dinga asei ahi. Pache hi Kamjong haosapu hi a chule KPM sunga gal asat jeh a jail a um ahi. Hiche masanga Rithale Khullakpa, Sambui le anungjui hohi Chassad haosapu noiya cheng uva chule agam ujong Pache haosapu a ahi, tia hetpehna um ahi. Chassad leh Khoikai kikah a gam thu a boina anaum a hi Peter in Chassad gam a Khoikai kho mi phalna beiya gam chu a aumle songkul a kikoi ding ahi, tia anasei ahi, ati.

Case chom chom ni ahi’in, hiche teni a kon gam hi Chassad a ahi ti hetdoh thei ahi’in, Chassad ho Sampui gam hilouva Sampui Tangkhul hojong Chassad gam a cheng ahiu aphotchen ahi. Hiche jeh a Chassad haosapu in Khoikai kho a kon Chassad kho chan gam leiset thu a niseh thuso ipi hijong le thuso anei nom chan anei thei nadinga tha anei ahi’in, hiche chungchang a NSCN-IM le Tangkhul ho kikum loudiu ahi, ati.

RH Shaw, subdivisional Officer, East in “ Chassad gam ahi tia hetpehna umsa gam Sambui hon keiya ahi tia asei uhi hetpehna kanei theilou ding ahi. Chassad haosapu in agam sunga phailei abol nom chan abol nadinga tha anei ahi’in Rithale Khullakpa, Sambui in hiche chungchang a tha (right) aneipoi”, tia Order anaso doh jong KIM in atahdoh in ahi.

“Gam leiset koiya ahi hi documentary evidence um ahi’in, koiyin ‘lousan kai’ ape hem ti hetdoh thei ahi. British hon ana sodoh gam leiset lekha (land deed) hohi suhmang theiding kinepna a NSCN-IM hon Kuki ho in meiya ahal a chule jouva thuso anei diu hi Kuki hon kicheh tah a ahet ahi.

Achesa 1967 kum a Kabow Valley a Kuki 20000 vel hi Burma Military Junta hon Khadawmi Operation, 1967 a jamdoh a India gam mi ahiuve tia jouthu a ngohna asem ahi. Aumtalou MP anahi a Suisa jeh a Kuki hohin sorkar a kon ‘subsistence’ amu ahi’in, ahivanga kithopina ngaicha a amaho insung jeh a Kuki pumpi ‘refugee’ tia kisei hi thutah hilou, jou thu ahi. 917-1919 kum a kho neilou refugee hon British douna a gal abol louhel ding ahi. Tangkhul hon Kuki ho refugee ahi tia asei hi adihna ima umlou ahi’in, Tangkhul hohi Somra tract, Myanmar (Burma) a cheng nalai ahi, tin KIM thuso chun aseibe in ahi.

Chassad kho kihal Mizoram Ex-CM in demna nei

Aizawl, Mar 19(ET): Lal Thanhawla, Ex-Chief Minister, Mizoram, President MPCC  in achesa March nisim 16, 2020 nia NSCN(IM) leh Tangkhul hon Unao Kuki kholui tah khat Chaasad, Kamjong District a um melsetah leh vetlom lout ah a ahallhah naochunga alungnopmo na leh demna thuphong aneyin ahi.

Thisan kijompi unao Kuki ho phatkhat khat leh mikhutna bolgentheina umji alainatpi na aphontoh kilhon in hitobang thilsoh avel a alhunkit louna dingin deisahna thu jong aseiyin ahi.

Chassad khomite gentheina leh hesohna a kithopina din Lal Thanhawla, Ex- Chief Minister, Mizoram leh Lalmalsawma Ngaka, President, MPYCC in 407 truck khat dimset in neh leh chah Manipur Group YMA khutna ana pedoh in ahi.

35 AR hon NSCN-IM cadre 5 amat ho lhadoh nading’a DFO in bandh anabol

Senapati, Mar 19 (ET) : Senapati District hopsung Paomata Centre akon janni (March 19) nikho’a NSCN-IM cadre 5 Police hon anamat deilou vetsahnan District Frontal organization hon Senapati leh akimvel bandh anabol uvin ahi tin thulhut chun aseiye. Hetthei khat chu District Frontal Organisation hi Naga People’s Organisation, Senapati District Students’ Association leh Senapati District Women Association ho kigom khom’a kisemdoh hin NSCN-IM cadre 5 kiman ho nidan 12 kah’a lhadoh na ding’a ana phudoh’u  ahi.

Hiche toh lhon’a 34 Assam Rifles hon akimandoh NSCN-IM cadre 5 ho alhadoh lou jeh in CSO hon area sung’a sumkol veina jouse akhah uvin chuleh gari jong analhaisah pouvin ahi. State Government in akimanho nidan 12 kah’a condition imacha umlouva ahin lhadoh ding in Frontal body hon ngehna anei uvin ahi. Ijem tia temna kinei nahsah louva aum leh frontal body hon kiphinna kinei ding amopo vang Govt hiding ahi ati.

Board question ‘leak’ thu a kiman jilkung 2 police hon akithopi e, tia DESAM le AIMS in ngohna nei

Imphal, March 19 (ET): Democratic Students’ Alliance of Manipur (DESAM) le Apunba Ireipakki Maheiroi Sinpanglup (AIMS) in Thursday nikhon Board exam, 2020 ‘question paper ‘leak’ ahi thu a panla a jilkung ni Manipur Police hon ahuh uve, tin ngohna anei uvin ahi.

Question paper leak thu a hi jilkung thum tu le tua jail a um ahi. DESAM office a press meet abol nauva Alliance vice president Shital Oinam in MIL question paper leak ahijeh a vyber-crime unit hon jilkung thum amat jouva DESAM chule AIMS in hiche a themmona neiya jilkung ni amat be kit ahi, ati.

Jilkung teni hi Atao Rahman, Borayangbi Awang Leikai a cheng chule Lisham Robinson Singh, Thoubal Haokha a cheng ahi, tin Shital in aseiyin ahi. “Simlai kiloikhom tenin thu akhlna a jilkung teni hin question paper achoh lhon a chule dangka 40,000 a ajoh lhon kihedoh ahi”, ati. Jilkung teni akilhadoh nadinga police hon akithopi ahi, tin DESAM lamkai pa in aseibe in ahi.

MPCC team holeh CPI team hon Chassad kho vil; dinmun vetlhahna neiyu

Imphal, March 19 (ET): Manipur Pradesh Congress Committee (MPCC) in Thursday nikhon Chassad kho avil uvin, amun a thil umdan kholtohna anei uvin ahi.

Ache team holah a MLA Govindas Konthoujam le Okram Surjakumar jong apang in ahi. Chassad khosunga thilsoh hi Govindas in vangset umtah le pohnat umtah ahi, tin aseiyin chule PCC team hon Kuki le Tangkhul lamkai ho ache nauva akimupi uvin, chamna le lungmonna asem diuva temna akineiye, ati.

Nam lamkai hon gamkaiya chamna sem dinga kitepna anei uve, tin Govindas in aseibe in ahi. Nam kikah a chamna le lungmonna auma ahile khantouna umding ahi, tin Congress MLA pa in aseibe in ahi. “Kahung nau hi Chief Minister henga kalhut diu ahi”, tin aseiyin chule state sorkar in Chassad kho miho manna ho compensation abol ding akinepna thu aseibe in ahi.

‘Share and Care’ project, Mami Thawan Foundation le Maion Society in tunin Chassad a vangsetna toh ho kithopina ding a von ho Tribal Youth Club (TYC), New Lamlabulane henga apelut tauvin ahi. Mami Thawan Foundation chairman Romi Meitei in gamsunga nam chom chom lungmong tah a achenkhom angaidan thu aseiyin ahi. TYC general secretary Jim injong pan alah nau chunga kipathu aseiyin, kingailutna apunsah ding ahi, ati.

Alangkhat a, Communist Party of India (CPI) Manipur State Council Secretary L Sotinkumar in Thursday nikhon BJP lamkaina a kum thum lhing gamsunga sorkar akisem sunga Kamjong district khantouna ding hi akigel khohpoi, tin aseiyin ahi. Hiche masanga CPI team hojong Kamjong district a um Chassad kho a cheuva, dinmun vetlhahna anei uva chule hiche chungchang a Irawat Bhavan a press meet jong abol u ahi. Chassad thilsoh hi tua sorkar themmo chan ding ahi, tin Sotinkumar in aseiyin chule Kamjong district a tuchan geiya ‘fire service’ panna a government office khoh khoh ho umlou lai ahi, ati.

In meiya kihal lhah peh a Chassad kho mi vangsetna toh jouse sorkar in compensation apeh dinga Sotinkumar in aseibe in ahi. Hetthei khat chu March nisim 16 nikho a Chassad kho a in 150 val NSCN-IM in atosot Tangkhul hon meiya ahal lhah a chule thil le lo tamtah jong asuhset u ahi.

 

Mizo Students Union le Zillai in Chassad kho kihal demna nei; khosung miho sorkar in venna apeh dinga thumna neiyu

Imphal, March 19(ET): Mizo Students’ Union (MSU) General Headquarters, Aizawl in achesa March 16 ni a Kamjong district, Chassad kho meiya akihal na thilsoh demna anei uvin, themmona neilou ho chunga khansetna hi ‘human rights’ kipalkeh na ahi’in chule angaicha louhel a nam kikhenna sohthei ahi, ati.

Zo nam ho kipunkhomna dinga thakhat akihi tin MSU in avel a aseikit in chule thilsoh a themmona neiho gamsung dan dungjuiya gotna khoutah peh dinga thumna anei uvin chule vangsetna toh insung ho sorkar in compensation apeh dinga jong thumna anei uvin ahi. India sorkar in hiche thu agelkhoh a chule North East India a chengkhom nam chom chom ho kah a chamna aumna dinga pan alah ding a MSU in thumna sangtah anei uvin ahi.

Zillai (Vaiphei Students Association) General Headquarters injong March 16 nikho a Chassad kho meiya akihal thu ajah kidang asahna thu asei uvin ahi. “School panna a inmun 150 vel chule gari 10 tobang meiya kihal lha soh ahi ti thu akija in, insung thil, kong le bel, sil le chen, ponsol chule adang tamtah jong kisumang ahi”, ati.

Chassad khosung a thilse kibol hi thet umtah ahi’in, akom cha a security umna a hitobang thilsoh alhun hi thet umtah ahi. Hitobang chonna hi masang khang a anaum ahi’in, 21st century a hitobang aso nahlai hi lungdon umtah chule lunggel thei jousen adem dinga lomtah ahi, ati.

State sorkar in khosung miho venna alhinga apeh ding chule khosung kithah semna dinga amangsa thil ho toh kitoh a compensation apeh diuvin Zillai hon sorkar henga temna anei uvin ahi. Chenna ding mun neilouva um khosung miho kithopina dinga mijousen pan alah a, ngailutna anei diuvin association in temna aneibe uvin ahi.

KKL  GHQ leh KSO GHQ makai na’a muntin na Chassad khomite kithopina chelha jing

Mangneo Touthang

Imphal, March 19 (ET): Chassad khopi kihalvam thilsoh deilouna CSO jat chom chom leh Students kiloikhomna chom chom in Government leh vannoi het ding’a thuphon anei utoh lhon in lam chom chom’a Chassad khomite kithopi na ding in Fund drive leh donation abol jing lai uvin ahi.  Hiche ho jouse hi Relief & Rehabilitation mopoh nanei KKL leh KSO GHQ hon vetsuina anei jing uvin ahi. Tuni jong YMA Manipur hon jong Chassad khomite ngailut vetsahnan anchang bag 80, dal bag 10, chini bag 10 leh Newtralia bag 10 chuleh K. Salbung khomite akon in jong Dk. 12,500/-, anchang Kg. 132, dal bag 2, chi bag 1, chini bag 1, sil le chen, ponsil chuleh insung thilkeu angaicha ho jouse KKL GHQ ho khut’a pehdohna ananei uvin ahi. Chu naban’a Kangpokpi KBC hon jong sum le pai nei le gou anadong khom kit uvin ahi.

Hiche toh lhon’a Ngachomi Ramshang Social Worker le a Inneipi injong Chassad vilna ananei lhon in hiche achun khosung mipite kithopi na in anchang bag 42, blanket 102, dal bag 2, ahlu bag 2 leh angaicha phabep ana pelhon in ahi. Chuleh khosung kihallhah nachung’a vetset umtah chaloh nanei ajat mi Tangkhul ho chung’a alungnopmo nathu aphongdoh in ahi.

Alangkhat’a Tangkhul led NSCN-IM thusah najal’a Kamjong mite leh Sampui khomite kitho’a Chassad khopi anahallhah nao chung a Kuki namsung’a simlai kiloikhomna jat chom chom tichu Gangte Students’ Organisation, GHQ, Simte Students (SSO) GHQ, Zou Youth Organisation GHQ, Young Vaiphei Association akon kithopina aum naban jom’a Delhi, Pune, Hyderabad, Bangalore chule mun chom chom’a um Kuki chate hon abol thei chan Chassad khopi letundoh kitna ding leh khomite khoto najal in sum le pai dong khom in donation leh fund drive ho abol jing uvin ahi.

 

Kipgen Phungpi leh KKK in Chassad vilna nei; Kipgen Bulpipan anaopa Haokip Bulpipa vang thumpehna nei

Mangneo Touthang

Imphal, Mar 19(ET): Achesa March nisim 16, 2020 nikhoa Kamjong te leh Sampui khomite kithoa hallhah’u Haokip Bulpite kholui Chassad kho kihal lhahna chunga tunin Kipgen Bulpipa Mangkhosat Kipgen, Leikot jaonan Kipgen Phungpi (KP) leh Kipgen Khangthah Kiloikhom (KKK-GHQ) in Anaopa Haokip Bulpipa Chassad kho vilna aneiyun ahi.

Hiche sung chun Mangkhosat Kipgen Bulpipan, Anaopa khosahna Chassad kihal thua alungnop louna leh alunghempina thuphon aneitoh kilhon in Anaopa Thangjahao Haokip Bulpi Chassad pa phatheii bohna leh Pathen henga taona jong ana man peh in, masang’a sang nga phajo le hoijo chuleh Bulhing jo a Chassad khopi athahbeh’a tundoh ahitheina ding in vang anathumpeh in ahi.

Kipgen phungpi President Chongpu Kipgen in jong khole veng kihal thua insung miten alainatpi nau leh apohnatnau ana phondoh toh kilhon in, Insung miten setvetnan Dangka 1,00,000/- ana pen chule Phungpi min a relief thil ijakai ho pehdohna jong ana neiyin chuleh Kipgen Khangthah Kiloikhom (KKK-GHQ) in jong Dangka 50,000/- in kithopina anapeuvin ahi.

Pendol’a aupa Leikot pan khankho dol’a ahungvilna chunga ama le ahin kilhonpi Kipgen Phungpi leh KKK ho chunga Haokip Bulpi Thangjahao Haokip Chassad pan kipathu ana seijin chuleh ngailut Ankong ana sohkhompin ahi.

Kipgen ten anaopa Haokip bulpipa kho Chassad vilna kin a chun Kipgen Phungpi SEA, Kipgen Khangthah Kiloikhom General Headquarters le Branch ho, Kipgen Hou Lhacha ho, Leikot Area Chief Association, Leikot Area Youth organisation Lamkai hole Kipgen Insunga Social Worker hon jong pan analauvin ahi. Chassad kho Khonunga adamthei nadiuvin Maicham sempeh na jong ana nei uvin ahi.

 

Coronavirus a kon kivendohna dingin JNIMS in kigotna jatchom chom akineiye tia: Medical Superintendent

Imphal, Mar 19(ET): Coronavirus natna a kon kivenna ding’in JNIMS in kigotna ho akinei tai tin JNIMS a Medical Superintendent Professor Dr. T Rajen in aseiyin ahi. JNIMS a Microbiology Department noiyin viral research & Diagnostic Laboratory (VRDL) kiti coronavirus natna photchet theina centre khat akihongdoh in, hiche centre hi India pumpia kihongdoh centre 52 lah’a khat ahin chule hiche centre a test kibol ho jong phat sot lut louva result mupai thei hiding ahi tin aseiyin ahi.

Dr. T Rajen in aseibena ah Casualty Ward leh OPD a Flu clinic khatcheh akihongdoh tan, koitobang buhse khosih veiho hiche clinic a jenthei hidiu ahi ati. Isolation Ward a doctor 4 leh nurse 4 akinganse in, natna a kon kivendohna thei thilkeu hojong ninglhing sel’in akikoiye ati. Coronavirus natna lou (vaccine) kisemdoh loulai ahijeh’a amitakip kivengpha ding’in athuhilna aneiyin chule tulai guideline imacha kisem loulai ahijeh’a hospital a hung kipolut jouse screen kimoh bolthei kitlou ahi tin jong aseiben ahi.

Alangkhat a Coronavirus natna a kon kivenna a Government in themjilna mun jouse suty alha a mi tampi kipunkhomna kingon ho jong akha vang’in JNIMS OPD a guideline akisem loulai jeh’in imacha abolthei kit pouvin ahi. Hiche hospital a Infra-red thermometer umjongle hospital a ahung jouse screen abolthei deh pouvin ahi.

COHSEM noiya themvetna phatep louva kivochon

Imphal, March 19 (ET): Coronavirus natna akon kivendoh na ding leh Ministry of Human Resource Development thupeh dungjui’a tulai Council of Higher Secondary Education Manipur (COHSEM) noi’a pol 11 leh 12 themvetna theory leh practical March nisim 20 akipat 30 sung’a kibol ding chu March nisim 31 nikho jou’a bol hita ding in COHSEM Secretary in hetsah thuphon aneiyin ahi. Chuleh themvetna hohi March nisim 31 jouva Council in thu le la vetchilna ahin nei jou teng avel’a hetsahna kinei ding ahi ati. Hiche naban’a March nisim 31 chan Council noi’a themvetna holeh evaluation kibol ho jong kikhongai ding ahitai tinjong aseibei.