Chandel leh Tengnoupal a Naga kho khatcha aumpon, Old Kuki leh New...

Chandel leh Tengnoupal a Naga kho khatcha aumpon, Old Kuki leh New Kuki kho bou um ahi, tia CNPO leh NSUC in Kuki ho Refugee ahi tia thuso anei KReF, KCA leh KSO, Tengnoupal in donbutna thuso nei

1329
0
SHARE

Chandel leh Tengnoupal a Naga kho khatcha aumpon, Old Kuki leh New Kuki kho bou um ahi, tia CNPO leh NSUC in Kuki ho Refugee ahi tia thuso anei KReF, KCA leh KSO, Tengnoupal in donbutna thuso nei

Imphal, Nov 8(ET): Chandel Naga People’s Organisation (CNPO) leh Naga Students Union Chandel (NSUC) in achesa October nisim 30 nikho a niseh thuso phabep a ‘Kuki hohi Refugee ahiuvin chule Tengnoupal-Chandel district a Anglo-Kuki War 1918-1919 aumpoi’ tia asei uva chule 1930 khang a kho kinai haosa ho kah a Court case umthu a thuso anei KReF, KCA chule KSO, Tengnoupal district in donbutna thuso anei uvin ahi.

Kuki thusim, gamsung mi dihtah ahina chule thutah ahina hohi Northeast India leh Tengnoupal, Chandel a 1977 kum kichaiya kon kipe ahi, tin Kuki Reformation Forum (KReF), Kuki Chiefs Association (KCA), Tengnoupal district leh Kuki Students Organisation (KSO), Tengnoupal district in aseiyin ahi.

Kuki kiti thucheng hi 33 AD (The Royal Chronicles of Meithis) a kon kisei pan a Geographer Claidius Ptlomey (90-165 AD) sunga avel a kisei kit a chule 17th century a kon Kuki ho gamhi India, Myanmar/Burma leh Bangladesh gam kikah a aume tihi kisei ahi’in, tuni a um India leh Manipur anaum masang ahi. Hiche phat laiya India gam hi lenggam tamtah a kivaipo ahi’in, Kangleipak lenggam hi 700 sq miles aumin, Manipur state umlou, hiche hi Janaury 21, 1972 kum a kon a bou Outer Manipur Hilly region, Khongjai Kuki leh Thadou Kuki chule Chingburois leh amaho leh amaho kidou Kacha Naga phabep ho kilakhom a kisem ahi, ati.

Kacha Naga hon Kuki ho henga venbitna athum uva, Kuki honjong anaventup u ahi’in, kipathu sei sanga ahilouva thu akhel u ahi, ati. Chule Anglo-Kuki War chungchang jong asei uvin, 1917-1919 kum a India leh Burma gam a British douna gal ‘Kuki Rebellion 1917-1919’ ana kidou ahi’in, 1977 leh 1880 khang a Kuki Rising um ahi’in, gam hin lokhum a International, National leh local writer (Cool J Shakespeare, 1912) hon ajih uhi velsei ngailou ahi, ati.

Anglo-Kuki War hi kum thum kijom a Kuki galhang hon asat ahi’in, Chakpikarong Sub-division noiya um (tua Chandel) Lonpi kho a Lonpi @ Mombi conclave anaum hi British sepai hon October 17, 1917 kum a ahal lhah Kuki galhang ho dinga Fortified Conclave masapen ahi. British hon tua Tengnoupal district a um Sita Kuki kho a Fortified Conclave vang ahal but louvu ahi.

‘Khongjom War’ tia kihe Anglo-Manipur War 1981 hi British Empire leh Manipur lenggam kidouna ahi’in, March 31 a kon April 27 1891 chan um a, British hon gol ajo ahi. 1939 kum a Nupi Lan kiti gamsung mi numei hon Manipur lengpa leh Political Agent Gimson douna a anasat gal jong um ahi, ati. Kuki ho Refugee ahi tia seijing a nam hon mun phabep a ‘Statue of Slavery’ (soh channa ) jong atahdoh u ahi’in, hiche chungchang thu a KReF in British Monarch Crown, Queen Elizabeth II leh UK Prime Minister Boris John henga October nisim 29 nikho a ‘War Compensation’ a dinga memorandum apehlut a chule memorandum copy hi India PM Modi, Home Minister Amit Shah leh Chief Minister N Biren jong apeh u ahi.

Meilhei ho lenggam ‘Kangleipak’ hi Indian Union a September 21, 1949 kum a kilalut ahi’in, Kuki haosa ho alunglhai loujeh a Kuki galhang 250 in adou ahi’in, ahivanga India sorkar anan joulou jeh a Meilhei te leng Maharaja Bodha Chandra in Merger Agreement soi kaina anei ahi. Thinglhang gam hohi British hon achombeh a avaipoh ahi’in, Vice President, British Officer in Hill avaipoh ahi. Manipur State Darbar jurisdiction in thinglhang gam ahop thalou chule Hill Bench jong achombeh a um ahi.

Old Kuki leh New Kuki hon ani a Khul/Khur/Khurpui ahilouleh Singlung/Chhinlung a kon kahiuve tia aseiyu ahi’in, thucheng hi Kuki-Chin pao a mun kibang tina ahi’in, Zeliangrong lah a um ‘Inpui Tribe’ pao toh jong kibang ahi. In hi inn (house tina ahi’in, Pui hi lentah- In lentah tina ahi. Kuki-Chin pao hi Naga tribe ho pao toh akibahna umlou ahi. Tangkhul hohin akho kho a pao chom chom aneiya Ukhrul pao hi ‘Common Language’ a aneiyu ahi.

Adeh a Manipur gam a Kuki tribe 22 (tua Mate leh Any Kuki panna a 24) um ahi’in, TC Hodson (1906), Col J Shakespear (1912) leh adang dang injong ajih ahi. Old Kuki a hi Aimol, Anal, Chiru, Koirao/Tarao, Koireng, Kom, Lamkang, Maring, Monsang, Moyon leh Purum pang a chule New Kuki a hi Chothe, Gangte, Hmar, Lushai, Paite, Ralte, Simte, Sukte (Tedim Chin), Thadou, Vaiphei, Zou, Mate, Any Kuki Tribe (AKT) pang ahi.

Old Kuki tribe a um phabep in Manipuri-Naga polity ajop uva, pao leh ham, chon leh khan a Kuki ahinau thutah asuhmil u ahi. Ng Mono Monsang hi 1946-47 kum a Imphal khopi a anaum Kuki National Assembly (KNA) a Executive member anhi a Khulmi Union (1947-48) a jong pang ahi. Chomkhat jou 1948 kum a Tengnoupal AC a kon MLA member masapen dinga kilhengdoh ahi. Tengnoupal district headquarter Chandel a kichon a Tengnoupal district jong Tangkhul Naga Chief Minister Rishang Keishing in May 13, 1974 kum a Chandel a akhel ahi. Mi kitah tah Prof Gangumei Kamei in Old Kuki minor tribe (Tengnoupal a kon) hohin Naga Polity ajop ahi, tihi hangsan tah a asei ahi.

Akisei Old Kuki tribe hon NSCN-IM ho bulhingset a atosot pouve, tihi thutah ahi’in, Old Kuki tribe min a um thingnoi kiloikhomna phabep hi Kuki Nation Organization (KNO) a beh ahi. Amaho hi United Komrem Revolutionary Army (UKRA), Aimol, Chiru, Chothe leh Kom tribe hohi C-in-C, UKRA KT Kom a beh ahi. UMLA (United Minority Liberation Army kiti Maring, Moyon, Monsang leh Purum tribe lamkai K Khalin chule H Don Anal, C-in-C, Pakan Re-Unification Army (PRA), Anal leh Lamkang jong pang ahi.

October 18, 2019 chan a state sorkar record dungjuiya Chandel sub-division a kho 96 um a, Old Kuki kho 91 chule New Kuki kho 05 um ahi. Chakpikarong ub-division a kho 105 lah a Old Kuki kho 43 leh New Kuki kho 62 um ahi. Khengjoi Sub-Division a kho 63 hi New Kuki kho ahi’in, Chandel district a Old Kuki tribe (Aanal, Lamkang, Moyon, Monsang leh adang dang) kho agom a 134 um a chule New Kuki (Thadou, Khongsai, Mate, Zou leh adang dang) kho agom a 112 um ahi.

Tengnoupal sub division a kho 99 lah a Old Kuki kho 34, New Kuki kho 64 chule Kwatha- Scheduled Caste kho 1 um ahi’in, Machi Block a Old Kuki kho 41 leh New Kuki kho 29, agom a kho 70 um ahi. Tengnoupal district sunga Old Kuki kho 75, New Kuki kho 93 agom a 169 um ahi.

 Manipur gam a cheng Kuki ho Naga ahi tia kisei hi hetna lhahsamna ahi, tin asei uvin ahi. British hon December 18, 1919 kum a Kuki ho ajo uva hi tamtah songkul a akoiyu ahi’in, Kuki haosa galhang ahom a 22 jail a akoi uva, haosa 11 hi Manipur a kon Sadiya Jail a asol uva chule Burma a haosa 11 hi Taunggyi jail, Burma a akoiyu ahi. Chomkhat jouva abon uva kum thum leh kum li cheh Andaman & Nicobar jail a akoiyu ahi. 1947 kum jouva India leh Burma in British vaipohna a kon chamlhatna amu jouva Kuki nam hi India, Burma leh Bangladesh gam a akhen u ahi.

1967 kum a Burma sorkar in Revolutionary Council (U Newin) lamkaina noiya ‘Khadawmi Operation’ hi Kuki ho douna a abol uva tua Burma a um Kuki ho chenna phabep jong anodoh u ahi. Akinodoh hohi tua Manipur Kuki gamkai a um u ahi. CNPO leh NSUC in October nisim 26 nikho a Kuki Refugee Relief Payment thu asei hin 1967 kum ‘Khadawmi Operation 1967’ toh kisaiya achenna mun a kon kinodoh ho thu toh kisaina aneilou ahi.

Akisei payment hi India sorkar in Rani Gaidinliu noiya Kacha Naga Upring a panlah jeh a Kacha Naga ho apeh ahi’in, thusim adih louva hilchen them uva Rani Gaidinliu hi Kuki Rising 1917-1919 lamkai a aseidoh u ahi. Kuki hohin adei dei nau gam a chenna dinga thaneina aneiyu ahi’in, nam dang boina ding ahipoi, ati.

India sorkar leh state sorkar chule Tengnoupal district pumpi (tua Tengnoupal leh Chandel a kikhen) in gam leiset hi Old Kuki kho 134 leh New Kui kho 112 (Chandel district a) chule Old Kuki kho 75 leh New Kuki kho 93 (Tengnoupal district) a achennau ahi’in, district teni a Naga kho umlou ahi tihi kiseiya kihahselna kinei ahi, tin thuso chun aseiyin ahi.

Kuki Rising (Anglo-Kuki War) lamkai hi Kacha Naga hi a Rani Gaidinliu lamkaina a kisei hi Kuki thusim, Kukite chule gam leiset kilahpeh a Kuki ho kitha na ahi. Old Kuki tribe hohi Tangkhul Missionery hon langkhat a Bible mang a chule NSCN-IM hon alangkhat a meithal leh thisan mangcha a 1960 khang a Manipur Naga Polity amanchah uva akailut u ahi.

CM anahi Rishang Keishing in Tengnoupal district headquarter Chandel a akhel a district min jong Tengnoupal a kon Chandel a akhel hi Old Kuki leh New Kuki ho gam lahpeh nading tohgon ahi’in, lungthim phalou tah duha anei jeh a 1997 kum a Churachandpur a Paite-Thadou tribe kikah a gal anaum ahi. ‘Nagaland For Christ’ thupi a NSCN-IM hon United Naga Council hohi thal choilou Kuki kho hon September nisim 15, 1993 kah a Kuki hon ama ama kho adalhah nading uva thuso pe (Quit Notice) pe dinga thuhilna apeh a, ahivanga khosung hin dalha a Kuki kho mi themmona neilou mi 100 val September 13 nikho a atha kit ahi. Numei atamjo panna a Kuki numei, chapang, tehse leh chatmo 1149 hi melsetah a NSCN-IM hona tha a, lakh khat val chenna ding mun neilouva akoiya chule Manipur gam a Kuki kho 360 val meiya asuhmang u ahi, tin thuso chun aseibe in ahi.